महापालिकेच्या परिवहन उपक्रमातंर्गत प्रवासांच्या सोयीसाठी ई तिकिटींग यंत्रणा, मोबाइल अॅपव्दारे तिकीट व पास विक्री, बसमधील जीपीएस यंत्रणा लवकरात लवकर कार्यान्वित करण्याच्या सूचना परिवहन समिती सभेत करण्यात आल्या. सभापती नियाज खान यांच्या अध्यक्षतेखाली परिवहन समितीची सभा झाली.
बिंदू चौक येथील पे अँड पार्क योजनेसाठी मागविलेल्या निविदामधील जादा दराची श्रीमती भारती माने यांची निविदा मंजूर करण्यात आली. तसेच शहरांत बीओटी तत्त्वावर उभारलेल्या शेडससंबंधीच्या करारात सुधारणा प्रस्तावास मान्यता देण्यात आली. नगरसेवकांनी प्रवाशांची गर्दी असणाऱ्या लुगडी ओळ, समाधान हॉटेल, मध्यवर्ती बस स्थानक परिसर, पाडळकर मार्केट या थांब्यावर वाहकाव्दारे स्टॉप बुकिंग सुरु करण्याच्या सूचना केल्या. दोन मार्चपासून स्टॉप बुकिंग उपलब्ध करण्यात येईल, असे अतिरिक्त व्यवस्थापक संजय भोसले यांनी सांगितले.
प्रशासनातर्फे लवकरच ५० चालकांची कंत्राटी तत्त्वावर नियुक्ती करण्यात येईल, असे सांगितले. नगरसेवक सचिन पाटील यांनी बसमधील डिझेल संपण्याच्या प्रकाराबाबत विचारणा केली. चालकांच्या अनुपलब्धतेमुळे वीस बसेस बंद ठेवाव्या लागल्याबाबत सदस्यांनी नाराजी व्यक्त केली. नगरसेवक शेखर कुसाळे व चंद्रकांत सुर्यवंशी यांनी दैनंदिन प्रवासी उत्पन्नातील त्रुटींबाबत तीव्र नापसंती व्यक्त केली. चर्चेत नगरसेवक प्रविण केसरकर, सुनंदा मोहिते, लाला भोसले, शोभा कवाळे, विजय खाडे, उमा बनछोडे, सयाजी आळवेकर, सुहास देशपांडे यांनी सहभाग घेतला. यावेळी स्थायी सभापती संदीप नेजदार यांचा सत्कार करण्यात आला. नगरसचिव दिवाकर कारंडे उपस्थित होते.
...........
अनधिकृत प्रवासी वाहतुकीवर कारवाई करावी
शहर व उपनगरातून केएमटी थांब्यावरुन तीन व सहा आसनी रिक्षांकडून मोठ्या प्रमाणात अनधिकृत प्रवासी वाहतूक केली जाते. अशा वाहनांवर कारवाई करावी या मागणीचे निवेदन नगरसेवकांनी, वाहतूक नियंत्रण शाखेचे पोलिस निरीक्षक अशोक धुमाळ यांना दिले. त्याचबरोबर माधुरी बेकरी ते देवल क्लब या एकेरी मार्गावर व रेल्वे स्टेशन परिसरातून केएमटी बसेसना प्रवेश देण्यात यावा. छत्रपती शिवाजी चौक, लुगडी ओळ, गंगावेश, समाधान हॉटेल या थांब्यावरुन मोठ्या प्रमाणात अनधिकृत प्रवासी वाहतूक होत असल्याचे त्यांनी निदर्शनास आणले.
मोबाइल अॅप डाउनलोड करा आणि राहा अपडेट
