म. टा. प्रतिनिधी, कोल्हापूर
कळंबा फिल्टर हाऊस प्रभाग हा सर्वाधिक कमी लोकसंख्येचा प्रभाग. यामध्ये संमिश्र लोकवस्ती आहे. एकीकडे बंगले, अपार्टमेंटधारक, मध्यमवर्गीय लोकवस्ती तर दुसऱ्या बाजूला झोपडपट्टी आहे. त्यामुळे प्रत्येक भागात समस्या वेगळ्या आहेत. प्रभागात ठिकठिकाणी महापालिकेच्या मालकीच्या जागा आहेत. त्या विकसित झाल्या तर नागरिकांच्या शाळा, बागा या मागण्यांना मूर्त स्वरूप लाभेल. या प्रभागात काम करण्याची संधी मोठी आहे. योग्य नियोजन, निधीची सांगड घालून काम केल्यास प्रभागात सुविधा सहजरित्या उपलब्ध होऊ शकतील. नागरिकांच्या विकासकामांच्या मोठ्या अपेक्षा आहेत. विद्यमान नगरसेविका व महिला बाल कल्याण समिती सभापती वृषाली कदम यांच्यासमोर त्या पूर्ततेचे आव्हान आहे.
दुसरीकडे या प्रभागात मैल खड्डा परिसरात महापालिकेच्या मालकीची सुमारे १८ एकर जागा आहे. या जागेवर प्रशासकीय इमारत बांधण्याचा प्रस्ताव आहे. त्यासाठी आराखडा तयार आहे. प्रशासनाने, इमारत बांधणीसाठी निधी मिळावा म्हणून राज्य सरकारकडे पाठपुरावा सुरु केला आहे. नव्या इमारतीसाठी पाठपुरावा सुरु असताना या जागेकडे मात्र प्रशासनाचे दुर्लक्ष झाले आहे. निर्माण चौक परिसरातील मैल खड्डा जागेवर अतिक्रमण वाढत आहे. चायनिज सेंटरच्या नावाखाली जागा व्यापली गेली आहे. वाहने पार्क केली जात आहेत. त्याकडे अधिकाऱ्यांचे दुर्लक्ष आहे. अतिक्रमणांच्या विरोधात कारवाई होताना दिसत नाही. प्रभागात एकही बाग नाही. महापालिकेच्या मालकीची शाळा नाही. बालाजी पार्क, म्हाडा कॉलनी, ताराराणी कॉलनी, मैल खड्डा परिसरातील मुलांना शाळेसाठी नेहरुनगर व जरगनगर विद्यामंदिर येथे जावे लागते.
गेल्या वर्षी काँग्रेसच्या वृषाली कदम, भाजपच्या शीतल रामुगडे, राष्ट्रवादीच्या अलका कांबळे आणि शिवसेनेच्या वैशाली कांबळे अशी चौरंगी निवडणूक रंगली. यामध्ये काँग्रेसच्या कदम या विजयी झाल्या होत्या. प्रभागात बालाजी पार्क, नंदनवन कॉलनी, शिंदे अंगण, सासने कॉलनी, सासनेनगर, निर्माण चौक, झोपडपट्टी परिसर, शाहू वसाहत, शाहू कॉलनी, महालक्ष्मी पार्क परिसराचा समावेश आहे.
विद्युत वाहिन्यामुळे धोका
शाहू कॉलनी मंडळ, बालाजी पार्क चौक येथील मुख्य रस्ता उखडला आहे. म्हाडा कॉलनीत गटर्सची दुरवस्था झाली आहे. सांडपाण्याचा निचरा होत नाही. ताराराणी कॉलनी येथे काही ठिकाणी रस्ता व्यवस्थित आहे, काही ठिकाणी रस्ता खराब आहे. महालक्ष्मी पार्क, शाहू कॉलनीकडील ओढ्याकडील बाजूला संरक्षक भिंत बांधण्याची आवश्यकता आहे. पावसाळ्यात या बाजूकडील घरांना पाण्याचा धोका वाढतो. सापांची भीती असते. सासने कॉलनीत रस्ता उखडला आहे. आमदार, महापालिकेच्या निधीतून भागात काही ठिकाणी रस्त्यांची कामे झाली. प्रभागात सर्वात जास्त म्हाडाची घरे आहेत. तेथेही ड्रेनेजची दयनीय अवस्था आहे. घरे दाटीवाटीची आहेत. घरावरून विद्युत वाहिन्या गेल्या आहेत. यामुळे नागरिकांना बांधकाम करता येत नाही. विद्युत वाहिन्या जमीनीखालून टाकण्याची नागरिकांची मागणी आहे. माजी गृहराज्यमंत्री सतेज पाटील यांच्या कालावधीत यासंदर्भात सकारात्मक चर्चा झाली. नंतर काहीच झाले नाही. मैलखड्डा येथील झोपडपट्टी परिसरात अनधिकृत झोपड्या अधिक आहेत.
सभागृहाभोवती भिंत, बालोद्यानही हवे
सासने कॉलनीत माजी आमदार महादेवराव महाडिक यांच्या निधीतून व्यायामशाळेसाठी इमारत बांधण्यात आली. सध्या ही इमारत बंदच असते. येथे व्यायामाचे साहित्य नाही. लगत मोकळी जागा आहे. तेथे बालोद्यान साकारू शकते. सध्या लहान मुलांना खेळण्यासाठी तीन खेळणी उपलब्ध आहेत. मात्र मैदानाचे सपाटीकरण, संरक्षक भिंत आवश्यक आहे. दिवंगत माजी खासदार सदाशिवराव मंडलिक यांच्या फंडातून बालाजी पार्क परिसरात हॉल उभारण्यात आला. तेथेही संरक्षक भिंत, पिण्याच्या पाण्याची सुविधा व समारंभासाठी आवश्यक सोयी दिल्यास ते उपयुक्त ठरेल.
शहराची झपाट्याने होणारी वाढ पाहता प्रभागात मैलखड्डा येथील जागेवर महापालिकेची प्रशासकीय इमारत होणे गरजेचे आहे. प्रभागातील ओपन स्पेस महापालिकेच्या नावावर झाल्या पाहिजेत. प्रभागात मुलांसाठी उद्यान नाही. ज्येष्ठ नागरिकांसाठी विरंगुळा केंद्र नाही. पूर नियंत्रण निधीतून शाहू कॉलनीत संरक्षक भिंत बांधणे गरजचे आहे. सासने कॉलनीत सांडपाणी व पावसाच्या पाण्याचा निचरा व्यवस्थित होत नाही. नगरसेविका वृषाली कदम यांचे वर्षभरातील कामा समाधानकारक नाही. प्रभागात विकासकामांना मोठी संधी आहे. पण कामे होताना दिसत नाहीत.
- शीतल रामुगडे (प्रतिस्पर्धी उमेदवार, भाजप)
प्रभागात महापालिकेच्या मालकीची शाळा नाही. शाळा सुरु केल्यास मुलांची सोय होईल. शाहू कॉलनी, महालक्ष्मी पार्क परिसरातील ओपन स्पेसवर ज्येष्ठ नागरिकांसाठी विरंगुळा केंद्र, बाग साकारू शकते. महापालिका पातळीवर त्यासाठी नियोजन गरजेचे आहे. म्हाडा कॉलनीत पिण्याची पाइपलाइन दोन इंचाची आहे. तीस वर्षापूर्वीची ही पाइपलाइन खराब झाली आहे. पाइपलाइनला ठिकठिकाणी गळती आहे. दूषित पाणी त्यात मिसळते. जुनी पाइपलाइन बदलणे अत्यावश्यक आहे.
- दिनकर कांबळे (म्हाडा कॉलनी)
ताराराणी कॉलनी परिसरात महापालिकेच्या कर्मचाऱ्यांना घर बांधणीसाठी प्लॉट दिले आहेत. १५० हून अधिक जण येथे राहतात. मात्र आजही प्लॉटचे खरेदीपत्र झाले नाही. नागरिकांनी वारंवार पाठपुरावा केला आहे. कर्मचाऱ्यांच्या नावांनी खरेदीपत्र झाल्यास प्रलंबित प्रश्न सुटू शकतो.
- उर्मिला सुतार (ताराराणी कॉलनी)
कळंबा फिल्टर हाऊस प्रभागात वर्षभरात ४३ लाख रुपयांची कामे मंजूर आहेत. यापैकी काही विकास कामांना सुरुवात झाली आहे. बालाजी पार्काता बाग करण्यात येणार आहे. बालाजी पार्क, गुरु महाराजनगरी, सासने कॉलनी येथे ओपन जीम प्रस्तावित आहे. सासने कॉलनीत अडीच लाख रुपये खर्चून ड्रेनेजलाइनचे काम पूर्ण झाले आहे. म्हाडा कॉलनीत अंगणवाडीसाठी हॉल प्रस्तावित आहे. पाडळकर वसाहतीत डांबरीकरण सुरू आहे. राजश्री शाहू हौसिंग सोसायटी येथे गटर, निर्माण चौक ते ताराराणी कॉलनी रस्ता डांबरीकरण, स्वरूप तरुण मंडळ येथे हॉल उभारणी, शाहू कॉलनी येथे नवीन गटर्स अशी ३५ लाख रुपयांच्या कामांना जानेवारी महिन्यात सुरुवात होत आहे.
- वृषाली कदम (सभापती, महिला व बाल कल्याण समिती सभापती)
मोबाइल अॅप डाउनलोड करा आणि राहा अपडेट