दैव बलवत्तर म्हणून वाचलो

February 22, 2016, 1:30 pm

≫ Next: ‘अरे...’ला ‘कारे...’ने उत्तर देण्याची गरज

≪ Previous: ‘राष्ट्रवादीला नंबर वन बनवू’

$

0

0

म. टा. प्रतिनिधी, कोल्हापूर

रस्त्यावर पडलेला दगड विटांचा खच, वाहतूक रोखण्यासाठी तोडून टाकलेली मोठी झाडे, भाले, कुऱ्हाडी घेवून धावणारे आंदोलक आणि त्यांच्याकडून कॅनॉलमध्ये मोटारी टाकल्या जाण्याचा धोका अशा धोकादायक स्थितीत सुमारे ७० किलोमीटरचा थरारक प्रवास कोल्हापूर जिल्हा सहकारी दूध उत्पादक संघाच्या (गोकुळ) संचालकांनी केला. साडेपाच तासांचा प्रवास करून संचालक सहीसलामत दिल्लीत पोहोचले. अंगावर शहारे आणणाऱ्या या प्रसंगातून पाच लाख दूध उत्पादकांच्या शुभेच्छा आणि करवीरनिवासनी अंबाबाई, जोतिबाच्या आशीर्वादने बाहेर पडल्याची भावना या संचालकांनी 'महाराष्ट्र टाइम्स'शी बोलताना व्यक्त केल्या.

हरियाणातील कर्नालमध्ये आयडीएच्या चर्चासत्रासाठी गेलेल्या गोकुळच्या संचालकांनी उलगडला हरियाणातील 'प्रवास' उलगडला. चेअरमन विश्वास पाटील, संचालक अरुण नरके, रवींद्र आपटे, पी. डी. धुंदरे, बाळासो खाडे, रामराजे कुपेकर, संचालिका अनुराधा पाटील, कार्यकारी संचालक डी. व्ही. घाणेकर, जनसंपर्क अधिकारी मोहन यादव, संजय दिंडे, नूल (ता. गडहिंग्लज) येथील सुरेखा शेगुणशी परतीच्या प्रवासावेळी जाट समाजाच्या आरक्षणाच्या प्रश्नावरून सुरू असलेल्या आंदोलनात संचालक अडकले.

दिवस कसातरी गेल्यानंतर सर्व संचालकांना धास्ती वाटू लागली. पोलिसांच्या संरक्षणामुळे भीती नसली तरी, मनात प्रचंड अस्वस्थता निर्माण झाली होती. सहा लेनच्या महामार्गावर नागरिक अडकल्याने सुखदेव सिंग यांच्या धाब्यावर दोन-तीन हजार नागरिकांचा जमाव होता. प्रचंड थंडी आणि बोचऱ्या वाऱ्यामध्ये रात्र काढल्यानंतर रविवारी सकाळी पोलिसांनी अनेक प्रवाशांना तेथून जिल्हा मार्गाने बाहेर काढण्यास सुरुवात केली. दहा किलोमीटरवरील एका खेडेगावात संचालकांना आणून सोडले गेले. यावेळी पूर्वी नागपूरला सीआरपीएफमध्ये कार्यरत असलेल्या सैनिकी अधिकाऱ्याच्या मुलाने मोटारसायकलवरून येऊन वाटाड्याची भूमिका पार पाडली. या तरुणाच्या मोटारसायकलवरून बसून संचालक बाळासाहेब खाडे गेले. अन्य संचालकांनी त्यांच्या पाठोपाठ येत सुमारे ७० किलोमीटरचे अंतर पार केले. महामार्गाप्रमाणेच ग्रामीण रस्त्यावरही आंदोलकांनी रस्ते रोखले होते. स्थानिकांच्या मदतीने वाट मोकळी करत सर्व संचालक नोएडा येथे दाखल झाले. दिल्लीतही संचालकांना आंदोलनाला सामोरे जावे लागले. अन्य रस्त्यांचा आधार घेत संचालक विमानतळावर आले. तेथून पुण्यात दाखल झाल्यावर त्यांनी सुटकेचा निःश्वास सोडला.

अत्यंत प्रतिकुल परिस्थितीतून आम्ही बाहेर पडलो. आंदोलनाच्या काळात तेथील माणुसकीचेही दर्शन झाले. चोविस तास मदत करणारा धाबा चालक आणि वाटाड्याची भूमिका पार पाडणारा मोटारसायकलस्वार यांच्यामुळेच आम्ही सुखरुप परतलो.

- रवींद्र आपटे, ज्येष्ठ संचालक

मोबाइल अॅप डाउनलोड करा आणि राहा अपडेट

---

‘अरे...’ला ‘कारे...’ने उत्तर देण्याची गरज

February 22, 2016, 1:30 pm

≫ Next: रूपांतरित कराला स्थगिती द्या

≪ Previous: दैव बलवत्तर म्हणून वाचलो

$

0

0

म. टा. प्रतिनिधी, कोल्हापूर

'उन्मादक शक्तींच्या कारवायांमुळे समाजामध्ये अस्वस्थता निर्माण होत आहे. अशांमुळे युवकांनी अस्वस्थ न होता एकत्र येऊन विरोध करत 'अरे...'ला 'कारे...'ने उत्तर देण्याची गरज आहे. त्यासाठी युवकांनी आक्रमकपणा अंगीकारून परिवर्तन चळवळीचा जोम वाढवावा' असे आवाहान अंधश्रद्धा निर्मूलन समितीचे अध्यक्ष, ज्येष्ठ नेते प्रा. डॉ. एन. डी. पाटील यांनी केले. अंनिसच्यावतीने महालक्ष्मी हॉलमध्ये आयोजित अध्यक्ष, उपाध्यक्षांच्या पहिल्या राज्य अधिवेशानामध्ये ते बोलत होते. यावेळी डॉ. आ. ह. साळुंखे, डॉ. राम ताकवले प्रमुख उपस्थित होते.

प्रा. डॉ. एन. डी. पाटील म्हणाले, 'मोदी सरकारला अधिक मते मिळणे हा अपवाद होऊ शकतो. पण देशातील प्रघात होऊ शकत नाही. मोदी राजवटीत ग्रामीण भागाबद्दल आकस दिसून येत आहे. पंतप्रधान शेतकऱ्यांच्या आत्महत्येची चर्चा करत नाहीत. ते केवळ इंडिया शायनिंगचचीच चर्चा करतात. केवळ धर्माच्या नावावर राष्ट्र उभारता येत नाही. सर्वधर्मियांना एकत्र येऊन राहण्याची शक्ती मोठी असते.

मुठभर धर्मांधांनी देशाला धर्मसंसद स्वरुप दिले आहे. पण ही धर्मसंसद पासंगालाही पुरणार नाही. पंतप्रधान मोदी यांच्या खुर्चीमुळे उन्मादक शक्तींना कितीही बळ आले तरी, देशातील आश्वासक वातावरण बदलणार नाही. लोकांनी निवडून दिलेली संसदच सार्वभौम राहणार आहे.'

डॉ. आ. ह. साळुंखे म्हणाले, 'परिवर्तनाच्या चळवळीत नवीन पिढीला आणताना त्यांना अपमानित न करता मतपरिवर्तनावर भर द्यावा. माणसांना बदलण्याची संधी द्या. आपल्या परंपरा व धर्मशास्त्रातून आलेल्या चुकीच्या पद्धती, चालीरिती केवळ मनावर लादलेल्या नाहीत, तर गोंदवल्याप्रमाणे शरीराचा एक भाग बनल्या गेल्या आहेत. त्या काढताना विशिष्ट पद्धतीचा वापर करावा लागेल. परिवर्तनाची चळवळ पुढे नेताना निष्ठेने हा लढा पुढे नेण्याची जीद्द बाळगली पाहिजे.'

यावेळी प्रा. डॉ. पाटील यांच्या हस्ते अंनिसचे राज्य उपाध्यक्ष डॉ. रवींद्रनाथ टोणगावकर यांच्या 'माझी आध्यात्मिक वाटचाल, गुढाकडून वास्तवाकडे' पुस्तकाचे प्रकाशन करण्यात आले. यावेळी डॉ. राम ताकवले यांनी पॉवर पॉइंट प्रेझेंटेशनद्वारे मार्गदर्शन केले. डॉ. सुनीलकुमार लवटे यांचेही भाषण झाले. कार्यक्रमास राज्य उपाध्यक्ष प्रा. अनिरुद्ध जाधव, राज्य प्रधान सचिव सुशीला मुंडे, माधव बागवे, सुनील स्वामी, अरुण पाटील, धनाजी जाधव, कृष्णात मोरे, हर्षल जाधव, सचिन ओतारी, रमेश वडणगेकर, अनिल चव्हाण यांच्यासह कार्यकारणीचे सदस्य उपस्थित होते. राज्य कार्याध्यक्ष अविनाश पाटील यांनी प्रास्ताविक केले.

मोबाइल अॅप डाउनलोड करा आणि राहा अपडेट

रूपांतरित कराला स्थगिती द्या

February 22, 2016, 1:30 pm

≫ Next: फेरीवाला पुनर्वसनाचे नियोजन विस्कटले

≪ Previous: ‘अरे...’ला ‘कारे...’ने उत्तर देण्याची गरज

$

0

0

म. टा. प्रतिनिधी, कोल्हापूर

महसूल विभागाने शहरातील सतरा हजार मिळकतधारकांना रूपांतर‌ित कराच्या वसुलीसाठी नोटिसा पाठवल्याने त्याला जोरदार विरोध सुरू झाला आहे. विविध व्यापारी संघटनांसह शिवसेनेने यापूर्वीच विरोध आणि आंदोलनेही केली आहेत. आता कॉँग्रेसनेही रूपांतर‌ित कराला विरोध सुरू केला असून, आमदार सतेज पाटील यांच्यासह महापालिकेतील कॉँग्रेसच्या नगरसेवकांनी सोमवारी (ता. २२) जिल्हाधिकाऱ्यांची भेट घेऊन रूपांतर‌ित कर वसुलीला स्थगितीची मागणी केली.

शहरातील नागरिकांनी मिळकतींचा वापर रहिवासासाठी न करता व्यापारी आणि औद्योगिक कारणांसाठी केल्याने महसूल विभागाने सतरा हजार मिळकतधारकांना दंडाच्या नोटिसा पाठवल्या आहेत. गेल्या दहा ते बारा वर्षातील वसूल न झालेला कर आणि त्यावरील चाळीस पट दंडाच्या वसुलीसाठी नोटिसा पाठवल्या आहेत. याला व्यापाऱ्यांसह विविध पक्ष, संघटनांकडूनही विरोध वाढत आहे.

सोमवारी (ता. २२) आमदार सतेज पाटील, चेंबर ऑफ कॉमर्सचे अध्यक्ष आनंद माने, महापालिकेतील कॉँग्रेसचे नगरसेवक शारंगधर देशमुख, संदीप नेजदार आदींसह जिल्हाधिकारी डॉ. अमित सैनी यांची भेट घेतली. यावेळी आमदार पाटील यांनी रुपांतरीत कराचा दंड अन्यायकारक असल्याचे सांगत, त्याला स्थगिती देण्याची मागणी केली.

महापालिकेला निधी कमी का?

'महापालिकेला गेल्या वर्षभरात जिल्हा नियोजनमधून केवळ तीन कोटींचा निधी मिळाला आहे. कमी निधी मिळत असल्याने शहराच्या विकासाला मर्यादा येत आहेत', असे सांगत जिल्हा नियोजन मंडळामधून महापालिकेला अधिकाधिक निधी मिळावा अशी मागणी आमदार पाटील यांनी जिल्हाधिकाऱ्यांकडे केली.

शाहूपुरी व्यापाऱ्यांचे जिल्हाधिकाऱ्यांना निवेदन

रुपांतरीत कराच्या वसुलीसाठी महसूल विभागाने शहरातील सतरा हजार मिळकत धारकांना नोटिसा पाठवल्याने व्यापाऱ्यांनी याला विरोध सुरू केला आहे. याबाबत स्टेशन रोड शाहूपुरी व्यापारी सामाजिक संघटनेने जिल्हाधिकारी डॉ. अमित सैनी यांनी निवेदन दिले. छत्रपती राजाराम महाराजांनी १९२७ मध्ये शाहूपुरी व्यापार पेठ स्थापन केली असून, व्यापाऱ्यांना कर लागू नसल्याचे गॅझेट व्यापाऱ्यांनी पुराव्यादाखल सादर केले आहे. दरम्यान, यावर रुपांतरीत कराचा अहवाल राज्य सरकारकडे पाठवून निर्णय घेऊ, असे आश्वासन जिल्हाधिकारी डॉ. अमित सैनी यांनी दिल्याची माहिती व्यापारी संघटनेने प्रसिद्धीपत्रकाद्वारे दिली आहे. चेतन जाधव, केदार पाटील, राजेंद्र शहा, सुनील पाटील, किरण बनछोडे आदींनी जिल्हाधिकाऱ्यांना निवेदन दिले.

मोबाइल अॅप डाउनलोड करा आणि राहा अपडेट

फेरीवाला पुनर्वसनाचे नियोजन विस्कटले

February 22, 2016, 1:30 pm

≫ Next: कोल्हापूर महापालिका डबघाईला !

≪ Previous: रूपांतरित कराला स्थगिती द्या

$

0

0

म. टा. प्रतिनिधी, कोल्हापूर

फेरीवाला झोनची निश्चिती होऊनही फेरीवाल्यांच्या पुनर्वसनाचे काम मात्र धीम्या गतीने सुरू आहे. शहरातील प्रमुख बाजारपेठेतील व्यापारी आणि ठिकठिकाणच्या स्थानिक नागरिकांच्या विरोधाने पुनर्वसनाचे नियोजन विस्कटले आहे. विविध प्रभागातील नगरसेवकही फेरीवाला झोनसाठी प्रशासनाला सहकार्य करण्याऐवजी स्थानिक नागरिकांची बाजू घेऊन पुढे येत असल्याने प्रशासनाची डोकेदुखी वाढली आहे. दुसरीकडे महाद्वार रोड, ताराबाई रोड, जोतिबा रोड, भाऊसिंगजी रोड येथे व्यापाऱ्यांच्या विरोधामुळे पुनर्वसनाचे घोंगडे भिजत राहिले. याप्रश्नी महापालिका पदाधिकारी आणि अधिकारी यांच्यामध्ये मंगळवारी (ता. २३) बैठक होण्याची शक्यता आहे.

महापालिकेच्यावतीने राष्ट्रीय फेरीवाला धोरणानुसार अंमलबजावणीला सुरूवात झाली. फेरीवाल्यांच्या पुनर्वसनाची ७४ फेरीवाला क्षेत्र घोषित केले असून या ठिकाणी त्यांचे पुनर्वसन केले जाणार आहे. ५२ ठिकाणे 'नो हॉकर्स झोन'म्हणून घोषित केली आहेत.चारही विभागीय कार्यालयामार्फत रविवारपासून पट्टे मारण्यास सुरूवात झाली. पण ठिकठिकाणच्या विरोधामुळे सोमवारी प्रभावीपणे पुनर्वसनाचे काम होताना दिसले नाही. आयुक्त पी. शिवशंकर यांनी सायंकाळी केएमटीचे अतिरिक्त व्यवस्थापक संजय भोसले, इस्टेट अधिकारी प्रमोद बराले, सचिन जाधव, उप शहर अभियंता एस. के. पाटील. एस. के. माने, रमेश मस्कर, हर्षजीत घाटगे यांची बैठक घेऊन दोन दिवसातील घटनांचा आढावा घेतला. जी ठिकाणे वादग्रस्त बनली आहेत, त्या संदर्भात येत्या दोन दिवसात निर्णय घेण्याचे बैठकीत ठरले.

पट्टे मारून जागा निश्चिती

गांधी मैदान विभागीय कार्यालय कार्यक्षेत्रातंर्गत शेंडा पार्क ते जवाहरनगर रोड, बोंद्रेनगर रिंगरोड परिसरात पट्टे मारून जागा निश्चित केल्या. राजारामपुरी विभागीय कार्यालयाच्या हद्दीत पाच बंगला परिसर, रेल्वे फाटक परिसरात पट्टे मारून २०० हून अधिक फेरीवाल्यांचे नियोजन करण्यात आले. पांजरपोळ ओम मंगल कार्यालयाशेजारी(५०) , सायबर चौक ते राधाबाई शिंदे इंग्लिश मिडीयम स्कूल मार्गावर (४०), आयर्विन ख्रिश्चन हायस्कूलशेजारी (२०), सावित्रीबाई फुले हास्पीटल येथील कुटुंब कल्याण केंद्र ते उद्यमनगरकडे जाणारा रस्त्यावर पट्टे मारण्यात आले. याठिकाणी फेरीवाल्यांचे पुनर्वसन होणार आहे. छत्रपती शिवाजी मार्केट विभागीय कार्यालयातंर्गत दसरा चौक परिसरातील स्टेट बँक परिसर, ​लक्ष्मीपुरीतील जुन्या पुस्तक विक्रीच्या स्टॉल परिसरात पट्टे मारण्यात आले.

नगरसेवकांचा खो

महापालिकेने शहरातील फेरीवाले झोन आणि नो हॉकर्स झोन जाहीर केले आहेत. फेरीवाल धोरणाची अंमलबजावणी करताना स्थानिक नगरसेवक, लोकप्रतिनिधींच्या सहकार्याची आवश्यकता आहे. शहरातील वाहतुकीची कोंडी टाळण्यासाठी, चौक फेरीवाले मुक्त होण्यासाठी प्रशासन आणि नगरसेवकांनी एकत्रित प्रयत्नांची गरज असताना गेले दोन दिवस अनेक ठिकाणी नगरसेवकच, महापालिकेच्या कर्मचाऱ्यांना विरोध करत असल्याचे सामोरे येत आहे. रविवारी २३ ठिकाणी कर्मचाऱ्यांना विरोध झाला. याठिकाणी नगरसेवकांनीच कामात खो घातल्याचे दिसले.शहरातील मध्यवस्ती भागातील प्रभागात तर रोज अनधिकृत केबिन, फेरीवाल्यांची भर पडत आहे. मतदानावर डोळा ठेवून नगरसेवक अशा अनधिकृत केबीनला पाठीशी घालत आहेत.

अट्टाहास नडला

संपूर्ण शहरात एकाचवेळी फेरीवाला धोरणाची अंमलबजावणी करण्याऐवजी, टप्प्याटप्प्याने फेरीवाल्यांचे पुनर्वसनाचे काम हाती घेण्याची सूचना काही जणांनी केली होती. मात्र महापालिकेतील वरिष्ठ अधिकाऱ्यांनी एकाचवेळी संपूर्ण शहरात फेरीवाला झोनची अंमलबजावणीचे आदेश दिले. परिणामी एकाचवेळी ठिकठिकाणी विरोधाला सुरूवात झाली आहे.

मोबाइल अॅप डाउनलोड करा आणि राहा अपडेट

कोल्हापूर महापालिका डबघाईला !

February 22, 2016, 11:19 am

≫ Next: दूषित पाण्यामुळे तरुणीचा मृत्यू

≪ Previous: फेरीवाला पुनर्वसनाचे नियोजन विस्कटले

$

0

0

Gurubal.Mali@timesgroup.com

कोल्हापूरः एलबीटीच्या बदल्यात दरमहा ११ कोटींचा निधी देण्याचा शब्द राज्य सरकारने न पाळल्यामुळे कोल्हापूर महापालिकेस तब्बल २८ कोटीचा दणका बसला असून आर्थिक गणित कोलमडले आहे. सरकारने हात आखडता घेतल्याने गेल्या तीन महिन्यात महापालिका निधीतील सर्वच कामांना कात्री लावण्यात आली आहे. अशीच अवस्था राहिल्यास पुढील वर्षी महापालिका डबघाईला येण्याची शक्यता आहे.

पाच वर्षापूर्वी जकात बंद झाली. तेव्हा वर्षाला साधारणता शंभर कोटींची जकात मिळत होती. ती सुरू राहिली असती तर आता १७० कोटीपर्यंत दरवर्षी उत्पन्न मिळाले असते. पण जकात बंद झाल्यानंतर महापालिकेचे होणारे मोठे आर्थिक नुकसान टाळण्यासाठी एलबीटी सुरू झाली. यातून ११० कोटींचे उत्पन्न अपेक्षित होते. एप्रिल ते जुलै २०१५ या चार महिन्यात महापालिकत एलबीटी सुरू होती. ऑगस्टपासून त्याचीही वसूली बंद झाली. सरकारने एलबीटीच्या बदल्यात दरमहा ११ कोटी देण्याची घोषणा केली. प्रत्यक्षात मात्र सप्टेंबर ते डिसेंबर या चार महिन्यात ६ कोटी ४३ लाख याप्रमाणे तर त्यानंतर दोन महिन्यात प्रत्येकी ७ कोटी ३० लाख मिळाले. पण गेल्या सहा महिन्यात सरकारने तब्बल २८ कोटीला कात्री लावल्याने आर्थिक गणितच कोलमडले आहे. राज्य सरकारने असाच हात आखडता घेतला तर पुढील वर्षी किमान ७० कोटीचा दणका बसणार आहे.

एलबीटी रद्द केल्याने झालेले नुकसान म्हणून राज्य सरकारकडून जादा निधी मिळावा अशी विनंती सरकारला केली आहे.

- नितीन देसाई, अतिरिक्त आयुक्त

एलबीटी आणि जकात हे उत्पन्नाचे प्रमुख स्त्रोत होते. पण तेच बंद केल्याने अडचणी वाढल्या आहेत. लोकांना अधिकाधिक सुविधा देण्यासाठी सरकारने जादा निधी देण्याची गरज आहे. याशिवाय प्रशासनाने उत्पन्नवाढीचे नवनवीन स्त्रोत शोधायला हवेत.

- अश्विनी रामाणे, महापौर

मोबाइल अॅप डाउनलोड करा आणि राहा अपडेट

दूषित पाण्यामुळे तरुणीचा मृत्यू

February 22, 2016, 2:21 pm

≫ Next: पानसरे हत्याप्रकरणी सुनावणी आज

≪ Previous: कोल्हापूर महापालिका डबघाईला !

$

0

0

म. टा. प्रतिनिधी, कोल्हापूर

दूषित पाण्यामुळे ताप मेंदूपर्यंत पोचल्याने सिध्दी अशोक लिंगम (वय २०, रा. परीट गल्ली, पंचगंगा तालीमजवळ, शुक्रवार पेठ) या युवतीचा मृत्यू झाला. दुषित पाण्यामुळे परीट गल्लीतील ताप, काविळ व टॉयफॉईडचे १५ जण हॉस्पिटलमध्ये उपचार घेत आहे. या घटनेने जाग आलेल्या महानगरपालिकेने युध्दपातळीवर पाइपलाइनचा शोध घेतला असून दुरूस्तीचे काम सुरू केले आहे.

गेले आठ दिवस परिसरातील सिध्दी लिंगमसह, श्रुती लोखंडे, अमित साठम, शिवाजी शिंदे, मंथन शिंदे, संयम भिवटे, तनिष्क पाटील यांच्यासह नऊ ते दहाजण खासगी हॉस्पिटलमध्ये उपचार घेत आहेत. सिध्दी लिंगमची प्रकृती रविवारपासून खालावली. सोमवारी दुपारी साडेचारच्या सुमारास तिचा मृत्यू झाला. या घटनेने परिसरातील नागरिकांकडून तीव्र प्रतिक्रिया उमटत आहेत.

परीट गल्ली येथे गेले सहा महिने गढूळ पाणी येत होते. त्यासंदर्भात महानगरपालिकेकडे तक्रारही करण्यात आली होती. एक महिन्यापूर्वी पिण्याच्या पाण्याला सांडपाण्याचा वास येऊ लागला. नागरिकांनी महानगरपालिकेकडे याबाबत तक्रार केली. तीन आठवड्यापूर्वी थेट मैलाचा वास येऊ लागला. नागरिकांनी स्थानिक नगरसेविका सरिता मोरे व त्यांचे पती नंदकुमार मोरे यांच्याकडे तक्रार केली. गेले पंधरा दिवस तापाच्या रूग्णांत वाढ होऊ लागली आहे.

मोबाइल अॅप डाउनलोड करा आणि राहा अपडेट

पानसरे हत्याप्रकरणी सुनावणी आज

February 22, 2016, 2:30 pm

≫ Next: पानसरे हत्याप्रकरणी सुनावणी आज

≪ Previous: दूषित पाण्यामुळे तरुणीचा मृत्यू

$

0

0

म. टा. प्रतिनिधी, कोल्हापूर

ज्येष्ठ नेते कॉम्रेड गोविंदराव पानसरे हत्या खटल्याची सुनावणी मंगळवारी सत्र न्यायाधीश एल. डी. बिले यांच्यासमोर होणार आहे. मंगळवारच्या सुनावणीवेळी पानसरे यांच्या हत्या प्रकरणातील प्रमुख आरोपी सनातन संस्थेचा साधक समीर गायकवाड याला आरोपपत्राची माहिती देण्यात येणार आहे. दरम्यान समीरला सुरक्षिततेच्या दृष्टीने अंडासेलच्या बाहेर काढता येणार नसल्याचा अभिप्राय कळंबा कारागृह प्रशासनाने कोर्टाला सादर केला आहे. समीरला अंडासेलमधून बाहेर काढावे, असा अर्ज समीरचे वकील एस. एस. पटवर्धन यांनी कोर्टाकडे केला होता.

दरम्यान, समीरचा खटला कोल्हापूर जिल्हाबाहेर चालवावा, अशी याचिका हिंदू विधीज्ज्ञ परिषदेचे सचिव अॅड. संजीव पुनाळेकर यांनी मुंबई हायकोर्टात दाखल केली होती. पण, अॅड. पुनाळेकर यांनी याचिका मागे घेतली असल्याने कोल्हापुरातील खटला सुरू होण्याचा मार्ग मोकळा झाला आहे.

मोबाइल अॅप डाउनलोड करा आणि राहा अपडेट

पानसरे हत्याप्रकरणी सुनावणी आज

February 22, 2016, 2:30 pm

≫ Next: योजनांची गाडी रुळावर येणार?

≪ Previous: पानसरे हत्याप्रकरणी सुनावणी आज

$

0

0

म. टा. प्रतिनिधी, कोल्हापूर

ज्येष्ठ नेते कॉम्रेड गोविंदराव पानसरे हत्या खटल्याची सुनावणी मंगळवारी सत्र न्यायाधीश एल. डी. बिले यांच्यासमोर होणार आहे. मंगळवारच्या सुनावणीवेळी पानसरे यांच्या हत्या प्रकरणातील प्रमुख आरोपी सनातन संस्थेचा साधक समीर गायकवाड याला आरोपपत्राची माहिती देण्यात येणार आहे. दरम्यान समीरला सुरक्षिततेच्या दृष्टीने अंडासेलच्या बाहेर काढता येणार नसल्याचा अभिप्राय कळंबा कारागृह प्रशासनाने कोर्टाला सादर केला आहे. समीरला अंडासेलमधून बाहेर काढावे, असा अर्ज समीरचे वकील एस. एस. पटवर्धन यांनी कोर्टाकडे केला होता.

दरम्यान, समीरचा खटला कोल्हापूर जिल्हाबाहेर चालवावा, अशी याचिका हिंदू विधीज्ज्ञ परिषदेचे सचिव अॅड. संजीव पुनाळेकर यांनी मुंबई हायकोर्टात दाखल केली होती. पण, अॅड. पुनाळेकर यांनी याचिका मागे घेतली असल्याने कोल्हापुरातील खटला सुरू होण्याचा मार्ग मोकळा झाला आहे.

मोबाइल अॅप डाउनलोड करा आणि राहा अपडेट

---

योजनांची गाडी रुळावर येणार?

February 23, 2016, 1:30 pm

≫ Next: कोल्हापूर-रत्नागिरी चौपदरीकरणासाठी सोशल ऑडिट

≪ Previous: पानसरे हत्याप्रकरणी सुनावणी आज

$

0

0

म. टा. प्रतिनिधी, कोल्हापूर

रेल्वे मंत्री कोकणातील असल्याने गुरुवारी सादर केल्या जाणाऱ्या रेल्वे बजेटकडून कोल्हापूरवासीयांच्या भरपूर अपेक्षा आहेत. अनेक मार्गांचे सर्व्हे झालेल्या कोल्हापूर स्टेशन कोकण रेल्वेला वैभववाडी येथे जोडण्याच्या प्रस्तावाच्या मंजुरीबरोबरच बजेटमध्ये तरतूद होईल याकडे लक्ष लागले आहे. त्याचवेळी पुणे ते लोंढा दरम्यान मंजूर झालेल्या दुहेरीकरणाच्या कामामध्ये मिरज ते कोल्हापूरपर्यंतच्या भागाचा समावेश होण्याची अपेक्षा आहे.

कराड ते बेळगाव व्हाया कोल्हापूर नवीन रेल्वे मार्ग, मुंबईसाठी सुपरफास्ट रेल्वे, अहमदाबादसाठी दररोज रेल्वे, पुण्यातील काही एक्सप्रेस कोल्हापुरातून सुरू करणे, मॉडेल रेल्वे स्टेशन म्हणून विकास, स्टेशन परिसरातील विस्तारीकरण या मागण्यांची पूर्तता होण्याची फार आवश्यकता आहे.

कराड ते बेळगाव व्हाया कोल्हापूर

कोकण रेल्वेला जोडण्याच्या प्रस्तावाबरोबर कराड ते बेळगाव व्हाया कोल्हापूर या नवीन रेल्वे मार्गाची प्रतिक्षा आहे. यामुळे बेळगावचे अंतर कमी होणार असून दक्षिणेकडे जाण्यासाठीचा वेळ वाचणार आहे. पुण्यानंतर मिरज हे या मार्गावरील मोठे रेल्वे जंक्शन आहे. कोल्हापूर, कराड, सातारा, सोलापूर, पंढरपूर तसेच कर्नाटक, आंध्र प्रदेशाकडे जाणाऱ्यांसाठी मध्यवर्ती ठिकाण आहे. त्याकरिता रेल्वेचे विभागीय कार्यालय मिरजेत होणे गरजेचे आहे.

कोकण रेल्वेशी कनेक्ट

मुंबईपर्यंतचा प्रवास वेगवान होण्यासाठी पुण्यापासून कोल्हापूरपर्यंतच्या रेल्वे मार्गाचे दुहेरीकरणाचे फार महत्वाचे काम आहे. पुणे ते लोंढ्यापर्यंतच्या कामामध्ये कोल्हापूरपर्यंतच्या मार्गाचा समावेश करावा, अशी मागणी गेल्या बजेटपासून खासदार धनंजय महाडिक करत आहेत. याबाबत रेल्वे मंत्री सुरेश प्रभू यांच्याशीही चर्चा केली आहे. याबरोबरच कोल्हापूरच्यादृष्टीने सर्वात महत्वाच्या आणखी दोन​ निर्णयांची अपेक्षा आहे. कोल्हापूर स्टेशन कोकण रेल्वेला जोडण्यासाठी वैभववाडीच्या मार्गाचा सर्व्हे करण्यात आला आहे. त्यासाठी मंजुरी देण्यात येईल, असे मंत्री प्रभू सांगत आहेत. त्यामुळे या बजेटमध्ये त्यादृष्टीने प्रभू निर्णय घेतील अशी दाट शक्यता आहे.

मॉडेल स्टेशनचा प्रस्ताव

कोल्हापूर स्टेशन ए ग्रेडमध्ये आहे. हे स्टेशन मॉडेल स्टेशन म्हणून विकसीत करण्याचा निर्णय यापूर्वीच झाला आहे. पण त्यादृष्टीने स्टेशनवरील विकास कामांची वाटचाल दिसत नाही. स्टेशनची इमारत जुनी झालेली असल्याने तिथे नवीन सुविधा देण्यास मर्यादा येत आहेत. त्यासाठी इमारत नवीन ठिकाणी उभी करण्याचा प्रस्ताव विचाराधीन आहे. त्यासाठी पब्लिक प्रायव्हेट पार्टनरशीपचे धोरण सरकारने अवलंबण्याचे ठरवले आहे. त्यानुसार स्टेशनचा विकास खासगी संस्था, सहकारी संस्थांच्या माध्यमातून केला जाईल, अशी चर्चा आहे.

नव्या प्लॅटफॉर्मबाबत अपेक्षा

सध्या स्टेशनवर तीन प्लॅटफॉर्म आहेत. पण नवीन रेल्वे सुरू करण्यासाठी आणखी जागेची आवश्यकता आहे. त्यासाठी परीख पुलाजवळील जागेचा वापर करुन तिथे काही प्लॅटफॉर्म करण्याचा विचार आहे. त्यासाठी इंजिनीअरिंग विभागाकडून त्यावर काम सुरू आहे. तसेच गोकुळ हॉटेलच्या पाठीमागील बाजूने प्लॅटफॉर्मवर येण्यासाठी नवीन मार्ग करण्याचाही विचार आहे. स्टेशनचा विस्तारासाठी जागा उपलब्ध आहे, पण त्यासाटी स्टेशनचा आराखडा बनवला जाण्याची आवश्यकता आहे. परीख पूल व शाहूपुरीकडील परिसरातील जागा रेल्वेकडे आहे. नवीन प्लॅटफॉर्म तयार झाल्यानंतर रेल्वे थांबवून ठेवण्यासाठी जागा तयार होऊ शकते.

हव्या छोट्या स्टेशनवरही सुविधा

मिरजेपर्यंतच्या मार्गावरील रुकडी, हातकणंगले, जयसिंगपूर या स्टेशनमध्ये सुविधांची गरज आहे. प्लॅटफॉर्मची उंची वाढवण्याची नितांत गरज असून अपघात होण्याचे प्रमाण कमी होईल. तसेच शेड पुरेसे नसल्याने प्रवाशांना त्रास होतो. स्टेशनवर बसण्यासाठी पुरेसे बेंच नाहीत. अशा अनेक सुविधांची छोट्या स्टेशनवर आवश्यकता आहे.

मोबाइल अॅप डाउनलोड करा आणि राहा अपडेट

कोल्हापूर-रत्नागिरी चौपदरीकरणासाठी सोशल ऑडिट

February 23, 2016, 1:30 pm

≫ Next: २८ फेब्रुवारी रोजी वैज्ञानिक प्रकल्प स्पर्धा

≪ Previous: योजनांची गाडी रुळावर येणार?

$

0

0

म. टा. प्रतिनिधी, कोल्हापूर

गेल्या अनेक वर्षांपासून प्रलंबित राहिलेल्या कोल्हापूर-रत्नागिरी मार्गाच्या चौपदरीकरणाचे काम मात्र भू संपादनाचा कायदा अस्तित्वात नसल्याने आता रखडले आहे. रस्त्याच्या कामाला गती यावी यासाठी या मार्गावरील सामाजिक परिणामांचा अहवाल (सोशल ऑडिट) तयार करण्यात येणार आहे. राष्ट्रीय महामार्ग प्राधिकरणाच्या अधिकाऱ्यांनी सामाजिक परिणामाच्या अभ्यासासह भूसंपादनासाठी स्वतंत्र अधिकारी नेमण्याची मागणी करणारे पत्र जिल्हा प्रशासनाला दिले आहे.

कोकणाला जोडणारा तब्बल १३० किलोमीटर अंतराचा कोल्हापूर-रत्नागिरी हा मार्ग सर्वाधिक वर्दळीचा असल्याने याच्या चौपदरीकरणाची मागणी गेल्या अनेक वर्षांपासून सुरू आहे. कोकण आणि कोल्हापूरला जोडणारा हा मार्ग पुढे सांगली, सोलापूरमार्गे नागपूरला जातो. हा मार्ग अधिक प्रशस्त करण्यासाठी चौपदरीकरण करण्याचा निर्णय सरकारने घेतला आहे. मात्र सर्व्हे पूर्ण झाल्यानंतर काम रखडले होते. यातच केंद्र सरकारचा नवीन जमीन अधिग्रहण कायदा अजूनही संमत झाला नसल्याने कोल्हापूर-रत्नागिरी मार्गाचे काम जवळपास रखडल्याचे स्पष्ट झाले आहे.

मात्र या रस्त्याचे काम सुरू व्हावे यासाठी राष्ट्रीय महामार्ग विभागाने हालचाली सुरू केल्या आहेत. जमीन संपादनासाठी स्वतंत्र अधिकाऱ्याची नेमणूक करण्याची मागणी जिल्हा प्रशासनाकडे केली आहे. भूसंपादनाचा नवा कायदा अस्तित्वात नसल्याने या मार्गावरील सामाजिक परिणामांचा अभ्यास करून अहवाल केंद्र सरकारच्या विशेष समितीकडे पाठवण्यात येईल. त्यानंतर भू संपादन सुरू होईल असे अधिकाऱ्यांनी सांगितले.

शिवाजी विद्यापीठ करणार अभ्यास

कोल्हापूर-रत्नागिरी मार्गाचा सामाजिक परिणामांचा अभ्यास सक्षम स्वयंसेवी किंवा शैक्षणिक संस्थांकडून करून घेण्यात येणार आहे. त्यासाठी जिल्हा भू संपादन विभागाकडून शिवाजी विद्यापीठातील सामाजकार्य विभागाची मदत घेण्यात येणार आहे. मार्गावरील क्षेत्र, प्रभावित होणारी कुटूंबे, आर्थिक हानी, पर्यावरणीय हानी, नुकसान भरपाईची रक्कम आदी बाबींचा अभ्यास केला जाईल.

कोल्हापूर - रत्नागिरी मार्गासाठी सर्व्हे यापूर्वीच पूर्ण झाला आहे. आता जमीन संपादनासाठी स्वतंत्र अधिकारी मिळावा आणि मार्गाचा सामाजिक अहवाल परिणाम तयार करावा अशी मागणी आम्ही जिल्हा प्रशासनाकडे केली आहे. अहवालानंतर लवकरच भू संपादन सुरू होईल. - रत्नाकर बामणे, कार्यकारी अभियंता, राष्ट्रीय महामार्ग विभाग

मोबाइल अॅप डाउनलोड करा आणि राहा अपडेट

२८ फेब्रुवारी रोजी वैज्ञानिक प्रकल्प स्पर्धा

February 23, 2016, 1:30 pm

≫ Next: शिक्षण सहसंचालकांचा ‘सुटा’तर्फे निषेध, निदर्शने

≪ Previous: कोल्हापूर-रत्नागिरी चौपदरीकरणासाठी सोशल ऑडिट

$

0

0

कोल्हापूर ः
कॉन्सोरटीयम ऑफ नेचर कॉन्सोरवेटर्स सोसायटीच्यावतीने येत्या २८ फेब्रुवारीला वैज्ञानिक प्रकल्प स्पर्धा आयोजित केल्या आहेत. राष्ट्रीय विज्ञान दिनानिमित्त ज्येष्ठ शास्त्रज्ञ भारतरत्न सर सी. व्ही. रामण यांच्या नावाने ही स्पर्धा होत आहे. 'महाराष्ट्र टाइम्स' या कार्यक्रमाचे माध्यम प्रायोजक आहे.

देशात २८ फेब्रुवारीला राष्ट्रीय विज्ञान दिवस म्हणून साजरा केला जातो. डॉ. रामण यांनी भौतिकशास्त्रातून संशोधन केले आहे. संशोधनातील उत्तुंग कार्याबद्दल त्यांना देशाचा सर्वोच्च भारतरत्न हा पुरस्कार १९५४ ला देण्यात आला. विद्यार्थ्यांच्यात नवसंशोधनाला चालना देण्यासाठी सोसायटीच्या वतीने ही स्पर्धा आयोजित केली आहे. स्पर्धा पेटाळा येथील स. म. लोहिया ज्युनिअर कॉलेजच्या राम गणेश गडकरी सभागृहात सकाळी १० ते सायंकाळी ४ या वेळेत होणार आहे. पाचवी ते सातवी, आठवी ते बारावी आणि बारावी ते पदवीपर्यंत असे तीन गटात स्पर्धा होतील.

'महाराष्ट्र टाइम्स'च्या कल्चर क्लबच्या सभासदांना या कार्यक्रमासाठी विनामूल्य प्रवेश आहे. अन्य व्यक्तिंना ५० रुपये शुल्क राहणार आहे. एका गटात जास्तीत जास्त ३ विद्यार्थी सहभाग घेऊ शकतात. विद्यार्थ्यांनी पर्यावरण, पारंपारिक उर्जा स्त्रोत यासह नावीन्यपूर्ण संशोधनच्या प्रकल्पाची मांडणी करता येणार आहे.

स्पर्धेच्या नाव नोंदणीसाठी विज्ञान प्रसार कार्यक्रमप्रमुख सुनील पाटील ९२०९०००६५४ आणि गणेश वाघमारे ९५६१९७५६०५ वर संपर्क साधावा.

मोबाइल अॅप डाउनलोड करा आणि राहा अपडेट

शिक्षण सहसंचालकांचा ‘सुटा’तर्फे निषेध, निदर्शने

February 23, 2016, 1:30 pm

≫ Next: महाराष्ट्र एकीकरण समितीचा बालेकिल्ल्यात पराभव

≪ Previous: २८ फेब्रुवारी रोजी वैज्ञानिक प्रकल्प स्पर्धा

$

0

0

म. टा. प्रतिनिधी, कोल्हापूर

पूर्वकल्पना देऊनही शिक्षण सहसंचालक डॉ. अजय साळी उपस्थित राहिले नसल्याचा निषेध करीत शिवाजी विद्यापीठ शिक्षक संघाने शिक्षण सहसंचालक कार्यालयासमोर मंगळवारी निदर्शने केली. मागण्यांचे निवेदन कार्यालयीन अधीक्षकांना देऊन निषेध नोंदविला.

उच्च आणि तंत्र शिक्षण विभागाने अनुदानित अशासकीय कॉलेजमध्ये एचटीई सेवार्थ प्रणाली कार्यवाही केली आहे. मात्र ही प्रणाली राबवित असताना उच्च शिक्षण सहसंचालक कार्यालयाने मनमानी पद्धतीने दोनशेहून अधिक प्राध्यापकांचे डिसेंबर आणि जानेवारी महिन्याचे वेतन दिलेले नाही. त्यामुळे प्राध्यापकांच्यात असंतोष आहे. वेतन ऑनलाइन पद्धतीने करण्यासाठी एचटीई सेवार्थ प्रणाली सुरु आहे.

मात्र या कार्यवाहीदरम्यान शिक्षण सहसंचालकांनी अनेक कॉलेजला तोंडी आदेश देऊन संबधित प्राध्यापकांची नावे समाविष्ट करू नये, असे आदेश दिले आहेत. संबधित प्राध्यापकांच्या नेमणुका नियमानुसार झाल्या आहेत. त्यांच्या नेमणूकांना शिवाजी विद्यापीठ आणि शिक्षण सहसंचालक कार्यालयाने मान्यता दिली आहे. गेल्या तीन वर्षापासून वेतन दिले जात होते. मात्र या प्राध्यापकांचे एचटीई प्रणालीतून वेतन रोखले आहे. त्या विरोधात सुटाने निदर्शने केली.

मंगळवारी दुपारी दोन वाजता सुटाचे पदाधिकारी सहसंचालक कार्यालयात आल्यानंतर सहसंचालक डॉ. अजय साळी नसल्याचे कळाले. त्या वेळी पदाधिकाऱ्यांनी जोरदार आक्षेप नोंदविला. दहा वेळा निवेदन देऊनही चर्चेसाठी येत नसल्याचा आरोप पदाधिकाऱ्यांनी केला. सुटाचे सहकार्यवाह डॉ. आर. जी. कोरबू म्हणाले, 'सुटाचे पदाधिकारी कार्यालयात येणार म्हणून सहसंचालकांनी जाणीवपूर्वंक येण्याचे टाळले. प्राध्यापकांचा प्रश्न गंभीर असूनही याकडे जाणीवपूर्वक दुर्लक्ष केले जात आहे. सहसंचालक काही निर्णय मर्जीनुसार घेत आहे. सुटाच्या पदाधिकाऱ्यांना विश्वासात घेऊन निर्णय घेतले पाहिजेत. सहसंचालकांच्या विरोधात आंदोलनाचा हा पहिला टप्पा आहे. यापुढील आंदोलने ताकदीने केली जातील.'

निदर्शनात सुटाचे सहकार्यवाहह डॉ. आर. जी. कोरबू, अध्यक्ष प्रा. रघुनाथ ढमकले. डॉ. सुधाकर मानकर, प्रा. एस. के. बोजगर, डॉ. आर. एच. पाटील, प्रा. एन. के. मुल्ला, प्रा. अनिल वाघमारे आदींसह पदाधिकारी, प्राध्यापक सहभागी झाले होते.

मोबाइल अॅप डाउनलोड करा आणि राहा अपडेट

महाराष्ट्र एकीकरण समितीचा बालेकिल्ल्यात पराभव

February 23, 2016, 1:30 pm

≫ Next: ‘ओव्हरलोड’ ५ टक्के जादा

≪ Previous: शिक्षण सहसंचालकांचा ‘सुटा’तर्फे निषेध, निदर्शने

$

0

0

म. टा. वृत्तसेवा, बेळगाव
बेळगाव तालुका पंचायत निवडणुकीत काँग्रेसने आपले वर्चस्व प्रस्थापित केले. खानापूर तालुका पंचायतीवर महाराष्ट्र एकीकरण समितीने आपली सत्ता कायम राखली. मराठी भाषिकांचे बालेकिल्ले म्हणून ओळखल्या जाणाऱ्या मतदारसंघात महाराष्ट्र एकीकरण समितीच्या उमेदवारांना पराभवाला सामोरे जावे लागले. येळ्ळूर या समितीच्या बालेकिल्ल्यातील जिल्हा पंचायतचे उमेदवार अर्जुन गोरल यांचा पराभव मराठी भाषिकांना जिव्हारी लागला आहे.
४५ सदस्य असलेल्या बेळगाव तालुका पंचायतीत काँग्रेसचे २२, समितीचे १४ आणि भाजपचे ९ उमेदवार निवडून आले. खानापूर तालुका पंचायत निवडणुकीत समितीचे १०, भाजप ९, काँग्रेस ३ आणि अपक्ष २ उमेदवार विजयी झाले. जिल्हा पंचायतीवर काँग्रेसचे ४३, भाजप ३९, महाराष्ट्र एकीकरण समितीचे ५, जनता दल २ आणि अपक्ष १ असे उमेदवार विजयी झाले आहेत.
जिल्हा पंचायत निवडणुकीत महाराष्ट्र एकीकरण समितीचे खानापूर तालुक्यातून तीन आणि बेळगाव तालुक्यातून दोन उमेदवार निवडून आले. खानापूरमधून महाराष्ट्र एकीकरण समितीचे जांबोटीतून जयराम देसाई, गर्लगुंजीमधून नारायण कार्वेकर आणि नंदगडमधून सुप्रिया कुट्रे विजयी झाले. बेळगावमधील जिल्हा पंचायतच्या हिंडलगा मतदारसंघातून महाराष्ट्र एकीकरण समितीच्या माधुरी हेगडे आणि उचगाव मतदारसंघातून सरस्वती पाटील विजयी झाल्या आहेत.
उमेदवार विजयी झाल्याची घोषणा होताच कार्यकर्त्यांनी गुलाल उधळून, फटाके फोडून आणि घोषणा देऊन जल्लोष केला. क्लब रोडवर कार्यकर्त्यांनी सकाळपासून निवडणुकीचा निकाल जाणून घेण्यासाठी मोठी गर्दी केली होती. ज्योती कॉलेजकडे जाणारा रस्ता सकाळपासूनच ब्यारीकेड लावून पोलिसांनी अडवला होता. पोलिस बंदोबस्त मोठ्या प्रमाणावर मतमोजणी केंद्रात ठेवण्यात आला होता.

मोबाइल अॅप डाउनलोड करा आणि राहा अपडेट

‘ओव्हरलोड’ ५ टक्के जादा

February 23, 2016, 1:30 pm

≫ Next: ‘मेक इन’मध्ये सतारीचे सूर

≪ Previous: महाराष्ट्र एकीकरण समितीचा बालेकिल्ल्यात पराभव

$

0

0

Raviraj.Gaikwad @timesgroup.com

ट्रकमध्ये वजन मर्यादेनुसार माल भरूनही डिझेल, ट्रकची बॉडी, ताडपत्रीमुळे वाढलेल्या वजनाचा (ओव्हरलोड) फटका ट्रान्स्पोर्ट व्यावसायिकांना होत होता. ओव्हरलोडच्या जाचक दंडातून ट्रान्स्पोर्ट व्यावसायिकांना आता दिलासा मिळणार आहे. ट्रक आणि त्यामध्ये भरलेल्या मालाच्या मर्यादित वजनापेक्षा पाच टक्के अधिक वजन असल्यास त्यांची दंडातून सुटका होणार आहे.

मालवाहतूक ट्रक, टेम्पोमध्ये प्रमाणापेक्षा जास्त माल भरला असल्यास (ओव्हरलोड) प्रादेशिक परिवहन विभागाकडून दंड आकारला जातो. 'ओव्हरलोड'मुळे अपघातांचा धोका असल्याने ही दंडाची तरतूद करण्यात आली आहे. मात्र, प्रत्यक्षात महामार्गावर या नियमाचा वेगळाच परिणाम दिसत होता. अनेक ट्रकमालकांनी सुरक्षेसाठी ट्रकची बॉडी जास्त मजबूत केली आहे. या बॉडीचे वजन, ताडपत्री, रस्सी आणि वाहतुकीच्या वेळी पूर्ण भरलेली डिझेल टाकी यामुळे ट्रकचे पाचशे किलो ते एक टन वजन आपसूकच वाढते. नियामानुसार ट्रकमध्ये माल भरूनही ट्रकचे वाढीव वजन आणि मालाचे वजन एकत्र धरल्याने अनेकांना ओव्हरलोडच्या दंडाचा फटका बसत होता. तसेच टोल नाक्यांवरही दुप्पट टोल आकारणी व्हायची.

ट्रक आणि मालाच्या एकूण वजनात एक ते दीड टन जास्त वजन असल्यास महाराष्ट्रात 'आरटीओ'कडून ओव्हरलोडच्या दंडासाठी अडीच हजार रुपये (ट्रक चालक स्वतः मालक असेल, तर १२५० रुपये) आकारले जातात. प्रत्यक्षात रस्त्यावर मात्र ट्रकचालकांकडून 'चिरीमिरी'वर हा विषय मिटविला जायचा. त्यासाठी अडीच ऐवजी पाचशे, हजार रुपयांवर वेळ मारून नेली जायची. मात्र, जाणीवपूर्वक जादा माल भरलेला नसताना हा दंड कशासाठी भरायचा, असा प्रश्न ट्रान्सपोर्ट व्यवसायिकांपुढे होता. तसेच 'चिरीमिरी'मुळे दंडाची रक्कम सरकारच्या महसूलातही जात नव्हती. त्यामुळे डिझेल, ट्रकची बॉडी याचा विचारकरून मालाच्या काही टक्के अधिक वजनावर सवलत मिळाली, अशी ट्रान्सपोर्ट व्यवसायिकांची मागणी होती. ती सरकारने मान्य केली आहे.

आठवी पासची अट रद्द

ओव्हरलोडच्या सवलती बरोबरच ऑल इंडिया परमिटच्या गाडीवर दोन ड्रायव्हरची असणारी सक्ती सरकारने रद्द केली आहे. तसेच अवजड वाहन चालविण्यासाठीचा परवाना घेताना, किमान शिक्षण आठवी पास असण्याची अट होती. या अटीमुळे ट्रान्सपोर्ट व्यवसायात चालकांचा मोठी चणचण भासत आहे. याची दखल घेत आठवी पासची ही अट शिथील करण्यात आली आहे. किमान वाहतूक चिन्हे ओळखता येणाऱ्याला आता अवजड वाहन चालविण्याचा परवाना मिळणार आहे.

अनेक वर्षांपासून ट्रान्सपोर्ट व्यावसायिकांनी या दंडातून मुक्तता व्हावी, अशी मागणी सरकारकडे केली होती. त्याला यश आले. सरकारचा हा निर्णय निश्चितच समाधानकारक आहे. -हेमंत डिसले, सचिव, कोल्हापूर डिस्ट्रिक्ट लॉरी ऑपरेटर्स असोसिएशन

मोबाइल अॅप डाउनलोड करा आणि राहा अपडेट

‘मेक इन’मध्ये सतारीचे सूर

February 23, 2016, 10:08 am

≫ Next: समीरवर ८ मार्चला दोषारोप निश्चिती

≪ Previous: ‘ओव्हरलोड’ ५ टक्के जादा

$

0

0

मिरज : भारतीय तंतुवाद्याचे माहेरघर असलेल्या मिरज शहराला मुंबईतील मेक इन इंडिया, प्रदर्शनात सहभागी होण्याचा बहुमान मिळाला होता. आपल्या तंतुवाद्य निर्मितीने संपूर्ण जगात भारताचा नावलौकिक वाढविणाऱ्या सतारमेकर घराण्यातील जुबेर सतारमेकर यांचा स्टॉल प्रदर्शनात लक्षवेधी ठरला. पंतप्रधान नरेंद्र मोदी यांनी सतारमेकर यांच्या स्टॉलला भेट देऊन त्यांचे कौतुक केले. जुबेर सतारमेकर यांनी प्रदर्शन काळात आपल्या सतारीवर सुरेल सूर छेडून उपस्थितांची मने जिंकली.
प्रदर्शनात जुबेर सतारमेकर यांना अमेरिकेसह अन्य देशातून तब्बल ५० सतारींची मागणी आली आहे. मिरजेसाठी ही अभिमानाची बाब असून, सर्व सतारमेकर बंधू यापुढेही संगीत क्षेत्रात नवनवीन वाद्य निर्मितीसाठी प्रयत्नशील राहतील, असा विश्वास जुबेर सतारमेकर यांनी व्यक्त केला आहे.

मोबाइल अॅप डाउनलोड करा आणि राहा अपडेट

---

समीरवर ८ मार्चला दोषारोप निश्चिती

February 23, 2016, 11:53 am

≫ Next: ‘उस्तादां’सोबत घुमणार कोल्हापूरची हलगी

≪ Previous: ‘मेक इन’मध्ये सतारीचे सूर

$

0

0

म. टा. प्रतिनिधी, कोल्हापूर

ज्येष्ठ नेते कॉ. गोविंद पानसरे हत्येतील प्रमुख आरोपी सनातन संस्थेचा साधक समीर गायकवाड हा सुरक्षिततेच्यादृष्टीने कळंबा कारागृहातील अंडासेलमध्ये राहील, असे कोर्टाने स्पष्ट केले. समीरला सकाळी दोन तास अंडासेलमधून इतर कैद्यांसमवेत बाहेर ठेवण्याची सूट कोर्टाने दिली आहे. दरम्यान, समीरवर पुढील आठ मार्च रोजीच्या सुनावणीच्यावेळी पानसरे हत्येतील प्रमुख आरोपी म्हणून दोषारोपपत्र ठेवण्यात येणार आहे.

सत्र न्यायाधीश एल.डी. बिले यांच्यासमोर मंगळवारी कोर्टात सुनावणी झाली. कोर्टाने आठ मार्च रोजी समीरवर दोषारोपपत्र ठेवले जाईल, असे स्पष्ट केले. समीरच्या तपासावर आम्ही नाखूष आहोत, असे पानसरे कुटुंबियांचे वकील विवेक घाटगे यांनी सांगितले. प्रथम पूर्ण तपास करावा, मग दोषारोप पत्र ठेवावे, अशी विनंती केली. तसेच या संबधी मुंबई हायकोर्टात याचिका दाखल करणार असल्याचे सांगितले.

दरम्यान, मागील सुनावणीच्यावेळी समीरला अंडासेलमधून बाहेर काढावे असा अर्ज समीरचे वकील समीर पटवर्धन यांनी केला होता. याबाबत कोर्टाने कारागृह अधीक्षकांचे मत मागवले होते. त्यानुसार कारागृह अ​धीक्षकांनी अहवाल पाठवला. समीरने कारागृहात गैरवर्तन केल्याने व तो संवेदनशील गुन्ह्यातील आरोपी असल्याने त्याला अंडासेलमध्ये ठेवणे महत्वाचे आहे. रोज सकाळी सहा ते सात या वेळेत व्यायामासाठी व सकाळी दहा ते दुपारी तीन वाजेपर्यंत इतर कैद्यांसमवेत अंडासेलमधून बाहेर काढले जाते, असा अहवालात उल्लेख आहे. कोर्टाने अहवालाची माहिती देत यापूर्वी समीरचे वकील अॅड संजीव पुनाळेकर यांनी समीरला बिंदू चौक सबजेलमध्ये ठेवण्याऐवजी कळंबा कारागृहात ठेवण्याची विनंती कोर्टाला केली होती. असे असताना अचानक त्याला अंडासेलमधून बाहेर काढावे हे म्हणणे चुकीचे आहे असे समीरच्या वकिलांना समजावले. यापुढे सकाळी व्यायामानंतर दोन तास त्याला अंडासेलच्या बाहेर ठेवावे, असा आदेश कोर्टाने दिला.

अंडासेलमध्येच ठेवणार

समीर गायकवाडला अंडासेलमध्ये ठेवण्याचा निर्णय मंगळवारी कोर्टाने दिला. समीरचे मानसिक संतुलन बिघडले असल्याने त्याला अंडासेलमधून बाहेर काढावे, असा अर्ज समीरच्या वकिलांनी दिला होता. मात्र कारागृह प्रशासनाने समीरला अंडासेलमधून बाहेर काढण्यास असमर्थता दर्शवली आहे. तसेच पंधरा दिवसांपूर्वी कारागृहाला जिल्हाधिकारी अमित सैनी यांनी भेट दिली होती. यावेळी तुला काही त्रास होतो का, असे जिल्हाधिकारी सैनी यांनी समीरला विचारले होते. पण त्याने त्रास होत नसल्याचे सांगितले होते, असा उल्लेखही अहवालात करण्यात आला आहे.

मोबाइल अॅप डाउनलोड करा आणि राहा अपडेट

‘उस्तादां’सोबत घुमणार कोल्हापूरची हलगी

February 24, 2016, 1:30 pm

≫ Next: नगरसेवक बनले विद्यार्थी

≪ Previous: समीरवर ८ मार्चला दोषारोप निश्चिती

$

0

0

म. टा. प्रतिनिधी, कोल्हापूर

तबलानवाज म्हणून जगभर ख्याती असलेल्या उस्ताद झाकीर हुसेन यांच्या पसंतीची पावती मिळवत कोल्हापूरचे हलगीवादक संजय आवळे रविवारी (ता. २८ फेब्रुवारी) थेट मुंबईतील पृथ्वी थिएटरमध्ये झाकीरहुसेन यांच्यासोबत हलगी वाजवणार आहेत. ज्येष्ठ अभिनेते श​शी कपूर यांच्या वाढदिवसानिमित्त दरवर्षी होणाऱ्या संगीत रजनीमध्ये यावर्षी नाट्यगीताची मैफल रंगणार आहे. 'कट्यार काळजात घुसली'फेम महेश काळे आणि आनंद भाटे यांच्या नाट्यगीताला झाकीर हुसेन यांची तबलासाथ असेल. आणि याच कार्यक्रमाच्या स्वागताची हलगी वाजवण्याचा सन्मान कोल्हापूरच्या संजय आवळे यांना दस्तूरखुद्द हुसेन यांनीच दिला आहे.

संजय आवळे गेल्या वीस वर्षांपासून कोल्हापुरात हलगीवादन करतात. सांस्कृतिक कार्यक्रम, लग्नसोहळ्यातील विधी अशा कार्यक्रमात कोल्हापुरात हमखास संजय यांची हलगी घुमते. जेमतेम परिस्थितीत संजय हलगीवादन करून संसाराचा गाडा ओढतात. तबलावादनात जगप्रसिद्ध असलेल्या उस्ताद झाकीर हुसेन यांच्यासारख्या दिग्गज कलाकाराला संजय यांच्या हलगीच्या तालाने भूरळ घातली आणि थेट पृथ्वी थिएटरमध्ये होणाऱ्या कार्यक्रमासाठी संजय यांना निमंत्रित करण्यात आले आहे.

कपूर घराण्यातील अभिनेते पृथ्वीराज कपूर यांच्या स्मरणार्थ उभ्या असलेल्या पृथ्वी थिएटरमध्ये दरवर्षी मोठा सोहळा होतो. यावेळी सिनेमा व संगीत क्षेत्रातील मान्यवर उपस्थित असतात. यानिमित्ताने सांस्कृतिक कार्यक्रमांचे आयो​जन करण्यात येते. यावर्षी नाट्यगीताची खास मैफल होणार आहे. 'कट्यार..'फेम गायक महेश काळे आणि आनंद भाटे यांच्या गायनाला उस्ताद झाकीर हुसेन यांची तबलासाथ अशी पर्वणी रसिकांना या मंचावर अनुभवता येणार आहे. या कार्यक्रमातच एक वेगळा आणि पारंपरिक वादनप्रकार म्हणून संजय आवळे यांच्या हलगीवादनाचा नाद घुमणार आहे.

झाकीर हुसेन यांचे वडील प्रख्यात तबलावादक अल्लारखाँ खान यांच्या स्मृतिनिमित्त झाकीर हुसेन दरवर्षी एक नवे वाद्य रसिकांसमोर आणतात. त्या-त्या वाद्यप्रकारातील कलाकारांना संधी देतात. काही दिवसांपूर्वी झाकीर हुसेन यांची कोल्हापुरात मैफल झाली होती. त्यावेळी गुणीदास फाउंडेशनचे संचालक आणि तबलावादक राजप्रसाद धर्माधिकारी यांनी संजय आवळे यांच्या हलगी वादनाने मैफलीचे स्वागत केले. त्यावेळीच झाकीर हुसेन यांच्यातील कानसेनाने संजय यांच्या हलगी वादनाचे सूर पारखले. हलगी लक्षात ठेवून खुद्द हुसेन यांनीच धर्माधिकारी यांच्याशी संपर्क साधून संजय यांच्या हलगी वादनाचा व्हिडिओ पाठवण्याची विनंती केली. त्यानुसार संजय यांच्या हलगी वादनाचा व्हिडिओ पाठविण्यात आला. त्यानंतर तत्काळ हुसेन यांच्याकडून संजय यांना निमंत्रित करणारे पत्र मिळाले.

आयुष्यातील अविस्मरणीय क्षण

संजयचे घराणे हलगीवादनाचे. लहानपणापासूनच संजय यांचे हात हलगीसोबत सराईतपणे बोलतात. तरीही ज्या मंचावर झाकीर हुसेन यांचे तबलावादन होणार आहे, महेश काळे यांच्यासारख्या कसलेल्या शास्त्रीय गायकाचे सूर बरसणार आहेत, आनंद भाटे यांच्यासारखा कलाकार साथीला असणार आहे, त्याच ठिकाणी संजय यांच्या हलगीवादनाने मैफलीचे स्वागत होईल. हा आयुष्यातील अविस्मरणीय क्षण असल्याची भावना संजय यांनी व्यक्त केली.

'कोणत्याही कलाकारासाठी पृथ्वी थिएटरमध्ये आयुष्यात एकदा तरी कला सादर करता यावी हे स्वप्न असते. माझ्या आयुष्यात पृथ्वी ​​थिएटरचा मंच आणि उस्ताद झाकीर हुसेन यांची साथसंगत असा दुहेरी योग जुळून आला आहे. या संधीचे सोनं करण्यासाठी मी आजवरच्या हलगीवादनातील बेस्ट देणार आहे.'

संजय आवळे

मोबाइल अॅप डाउनलोड करा आणि राहा अपडेट

नगरसेवक बनले विद्यार्थी

February 24, 2016, 1:30 pm

≫ Next: स्कायवॉक बांधा, वाहतूक सुधारा

≪ Previous: ‘उस्तादां’सोबत घुमणार कोल्हापूरची हलगी

$

0

0

म. टा. प्रतिनिधी, कोल्हापूर

महापालिकेच्या नव्या सभागृहाची स्थापना होऊन तीन महिने उलटले. सभागृहातील साठहून अधिक सदस्य पहिल्यांदाच प्रतिनिधीत्व करत आहेत. शहरवासियांचे प्रतिनिधीत्व करणारे हे सगळे बुधवारी विद्यार्थी बनले. महापालिकेच्या नियमावली, सभागृहाच्या कामकाजाची माहिती घेत त्यांनी जबाबदारीचे धडे गिरवले. दिवसभर झालेल्या प्रशिक्षणवर्गात सभागृह आणि बाहेरील कामकाजाची माहिती त्यांनी घेतली. विविध समित्यांच्या कार्यकक्षा, पदाधिकाऱ्यांच्या भूमिकांची माहिती यावेळी देण्यात आली.

मुंबईच्या अखिल भारतीय स्थानिक स्वराज्य संस्थेच्यावतीने हॉटेल वूडलँड येथे प्र​​शिक्षण वर्ग झाला. महापालिकेच्या नूतन सदस्यासाठी आयोजित प्रशिक्षण वर्ग नगरसेवकांच्या हजेरीने फुल्ल भरला. महापौर अश्विनी रामाणे यांच्या अध्यक्षतेखाली सकाळी ११ वाजता याचे उदघाटन झाले. अखिल भारतीय स्थानिक स्वराज्य संस्थेचे अध्यक्ष रणजित चव्हाण यांनी नगरसेवकांची जबाबदारी व नागरिकांप्रती कर्तव्ये या विषयावर मार्गदर्शन केले. 'शहर विकासाची जबाबदारी नगरसेवकांवर आहे. लोकप्रतिनिधी म्हणून प्रतिनिधीत्व करताना पक्षीय विचार बाजूला ठेवला पाहिजे. शहराच्या भविष्याचा वेध घेत रचनात्मक कार्याची सुरूवात करायला पाहिजे. सभागृहात प्रत्येक सदस्याचा सहभाग महत्वाचा असला पाहिजे. सदस्यांनी अभ्यासूवृत्ती जोपासली पाहिजे.' असे चव्हाण यांनी नमूद केले.

महापालिकेची नियमावली, सरकारी धोरणांची अंमलबजावणी, योजना या संदर्भात नगरसेवक भूपाल शेटे, पूजा नाईकनवरे, उमा बनछोडे, नियाज खान यांनी माहिती घेतली. मुंबई महापालिकेचे निवृत्त नगरसचिव श्रद्धानंद आजगावकर, संस्थेच्या प्रशिक्षण विभागाचे संचालक लक्ष्मणराव लटके यांनी मार्गदर्शन केले. शरद मिराशी यांनी राज्य घटनेने ठरवून दिलेल्या सदस्यांच्या अधिकाराबाबत माहिती दिली. दिवसभराच्या सत्रात मार्गदर्शन केले. महापालिकेच्या रचना व कार्य विभागाचे अध्यक्ष संजय भोसले यांनी स्वागत केले. उपायुक्त विजय खोराटे यांनी प्रास्ताविक केले. तौफिक मुल्लाणी यांनी आभार मानले.

मोबाइल अॅप डाउनलोड करा आणि राहा अपडेट

स्कायवॉक बांधा, वाहतूक सुधारा

February 24, 2016, 1:30 pm

≫ Next: सेवा दलाचा रविवारी अमृतमहोत्सवी मेळावा

≪ Previous: नगरसेवक बनले विद्यार्थी

$

0

0

म. टा. वृत्तसेवा, कोल्हापूर शहरांतर्गत वाहतूक व्यवस्थेचा प्रश्न सध्या ऐरणीवर आहे. वाहनांची संख्या वाढली असली तरी रस्त्यांचे रुंदीकरण झालेले नाही. त्यामुळे पार्किंगचा मोठा प्रश्न निर्माण झाला असून वाहतुकीवरही त्याचा मोठा परिणाम होत आहे. यादृष्टीने ठोस निर्णयाची आवश्यकता आहे. शहराचे बजेट मांडले जात असताना वर्दळीच्या ठिकाणी उड्डाणपूल उभारणे ही काळाची गरज झाली आहे. स्कॉयवॉक, पार्किंगचे नियोजन, रस्त्यांचे रुंदीकरण, अतिक्रमणे हटविण्याबरोबर चौकांच्या सुशोभिकरणावर भर देण्याची गरज आहे. केएमटीसारख्या सार्वजनिक वाहतूक व्यवस्थेला निधी देऊन सक्षम केल्यास वाहतूक सुरळीत होण्यास मदत होईल. शहरातील वाहनांची वर्दळ व रस्त्यांवर होणारी कोंडी पाहता गर्दीच्या ठिकाणी उड्डाणपूल झाले पाहिजेत असे प्रकर्षाने जाणवते. त्यामुळे वाहतूक सुरळीत होण्यास मदत होणार असून महापालिकेने त्याचे नियोजन करावे. अंतर्गत रस्त्यांची डागडुजी झाली पाहिजे. अनेक उद्याने व चौकांची अवस्था पाहिल्यास त्यांच्या सुशोभीकरणासाठी महापालिकेने प्रयत्न केले पाहिजेत. रंकाळा, कोटीतीर्थ, पंचगंगा नदी हे पाण्याचे स्रोत कायमस्वरुपी स्वच्छ ठेवण्यासाठी तरतूद व्हावी अशी मागणी सूरज मोरे, टेंबे रोड यांनी केली. तर शहरातील रस्ते अगदी जुन्या काळापासून जैसे थे आहेत. रुंद रस्ते क्वचितच दिसतात. अरुंद रस्त्यांवरील वाहनांमुळे प्रचंड कोंडी होते. त्यामुळे लहान रस्त्यांचे रुंदीकरण अत्यावश्यक आहे. त्यासाठी महापालिकेनेच तरतूद करून मार्ग काढला पाहिजे. त्यांच्याबरोबरच उड्डाणपुलांची गरजही पूर्ण करण्यासाठी प्रयत्न केले पाहिजेत. एकीकडे रस्ते रुंद झाल्याची मागणी करत असताना वाहनांच्या वेगावर मर्यादा राखण्याची गरज आहे. अतिक्रमण हटविण्यासाठी यंत्रणा राबवण्याची गरज आहे. यंग सीनिअर्ससाठी रस्त्यांवर स्वतंत्र काही व्यवस्था करता येते का याचा विचार केला जावा अशी मागणी मधुकर पाटील, रविवार पेठ यांनी केली. वाहनांच्या संख्येत वाढ, त्यामुळे रस्त्यावर होणारी कोंडी, त्यातून होणारे प्रदूषण याचा विचार करतो. पण त्या रस्त्यावरुन चालणाऱ्या पादचाऱ्यांचा विचार होत नाही. अनेक वर्दळीच्या रस्त्यांवर त्यांच्यासाठी फुटपाथ नाहीत. महापालिकेजवळील चौकामध्ये तर स्कायवॉक झाला पाहिजे. पापाची तिकटी सारख्या गजबजलेल्या रस्त्यावर अस्ताव्यस्त पार्किंग होत असते. त्यामुळे अनेकांना त्रास सहन करावा लागतो. पार्किंगसाठी धोरण राबवले गेल्यास रस्त्यावरील वाहतूक सुरळीत होण्यास मदत होईल असे वसीम तांबोळी, पापाची तिकटी याने सांगितले. अनेक वर्षानंतर मुख्य रस्त्यांसाठी वेगवेगळ्या योजनांमधून शहरासाठी निधी मिळाला. पण अंतर्गत रस्ते करण्याची जी जबाबदारी महापालिकेवर आहे. त्याकडे दुर्लक्ष केले जात आहे. अनेक रस्त्यांवरील खड्डे कायमचे आहेत. तिथून पादचारीही जाण्यास धजावत नाहीत. ही दुरवस्था संपवण्यासाठी देखभाल कायमची हवी. उपनगरांमध्ये ड्रेनेज व सांडपाण्याची व्यवस्था, किटकनाशकाची फवारणी हवी, अभ्यासिका सुरू करणे, उपनगरांमध्ये उद्याने विकसीत करण्याबाबत बजेटमध्ये तरतूद व्हावी अशी अपेक्षा गुरुप्रसाद डासाळकर, सानेगुरुजी वसाहत यांनी व्यक्त केली. अनेक भाविक, पर्यटक शहरात येत असतात. पण त्यांना कोठुन कुठे जायचे याचे दिशादर्शक नाहीत. अनोळखी नागरिक ठिकठिकाणी विचारणा करत प्रवास करतात. त्यासाठी महापालिकेने सर्व रस्त्यांवर फलक लावण्याची व्यवस्था करावी. कावळा नाका ते लक्ष्मीपुरी दरम्यानच्या रस्त्यावर होणारी कोंडी कमी करण्यासाठी उपाय शोधावा. शिवाजी पुलाचे काम पूर्ण करण्याबरोबरच शहरातील विविध ठिकाणच्या अनाधिकृत पार्किंगबाबत निर्णय घ्या असे भिकाजी मंडलिक, मंडलिक वसाहत यांनी सांगितले. वाहतुकीची समस्या सोडवण्यासाठी विविध पर्यायांबरोबर दिल्लीमधील सम विषम क्रमांकाच्या वाहनांचा प्रयोग येथे प्रायोगिक तत्वावर राबवला जावा. अवजड वाहनांना शहरामध्ये येण्यास वेळेचे बंधन असावे. गंगावेश, मिरजकर तिकटी परिसरातील वाहतुकीचा प्रश्न अनेकदा जनावरांमुळे तयार होतो. त्यांच्यावर नियंत्रण आणण्यासाठी उपाय करावा. तसेच रस्त्याच्या दुतर्फा असलेल्या पार्किंगवर नियंत्रण ठेवावे असे विशाखा गंगाधरे, कसबा बावडा यांनी सांगितले. वीज वाचवण्यासाठी एलईडी बल्ब सर्वत्र वापरले जात आहेत. महापालिकेकडूनही बसवले जात आहेत. पण अनेक भागात ते बसवलेले नाहीत. याकरिता शहरासाठी म्हणून एखादी योजना करुन संपुर्ण शहरात स्ट्रिट लाईटसाठी एलईडी बल्ब बसवण्याची योजना करावी. भाजी मंडईच्या परिसरातील अतिक्रमणे काढल्यास नागरिकांना सुविधा होईल. अंतर्गत रस्त्यांची सुविधा द्यावी तसेच स्पीड ब्रेकरही हवेत असे दिपाली शिंदे, रविवार पेठ यांनी सांगितले. शहरात सध्या कचऱ्याचा प्रश्न गंभीर बनत आहे. अनेक ठिकाणाहून कचऱ्याचा उठाव नीट केला जात नाही. तिथे कचऱ्याचे ढिग साठलेले पहायला मिळतात. त्यासाठी घनकचरा व्यवस्थापनाबाबत निर्णय आवश्यक आहे. महापालिकेकडून आरोग्याच्या सुविधाही दिल्या पाहिजेत. महिलांकरिता सार्वजनिक शौचालयांची उभारणी करण्याची गरज आहे. ड्रेनेज सिस्टिम सुधारण्याची आवश्यकता झाली आहे. वाचनालय, वाय फाय सिटीच्या सुविधा उपलब्ध करुन दिल्या पाहिजेत असे कमलाकर बोभाटे, रामानंदनगर यांनी सांगितले.

मोबाइल अॅप डाउनलोड करा आणि राहा अपडेट

सेवा दलाचा रविवारी अमृतमहोत्सवी मेळावा

February 24, 2016, 1:30 pm

≫ Next: ‘पैसे शेतकऱ्यांचे अन् मांडव भाजपाचा’

≪ Previous: स्कायवॉक बांधा, वाहतूक सुधारा

$

0

0

म. टा. प्रतिनिधी, कोल्हापूर

तरुणाईमध्ये लोकशाही, समाजवाद आणि धर्मनिरपेक्षता ही मूल्ये रुजवणाऱ्या राष्ट्र सेवा दलाचा अमृतमहोत्सव साजरा करण्यात येणार आहे. त्या‌निमित्त कोल्हापुरात रविवारी (ता.२८) मेळाव्याचे आयोजन केले आहे. यासाठी राज्यभरातून सेवादलाचे कार्यकर्ते उपस्थित राहणार आहेत.

कोरगावकर हायस्कूल येथे होणाऱ्या मेळाव्याच्या अध्यक्षपदी ज्येष्ठ नेते भाई वैद्य असतील. ज्येष्ठ सामाजिक कार्यकर्त्या मेधा पाटकर, प्रा. डॉ. एन. डी. पाटील, पन्नालाल सुराणा, डॉ. सुनीलम, महाराष्ट्र राज्य सेवा दलाचे अध्यक्ष राजा अवचट, माजी खासदार कल्लाप्पाण्णा आवाडे, आदी उपस्थित राहणार आहेत.

पहिल्या सत्रात 'धर्मनिरपेक्ष लोकशाहीला आव्हान धर्मांधतेचे' या विषावर परिसंवाद होणार आहे. या परिसंवादाचे अध्यक्ष डॉ. अभिजित वैद्य आहेत, तर डॉ. राजन गवस, प्रा. डॉ. राजेंद्र कुंभार, अॅड. असिम सरोदे आदींचा सहभाग असेल.

मेळाव्यात सेवा दलाचे ज्येष्ठ कार्यकर्ते आणि विविध क्षेत्रात काम करणाऱ्या व्यक्तींचा सन्मान करण्यात येणार आहे. यावेळी विशेषांकाचेही प्रकाशन करण्यात येणार आहे. मेळाव्यासाठी कोल्हापूर आणि सांगली जिल्ह्यातून तीन ते चार हजार कार्यकर्ते उपस्थित राहणार असल्याची माहिती राष्ट्र सेवा दलाच्या अमृत महोत्सव समितीने दिली आहे.

मोबाइल अॅप डाउनलोड करा आणि राहा अपडेट