दोन्ही काँग्रेसने कोल्हापूर भकास केल्याचा पालकमंत्र्यांचा आरोप
म. टा. प्रतिनिधी, कोल्हापूर
'गुंडगिरी, खंडणी बहाद्दरांचा भरणा, पाकिट संस्कृती ही शिवसेनेचे पूर्वापार संस्कृती आहे. त्यांची सुरुवातच यातून झाली आहे' असा आरोप भाजपचे नेते, पालकमंत्री चंद्रकांत पाटील यांनी केला. 'शिवसेना किती सोज्वळ आहे, हे माहिती आहे. भाजप-शिवसेनेची युती तोडण्यासाठी आमदार राजेश क्षीरसागरांना कोणी सुपारी दिली होती असा प्रश्न मनात येतो. त्यांनी भारतीय जनता पक्षाला शिकवू नये' असा टोलाही त्यांनी 'महाराष्ट्र टाइम्स'च्यावतीने आयोजित 'चॅट रुम'मध्ये लगावला.
प्रश्न : कोल्हापूरच्या विकासाची तुमची काय भूमिका ?
तुंबलेले गटर आणि हाकेला धाऊन येणारा नगरसेवक अशी पारंपरिक, मर्यादित संकल्पना आता बदलली आहे. स्वतःच्या खिशातून पैसे खर्च करणारा नगरसेवक हवा. प्रलंबित कामासाठी नगरसेवकांच्या माणसांनीच कामे पूर्ण केली पाहिजेत. पाचपैकी चार माणसे नगसेवकांची असायला हवीत. सध्या महापालिकेची आर्थिक स्थिती कंगाल आहे. महापालिकेत भाजप युतीची सत्ता आल्यास प्रत्येक माणसांसह शहर श्रीमंत केले जाणार आहे. प्रत्यक्ष नागरिकांवर कोणत्याही प्रकारचा कर लावणार नाही. प्रसंगी काही नियमात बदल करू. महापालिकेची आर्थिक स्थिती भक्कम करण्यासाठी प्रयत्न करू. कचऱ्यापासून वीजनिर्मिती केली जाईल. कचऱ्यापासून वीज निर्मितीचा सुमारे दीडशे कोटी रुपयांचा प्रकल्प आहे. पूर्णपणे बीओटी तत्त्वावर हा प्रकल्प राबविला जाईल. हा प्रकल्प झाल्यास महापालिकेची स्ट्रीट लाइटचे सुमारे दोन कोटी रुपयांचे बिल वाचणार आहे. वीज महावितरणला विकता येईल. महापालिकेच्या सर्व इमारती, ओपन पॅसेजच्या ठिकाणी सोलर दिवे लावता येतील. सांडपाण्याचा पुर्नवापर करणे शक्य आहे. तीर्थक्षेत्र विकास आराखडा तयार आहे. कोल्हापूरला पर्यटनाचा दर्जा देऊन आकर्षणाचे केंद्र केले जाईल. त्यासाठी दहा प्रकल्प राबवले जातील.
महापालिका निवडणुकीत भाजप-सेना युती का नाही ?
भाजप-शिवसेनेच्या नेत्यांची महापालिकेतील युतीबाबत झालेली बैठक सकारात्मक झाली. मात्र ती युती मोडण्याचे काम शिवसेनेने केले. भाजपच्या नेत्यांवर आरोप सुरू केले. अमित शहा अफझलखान, भाजप पाण्याबरोबर वाहून जाणारा ओंडका असल्याच्या आरोपांची पत्रकबाजी, आरोप झाले. शिवसेनेने केलेल्या आरोपांमुळे भाजप दुरावत गेला. त्यासाठी आमदार राजेश क्षीरसागर यांना कोणी सुपारी दिली होती का, असा प्रश्न निर्माण होतो. शिवसेना सोज्वळ आहे, असे नाही. हिंदुत्वाच्या नावाखाली पंधरा दिवसांपूर्वी मुंबईत गोंधळ घातला. मुंबईत सुधींद्र कुलकर्णी यांच्यावर शाई फेकली. अशा कृत्याला त्यांनी राष्ट्रवाद म्हणण्यास सुरूवात केली. शिवसेनेची सुरुवात गुंडगिरी, पाकिट संस्कृती आणि खंडणीतून झाली. त्यांची ती पूर्वीपासून संस्कृती आहे. त्यामुळे राज्यात भाजपची शिवसेनेसोबत युती असताना महापालिका निवडणुकीत ताराराणी पक्षासोबत युती करावी लागली. आमच्याकडे दोन पर्याय आहेत. दोस्तीचे दोन प्रकार आहेत. शिवसेना नैसर्गिक मित्र असला तरी पर्यायी मैत्रीचा मार्गही खुला आहे. नैसर्गिक मैत्रीत दगा मिळाल्यास पर्यायी मैत्री खुली आहे. दरवेळीला आम्हीच सत्तेची काळजी करावी असे नाही.
सत्तेत शिवसेना मित्रपक्ष आहे. मग आरोप का सुरू आहेत ?
गेले पंचवीस वर्षे शिवसेना मोठा भाऊ तर भाजप लहान भाऊ असे चित्र आहे. मात्र मोठ्या भावाचे लहान भावावर प्रेम, आदर असल्याचे कुठेच दिसले नाही. भाजप कमकुवत आहे, असा गैरसमज निर्माण करून कायम दु्य्यम वागणूक मिळाली. ही वागणूक दुसऱ्या, तिसऱ्या फळीतील कार्यकर्त्यांना सहन होत नव्हती. त्यामुळेच राज्यात युती झाली नाही. नंतर तेच कोल्हापूरच्या बाबतीत झाले. काही कार्यकर्त्यांचा युती करायला विरोध होता. आजही शिवसेनेला या जगात शहाणी मी, आमच्याकडेच कर्तृत्वान कार्यकर्ते आहेत, असे वाटते. त्यांनी गेल्या काही निवडणुकीत कोल्हापूरात जागा वाटपात आम्हाला नगण्य समजले. आमच्या कार्यकर्त्यांना संधी दिली नाही. त्यामुळे कार्यकर्ते नाराज होते. आम्हाला युतीत रहायचे नाही, अशी टिका, त्यातून आरोप-प्रत्यारोप सुरु झाले. तरीही आम्ही शांत होतो. उत्तर देत नाही म्हणजे आम्ही कमकुवत आहोत असे त्यांना वाटू लागले. त्यातून सेनेने सतत आरोप केले. त्यामुळेच टीकेला प्रत्युत्यर देण्याची वेळ आली.
सत्ता आल्यावर तुमची भूमिका काय असेल ?
आमची सत्ता आल्यास नवे प्रकल्प आणले जातील. चार चांगले प्रकल्प पारदर्शीपणे, वेळेत पूर्ण केले जातील. एक रुपयाही भ्रष्टाचार होणार नाही ही आमची हमी आहे. कोणत्याही प्रकल्पात पैसे खाल्ले नाहीत अशी प्रतिक्रिया सर्वसामान्य नागरिकांतून येईल. त्यामुळे नकारात्मक दृष्टिकोन आपोआप कमी होईल. विनाकारण आंदोलने होणार नाहीत. चांगली माणसं निवडून आली तर पैसे खाण्याचा प्रश्नच निर्माण होणार नाही. सध्या महिला बचत गटांना काहीही दिशा नाही. त्यांना हक्काची बाजारपेठ उपलब्ध करून देऊ. त्याचे व्हीजन तयार आहे. दोन महिन्यात खासगी विमानसेवा सुरू होईल. विमानतळ विस्तारीकरणही होईल.
कोल्हापूरच्या सद्यस्थितीबद्दल तुम्हाला काय वाटते?
महापालिकेत सत्तेत असलेल्या काँग्रेस-राष्ट्रवादीला विकासाचे व्हिजन नव्हते. राजकीय प्रबळ इच्छाशक्ती, पारदर्शकता कमी पडली. प्रत्येक प्रकल्पात पैसे खाण्याची नेत्यांची प्रवृत्ती राहिली. एसटीपी प्रकल्प, थेट पाइपलाइन, आयआरबीचा रस्ते प्रकल्प यामध्ये इच्छाशक्तीचा अभाव राहिला. ढपल्यासाठी प्रकल्पांचा वापर केला.
कोल्हापूर अमृत योजना, स्मार्ट सिटीत का नाही ?
राष्ट्रवादी काँग्रेसची खोटे बोला, पण रेटून बोला अशी पद्धती आहे. २०१४ मध्ये काँग्रेस सरकारने कोल्हापूरचे नावच पाठविले नाही. मात्र, आमच्या सरकारने अमृत योजनेत कोल्हापूरचा समावेश करण्यासाठी निर्णय घेऊन प्रस्ताव पाठविला. मोदी सरकारच्या काळात मेरिटवर काम चालते. वशिला चालत नाही. काँग्रेस-राष्ट्रवादीच्या काळात वशिला चालत होता. थेट पाइपलाइनसाठी परवानगी न घेता वर्कऑर्डर दिल्या. थेट पाइपलाइन पूर्ण झाल्याशिवाय निवडणूक लढविणार नसल्याची घोषणा काहींनी केली होती. ती पूर्ण करण्यासाठी परवाने न घेताच उद‍्घाटनाचा नारळ फोडला.
भाजपविरोधात शिवसेना-काँग्रेस-राष्ट्रवादी एकत्र का ?
आमच्या विरोधात या तीन पक्षांनी गट्टी केली आहे हे एखादा लहान मुलगाही सांगेल. भारतीय जनता पक्ष सक्षम, प्रबळ आहे. भाजप-ताराराणी आघाडी सत्तेवर येणार हे स्पष्ट झाल्याने विरोधकांच्या पायाखालची वाळू घसरल्याने काँग्रेस, राष्ट्रवादी काँग्रेस आणि शिवसेनने भाजपला लक्ष्य केले आहे. तिघे एकत्र आले तरी भाजपचा विजय निश्चित आहे. कसबा बावड्यात सेनेची हवा असताना त्यांनी प्रबळ उमेदवार दिले नाहीत यावरून ते लक्षात येते.
तुमचा नेमका शत्रू कोण?
आमचा मूळ शत्रू राष्ट्रवादी काँग्रेस पक्ष आहे. आमची स्पर्धा त्यांच्याबरोबर राहील. तो दुसऱ्या क्रमांकावर राहील. काँग्रेस आणि शिवसेना तिसऱ्या क्रमांकावर जातील. या निवडणुकीत पुन्हा संधी द्या असे काँग्रेस - राष्ट्रवादीकडून आवाहन केले जाते. त्यांनी चांगली कामे केली असतील तर मते मागण्याची वेळच आली नसती. जनतेने त्यांना पाठिंबा दिला असता. जनता आमच्या पाठिशी आहे. सत्ता आमचीच येईल. सत्तेवर आल्यानंतरही आम्ही मित्रपक्ष म्हणून सेनेला सोबत घेऊ.
टोलमुक्तीची चालढकल सुरू असल्याचा आरोप होत आहे ?
भारतीय जनता पक्ष पूर्णपणे टोलमुक्ती करणार आहे. केवळ निवडणूक डोळ्यासमोर ठेऊन तीन महिन्यांसाठी टोल बंद केलेला नाही. पुर्नमूल्यांकन समिती नेमली आहे. त्याबाबत निर्णय होईल. टोलमुक्तीसाठीचा हा शेवटचा टप्पा आहे. कोल्हापूरची हद्दवाढही करू. मात्र यात औद्योगिक वसाहतींचा समावेश नसेल.
प्रश्न : राष्ट्रवादी काँग्रेसचे नेते हसन मुश्रीफ यांनी तुम्हाला टार्गेट का केले आहे ?
राजकारणात चांगला माणूस आला की राजकारणी माणसांना त्रास होतो. तशीच अवस्था हसन मुश्रीफ यांची झाली आहे. त्यांच्या पाठिमागचा इतिहास पाहिला की इतकी संपत्ती कोठून आली असा प्रश्न पडतो. साधे स्टोह दुरुस्तीचेही दुकान चालवत नसलेल्या हसन मुश्रीफ यांच्याकडे एवढी संपत्ती आली कोठून हे विचार करण्याजोगे आहे. खासगी साखर कारखाना ते कसा उभारू शकले हे पहायला हवे. त्यांचे स्टोव्ह रिपेरिंगचे दुकान होते का? ते शेती करत होते का ? असा प्रश्न पडतो. त्यांनी केडीसीसीच्या कागलमधील शाखेत दोन कोटींचा ढपला पाडला आहे. त्यांचा स्वतः खासगी सहकारी साखर कारखाना आहे. सामान्य माणसांकडून शेअर्सची रक्कम घेऊन पैसे खाण्याचा प्रकार केला आहे. त्यामुळे लाखो रुपयांची माया जमविलेल्या मुश्रीफ यांच्या कारभाराची चौकशी करावी लागेल.
फटकारे...
> भाजप-शिवसेनेची युती मोडण्याचे काम शिवसेनेने केले. अमित शहा अफझलखान, भाजप पाण्याबरोबर वाहून जाणारा ओंडका असल्याच्या आरोपांची पत्रकबाजी, आरोप झाले. त्यामुळे भाजप दुरावला. यासाठी आमदार क्षीरसागर यांना कोणी सुपारी दिली होती का, असा प्रश्न निर्माण होतो.
> शिवसेना नैसर्गिक मित्र असला तरी पर्यायी मैत्रीचा मार्गही खुला आहे. नैसर्गिक मैत्रीत दगा मिळाल्यास पर्यायी मैत्री खुली आहे. दरवेळीला आम्हीच सत्तेची काळजी का करावी?
> क्षीरसागर यांचे मंत्रिपद माझ्यामुळे मंत्रीपद गेल्याचा आरोप शिवसेना करते. मात्र प्रत्यक्षात तसे नाही. मी एवढा मोठा नाही. मंत्रीपदे दोन आणि २० दावेदार यामुळे अनेकांना संधी मिळाली नाही.
> काँग्रेस - राष्ट्रवादीने चांगली कामे केली असतील तर मते मागण्याची वेळच आली नसती. प्रत्येक गोष्टीत कमिशन खाल्ल्यानेे जनतेचा त्यांच्यावरील विश्वास उडाला आहे.
> ताराराणी आघाडीपेक्षा कमी जागा आल्या तरी महापौर भाजपचाच असेल. ४५ जागा आमच्या आघाडीला मिळतील. त्यामुळे विधानपरिषद निवडणूक लढवण्याचा निर्णय भाजप-ताराराणी घेईल.
(शब्दांकन : सचिन यादव)
मोबाइल अॅप डाउनलोड करा आणि राहा अपडेट
