राज्य निवडणूक आयुक्त जे. एस. सहारिया यांची माहिती
म. टा. प्रतिनिधी, कोल्हापूर
'राज्यातील ८० टक्के जिल्हा परिषदा, नगरपालिका, पंचायत समित्यांच्या निवडणुका डिसेंबर २०१६ आणि जानेवारी २०१७ या कालावधीत होणार आहेत,' अशी माहिती राज्याचे राज्याचे निवडणूक आयुक्त जे. एस. सहारिया यांनी दिली.
कोल्हापूर महापालिका निवडणुकीचा आढावा घेण्यासाठी सहारिया यांच्या उपस्थितीत सोमवारी सायंकाळी अधिकाऱ्यांची बैठक झाली. राज्याच्या गृह विभागाचे अप्पर सचिव के. पी. बक्षी, राज्याचे पोलिस महासंचालक प्रविण दिक्षीत, जिल्हाधिकारी अमित सैनी, कोल्हापूर परिक्षेत्राचे विशेष पोलिस महानिरीक्षक संजय वर्मा, निवडणूक निर्णय अधिकारी तथा आयुक्त पी. शिवशंकर, जिल्हा पोलिस अधीक्षक मनोजकुमार शर्मा बैठकीला उपस्थित होते.
सध्या मतदार नोंदणीचा कार्यक्रम सुरू असल्याचे सांगून सहारिया म्हणाले, 'डिसेंबर २०१६ मध्ये होणाऱ्या जिल्हा परिषद, पंचायत समिती, नगरपालिका निवडणुकीसाठी नाव नोंदणी, मतदार यादीत दुरूस्ती करण्याची मोठी संधी उपलब्ध आहे. आठ ऑक्टोबर ते नऊ नोव्हेंबर २०१५ या कालावधीत मतदार नोंदणीचा कार्यक्रम आहे. हीच मतदार यादी त्या निवडणुकीसाठी वापरण्यात येणार आहे.
गृह विभागाचे अप्पर सचिव के. पी. बक्षी म्हणाले, 'निवडणूक आयोगांच्या नियमाचे उल्लंघन होवू नये. निवडणुकीच्या कालावधीत लोकांमध्ये विश्वास निर्माण करून मुक्त आणि निर्भयपणे निवडणुका पार पाडाव्यात यासाठी सरकारस्तरावर निवडणूक आयोगाशी पूर्ण समन्वय ठेवण्यात आला आहे.' प्रारंभी महापालिका आयुक्त पी. शिवशंकर यांनी स्वागत केले. महापालिका निवडणुकीबाबत केलेली पूर्वतयारी, आचारसंहिता, कायदा सुव्यवस्था, मतदान व मतमोजणी, मतदार जागृतीबाबत केलेल्या नियोजनाची व उपाययोजनांची माहिती प्रेझेंटेशनद्वारे दिली. निवडणूक खर्च परीक्षण व व्यवस्थापन यंत्रणा, आचारसंहिता पथकाची कारवाई, करावयाच्या उपाय योजना यासंबधी यावेळी अधिकाऱ्यांना माहिती देण्यात आली.
मुश्रीफांच्या खुलाशानंतर कारवाईचा निर्णय
राष्ट्रवादीचे आमदार हसन मुश्रीफ व जिल्हाधिकारी अमितकुमार सैनी यांच्यातील वाद आणि मुश्रीफांना नोटीस याविषयी सहारिया म्हणाले, 'यासंदर्भात मुश्रीफांना नोटीस पाठविली आहे. त्यांना निवडणूक आयोगाकडे खुलासा करण्यासाठी आणखी काही दिवसांची मुदत आहे. मुश्रीफांचा खुलासा येऊ दे, त्यानंतर काय कारवाई करता येईल याचा निर्णय घेतला जाईल.
मॉडेल मतदान केंद्रे बनावीत
महापालिका निवडणुकीतील ऑनलाइन अर्ज भरण्याच्या घोळाप्रश्नी विचारले असता सहारिया म्हणाले, 'निवडणूक प्रक्रियेत नवीन पद्धत स्वीकारली जात आहे. नाविन्याचा अंगीकार करताना काही चुका होवू शकतात. उमेदवार निवडणुकीपासून वंचित राहू नये याकरिताच शेवटी छापील अर्जाचा अवलंब करण्यात आला. स्थानिक स्वराज्य संस्थेच्या निवडणकीत संगणकीकरणाचा अधिकाधिक अवलंब करण्याच्या सूचना केल्या आहेत. महापालिका निवडणुकीत सर्वच मतदान केंद्रे मॉडेल मतदान केंद्रे बनावीत यादृष्टीने प्रयत्न करण्याच्या सूचना आयुक्तांना केल्या आहेत.'
मोबाइल अॅप डाउनलोड करा आणि राहा अपडेट
