म. टा. वृत्तसेवा, सातारा
राज्यात अंमली पदार्थांच्या व्यापाराने दूरवर हातपाय पसरल्याचे स्पष्ट झाले असून सोमवारी सातारा जिल्ह्यात उघड झालेल्या रॅकेटमध्ये कोट्यवधी रुपयांचे अंमली पदार्थ पोलिसांनी जप्त केले आहेत. यात पोलिस खात्यातीलच कर्मचारी अडकल्याने या प्रकरणाने गंभीर वळण घेतले आहे.
खंडाळा तालुक्यातील कण्हेरी गावातून स्थानिक गुन्हे अन्वेषण पथकाने १२२ किलो मेफीड्रोन या अंमली पदार्थाचा साठा सोमवारी रात्री जप्त केला. आंतरराष्ट्रीय बाजारात या मालाची किंमत २२ कोटी रुपये आहे. या प्रकरणी दोन संशयितांना अटक करण्यात आली असून आहे. त्यात एका पोलिस कॉन्स्टेबलचा समावेश आहे.
कण्हेरी गावात हा साठा लपविण्यात आल्याची माहिती मिळाल्यानंतर सातारा स्थानिक गुन्हे अन्वेषण शाखेच्या पथकाने तेथे छापा टाकला असता एका घरात पाच मोठ्या पिशव्यांमध्ये मेफीड्रोनचा साठा आढळून आला. पोलिसांनी या प्रकरणी दोन जणांना अटक केली.
मुंबई पोलिस दलात सेवेत असलेल्या कण्हेरी (ता. खंडाळा) येथील धर्मराज बाबुराव काळोखे (४५) या कर्मचाऱ्याकडून सुमारे एक कोटी रुपये किमतीचा अंमली पदार्थांचा साठा जिल्हा पोलिस दलाने जप्त केला आहे. या प्रकरणी रात्री उश‌रिापर्यंत चौकशी व माहिती नोंदवण्याचे काम सुरू होते.
काळोखे हा गेली १५ वर्षे मुंबई पोलिस दलात सेवेत असून, त्याचे गावाकडे नेहमी येणे-जाणे होते. दोनच दिवसांपूर्वी तो कण्हेरी येथे आला होता. त्याने आपल्याकडील काळ्या रंगाच्या पाच बॅगा शेजारच्या घरात सोमवारी आणून ठेवल्या होत्या. याबाबतची माहिती खंडाळा पोलिसांना मिळाल्यानंतर त्यांनी जिल्हा पोलिस अधीक्षक देशमुख, उपविभागीय पोलिस अधिकारी दीपक हुंबरे यांनी मोठ्या फौजफाट्यासह छापा टाकून त्या बॅगा ताब्यात घेतल्या. काळोखेकडून आणखी काही गुन्हे उघडकीस येण्याची शक्यता असून त्याचे अंमली पदार्थांच्या मोठ्या रॅकेटशी संबंध असावेत, असा संशय आहे.
'आमचा संबंध नाही'
कोल्हापूर : कोंडुसकर ट्रॅव्हल्स ही कोल्हापूरस्थित प्रायव्हेट लिमिटेड कंपनी असून, तिचा ओंकार इंडस्ट्रीज या कंपनीशी कोणताही संबंध नसल्याचा खुलासा कोंडुसकर ट्रॅव्हल्सने केला आहे. 'महाराष्ट्र टाइम्स'च्या १० मार्चच्या 'कोंडुसकर पुन्हा ड्रग वादात' या शीर्षकाखालील वृत्तात ओंकार इंडस्ट्रीज ही कंपनी कोंडुसकर ट्रॅव्हल्सची उपकंपनी असल्याचा उल्लेख होता.
पोलिस स्टेशनच्या लॉकरमध्येच ड्रग
कॉन्स्टेबल काळोखे याच्या मरिन ड्राइव्ह पोलिस स्टेशनच्या लॉकरमध्येही १२ किलो पांढरी पावडर सापडली आहे. मंगळवारी दुपारी मरिन ड्राइव्ह पोलिस आणि अमली पदार्थ विरोधी पथकाने काळोखे याच्या पोलिस स्टेशनमधील लॉकरची झडती घेऊन ही पावडर हस्तगत करण्यात आली. त्याच्या तपासणीसाठी फोरेन्सिक लॅबची मदत घेण्यात येत असल्याची माहिती अपर पोलिस आयुक्त (गुन्हे) के. एम. प्रसन्ना यांनी दिली.
मोबाइल अॅप डाउनलोड करा आणि राहा अपडेट
