म. टा. प्रतिनिधी, कोल्हापूर
महाराष्ट्र राज्य सांस्कृतिक संचलनालयाच्यावतीने घेण्यात आलेल्या ५९ व्या राज्य हौशी मराठी नाट्य स्पर्धेत कोल्हापूर केंद्रातून फिनिक्स क्रिएशन्सच्या 'ह्येच्या आईचा वग' या नाटकाने प्रथम क्रमांक मिळवला. इचलकरंजीच्या रंगयात्रा संस्थेच्या 'हूज अफ्रेड ऑफ द व्हर्जिनिया वूल्फ' या नाटकाने द्वितीय क्रमांक पटकावला. या दोन्ही नाटकांची अंतिम फेरीसाठी निवड झाली. रुद्रांश अॅकॅडमीच्या 'मोठ्यांचा शेक्सपिअर' या नाटकाला तृतीय क्रमांक मिळाला. सोमवारी राज्य नाट्य स्पर्धेचा निकाल जाहीर करण्यात आला.
१५ नोव्हेंबरपासून संगीतसूर्य केशवराव भोसले नाट्यगृहात राज्य नाट्यस्पर्धा सुरू होती. १३ डिसेंबरपर्यंत सुरू राहिलेल्या या स्पर्धेत एकूण २८ नाट्यप्रयोग सादर करण्यात आले होते. यंदा कोल्हापूरसह इचलकरंजी, जयसिंगपूर, कोकण, बेळगाव येथील शहरी नाट्यसंस्थांसह ग्रामीण भागातील नाट्यसंस्थांचा सहभाग हे या स्पर्धेचे वैशिष्ट्य होते. प्रा. मधू जाधव, मुकुंद हिंगणे, गौरी लोंढे यांनी परीक्षक म्हणून काम पाहिले.
दिग्दर्शन, नेपथ्यातही फिनिक्स व रंगयात्राने बाजी मारली. तर रंभभूषासाठी उत्कृष्ट नाटक शिवाजी विद्यापीठाचे 'तुघलक' व निष्पाप कलानिकेतनचे 'युद्ध नको मज बुद्ध हवा' हे ठरले. प्रकाश योजनेसाठी 'मोठ्यांचा शेक्सपियर' या नाटकाने बक्षीस घेतले.
स्पर्धेचा अनुक्रमे निकाल असा
दिग्दर्शन
संजय मोहिते (ह्येच्या आईचा वग)
अनिरुध्द दांडेकर (हूज अफ्रेड ऑफ द व्हर्जिनिया वूल्फ)
प्रकाश योजना
विनायक रानभरे (हूज अफ्रेड ऑफ द व्हर्जिनिया वूल्फ)
तेजस कोळी (मोठ्यांचा शेक्सपियर)
नेपथ्य
अमोल नाईक (ह्येच्या आईचा वग)
प्रवीण लायकर (हूज अफ्रेड ऑफ द व्हर्जिनिया वूल्फ)
रंगभूषा
ओंकार पाटील (तुघलक, शिवाजी विद्यापीठ संगीत व नाट्यशास्त्र विभाग)
सुनीता वर्मा (युद्ध नको मज बुद्ध हवा, निष्पाप कलानिकेतन, इचलकरंजी)
उत्कृष्ट अभिनय रौप्यपदके
सचिन वाडकर (ह्येच्या आईचा वग)
कादंबरी माळी (हूज अफ्रेड ऑफ द व्हर्जिनिया वूल्फ)
अभिनय गुणवत्ता प्रमाणपत्रे
तेजस्विनी सोनसाळे (वृंदावन, वरेरकर नाट्यसंस्था, बेळगाव), प्रतीक्षा गवस (पुरूष, सुगुण नाट्य संस्था, कोल्हापूर), वैदेही सावंत (नटरंग, वसुंधरा संस्था, कोल्हापूर), पूर्वा कोडोलीकर (ऐश्‍वर्या ब्युटी पार्लर, भारतवीर मंडळ, कोल्हापूर), उज्वला खांडेकर-शहा (ऊन-पाऊस, गानकोकिळा कान्होपात्रा किणीकर स्मृती संस्था, कोल्हापूर), परसु गावडे (विच्छा माझी पुरी करा, साई नाट्यधारा मंडळ, हलकर्णी), युवराज केळुस्कर (तुघलक), निहाल रूकडीकर (मोठ्यांचा शेक्सपियर), रोहित पोतनीस (अंदाधुंद, परिवर्तन फाऊंडेशन, कोल्हापूर), सतीश तांदळे (देव हरवला, देवल क्‍लब, कोल्हापूर).
लोकनाट्याने एक काळ रंगभूमीवर सुवर्णकाळ गाजवला आहे. या नाट्यप्रकाराच्या सादरीकरणासाठी लागणारी ऊर्जा आणि त्याची मांडणी राज्यनाट्यच्या मंचावर सादर करण्याच्या निर्णयाचे व त्यासाठी प्रत्येकाने घेतलेल्या मेहनतीचे चीज झाले. राज्य नाट्यच्या अंतिम फेरीसाठी निवड झाल्याने नवी प्रेरणा मिळाली आहे.
संजय मोहिते, दिग्दर्शक, ह्येच्या आईचा वग
इंग्रजी नाटकाचे मराठी रुपांतरण असल्याने हे नाटक सादर करताना वेगळे दडपण होते. क्लिष्ट विषय, इंग्रजी जीवनशैलीची पार्श्वभूमी यामुळे नाटकाचा विषय रसिकांपर्यंत पोहोचवण्याचे आव्हान होते. मात्र हे शिवधनुष्य पेलण्याची ताकद रंगभूमीच्या ध्यासानेच दिली. अंतिम फेरीसाठी निवड झाल्याचा आनंद आहे. अंतिम फेरीसाठी जोमाने तयारी करणार आहोत.
अनिरुद्ध दांडेकर, दिग्दर्शक, हूज अफ्रेड ऑफ द व्हर्जिनिया वूल्फ
