Gurubal.Mali@timesgroup.com
Tweet@gurubalmaliMT
कोल्हापूर : विधानसभा निवडणुकीची तारीख जवळ येत असताना कोणत्याच पक्षाच्या उमेदवारांची यादी घोषित होत नसल्याने इच्छुकांची घालमेल वाढत आहे. यादी तयार असूनही केवळ बंडखोरी होऊ नये म्हणून प्रत्येक पक्षाची यादी मुंबई आणि दिल्लीत चर्चेच्या पातळीवर अडकवण्यात आली आहे. पहले आप... पहिले आप... अशीच भूमिका युती आणि आघाडीसह इतर सर्वच पक्षांनी घेतली आहे. त्यामुळे पंधरा दिवसांत मतदारांपर्यंत पोहोचायचे कसे? असा प्रश्न भावी उमेदवारांना पडला आहे.
कोल्हापूर जिल्ह्यातील करवीर, कोल्हापूर दक्षिण आणि शाहूवाडी या तीन मतदारसंघात दुरंगी लढत निश्चित आहे. येथील उमेदवारही ठरलेले आहेत. काही राजकारण बदलले तरी करवीरमध्ये काँग्रेसचे उमेदवार, माजी आमदार पी. एन. पाटील विरुद्ध शिवसेनेचे आमदार चंद्रदीप नरके, कोल्हापूर दक्षिणमध्ये भाजपचे आमदार अमल महाडिक विरुद्ध काँग्रसचे उमेदवार ऋतुराज पाटील आणि शाहूवाडीत आमदार सत्यजित पाटील विरुद्ध माजी आमदार विनय कोरे यांच्यातच लढत होईल. त्यामुळे तिकीट कधी का जाहीर होईना, असे म्हणत हे सहा उमेदवार प्रचाराला लागले आहेत. या तीन मतदारसंघात बंडखोरी करण्यास फारसा वाव नाही. तिसऱ्या पक्षाकडे प्रबळ उमेदवारदेखील नाही. त्यामुळे आघाडी आणि युती झाली आहे असे समजून येथे प्रचाराने वेग घेतला आहे.
जिल्ह्यातील उर्वरीत सात मतदारसंघांत अजून मोठी संभ्रमावस्था आहे. युती होणार का? आघाडी झाली तर स्वाभिमानी शेतकरी संघटना त्यामध्ये असेल का? याचा फैसला झालेला नाही. त्यामुळेच उमेदवारांची नावेदेखील जाहीर झालेली नाहीत. यातील सर्वच मतदारसंघात इच्छूकांची संख्या अधिक आहे.
कागलमध्ये आमदार हसन मुश्रीफ यांच्या विरोधात नेमके घाटगे कोण? याचा निर्णय झाला नाही. एका घाटगेंना युतीने उमेदवारी दिली तर दुसरे घाटगे बंडखोरी करणार हे नक्की आहे. त्यामुळे येथे अप्रत्यक्ष तयारीचे संकेत दिले असले तरी अधिकृत घोषणा मात्र केली नाही. हीच अवस्था राधानगरीत आहे. के. पी. पाटील आणि ए. वाय. पाटील यांच्या वादात बंडखोरी टाळण्यासाठी दोघांनाही प्रतिक्षा करा असा आदेश देण्यात आला आहे.
चंदगडमध्ये लढण्यासाठी अनेकजण इच्छूक आहेत. त्यामध्ये सेना व भाजपचे उमेदवार जास्त आहेत. यातील कुणालाही उमेदवारी दिली तर उर्वरीत उमेदवार बंडखोरी करणार असे चित्र आहे. भरमू सुबराव पाटील, गोपाळराव पाटील, संग्राम कुपेकर, रमेश रेडेकर अशा अनेकांची नावे आतापासूनच बंडखोरीच्या यादीत चर्चेत आहेत. सर्वच पक्षांची समान ताकद असणाऱ्या शिरोळचा तिढा सुटत नाही. येथेदेखील बंडखोरी होणार हे अधोरिखित आहे. आघाडी झाल्यास ही जागा स्वाभिमानी शेतकरी संघटनेला जाईल. अशावेळी राजेंद्र पाटील यड्रावकर, गणपतराव पाटील हे कोणता झेंडा घेऊन मैदानात उतरतात हे पाहणे उत्सुकतेचे ठरेल. युती झाल्यास सेनेला जागा जाईल आणि अनिल यादव, माधवराव घाटगे बंडखोरी करतील अशी शक्यता आहे.
या सर्व पार्श्वभूमीवर काँग्रेस, राष्ट्रवादी, शिवसेना व भाजप या चारही प्रमुख पक्षांना जिल्ह्यात बंडखोरीची भीती वाटत आहे. पक्षीय पातळीवर जागा वाटप आणि उमेदवार निश्चित असले तरी त्याची घोषणा करण्यास टाळाटाळ केली जात आहे. युतीला जागा टिकवण्याचे तर आघाडीला जागा वाढविण्याचे आव्हान आहे. त्यामुळे बंडखोरीचा फटका बसू नये यासाठीच काळजी घेतली जात आहे. तीन दिवसांनंतर उमेदवारी अर्ज भरण्यास सुरूवात होणार आहे. तोपर्यंत सर्वच मतदारसंघांतील यादी जाहीर होणे कठीण आहे.
येथे बंडखोरी शक्य
कागल : समरजित घाटगे, संजय घाटगे
चंदगड : संग्राम कुपेकर, गोपाळराव पाटील, रमेश रेडकर
राधानगरी : ए. वाय. पाटील, सत्यजित जाधव, जीवन पाटील
कोल्हापूर उत्तर : दौलत देसाई, सत्यजित कदम, वसंत मुळीक, चंद्रकांत जाधव
इचलकरंजी : अमृत भोसले, मदन कारंडे
शिरोळ : अनिल यादव, राजेंद्र पाटील, राजवर्धन निंबाळकर
हातकणंगले : अशोकराव माने, राजीव आवळे.
येथे होणार थेट लढत
दक्षिण : अमल महाडिक वि. ऋतुराज पाटील
करवीर : चंद्रदीप नरके वि. पी. एन. पाटील
शाहूवाडी : सत्यजित पाटील वि. विनय कोरे
