Satish.ghatage@timesgroup.com Tweet:satishgMT कोल्हापूर अवैध व्यवसायातील मटका, जुगार, सावकारांविरोधात कोल्हापूर पोलिसांनी जोरदार मोहीम सुरु केल्याने नागरिकांतून सार्वत्रिक स्वागत होत आहे, मात्र चोरी, घरफोडीच्या तपासात पोलिस 'फेल' झाल्याची भावना पसरत चालली आहे. तपास पथकात समन्वयाचा अभाव, बंद पडलेली रात्रीची गस्त यामुळे चोऱ्या वाढल्या असून नागरिकांमध्ये दहशत पसरली आहे. शहर व उपनगरातून दीड महिन्यात ९० तोळे दागिने चोरीला गेले आहेत. शहरातील उपनगरे, फ्लॅट, बंगल्याबरोबरच वर्दळ असलेल्या गल्लीबोळात चोरट्यांनी उच्छाद मांडला आहे. पर्यटनाला चालना मिळावाी यासाठी सरकार प्रयत्न करत असताना दुसरीकडे फिरायला गेलो तर घरी चोरी होईल, ही भावना नागरिकांना सतावत चालली आहे. चोरटे बंद असलेली घरे शोधून चोरी करत असताना पोलिसांकडून मात्र संथगतीने तपास सुरु आहे. मटका, जुगारासह सावकारी करणाऱ्यांना पोलिसांनी चाप लावला आहे. या मंडळींचे अवैध व्यवसाय पोलिसांना माहीत होते. तसेच त्यांच्यावर यापूर्वी गुन्हे दाखल झाले असल्याने त्यांच्यावर मोक्का गुन्हे दाखल करण्यात पोलिसांना जादा प्रयत्न करायला लागले नाही. पण इच्छाशक्तीच्या जोरावर गुन्हेगारांचे कंबरडे मोडण्यास सुरुवात झाली आहे. गुन्हेगारीमुक्त करण्यासाठी ज्याप्रमाणे पोलिसांनी पावले उचलली आहेत, त्याप्रमाणे तपासात मात्र ढिलाई होत आहे. शहर व उपनगरातून सर्वसामान्य व मध्यमवर्गियांच्या घरातील चोरांचा तपास करण्यात स्थानिक पोलिस स्टेशनमधील डी.बी.पथके व स्थानिक गुन्हे अन्वेषण विभाग अपयशी ठरला आहे. घरफोड्यांच्या तपासात डॉग स्कॉड, ठसे तज्ज्ञांना पाचारण केले जाते. ठसे तज्ज्ञांच्या अहवालाला वेळ लागत असल्याने तपासास विलंब लागत आहे. स्मार्ट सिटीद्वारे कोल्हापुरात चौकाचौकात उभारण्यात आलेले सीसीटीव्ही चोरट्यांना अटक करण्यात मदतनीस ठरलेले नाहीत. पोलिसांकडून रात्रीची गस्त व्यवस्थित केली जात नसल्याने चोरट्यांकडून रात्री दोन ते चार या वेळेत चोऱ्या होत असल्याने गस्तीबाबत शंका व्यक्त केली जात आहे. लक्ष्मीपुरी पोलिसांनी सीसीटीव्हीच्या फुटेजवरुन मोबाईल दुकानातील चोरीचा छडा चोवीस तासांत लावला. पण शहरात गेल्या दोन महिन्यात १५ ते २० घरफोड्या झाल्या असून त्याचा मागसूमही लागलेला नाही. चोरीचे दागिने खरेदी विक्री करणाऱ्या सराफांकडेही काणाडोळा केला जात आहे. चेन स्नॅचरनी पुन्हा डोके वर काढले असून कारच्या काचा उचकटून, दुचाकीच्या डिकी उचकटून पैशाच्या बॅग, दागिन्यांच्या पर्सही चोरल्या जात आहेत. भाजी मंडई, महाद्वार रोडवर पर्स व मोबाइल चोरीचे प्रकार वाढले असतानाही पोलिसकडून गहाळ रजिस्टरमध्ये नोंदी केल्या जात आहेत. .............. मागील दीड महिन्यातील चोऱ्या साळोखेनगर बंगला : सहा तोळे दागिने मुक्त सैनिक वसाहत अभियंत्याचा बंगला: दहा तोळे दागिने गजानन महाराज नगरातील बंगला पाच लाखांचा ऐवज केएमसी महाविद्यालय कार्यालय: दोन हजार शुक्रवार पेठ डंगरी गल्लीतील घर : १९ तोळे दागिने, ४० हजार रोकड आर.के.नगरातील बंगला: १५ तोळे दागिने, १० लाख रोकड कदमवाडी लक्ष्मीनारायण नगर: चार तोळे दागिने आर.के.नगर चेन स्नॅचिंग: तीन तोळे दागिने मुक्त सैनिक वसाहत: अडीच तोळे दागिने प्रथमेश नगर पोलिसाचे घर: दीड तोळे दागिने मोरेवाडी, अष्टविनायक पार्क :१५ तोळे दागिने, तीन लाखांची रोकड ................. मटा भूमिका तत्काळ तपासाची गरज सध्या घरांना चांगली कुलपे, लोखंडी दरवाजे लावूनही घरफोड्या होत आहेत. घरफोड्या, चोऱ्यांच्या तपासात पोलिस अपयशी ठरत आहेत. त्याचा फटका सर्वसामान्यांना बसत आहे. आपल्या घरी चोरी होईल, अशी भिती प्रत्येक कुटुंबाला वाटू लागली आहे. अनेक कुटुंबे परगावी जाण्याचे टाळत आहेत. बाजार अथवा कार्यालयात गेल्यावर परत घरी आल्यावर चोरी होणार नाही याची शाश्वती नाही. बाजारात मोबाइल व पर्स चोरटे, दुचाकी व चारचाकी फोडल्या जात आहेत. दोन ते तीन दिवसाला कुठे ना कुठे घरफोडी ठरलेली आहे. एखाद्या समारंभाला दागिने घालून जावे इतकी सुरक्षितता महिलांना वाटत नाही. समाजातील सर्व स्तरांमध्ये भितीचे सावट गडद होत असताना पोलिस अधिकाऱ्यांकडून ,'पोलिस आहेत, तुम्ही काळजी करु नका' हा आत्मविश्वास नागरिकांत जागवण्यासाठी घरफोड्या, चोऱ्यांचा तपास तत्काळ करण्याची गरज आहे.
मोबाइल अॅप डाउनलोड करा आणि राहा अपडेट
