म. टा. प्रतिनिधी, कोल्हापूर

इचलकरंजी नगरपालिकेतील पाणीपुरवठा सभापती संजय तेलनाडे, त्याचा भाऊ नगरसेवक सुनील तेलनाडे यांच्या एसटी सरकार गँगमधील १२ जणांच्याविरोधात संघटित गुन्हेगारीबद्दल मोक्का कायद्याअंतर्गत कोल्हापूर पोलिसांनी सोमवारी कारवाई केली. त्यांच्यावर खून, फसवणूक, मारामारी, सरकारी कर्मचाऱ्यांवर हल्ला, मटका, जुगार असे गंभीर गुन्हे दाखल आहेत. कोल्हापूर विभागाचे विशेष पोलिस महानिरीक्षक डॉ. सुहास वारके यांनी मोक्का कारवाईचे आदेश दिले.

तेलनाडेच्या बेकायदेशीर व्यवहाराला कायदेशीर स्वरुप देण्याचे काम करणारा अॅड. पवनकुमार उपाध्ये, ऋषिकेश दिगंबर शिंदे (लोंढे), अरविंद मस्के, राकेश कुंभार, दीपक कोरे, इम्रान दस्तगीर कलावंत, राहुल चव्हाण, अरिफ दस्तगीर कलावंत, अभिजित जमादार, संदेश विलास कापसे अशी मोक्का कारवाई केलेल्या संशयितांची नावे आहेत.

कोल्हापूर शहरासह जिल्ह्यात खंडणी, सावकारी, भूखंड माफियांवर कारवाई करण्याचे आदेश महानिरीक्षक डॉ. वारके यांनी दिले होते. त्यानुसार पोलिस अधीक्षक डॉ. अभिनव देशमुख यांनी संघटित गुन्हेगारीवर विशेष लक्ष केंद्रित केले होते.

इचलकरंजीतील भूखंड माफिया व एसटी सरकार गँगचा म्होरक्या नगरसेवक संजय तेलनाडे, त्याचा भाऊ नगरसेवक सुनील तेलनाडे यांच्या विरोधात इचलकरंजीत यापूर्वीच अनेक गुन्हे नोंदवण्यात आले आहेत. दरम्यान, शनिवारी (ता.१८) नरेंद्र भोरे यांनी तेलनाडे गँगच्या विरोधात शहापूर पोलिस ठाण्यात फिर्याद दिली होती. तेलनाडे गँगने भोरे व त्यांच्या पत्नीमध्ये समेट घडवण्यासाठी २५ लाख रुपयांची खंडणी मागितली होती. या गुन्ह्यात तेलनाडे बंधूंसह १७ ते १८ जणांवर गुन्हा दाखल करण्यात आला.

या गुन्ह्यात तेलनाडे बंधूंचा सहभाग स्पष्ट झाला असून यापूर्वी त्यांच्यावर खून, फसवणूक, मारामारी, सरकारी कर्मचाऱ्यांवर हल्ला, मटका, जुगार या प्रकरणी गुन्हे दाखल झालेले आहेत. नगरसेवक पदाचा वापर करुन शहरातील महत्वाच्या मिळकती गिळंकृत करण्यासाठी समांतर यंत्रणा चालवत असल्याचे निदर्शनास आले होते. पोलिस निरीक्षक के.एन पाटील यांनी तेलनाडे टोळीविरोधात मोक्का अंतर्गत कारवाई करण्याचा प्रस्ताव पोलिस अधीक्षकांकडे पाठवला होता. या प्रस्तावाची छाननी करुन पोलिस अधीक्षक डॉ. अभिनव देशमुख यांनी तो विशेष पोलिस महानिरीक्षक वारके यांच्याकडे पाठवला. त्यानंतर त्यांनी सोमवारी मोक्का कायद्याखाली कारवाई करण्याचा आदेश दिला. दरम्यान, या टोळीतील इम्रान कलावंत, संदेश कापसे, अरिफ कलावंत, ऋषिकेश शिंदे यांना पोलिसांनी अटक केली आहे. तेलनाडे बंधूंना अटक करण्यासाठी पोलिसांची पथके पाठवण्यात आली आहेत.

............

मोक्का अंतर्गत २१४ गुन्हेगार जेरबंद

मोक्काअंतर्गत २०१९ मध्ये पोलिसांनी १० गुन्ह्यात २१४ गुन्हेगारांना जेरबंद केले आहे. तेलनाडे बंधू व त्यांची एसटी सरकार गँगच्या विरोधात कोणाच्या तक्रारी असतील त्यांनी निर्भयपणे थेट पोलिस अधीक्षक देशमुख यांची भेट घेऊन तक्रारी नोंदवाव्यात, असे आवाहन पोलिसांनी केले आहे.

म. टा. प्रतिनिधी, कोल्हापूर

कोल्हापूर, हातकणंगले लोकसभा मतदारसंघासाठी मतमोजणीच्या ठिकाणी केंद्रीय राखीव पोलिस दलाचे सुरक्षा कवच असणार आहे. यामुळे मतमोजणी अधिकारी, कर्मचाऱ्यांनाही सुरक्षेच्या अग्नीदिव्यातून जावे लागणार आहे. इव्हीएम मशीन हॅक केले जाते, असे आरोप झाल्याने पहिल्यांदाच इतक्या काटेकोरपणे सुरक्षा व्यवस्था तैनात करण्यात आली आहे.

गुरूवारी २३ मे रोजी मतमोजणी होणार आहे. 'कोल्हापूर' साठीच्या रमणमळा सरकारी गोदाम आणि 'हातकणंगले'साठी राजाराम तलावाशेजारील गोदामात मतमोजणीसाठी आवश्यक टेबल लावून बॅरीकेडस बांधण्यात आले आहेत. इंटरनेट, सीसीटीव्हीची जोडणी केली आहे. त्याची चाचणी आज, मंगळवारी करण्यात येणार आहे. प्रत्यक्षात मतमोजणीच्या ठिकाणी येताना मेटल डिटेक्टरवर तपासणी करून सोडण्यात येणार आहे. २०० मीटरच्या आत सोडताना राज्य पोलिस, त्यानंतर राज्य राखीव दल आणि शेवटी केंद्रीय राखीव दलाचे पोलिस तपासणार आहेत. सुरक्षेच्या तीन टप्प्यात तपासणी झाल्यानंतर निवडणूक आयोग किंवा निवडणूक निर्णय अधिकाऱ्यांचे ओळखपत्र असलेल्यांना सोडण्यात येणार आहे.

..........

निवडणूक निर्णयअधिकारी अपवाद

मोबाइल वापरण्यावर निर्बंध असले तरी निवडणूक आयोगाला वेळोवेळी माहिती देण्यासाठी निवडणूक निर्णय अधिकाऱ्यांना मोबाइल वापरण्यास परवानगी आहे. बंदी असलेल्या ठिकाणी काम करणारे अधिकारी, कर्मचाऱ्यांचे मोबाइल ठेवण्यासाठी निवडणूक प्रशासनाने स्वतंत्र व्यवस्था केली आहे. वाहनाची चावीही त्याच ठिकाणी ठेवावी लागणार आहे.

.........

आरोपांमुळे खबरदारी

एव्हीएम यंत्रांवर अनेक राजकीय पक्षांनी आक्षेप नोंदवले आहेत. यामुळे मतमोजणी प्रक्रियेवर संशय, प्रश्न उपस्थित होऊ नयेत, यासाठी दक्ष राहण्याची सूचना निवडणूक आयोगाने केली आहे. यामुळे निवडणूक निर्णय अधिकारी तथा जिल्हाधिकारी दौलत देसाई, निवडणूक निर्णय अधिकारी अप्पर जिल्हाधिकारी नंदकुमार काटकर यांनी अतिशय सतर्क राहून कोणत्याही प्रकारच्या त्रुटी राहू नयेत, यासाठी दक्षता घेत आहेत.

म. टा. प्रतिनिधी, कोल्हापूर

दहशत माजवणे, जबरदस्तीने जमीन हडप करणे, खासगी सावकरी या गुन्ह्याखाली मोक्का कायद्याखाली अटक केलेल्या सुरज साखरेसह तिघांना सोमवारी पुणे मोक्का कोर्टासमोर हजर करण्यात आले. कोर्टाने त्यांना १० दिवसांची पोलिस कोठडी सुनावली.

'एसएस गँग'चा सूत्रधार सूरज हणमंतराव साखरे (वय २८, रा. कश्यप हाईट अपार्टमेंट, देवकर पाणंद), त्याचे साथीदार ऋषभ सुनील भालकर (२१, रा. जनाई दत्तनगर, कळंबा रोड), पुष्कराज मुकुंद यादव (२०, रा. शिंगणापूर) या तिघांना पोलिसांनी अटक केली आहे. संशयित अभि उर्फ युवराज मोहन महाडिक (मंगळवार पेठ), युनुस हसन मुजावर (रा. राजारामपुरी), चालक धीरज आणि पार्थ हे फरारी आहेत.

गगनबावडा तालुक्यातील किरवे गावातील रणजित पाटील या तरुणाचे खासगी सावकारीतून अपहरण केले. त्याला मारहाण करुन २५ लाख रुपयांची खंडणी मागितली. या प्रकरणी गुन्हा दाखल केल्यानंतर पोलिसांनी साखरेसह तिघांना अटक केली. त्यानंतर सूरज साखरेसह साथीदारांवर मोक्का अंतर्गत कारवाई करण्यात आली. साखरे याच्या साथीदारांचा शोध सुरू असून संशयितांची बँक खाती गोठविण्यासाठी बँकेबरोबर पत्रव्यवहार केला आहे, अशी माहिती पोलिस निरीक्षक आर.बी. शेडे यांनी दिली.

म. टा. प्रतिनिधी, कोल्हापूर

दुर्ग दिन व शिवराज्याभिषेक दिनाचे निमित्त साधून दोन जून रोजी 'किल्ले पारगड प्रदक्षिणा' आयोजित केली आहे, अशी माहिती शिवसेना जिल्हाप्रमुख विजय देवणे यांनी पत्रकार परिषदेत दिली. यादिनी गडपूजन, शिवप्रतिमा पूजन व पालखी सोहळा होणार आहे.

शिवसेना जिल्हा शाखा, हिल रायडर्स फाऊंडेशन, समिट अॅडव्हेंचर्स, संवेदना सोशल फाऊंडेशन आणि किल्ले पारगड जनकल्याण संस्था यांच्या सहकार्यातून पहिल्यांदाच 'किल्ले पारगड प्रदक्षिणा' मोहीम होत आहे.

देवणे म्हणाले, 'शिवसेनेने गडसंवर्धनासाठी पारगड दत्तक घेतला आहे. गडकिल्ल्यांच्या संवर्धनाची भावना दुर्गप्रेमीत रुजावी, शिवकालीन इतिहासाची नव्या पिढीला ओळख करुन देण्यासाठी मोहीम आयोजित केली आहे. हा किल्ला ४८ एकर परिसरात पसरलेला आहे. छत्रपती शिवाजी महाराज यांनी, पोर्तूगीजांवर वचक ठेवण्यासाठी साधारण १६७६ च्या आसपास या गडाची निर्मिती केली. नरवीर तानाजी मालुसरे यांचे पुत्र रायाजी मालुसरे यांची पहिला किल्लेदार म्हणून नेमणूक केली होती. छत्रपतींच्या पदस्पर्शाने पावन झालेल्या, शिवकालीन इतिहासाचा साक्षीदार असलेला हा किल्ला आहे.'

एक जून रोजी दुर्गदिन आहे व सहा जून रोजी शिवराज्याभिषेक दिनाचे औचित्य साधून किल्ले पारगड प्रदक्षिणा काढण्यात येणार आहे. प्रदक्षिणाचा जवळपास सहा किलो मीटरचा मार्ग निश्चित केला आहे. मोहिमेत सहभागी होणाऱ्यांना गडावर नाष्टा, दुपारी जेवणाची मोफत सोय केली आहे. दरम्यान कोल्हापूर ते पारगडसाठी प्रवास खर्च ३०० रुपये शुल्क आहे. यासाठी खासगी बस उपलब्ध आहेत. दोन जून सकाळी संगीतसूर्य केशवराव भोसले नाट्यगृह येथून बसेस पारगडकडे रवाना होतील, अशी माहितीही दिली. मोहिमेतील सहभागासाठी हिल रायडर्स फाऊंडेशनचे प्रमोद पाटील, समीट अॅडव्हेंचर्स विनोद कांबोज, शिवस्वरुप खरी कॉर्नर येथे नावनोंदणी करावी. पत्रकार परिषदेला शिवसेना जिल्हाप्रमुख संजय पवार, प्रा. सुनील शिंत्रे, प्रभाकर खांडेकर, राहुल चिकोडे, संदीप पाटील, युवराज साळोखे आदी उपस्थित होते.

कोल्हापूर

जैववैद्यकीय कचरा नाल्यामध्ये टाकल्याप्रकरणी महापालिकेने शहरातील पाच हॉस्पिटल प्रशासनाला सोमवारी नोटीस बजावली. श्रृतिका डायग्नोस्टिक सेंटर, दोशी हॉस्पिटल, डॉ. सुजीत तांबेरी यांचे मेडिकेअर सेंटर, शेंडापार्क येथील डॉ. कौस्तुभ वाईकर व जुनी मोरे कॉलनी येथील डॉ. पद्माकर सरोदे यांना नोटीस दिली. नोटीस बाजवलेल्या हॉस्पिटल प्रशासनाने समाधानकारक खुलासा न केल्यास दंडात्मक कारवाईसोबत परवाना रद्द करण्याचा निर्णय प्रशासनाने घेतला आहे. महापालिकेच्यावतीने गेल्या तीन आठवड्यापासून जयंती नाल्यासह उपनाल्यासह स्वच्छता मोहीम हाती घेतली आहे. मोहिमेदरम्यान नाल्यात जैववैद्यकीय कचरा मोठ्याप्रमाणात टाकला जात असल्याचे निदर्शनास आले. त्याची गंभीर दखल घेत प्रशासनाने पाच हॉस्पिटलला सोमवारी नोटीस बजावली.

कोल्हापूर: महात्मा गांधींचा खून करणाऱ्या नथुराम गोडसे याला देशभक्त संबोधणाऱ्या साध्वी प्रज्ञासिंह ठाकूरच्या प्रतिमेचे दहन एसएसयुआयच्यावतीने करण्यात आले. मिरजकर तिकटी येथील हुतात्मा क्रांती स्तंभाजवळ निषेधाच्या घोषणाही दिल्या. यावेळी जिल्हाध्यक्ष पार्थ मुंडे, सुशील चव्हाण, यश शिर्के, अमित चव्हाण, आशुतोष मगर, रोहित गवळी, योगेश साळोखे आदी उपस्थित होते.

कोल्हापूर: दरवर्षी १२ जून रोजी साजरा होणाऱ्या बालकामगार विरोधी दिनानिमित्त अवनितर्फे बालकामगारमूक्त मोहीम राबवली जाते. त्याचाच भाग म्हणून अवनिच्यावतीने बालकामगार शोध मोहीम सुरू केली आहे. कोल्हापूर, सांगली, सातारा येथील राष्ट्रीय महामार्गावरील हॉटेल्स, धाबे यांचे सर्वेक्षण करुन त्यांची सुटका करण्यात येणार आहे. बालकामगार म्हणून मुक्त झालेल्या सर्व मुलांना शिक्षणाच्या प्रवाहात सामील करून घेण्यात येणार आहे. ३१ मेपर्यंत शोध मोहीम सुरू राहणार असून २५० ठिकाणी सर्व्हे केला असल्याचे संस्थेच्या उपाध्यक्षा अनुराधा भोसले यांनी सांगितले. मोहिमेमध्ये स्वाभिमानी बालहक्क अभियानाचे जिल्हाध्यक्ष साताप्पा मोहिते, अमर कांबळे, नीमेश गवळी, राधिका लोखंडे, अतुल मुगडे, रोहित कांबळे, मयुर कुकडे आदी सहभागी झाले आहेत.

कोल्हापूर टाइम्स टीम

'नर्सरीबागेत होत असलेल्या राजर्षी शाहू समाधी स्मारकाचे बंद पडलेले काम पुन्हा सुरू करण्यासाठी पोलिस बंदोबस्त द्या' अशी मागणी निवदेनाद्वारे महापौर सरिता मोरे यांच्या नेतृत्वाखाली महापालिकेच्या पदाधिकाऱ्यांनी जिल्हाधिकारी दौलत देसाई व जिल्हा पोलिसप्रमुख डॉ. अभिनव देशमुख यांच्याकडे केली. दोन्ही अधिकाऱ्यांनी याबाबत सकारात्मक निर्णयाची ग्वाही दिली.

जिल्हाधिकारी देसाई व जिल्हा पोलिसप्रमुख डॉ. देशमुख यांच्याशी चर्चा करताना महापौर मोरे म्हणाल्या, 'राजर्षी शाहू महाराजांच्या समाधीस्मारकाचे काम गेल्या चार वर्षांपासून सुरू आहे. स्मारक उभारणीद्वारे शाहूंच्या विचारांचा प्रसार आणि पर्यटनाला चालना देण्याचा महापालिकेचा प्रयत्न आहे. स्मारकाच्या संरक्षक भिंतीचे बांधकाम सुरू असताना सिद्धार्थनगरातील रहिवाशांनी प्रवेशद्वाराच्या मागणीवरून चार मेपासून हेतुपूरस्सर बांधकाम बंद पाडले. सामाजिक तेढ निर्माण होऊ नये, यासाठी येथील शिष्टमंडळाबरोबर चर्चा करुन मागण्या मान्यही केल्या. मात्र काही ठराविक लोकांची अरेरावी अद्याप सुरू आहे. स्मारकाचे काम नियमानुसार सुरू असताना ते बंद पडल्यामुळे काम सुरू करण्यासाठी शाहूप्रेमींना येण्याचे आवाहन करण्यार आहे. त्यावेळी कायदा व सुव्यवस्थेचा प्रश्न निर्माण होऊ नये, यासाठी पोलिस बंदोबस्त द्या.'

उपमहापौर भूपाल शेटे म्हणाले, 'समाधी स्मारकामध्ये डॉ. बाबासाहेब आंबेडकर हॉलची उभारणी करण्यात येणार असून त्यासाठी एक कोटी ४० लाखांच्या निधीची तरतूद केली आहे. स्मारकाच्या सुरक्षेसाठी संरक्षक भिंत आवश्यक आहे. त्यामुळे पोलिस संरक्षणात काम केले जाईल.'

विरोधी पक्षनेते विलास वास्कर यांनी येथे वहिवाटीप्रमाणे रस्ता दिल्यास स्मारकाचे पावित्र्य नष्ट होईल असे निदर्शनास आणून दिले. तर नगरसेविका मेहजबीन सुभेदार यांनी समाधी स्मारक स्थळाच्या परिसरात होणाऱ्या अवैध प्रकारांचे पुरावेच सादर करत संरक्षक भिंतीची आवश्यकता व्यक्त केली.

स्मारक समितीचे सदस्य वसंतराव मुळीक म्हणाले, 'राजर्षी शाहूंच्या इच्छेनुसार समाधी स्मारकाचे काम होत असताना आणि काम अंतिम टप्प्यात असताना चुकीच्या पद्धतीने विरोध होत आहे. स्मारकाची सुरक्षितता महत्वाची असून काही मोजक्या लोकांमुळे सामाजिक स्वास्थ बिघडत आहे.'

शहर अभियंता नेत्रदीप सरनोबत यांनी येथील कामाचा आराखडा दाखवत सिद्धार्थनगर येथील रहिवाशांना अन्य ठिकाणाहून असलेल्या रस्त्यांची वस्तूस्थिती जिल्हाधिकारी देसाई यांच्या निदर्शनास आणून दिली.'

देसाई यांनी जिल्हा पोलिसप्रमुखांशी चर्चा करुन सकारात्मक निर्णय घेण्याची ग्वाही दिली. त्यानंतर पदाधिकाऱ्यांनी जिल्हा पोलिसप्रमुख डॉ. देशमुख यांना निवेदन दिले. आयुक्त डॉ. मल्लिनाथ कलशेट्टी यांच्यासोबत यापूर्वीच चर्चा झाली असून बांधकामाबाबत अडचण येणार नाही. त्यासाठी आयुक्त लवकरच बैठक घेणार आहेत. या बैठकीस स्वत: उपस्थित राहू' असे ते म्हणाले.

यावेळी परिवहन सभापती अभिजित चव्हाण, शिक्षण सभापती अशोक जाधव, माजी नगरसेवक नंदकुमार मोरे, उपशहर रचनाकार नारायण भोसले, उपशहर अभियंता एस. के. माने, अभिलेख अधिकारी गणेशकुमार खोडके, ठेकेदार व्ही. के. पाटील, इतिहास संशोधक इंद्रजित सावंत, सचिन जाधव, अभिजीत जाधव आदी उपस्थित होते.

सुरक्षा महत्त्वाची

राजर्षी शाहूंचे आंतरराष्ट्रीय दर्जाचे समाधी स्मारक साकारत आहे. स्मारक पाहण्यासाठी लाखो शाहूप्रेमी आणि पर्यटक येतील. त्यामुळे स्मारकाचा दर्जा आणि सुरक्षा राखणे महत्त्वाचे आहे. सद्यस्थितीत स्मारक परिसरात अनेक अवैध कृत्ये होतात असे शिष्टमंडळाने जिल्हाधिकाऱ्यांच्या निदर्शनास आणून दिले. येथे गोळा केलेल्या मद्यांच्या बाटल्यांचे वृत्तपत्रांतील फोटो, प्रसिद्ध झालेल्या बातम्यांची कात्रणे दाखवली.

Appasaheb.mali@timesgroup.com

Tweet:Appasaheb_MT

कोल्हापूर : कोल्हापूरला शंभरहून अधिक वर्षाची चित्रपटनिर्मितीची परंपरा. मराठी सिनेमाचे माहेर घर म्हणून ओळखल्या जाणाऱ्या या शहरात काही कुटुंबीयांनी पिढ्यानपिढ्या सिनेमा वेड जपले आहे. आजोबा, वडील, काका यांच्यानंतर नव्या पिढीतील तरुण 'आम्ही चालवू कलेचा वारसा'अशी साद घालत कलादिग्दर्शन, कॅमेरामन, अभिनय, नृत्यदिग्दर्शक अशा सिनेमाच्या विविध क्षेत्रात काम करत आहेत. तरुण पिढीची हे आश्वासक बोल निश्चितच अपेक्षा उंचावणाऱ्या आहेत. काही जण कोल्हापुरात कार्यरत आहेत. तर कुणी मुंबई गाठली आहे. तिथेही ते कोल्हापुरी ठसा उमटवित आहेत.

कलादिग्दर्शनाला तिसऱ्या पिढीचा लूक

फिल्म इंडस्ट्रीतच करिअर करायचे म्हणून प्रशांत रमेश बिडकर या तरुणाने पुण्यातील एफटीआयमध्ये आर्ट डायरेक्टर अँड प्रॉडक्शन डिझाइनचा अभ्यासक्रम पूर्ण केला. २०११ पासून ते स्वतंत्रपणे कलादिग्दर्शक म्हणून काम करत आहे. 'देऊळ, किल्ला'सारखा सिनेमा त्याच्या नावावर आहे. मूळचे कोल्हापूरच्या असलेल्या प्रशांतने प्रारंभी काही वर्षे पुण्यात तर सध्या मुंबई येथे काम करत आहेत. गेल्या आठ नऊ वर्षाच्या कालावधीत पंधराहून अधिक सिनेमे केले. प्रशांतच्या रुपाने बिडकर कुटुंबीयांतील तिसरी पिढी सिनेमा क्षेत्रात आहे. कलादिग्दर्शक बळीराम बिडकर यांचे ते नातू आहेत. चित्रकार व शिक्षक रमेश बिडकर यांचे चिरंजीव आणि कलादिग्दर्शक सतीश बिडकर यांचा हा पुतण्या कल्पकता, कौशल्य आणि कलात्मकतेची सांगड घालून इंडस्ट्रीजमध्ये ठसा उमटवित आहे.

इंडस्ट्रीजसाठी आश्वासक चेहरा

नृत्यदिग्दर्शक, दिग्दर्शक, शॉर्ट फिल्म व जाहिरात निर्मिती अशा वेगवेगळ्या पातळीवर हटके काम करणारा तरुण कलावंत म्हणजे संग्राम भालकर. दिग्दर्शक यशवंत भालकर यांचा हा मुलगा. गेल्या काही वर्षांत त्यांनी आपल्या कामाच्या बळावर इंडस्ट्रीजमध्ये स्वतची ओळख निर्माण केली आहे. 'राजमाता जिजाऊ, हायकमांड, हृदयात समथिंग, संत सखू, पिसारा, जल्लोष अशा वेगवेगळ्या सिनेमासाठी नृत्यदिग्दर्शनाची जबाबदारी खुबीने पार पडली. आतापर्यंत त्याने २३ सिनेमासाठी नृत्य दिग्दर्शन केले आहे.मराठी व हिंदी वाहिन्यावरील गाजलेल्या मालिकेसाठी कोरिओग्राफी केली आहे. कलेची आवड जोपासत मराठी सिनेमे, मालिका, विविध शोसाठी नृत्य दिग्दर्शन करताना त्याने नव्या पिढीला नृत्याचे शास्त्रशुद्ध धडे देण्यासाठी कोल्हापूर डान्स असोसिएशनची स्थापना केली आहे.

नाटकाची आवड ते व्यावसायिक रंगभूमीवर छाप

ती हौशी नाटकात काम करते, व्यावसायिक रंगभूमीवर छाप पाडते, सोबत कायद्याचा अभ्यासही करत आहे. एकाचवेळी शिक्षण, नाटकात काम करण्याची आवड या दोन्ही गोष्टी जपणाारी याज्ञसेनी सुनील घोरपडे ही कोल्हापुरातील तरुण कलाकार. याज्ञसेनी म्हणते, 'मला कुटुंबीयांकडून कलेचा वारसा मिळाला. कुटुंबांतील अनेक सदस्य नाटक, सिनेमाशी निगडीत. यामुळे लहानपणीच कलेची आवड लागली' तिने राज्य नाट्य स्पर्धेसह व्यावसायिक नाटकेही केली आहेत. यामध्ये 'नागमंडल', 'ती फुलराणी', 'नटसम्राट', 'विच्छा माझी पुरी करा', 'नरशार्दूल राजा संभाजी', 'नवरा माझ्या मुठीत गं', 'सखाराम बाईंडर' या नाटकांचा समावेश आहे. लहानपणी निर्माण झालेली नाटकाची आवड ते व्यावसायिक रंगभूमीवरील सादरीकरण हे शक्य झाले ते कुटुंबांच्या प्रोत्साहनामुळे असे ती म्हणते.

कुटुंब रंगलंय छायाचित्रणात

कॅमेरामन इम्तियाज बारगीर हे गेली ३६ वर्षे कॅमेरामन म्हणून फिल्म इंडस्ट्रीत आहेत. या कालावधीत त्यांनी ४८ सिनेमे केले. त्यांच्या पाऊलावर पाऊल टाकत त्यांची दोन्ही मुले सलमान आणि सैफ हे दोघेही कॅमेरामन म्हणून मराठी सिनेमातील वाटचाल सुरू केली आहे. बारावीपर्यंत शिक्षण घेऊन या दोघांनीही सिनेमा क्षेत्रात काम करायचं ठरविले. मोठा मुलगा सलमान हा असिस्टंट कॅमेरामन म्हणून वारसा सांभाळत आहे. लहान मुलगा सैफ हा ऑपरेटिव्ह कॅमेरामन म्हणून काम करत आहे. बारगीर यांची तिसरी पिढी सध्या मराठी सिनेमात सक्रिय आहे. दरम्यान, इम्तियाज बारगीर यांचे वडील सिकंदर बारगीर हे जयप्रभा स्टुडिओ व शालिनी सिनेटोनमध्ये कॅमेरा ऑपरेटिंगचे काम करत होते.

कोल्हापूर टाइम्स टीम

गाळप झालेल्या उसाचे एफआरपीप्रमाणे बिल आठ दिवसांत शेतकऱ्यांच्या खात्यावर जमा करावे, या मागणीसाठी भारतीय किसान संघाने लक्ष्मीपुरीतील प्रादेशिक सहसंचालक कार्यालयासमोर आज, सोमवारी धरणे आंदोलन केले. संघाच्या शिष्टमंडळाने प्रादेशिक साखर सहसंचालक कार्यालयाला मागणीचे निवेदनही दिले.

श्रमिक हॉलजवळ मंडप उभारुन सोमवारी सकाळपासून संघाच्या कार्यकर्त्यांनी धरणे आंदोलन सुरू केले. 'एफआरपी आमच्या हक्काची, नाही कुणाच्या बापाची' अशा घोषणा यावेळी देण्यात आल्या. दोन तासांच्या आंदोलनात संघाच्यावतीने प्रादेशिक सहसंचालक कार्यालयाला निवेदन देण्यात आले. निवेदनात असे म्हटले आहे की, ऊस गाळप झाल्यानंतर १४ दिवसांत बिल देणे बंधनकारक असताना कोल्हापूर सांगली जिल्ह्यातील साखर हंगाम संपूनही अजूनही बिले मिळालेले नाही. त्यामुळे शेतकरी आर्थिक अडचणीत सापडले आहेत. एफआरपी थकवल्याप्रकरणी कारखान्यांवर कारवाई करावी, असे आदेश साखर आयुक्तांनी देऊनही त्याची अंमलबजावणी झालेली नाही. सध्या लग्न सराई सुरू आहे. खरीप हंगाम जवळ आल्याने खते बी-बियाणे खरेदीसाठी शेतकऱ्यांना पैसे हवे असल्याने आंदोलन करावे लागत आहे. कारखान्यांनी उसाची बिले लवकर देण्यासाठी प्रयत्न करावेत अशी मागणी करण्यात आली.

आंदोलनात जिल्हाध्यक्ष यशवंत खानविलकर, रघुनाथ पिसाळ, सिद्धार्थ शिंदे, श्रीकांत सोंगडे, दिलीप पाटील, बाळगोंडा पाटील यांच्यासह शेतकरी सहभागी झाले होते.

कोल्हापूर टाइम्स टीम

कामगारांच्या तक्रारीची दखल न घेणाऱ्या कामगार आयुक्तांचा निषेध करत आज सोमवारी संभाजी ब्रिगेड माथाडी आणि जनरल कामगार युनियनने शाहूपुरीतील सहाय्यक कामगार आयुक्त कार्यालयासमोर निदर्शने केली.

युनियनच्यावतीने कार्यालयाला निवेदन देण्यात आले. गोकुळ शिरगाव येथील इंडो काउंट इंड्रस्ट्रिजविरोधात २०१८ पासून दिलेल्या तक्रारीविरोधात कारवाई करावी करावी, अशी मागणी निवेदनात केली आहे. निवेदनात असे म्हटले आहे की, महाराष्ट्र औद्योगिक संबध १९४६ अधिनियमाप्रमाणे संभाजी ब्रिगेडची युनियन मान्यताप्राप्त असताना सहाय्यक कामगार कार्यालयाने संभाजी ब्रिगेडशी चर्चा करता येणार नाही अशी नोटीस दिली आहे. या नोटिशीविरोधात कोर्टात याचिका दाखल केली जाईल असा इशारा देण्यात आला. जिल्ह्यातील बोगस कंत्राटदार स्थानिक व परराज्यातील कामगारांना गुलामाप्रमाणे राबवून घेत आहेत. तसेच पगारही दिला जात नाही. कामगार आयुक्त कार्यालयाने बोगस कंत्राटदारांवर कारवाई करावी अशी मागणी करण्यात आली.

कामगारांचे हित जोपासण्याऐवजी कारखानदारांचे हित जोपासणे सुरू राहिले तर कार्यालयाला टाळे ठोकले जाईल, असा इशारा देण्यात आला. आंदोलनात जिल्हाध्यक्ष रुपेश पाटील, भगवान कोईंगडे, सुनील जाधव, विकी जाधव, अरुण जकाते, मारुती भोळे यांच्यासह कामगार सहभागी झाले होते.

कोल्हापूर

संकल्प फाउंडेशनच्यावतीने जयंती नाला येथे शनिवारी स्वच्छता मोहीम राबवली. महापालिकेचे आयुक्त डॉ. मल्लिनाथ कलशेट्टी यांनी केलेल्या आवाहनानुसार फाउंडेशनच्यावतीने स्वच्छता करण्यात आली. खानविलकर पेट्रोल पंपाजवळ सकाळी सात ते ११ पर्यंत स्वच्छता करण्यात आली. यावेळी फाउंडेशनचे अध्यक्ष अक्षय शेळके, सुशांत चव्हाण, यश शिर्के, सागर तांबे, प्रशांत मंडलिक, आशिष माने, पार्थ मुंडे, आशुतोष मगरे, अक्षय जाधव, संकेत जोशी आदी कार्यकर्ते उपस्थित होते.

लाइन बाजार येथे इफ्तार पार्टी

म. टा. वृत्तसेवा, कसबा बावडा

लाइन बाजारमधील हिंदू बांधवांनी येथील सुन्नत मुस्लिम जमात या मस्जिदमध्ये इफ्तार पार्टीचे आयोजन केले होते. ऋतुराज पाटील यांच्या हस्ते फलाहार वाटप करण्यात आले.

मुस्लिम धर्मियांचा रमजानचा महिना सूरू आहे. या काळात मुस्लिम समाजातर्फे उपवास म्हणजेच (रोजा) ठेवला जातो. रात्री ७ नंतर उपवास सोडला जातो. यावेळी ऋतुराज पाटील व त्यांच्या सहकाऱ्यांनी या बांधवाना उपवास सोडताना फलाहार वाटप केला. त्यांच्यासोबतच फळाचा आस्वाद घेतला.

यावेळी समाजाचे अध्यक्ष बाळ सय्यद यांनी लाइन बाजारमध्ये सर्वजण एकोप्याने राहतात. हा एकोपा इथून पुढेही असाच राहील. हिंदू बांधवानी आमच्यासाठी आयोजित केलेली इफ्तार पार्टी महत्त्वाची आहे असे सांगितले.

यावेळी असफअली मुजावर, नासिरभाई सय्यद, बालेखन पठाण, ताजुद्दिन शेख, निवास जाधव, लक्ष्मण गायकवाड, दीपक पडवळे, नाना दळवी, सतीश लाड उपस्थित होते.

म. टा. वृत्तसेवा, राधानगरी

आजीच्या नव्वदाव्या वाढदिवसानिमित्त सोहळा फार्म हाऊसवर सुरू होता. त्यात नव्याने तयार केलेल्या आंब्याच्या बागेत आलेल्या आंब्यांचे बॉक्स नातेवाईकांना देण्याचे अप्रूप, असा सगळा घरात आनंदी सोहळा सुरू असताना नातू घरी राहिलेली आंब्याची पेटी आणायला म्हणून गेला आणि रस्त्यात उभ्या असलेल्या मशीनला धडकला. यातच तो गतप्राण झाला आणि आनंदी सोहळ्यावर शोककळा पसरली.

परिते - शेळेवाडी रस्त्यावर झालेल्या या अपघातात यश आदेश चव्हाण (वय १८) या एकुलत्या मुलाचा मृत्यू झाला. रविवारी रात्री अकरा वाजता हा अपघात झाला. अपघाताची नोंद करवीर पोलिस ठाण्यात झालेली आहे.

यशच्या आजीचा रविवारी ९० वा वाढदिवस होता. त्यानिमित्त घरगुती कार्यक्रमाचे आयोजन केले होते. यासाठी चव्हाण यांचे कुटुंबीय आणि पाहुणे फार्म हाऊसवर जमले होते. या सगळ्यांना त्यांच्या बागेतील आंब्याच्या पेट्या भेट म्हणून देत होते. त्यावेली यशच्या मामांना देण्यासाठी ठेवलेली पेटी घरीच राहिल्याचे लक्षात आले. त्यामुळे ती आणण्यासाठी यश दुचाकी घेऊन निघाला. त्यावेळी त्याच्या मामाने आंब्याची पेटी नंतर घेऊ, असे सांगितले. मात्र, सर्व पाहुण्यांबरोबर तुम्हालाही देऊ असे म्हणून तो निघाला. घरी जात असताना रस्त्याशेजारी टायर पंक्चर झालेला डांबर मिक्सर त्याला न दिसल्याने तो त्याला धडकला आणि गंभीर जखमी झाला होता. त्याला तातडीने कोल्हापुरातील एका खासगी रुग्णालयात दाखल करण्यात आले होते. मात्र उपचारादरम्यान त्याचा मध्यरात्री मृत्यू झाला. या अपघाताची नोंद करवीर पोलिस ठाण्यात झालेली असून पुढील तपास रमेश ठाणेकर हे करत आहेत. शांत व मनमिळावू स्वभावाच्या यशचा अपघाती मृत्यू झाल्याने कुटुंबीयांना मोठा धक्का बसला.

कोल्हापूर टाइम्स टीम

लोकसभा निवडणुकीसाठी गुरुवारी मतमोजणी होणार आहे, त्या पार्श्वभूमीवर 'कोल्हापूर'साठी मतमोजणीचे ठिकाण असलेले रमनमळा येथील शासकीय गोदाम तर 'हातकणंगले'साठीच्या राजाराम तलावाशेजारील सरकारी गोदामात मंगळवारी सकाळी आठपासून तयारीची लगीनघाई राहिली. निवडणूक निर्णय अधिकारी तथा जिल्हाधिकारी दौलत देसाई, निवडणूक निर्णय अधिकारी तथा अप्पर जिल्हाधिकारी नंदकुमार काटकर यांनी तयारीचा तर विशेष पोलिस महानिरीक्षक डॉ. सुहास वारके, जिल्हा पोलिस प्रमुख डॉ. अभिनव देशमुख यांनी सुरक्षेचा आढावा घेतला. त्यांनी मतमोजणीच्या ठिकाणी भेट देऊन सूचना दिल्या.

गुरुवारी सकाळी सात वाजता मतमोजणीला प्रारंभ होईल. एका लोकसभा मतदारसंघात सहा विधानसभा मतदारसंघ आहेत.'कोल्हापूर' मतदारसंघातील विधानसभानिहाय मतदान यंत्रे रमनमळामधील विविध गोदामात ठेवले आहेत. त्याच ठिकाणी मतमोजणी करण्यात येणार आहे. त्यासाठी टेबल लावण्यात आले आहेत. टेबलभोवती बॅरिकेटस बांधण्यात आले. उमेदवारांच्या प्रतिनिधींना बसण्यासाठी स्वतंत्र व्यवस्था केली आहे. राष्ट्रीय पक्ष उमेदवारांच्या प्रतिनिधींना पहिल्या रांगेत बसवण्याची संधी दिली जाणार आहे. त्यानंतर राज्य मान्यता प्राप्त आणि शेवटी अपक्ष उमेदवारांच्या प्रतिनिधींना बसावे लागणार आहे. अशी बैठक व्यवस्था तयार करण्यात आली आहे.

पोष्टल मतपत्रिकेवरील बारकोड स्कॅन करण्यासाठी स्कॅनर, संगणक आणि प्रत्येक विधानसभा मतमोजणीच्या ठिकाणी सीसीटीव्ही बसवण्यात आले आहेत. इंटरनेटची जोडणी करण्यात आली असून त्याची चाचणी घेण्यात आली. जोडलेले सर्व संगणक सुरू असल्याची खात्री करण्यात आली. त्यासाठी संगणक तज्ज्ञ कार्यरत होते. निवडणुकीशी संबंधित महसूलमधील अधिकारी, कर्मचारी मतमोजणीच्या दोन्ही ठिकाणी दिवसभर थांबून कार्यरत होते. उमेदवारांच्या प्रतिनिधींना ओळखपत्र पोहच करण्याचे काम दिवसभर सुरू राहिले.

भोजन, सुरक्षा, स्वच्छता, आरोग्य, मीडिया कक्षासाठी बॅरिकेटस लावून कक्ष तयार केले आहेत. पुरेशा प्रमाणात पुरूष आणि महिला कर्मचाऱ्यांसाठी स्वच्छतागृह लावण्यात आले. बंदोबस्तासाठीचे पोलिस आणि राखीव कर्मचाऱ्यांसाठी परिसरात मंडप उभारण्यात येत आहे. उष्णता मोठ्या प्रमाणात आहे. गोदामावर पत्रे आहेत. त्यामुळे प्रचंड उकाडा आहे. यातून सुटका होण्यासाठी आवश्यकत त्या ठिकाणी स्टॅन्ड, टेबल फॅन, कुलरची व्यवस्था करण्यात आली. शहरात शोधा, शोध करून जादाचे कुलर भाड्याने घेऊन बसवण्यात आले. घरातील लग्न किंवा एखाद्या मोठ्या कार्यक्रमाची तयारीत जसा सक्रिय सहभाग असतो, त्याप्रमाणे तयारीतील प्रत्येक अधिकारी, कर्मचाऱ्यांची धांदल दिसत होती. अधिकाऱ्यांच्या मार्गदर्शनाखाली तयारीचे काम रात्री उशिरापर्यंत केले जात होते. फेरीनिहाय निकाल ऐकण्याची उत्सूकता उमेदवारांचे समर्थक, कार्यकर्त्यांना असते. त्यांच्या सोयीसाठी रमनमळ्यातील पोस्ट कार्यालय चौक तर राजाराम तलाव परिसरातील शिवाजी विद्यापीठ चौकात मोठे लाऊड स्पिकरचे कर्णे बसवण्यात आले आहेत.

कोट

मतमोजणीची तयारी अंतिम टप्यात आहे. दिवसभर मूलभूत आणि प्रत्यक्ष मतमोजणीवेळी गरजेच्या सुविधा निर्माण करण्यात आल्या. इंटरनेट, संगणकची चाचणी घेण्यात आली. सुरक्षेसाठी परिसरात सीसीटीव्ही बसवण्यात आले.

दौलत देसाई, जिल्हाधिकारी

२४० टेबलची मांडणी

दोन्ही ठिकाणी २० टेबलवर मतमोजणी करण्यात येणार आहे. मतमोजणीच्या २२ फेऱ्या होतील.'कोल्हापूर' आणि हातकणंगले लोकसभा मतदारसंघातील १२ विधानसभा मतदारसंघात २४० टेबलची मांडणी करण्यात आली आहे. केंद्रावर ४० सीसीसीटीव्हीची नजर असणार आहे. मतमोजणी करणाऱ्या कर्मचाऱ्यांना जाग्यावरच चहा, नाष्टा, जेवण पोहच करण्याची व्यवस्था केली आहे. जेवण दर्जेदार देण्यासंबंधीच्या सूचना जिल्हाधिकारी देसाई यांनी दिल्या आहेत.

महानगरपालिकेतर्फे स्वच्छतागृह

मतमोजणीच्या इमारतीजवळ पुरूष आणि महिलांसाठी स्वतंत्र स्वच्छतागृह बसवण्यात आले. महानगरपालिका प्रशासनाकडून हे उपलब्ध करून दिले आहेत. इतर वापरासाठी आणि पिण्यासाठी पाणी कमी पडू नये, अशी व्यवस्था करण्यात आली. टँकरही तैनात करण्यात आले आहेत. सेवा पुरवणाऱ्यांना कर्मचाऱ्यांनाही ओळखपत्र देण्यात आले आहेत.

म. टा. प्रतिनिधी, कोल्हापूर

भगवान गौतम बुद्ध जयंती शनिवारी शहरात विविध कार्यक्रमांनी साजरी झाली. महापालिकेच्यावतीने गौतम बुद्धाच्या प्रतिमेस महापौर सरिता मोरे यांनी पुष्पहार अर्पण करुन अभिवादन केले. धम्म ध्वजारोहन, त्रिशरण व पंचशील ग्रहण कार्यक्रमांचे ठिकठिकाणी आयोजन केले होते.

महापालिकेच्या छत्रपती ताराराणी सभागृहात गौतम बुद्धांच्या पुतळ्यास महापौर मोरे यांनी पुष्पहार अर्पण केला. यावेळी उपायुक्त मंगेश शिंदे, प्रभारी जनसंपर्क अधिकारी विजय वणकुद्रे उपस्थित होते. बहुजन ऐक्य समितीच्यावतीने शिवाजी पेठ येथील प्रसाद गार्डन येथे फुले वाहण्यात आली. यावेळी अॅड. पंडितराव सडोलीकर, अक्षय साळवी, अमोल कांबळे, राज कुरणे, जगन्नाथ कुरणे, विक्रम कांबळे आदी उपस्थित होते.

जिल्हा बहुजन माध्यमिक शिक्षक व सेवक सहकारी पतसंस्थेच्यावतीने गौतम बुद्धांची जयंती उत्साहात साजरी केली. संस्थेचे अध्यक्ष रंगराव मांगोलीकर यांनी गौतम बुद्धांच्या मूर्तीचे पूजन केले. याप्रसंगी रघुनाथ मांडरे यांनी मनोगत व्यक्त केले. यावेळी उपाध्यक्षा कल्पना भोसले, संचालक प्रकाश पोवार, राहुल माणगांवकर, नंदकुमार कांबळे, रवींद्र मोरे, रामचंद्र गडकर आदी उपस्थित होते.

रिपब्लिकन पार्टी ऑफ इंडियाच्या आठवले गटाच्यावतीने कुशिरे-पोहाळे येथील बौद्ध लेणी स्थळावर गौतम बुद्धांची जयंती साजरी करण्यात आली. यावेळी प्रा. शहाजी कांबळे, संजय जिरगे, शिल्पेश कांबळे, सुरेश कुरणे, अंकित कांबळे, रुपेश कांबळे, सचिन कांबळे आदी उपस्थित होते.

कोल्हापूर बौध्द अवशेष व विचार संवर्धन समितीच्या वतीने मसाई पठार पांडवदरा येथे बुध्द जयंती साजरी करण्यात आली. अध्यक्षस्थानी टी.एस. कांबळे होते. येथील बौध्द लेण्यांचे पर्यटन स्थळात रूपांतर करावे, त्याचे संवर्धन करावे अशी मागणी यावेळी पुरातत्व खात्याकडे करण्यात आली. यावेळी सर्जेराव थोरात, बापूसाहेब कांबळे, अजित कांबळे आदि उपस्थित होते. यावेळी सामाजिक क्षेत्रात काम करणाऱ्यांचा सत्कार करण्यात आला. प्रवीण कांबळे यांनी आभार मानले.

फोटो आहे...

म. टा. प्रतिनिधी, कोल्हापूर

नवदुर्गा महोत्सव, आडवाटेवरचे कोल्हापूर, कला महोत्सव, फ्लॉवर महोत्सवामध्ये दंग असणारे पालकमंत्री चंद्रकांत पाटील अंबाबाई तीर्थक्षेत्र विकास आराखड्याकडे लक्ष देतील का? तीर्थक्षेत्र विकासासाठी अर्थसंकल्पात केवळ ८० कोटींची तरतूद करून त्यांनी भाविकांची फसवणूक केली आहे. याच्या निषेधार्थ शिवसेनेचे शहरप्रमुख रविकिरण इंगवले यांच्या नेतृत्वाखाली महाद्वार चौकात रस्ता रोको आंदोलन केले. यामुळे महाद्वार रोडवरील वाहतूक काहीकाळ ठप्प झाली होती.

याबाबत दिलेल्या प्रसिद्धी पत्रकात म्हटले आहे की, 'पालकमंत्री पाटील विविध महोत्सवांच्या माध्यमातून शहरातील सर्व प्रश्नांची सोडवणूक झाल्याप्रमाणे पैशाची उधळपट्टी करत आहेत. त्यामुळे अंधारात काजवा महोत्सव घेणाऱ्यांचा विकास आता उजेडातही दिसत नाही. सातत्याने विविध महोत्सवांमध्ये व्यस्त असलेल्या पालकमंत्र्यांना तीर्थक्षेत्र विकास आराखड्याकडे लक्ष देण्यास वेळ नाही.'

पालकमंत्री पाटील घोषणांचा पाऊस पाडत असून, विकासकामे मात्र होत नाहीत. अंबाबाईचरणी दाखल होणारी देणगी नेमकी कोठे जाते? अंबाबाई मंदिरासाठी घेतलेल्या निर्णयाची त्वरीत अंमलबजावणी करा? अन्यथा उग्र आंदोलन करू.'

यावेळी बाबा महाडिक, धनाजी दळवी, लाला साळोखे, आबाजी जगदाळे, पीयूष चव्हाण, मंगलाताई साळोखे यांच्यासह कार्यकर्ते उपस्थित होते.

०००००

म. टा. प्रतिनिधी, कोल्हापूर

राष्ट्रवादीतील गटबाजी, काँग्रेसमधील एका गटाने उघडपणे केलेला विरोध, आघाडीधर्माला दिलेला फाटा, शिवसेना व भारतीय जनता पक्षाने कोल्हापुरातून फुंकलेले प्रचाराचे रणशिंग यामुळे यंदाची लोकसभेची निवडणूक कमालीची गाजली. तपोवन मैदान आणि गांधी मैदानातील प्रचार सभेने युती व आघाडीने शक्तीप्रदर्शन घडवत विजयाचे आम्हीच प्रमुख दावेदार अशी घोषणा केल्याने निवडणुकीविषयी उत्कंठा वाढीस लागली आहे.

...........

पवारांच्या दौऱ्यांनी केले कार्यकर्त्यांना चार्ज

निवडणूक लोकसभेची असो की विधानसभेची, राष्ट्रवादीचे राष्ट्रीय अध्यक्ष शरद पवार यांच्या दौऱ्यात सगळी समीकरणे ठीक व्हायची. यंदा 'राष्ट्रवादी'ने कोल्हापूरची जागा कमालीची प्रतिष्ठेची बनविली. पक्षातंर्गत गटबाजी, काँग्रेसमधील एका गटाच्या विरोधामुळे राष्ट्रवादीच्या बालेकिल्ल्याला धक्का बसू नये, यासाठी शरद पवार यांनी कोल्हापूरवर विशेष लक्ष केंद्रित केले. प्रचाराच्या कालावधीत त्यांनी पाचवेळा कोल्हापूर दौरा करुन कार्यकर्त्यांना चार्ज केले.

........

'आमचं ठरलंय' ते 'आम्ही बी ध्यानात ठेवलंय'

काँग्रेसचे आमदार सतेज पाटील गटाने खासदार धनंजय महाडिक यांच्या विरोधात उघडपणे विरोधाची भूमिका घेतली. 'आमचं ठरलयं' म्हणून त्यांनी मतदारसंघात यंत्रणा सक्रिय करत शिवसेनेचे उमेदवार प्रा. संजय मंडलिक यांचा प्रचार केला. हा विरोध टोकाला गेल्यावर राष्ट्रवादीचे राष्ट्रीय अध्यक्ष शरद पवार यांनी 'आम्ही बी ध्यानात ठेवलंय' असे सुनावत काँग्रेसमधील गटाला सूचक इशारा दिला. मात्र महाडिक आणि पाटील गटातील वैर कायम राहिले.

...................

युतीने फुंकले कोल्हापुरातून रणशिंग

भारतीय जनता पक्ष, शिवसेनेने लोकसभा निवडणुकीच्या प्रचाराचा शुभारंभ कोल्हापुरातून केला. मुख्यमंत्री देवेंद्र फडणवीस, शिवसेना पक्षप्रमुख उद्धव ठाकरे यांच्यासह राज्यमंत्रीमंडळातील बहुतांश मंत्र्यांच्या उपस्थितीत तपोवन मैदान येथे २४ मार्च रोजी प्रचार सभा झाली. फडणवीस व ठाकरे यांनी भाषणात काँग्रेस, राष्ट्रवादी काँग्रेसचा जोरदार समाचार घेतला.

..............

गांधी मैदानातून राष्ट्रवादीचे शक्तिप्रदर्शन

राष्ट्रवादी काँग्रेस, काँग्रेस आघाडीने १७ एप्रिल रोजी गांधी मैदान येथे जंगी सभा घेऊन शक्तिप्रदर्शन घडवले. पक्षाचे अध्यक्ष शरद पवार यांच्या प्रमुख उपस्थितीत सभा झाली. पीपल्स रिपब्लिकन पार्टी ऑफ इंडियाचे अध्यक्ष प्रा.जोगेंद्र कवाडे यांची शिवसेनेचे उमेदवार मंडलिक यांच्यावरील खरमरीत टीका गाजली. राष्ट्रवादीचे प्रदेशाध्यक्ष जयंत पाटील यांनी चित्रफितीच्या माध्यमातून मोदी सरकारच्या फसव्या घोषणांचा पर्दाफाश केला.

...........

आघाडी धर्म फाट्यावर, युतीतही बेबनाव

खासदार महाडिक व काँग्रेसचे आमदार सतेज पाटील यांच्यातील राजकीय संघर्षाचा प्रभाव निवडणुकीवर राहिला. काँग्रेस, राष्ट्रवादी, स्वाभिमानी व मित्रपक्षांची आघाडी होती. मात्र आमदार पाटील गटाने महाडिक यांच्याविरोधात प्रचारात सक्रिय होत आघाडी धर्माला फाटा दिला. दुसरीकडे भारतीय जनता पक्षातील महाडिक समर्थक असलेल्या स्थानिक स्वराज्य संस्थेतील सदस्यांनी युती धर्म पाळला नाही. युतीचे उमेदवार मंडलिकांच्याऐवजी त्यांनी राष्ट्रवादीचे उमेदवार महाडिक यांचा प्रचार केला.

...............

मतदारसंघनिहाय विधानसभेसाठी जोडणी

निवडणूक लोकसभेची मात्र जोडणी विधानसभेसाठी असे चित्र प्रत्येक विधानसभा मतदारसंघात पाहावयास मिळाले. आगामी विधानसभा निवडणूक डोळ्यासमोर ठेवून इच्छुक उमेदवारांनी प्रचार यंत्रणा राबवली. इतकेच नव्हे तर आगामी निवडणुकीत पक्षनिहाय उमेदवार कोण असतील याचे आडाखे बांधले गेले.

.........

'गोकुळ'सह स्थानिक राजकारणच चर्चेत

लोकसभा निवडणूक देशाशी निगडीत व विकासाच्या प्रश्नावर लढली जाईल, अशी अपेक्षा जाणकार व्यक्त करत होते. मात्र संपूर्ण प्रचाराच्या कालावधीत गटातटाचे राजकारण, नेत्यांमधील राजकीय संघर्षाभोवती निवडणूक रंगली. गोकुळ मल्टीस्टेटचा विषयही ऐरणीवर आला. वैयक्तिक टीकाटिप्पणी झाली. पालकमंत्री चंद्रकांत पाटील यांनी 'गोकुळसाठी महाडिकांनी कुटुंब दावणीला बांधले'अशा शब्दांत टीका केली.

म. टा. प्रतिनिधी, कोल्हापूर

'सामाजिक उपक्रमात अग्रेसर असलेल्या संवेदना सोशल फाउंडेशनच्या वतीने पालकमंत्री चंद्रकांत पाटील यांच्या प्रेरणेने यावर्षी एक हजार मुली, महिलांना शिक्षण, प्रवास, प्रशिक्षणासाठी मदत केली जाणार आहे,' अशी माहिती फाउंडेशनचे अध्यक्ष राहुल चिकोडे आणि सचिव काशीनाथ मेणे यांनी पत्रकार परिषदेत दिली.

आर्थिक परिस्थितीमुळे अनेकांना शिक्षण, प्रशिक्षण घेता येत नाही. तसेच मोठ्या शहरात जाऊन आवश्यक असलेले शिक्षण व कौशल्य घेता येत नाही. अशा गरजू मुलींना यावर्षी मदत केली जाणार आहे. त्यासाठी फाउंडेशनकडे अर्ज दाखल करावेत, असे आवाहन केले आहे. अर्जांची छाननी करून योग्य ती मदत केली जाणार आहे.

फाउंडेशनच्या वतीने अनेक उपक्रम यापूर्वी राबविले आहेत. पालकमंत्री पाटील यांच्या वाढदिवसानिमित्त जिल्ह्यात २९ ठिकाणी स्वच्छतागृहे उभारण्यात आली असून, त्यांची देखभाल महिला बचत गटांकडून केली जात आहे. तिरळे डोळे व वेडेवाकडे दात असलेल्या झोपडपट्टीतील मुलींचे वैगुण्य घालविण्यासाठी तपासणी करून शस्त्रक्रियाही करण्यात आल्या. दुर्गम भागातील धनगरवाड्यांतील विद्यार्थी-विद्यार्थिनींसाठी कोल्हापूर शहरातील प्रेक्षणीय स्थळांच्या सहलीचे यशस्वी आयोजन करण्यात आले. पन्हाळा-पावनखिंड पदभ्रंमती मोहिमेत तीन हजार ९०० ट्रेकर सहभागी झाले. ही मोहीम एशियन पॅसिफिक व ग्लोबल व नॅशनल रेकॉर्ड प्रस्थापित करणारी ठरली. संस्थेच्या वतीने शहर व जिल्ह्यातील तालीम, संस्थांना इमारती बांधण्यासाठी, ग्रंथालय, धार्मिक मंदिरे उभारण्यासाठी मदत केली आहे. पाच रुपयांत चपाती-भाजी हा गरीब, गरजू आणि रुग्णांसाठी अत्यंत महत्त्वाचा उपक्रम ठरला आहे. रोज एक हजार व्यक्ती या उपक्रमाचा लाभ घेतात.

०००००