कोल्हापूर टाइम्स टीम

शिवाजी विद्यापीठातील दीक्षान्त सभागृहास राजमाता जिजाऊ यांचे नाव द्यावे अशी मागणी शिवसेना युवा सेनेच्या कार्यकर्त्यांनी विद्यापीठ प्रशासनाकडे केली आहे. या महिन्यात होणाऱ्या व्यवस्थापन परिषदेच्या बैठकीत नामकरणाचा ठराव मंजूर करुन घ्यावा. सभागृहाला राजामाता जिजाऊ यांचे नाव दिल्यास विद्यापीठाच्या नावलौकिकात वाढ होईल अशी भूमिका कार्यकर्त्यांनी मांडली.

विद्यापीठाचे प्र-कुलगुरू डॉ. डी. टी. शिर्के यांच्याकडे कार्यकर्त्यांनी मागण्यांचे निवेदन दिले. शिष्टमंडळात युवा सेना विस्तारक हर्षल सुर्वे, जिल्हा युवाधिकारी मंजित माने, शेखर बारटक्के, विनायक जाधव, पवन तोरस्कर, अर्जुन कदम, अभिजित भोसले आदींचा समावेश होता. विद्यापीठ प्रशासनाने, याप्रश्नाकडे दुर्लक्ष केल्यास तर आम्ही स्वत सभागृहाचे नामकरण करू. गेल्या अनेक वर्षापासून आजी, माजी विद्यार्थी संस्था, सामाजिक संस्था या मागण्यासाठी पाठपुरावा करत असल्याचे कार्यकर्त्यांनी अधिकाऱ्यांच्या निदर्शनास आणले. याप्रसंगी कुलसचिव विलास नांदवडेकर उपस्थित होते.

सातारा, कराड, फलटण

झाले केरोसीनमुक्त

सातारा :

जिल्ह्यातील सातारा, कराड व फलटण ही शहरे केरोसीनमुक्त करण्यात जिल्हा पुरवठा विभागाला यश आले आहे. या शहरांतील महिन्याकाठी जाणारे १५ टँकर आता बंद झाले आहेत. या तीन ही शहरांमधील रेशनिंग दुकानदार महिनाकाठी १५ टँकर रॉकेलची मागणी करीत होते. या शहरांमध्ये प्रत्येक कुटुंबात गॅस कनेक्शन असतानाही रॉकेलची मागणी कशी होते? या बाबत शंका आल्याने पुरवठा विभागाने या शहरांत कार्यवाही सुरू केली.

या साठी शहरांतील गॅस एजन्सीजची बैठक घेण्यात आली. त्यामध्ये केरोसीन मागणी करणाऱ्या रेशनिंग ग्राहकांकडे गॅस आहे का? याची तपासणी करण्यात आली. अनेकांनी रेशनिंग कार्डवर गॅसचा उल्लेख टाळला होता. त्यामुळे रेशनिंग व्यावसायिक मोठ्या प्रमाणावर केरोसीनची मागणी करीत होते. गॅसच्या तपासणीत अनेकांनी कूरकूर केली. काही रेशनिंग व्यावसायिक ही माहिती लपवत होते. मात्र, प्रशासनाने दट्ट्या लावला. केरोसीन घेणाऱ्या रेशनिंग ग्राहकांकडून गॅस नसल्याचे हमीपत्र घेण्यात आले. तसेच माहिती दडविणाऱ्यांवर फौजदारी गुन्हे दाखल करण्याचा इशाराही देण्यात आला होता. सलग तीन महिने चाललेल्या या कार्यवाहीमध्ये केरोसीनची मागणी करणाऱ्या अनेक ग्राहकांकडे गॅस कनेक्शन असल्याचे आढळून आले. या मोहिमेमुळे तब्बल ८० किलो लिटर केरोसीन वाचले आहे. महिन्याकाठी १ लाख ८० हजार लिटर केरोसीनची बचत झाली. रेशनिंगला प्रति लिटर ३० रुपयांनी दर पकडला तरी त्याची किंमत तब्बल ५४ लाख रुपये इतकी होते.

............

साताऱ्यात आठवड्यातून एक दिवस पाणी कपात

सातारा :

सातारा शहरात पाणीटंचाईचे ढग जमा होऊ लागले असून, आठवड्यातून एक दिवस पाणी कपात करण्याचा निर्णय पालिकेने घेतला आहे. शहराला पाणीपुरवठा करत असलेल्या कास तलावात केवळ सात फूट चार इंच पाणीसाठा शिल्लक आहे. तलावाचा दुसरा व्हॉल्व्हही उघडा पडला असल्याने पाणीटंचाई निर्माण झाली आहे. तलावाचा दुसरा व्हॉल्व्ह उघडा पडला असून, शेवटच्या तिसऱ्या व्हॉल्व्हमधून पाणीपुरवठा सुरू आहे. यंदा अवकाळी पावसाने ओढ दिल्याने व उन्हाची तीव्रता जास्त असल्याने गतवर्षीच्या तुलनेत यंदा तलावात दोन फुटाने पाणीसाठा कमी आहे. वरुणराजा वेळेत बरसला नाही तर सातारकरांची तहान भागविणे जिकिरीचे होणार आहे.

...........

अपघात एक जागीच ठार

कराड :

तांबवे (ता. कराड) गावाच्या हद्दीतील पवार मळा येथे मंगळवारी दुपारी दोन वाजण्याच्या सुमारास दुचाकी व चारचाकीची समोरासमोर भिषण धडक होऊन झालेल्या अपघातात दुचाकीस्वार युवक जागीच ठार झाला, तर एक मुलगी गंभीर जखमी झाली असून, एक लहान मुलगी किरकोळ जखमी झाली आहे. प्रतीक शंकर शिंदे (वय १९, रा. वसंतगड, ता. कराड) असे अपघातात मृत्यू झालेल्या युवकाचे नाव आहे. त्याचीच बहिण प्रतीक्षा शंकर शिंदे (वय १४, रा. वसंगतड, ता. कराड) व गुड्डी चंद्रकांत चव्हाण (वय १०, रा. वारूंजी, ता. कराड ) या दोघी जखमी झाल्या. यातील प्रतीक्षा शिंदे गंभीर जखमी झाल्याने तिला येथील कृष्णा रुग्णालयातील अतिदक्षता विभागात उपचारासाठी दाखल करण्यात आले आहे. गुड्डी शिंदे ही किरकोळ जखमी आहे.

.......

बसवेश्वर जयंतीनिमित्त रॅली

कराड : कराड येथे वीरशैव लिंगायत समाजाच्या वतीने मंगळवारी सात रोजी श्री महात्मा बसवेश्वर यांची जयंती उत्साहात साजरी करण्यात आली. या वेळी शहरातून दुचाकी रॅली काढण्यात आली. या रॅलीस उत्स्फूर्त प्रतिसाद मिळाला. सकाळी दहा वाजता लिंगायत मठापासून रॅलीस प्रारंभ झाला. या वेळी रॅलीतील सहभागी समाजबांधवांनी महात्मा बसवेश्वर यांचा जयघोष केला. चावडी चौक, कन्याशाळा, आंबेडकर पुतळा, दत्त चौक, तहसीलदार कार्यालय मार्गे ही रॅली काढण्यात आली.

उजनीतून दुबार पंपिंग सुरू

सोलापूर :

उजनी धरणातील पाणीपातळी वजा ३५ टक्क्यांखाली गेल्यामुळे महापालिकेच्या पाणीपुरवठा विभागाने उजनी जलाशयातून दुबार पंपिंग सुरू केले आहे. धरणाच्या काठावर नव्याने यंत्रणा उभारण्यात आली आहे. उन्हाच्या झळा आणि रात्रीची धग सोसत धरणाच्या खोल पाण्यात उतरून कामगारांनी ३६ वीजपंपांच्या पार्ईप आणि वायरिंग जोडणीचे काम पूर्ण केले आहे. पुढील दोन महिने दोन वरिष्ठ अधिकारी आणि १५ कर्मचारी या ठिकाणी तैनात असणार आहेत.

शहराला उजनी-पाकणी जलवाहिनी, औज-सोरेगाव आणि हिप्परगा तलाव या तीन योजनांमधून पाणीपुरवठा होतो. हिप्परगा तलाव कोरडा पडल्याने उर्वरित दोन योजनांमधून पाणीपुरवठा सुरू आहे. उजनी जलाशयावर महापालिकेचे पंपगृह आहे. जलाशयाच्या काठावर १५ मीटर खोलीची चर आहे. यातून पाणी उपसा केला जातो.

का केले जाते पंपिंग

उजनी जलाशयाची पाणीपातळी वजा ३५ टक्क्यांखाली गेल्यानंतर पंपगृहाच्या जॅकवेलपर्यंत पाणी पोहोचत नाही. त्यामुळे जलाशयात आणखी पुढे जाऊन पाणी उपसा केला जातो. हे पाणी जॅकवेलच्या चरीपर्यंत सोडण्यात येते. यंदा उजनी धरण शंभर टक्के भरले होते. लोकसभा निवडणुकीच्या तोंडावर धरणातून नियोजनापेक्षा जास्त पाणी सिंचनासाठी सोडण्यात आले. परिणामी धरणाची पाणीपातळी लवकर खालावली. उजनी धरणातील पाणीपातळीचा अंदाज आल्यानंतर मनपाच्या पाणीपुरवठा विभागाने १५ एप्रिलपासून दुबार पंपिंगची तयारी सुरू केली होती. महापालिकेने या कामासाठी ३० लाख रुपयांची तरतूद करून ठेवली आहे. यंत्रणा उभी करण्यासाठी एक कंत्राटदार नेमण्यात आला आहे. पाणीपुरवठा विभागाचे प्रमुख गंगाधर दुलंगे, उपअभियंता संजय धनशेट्टी, सहायक अभियंता संतोष यलगुलवार, इलेक्ट्रिक सुपरवायझर नितीन अंबिगार यांच्यासह कर्मचाऱ्यांनी उजनी जलाशयाच्या काठावर नव्याने यंत्रणा उभी करून घेतली. मंगळवारपासून नियमितपणे पाणी उपसा करून जॅकवेलपर्यंत पाणी सोडण्यास सुरुवात झाली. जून-जुलै महिन्यात पाऊस पडल्यानंतर उजनी धरणातील पाणी पातळीत वाढ होईल. तोपर्यंत दुबार पंपिंगचे काम सुरू राहणार आहे.

आजवर पाच वेळा दुबार पंपिंग

पाणीपुरवठा विभागाचे उपअभियंता संजय धनशेट्टी म्हणाले, '२००८पासून आजवर पाच वेळा दुबार पंपिंग करावे लागले आहे. यापूर्वी २०१६मध्ये एप्रिल महिन्यात दुबार पंपिंग करण्यात आले होते. यंदा मात्र मे महिन्यात दुबार पंपिंग करावे लागले आहे. उजनी धरणाची पाणीपातळी वजा ५० टक्क्यांखाली गेली तर तिबार पंपिंग करावे लागेल. मागच्या वेळी ३० अश्वशक्तीचे दोन तर ५० अश्वशक्तीचा एक पंप वाढविण्यात आला आहे.

कर्जबाजारी शेतकऱ्याची आत्महत्या

सोलापूर

दुष्काळाचा सामना करीत असलेल्या सोलापूर जिल्ह्यात कर्जबाजारीपणाला कंटाळून एका शेतकऱ्याने मंगळवारी आत्महत्या केली आहे. तुकाराम माने, असे आत्महत्या केलेल्या शेतकऱ्याचे नाव असून, तो मोहोळ तालुक्यातील येणकी गावाचा रहिवासी आहे. डाळिंबावर फवारण्यासाठी आणलेले विषारी कीटकनाशक प्राशन करून शेतकऱ्याने आपली जीवनयात्रा संपवली.

तुकाराम माने यांनी शेतीसाठी युनियन बँकेकडून १२ लाखांचे कर्ज काढले होते. हे कर्ज फेडून कर्जमाफीचा फायदा घेण्यासाठी त्यांनी खासगी सावकाराकडून ३ लाखांचे कर्ज घेतले होते. मात्र, बँकेने घराच्या कर्जाचे हफ्ते भरून घेतल्याने शेती कर्जाची रक्कम जैथे-थेच राहिली. शिवाय खासगी सावकाराचे कर्ज वाढले. दुष्काळ आणि नापिकीमुळे गेल्या अनेक महिन्यांपासून तुकाराम चिंतेत होता. ऊस जाळून गेल्यावर आणि त्या नंतर आता डाळिंबाची बाग जळण्याच्या मार्गावर होती. परिणामी शेतीतील उत्पन्न येत नसल्याने घेतलेले कर्ज कसे फेडायचे याची त्याला चिंता लागली होती. या नैराश्येतून अखेर मंगळवारी सकाळी अकरा वाजता कीटकनाशक प्राशन करून त्याने आत्महत्या करून आपली जीवनयात्रा संपवली.

कोल्हापूर टाइम्स टीम

तंजावर (तमिळनाडू) येथील तमिळ विद्यापीठ आणि सरस्वती महाल ग्रंथालय यांच्यासमवेत तंजावर पेपर्स आणि तंजावरी मराठी भाषा अभ्यासासंदर्भात सामंजस्य करार करण्याबाबत तमिळ विद्यापीठाचे कुलगुरू डॉ. सी. बालसुब्रम्हण्यम् यांच्याशी शिवाजी विद्यापीठाचे कुलगुरू डॉ. देवानंद शिंदे यांची यशस्वीपणे चर्चा झाली. कुलगुरू डॉ. शिंदे यांनी या संदर्भात नुकतीच विद्यापीठाच्या अभ्यासकांसमवेत तंजावरला भेट दिली.

तंजावर येथील तमिळ विद्यापीठाने मराठा इतिहास आणि मराठी भाषेसंदर्भातील चाळीस हजारहून अधिक कागदपत्रे जतन करून ठेवलेली आहेत. हे विद्यापीठ भाषेला केंद्रस्थानी ठेऊन स्थापन करण्यात आले असून या विद्यापीठाकडून मोडी कागदपत्रांचे भाषांतर कार्यही मोठ्या प्रमाणात झाले आहे. त्यामुळे या विद्यापीठाशी तंजावर पेपर्स आणि तंजावरी मराठी भाषा अभ्यासासंदर्भात सामंजस्य करार शिवाजी विद्यापीठाच्या विचाराधिन होता. त्याचबरोबर सरस्वती महल ग्रंथालयात मोडी कागदपत्रांसह हजारो मराठी ग्रंथांचे जतन केलेले असल्याने संशोधकांना अभ्यासासाठी ते सहज उपलब्ध व्हावे यासाठी ग्रंथालयाबरोबरही सामंजस्य करार करण्यात येणार आहे. त्या दृष्टीने तंजावर येथील सरस्वती महाल ग्रंथालयामध्ये बैठक झाली. बैठकीमध्ये तंजावरला मराठी अध्यासन आणि शिवाजी विद्यापीठात तमिळ अध्यासन स्थापन करण्यासंदर्भात विस्तृत चर्चा झाली.

शिवाजी विद्यापीठ नवे म्युझिअम साकारत असून या म्युझिअममध्ये तंजावर येथील मराठ्यांच्या इतिहासाशी संबंधित दालन उभारण्यासंदर्भातही सकारात्मक चर्चा यावेळी झाली. शिवाय, सरस्वती महल ग्रंथालयातील उपलब्ध अभ्यास साधनासंदर्भात तंजावरचे जिल्हाधिकारी ए. अण्णादुराई यांच्यासमवेतही स्वतंत्र बैठक झाली. दोन्ही बैठका तंजावरचे राजे शिवाजीराजे भोसले यांच्या अध्यक्षतेखाली झाल्या. बैठकांना तमिळ विद्यापीठाचे कुलगुरू डॉ. सी. बालसुब्रम्हण्यम्, कुलसचिव मुथ्थूकुमार यांच्यासह तमिळ विद्यापीठातील डॉ. विवेकानंद गोपाळ, डॉ. जयकुमार, डॉ. कविता, डॉ. शीला, डॉ. नीलकंठ हे भारतीय भाषा आणि सामाजिक शास्त्रांचे प्राध्यापक उपस्थित होते; तर, शिवाजी विद्यापीठाच्या वतीने कुलगुरू डॉ. देवानंद शिंदे, समिती सदस्य डॉ. अवनीश पाटील, डॉ. नंदकुमार मोरे, डॉ. निलांबरी जगताप आणि गणेश नेर्लेकर-देसाई उपस्थित होते.

मराठ्यांच्या इतिहासात तंजावर महत्त्वाचे!

तमिळनाडूतील तंजावर येथे साडेतीनशे वर्षांपूर्वी इ.स. १६७६ ला मराठ्यांनी आपले राज्य स्थापन केले. शहाजीराजेंचे पुत्र आणि छत्रपती शिवाजी महाराजांचे बंधू व्यंकोजी यांनी हे राज्य स्थापन केले. तेव्हापासून ब्रिटीशांनी १८५५ ला संस्थान खालसा करेपर्यंत तेथे मराठा अंमल होता. या जवळजवळ दोनशे वर्षांमध्ये अकरा राजांनी राज्यकारभार केला. त्यांच्या कारकिर्दीत तेथे मराठी संस्कृती रुजली. मराठ्यांच्या इतिहासात तंजावरचे राज्य हा एक महत्त्वाचा भाग असून तंजावरच्या अभ्यासाशिवाय मराठ्यांचा इतिहास पूर्ण होत नाही. त्यामुळे तंजावर राजघराण्याचे हजारो पेपर्स, इतर ऐतिहासिक कागदपत्रे, वस्तू, शिल्पे, चित्र, शिलालेख, ग्रंथ अभ्यासणे हे मराठा इतिहासाच्या अभ्यासात महत्त्वाचे आहे.

कोल्हापूर टाइम्स टीम

इटलीतील समर वर्ल्ड युनिर्व्हसिटी गेमसाठी निवड झालेल्या तलवारबाजीपटू ज्योती अरुण सुतारला शिवाजी विद्यापीठ आणि पालकमंत्री चंद्रकांत पाटील यांनी सढळ हाताने मदत केली आहे. या मदतीमुळे ज्योतीला आतंरराष्ट्रीय स्पर्धेत चमक दाखवण्यााची संधी मिळणार आहे.

अमृतसर येथे नुकत्याच्या झालेल्या अखिल भारतीय आंतर विद्यापीठ स्पर्धेत फॉईल प्रकारात ज्योतीने ब्राँझपदक पटकावले. यावेळी भारतीय संघ निवड चाचणीत तिसरा क्रमांक आल्याने तिची भारतीय विद्यापीठ संघात निवड झाली आहे. तलवारबाजीत भारतीय संघात निवड झालेली ज्योती ही शिवाजी विद्यापीठाची पहिली खेळाडू ठरली आहे. देशातील फक्त नऊ खेळाडूंची निवड झाली आहे.

इटलीतील नापोली शहरात ३ जुलै ते १४ जुलै या कालावधीत स्पर्धा होणार असून त्यासाठी तिला आर्थिक मदतीची गरज होती. तलवार, मास्क, बॉडी वायर व डायटसाठी खर्च करावा लागणार होता. शिवाजी विद्यापीठाकडून मदत व्हावी यासाठी क्रीडा विभाग प्रमुख पी. टी. गायकवाड यांनी पुढाकार घेतला. कुलगुरू डॉ. देवानंद शिंदे, व्ही. डी. नांदवडेकर यांनी मदतीचा हात देताना विद्यापीठाकडून दोन लाख वीस हजार रुपये मदत देण्यात येणार आहे असे सांगितले. विद्यापीठाच्या मदतीमुळे तिला खेळासाठी लागणारे साहित्य खरेदी करता येणे शक्य झाले आहे. पालकमंत्री पाटील यांनी विमान प्रवासाची मदत केल्याने आंतरराष्ट्रीय स्पर्धेत सहभागी होण्याचे ज्योतीचे स्वप्न साकार होणार आहे.

ज्योती पाचवी इयत्तेपासून तलवारीबाजी क्रीडा प्रकारात सराव करत आहे. राज्यस्तरीय ४६ तर २६ राष्ट्रीय स्पर्धेत तिने चॅम्पियनशीप मिळवली आहे. ज्योतीचे वडील अरुण सुतार हे फुटबॉल खेळाडू तर आई स्मिता या अॅथलीट खेळाडू होत्या. दोघांनी दिलेल्या प्रोत्साहनमुळे ज्योतीची तलवारबाजीतील कारकीर्द फुलली. शिवाजी विद्यापीठाचा जिमखाना विभागात उमेश पाटील यांच्या मार्गदर्शनाखाली तिचा सराव सुरु आहे. न्यू कॉलेजमध्ये बीएससीच्या दुसऱ्या वर्गात शिकणाऱ्या ज्योतीला अभिजीत मस्कर, काशिनाथ भिसे, प्रा. अमर सासने, न्यू कॉलेजचे प्राचार्य डॉ. व्ही.एम. पाटील यांचे सहकार्य लाभले आहे.

शिवाजी विद्यापीठ व पालकमंत्र्यांच्या बहुमोल सहकार्यामुळे मी आंतरराष्ट्रीय स्पर्धेत प्रतिनिधीत्व करणार आहे. विद्यापीठ व पालकमंत्र्यांची मी आभारी आहे. मला मनोधैर्य देणाऱ्या आई, वडील, प्रशिक्षक, हितचिंतकाच्या मदतीने मी कोल्हापूरचे नाव आंतरराष्ट्रीय पातळीवर उंचावण्यासाठी पुरेपुर प्रयत्न करेन.

- ज्योती सुतार, खेळाडू

विठ्ठल मंदिर होतय 'ग्रीन टेम्पल'

मंदिरात ऑक्सिजन वाढवण्यासाठी झाडांच्या कुंड्या

म. टा. वृत्तसेवा, पंढरपूर

पंढरपूरच्या विठ्ठल मंदिरात वर्षभर भाविकांची गर्दी असते. गर्दीच्या काळात भाविकांना मुबलक प्रमाणात ऑक्सिजन मिळावा यासाठी मंदिर समितीने विठूरायाच्या राऊळीला पर्यावरणपूरक ग्रीन टेम्पल बनविण्यास सुरुवात केली आहे. मंदिरात ऑक्सिजन वाढावा म्हणून ठिकठिकाणी विविध प्रकारच्या झाडांच्या कुंड्या ठेवल्या आहेत.

विठूरायाच्या दर्शनासाठी वर्षभरातून जवळपास दीड कोटींपेक्षा जास्त भाविक येतात. बहुतांश वेळी मंदिर भाविकांनी खचाखच भरलेले असल्याने वृद्धांसह अनेकांना श्वसनाचा त्रास होतो. मंदिरात कायम गर्दी असल्याने ऑक्सिजनची कमतरता हा नेहमीचाच प्रश्न आहे. गर्दीच्या भाविकांना पुरेसा ऑक्सिजन मिळावा आणि भाविकांना सुसह्य दर्शन घेता यावे यासाठी मंदिर समितीने मंदिरात ठिकठिकाणी ऑक्सिजन देणाऱ्या झाडांच्या कुंड्या बसविण्यास सुरुवात केली आहे. आतापर्यंत जवळपास ५०० पेक्षा जास्त कुंड्या मंदिरात बसविण्यात आल्या आहेत.

विठ्ठल मंदिरातील ज्या जागेचा वापर होत नाही, अशा ठिकाणी या कुंड्या बसविण्यास सुरुवात झाली आहे. पुणे येथील राजेश्वरी नर्सरीचे मालक हिरेमठ यांनी मंदिराला झाडे अर्पण केली आहेत. या झाडात नागफणी, आरेकर पाम, झेनाडो, बायगस अर्थात सावलीतील वडाचे झाड, मनीप्लँट, टिलोडेंड्रॉन अशा विविध प्रकारच्या आणि जास्त ऑक्सिजन देणाऱ्या इनडोअर रोपांचा समावेश आहे. ही सर्व रोपंची वाढ अतिशय संथ असून, बंदिस्त जागेत चांगल्या रितीने ऑक्सिजन देण्याचे काम ही झाडे करतील. या कुंड्यांमुळे मंदिराच्या सौंदर्यात भर पडत असून, भाविकांना मंदिरात सुसह्य वाटत आहे. आता विठ्ठल मंदिरासोबत दर्शन मंडप व इतर ठिकाणीही या कुंड्या आकर्षकरीतीने मांडण्याचे काम सुरू झाल्याने आता बाराही महिने विठूरायाच्या मंदिरात भाविकांना दर्शनाचा आनंद आरोग्यदायी पद्धतीने घेता येणार आहे.

'आषाढी'च्या नियोजनासाठी

मंत्रालयात बैठक घेण्याची मागणी

पंढरपूर :

आषाढी वारीसाठी पंढरीस येणाऱ्या पालखी सोहळ्यांच्या नियोजनाची बैठक मुख्यमंत्र्यांनी मंत्रालयात घ्यावी, अशी मागणी श्री संत निवृत्तीनाथ महाराज संस्थांचे अध्यक्ष ह. भ. प. संजय धोंडगे यांनी केली आहे.

संत ज्ञानेश्वर, संत तुकाराम व संत सोपानकाका यांच्या पालखी सोहळ्याच्या नियोजनाची बैठक पुणे येथे विधानभवनमध्ये होते, तर राज्यातील इतर पालखी सोहळ्यांकडे मात्र सरकारचे दुर्लक्ष होते. पंढरपूर येथे आषाढी वारीच्या पूर्वी सोलापूरचे पालकमंत्री बैठक घेतात. परंतु त्यामध्ये राज्यातील पालखी सोहळ्यांच्या नियोजनापेक्षा स्थानिक प्रश्नाकडेच अधिक लक्ष दिले जाते. त्यामुळे राज्यातील पालखी सोहळ्यांच्या मुलभूत प्रश्नांकडे दुर्लक्ष होते, असेही धोंडगे यांनी म्हटले आहे.

म. टा. प्रतिनिधी, कोल्हापूर

टक्केवारी व्याजाने कर्ज देऊन तिप्पट, चौप्पट व्याजदराने वसुली करणाऱ्या कोल्हापूर परिक्षेत्रातील संशयित सावकारांच्या घरावर छापे टाकण्याचे आदेश विशेष पोलिस महानिरीक्षक डॉ. सुहास वारके यांनी दिले. या सावकारांवर संघटित गुन्हेगारी कायद्यातंर्गत (मोक्का) कारवाई करण्याचा निर्णय पोलिस प्रशासनाने घेतला असून, कोल्हापूर जिल्ह्यातील ३५ हून अधिक सावकार लवकरच ताब्यात घेतले जातील, असे विशेष पोलिस महानिरीक्षक डॉ. सुहास वारके यांनी मंगळवारी पत्रकारांशी बोलताना स्पष्ट केले.

डॉ. वारके म्हणाले, 'परिक्षेत्रात बहुतांशी सावकारांविरोधात तक्रारी दाखल आहेत. त्यांची विशेष पथकांकडून चौकशी सुरू आहे. संशयित सावकारांवर 'मोक्का'अंतर्गत कारवाई करण्याचा निर्णय पोलिस प्रशासनाने घेतला आहे. त्यासाठी जिल्ह्यातील ३५ पेक्षा अधिक सावकांवर पोलिसांची करडी नजर आहे. त्यांना लवकरच ताब्यात घेतले जाणार आहे. अवैध धंद्यांसह संघटित गुन्हेगारी टोळ्यांचा बिमोड करण्यासाठी प्रशासनाने आक्रमक भूमिका घेतली आहे. जिल्ह्यात दोन वर्षांत ३० हून अधिक टोळ्यांवर 'मोक्का'अंतर्गत कारवाई केली आहे. शहरासह ग्रामीण भागात बेकायदेशीर सावकारांचे मोठ्या प्रमाणात पेव फुटले असल्याचे निदर्शनास येत आहे. संशयितांवर कडक कारवाई करण्याचा निर्णय घेतला आहे. त्यामुळे कोल्हापूरसह सांगली, सातारा, पुणे ग्रामीण, सोलापूर ग्रामीण या पाच जिल्ह्यातील संशयित सावकारांच्या विरोधात दाखल झालेल्या तक्रारांची चौकशी सुरु आहे. त्यांच्या घरांवर छापे टाकण्याचे आदेश दिले आहेत. काही सावकारांनी कोट्यावधी रुपयांची बेहिशोबी रक्कम मिळविली आहे. या सावकारांवर 'मोक्का'अंतर्गत कारवाई केली आहे. त्यासह पोलिस रेकॉर्डवरील सराईत गुन्हेगार, टोळ्यांसह दहशत माजवून कुळे काढणाऱ्या गुन्हेगारांवर कारवाईचे आदेशही पोलिस अधीक्षकांना दिले आहेत.'

.. .. ..

सावकारांकडून ज्या लोकांनी कर्ज घेतले आहे त्यांच्याकडे वसुलीसाठी सावकारांकडून तगादा किंवा दमदाटी होत असेल तर संबंधितांनी निर्भयपणे पोलिसांशी संपर्क साधावा. सावकारांच्या धमकीला बळी पडू नये.

डॉ. सुहास वारके, विशेष पोलिस महानिरीक्षक

.. .. ..

फोटो आहेत

म. टा. प्रतिनिधी, कोल्हापूर

शहर रस्ते विकास प्रकल्पातून शहरात ४९ किमीच्या रस्त्यांची बांधणी झाली. सिमेंट काँक्रिट आणि डांबरीकरण अशा पद्धतीने केलेल्या रस्त्याच्या मध्यभागी मोठ्या भेगा पडल्या असल्याने मोटारसायकलस्वारांना रस्त्यावरुन प्रवास करणे जीवघेणे ठरत आहे. दोन्ही रस्त्याच्यामधील पडलेल्या भेगा त्वरीत न बुजवल्यास अपघातांची संख्या वाढवण्याची शक्यता आहे.

महापालिकेच्यावतीने आयआरबी कंपनीने 'बांधा, वापरा आणि हस्तांतर करा' या नुसार सुमारे ४९ किमी रस्त्यांची बांधणी करण्यात आली. रस्ते विकास प्रकल्पातंर्गत बांधलेल्या रस्त्यांच्या देखभालीची जबाबदारी आयआरबी कंपनीची होती. मात्र प्रकल्प हाती घेतल्यापासून सुरू झालेले आंदोलन आणि त्यानंतरच्या टोलच्या आंदोलनामुळे कंपनीला येथून गाशा गुंडळावा लागला. राज्य सरकारने कंपनीला पैसे दिले असले, तरी रस्त्यांच्या देखभालीचा प्रश्न कायम राहिला.

प्रकल्प पूर्ण झाल्यापासून कधीही रस्त्यांची देखभाल झालेली नसल्यामुळे रस्त्यांची अवस्था सद्य:स्थितीत दयनीय होऊ लागली आहे. विशेषत: सिमेंट काँक्रिट आणी डांबरी रस्त्याच्यामध्ये भेगा पडल्याने मोटारसायकलस्वारांचा प्रवास जीवघेणा ठरु लागला आहे. शहराचे प्रवेशद्वार समजल्या जाणाऱ्या तावडे हॉटेलपासून हा जीवघेणा प्रवास शहराच्या अनेक मार्गावर दिसून येतो. तावडे हॉटेल ते ताराराणी चौक असो किंवा आयटीआय ते कळंबा असो, प्रत्येक रस्त्याच्यामध्ये मोठी भेग दिसून येते. मोटारसायकलचे टायर बसू शकेल एवढी मोठी भेग असल्याने वाहन घसरण्याचे प्रकार वारंवार होता. सिमेंट रस्त्यावर चारचाकी वाहन जाण्यासाठी डांबरी रस्त्यावर वाहन घेण्याचा प्रयत्न केल्यास स्लीप होण्याची शक्यता बळावते. अशीच स्थिती शहर वाहतूक शाखा व खानविलकर पेट्रोल पंप शेजारी दिसते. रात्रीच्यावेळी अशा रस्त्यावर मोटारसायकल स्लीप होण्याचे प्रकार वारंवार घडत आहेत.

रस्ते विकास प्रकल्प वादग्रस्त ठरल्यानंतर कंपनीची सर्व प्रकारची देयके राज्य सरकारने भागवली आहेत. परिणामी प्रकल्पांतर्गत तयार झालेल्या रस्त्यांची जबाबदारी महापालिकेचीच आहे. पण गेल्या दहा वर्षात महापालिका प्रशासनाने याबाबत कोणतीही उपाययोजना केलेली नाही. सरकारच्या निधीकडे डोळे लावून बसण्यापेक्षा अत्यावश्यक बाब म्हणून या रस्त्यांच्या दुरुस्तीकडे गांभीर्याने पाहण्याची गरज आहे.

...............

चौकट

प्रस्ताव सरकार दरबारी पडून

रस्ते विकास प्रकल्पातून बांधण्यात आलेल्या रस्त्यांची देखभाल करण्यासाठी महापालिका प्रशासनाकडून राज्य सरकारकडे दरवर्षी २५ कोटींची मागणी करण्यात आली. गेल्या चार वर्षांपासून निधीचा प्रस्ताव राज्य सरकारच्या दरबारी पडून आहे. मात्र सद्य:स्थितीत सिमेंट व डांबरी रस्त्याच्यामध्ये पडलेल्या भेगा बुजवण्यासाठी मोठ्या आर्थिक निधीची आवश्यकता नसली, तरी प्रशासन याकडे गांभीर्याने लक्ष देत नाही. पावसाळ्यापूर्वी या भेगा भरण्यासाठी प्रशासनाला युद्धपातळीवर नियोजन करावे लागेल.

म. टा. प्रतिनिधी, कोल्हापूर :

जागेचा ताबा घेण्यावरून कोटीतीर्थ जवळील आयर्विन ख्रिश्चन हॉस्टेल कंपाउंडमधील पाच घरांवर हल्ला केल्याप्रकरणी राजारामपुरी पोलिसांनी अटक केलेल्या संशयितांना मंगळवारी कोर्टासमोर हजर केले असता या सर्वांची बिंदू चौक कारागृहात रवानगी करण्यात आली. त्यांची आठ दिवसांची कोठडी मंगळवारी संपल्याने त्यांना कोर्टासमोर हजर केले होते.

कोटीतीर्थ जवळील आयर्विन ख्रिश्चन हॉस्टेल कपाउंडमध्ये जागेचा ताबा घेण्यावरून २५ एप्रिल रोजी सकाळी ११ वाजता जमावाने जेसीबी मशीन घेऊन या परिसरातील घरांवर हल्ला केला होता. येथील महिलांना धक्काबुक्की करून लाथाबुक्क्यांनी मारहाण केल्याने सहाजण जखमी झाले होते. या प्रकरणी राजारामपुरी पोलिसांनी १०० जणांवर गुन्हा दाखल केला आहे. पोलिसांनी संशयित राहुल जवान कवाळे (३६, रा. मातंग वसाहत), किशोर कृष्णा कलकुटगी (५०, मंगळवार पेठ, मिरज, जि. सांगली), धनंजय महादेव गड्यानवर (४०, रा. दत्त चौक, मिरज), सचिन एकनाथ दुर्वे (३८, रा. संभाजीनगर), इम्रान हुसेन पठाण (३२, रा. जवाहरनगर सरनाईक वसाहत), पिंटू बाळासो सातपुते (३६, रा. रमणमळा), गणेश जयवंत बुचडे (वय ३९) आणि सचिन अशोक कवाळे (३२) आदींना अटक केली होती. दरम्यान, पोलिसांनी संशयितांची सीपीआरमध्ये वैद्यकीय तपासणी केली.

फोटो आहे...

म. टा. प्रतिनिधी, कोल्हापूर

फुलांनी सजविलेली पालखी, 'छत्रपती शिवाजी महाराज व महात्मा बसवेश्वर की जय'चा घोष, धनगरी ढोलांसह पारंपरिक वाद्यांचा गजर अशा उत्साही वातावरणात लिंगायत समाजातर्फे मिरवणूक काढण्यात आली. 'शिव-बसव' जयंतीनिमित्त मंगळवारी सायंकाळी शहरातील विविध भागांतून मिरवणूक निघाली. कोल्हापुरी फेटे परिधान केलेल्या महिला व पुरुषांचा मिरवणुकीत लक्षणीय सहभाग होता.

दरम्यान, महात्मा बसवेश्वर यांच्या जयंतीनिमित्त चित्रदुर्ग मठ येथे दिवसभर कार्यक्रमांची रेलचेल होती. सायंकाळी महापौर सरिता मोरे, वैशाली क्षीरसागर, शुभलक्ष्मी कोरे, प्रतिमा पाटील, नगरसेविका उमा बनछोडे यांच्या हस्ते मिरवणुकीचे उद्घाटन झाले. तत्पूर्वी उद्योजक आशीष व प्रियांका गाताडे यांनी पालखीपूजन केले.

मिरवणुकीतील महात्मा बसवेश्वर, छत्रपती शिवाजी महाराज, अक्कमहादेवी, महाराणी ताराराणी यांच्या वेशभूषेतील बालचमूंनी लक्ष वेधून घेतले. मिरवणुकीत ब्रॉस बँडपथक, धनगरी ढोलांचा समावेश होता. दसरा चौक, आईसाहेब पुतळा, महाराणा प्रताप चौक, शिवाजी चौक, महापालिका, गवळी गल्ली, तेली गल्ली, नष्टे गल्ली, सीपीआरमार्गे चित्रदुर्ग मठ अशी मिरवणूक काढण्यात आली. मिरवणुकीत वीरशैव बँकेचे अध्यक्ष राजेंद्र शेटे, नानासाहेब नष्टे, राजेश पाटील-चंदूरकर, सुभाष चौगुले, डॉ. गिरीश कोरे, अशोक माळी, संतोष माळी, बबन गवळी, आदींचा समावेश होता.

०००

बसवण्णांच्या दर्शनाला नेते

पालकमंत्री चंद्रकांत पाटील, आमदार राजेश क्षीरसागर, आमदार सतेज पाटील, काँग्रेसचे जिल्हाध्यक्ष प्रकाश आवाडे यांनी चित्रदुर्ग मठ येथे भेट देऊन महात्मा बसवेश्वर यांच्या प्रतिमेचे दर्शन घेतले. समाजाच्या रुद्रभूमी येथील हॉलला मदत करण्याची ग्वाही पालकमंत्री पाटील यांनी दिली. वीरशैव समाजाचे अध्यक्ष सुनील गाताडे, उपाध्यक्ष चंद्रकांत स्वामी, सचिव राजू वाली, सुहास भेंडे, अॅड. सतीश खोतलांडे, माजी नगरसेवक श्रीकांत बनछोडे आदींनी मान्यवरांचे स्वागत केले. सकाळच्या सत्रात सरोज व विजय शेटे यांच्या हस्ते महापूजा झाली. यानंतर प्रा. शिवाजीराव भुकेले यांचे 'महात्मा बसवेश्वर : जीवन व कार्य' विषयावर व्याख्यान झाले. रात्री 'अंतरंग' प्रस्तुत भावभक्तिगीतांचा कार्यक्रम झाला.

००००

म. टा. प्रतिनिधी, कोल्हापूर

राज्य सरकारने टोल आंदोलनात कार्यकर्त्यांवर दाखल केलेले गुन्हे मागे घ्यावेत. या आंदोलनातील गुन्ह्याची माहिती घेऊन त्याचा अहवाल तत्काळ समितीला सादर करावा. त्यासाठी जलदगतीने प्रक्रिया करुन समितीची बैठक घ्यावी, अशी विनंती शहर जिल्हा सर्वपक्षीय टोल विरोधी कृती समितीच्या शिष्टमंडळाने मंगळवारी जिल्हाधिकारी दौलत देसाई यांच्याकडे निवेदनाद्वारे केली. त्यांनी ही प्रक्रिया एक महिन्याच्या आत पूर्ण करण्याचे आश्वासन शिष्टमंडळाला दिले.

टोलविरोधी कृती समितीने सोमवारी पालकमंत्री चंद्रकांत पाटील यांची भेट घेतली होती. त्यांनी या प्रकरणी जिल्हाधिकारी दौलत देसाई आणि जिल्हा पोलिस अधीक्षक डॉ. अभिनव देशमुख यांची भेट घेण्याची सूचना केली होती. त्यानुसार शिष्टमंडळाने मंगळवारी जिल्हाधिकारी देसाई यांची भेट घेतली. टोलविरोधी आंदोलनात पोलिसांनी कार्यकर्त्यांवर राजकीय गुन्हे दाखल केले आहेत. मुख्यमंत्री देवेंद्र फडणवीस यांनी कार्यकर्त्यांवरील गुन्हे मागे घेण्याचे आश्वासन दिले होते. मात्र अजूनही आंदोलकांच्यावरील खटला कोर्टात सुरु आहे. कोर्टातर्फे वॉरंट प्रक्रिया सुरु झाली आहे. राज्य सरकारने विविध आंदोलनांदरम्यान कार्यकर्त्यांवर दाखल झालेले राजकीय गुन्हे मागे घेण्यासाठी अर्थमंत्री सुधीर मुनगंटीवार यांच्या अध्यक्षतेखाली समिती नेमली आहे. जिल्हा समितीचे अध्यक्ष जिल्हाधिकारी आणि सचिव अपर पोलिस अधीक्षक तिरुपती काकडे आहेत. या समितीची त्वरीत बैठक घेऊन गुन्हे अहवालाची माहिती तत्काळ सादर करावी, असे निवेदनात म्हटले आहे. शिष्टमंडळात समितीचे निमंत्रक निवासराव साळोखे, दिलीप देसाई, बाबा पार्टे, प्रसाद जाधव, किसन कल्याणकर, जयकुमार शिंदे, अॅड. पंडितराव सडोलीकर, विवेक कोरडे, संदीप कांबळे आदींचा समावेश होता.

जि.प.चा लोगो वापरावा...

म. टा. प्रतिनिधी, कोल्हापूर

अंशदायी पेन्शन योजनेंतर्गत दरमहा कर्मचाऱ्यांच्या पगारातून दहा टक्के रक्कम कपात केली जाते. कर्मचाऱ्यांच्या रकमेइतकीच रक्कम सरकारकडून जमा केली जाते. मात्र जि.प.च्या विविध विभागातील १५२१ कर्मचाऱ्यांना गेल्या चार वर्षांपासून या रकमेच्या पावत्या मिळालेल्या नाहीत. वेतनातून कपात केलेली रक्कम त्यांच्या पेन्शन योजनेच्या खात्यावर जमा नाही. वित्त विभागाच्या गलथान कारभाराचा फटका कर्मचाऱ्यांना बसत आहे. जि.प.कडूनच पेन्शन योजनेची रक्कम खात्यावर जमा न झाल्यामुळे सरकारी वाट्याच्या तितक्याच रकमेपासून कर्मचारी वंचित राहिले अशा तक्रारी कर्मचारी संघाने केल्या आहेत.

जवळपास दोन कोटी रकमेचा हिशेबाचा ताळमेळ लागत नसल्यामुळे पावत्या देण्याच्या कामाला दिरंगाई होत आहे. दरम्यान, वित्त विभागाने, मुख्य कार्यकारी अधिकारी अमन मित्तल यांची भेट घेऊन ३१ मे पर्यंत कर्मचाऱ्यांच्या खात्यावर रक्कम जमा करण्याची प्रक्रिया पूर्ण केली जाईल असे पत्र दिले आहे. दुसरीकडे प्रशासनाने कर्मचारी संघटनांना यासंदर्भात लेखी स्वरुपात काही कळविले नाही, यामुळे १३ मे पासून कामबंद आंदोलनावर संघटना ठाम आहेत.

जिल्हा परिषदेच्या विविध विभागातील कर्मचाऱ्यांची अंशदायी निवृत्ती वेतनची रक्कम २०१६ पासून खात्यात जमा झाली नसल्याचे निदर्शनास आले. त्यांना पावत्याही मिळाल्या नाहीत. कर्मचाऱ्यांनी प्रशासनाकडे पाठपुरावा करुनही दखल घेतली नाही. कर्मचारी संघटनांनी वारंवार मागणी करुनही वित्त विभागाकडून पावत्या देण्यात टाळाटाळ सुरू आहे. कर्मचाऱ्यांनी २०१६ मध्ये आंदोलन केल्यानंतर काहीजणांना पावत्या वितरीत केल्या. मात्र त्या पावत्यांमध्ये चुका आढळल्या. कर्मचाऱ्यांच्या म्हणण्यानुसार 'वित्त'विभागाकडून पावत्या गहाळ झाल्या आहेत. त्याची जबाबदारी कुणावर असा प्रश्न त्यांनी उपस्थित केला आहे.

...............

धनादेश गहाळ, अधिकारी बिनधास्त

कर्मचाऱ्यांच्या वेतनातून वजावट झालेल्या रकमेचे डीडी संबंधित विभागप्रमुख व तालुका पंचायत समितीकडून वित्त विभागाला प्राप्त होतात. परंतु 'वित्त'कडून संबंधित कर्मचाऱ्यांच्या खात्यावर रक्कम जमा झाली नाही. काही धनादेश कालबाह्य झाले आहेत. तर काही धनादेश गहाळ झाल्याच्या तक्रारी आहेत. या योजनेतील काही लाभार्थी मयत झाले आहेत. मात्र त्यांच्या पावत्या सापडत नाहीत. हिशेबच लागत नसल्यामुळे त्यांच्या नातेवाईकांकडे रक्कम देताना अडचणी उद्भवत आहेत. धनादेश कालबाह्य होणे, गहाळ होण्याचा प्रकार घडूनही वरिष्ठ अधिकाऱ्यांनी मात्र हे प्रकार फारसे गांभीर्याने घेतले नाही.

..........

कोट

'एक नोव्हेंबर २००५ किंवा त्यानंतर सेवेत दाखल झालेल्या कर्मचाऱ्यांच्या वेतनातून कपात झालेल्या रकमेच्या पावत्या त्या कर्मचाऱ्यांना मिळाव्यात यासाठी प्रशासनाकडे सातत्याने पाठपुरावा केला. अद्याप पावत्या मिळाल्या नाहीत. या प्रकाराला जे दोषी आहेत, त्यांच्यावर कारवाई झाली पाहिजे ही कर्मचारी महासंघाची मागणी आहे. पेन्शन योजनेच्या पावत्या कधी देणार याबाबत लेखी स्वरुपात मागणी केली आहे. अन्यथा कर्मचारी संघटना काम बंद आंदोलनावर ठाम आहेत.

सचिन जाधव, अध्यक्ष, कर्मचारी महासंघ जि.प.

...............

रकमांची विवरणपत्रे ३१ मे पूर्वी देणार

याबाबत उपमुख्य वित्त व लेखा अधिकारी राहुल कदम म्हणाले, 'अंशदायी पेन्शन झाल्यापासून १५२१ कर्मचाऱ्यांची २०१० ते २०१८ या कालावधीतील एकूण वर्गणी २२ कोटी ३१ लाख ४ हजार २८३ इतकी आहे. या जमा रकमेच्या सममूल्य म्हणजे तितकीच रक्कम सरकारी हिस्सा म्हणून वित्त विभागाने प्राप्त करुन घेतली आहे. या दोन्ही रकमेवरील व्याजापोटी १० कोटी ४७ लाख ४७ हजार इतकी रक्कम सरकारकडून प्राप्त झाली आहे. एकूण ५५ कोटी ९ लाख ५५ हजार ५६६ इतकी रक्कम कोषागारात जमा आहे. २०१८ - १९ पासून हे सर्व कर्मचारी राष्ट्रीय निवृत्तीवेतन योजनेकडे वर्ग केले आहेत. कोणत्याही कर्मचाऱ्याचे कसल्याही प्रकारे नुकसान झाले नाही. सर्व रकमांची विवरणपत्रे ३१ मे पूर्वी कर्मचाऱ्यांना देण्यात येतील.