पाच लाखास गंडा

कराड :

घराचे खोदकाम करताना सापडलेले अर्धा किलो सोने पाच लाख रुपयास देतो, असे सांगून चौघांनी पितळेचे दागिने देऊन एका बांधकाम व्यवसायिकाची फसवणूक केल्याची घटना उघडकीस आली आहे. या प्रकरणी संजय विजय सणस (रा. मरळी ता. पाटण) यांनी कराड शहर पोलिसात फिर्याद दिली आहे. या प्रकरणी प्रविण ब्रम्हनंद वेणेकर (वय २८ रा. गणेशनगर ता. मुडगोड जि. कारवार) याला पोलिसांनी अटक केली आहे. त्याला न्यायालयात हजर केले असता चार दिवसांची पोलिस कोठडी सुनावण्यात आली आहे. व अन्य तीन जण फरार आहेत. मंजुनाथ बजंत्री (रा. गणेशनगर मुडगोड जि. कारवार) व अन्य दोघेजण (नावे समजू शकली नाहीत) अशी गुन्हा नोंद झालेल्यांची नावे आहेत

संजय सणस यांच्याकडे मंजुनाथ बंजत्री हा गवंडी काम करण्यासाठी होता. त्यामुळे बांधकाम व्यावसायिक आणि गवंडी यांची पूर्वीची ओळख होती. गवंडी बजंत्री याने संजय सणस याला फोन करून घराचे खोदकाम करत असताना अर्धा किलो सोने सापडले आहे, ते मला विकायचे आहे, असे सांगितले होते.

सोलापुरात ११४ छावण्यांत ६५ हजार जनावरे

सांगोल्यात सर्वाधिक ६६ छावण्या; जिल्हाधिकारी राजेंद्र भोसलेंची माहिती

सोलापूर :

सोलापूर जिल्ह्यात भीषण पाणी आणि चारा टंचाई निर्माण झाली आहे. एप्रिलअखेर ११४ चारा छावण्या सुरू केल्या आहेत. या छावण्यांमध्ये ६५ हजार जनावरांचा समावेश आहे. यामध्ये सर्वाधिक सांगोला तालुक्यात ६६ छावण्या आहेत. मेअखेर चारा छावण्यांची संख्या २००पर्यंत जाण्याची शक्यता आहे.

करमाळा तालुक्यात ८ छावण्यांत ३ हजार ६४८, मंगळवेढा तालुक्यात ३८ छावण्यांमध्ये १९ हजार ५१५, सांगोला तालुक्यातील ६६ छावण्यांमध्ये ४० हजार ६०५ तर बार्शी तालुक्यातील २ छावण्यांमध्ये १४३५ जनावरांचा समावेश आहे. माळशिरस तालुक्यात ३, मोहोळ तालुक्यात २, दक्षिण सोलापूर तालुक्यात ४ तर पंढरपूर तालुक्यात आणखी तीन छावण्या मंजूर असून, येत्या दोन दिवसांत सुरू होणार असल्याचे पुरवठा खात्याकडून सांगण्यात आले. ५० हजार ९७० मोठी तर १४ हजार लहान जनावरे छावण्यांमध्ये आहेत. सरकारकडून मोठ्या जनावरास प्रती दिन ९० तर लहान जनावरास ४५ रुपये चाऱ्यासाठी अनुदान आहे.

१२४ गावांकडून २२२ प्रस्ताव

चारा छावण्या सुरू करण्यासाठी जिल्ह्यातील १२४ गावांतून २२२ प्रस्ताव प्राप्त झाले होते. त्यापैकी ११२ गावांमध्ये १८२ चारा छावण्या सुरू करण्यासाठी समितीने शिफारस केली होती. यापैकी १३२ गावांना तालुकास्तरीय समितीने मंजुरी दिली असून, त्यापैकी ११४ छावण्या सुरू करण्यात आल्याची माहिती जिल्हाधिकारी राजेंद्र भोसले यांनी दिली.

म. टा. प्रतिनिधी, कोल्हापूर

मनरेगा योजनेतून विहिरीतील गाळ काढण्यास मंजुरी द्यावी, अशी मागणी करवीर पंचायत समिती सभापती राजेंद्र सुर्यवंशी यांनी जिल्हा परिषदेचे मुख्य कार्यकारी अधिकारी अमन मित्तल यांच्याकडे केली.

त्यांनी निवेदनात म्हटले आहे की, महात्मा गांधी राष्ट्रीय ग्रामीण रोजगार हमी योजनेंतर्गत गाव तलाव, पाझर तलाव, पारंपरिक पाणीसाठा तसेच खासगी विहिरीतील गाळ काढण्याचा सरकारी आदेश आहे. सध्या भूजल पातळी घटल्यामुळे पाण्याची टंचाई जाणवत आहे. पिण्याचे पाणी आणि शेतीसाठी पाणी अपुरे पडत आहे. या पार्श्वभूमीवर प्रशासनाने मनरेगा योजनेतून विहिरीतील गाळ काढण्यास मंजुरी द्यावी. करवीर पंचायत समिती स्तरावर एका विहीर मालकाला ५० ते ६० हजार रुपये इतके अनुदान मिळणार आहे. या योजनेतून विहीर आणि तलावातील गाळाचा उपसा होवून पाणी नजीकच्या काळात साठवणूक करता येईल. करवीर तालुक्यातील सिंचन क्षेत्रात वाढ होईल.

.. ..

म. टा. प्रतिनिधी, कोल्हापूर

हातापायाने धडधाकट माणसंही कारणं देऊन काम टाळताना आपण अनेकदा पाहतो. मात्र, एका अंध तरुणाने डोळसांना आश्चर्यचकित करणारी कामगिरी केली आहे. एकाच वर्षात समाजशास्त्र विषयात सेट, नेट परीक्षा पास होऊन त्याने युजीसीची शिष्यवृत्तीही मिळवली. यावर न थांबता त्याने बँकिंगच्या परीक्षांचा अभ्यास करून अधिकारीपद मिळवले. अंधांकडे पाहण्याचा समाजाचा दृष्टिकोण बदलवणारा हा तरुण म्हणजे राधानगरी तालुक्यातील सोळांकूर येथील अमित पाटणकर.

अमित अनिल पाटणकर. वय वर्षे ३०. शिक्षण एम. ए. सेट, नेट, जेआरएफ. बँकिंगची परीक्षा पास होऊन नुकतीच त्याची पंजाब नॅशनल बँकेत अधिकारी पदावर निवड झाली. गेल्या दोन वर्षांपासून तो शिवाजी विद्यापीठाच्या समाजशास्त्र विभागात प्राध्यापक पदावर काम करीत आहे. डोळ्यांना रक्तपुरवठा करणाऱ्या रक्तवाहिन्या निकामी असल्याने जन्मताच तो अंध आहे. जग कसे दिसते ते कधीच पाहायला मिळाले नाही. उठता-बसता पाय जपून टाकावे लागतात. सफेद काठीचा आधार घेऊन पुढे जावे लागते. मात्र, याविषयी कधीच तक्रार केली नाही. उलट अंधत्व लादणाऱ्या नियतीलाही लाजवण्याचा निर्धार त्याने केला. पहिली ते दहावीपर्यंत तो गावातील शाळेत शिकला. यानंतर कोल्हापुरात महावीर कॉलेजमध्ये प्रवेश घेतला. समाजशास्त्राची पदवी घेतल्यानंतर पुढे विद्यापीठातून एम.ए.ची पदवी घेतली. सध्या तो प्रा. डॉ. जगन कराडे यांच्या मार्गदर्शनाने पीएचडीसाठी संशोधन करीत आहे. 'समाजशास्त्रीय दृष्टिकोनातून कोल्हापूर जिल्ह्यातील अंध व्यक्तींचा अभ्यास' या विषयावर त्याचे संशोधन सुरू आहे.

अमितने सर्व परीक्षा लेखनिकाची मदतीने दिल्या. मुलाचा उत्साह आणि बुद्धीमत्ता पाहून आई-वडिलांनीही प्रोत्साहन दिले. आपण अंध आहे म्हणून आपल्याला मर्यादा आहेत, असा विचार अमितच्या मनात कधीच येत नाहीत. उलट त्याने अंध व्यक्तींचे कौशल्य सिद्ध केले. अभ्यासासाठी ब्रेल लिपीत खूपच कमी पुस्तके उपलब्ध आहेत. यावर विसंबून न राहता अमितने यट्यूब, गुगल आणि सोशल मीडियाचीही मदत घेतली. ई-बुक, ऑडिओ बुकच्या माध्यमातून तो अभ्यास करतो. उपजत आकलनक्षमतेमुळे त्याला एकच मुद्दा पुन्हापुन्हा ऐकावा लागत नाही. सखोल अभ्यास, स्पष्ट उच्चार, खणखणीत आवाज आणि प्रचंड आत्मविश्वास यामुळे विद्यापीठातील त्याची व्याख्याने ऐकण्यासाठी विद्यार्थी गर्दी करतात. दोन वर्षांपूर्वी समाजशास्त्र विषयात सेट, नेट आणि जेआरएफ मिळवली. मात्र, प्राध्यापक भरतीला स्थगिती असल्याने त्याने बँकिंगच्या परीक्षांचा अभ्यास सुरू केला. या परीक्षेत पास झाल्याने त्याची पंजाब नॅशनल बँकेत अधिकारी पदावर निवड झाली आहे. पुढे प्राध्यापकी करायची, की बँकिंग क्षेत्रात करिअर करायचे याबाबत त्याने अजून निर्णय घेतलेला नाही.

.. .. ..

'नॅब'ची मोलाची मदत

नॅशनल असोसिएशन फॉर द ब्लाइंड म्हणजेच 'नॅब' या संस्थेची अमितला वेळोवेळी मदत झाली. महाविद्यालयीन शिक्षण घेताना त्याला नॅबकडून ठाकूर स्कॉलरशिप मिळाली. याशिवाय नॅबच्या पदाधिकाऱ्यांकडून सातत्याने त्याला प्रोत्साहन आणि मार्गदर्शन मिळाले. 'नॅब'लाही अमितच्या यशाचा अभिमान आहे.

. . . .

आधुनिक तंत्रज्ञानाचा वापर करून अंध व्यक्तीही समाजाच्या मूळ प्रवाहात सहभागी होऊ शकतात. आज अनेक क्षेत्रात अंधबांधव उत्तम काम करीत आहेत. मर्यादा सर्वांनाच असतात. मात्र, आपल्याकडील कौशल्यांचा पुरेपूर वापर केल्यास संकटही मित्र बनते.

अमित पाटणकर

.. ..

कोल्हापूर टाइम्स टीम

गेल्या महिन्यापासून उष्णतेने हैराण झालेल्या शहरवासियांना फनी वादळामुळे निर्माण झालेला गारवा अनुभवास येत आहे. अशा बदलत्या वातावरणात रविवारी महापालिकेने आयोजित केलेल्या जयंती नाला स्वच्छता मोहिमेला नागरिकांचा प्रसिताद मिळाला. शेकडो हात श्रमदानासाठी सरसावले. प्रशासन, पदाधिकारी आणि विविध सामाजिक, स्वयंसेवी संस्थांनी घेतलेल्या सहभागामुळे जयंती नाल्यात व काठावर असलेल्या हजारो टन कचऱ्याची निर्गत झाली. त्यामुळे पंचगंगा नदीत जाणारे सांडपाणी आणि कचऱ्याला अटकाव करण्यात नक्कीच यश येईल.

शहराच्या कचरामुक्तीसह जयंती नाला सफाईसाठी महापालिका प्रशासनाने लोकसहभागाची हाक दिली होती. अपेक्षित लोकसहभागासह नियोजन करून स्वच्छता मोहिमेसाठी प्रमुख अधिकाऱ्यांच्या मार्गदर्शनाखाली पाच पथके तैनात केली होती. हॉकी स्टेडियम ते सावित्रीबाई फुले हॉस्पिटल, सावित्रीबाई फुले हॉस्पिटल ते लक्ष्मीपुरी, लक्ष्मीपुरी ते आयर्विन ख्रिश्चन हायस्कूल, आयर्विन ख्रिश्चन हायस्कूल ते जयंती नाला पंप हाऊस आणि पंप हाऊस ते सिद्धार्थ नगर असे पाच विभाग करुन जबाबदारी निश्चित केली होती. महापौर सरीता मोरे यांच्या उपस्थितीत हॉकी स्टेडिय येथे सकाळी सात वाजता स्वच्छेतेला सुरुवात झाली. आणि हजारो हात श्रमदानासाठी सरसावले.

नाल्यातून वाहणारे दुर्गंधीयुक्त सांडपाणी, जमा झालेले प्लास्टिक, उगवलेली झाडे-झुडपे, मृत जनावरांचे अवशेष, वाहनांचे गंजलेले पार्ट्स, बायोमेडिकल वेस्ट असा विविध प्रकारचा कचरा हजारो हातांनी एकत्र केला. अनेक नागरिकांनी दुर्गंधीयुक्त पाण्यात उतरुन कचरा बाहेर काढला. श्रमदान जोरात सुरू असतान जेसीबी मशिनच्या मदतीने सांडपाण्याला अडथळा ठरणारे घटक बाजूला काढले जात होते. अनेकांनी हातात खोरे, कुदळ, पाटी घेत तोंडाला स्कार्फ बांधून मोहिमेत सहभाग घेतला.

नाल्याच्या काठावर जसजसा कचरा संकलीत होत होता, तसतशी महापालिकेची वाहने कचरा घेऊन घनकचरा व्यवस्थापन प्रकल्पाकडे डंपिंगसाठी जात होती. शहरवासियांच्या उत्स्फूर्त प्रतिसादाला महापालिकेच्या अधिकाऱ्यांनी स्वत: सहभागी होत तितकीच दाद दिली. आरोग्य व पवडी विभागाच्या कर्मचाऱ्यांचे हे नेहमीचे काम असले तरी मोहिमेत हजारो हात सहभागी झाल्यामुळे त्यांचाही उत्साह दुणावला. सकाळी सात वाजता सुरू झालेली स्वच्छता मोहीम अकरा वाजेपर्यंत सुरू होती. नंतर उर्वरीत कचरा निर्मूलन जेसीबीच्या मदतीने दिवसभर सुरू होते.

रविवारच्या मोहिमेमुळे अनेकांनी आपला हॅपी संडे साजरा केला. मोहिमेमध्ये आयुक्त डॉ. मल्लिनाथ कलशेट्टी, जिल्हा परिषदेचे सीईओ अमन मित्तल, निवासी उपजिल्हाधिकारी संजय शिंदे, संयोगिताराजे छत्रपती, अमरजा निंबाळकर, क्रिडाईचे अध्यक्ष विद्यानंद बेडेकर, आर्किटेक्ट असोसिएशनचे अध्यक्ष अजय कोराणे, उदय गायकवाड, दिलीप देसाई, दिलीप पोवार, बंडा साळोखे, आरोग्याधिकारी डॉ. दिलीप पाटील, शहर अभियंता नेत्रदीप सरनोबत, उपायुक्त मंगेश शिंदे, जलअभियंता सुरेश कुलकर्णी, मुख्य आरोग्य निरीक्षक डॉ. विजय पाटील, उपशहर अभियंता रमेश मस्कर, एस. के. माने, आर. के. जाधव, आर. के. पाटील, हर्षजित घाटगे, विजय वणकुंद्रे यांच्यासह महापालिकेचे अधिकारी व कर्मचारी सहभागी झाले होते.

सहभागी संस्था

- क्रिडाई

- आर्किटेक्ट ऑफ इंजिनीअरिंग असोसिएशन

- कोल्हापूर स्पोर्ट्स असोसिएशन

- कोल्हापूर प्रेस क्लब

- फेरीवाले संघटना

- विद्या प्रबोधिनी

६

जेसीबी

१०

डंपर

१

ट्रॅक्टर

२०००

कर्मचारी

नगरसेवकांची पाठ

महापालिका प्रशासनासह पदाधिकाऱ्यांनी नगरसेवकांनाही स्वच्छता मोहिमेमध्ये सहभागी होण्याचे आवाहन केले होते. प्रत्यक्षात मोजकेच नगरसेवक यात सहभागी झाले. महापौर सरिता मोरे, त्यांचे पती माजी नगरसेवक नंदकुमार मोरे, उपमहापौर भूपाल शेटे, भाजप गटनेते विजय सूर्यवंशी, नगरसेवक अजित ठाणेकर, अश्विनी बारामते, ईश्वर परमार, राजाराम गायकवाड, उमा बनछोडे सहभागी झाले. इतर नगरसेवकांनी मोहिमेकडे पाठ फिरवली. अधिकाऱ्यांची उपस्थिती मात्र उल्लेखनीय होती.

स्वच्छता मोहिमेला नागरिकांनी उत्स्फूर्त प्रतिसाद दिला. शहराच्या विकासासाठी असे उपक्रम नेहमीच फलदायी ठरतील. केवळ सरकारी कर्मचाऱ्यांच्या कामावर लक्ष केंद्रीत न करता नागरिकांनी त्यामध्ये योगदान दिल्यास शहराच्या विकासाला आणखी बळकटी मिळेल. स्वच्छता मोहिमेमुळे शहरवासियांचे आरोग्यही सदृढ राहील.

- सरिता मोरे, महापौर

शहरवासियांच्या सहभागामुळे भविष्यात स्वच्छ शहरांमध्ये कोल्हापूर आपले नाव उज्ज्वल करेल. गेल्या ४० वर्षांच्या अनुभवांवरुन लोक सहभागाशिवाय यश मिळत नाही हे निश्चित ठावूक आहे. यापुढेही अशा उपक्रमांमध्ये शहरवासियांनी सहभागी व्हावे. तसेच आजच्या उपक्रमामध्ये सहभागी झालेल्या नागरिकांना मनपासून धन्यवाद.

- डॉ. मल्लिनाथ कलशेट्टी, आयुक्त

लोगो : मटा भूमिका

स्वच्छतेसह संवर्धनाचा

वसा टिकायला हवा

महाराष्ट्राचे तत्कालीन ग्रामविकासमंत्री, दिवंगत आर. आर. पाटील यांनी संत गाडगेबाबा ग्रामस्वच्छता अभियानाला सुरुवात केली. अभियानाच्या माध्यमातून महाराष्ट्रातील अनेक गावे व शहरांचा कायापालट झाला. अभियानाच्या माध्यमातून सरकारी अधिकाऱ्यांसोबत नागरिक स्वच्छता मोहिमेमध्ये जोडले जाऊ लागले. त्यातून श्रमदानाला पुन्हा महत्त्व प्राप्त झाले. त्याच धर्तीवर आयुक्त डॉ. मल्लिनाथ कलशेट्टी यांनी लोकसहभागाला प्राधान्य देत श्रमदान करण्यास सुरुवात केली आहे. स्वत: आयुक्त स्वच्छता मोहिमेत सहभागी होत असल्याने अधिकारी, कर्मचारीही सहभागी होत आहेत. त्यातून या मोहिमेला लोकांचा सहभागही मिळू लागला आहे. यातूनच पुन्हा एकदा शहरात श्रमदानाची चळवळ रुजू लागली आहे. या चळवळीला व्यापक स्वरुप प्राप्त झाल्यास शहरातील उद्याने, सार्वजनिक स्थळांची स्वच्छता आणि संवर्धनास बळकटी मिळेल. स्वच्छतेचा हा वसा कोल्हापूरकरांनीच टिकवायला हवा.

गूड न्यूज व महापालिका लोगो

म. टा. प्रतिनिधी, कोल्हापूर

केंद्र सरकारने स्वच्छ भारत अभियानातंर्गत 'प्रत्येक घरात शौचालय' योजना सुरू केली आहे. या योजनेची प्रभावी अंमलबजावणी करताना महापालिकेच्या आरोग्य विभागाच्यावतीने झोपडपट्टी परीसरात एक वर्षात तब्बल साडेतीन हजार वैयक्तिक शौचालयांची बांधणी करण्यात आली. यापैकी बहुतांशी शौचालये मलनि:सारण वाहिनीला जोडण्यात आली आहेत. वैयक्तिक लाभार्थ्यांना प्रोत्साहन देण्यासाठी प्रत्येकी १५ हजारांचे अनुदान दोन टप्प्यात देण्यात आले असून 'शेल्टर' या सामाजिक संस्थेचाही याकामी मोलाचा हातभार लागला आहे.

देशात स्वच्छता अभियानातून प्रत्येक घर स्वच्छ ठेवण्यासाठी केंद्र सरकारने स्वच्छ भारत अभियानाला सुरुवात केली. अभियानातंर्गत महापालिकेच्यावतीने वैयक्तिक शौचालय योजना राबवण्यास सुरुवात केली. शहरामध्ये वैयक्तिक शौचालयांची संख्या जास्त असली, तरी विशेषत: झोपडपट्टी भागात सार्वजनिक शौचालयांचा वापर जास्त केला जातो. विचारे माळ, सदर बाजार, राजेंद्रनगर, लक्षतीर्थ वसाहत, कणेरकर नगर आदी भागांवर विशेष लक्ष केंद्रीत करण्यात आले.

त्यानुसार २०१८-१९ मध्ये झोपडपट्टी भागात साडेतीन हजार शौचालयांची बांधणी करण्यात आली. लाभार्थ्यांना शौचालय बांधणीसाठी अनुदान स्वरुपात प्रत्येकी १५ हजार रुपये दोन टप्प्यात देण्यात आले. महापालिकेच्या आरोग्य विभागाला ही मोहीम राबवताना त्याला 'शेल्टर' या सामाजिक संस्थेची चांगली मदत झाली. शेल्टर संस्थेने यापैकी दोन हजार कुटुंबांना शौचालयासाठी आवश्यक साहित्य पुरवले.. बांधलेली सर्व शौचालये मलनि:सारण वाहिनीला जोडण्यात आली आहेत. लाभार्थ्यांचा सहभाग आणि संस्थेच्या मदतीमुळे २०१९-२० वर्षामध्ये दोन हजार शौचालय बांधणीचे उद्दीष्ट ठेवले आहे. त्यापैकी एक हजार शौचालय शेल्टर संस्था उभी करणार आहे. वैयक्तिक शौचालय बांधणीला प्रोत्साहन देताना शहरातील सार्वजनिक शौचालयांची संख्या कमी करण्याचे नियोजन महापालिका प्रशासनाने केले आहे.

.....................

चौकट

योजनेला प्रोत्साहन मिळणार

घरापासून ३० मीटर अंतरावर मलनि:सारण वाहिनी असल्यास वैयक्तिक शौचालय बांधणीस अडथळा येत होता. पण ही अट नंतर शिथिल करण्यात आली. घरोघरी शौचालय योजनेस प्रोत्साहन देण्यासाठी अट शिथिल करण्यात आली असताना शहराच्या अनेक भागात 'अमृत' योजनेंतर्गत ड्रेनेज लाइन टाकण्याचे काम सुरू आहे. शिथिल केलेली अट आणि ड्रेनेज लाइनच्या कामामुळे वैयक्तिक शौचालय योजनाला अधिक प्रोत्साहन मिळण्याची शक्यता आहे.

\B

\B

म. टा. प्रतिनिधी, कोल्हापूर

पंचगंगा नदीवरील पर्यायी शिवाजी पुलाचे काम बंद पाडण्यास येणाऱ्या अधिकाऱ्यास कोल्हापूर हिसका दाखवण्याचा आणि काम स्थगित केल्यास बेमुदत कोल्हापूर बंद करण्याचा निर्णय शिवाजी पूल बचाव नागरी कृती समितीतर्फे रविवारी घेण्यात आला. यावेळी काम बंद केल्यास बेमुदत उपोषण करण्याचा इशाराही महापौर सरिता मोरे यांनी दिला.

पुरातत्व विभागाने काम थांबवण्यासंबंधी राष्ट्रीय महामार्ग प्रशासनास नोटीस दिली आहे. काम थांबू नये, यासाठी पूल परिसरात आयोजित बैठकीत हा निर्णय घेण्यात आला.

महापौर मोरे म्हणाल्या, 'पुलाचे काम अंतिम टप्प्यात आहे. अशावेळी काम बंद करण्याची नोटीस पुरातत्व विभागाकडून देणे चुकीचे आहे. कोणत्याही परिस्थिती काम बंद करू देणार नाही. काम बंद झाल्यास मी स्वत: उपोषण करणार आहे. जर कुणी अधिकारी काम बंद करण्यासाठी आला तर त्याला कोल्हापुरी हिसका दाखवण्यात येईल. जुन्या पुलाचे आयुर्मान संपले आहे. या पुलावर पूर्वी अपघात होऊन १३ जणांचा मृत्यू झाला आहे. तरीही नवीन पुलाचे काम बंद करण्याची भाषा करणे चुकीचे आहे.'

समितीचे निमंत्रक आर. के. पोवार म्हणाले, 'अनेक वर्षे रखडलेले पुलाचे काम पुन्हा २०१४ मध्ये सुरू झाले. काम त्वरित पूर्ण होण्यासाठी पाठपुरावा केला जात आहे. गोव्याची आसमास कंपनी काम करत आहे. काम पूर्ण होण्याच्या टप्प्यात आले असताना पुन्हा खो घालण्याचा प्रयत्न सहन करणार नाही. काम बंद केल्यास त्याच दिवसापासून कोल्हापूर बेमुदत बंद केले जाईल.'

बाबा पार्टे म्हणाले, 'जेव्हा पुलाचे काम सुरू झाले तेव्हा पुरातत्व विभागाने नोटीस का काढली नाही? कामाला सुरूवात करण्यापूर्वी अधिकाऱ्यांची व्यापक बैठक झाली होती. त्यावेळी आवश्यक परवाने मिळाल्याचे सांगण्यात आले. पुरातत्व वास्तूच्या हद्दीपासून १०० मीटरच्या आत काम येत नसल्याचे सांगितले होते. '

अशोक पोवार म्हणाले, 'पर्यायी पुलाचे बांधकाम बंद पाडण्यामागे षडयंत्र दिसते. पूल बांधकाम कामासच कायदा कसा आडवा येतो ? ब्रम्हपुरी टेकडीवर घरे झाली, तेथे सोयी सुविधा दिल्या, बीएसएनलने केबल जमिनीखालून नेली. त्यावेळी कायदा कुठे गेला होता?'

वसंतराव मुळीक म्हणाले, 'पावसाळा सुरू होण्यापूर्वी पुलाचे बांधकाम पूर्ण होऊन तो वाहतुकीस खुला होणे गरजेचे आहे. काम थांबणार नाही, त्याची दक्षता जिल्हा प्रशासनाने घ्यावी. राष्ट्रीय महामार्ग प्रशासनाने पुरातत्त्वच्या नोटिशीला उत्तर द्यावे. काम थांबवण्याचा निर्णय घेऊ नये, अन्यथा गंभीर परिणाम होतील.'

फत्तेसिंह सावंत म्हणाले, 'नोटीशीबाबत माहिती मिळताच खासदार संभाजीराजे छत्रपती यांनी तातडीने पत्रकार परिषद घेतली. पूल कामाच्या ठिकाणच्या जमिनीचा मोबदला देण्याबाबतचे हमीपत्र द्यावे अशी जिल्हाधिकाऱ्यांकडे विनंती केली आहे. खासदार संभाजीराजे, धनंजय महाडिक हे दिल्लीत थांबून यासाठी प्रयत्न करत आहेत. पुरातत्व विभागाचा 'ना हरकत' दाखला मिळेल. त्यासाठी काम थांबवण्याची गरज नाही.'

याप्रसंगी जयकुमार शिंदे, अशोक भंडारी, माणिक मंडलिक, प्रसाद जाधव, सतिशचंद्र कांबळे, किशोर घाटगे यांची भाषणे झाली. यावेळी लाला गायकवाड, वैशाली महाडिक, माई वाडेकर, निरंजन कदम आदी उपस्थित होते.

............

काम गतीने

पूल बांधकामासंबंधी 'पुरातत्व'च्या प्रशासनाने नोटीस दिली असली तरी ठेकेदारांकडून काम गतीने केले जात आहे. २० मे पर्यंत शेवटच्या टप्प्यातील बहुतांश काम पूर्ण होईल. 'कोल्हापूरकडील दिशेला भराव करण्याचे काम पूर्ण होत आहे. पूल आणि रस्ता जोडणारा कमी अंतराचा अखेरचा स्लॅब लवकरच टाकण्यात येईल', असे ठेकेदार आसमास कंपनीचे प्रतिनिधी एन. डी. लाड यांनी सांगितले.

म. टा. प्रतिनिधी, कोल्हापूर

'ऑगस्ट, सप्टेंबर महिन्यात पाऊस कमी झाल्याने ऑक्टोबर २०१८ पासून राज्य सरकारने दुष्काळ निवारण कामाची सुरुवात केली आहे. सरकार दुष्काळाबाबत गंभीर असून पिण्याचे पाणी, चारा, सर्वांना रोजगार मिळावा यासाठी राज्य सरकारकडून काम सुरु झाले आहे. तरीही राज्य सरकार दुष्काळाबाबत गंभीर नाही ही शरद पवार यांनी केलेली टीका योग्य नाही', असे मत महसूल मंत्री चंद्रकांत पाटील यांनी पत्रकारांशी बोलताना व्यक्त केले. पवार दुष्काळाचे राजकारण करत आहेत, असा आरोप करत दुष्काळाचा मुकाबला करण्यासाठी सत्ताधारी व विरोधक एकत्र आले आहे. पवारांचा अनुभव लक्षात घेता त्यांच्या सूचनांचे स्वागत केले जाईल', असेही ते म्हणाले.

पवारांनी ईव्हीएम मशिनबाबत शंका घेतली आहे. कोर्टाने राफेलप्रश्नी दिलेला निर्णयही त्यांना मान्य नाही. दुष्काळात उपाययोजना करताना राज्य सरकारने आचारसंहितेचा बागलबुवा करु नये, अशी टीका पवारांकडून केली जात आहे, याकडे लक्ष वेधत मंत्री पाटील म्हणाले, 'लोकशाही मार्गाने सर्व प्रश्न सोडवले जात असताना पवारांना ते मान्य नाही. पवारांविषयी आता चिंता वाटायला लागली आहे. पवार अनुभवी आहेत. केंद्रीय कृषीमंत्री म्हणून त्यांनी काम केले आहे. लातूर भूकंपाच्यावेळी त्यांनी चांगले काम केले आहे. दुष्काळाप्रश्नी त्यांनी केलेल्या सूचनांचे स्वागत केले जाईल. पाऊस कमी पडल्याने ऑक्टोबर २०१८ पासून दुष्काळ निवारणाच्या उपायोजना सुरु केल्या असून त्याचवेळी सरकारने राज्यातील १५१ तालुक्यात दुष्काळ जाहीर केला आहे. केंद्राने ४८०० कोटी रुपयांचा भरीव निधी दिला आहे. राज्य सरकारने केंद्राच्या निधीची वाट न पाहता २००० कोटी रुपयांची तरतूद केली आहे. सरकारी जमीन, धरणांच्या बॅक वॉटरमध्ये चाऱ्याच्या उत्पादनास प्रोत्साहन दिले असून जून महिन्यापर्यंत चारा कमी पडणार नाही. '

१२६४ चारा छावणीत आठ लाख ३२ हजार २९ जनावरे दाखल झाली आहेत, अशी माहिती देत पाटील म्हणाले, 'चारा छावणीतील जनावरांच्या हजेरीसाठी नवीन अॅप विकसित केले असून रोजच्या हजेरीवरुन बिल दिले जाणार आहेत. पाच लाख शेतकऱ्यांना रोजगार उपलब्ध करुन दिला जाईल. आणखीन पाच लाख शेतकऱ्यांना मागेल तेव्हा ३६५ दिवस रोजगार उपलब्ध करुन दिला जाईल. शेतकऱ्यांच्या माफ केलेल्या कर्जाची रक्कम त्यांच्या खात्यावर जमा होत असून पीक विमा योजनेतील तीन हजार कोटी रुपये शेतकऱ्यांच्या खात्यावर जमा होणार आहेत. पीक विमा योजनेतील ७५ टक्के प्रिमियम केंद्र व राज्य सरकारने भरला आहे.'

.......

गृहखात्याने आदेशाने मंत्रालयाच्या पायऱ्या काढल्या

आपत्कालीन परिस्थितीत अग्निशमन दलासह अन्य मोठी वाहने वळवताना अडचणी येत असल्याने मंत्रालयाच्या पायऱ्या तोडून टाकाव्यात, अशी सूचना गृह विभागाने केली होती, अशी माहिती महसूल मंत्री पाटील यांनी दिली. या संदर्भात सरकारने तीन आयएसएस अधिकाऱ्यांची समिती नियुक्ती केली. या समितीने पायऱ्या तोडून टाकाव्यात, असा निर्णय दिला आहे. त्यानुसार लोखंडी पायऱ्या काढल्या जात आहेत. पायऱ्या तोडल्यामुळे किती खर्च वाया गेला याची माहिती नसल्याचे पाटील यांनी सांगितले.

..............

....................

धरणातील उपलब्ध जलसाठा १९.६३ टक्के

पाणी पुरवणाऱ्या टँकरची संख्या ४७७४

पाणी पुरवलेल्या गावांची संख्या ३६९९

पाणी पुरवलेल्या वाड्यांची संख्या ८४१७

जनावरांच्या एकूण छावण्या १२६४

चारा छावण्यातील जनावरे ८,३२,०२९

रोजगार हमी कामांची संख्या ३४,४३१

मजूरांची संख्या २,७४,६४३

लोगो : \Bबसव व्याख्यानमाला

\B

म. टा. प्रतिनिधी, कोल्हापूर

'महात्मा बसवेश्वर, महात्मा गांधी आणि राजर्षी शाहू महाराज यांच्या विचार कार्यामध्ये श्रमाधिष्ठित जीवन, स्वयंपूर्ण व स्वावलंबी समाज आणि स्त्री-पुरुष समानता हे समानसूत्र आढळते,' असे प्रतिपादन प्राचार्य डॉ. सोमनाथ रोडे (लातूर) यांनी केले.

कोल्हापूर लिंगायत समाज संस्था व बसव केंद्र यांच्या संयुक्त विद्यमाने महात्मा बसवेश्वर यांच्या जयंतीनिमित्त बसव व्याख्यानमाला आयोजित केली आहे. 'महात्मा बसवण्णा व महात्मा गांधी' हा त्यांच्या व्याख्यानाचा विषय होता. अध्यक्षस्थानी साहित्यिका नीलम माणगावे होत्या. येथील चित्रदुर्ग मठ येथे व्याख्यानमाला सुरू आहे.

प्राचार्य रोडे यांनी तासाभराच्या व्याख्यानात या तीनही महापुरुषांच्या जीवनकार्यावर प्रकाशझोत टाकला. ते म्हणाले, 'महात्मा बसवेश्वर यांनी बाराव्या शतकात अनुभव मंटपची स्थापना केली. यामध्ये अठरापगड जातीतील प्रतिनिधींचा समावेश होता. अनुभव मंटप म्हणजे सर्वसामान्यांच्या विचारांना वाट करून देणारी पहिली संसद होय. ७७७ महिला प्रतिनिधींचा या संसदमध्ये समावेश होता. वचन साहित्यात महिलांचे मोलाचे स्थान आहे. महिलांना भाषण स्वातंत्र्य, उपासना स्वातंत्र्य असले पाहिजे ही त्यामागील भूमिका होती.'

प्राचार्य रोडे म्हणाले, 'स्त्री-पुरुष समानता, अस्पृश्यता निर्मूलन, स्वयंपूर्ण व स्वावलंबी समाजासाठी महात्मा गांधी व शाहू महाराज यांनी आयुष्यभर प्रयत्न केले. स्वातंत्र्यलढ्यात महिलांनी अग्रभागी राहून लढण्याची प्रेरणा दिली. शाहू महाराजांच्या दरबारात बाराव्या शतकातील अनुभव मंटपची प्रचिती येते. महाराजांनी सर्व जातीधर्मांना राज्यकारभारात सामावून घेतले. महिलांना सर्व प्रकारचे अधिकार मिळायला हवेत म्हणून कायदे केले. कौटुंबिक अत्याचारविरोधी कायदा लागू केला. तिघांनीही कष्टाला अनन्यसाधारण महत्त्व दिले. सर्वसामान्य माणसांना सक्षम बनविले. मात्र, आज समाजात विषमतेची दरी रुंदावत असून त्यावरून समाजात संघर्ष उदभवण्याचा धोका आहे.'

किरण गवळी यांनी स्वागत केले. चंद्रशेखर बटकडली यांनी आभार मानले. व्यासपीठावर बसव मल्लिकार्जुन स्वामी, सदाशिव देवताळे, राजशेखर तंबाखे, विलास आंबोळे प्रमुख उपस्थित होते.

०००००

विक्रेता पसार, घरमालक ताब्यात

म. टा. प्रतिनिधी, कोल्हापूर

आळते (ता. हातकणंगले) येथील इंगवले मळ्यामधील घरात साठा केलेला साडेसात लाख रुपये किंमतीचा गुटखा स्थानिक गुन्हे शाखा व आणि अन्न औषध प्रशासन विभागाच्या पथकाने शनिवारी जप्त केला. संशयित घरमालक तानाजी सज्जनराव इंगवले (वय ५५) याला ताब्यात घेण्यात आले. मुख्य विक्रेता राजेश नरसिंगा पांडव हा पसार झाला. पोलिस त्याचा शोध घेत आहेत. ही कारवाई शनिवारी सायंकाळी पाचच्या सुमारास झाली.

एलसीबीचे पोलिस निरीक्षक तानाजी सावंत यांनी दिलेल्या माहितीनुसार, जिल्ह्यात अवैध गुटखा विक्री व उत्पादन रोखण्यासाठी छापा टाकून कारवाई करण्याचे आदेश जिल्हा पोलिस अधीक्षक डॉ. अभिनव देशमुख यांनी दिले आहेत. खबऱ्याने राजेश पांडव (रा. आळते) हा अवैध गुटखाचा व्यवसाय करतो. त्याने राहत्या घरापासून काही अंतरावर इंगवले मळ्यातील शेतात तानाजी इंगवले यांच्या घरात गुटख्याचा साठा ठेवला असल्याचे सांगितले. त्यानुसार पोलिस उपनिरीक्षक दादाराजे पवार, सहायक फौजदार सुरेश चव्हाण, कॉन्स्टेबल अमोल कोळेकर, नितीन चोथे, राजेंद्र हांडे, संजय पडवळ, राजेंद्र बंद्रे, संदीप कुंभार, पांडूरंग पाटील, रणजीत कांबळे, जितेंद्र भोसले, रवि कांबळे आणि अन्न औषध प्रशासनाचे अधिकारी विजयकुमार उनवणे यांनी या ठिकाणी छापा टाकून घरात लपवलेला गुटख्याचा साठा जप्त केला. या प्रकरणी पोलिसांनी घरमालक तानाजी इंगवले याला ताब्यात घेतले असून हातकणंगले पोलिस ठाण्यात गुन्हा दाखल करण्यात आला.

कोल्हापूर टाइम्स टीम

मध्यभागी भंडाऱ्यातील ताटावर ठेवलेल्या बंदा रुपयावर नजर आणि हात ढोलाच्या ठेक्यावर अशा भारलेल्या वातावरणात ढोल दणाणून वाजला. ढोलाच्या ध्वनीलहरींवर थिरकत रुपया ताटावरून खाली पडताच टाळ्यांचा एकच गजर झाला. मंगळवार पेठ राजर्षी शाहू तरुण मंडळाच्यावतीने शिवजयंतीनिमित्त आयोजित करण्यात आलेल्या धनगरी ढोल वादन स्पर्धेने आसमंतात जान आणली. २५ सहभागी स्पर्धक संघांनी अत्यंत चुरशीने या स्पर्धेला प्रतिसाद दिला. मिरजकर तिकटी येथे दोन तास ही स्पर्धा रंगली.

शाहू तरुण मंडळाच्यावतीने मिरजकर तिकटी येथे शिवजयंतीनिमित्त विविध कार्यक्रमांचे आयोजन करण्यात आले आहे. या उत्सवाची सुरुवात गुरुवारी सायंकाळी सात वाजता शिवरायांच्या तांत्रिक देखाव्याच्या उद्घाटनाने झाली. उद्योगपती धैर्यशील यादव, महेश पोवार, डॉ. राजेश चिंचणेकर, मनोहर आवळे आदी उपस्थित होते.

निगवे दुमाला येथील भैरवनाथ जंगलीबाबा वालूग मंडळाच्या ढोलवादनाने स्पर्धेला सुरुवात झाली. तापलेल्या ढोलावर काठीने ताल धरत वादनातून उमटणाऱ्या ध्वनींकडे कान तर डोळे भंडाऱ्यातील रुपयाच्या नाण्याकडे अशा अविर्भावात रसिक तल्लीन झाले. पाच ढोल आणि एक कैताळ यांच्या टीमने तीन मिनिटांत रुपया खाली पाडण्यात यश मिळवले. त्यानंतर उत्तरोत्तर ही स्पर्धा रंगत गेली. रात्री उशिरापर्यंत ही स्पर्धा सुरू होती. दरम्यान संजय आवळे यांच्या सहकार्याने पाच फुटी ढाल व रोख रक्कम असे या स्पर्धेतील विजेते बक्षीस होते.

यावेळी मंडळाचे अध्यक्ष राजू पाटील, किशोर डवंग, अनिल कारंडे, रमेश मोरे, अशोक पोवार, स्वप्नील पार्टे, बाबासाहेब पार्टे, वसंत मुळीक, जयकुमार शिंदे, किसन कल्याणकर, यांच्यासह कार्यकर्ते उपस्थित होते.

म. टा. प्रतिनिधी, कोल्हापूर

आयर्विन ख्रिश्चन हॉस्टेल कपाउंडमधील जागा खाली करुन देण्यासाठी ३० लाखांची सुपारी घेतल्याप्रकरणी अटक केलेल्या दोघांना कोर्टाने ८ मे पर्यंत पोलिस कोठडी सुनावण्यात आली. गणेश जयवंत बुचडे (वय ३९) आणि सचिन अशोक कवाळे (वय ३२) अशी त्यांची नावे आहेत. दरम्यान, या प्रकरणातील मुख्य संशयित सुनील शेळके याचा जामीन मिळविण्यासाठी प्रयत्न सुरु झाला आहे. तपास अधिकारी रवींद्र कदम यांनी दिलेल्या माहितीनुसार, संशयित शेळके याच्या कार्यालयातच हा व्यवहार झाल्याची कबुली बुचडे व कवाळे या दोघांनी दिली आहे. या कपाउंडमधील जागा खाली करुन देण्यासाठी ३० लाखांची सुपारी घेतली होती. त्या पैकी १० लाख रुपये अॅडव्हॉन्स घेतले होते.

म. टा. प्रतिनिधी, कोल्हापूर

उद्यमनगर येथील एका घरात मटका चालविल्याप्रकरणी संशयित मटकाकिंग विजय लहू पाटील याच्यासह रितेश विजय पाटील, मेघा विनोद सुतार यांच्यावर रविवारी गुन्हा दाखल करण्यात आला. पोलिसांनी शनिवारी रात्री उद्यमनगरातील एका हॉस्पिटलजवळील घरात सुरु असलेल्या मटका अड्ड्यावर छापा टाकला होता.

पोलिसांनी दिलेल्या माहितीनुसार, जिल्ऱ्यातील मटका व अवैध व्यवसायाचे समूळ उच्चाटन करण्यासाठी पोलिसांनी मोहिम उघडली आहे. संशयित पाटील याला राजवाडा पोलिसांनी शनिवारी अटक केली होती. त्याला रविवारी कोर्टासमोर हजर केले असता त्याची जामिनावर मुक्तता झाली. दरम्यान, राजारामपुरी पोलिसांना खबऱ्याद्वारे मिळालेल्या माहितीनुसार उद्यमनगर येथील एका इमारतीच्या पहिल्या मजल्यावर छापा टाकला. या वेळी संशयित मेघा विनोद क्षीरसागर (वय ४२, रा. उद्यमनगर) यांना ताब्यात घेतले होते. त्यासह संशयित पाटील याने एका डब्यात लपविलेल्या मटक्याच्या चिठ्ठ्या, १४ हजार ३०० रुपयांची रोकड जप्त केली होती. क्षीरसागर यांच्याकडे कसून चौकशी केली असता त्यांनी या चिठ्ठया विजय लहू पाटील आणि रिद्धेश पाटील यांच्या असून ते येथे मटक्याचा हिशोब करण्यासाठी येत असल्याची कबुली दिली. त्यानुसार तिघांवर गुन्ह दाखल करण्यात आला.

कोल्हापूर टाइम्स टीम

करवीरनिवासिनी श्री अंबाबाई मंदिर परिरसरात जुनी घरे, वाडे आहेत. मात्र, व्यापारी केंद्र निर्माण झाल्याने इथल्या चिमण्या गायब झाल्या आहेत. परिसरात चिमण्यांसह पक्ष्यांचा पुन्हा किलबिलाट वाढावा, यासाठी स्पर्श फाउंडेशनच्यावतीने गेली सहा वर्षे मातीची भांडी व धान्य वाटण्याचा उपक्रम राबवला जात आहे.

'टच फॉर चेंज' असे बोधवाक्य असलेल्या स्पर्श फाउंडेशनमधील सर्व सदस्य युवा वर्गातील आहेत. जागतिक पर्यावरण राखण्यासाठी वृक्ष लागवड, वृक्षतोड रोखणे आणि पर्यावरणाची साखळी कायम राहण्यासाठी 'पक्षी वाचवा मोहिमे'साठी फाउंडेशन काम करत आहे. शिवाजी चौकाजवळील भेंडे गल्ली, कासार गल्लीत संस्थेचे कार्यालय आहे. संस्थेचे सर्व सदस्य जुन्या कोल्हापुरात राहायला असल्याने चिमण्यांचे प्रमाण कमी झाल्याचे सर्व सदस्यांना खटकत होते. त्यामुळे कार्यकर्त्यांनी भेंडे गल्ली, पापाची तिकटी, महाद्वार रोड, बाबूजमाल, गंगावेस, शिवाजी चौक परिसराचा सर्व्हे केला. या परिसरात जुने वाडे व घरे आहेत. चिमण्यांच्या निवासासाठी हा परिसर चांगला असल्याचे लक्षात आले. जुन्या घराच्या भिंतीच्या खोबणीत चिमण्यांची घरटी होऊ शकतात हे लक्षात आले. त्यानुसार त्यांनी 'महाराष्ट्र टाइम्स'च्या पक्षी वाचवा मोहिमेअंतर्गत परिसरातील प्रत्येक घरात पक्ष्यांना पाणी पिण्यासाठी मातीची भांडी आणि धान्य दिले.

परिसराचा मातीची भांडी आणि धान्य वाटपाला नागरिकांनी चांगला प्रतिसाद दिला. अनेक कुटुंबांनी घरामागील जागेत आणि टेरेवर गार्डन फुलवली आहे. उन्हाळ्यात पक्ष्यांना पाणी पिण्यासाठी भांडी व धान्याचे वाटप केल्यानंतर गेल्या तीन वर्षात पक्ष्यांची वर्दळ येथे दिसत असल्याचे कार्यकर्त्यांचे निरीक्षण आहे. परिसरात चिमण्यांचे प्रमाणही वाढू लागले आहे.

मातीची भांडी आणि धान्य वाटपाबरोबर नागरिकांमध्ये जनजागृतीसाठी फाउंडेशनच्यावतीने प्रयत्न केले जात आहेत. कागदी पुठ्ठ्यावर पक्षी वाचवा आवाहन करणारी चित्रे रेखाटून ती बागेत लावण्यात येणार आहेत. झाडे वाचवण्यासाठी गेल्यावर्षी संस्थेच्यावतीने ३०० झाडांवर जाहिरातींसाठी

ठोकण्यात आलेले खिळे, पत्रे हटवण्यात आले. जागतिक पर्यावरण दिनानिमीत्त दरवर्षी वृक्षारोपण मोहिमेत संस्थेचे सदस्य सहभागी होतात.

आम्ही गेल्या सहा वर्षांपासून पक्षी वाचवा मोहीम सुरू केली आहे. गेली पाच वर्षे 'मटा'च्या माध्यमातून अंबाबाई मंदिर परिसरात मोहीम राबवली. परिसरातील कुटुंबांना मातीची भांडी व धान्य वाटप करण्यात येत आहे. ही चळवळ कोल्हापूरच्या पर्यावरणवाढीसाठी पूरक आहे.

- अवधूत अपराध, समन्वयक, स्पर्श फाउंडेशन

तरुणाची आत्महत्या

कोल्हापूर : सुतारमळा परिसरातील विश्वकर्मा कॉलनी येथील उमेश नंदकुमार जाधव (वय ४१) याने रविवारी सायंकाळी आत्महत्या केली. आत्महत्येचे नेमके कारण स्पष्ट झालेले नाही. तो सोनारकाम करीत होता. त्याने या व्यवसायात वापरलेले जाणारे पोटॅश पिऊन आत्महत्या केली. त्याला उपचारासाठी सीपीआरमध्ये दाखल केले. मात्र उपचारापूर्वीच मृत्यू झाल्याचे डॉक्टरांनी सांगितले.

विवाहितेच्या छळ प्रकरणी दोघांवर गुन्हा

कोल्हापूर : विवाहितेचा मानसिक व शारिरिक छळ केल्या प्रकरणी दोघांवर लक्ष्मीपूरी पोलिस ठाण्यामध्ये गुन्हा नोंद झाला. पती शहाजहाँन अब्बास पठाण (रा. ब्रह्मपुरी डी वार्ड) आणि पद्मश्री सुरेश ओमण्णा (वय ३५ मूळ गाव आळते, ता. हातकणंगले) अशी त्यांची नावे आहेत. पोलिसांनी सांगितले की, विवाहितेचा पती अब्बास पठाण याने माहेरहून संसारपयोगी साहित्य आणण्यासाठी तगादा लावला. त्यासह चारित्र्याच्या संशयावरुन पत्नीला त्रास दिला. पत्नीला त्रास देण्यासाठी त्याचा मित्र पद्मश्रीला पत्नीचा मोबाइल क्रमांक दिला. त्यानेही व्हॉटस्अपवरुन तिला अश्लील मेसेज पाठविले. अखेर या छळाला कंटाळून तिने दोघांविरोधात फिर्याद दाखल केली.

फोटो आहे.

म. टा. प्रतिनिधी, कोल्हापूर

महापालिकेच्यावतीने नर्सरी बागेत सुरू असलेल्या राजर्षी शाहू समाधीस्थळ स्मारक सुशोभीकरणाबाबत आपल्या मागण्यांचे निवेदन देण्यासाठी आलेल्या सिद्धार्थनगर येथील एका कार्यकर्त्याने 'सगळा चोर कारभार आहे' अशी पदाधिकाऱ्यांना उद्देशून टिपणी केली. सर्वांसमक्ष काढलेल्या या उद्गाराने महापौर सरिता मोरे, माजी नगरसेवक नंदकुमार मोरे, नगरसेविका मेहजबीन सुभेदार यांनी आक्रमक होत संताप व्यक्त केला. आक्षेपार्ह वक्तव्य करणाऱ्या कार्यकर्त्याला फैलावर घेत शब्द मागे घेण्यास भाग पाडले. अखेर दिलगिरी व्यक्त केल्यानंतर वादावर पडदा पडला.

राजर्षी शाहू समाधीस्थळ स्मारक सुशोभीकरणातंर्गत संरक्षक भिंत बांधण्याचे काम सुरू आहे. मेघडंबरीच्या मागील बाजूच्या भिंतीचे काम पूर्ण झाले असून सिद्धार्थनगरच्या बाजूकडील बांधकाम स्थानिक नागरिकांनी प्रवेशद्वारासाठी बंद पाडले. याची दखल घेत पदाधिकारी शाहू महाराजांच्या स्मृतीदिनाचे औचित्य साधून अभिवादन व कामाची पाहणी करण्यासाठी समाधीस्थळावर दाखल झाले. त्याचवेळी सिद्धार्थनगर येथील नागरिक निवेदन देण्यासाठी आले. यावेळी चर्चा सुरू असताना एका कार्यकर्त्याने पदाधिकाऱ्यांना उद्देशून 'सगळा चोर कारभार आहे' अशी टिपणी केली. त्यामुळे संतापलेल्या महापौर मोरे व नंदकुमार मोरे यांनी त्याला चांगलेच खडसावले. त्याचवेळी नगरसेविका सुभेदार, माजी नगरसेवक आदिल फरास यांनीही या कार्यकर्त्याला फैलावर घेतले. समाधीस्थळ स्मारकावर घडलेल्या दुर्दैवी प्रकारामुळे पदाधिकाऱ्यांनी तीव्र भावना व्यक्त केल्या. अखेर संबंधिताने शब्द मागे घेतले. तर अन्य कार्यकर्त्यांनी दिलगिरी व्यक्त करत वादावर पडदा टाकण्याचा प्रयत्न केला.

यावेळी उपमहापौर भूपाल शेटे, शिक्षण सभापती अशोक जाधव, माजी महापौर हसिना फरास, शहर अभियंता नेत्रदीप सरनोबत, उपशहर अभियंता एस. के. माने, अन्य अधिकारी व शाहूप्रेमी उपस्थित होते.

असुविधांचा 'प्रयोग' ... लोगो

फोटो

म. टा. प्रतिनिधी, कोल्हापूर

मेकअपरुम आहे पण फुलसाइज आरसे नाहीत, त्याठिकाणी कपडे अडकविण्यासाठी व्यवस्था नाही. प्रयोग सादरीकरणाची स्थिती समजण्यासाठी मिनी बॉक्स नाहीत अशी विचित्र अवस्था संगीतसूर्य केशवराव भोसले नाट्यगृहातील मेकअपरुमची बनली आहे. 'लाइटरुम'च्या जागेवरुन संपूर्ण नाटक नजरेस पडत नाही, यामुळे लाइटमनला संपूर्ण साहित्य घेऊन रंगमंचासमोरील मोकळ्या जागेत ठिय्या मारावा लागत आहे.

नूतनीकरण करतानाही मेकअपरुमची उभारणी नीटपणे झाली नाही. महिला व पुरुष या दोन्ही ठिकाणच्या मेकअपरुमध्ये कलाकारांना आवश्यक सुविधा केलेल्या नाहीत. मेकअप करताना फुलसाइज आरसा गरजेचा असतो. फुलसाइज आकारातील आरशामध्ये कलाकारांना पूर्ण मेकअप दृष्टीस पडू शकतो. मात्र सध्याच्या मेकअपरुमध्ये लहान आकारातील आरसे आहेत. लहान आकारातील आरसे बदलण्याची वारंवार मागणी करुनही पालिका प्रशासनाचे डोळे अजून उघडलेले नाहीत.

सांस्कृतिक कार्यक्रम, नाटकात सिनीअर कलाकार असतात. त्याचा विचार करुन टॉयलेटरुममध्ये कमोडची गरज आहे. दोन्ही मेकअपरुमध्ये साध्या पद्धतीच्या टॉयलेटची सुविधा आहे. मेकअपरुमध्ये कपडे अडकविण्यासाठी बार नाहीत. कपडे व इतर साहित्य ठेवण्यासाठी लॉकरची गरज आहे. शिवाय मेकअपरुमधील कलाकारांना थिएटरमधील नाटक समजण्यासाठी, संवाद ऐकण्यासाठी मिनी बॉक्सची गरज आहे. याशिवाय सध्याच्या लाइटरुममधून रंगमंचाचे पूर्ण दर्शन होत नाही. सादरीकरण नजरेस पडत नाही. यामुळे प्रकाश योजनेचा वापर करताना तारांबळ उडते. यामुळे लाइटमनवर रंगमंचासमोर बसून लाइट ऑपरेट करावे लागत आहेत.

…………………...

ठराविक दिवस राखीव ठेवावा

कोल्हापुरातील रंगकर्मी व नाट्य वितरक संस्थांनी एकत्रितपणे नाट्यगृहाच्या शिफ्टच्या वेळा बदलाव्यात, अशी मागणी आहे. शिवाय सकाळी आठ ते अकरा या वेळेत थिएटर नाममात्र भाड्यात रंगीत तालीम व बालनाट्यासाठी मिळावे. शिवाय प्रत्येक महिन्यातील एक शनिवार आणि एक रविवार कोल्हापूरच्या स्थानिक संस्थासाठी राखीव ठेवावा. शहर आणि परिसरात पदरमोड करुन प्रयोग करणाऱ्या हौशी नाट्य संस्था आहेत. त्यांच्या कलागुणांना वाव मिळू शकतो.

………...

नाट्यगृह केबिनच्या विळख्यात

नाट्यगृहालगत खाऊगल्ली आहे. गेल्या काही वर्षात नाट्यगृहाच्या प्रवेशद्वारापर्यंत केबिन उभारल्या. विविध प्रकारचे खाद्यपदार्थांचे स्टॉल, आईस्क्रीमच्या गाड्या लावलेल्या असतात. त्यांना कसल्याही प्रकारची शिस्त नाही. याशिवाय नाट्यगृहासमोरील रस्ता हा वडापचा थांबा बनल्यासारखे चित्र आहे. या साऱ्यामुळे नाट्यगृहाचे सौंदर्य झाकोळले जात आहे. खाऊ गल्लीतील सांडपाणीही नाट्यगृह परिसरातील गटारीत पसरते. टाकावू पदार्थ त्याठिकाणी टाकल्यामुळे खाऊ गल्लीच्या बाजूची भिंत उंदरानी पोखरली आहे.

..................

…………………………………

महापालिकेकडून अपेक्षा… ...

मेकअपरुमध्ये कमोड टॉयलेट आवश्यक

तिकीट विक्रीची अद्ययावत सोय हवी

नाट्यगृहाच्या आतील व बाहेरील नियमित स्वच्छता करावी

नाट्यगृहातील सिलिंगमध्ये बल्ब बसवावेत

नाट्यगृहाच्या नुतनीकरणप्रसंगी रंगकर्मी, नाट्यवितरक व नाट्य संस्थेच्या सूचना स्वीकाराव्यात

……………………………………………………………………...............

कोट

'लाइटची मंडपी प्रथमदर्शनी नजरेस पडत असल्यामुळे नाटकाच्या नेपथ्याला बाधा पोहचत आहे. लाइट लाइन पुढे आल्यामुळे प्रकाश योजना व्यवस्थितपणे देता येत नाही. रंगकर्मी व प्रेक्षकांसाठी थिएटर परिसरात कँटीनची आवश्यकता आहे. मेकअपरुम सुसज्ज करायला हवे. कोल्हापुरातील हौशी नाट्य संस्थांना ५० टक्के शुल्कात थिएटर उपलब्ध करुन द्यावे.

संजय मोहिते, अभिनेता

………………………………..................

मटा भूमिका

संगीतसूर्य केशवराव भोसले नाट्यगृह हे कोल्हापूरचे सांस्कृतिक क्षेत्राचे वैभव म्हणून ओळखले जाते. कोल्हापुरातील हे एकमेव नाट्यगृह आहे. महापालिका प्रशासनाने थिएटर अद्ययावत केले व रंगकर्मी, कलाकारांना आवश्यक सुविधा पुरविल्या तर कला क्षेत्र उजळणार आहे. महापालिका निवडणुकीत काँग्रेस, राष्ट्रवादीच्या नेत्यांनी अद्ययावत नाट्यगृहाचे आश्वासन दिले होते. दुसरीकडे राज्यातील भाजप, शिवसेनेनेही थिएटर सुसज्ज बनविण्यासाठी फार काही केल्याचे नजरेस पडत नाही. वास्तविक शहराचा विस्तार वाढत आहे. कलाविषयक अभिरुची उंचाविण्यासाठी राज्यकर्त्यांनी व प्रशासनाने थिएटरच्या सुविधेला प्राधान्यक्रम देण्याची गरज आहे.