कोल्हापूर टाइम्स टीम

लोकसभा निवडणुकीच्या मतदान केंद्रापासून २०० मीटर अंतरामध्ये जिल्हा निवडणूक प्रशासनाने मोबाइल बंदी केली. तो आढळल्यास कारवाईची धमकी देण्यात आली आहे. त्यामुळे मोबाइलधारकांत भीती निर्माण झाली आहे. मोबाइलच्या जमान्यात अशा प्रकारचे फतवे काढून मतदारांना मतदान करण्यात अडथळे का निर्माण केले जात आहे, असे प्रश्नही उपस्थित होत आहे.

जिल्ह्यात कोल्हापूर, हातकणंगले मतदारसंघासाठी २३ एप्रिलला मतदान होत आहे. केवळ दोन दिवस शिल्लक आहेत. अशा टप्यातच मतदानादिवशी केंद्राच्या २०० मीटर परिसरात मोबाईल बंदीचा आदेश प्रशासनाने काढला आहे. राज्यात पहिल्या आणि दुसऱ्या टप्यातील मतदानावेळी काही जणांनी मतदान करतानाचे फोटो मोबाइलवरून काढल्याचे प्रकार समोर आले आहेत. मतदान ही बाब गोपनिय असताना काहींनी 'फेसबुक लाइव्ह'ही केले. त्यामुळे सरसकट मतदान केंद्रात मोबाइल बंदी करण्यात आली आहे. मात्र ते मोबाइल कुठे ठेवायचे, त्याची काय व्यवस्था केली आहे? मतदान केंद्रात जाताना पोलिसांकडून तपासणी होणार का? बाहेर मोबाइल कोणाच्या जबाबदारीवर ठेवायचा असे प्रश्न उपस्थित केले आहेत.

एखादा मतदार मतदान करताना फोटो काढत असेल तर त्याच्यावर गुन्हे दाखल करणे अपेक्षित आहे. अशा बोटावर मोजण्याइतक्या लोकांसाठी सर्वच मतदारांना मतदानाला येताना मोबाइल मनाई केली आहे. निवडणूक प्रशासन मतदानाची टक्केवारी वाढवण्यासाठी व्यापक जागृती करत आहे. दुसऱ्या बाजूला मतदानासाठी येणाऱ्यांवर जाचक बंधने लादून वेठीस धरले जात आहे, असेही आरोप होत आहेत. मोबाइल बंदीची अंमलबजावणी करतानाही मतदान केंद्राबाहेरचे पोलिस आणि मतदारांत वादावादीचे प्रसंग निर्माण होणार आहे.

मतदान केंद्राच्या २०० मीटर अंतरात मोबाइल घेऊन जाण्यास निवडणूक प्रशासनाने मज्जाव केला आहे. मात्र कुठे मोबाइल ठेवून केंद्रात जायचे हे प्रशासनाने सांगितलेले नाही. मोबाइल ठेवण्याची व्यवस्था न करता बंदी घालणे म्हणजे आडमुठेपणाचे धोरण आहे. एका बाजूला मतदान वाढण्यासाठी जागृती करायची आणि दुसऱ्या बाजूला विविध कारणांनी मतदारांना वेठीस धरणे चुकीचे आहे. याला विरोध केला जाईल.

- अशोक पोवार, मतदार

पहिल्या, दुसऱ्या टप्यात झालेल्या मतदानावेळी काही ठिकाणी मतदारांनी मतदान करतानाचे फोटो काढणे, व्हिडिओ शूटिंग यांसारखे प्रकार केले आहेत. त्यामुळे मतदान केंद्रापासून २०० मीटर अंतरावर मोबाइल बंदी केली आहे. कोणीही मतदार मोबाइल केंद्रात घेऊन आल्याचे आढळल्यास कारवाई होईल.

- दौलत देसाई, जिल्हाधिकारी तथा निवडणूक निर्णय अधिकारी

कोल्हापूर : महापालिकेच्या आरोग्य विभागाच्यावतीने शनिवारी जोतिबा चैत्र यात्रेच्या निमित्ताने पंचगंगा नदीघाट येथे विशेष स्वच्छता मोहीम राबवली. स्वच्छता मोहिमेनंतर नदीघाटावर औषध फवारणी करण्यात आली. यावेळी आयुक्त डॉ. मल्लिनाथ कलशेट्टी यांचा नागरीकांच्यावतीने पुष्पगुच्छ देवून स्वागत करण्यात आले. जोतिबा यात्रेला जाण्यासाठी भाविकांना नदीघाटावरुन प्रवासी सुविधा दिली जाते. परिणामी यात्राकाळात येथे प्रचंड गर्दी असते. यात्रेच्या काळात अनेक खाद्यपदार्थांचे स्टॉल असल्याने कचरा निर्माण होतो. हा कचरा काढण्यासाठी शनिवारी स्वच्छता मोहीम राबवली. यामध्ये महापालिकेचे ५० कर्मचारी सहभागी झाले होते. स्वच्छतेनंतर पाणी व औषध फवारणी करण्यात आली. शिवाजी तरुण मंडळाच्यावतीने आयोजित अन्नछत्र व महेश कामत यांनी भाविकांना केलेल्या ताक वाटपामध्ये प्लास्टिकचा वापर नसल्याचे सांगितले. त्यानंतर आयुक्तांना त्यांचा सत्कार केला. स्वच्छता मोहिमेमध्ये मुख्य आरोग्य निरीक्षक डॉ. विजय पाटील, आरोग्य निरीक्षक अरविंद कांबळे व आरोग्य विभागाचे कर्मचारी उपस्थित होते.

Bhimgonda.Desai@timesgroup.com

Tweet : @bhimgondaMT

कोल्हापूर : लोकसभा निवडणुकीत महिला मतदारांची टक्केवारी वाढण्यासाठी कोल्हापूर आणि हातकणंगले मतदारसंघात १३ ठिकाणी सखी मतदान केंद्रे असतील. या केंद्रावर सर्व कर्मचारी महिलाच असतील. त्यापैकी तीन सखी केंद्रे शहरातील आहेत. निवडणूक प्रशासनाने पहिल्यांदाच असा उपक्रम राबवून महिलांना मतदान करण्यास प्रोत्साहीत करणार आहे.

केंद्रीय निवडणूक आयोग लोकशाही अधिक सशक्त करण्यासाठी मतदानाची टक्केवारी वाढीसाठी दोन महिन्यांपासून व्यापक जागृती करत आहे. जिल्हा निवडणूक प्रशासननाने यासाठी कॉलेज, महाविद्यालय, सार्वजनिक ठिकाणी जागृतीचे कार्यक्रम घेतले. प्रचार फेरी काढण्यात आली. प्रत्यक्षात मतदानादिवशी प्रोत्साहीत करण्यासाठी काही आदर्श केंद्रे करण्याचे नियोजन प्रशासनाने केले आहे. सखी केंद्र कार्यरत करून महिला मतदारांनी अधिकाधिक मतदान करावे, असा संदेश पोहचवला जाणार आहे.

'कोल्हापूर' आणि 'हातकणंगले' मतदारसंघातील प्रत्येक विधानसभा मतदारसंघातील एक आणि कोल्हापूर दक्षिणमध्ये दोन मतदान केंद्राची निवड सखीसाठी केली आहे. या केंद्रावर केंद्र अधिकाऱ्यांसह पाच कर्मचारी महिला असतील. एकही पुरुष कर्मचारी असणार नाही. या केंद्रावर कोण महिला अधिकारी, कर्मचारी असतील हे निवडणूक प्रशासनाने निश्चित केले आहे. प्रत्येक दोन तासांना मतदानाची टक्केवारी ऑनलाइन अपडेट करण्यासह सर्व निवडणूक प्रक्रिया यशस्वी करण्याविषयी त्यांना प्रशिक्षण देण्यात आले आहे. पहिलाच असा उपक्रम यशस्वी करण्यासाठी निवडणूक निर्णय अधिकारी तथा जिल्हाधिकारी दौलत देसाई, अप्पर जिल्हाधिकारी नंदकुमार काटकर यांनी विशेष पुढाकार घेतला आहे. सखी केंद्रावर कोणत्याही प्रकारच्या मूलभूत सुविधांची कमतरता भासू नये, अशा सूचना संबंधीत स्थानिक स्वराज्य संस्थांच्या प्रशासनास दिले आहेत.

कर्तृत्व सिद्ध करण्याची संधी

निवडणूक आयोगाचे वॉच असल्याने प्रत्यक्षातील मतदानाची प्रक्रिया अतिशय महत्वाची आणि जबाबदारीची असते. असे काम मोठ्या समर्थपणे करण्याची संधी सखी मतदान केंद्रातील महिला अधिकारी, कर्मचऱ्यांना मिळणार आहे. आपले कर्तृत्वही सिद्ध करण्याची संधी मिळाली आहे.

सखी मतदान केंद्रे अशी

कोल्हापूर शहर - विवेकानंद कॉलेजमधील रुम नंबर १४, केडीसीसी बँकेजवळील रोटरी विद्यालयातील रुम नंबर २ आणि ३, हुनगिनहाळ (ता. गडहिंग्लज), फेजिवडे (ता. राधानगरी), गोपालकृष्ण गोखले विद्यामंदीर (जयसिंगराव पार्क, कागल), आंबेवाडी (ता. करवीर), उक्कोळी (ता. शाहूवाडी), रामराव इंगवले हायस्कूल (हातकणंगले), देशभक्त बाबासाहेब खंजिरे नाईट कॉलेज (इचलकरंजी), पद्माराजे विद्यालय आणि ज्युनिअर कॉलेज (शिरोळ), हजरत मोहबत सुलेमान उर्दू हायस्कूल (इस्लामपूर), पडळवाडी (ता. शिराळा)

लोकसभा निवडणुकीत मतदान वाढीसाठी विविध टप्यांत प्रयत्न सुरू आहेत. त्याचाच एक भाग म्हणून दोन्ही मतदारसंघातील १३ ठिकाणी सखी केंद्रे असतील. तेथे मतदान केंद्र अधिकाऱ्यापासून सर्व कर्मचारी महिलाच असतील.

- सतीश धुमाळ, उपजिल्हाधिकारी, निवडणूक

म.टा.वृत्तसेवा,जयसिंगपूर

यड्राव (ता.शिरोळ) येथील शरद इन्स्टिट्यूट ऑफ टेक्नॉलॉजी, कॉलेज ऑफ इंजिनिअरिंगचे नुकतेच नॅशनल बोर्ड ऑफ एक्रीडीशन (एन.बी.ए.) समितीकडून मूल्यांकन झाले. एनबीए ही संस्था राष्ट्रीय स्तरावरील व्यावसायिक अभ्यासक्रमांना मानांकन देण्याचे काम करते.

या समितीने शरद इंजिनिअरिंगच्या सर्व सुविधा, प्रत्येक विभागातील कागदपत्रांची तपासणी केली. तीन दिवसामध्ये समितीने टिचिंग-लर्निंग प्रोसेस, रिसर्च ऍण्ड कन्सल्टन्सी, इन्फ्रास्ट्रक्चर, विद्यार्थ्यांचा फिडबॅक, आउट कम बेस्ड एज्युकेशन, सीओ-पीओ मॅपींग, प्लेसमेंट याचे मूल्यमापन केले. त्याचबरोबर वर्कशॉप, ग्रंथालय, प्रथमवर्षाचे सर्व प्रयोगशाळा, ऑफीस, जिमखाना, कॅन्टीन, मुलांनी केलेले प्रोजेक्ट, सिव्हिल, मेकॅनिकल व कॉम्प्युटर सायन्स विभागाचे लॅब आणि तेथील कागदपत्रांची तपासणी केली. तसेच महाविद्यालयामार्फत देण्यात येणाऱ्या इतर सेवासुविधांची तपासणी केली.

एन.बी.ए. समितीमध्ये चेअरमन म्हणून आयआयटी रुरकीचे निवृत्त प्रोफेसर डॉ. ए.के. सक्सेना, डॉ. पी. के. गुप्ता, श्रीरपूर (प.बंगाल), आय.ई.एस.टी.चे डॉ. एस.के.राय, हिंदुस्थान युनिव्हर्सिटी चेन्नईचे डॉ. के. एम. मेहता, आण्णा युनिव्हर्सिटी चेन्नईचे डॉ. एस. एस. नारायणा, एन. आय. टी. सुरतकलचे डॉ. पी. मोहन, आयआयटी वाराणसीचे डॉ. ए. के. अग्रवाल आदींचा समावेश होता.

मूल्यांकन यशस्वीरित्या पार पाडण्यासाठी प्राचार्य डॉ. एस. ए. खोत, उपप्राचार्या प्रा. एस. पी. कुर्लेकर, एन.बी.ए. समन्वयक प्रा. प्रवीण यादव, सर्व विभागप्रमुख, एन.बी.ए. समन्वयक, शिक्षक व शिक्षकेतर कर्मचारी यांचे सहकार्य लाभले. एक्झिक्युटीव्ह डायरेक्टर अनिल बागणे यांच्या मार्गदर्शनाखाली हे मूल्यांकन पार पडले. संस्थाध्यक्ष राजेंद्र पाटील-यड्रावकर यांनी सर्वांना शुभेच्छा दिल्या.

................

फोटो-२१जेएसपी२- शरद इंजिनिअरिंगमध्ये एन.बी.ए. मूल्यांकनासाठी आलेल्या समितीसोबत एक्झिक्युटीव्ह डायरेक्टर अनिल बागणे, प्राचार्य डॉ. एस. ए. खोत, प्रा. प्रवीण यादव आदी.

००००

कोल्हापूर टाइम्स टीम

शिवसेना-भाजप युतीच्या कार्यकर्त्यांकडून तब्बल २८ दिवस इर्ष्येने केलेल्या प्रचाराची सांगता रविवारी भव्य महारॅलीने करण्यात आली. शहराच्या प्रमुख मार्गावरुन निघालेल्या महारॅलीत युतीने जोरदार शक्तीप्रदर्शन केले.

भाजप-शिवसेना युती झाल्यानंतर मुख्यमंत्री उद्धव ठाकरे आणि शिवसेना प्रमुख उद्धव ठाकरे यांच्या जाहीर सभेने राज्यातील प्रचाराची सुरुवात झाली होती. त्यानंतर युतीने समन्वय साधत जिल्ह्यात प्रचाराचे रान केले. पालकमंत्री चंद्रकांत पाटील यांच्या नेतृत्वाखाली शिवसेनेचे उमेदवार प्रा. संजय मंडलिक आणि इचलकरंजी लोकसभा मतदारसंघाचे उमेदवार धैर्यशिल माने यांच्या प्रचारासाठी युतीच्या कार्यकर्त्यांनी पायाला भिंगऱ्या लावून जोरदार प्रचार केला. आज प्रचाराच्या अंतिम दिवशी गांधी मैदानातून रॅली काढण्यात आली.

सकाळी नऊ वाजल्यापासून गांधी मैदानात कार्यकर्ते शहर, करवीर, कागल, राधानगरी या तालुक्यांतून आले होते. उन्हाचा तडाखा असतानाही कार्यकर्त्यांमुळे मैदान फुलून गेले होते. साडेअकराच्या सुमारास उमेदवार प्रा. संजय मंडलिक, आमदार राजेश क्षीरसागर, पश्चिम महाराष्ट्र देवस्थान व्यवस्थापन समितीचे अध्यक्ष महेश जाधव, अण्णासाहेब पाटील आर्थिक विकास महामंडळाचे उपाध्यक्ष संजय पवार, शिवसेना जिल्हाप्रमुख विजय देवणे, भाजप महानगर अध्यक्ष संदीप देसाई, शिवसेना शहरप्रमुख रविकिरण इंगवले यांच्या उपस्थितीत रॅलीस सुरुवात झाली.

हलगी, घुमक्याच्या तालावर निघालेल्या रॅलीत भाजप-शिवसेना महायुतीच्या घोषणा कार्यकर्त्यांनी दिल्या. 'कोण आला रे, कोण आला, शिवसेनेचा वाघ आला', 'एकच वादा, संजय दादा', 'बाळासाहेब ठाकरेंचा विजय असो', 'हा आवाज कुणाचा शिवसेना भाजप युतीचा' या घोषणांनी रॅलीचा मार्ग दुमदुमला. भगव्या टोप्या, उपरणी, झेंडे यामुळे रॅलीचे वातावरण भगवे झाले होते. भाजपचा केशरी हिरवा ध्वज, कमळ चिन्हाच्या टोप्या मिरवणुकीत उठून दिसत होत्या. गांधी मैदान, खरी कॉर्नर, महाद्वार रोड, पापाची तिकटी, माळकर तिकटी, शिवाजी चौक, बिंदू चौक, लक्ष्मीपुरी मार्गे रॅली दसरा चौकात आली. तेथे चौकात छोटी सभा झाली.

महिनाभर प्रचारात झोकून दिलेल्या कार्यकर्त्यांचे आभार मानून प्रा. संजय मंडलिक म्हणाले, 'युतीचे नेते, कार्यकर्त्याबरोबर आमदार सतेज पाटील, जनसुराज्यचे विनय कोरे यांनी पाठिंबा दिल्याने उमेदवाराचे हात बळकट झाले आहेत. धान्यानं खळं भरलं असून धान्याने पोती भरुन तयार झाली आहेत. पण त्याला उंदीर लागू नये, चोरुन कुणी नेऊ यासाठी सर्वांनी सावध राहण्याची गरज आहे. ही निवडणूक माझी राहिली नसून कोल्हापूरच्या स्वाभिमानाची लढाई झाली आहे. कागलपेक्षाही मला कोल्हापुरात जास्त मताधिक्य मिळेल असा विश्वास वाटतो.'

'उडाले ते कावळे, राहिले ते मावळे' असा इशारा विरोधकांना देऊन आमदार राजेश क्षीरसागर म्हणाले, '२८ दिवस अविश्रांत प्रचार करणाऱ्या महायुतीच्या कार्यकर्त्यांनी गाफील राहू नये. पुढचे दोन दिवस डोळ्यात तेल घालून लक्ष ठेवूया. प्रा. मंडलिक चांगल्या मताधिक्याने विजयी होतील यासाठी मतदान संपेपर्यंत कार्यरत राहूया.'

देवस्थान समितीचे अध्यक्ष महेश जाधव म्हणाले, 'आभाळ फाटलं असून विरोधकांना ते कसं, कुठे शिवायचं हे कळेना झाले आहे. पाचही विधानसभा मतदारसंघात प्रा. मंडलिकांना मताधिक्य मिळणार असून कागलचे मताधिक्य फेडताना विरोधकांना नाकीनऊ होईल.'

शहरप्रमुख रविकरण इंगवले यांनी पाकिट संस्कृती घालवण्यासाठी व महाडिकरुपी राक्षसाचे दहन करण्यासाठी युतीच्या कार्यकर्त्यांनी शेवटच्या क्षणापर्यंत सतर्क राहण्याचे आवाहन केले.

रॅलीकडे भाजप नगरसेवकांची पाठ

रॅलीकडे भाजपच्या बहुतांश नगरसेवकांनी रॅलीकडे पाठ फिरवली. भाजपचे नगरसेवक अजित ठाणेकर, विजय खाडे-पाटील आणि शिवसेनेचे नियाज खानही रॅलीत सहभागी झाले होते. काँग्रेसचे नगरसेवक प्रताप देसाई हेही रॅलीत सहभागी होते. माजी नगरसेवक मधुकर रामाणे, माजी उपमहापौर विक्रम जरग, नगरसेविका प्रतिक्षा पाटील यांचे पती धीरज, वृषाली कदम यांचे पती दुर्वास रॅलीत सहभागी झाले होते.

कोल्हापूर टाइम्स टीम

गळ्यात पक्षाच्या चिन्हाचे मफलर, डोक्यावर घड्याळ चिन्हाच्या प्रतिकृतीच्या टोप्या आणि राष्ट्रवादीच्या विजयाच्या घोषणा अशा उत्साही वातावरणात रविवारी सकाळी मोटारसायकल रॅली काढण्यात आली. खासदार धनंजय महाडिक यांच्या प्रचारार्थ राष्ट्रवादीने शहरातील विविध भागातून रॅली काढत त्यांना निवडून देण्याचे आवाहन केले. राष्ट्रवादीचे प्रदेशाध्यक्ष जयंत पाटील, आमदार हसन मुश्रीफ आणि खासदार महाडिकांच्या सहभागाने कार्यकर्त्यांचा आत्मविश्वास दुणावला. विविध भागातून काढलेल्या रॅलीद्वारे 'राष्ट्रवादी पुन्हा'चा नारा घुमला.

प्रचाराच्या समारोपाच्या दिनी राष्ट्रवादीने शहरातून मोटारसायकल रॅली काढून वातावरण निर्मिती केली. मोटारसायकलीला पक्षाचे झेंडे लावून विजयाच्या घोषणा देत कार्यकर्त्यांनी फेरीचा मार्ग दणाणून सोडला. सकाळी सव्वाअकरा वाजण्याच्या सुमारास सासने मैदान येथून रॅली निघाली. प्रदेशाध्यक्ष पाटील, आमदार मुश्रीफ, शहराध्यक्ष आर. के. पोवार, नगरसेवक प्रा. जयंत पाटील, माजी नगरसेवक आदिल फरास, युवा शक्तीचे पृथ्वीराज महाडिक यांच्या प्रमुख उपस्थितीत रॅलीला प्रारंभ झाला. प्रमुख नेते सजविलेल्या जीपमध्ये होते. फेरीच्या अग्रभागी नेते मंडळी, त्यापाठोपाठ तरुण कार्यकर्त्यांचा मोटारसायकलींचा ताफा, पक्षाच्या झिंदाबादच्या घोषणा देत रॅली मार्गस्थ झाली. अर्ध शिवाजी पुतळा येथे खासदार महाडिक रॅलीत सहभागी झाले.

मार्ग दुमदुमला, शहर निघाले ढवळून

सासने मैदान, दाभोळकर कॉर्नर, स्टेशन रोड गोकुळ हॉटेल मार्गे शाहूपुरी, पाच बंगला, राजारामपुरी मुख्य मार्ग, माऊली पुतळा, यादवनगर, गोखले कॉलेज, टेंबे रोड, मिरजकर तिकटी, खरी कार्नर, अर्ध शिवाजी पुतळा, शिवाजी पेठ, ताराबाई रोड, पापाची तिकटी, गंगावेश, जामदार क्लब, बुधवार पेठ, सीपीआर ते दसरा चौक अशी मोटारसायकल रॅली काढली. पक्षाच्या विजयाच्या घोषणा, राष्ट्रवादी पुन्हाचा नारा देत कार्यकर्त्यांनी शहर ढवळून काढले. शहरातील प्रमुख चौकात फटाक्यांची आतषबाजी करण्यात आली. रॅलीमध्ये जयेश कदम, महिला आघाडीच्या जिल्हाध्यक्षा संगीता खाडे, जहिदा मुजावर, बाबा महाडिक, निशिकांत सरनाईक, सुनील देसाई आदीसह कार्यकर्ते मोठ्या संख्येने सहभागी झाले.

आजी-माजी नगरसेवक प्रचारात

माजी महापौर शिवाजीराव कदम, बाजीराव चव्हाण, सुनील कदम, नगरसेवक प्रा. जयंत पाटील, महेश सावंत, मुरलीधर जाधव, संदीप कवाळे, किरण शिराळे, शेखर कुसाळे, ईश्वर परमार, राजाराम गायकवाड, रत्नेश शिरोळकर, स्थायी समितीचे माजी सभापती आदिल फरास, माजी नगरसेवक प्रकाश नाईकनवरे, अजित राऊत, महेश वासुदेव, जालिंदर पोवार, बाबा पार्टे, निलेश देसाई, उत्तम कोराणे, फिरोज सौदागर, परिवहनचे स्वीकृत सदस्य चंद्रकांत सुर्यवंशी यांचा रॅलीत समावेश होता.

महाडिकांच्या विजयासाठी जिवाचे रान करा

मोटार सायकल रॅलीची दसरा चौकात सांगता झाली. याप्रसंगी आमदार मुश्रीफ यांनी कार्यकर्त्यांना मार्गदर्शन केले. मुश्रीफ म्हणाले, 'राष्ट्रहितासाठी काँग्रेस, राष्ट्रवादी आघाडी सत्तेवर येणे गरजेचे आहे. गेल्या पाच वर्षात खासदार महाडिकांनी उत्कृष्ट कार्य केले आहे. त्यांना पुन्हा निवडून देण्यासाठी कार्यकर्त्यांनी जीवाचे रान करावे. दोन दिवसांत कार्यकर्त्यांनी प्रत्येक गल्लीत, प्रभागात जाऊन मतदारांच्या गाठीभेटी घ्याव्यात. जिल्ह्यात ७५ टक्क्यांहून अधिक मतदान झाले पाहिजे. महाडिकांना पुन्हा निवडून देऊ. ते जिल्ह्याचे नाव उज्ज्वल करतील. '

राष्ट्रवादी काँग्रेस आघाडी व शिवसेना भाजप युतीच्या पदयात्रेची सांगता दसरा चौकात झाली. राष्ट्रवादी आघाडीच्या रॅलीचा समारोप दुपारी एक वाजण्याच्या सुमारास झाला. आमदार मुश्रीफ यांचे भाषण सुरू असतानाच, युतीची पदयात्रा दसरा चौकात दाखल झाली. राष्ट्रवादीच्या नेत्यांनी भाषण आटोपून कार्यकर्त्यांना शांततेने परतण्याचे आवाहन केले. राष्ट्रवादीचे कार्यकर्ते परतत असताना युतीचे कार्यकर्ते चौकात दाखल होत होते. यावेळी युती व आघाडीच्या काही कार्यकर्त्यांनी पक्ष व उमेदवाराच्या घोषणा दिल्या. काही मिनिटाच्या या प्रकाराने राजकारणातील ईर्षा व कार्यकर्त्यातील खुन्नस याचे दर्शन चौकात घडले. काही अतिउत्साही कार्यकर्त्यांनी एकमेकांकडे पाहत शेरेबाजी करण्याचा प्रकारही घडला.

कोल्हापूर टाइम्स टीम

राजोपाध्येनगर हरिप्रिया कॉलनीतील बंद असलेल्या दोन घरांच्या दरवाजाचे कुलूप तोडून चोरट्यांनी सोन्या-चांदीच्या दागिन्यांसह एक लाख रुपयांचा मुद्देमाल लंपास केल्याचा प्रकार शनिवारी उघडकीस आला. याप्रकरणी अमित बाळासाहेब चव्हाण (वय ३९) यांनी फिर्याद नोंदवली आहे.

पोलिसांनी सांगितले की, अमित बाळासाहेब चव्हाण हरिप्रिया नगरात औदुंबर गोरे यांच्या घरी भाड्याने राहतात. ते महापालिकेमध्ये लिपिक म्हणून सेवेत आहेत. १९ एप्रिलला रात्री दहाच्या सुमारास ते येळवण जुगाई (ता. शाहुवाडी) येथे कुटूंबासह देवदर्शनासाठी गेले होते. २० एप्रिलला सकाळी घरी आले असता दरवाजाचे कुलूप तुटलेले दिसले. त्यांनी बेडरुममध्ये जाऊन पाहिले असता कपाटातील सोन्या-चांदीचे दागिने चोरीला गेलेचे निदर्शनास आले. चव्हाण यांच्या घराशेजारीच दीपक दगडू कांबळे यांचे घर आहे. कांबळे हे वरच्या मजल्यावर झोपले होते. खाली दोन खोल्यांच्या दरवाजांना कुलूप लावले होते. चोरट्यांनी या घराचेही कुलूप तोडून मुद्देमाल लंपास केला. दोन्ही घरातून सोन्याची अंगठी, नाणे, टॉप्स, चांदीची भांडी, ताट, वाटी, करंडा, पंचपाळ, पणत्या असा सुमारे एक लाख रुपयांचा मुद्देमाल लंपास केला. या प्रकरणी चव्हाण यांनी जुना राजवाडा पोलीस ठाण्यात फिर्याद दिली.

फोटो आहे.

कोल्हापूर

पंचाचार्य होमिओपॅथीक वैद्यकीय महाविद्यालयमध्ये जागतिक होमिओपॅथिक दिन साजरा झाला. होमिओपॅथीचे जनक डॉ. सॅम्युअल हनिमान यांची २६४ वी जयंती साजरी करण्यात आली. यानिमित्ताने संस्थेतर्फे रुक्मिणीनगरमधील संजीवनी रुग्णालयात मोफत सर्वरोग निदान, औषधोपचार शिबिर झाले.

महाराष्ट्र कौन्सिल ऑफ होमिओपॅथीचे अध्यक्ष प्राचार्य डॉ. राजकुमार पाटील यांच्या हस्ते डॉ. हनिमान यांच्या प्रतिमेचे पूजन झाले. याप्रसंगी डॉ. संतोष रानडे यांचे 'जगभरातील होमिओपॅथी चिकित्सा प्रणालीची सद्यस्थिती' या विषयावर व्याख्यान झाले. तर डॉ. रवीकुमार जाधव यांनी 'राजर्षी शाहू महाराज व होमिओपॅथी' व डॉ. शुभांगी जोशी यांनी सात्विक आहाराविषयी मार्गदर्शन केले. दिवसभर चाललेल्या शिबिरात डॉ. एम. आर. कुलकर्णी, डॉ. हिम्मत पाटील, सुहास पाटील, मिलिंद गायकवाड, दीपाली पाटील, सुनेत्रा शिराळे, गीतांजली कोरे, वर्षा पाटील, रुपाली पाटील यांनी रुग्णांची तपासणी केली. वंदना पोवार व फरजाना मुकादम यांनी रक्ततपासणी केली.

.. ..

म. टा. वृत्तसेवा, जयसिंगपूर

शिवसेना-भाजपा व मित्र पक्ष महायुतीचे हातकणंगले लोकसभा मतदार संघातील उमेदवार धैर्यशील माने यांच्या प्रचाराची सांगता शिरोळ तालुक्यात ठिकठिकाणी मोटारसायकल रॅलीने करण्यात आली. गणेशवाडी येथून रॅलीची सुरुवात झाली. यावेळी कार्यकर्त्यांनी दिलेल्या घोषणांनी परिसर दणाणला.

सकाळी गणेशवाडी येथील गणेश मंदिरात दर्शन घेवून रॅलीस प्रारंभ झाला. शेडशाळ, कवठेगुलंद, आलास, बुबनाळ, औरवाड, नृसिंहवाडी, कुरुंदवाड, शिरोळसह अन्य गावातून रॅली काढण्यात आली. या रॅलीत उमेदवार धैर्यशील माने, जि. प. सदस्य राजवर्धन नाईक-निंबाळकर, आमदार उल्हास पाटील, उदय डांगे, पृथ्वीराज यादव, अभिजित जगदाळे यांच्यासह कार्यकर्ते सहभागी झाले होते. भगवे स्कार्प तसेच धैर्यशील माने यांचे चिन्ह असणारे ध्वज हातात घेवून सहभागी झालेल्या कार्यकर्त्यांनी माने यांना विजयी करण्याचे आवाहन केले. तालुक्यात शिवसेना-भाजपा व मित्र पक्षाच्यावतीने ठिकठिकाणी पदयात्रा काढण्यात आली. तर शिरोळ येथील शिवाजी चौकात कार्यकर्त्यांनी दिलेल्या घोषणांनी परिसर दणाणला. जयसिंगपूर येथे या रॅलीची सांगता करण्यात आली.

कॅरी केचर : चंद्रकांत पाटील, धनंजय महाडिक, संजय मंडलिक, राजू शेट्टी

०००

मराठी मुलखात : दक्षिण महाराष्ट्र : विजय जाधव

०००

मतदाराचीच सत्त्वपरीक्षा !

०००

दक्षिण महाराष्ट्राच्या संधिसाधू राजकारणाची समीकरणे या निवडणुकीत बदलतील की, या सोयीच्या राजकारणाला बळ मिळेल, याचा निकाल लावणारी ही निवडणूक आहे. या राजकारणाचा केंद्रबिंदू असलेले कोल्हापूर राष्ट्रीय राजकारणावर आपला कौल देणार की स्थानिक गटा-तटांना डोक्यावर घेणार हेही स्पष्ट होईल. अपेक्षेप्रमाणे विकासाची चर्चा प्रचारातून गायब केली गेली. किरकोळ अपवाद वगळता काय झाले, काय राहिले, का राहिले याचा हिशेब अपूर्णच राहिला!

…………………०००००

लोकसभा निवडणुकीत सत्ताधारी भाजप-शिवसेना, विरोधी काँग्रेस-राष्ट्रवादी आघाडी, तिसरा पर्याय म्हणून समोर आणली गेलेली वंचित बहुजन आघाडी, शेतकऱ्यांचा स्वाभिमानी पक्ष या प्रमुख राजकीय पक्षांबरोबरच राष्ट्रवादी काँग्रेसचे नेते शरद पवार, भाजपचे ज्येष्ठ नेते चंद्रकांत पाटील, दक्षिण महाराष्ट्राच्या बळावर सत्ता काबीज करणारे शिवसेना नेते उद्धव ठाकरे, काँग्रेसमध्ये राहून बंडाचा झेंडा हाती घेणारे आमदार सतेज पाटील, काँग्रेस-राष्ट्रवादी आघाडीत सहभागी झालेले खासदार राजू शेट्टी, भाजपसोबत राजकारणाचा नवा डाव मांडणारे राज्यमंत्री सदाभाऊ खोत या नेत्यांचीही कसोटी लागली आहे. ही निवडणूक आगामी विधानसभा निवडणुकीची गणिते तर ठरवेलच, पण काही महत्त्वाकांक्षी नेत्यांचे स्थान भक्कम करताना काही नेत्यांना त्यांच्या राजकारणाची फेरमांडणी करायला भाग पाडेल, गटा-तटांचा राजकीय संघर्ष आणखी तीव्र करणारी ठरेल. कोल्हापूर शहर केंद्रस्थानी ठेवून परिसरातील चार जिल्ह्यांचा विकास करण्याची गरज अधोरेखित होईल इतके स्पष्ट लोकप्रबोधन या निवडणूक प्रचाराच्या रणधुमाळीने गेले महिनाभर केले.

कोल्हापूर लोकसभा मतदारसंघात राष्ट्रवादी आणि काँग्रेस आघाडीचे खासदार धनंजय महाडिक आणि शिवसेना-भाजप महायुतीचे प्रा. संजय मंडलिक यांच्यात, हातकणंगले मतदारसंघात स्वाभिमानी शेतकरी संघटनेचे खासदार राजू शेट्टी आणि शिवसेना-भाजपा महायुतीचे धैर्यशील माने, सांगलीत भाजप-शिवसेना महायुतीचे खासदार संजय पाटील, स्वाभिमानीचे काँग्रेसपुरस्कृत विशाल पाटील, शेवटच्या क्षणी वंचित बहुजन आघाडीच्या हाती लागलेले भाजपचे बंडखोर गोपीचंद पडळकर यांच्यात ही चुरशीची, अत्यंत अटीतटीची निवडणूक होत आहे. या तिन्ही मतदारसंघांचे वैशिष्ट्य म्हणजे आधी एकतर्फी वाटणारी ही निवडणूक सामान्य जनतेनेच विशेषत: ग्रामीण मतदारांनी हातात घेतली आहे. तिन्ही ठिकाणी गेली पाच वर्षे विरोधक गप्प होते, ते जनतेच्या दबावामुळे निवडणुकीच्या तोंडावर सक्रिय झाले. त्यांनी आव्हान उभे केले आणि विद्यमान तिन्ही खासदारांना मैदानात उतरायला भाग पाडले. सांगलीत भाजप, वंचित आघाडी आणि काँग्रेसला एकाचवेळी खेळवणारे गोपीचंद पडळकर, शिवसेनेच्या आयतेच हाती लागलेले आणि मोठी संधी असतानाही शेवटच्या वर्षभरात मतदारसंघातील पंचगंगा प्रदूषणासारखे काही प्रश्न हाती घेऊन शेट्टींच्या विरोधात उभे ठाकलेले शिवसेनेचे धैर्यशील माने, गेल्या वर्षापासून तयारीला लागलेले राष्ट्रवादीतील अंतर्गत राजकारण त्याचबरोबर महाडिक-आमदार सतेज पाटील यांच्यातील संघर्षावर स्वार होत चमकलेले शिवसेनेचे संजय मंडलिक हे तीन मतदारसंघांतील तिघेही उमेदवार विद्यमान खासदारांना दमदार आव्हान देत आहेत.

या तिन्ही मतदारसंघांच्या केंद्रस्थानी भाजप नेते चंद्रकांत पाटील आहेत. केंद्रातील मोदी सरकारसाठी आजच्या घडीला एक अन् एक जागा महत्त्वाची आहे. महाराष्ट्रात काँग्रेस-आघाडीचे आव्हान परतवून लावण्यासाठी भाजपने उभ्या केलेल्या फळीत मंत्री पाटील एक महत्त्वाची आघाडी सांभाळत आहेत. सातारा, सांगली, कोल्हापूर, हातकणंगलेसह राष्ट्रवादीच्या ताब्यातील माढा, बारामती, सातारा, कोल्हापूर या चार जागांवर दांडपट्टा चालविण्याची जबाबदारी पक्षाने त्यांच्यावर टाकली आहे. यामुळेच राष्ट्रवादीचे नेते शरद पवार यांना सतत टीकेचे लक्ष्य करण्याबरोबरच राष्ट्रवादीला रोखण्याचा एककलमी अजेंडा ते राबवत आहेत. शेवटच्या चार दिवसांत ते कोल्हापुरात थेट सक्रिय झाले आहेत. कोणत्याही परिस्थितीत 'गोकुळ' मल्टिस्टेट होऊ देणार नाही, असे सांगत निवडणुकीआधी गेली दोन वर्षे रंगलेल्या पडद्याआडच्या राजकारणाचा पट त्यांनी उशिरा का असेना उलगडला आहे, त्यातच माजी आमदार महादेवराव महाडिक यांच्यावर टीका करून मुद्द्याला हात घातला आहे. महाडिक कदाचित शिवसेनेचे उमेदवार असते आणि मंडलिक राष्ट्रवादीचे, या जर-तरच्या विषयाला आज कोणताच अर्थ नसला तरी त्यांनी 'पोटातले ओठावर' आणल्याने नवी चर्चा मात्र झडते आहे!

या परिस्थितीत मोठे आव्हान आहे ते खासदार महाडिक यांच्यासमोर. एकीकडे महाडिक गटाचे राजकारण भक्कम होत असताना कोणत्या ना कोणत्या कारणाने ते दुसऱ्या बाजूने पोखरले जात होते, हेही स्पष्ट झाले आहे. केवळ मेरिटवर निवडणूक रेटता येत नाही, हा संदेश महाडिक यांना मिळाल्याने शेवटच्या टप्प्यात त्यांनी प्रचारयंत्रणेला गती दिली. मोदी लाटेत आणि अंतर्गत विरोध असतानाही विजयी झालेल्या खासदार महाडिक यांना यावेळी जिल्ह्याच्या आणि 'गोकुळ'च्या राजकारणातून विरोध सुरू आहे. 'पुढील वीस वर्षे मीच या मतदारसंघाचा खासदार असेन,' असे गेल्या निवडणुकीतील विजयानंतर सांगणाऱ्या महाडिक यांचा आत्मविश्वास यावेळी पणाला लागला आहे. संसदेतील कामगिरी, कोल्हापूरकरांना दिलेली आश्वासने, अर्धवट स्थितीत असलेली विकासकामे, आपला गट, युवा शक्ती, भागीरथी महिला मंच, घरचे आमदार आणि काँग्रेस-राष्ट्रवादीचा मेळ घालून मैदानात उतरलेल्या महाडिक यांना मतदार कितपत साथ देतो, हे स्पष्ट होईलच. मात्र, महाडिक गटाचे राजकारणही निर्णायक टप्प्यावर येऊन पोहोचले आहे. भाजप नेते चंद्रकांत पाटील यांनीही महाडिक यांच्याविरोधात उघड भूमिका घेतल्याने यापुढे भाजप, ताराराणी आघाडीचे राजकारण कोणते वळण घेणार, महादेवराव महाडिक यांचे या बदलत्या राजकारणात काय स्थान राहणार, कोल्हापूर दक्षिण, जिल्हा परिषदेत काय उलथापालथ होणार, सतेज-महाडिक संघर्ष कोठे थांबणार, हे पाहावे लागेल. अर्थात सारेच नेते भक्कम आणि समर्थ असल्याने हा राजकीय पटलावरील नेत्यांचा थयथयाट येत्या काळात आणखी वेग घेईल, असेच चित्र आहे!

दक्षिण महाराष्ट्राचे राजकारण या निवडणुकीत काँग्रेस-राष्ट्रवादी, भाजप-शिवसेना यांचे भवितव्य ठरवेलच, शिवाय स्वाभिमानी शेतकरी संघटनेच्या आगामी राजकारणाची दिशा ठरवताना वसंतदादा गट, महाडिक, मंडलिक, सतेज आणि माने गटाची सत्त्वपरीक्षाही घेईल! ही निवडणूक सामान्य माणसाचे मूळ प्रश्न, लोकसंख्येने फुगत चाललेली शहरे, वेगाने होणारे नागरीकरण, शिक्षण, आरोग्य, शेती, शेतकरी, कष्टकरी, शेतमजूर, कामगार, बेरोजगार, तरुण यांच्या मूळ प्रश्नांपासून कोसो दूर राहिली. जाती-धर्माच्या जाणिवा अधिक घट्ट झाल्या. आरोप-प्रत्यारोपांची पातळी नको इतकी घसरली हे वास्तव कसे आणि कोण नाकारणार? निवडणूक जनतेच्या हाती कधीच गेली आहे, जिल्ह्याचे राजकारण कोणाच्या हाती द्यायचे हे सुजाण मतदार ठरवेल. पंतप्रधान नरेंद्र मोदी, काँग्रेसचे नेते राहुल गांधी, मोदींविरोधात उभे राहणारे आघाडीचे राजकारण, राज्यातील भाजप-शिवसेना युतीचे सरकार, शिवसेना नेते उद्धव ठाकरे यांचा यू-टर्न, हिंदुत्व, मनसे नेते राज ठाकरे यांची घणाघाती भाषणबाजी, शरद पवार यांची राष्ट्रवादीचे राजकारण सावरण्याची एकाकी धडपड, अनेक वाचाळांनी निवडणुकीत आणलेली रंगत, केलेला विखारी प्रचार आणि दुसरीकडे विकासाचे तीव्र होत जाणारे प्रश्न याकडे हा सामान्य मतदार एकाचवेळी आशेने पाहतो आहे. यातून तो काय बेस्ट निवडतो, ते अधिक महत्त्वाचे!

००००००

म. टा. प्रतिनिधी, कोल्हापूर

गेल्या महिनाभरापासून आरापे प्रत्यारोपांच्या फैरी झडून निवडणुकीच्या अंतिम टप्प्यात 'गोकुळ मल्टिस्टेट'चा प्रश्न केंद्रबिंदू ठरू लागला आहे. या मुद्दावर विरोधकांचा 'सर्जिकल स्ट्राईक' करण्यासाठी भाजप शिवसेना युतीने कंबर कसली आहे.

जिल्ह्यातील राजकारणात महाडिक गटाची ताकद कमी करण्यासाठी सतेज पाटील यांच्यासह विरोधकांनी 'गोकुळ'वर लक्ष केंद्रित केले आहे. २०१८ च्या ऑगस्ट महिन्यात जिल्हा सहकारी दूध उत्पादक संघाच्या (गोकुळ) संचालक मंडळाच्या बैठकीत दूध संघ 'मल्टिस्टेट' करण्याचा प्रस्ताव मंजूर करण्यात आला. मल्टिस्टेटच्या प्रस्तावाला आमदार सतेज पाटील, हसन मुश्रीफ, चंद्रदीप नरके यांच्यासह माजी आमदार संपतराव पवार यांनी विरोध केला. ३० सप्टेंबर झालेल्या सर्वसाधारण सभेत गोकुळच्या इतिहासात प्रथमच राडा झाला. सत्ताधारी व विरोधकांनी चप्पलफेक केली. गोंधळात हा ठराव मंजूर झाला. महाडिक कुटुंब गोकुळ स्वत:च्या ताब्यात घेण्यासाठी दूध संघ मल्टिस्टेट करत आहे, हा विरोधकांचा प्रचार जिल्हात पसरला.

मल्टिस्टेट प्रस्तावाला विरोध करण्यासाठी विरोधकांकडून कायदेशीर प्रक्रिया राबवली जात आहे. तर दुसरीकडे गोकुळ प्रशासनाने केंद्र सरकारकडे मल्टिस्टेटचा प्रस्ताव मंजुरीसाठी पाठवला आहे. केंद्र सरकारच्या मंजुरीबरोबर महाराष्ट्र व कर्नाटक या दोन्ही राज्यांची मंजुरी आवश्यक आहे. माजी आमदार महादेवराव महाडिक यांचे चिरंजीव आमदार अमल महाडिक हे भाजपचे असल्याने या प्रस्तावाला राज्य सरकारकडून ना हरकत दाखला मिळण्याचा दावा केला जात होता. ही प्रक्रिया सुरू असताना लोकसभा निवडणुकीचा कार्यक्रम जाहीर झाल्याने गोकुळ मल्टिस्टेटचा प्रश्न मागे पडला होता.

राष्ट्रवादीचे खासदार धनंजय महाडिक आणि शिवसेना भाजप उमेदवार प्रा. संजय मंडलिक यांच्या प्रचारात केंद्र व राज्य सरकारच्या कल्याणकारी योजनांचा प्रचार होईल, असे वाटप असताना आमदार सतेज पाटील यांनी थेट खासदार महाडिक यांच्या विरोधात भूमिका घेतली. 'आमचं ठरलंय' या टॅगलाईनखाली प्रचार सुरू झाला. पाटील यांचे काँग्रेस समर्थक थेट भाजप शिवसेनेच्या व्यासपीठावर गेले. आमदार पाटील यांच्या प्रचाराला राष्ट्रवादीचे खासदार शरद पवार यांनी 'मी बी ध्यानात ठेवलंय' असे म्हणत इशारा दिला. पण पाटील यांच्या कार्यकर्त्यांकडून 'बाण सुटलाय तर्राट' अशी भूमिका घेत महायुतीचा प्रचार सुरू ठेवला आहे. ग्रामीण भागात प्रा. मंडलिकांनी मल्टिस्टेट मुद्दा प्रचारात कायम ठेवला. पण प्रचाराला शेवटच्या टप्प्यात खऱ्या अर्थाने गोकुळ मल्टिस्टेटच्या च्या प्रश्नाला जोरदार उकळी आली. पालकमंत्री चंद्रकांत पाटील यांनी 'गोकुळमध्ये महाडिकांचा जीव अडकला असून मल्टिस्टेटला राज्य सरकारने परवानगी देणार नाही', अशी घोषणा करत महाडिक गटावर बॉम्ब टाकला. निवडणुकीच्या अंतिम टप्प्यात पाटील यांनी अचून टायमिंग साधत लगावलेल्या मास्टर स्ट्रोकमुळे ग्रामीण भागातील मतदारांवर प्रभाव पडण्याची शक्यता व्यक्त केली जात आहे. सत्ताधारी भाजप शिवसेना युतीनेही हा मुद्दा शेवटच्या टप्प्यात आणल्याने मतदार 'घड्याळ्या'चे काटे उलटे फिरवणार की 'धनुष्य बाणा'ने अचूक वेध साधणार हे निकालादिवशी स्पष्ट होणार आहे.

सोशल मीडियावर कलगी तुरा

गोकुळ मल्टिस्टेट होऊ देणार नाही आणि महाडिकांचा जीव गोकुळमध्ये अडकलाय हे पालकमंत्री चंद्रकांत पाटील यांचे भाषण सोशल मीडियावर चांगलेच व्हायरल झाले आहे. ग्रामीण भागात या भाषणाला चांगला प्रतिसाद मिळत असून राष्ट्रवादी आणि शिवसेना भाजप कार्यकर्त्यांमध्ये सोशल मीडियात जोरात कलगी तुरा सुरू झाला आहे. मल्टिस्टेटला पालकमंत्र्यांनी थेट विरोध केल्याने दूध उत्पादक शेतकरी व ग्रामीण भागातील मतदारांकडून कसा कौल मिळणार याकडे युतीचे लक्ष लागले आहे.

म. टा. प्रतिनिधी, कोल्हापूर

मतदारांनी कोणत्याही प्रलोभनास बळी न पडता मताच्या अधिकाराचा योग्य वापर करावा. धार्मिक, भाषिक, प्रादेशिक, संकुचित व भावनिक आवाहनाच्या आहारी जाऊ नये. उमेदवाराने व त्यांच्या राजकीय पक्षाने केलेल्या व करू शकणाऱ्या कामांचा लेखाजोखा घ्यावा. आपल्या सद्सदविवेकबुद्धीनुसार उमेदवाराची निवड करावी. लोकशाही वाचविण्यासाठी प्रत्येकाने मतदान करणे आवश्यक आहे,' असे मत राष्ट्रीय सेवा समितीचे राष्ट्रीय अध्यक्ष फारुक एम. कुरेशी यांनी व्यक्त केले.

राष्ट्रीय सेवा समिती, मुस्लिम पंचायत व स्वातंत्र्य सैनिकांच्या सहभागाने आयोजित मतदार प्रबोधन अभियानतंर्गत येथील तिरंगा महल येथे कार्यक्रमाचे आयोजन केले होते. याप्रसंगी प्राचार्य डॉ. आय. एच. पठाण, प्रा. डॉ. आय.जे. नमाजी यांनी मार्गदर्शन केले. सिकंदर हजारी यांनी आभार मानले.

मराठी मुलखात : दक्षिण महाराष्ट्र

- विजय जाधव

०००००

सरळ लढती, तिरकस राजकारण!

०००००

ही निवडणूक भाजपचे ज्येष्ठ नेते चंद्रकांत पाटील यांच्यासाठी निर्णायक असेल. सांगली, सोलापूर राखण्याबरोबरच कोल्हापूर, सातारा, हातकणंगले, माढ्यात झुंजावे लागेल. राष्ट्रवादीसमोरसुद्धा हे आक्रमण परतवून लावण्याचे आव्हान आहे. सातारा, कोल्हापूरची जागा राखण्यासाठी पक्षाची कसोटी लागणार आहे. भाजप-सेना युती आणि काँग्रेस-राष्ट्रवादी आघाडी यांच्यात सरळ सामना रंगणार आहे. अपेक्षेप्रमाणे सांगलीत कॉंग्रेसला मोठा धक्का बसला!

०००००

लोकसभा निवडणुकीचा बिगुल वाजल्यापासून दक्षिण महाराष्ट्रात तब्बल त्रेचाळीस दिवसांचा अवधी मिळाल्याने पक्ष, उमेदवारांना ऐनवेळच्या रणनीतीला चांगलाच वेळ मिळाला. निवडणुकीचे मैदान स्पष्ट होत आहे. राष्ट्रवादी, शिवसेना आणि भाजपने याचा फायदा उठवत, चाचपणी करत अखेर उमेदवार जाहीर केले. अपवाद काँग्रेसचा आणि सांगली लोकसभा मतदारसंघाचा. विरोधी काँग्रेस आघाडीपेक्षा खरी परीक्षा होती ती सत्ताधारी भाजप आघाडीचीच. केंद्रीय राजकारणाचे आणि त्यासाठीच्या नियोजनाचा भाग म्हणून सत्ताधारी आघाडीने 'जर-तर'च्या परिस्थितीला तोंड देण्याची तयारीही ठेवली. यामुळेच युतीच्या जागावाटपात शिवसेनेच्या वाट्याला आलेल्या जागांवर शिवसेनेचे उमेदवार निवडून आणण्याची जबाबदारीही भाजपने घेतली. भाजपचे ज्येष्ठ नेते चंद्रकांत पाटील यांनी ती स्वीकारली आहे. यापैकी किती नव्या जागा घेणार आणि पक्षाला बळ पुरवणार, यावरच त्यांची राजकीय ताकद दिसून येणार असल्याने ते पहिल्या दिवसापासूनच कामाला लागले आहेत. निवडणूक यंत्रणा कामाला लावण्यात त्यांनी बरेच अंतर पार केले.

शरद पवार यांच्या शब्दाखातर राष्ट्रवादीचे खासदार धनंजय महाडिक अखेर पक्षातच राहिले. मुख्यमंत्री देवेंद्र फडणवीस यांचे भाजपात येण्याचे निमंत्रणही त्यांनी नाकारले. त्यांच्या निर्णयाकडे डोळे लावून बसलेल्या भाजपला अखेरच्या क्षणी सेनेच्या उमेदवारासाठी प्रचार करण्याची वेळ आली. महाडिक आमचे उमेदवार असतील, असे सूचित करणाऱ्या चंद्रकांत पाटील यांना महाडिक यांनी अखेर राष्ट्रवादीतच राहण्याचा निर्णय घेतल्याने अडचणीचे झाले. राष्ट्रीय स्वयंसेवक संघाच्या मुशीत तयार झालेल्या चंद्रकांत पाटील यांनी दक्ष राहत सर्व शक्यता गृहित धरून नियोजन केले. युतीची घोषणा झाल्याबरोबर लगेचच त्यांनी प्रचाराची सूत्रे हालवायला सुरुवात केली. महाडिक मित्र असले तरी मैत्रीपेक्षा युतीधर्म महत्त्वाचा असल्याचे त्यांनी स्पष्ट केले आहे. फार मोठे सैन्य नसतानाही माहीतगार उमेदवार, सेनेचा काही भागावर असलेला प्रभाव आणि राष्ट्रवादीतील अंतर्गत संघर्षाचा नेमका राजकीय लाभ उठवत त्यांनी मोर्चेबांधणी केली. काँग्रेसचे आमदार सतेज पाटील यांनीही पहिल्या दिवसापासूनच महाडिकांविरोधात काम सुरू केल्याने सेनेचे उमेदवार संजय मंडलिक यांच्यासाठी तयार राजकीय पार्श्वभूमी मिळाली.

सतेज पाटील गट आक्रमक

काँग्रेस-राष्ट्रवादी आघाडीच्या निर्णयाला सुरुंग लावत काँग्रेसचे आमदार सतेज पाटील यांनी खासदार महाडिक यांच्याविरोधात बंडाचे निषाण खांद्यावर घेतले. पाडापाडीच्या राजकारणाचा जुना राग मनात धरून त्यांनी यावेळी पक्ष खुंटीला टांगून उघड भूमिका घेतली. पक्षाच्या पातळीवर सुटका करून घेण्यासाठी सातारा, सांगलीची जबाबदारी घेतली असली तरी ते काय करत आहेत, हे लपून राहिलेले नाही. आघाडीच्या कोल्हापूरच्या बैठकीत त्यांची अनुपस्थिती जाणवणारी होती. डॉ. डी. वाय. पाटील यांना राष्ट्रवादीत आणण्याचे राजकारण झाले असले तरी त्यातून फारसे काही साध्य झाल्याचे दिसत नाही. सतेज पाटील यांनी आधीच विरोधाचा पवित्रा घेतल्याने आता पुढे काय, हा प्रश्न उरला नाही. सतेज पाटील यांच्या या नव्या भूमिकेने आघाडीचे नेते मात्र चिंतेत आहेत. त्यांची ही भूमिका सतेज यांना आगामी राजकारणासाठी अडचणीची ठरू शकेल, असे राष्ट्रवादीचे प्रदेशाध्यक्ष जयंत पाटील यांनी म्हटले आहे; पण ते आता कोणाचे ऐकण्याच्या मन:स्थितीत नसावेत!

अजून बराच मोठा टप्पा असला तरी निवडणुकीचे राजकारण हळूहळू तापू लागले आहे. यात 'गोकुळ'चा मल्टिस्टेटचा विषय चर्चेत आला आहे. खुपिरेच्या सभेत ज्येष्ठ नेते महादेवराव महाडिक यांनी या निवडणुकीत धनंजय पडले तर खुपिऱ्याचे राजकारण तर संपेलच; पण महाडिक आणि गोकुळचे राजकारणही संपेल, असा निर्वाणीचा सूर काढत कार्यकर्त्यांना गाफील न राहण्याचा सल्ला दिला आहे. गोकुळच्या मल्टिस्टेट प्रकरणात झालेल्या सभेच्या राजकारणाचीही उजळणी घेतली आहे. त्यावेळी मल्टिस्टेटला विरोध करणाऱ्यांची फळी सांभाळणारे सेनेचे आमदार चंद्रदीप नरके यांना विधानसभेला पाडण्याचा विडाही त्यांनी उचलला आहे. यामुळे महाडिकविरोधी राजकारण आणखी टोकदार झाले आहे. यातून महाडिकसमर्थकांना स्थानिक पातळीवर बळ मिळाले असले तरी ही निवडणूक गोकुळची, विधानसभेची की लोकसभेची, असा प्रश्न विचारला जात आहे, तो रास्तच!

मोठा बॉम्ब कुठला?

यापूर्वी राजकीय चमत्काराची भाषा करणारे भाजपचे ज्येष्ठ नेते चंद्रकांत पाटील यांनी यावेळी मोठा बॉम्ब फोडण्याचे सूतोवाच केले आहे. डॉ सुजय विखे-पाटील, डॉ. भारती पवार, रणजितसिंह मोहिते-पाटील, रणजितसिंह नाईक-निंबाळकर यांच्यानंतर राज्यात आणखी कोण गळाला लागले? हे स्पष्ट झाले नसले तरी आता मोठा बॉम्ब कोणता, हे लवकरच स्पष्ट होईल. सांगलीतून भाजपने विद्यमान खासदार संजय पाटील यांनाच उमेदवारी दिली. अंतर्गत धुसफूस आणि काँग्रेसमधील बेदिली लक्षात घेता उमेदवार बदलाची शक्यता व्यक्त होत होती. मात्र, तो धोका न पत्करता पक्षाने संजय पाटील यांच्यावरच विश्वास दाखविला. ही जागा परत मिळविण्याचे आव्हान चंद्रकांत पाटील यांच्यासमोर असेल.

खासदार महाडिक यांनी मंडलिक हेच विरोधी उमेदवार असणार हे गृहित धरून मोर्चेबांधणी केली असली तरी सतेज पाटील यांचा विरोध, भाजप-सेना युतीचा समोर असणारा उमेदवार यामुळे त्यांच्यासमोरचे आव्हान वाढले आहे. निवडणूक एकतर्फी होणार असे तयार झालेले दोन महिन्यांपूर्वीचे चित्र पालटले आहे. काँग्रेस-राष्ट्रवादी आघाडीत स्वाभिमानीचे खासदार राजू शेट्टी सहभागी झाले आहेत. त्यांचा जिल्ह्याच्या ग्रामीण भागात चांगलाच प्रभाव आहे. यामुळे ते प्रचारात किती ताकदीने उतरतात, माजी आमदार महादेवराव महाडिक 'गोकुळ'वरून कोणता पवित्रा घेतात, 'भागिरथी'च्या महिला घरच्या राजकारणात आपल्या मताचा कसा वापर करतात, विकासाच्या स्थानिक प्रश्नांची चर्चा कशी होते, यावरच निवडणुकीचे वातावरण तापणार आहे. आरोप-प्रत्यारोपांचा धुरळा उडेलच, लढती सरळ असल्या तरी राजकारण तिरकस आहे!

\Bविशेष :\B भाजप-शिवसेना महायुतीने कोल्हापुरातून निवडणूक प्रचाराची दणक्यात सुरुवात केली. सभेस झालेल्या गर्दीने महायुतीला बाळसे आले असले तरी ती मतांमध्ये परावर्तित करण्याचे आव्हान उमेदवारांसमोर आहे. सांगलीत काँग्रेसच्या पोकळ बालेकिल्ल्यालाही दिवंगत वसंतदादांचे नातू प्रतीक पाटील यांनी सर्व पदांचे राजीनामे देत हादरा दिला आहे. काँग्रेसच्या विसंवादी आणि पराभूत मानसिकतेच्या राजकारणाचे ते फलित म्हणावे लागेल!

०००००००

म. टा. प्रतिनिधी, कोल्हापूर

दख्खनचा राजा जोतिबाच्या चैत्र पौर्णिमा यात्रेसाठी लाखोंच्या संख्येने आलेल्या यात्रेकरूंनी पाकाळणीनंतर अंबाबाईच्या दर्शनासाठी रविवारी कोल्हापुरात गर्दी केली. जोतिबा डोंगरावर गुलाल उधळून हजारो भाविक रविवारी अंबाबाईचे दर्शन घेत परतीच्या प्रवासाला लागले. रविवारची सुट्टी असल्याने पर्यटकांचा ओघ असतानाच जोतिबा भक्तांच्या गर्दीनेही अंबाबाई मंदिर परिसर गजबजून गेला.

चैत्र महिन्यातील पौर्णिमेला दरवर्षी जोतिबाची मोठी यात्रा भरते. यंदाची यात्रा १९ एप्रिलला होती. मुख्य यात्रेनंतर दुसऱ्यादिवशी अंबाबाईचा रथोत्सव सोहळा साजरा केला जातो. यानिमित्ताने दोन दिवस भाविकांचा जोतिबा डोंगर व अंबाबाई मंदिरात ओघ असतो. रविवारी सकाळपासूनच जोतिबाची पाकळणी साजरी करून भाविकांचे जथ्थे कोल्हापुरात दाखल व्हायला सुरुवात झाली. सासनकाठीसह येणाऱ्या भाविकांनी अंबाबाईचे दर्शन घेतले. शिवाजी पूल ते दसरा चौकापर्यंत बस, एसटीने आलेल्या भाविकांनी भाऊसिंगजी रोडमार्गे अंबाबाई मंदिरात गर्दी केली. यामुळे रविवारी गुलालाने माखलेल्या जोतिबाभक्तांच्या गर्दीने अंबाबाई मंदिर परिसर फुलून गेला. महालक्ष्मी भक्त मंडळाच्यावतीने जोतिबा भक्तांसाठी मोफत झुणका-भाकर वाटप केले. तसेच शाहू ट्रस्टतर्फे यात्रेकरूंना मसाले भात वाटप करण्यात आले.

म. टा. प्रतिनिधी, कोल्हापूर

राज्य पातळीवरील नेत्यांच्या जंगी सभा, अभिनेत्यांच्या कोपरा सभा, गल्ली बोळात आणि गावागावात निघालेल्या प्रचार फेऱ्या, आरोप प्रत्यारोपांच्या फैरींनी प्रचाराची सांगता झाली असली तरी काँग्रेसचे आमदार सतेज पाटील यांनी 'आमचं ठरलंय' ही भूमिका तर विरोधी राष्ट्रवादीकडून 'आम्ही ध्यानात ठेवलंय' या टॅगलाइनेच प्रचार गाजला.

महिन्याभराच्या प्रचारात कोल्हापूर आणि हातकणंगले लोकसभा मतदार संघात उमेदवारांकडून जोरदार प्रचार करण्यात आला. शरद पवार यांचे पाच तर उद्धव ठाकरे यांचे दोन दौरे झाले. या दोन्ही नेत्यांनी दोन्ही मतदार संघांत तीन ते चार सभा घेतल्या. सोशल मीडियातही जोरदार प्रचार झाला. राष्ट्रवादीचे उमेदवार धनंजय महाडिक यांच्या विरोधात थेट सतेज पाटील जाहीर आव्हान देत 'आमचं ठरलंय' या प्रचाराद्वारे जिल्ह्यात रान पेटवले. 'आमचं ठरलंय' ही टॅगलाइन हातकणंगले, सांगली, सातारा जिल्ह्यातही पसरली. 'आमचं ठरलंय' ला उत्तर देताना शरद पवारांनी 'मी बी ध्यानात ठेवलंय' असा इशारा दिला. याचीही टॅगलाइन झाली.

निवडणुकीत पैशाचा मोठा महापूर वाहिला. निवडणूक पथकाने केलेल्या कारवाईत दोन कोटीहून अधिक बहिशोबी रोकड जप्त करण्यात आली असली तरी निवडणुकीतील उलाढाल शंभर कोटी रुपयांवर पोचल्याचे आकडे पुढे येत आहेत. आज प्रचार संपल्यानंतर सलग दोन दिवस 'रात्रीचा खेळ चाले'नुसार पाकीट संस्कृतीची मोठी उलाढाल होणार असून त्याला राजाश्रय देण्यासाठी दुसऱ्या टप्प्यातील कार्यकर्ते वाट बघत आहेत. निवडणुकीत जाहीर सभा, कोपरा सभामध्ये राष्ट्रीय व राज्य पातळीवरील मुद्द्यापेक्षा वैयक्तिक टीकेवर भर दिल्याने लोकसभेची निवडणूक गल्लीबोळातील ठरल्याचे चित्र पहायला मिळाले.

राजकीय कार्यकर्त्याबरोबर युवा पिढी, महिलांचा प्रचारात मोठा सहभाग दिसला. उमेदवारांच्या सौभाग्यवतीनीही महिला मेळावे घेऊन मतदारांना आवाहन केले. युवकांचा व महिलांचा राजकारणात सहभाग लोकशाहीला पोषक असल्याची चर्चा असली तरी विकासाचे प्रश्न मागे पडल्याची खंतही व्यक्त केली गेली. सत्ताधारी व विरोधकांच्या जंगी प्रचाराबरोबर अपक्षांनीही आपल्या परीने प्रचार करत मतदारांना आकृष्ट करण्याचा प्रयत्न केला.

म. टा. प्रतिनिधी, पुणे

गेल्या दोन वर्षांमध्ये भारत संचार निगम लिमिटेडने (बीएसएनएल) थ्री जी नेटवर्कचा पुरवठा करत असतानाही त्यांचा डाउनलोड स्पीड आणि लॅटेन्सी (नेटवर्क पोहोचण्याचा वेग) या दोन्ही प्रकारांमध्ये सुधारणा केली आहे. मात्र, केवळ त्यांच्याकडे फोर जी नेटवर्क उपलब्ध नसल्याने देशातील अग्रगणी सरकारी कंपनी इतर खासगी कंपन्यांशी स्पर्धा करण्यात मागे पडली, असे स्पष्टीकरण मोबाइल नेटवर्क क्षेत्रात काम करणाऱ्या 'ओपन सिग्नल' या जागतिक दर्जाच्या संस्थेने दिले आहे. संस्थेच्या नेटवर्क संदर्भातील वार्षिक अहवालात, ही बाब स्पष्ट झाल्याने केंद्र सरकारच्या दूरसंचार मंत्रालयाची चांगलीच नाचक्की झाली असून गुणवत्ता सुधारलेली असतानाही 'फोरजी' का दिले गेले नाही, यावरून सरकारच्या नीतीवर प्रश्नचिन्ह उपस्थित करण्यात येत आहेत.

'ओपन सिग्नल'ने नुकताच भारतातील मोबाइल नेटवर्क संदर्भात एक विस्तृत अहवाल सादर केला. या अहवालामध्ये देशात कार्यरत असणाऱ्या सर्व टेलिकॉम कंपन्यांची गुणवत्ता आणि त्यांच्या कामगिरीचा लेखाजोखा मांडला आहे. या संस्थेने देशातील सुमारे ५४ लाख ९६ हजार ७०५ मोबाइल्समधील नेटवर्कचे सर्वेक्षण करून त्याद्वारे अहवाल तयार केला आहे. १ डिसेंबर २०१८ ते २८ फेब्रुवारी २०१९ या तीन महिन्यांच्या कालावधीत हे सर्वेक्षण पूर्ण करण्यात आले आहे. यामध्ये 'बीएसएनएल'ने गेल्या वर्षीच्या तुलनेत डाउनलोडिंग स्पीडमध्ये चांगली कामगिरी केली आहे. इतर खासगी कंपन्यांकडे फोर जी नेटवर्क असल्याने त्यांना सरासरी ६ एमबीपीएस इतका स्पीड गाठता आला असला, तरी थ्री जी असूनही बीएसएनएल आपल्या ग्राहकांना ३ एमबीपीएस स्पीड देण्यात यशस्वी ठरले आहे. याशिवाय कंपनीकडचा डाटा नेटवर्क टॉवरद्वारे ग्राहकांपर्यंत जलदरीत्या पोहोचण्यासाठी जी लॅटेन्सी नामक प्रक्रिया असते त्यामध्येही 'बीएसएनएल'ने गेल्या वर्षीच्या तुलनेत चांगली कामगिरी केली आहे. यंदा बीएसएनएल लॅटन्सी बाबतीत ९४.४ मायक्रोसेकंद या पातळीवर असून फोर जी कंपन्यांच्या तुलनेत हा आकडा निराशाजनक असला तरी गेल्या वर्षीपेक्षा त्यामध्ये १८ टक्क्यांनी सुधारणा झाली आहे.

'ओपन सिग्नल'च्या या सर्वेक्षणानुसार बीएसएनएलला यापूर्वीच जर फोर जी नेटवर्क उभारण्याची परवानगी मिळाली असती, तर आज ही कंपनी सर्व खासगी कंपन्यांच्या तुलनेत चांगली कामगिरी करून स्पर्धेमध्ये उतरली असती. याशिवाय सरकारी कंपनी असल्याने तिचा इतर स्पर्धक कंपन्यांवर एक वचकही राहिला असता. मात्र, सध्याच्या बीएसएनएलच्या ढासळलेल्या परिस्थितीला 'फोर जी'ची परवानगी न मिळणे, हे सर्वांत मोठे कारण आहे, असेही या सर्वेक्षणातून दिसून आले आहे. दरम्यान या सर्वेक्षणानंतर बीएसएनएलच्या कामगार संघटना अधिक आक्रमक झाल्या आहेत. सरकारी कारभार ढिसाळ आहे, बीएसएनएलमध्ये क्षमता असतानाही त्याचे हात बांधून ठेवायचे आणि कंपनी बंद करण्याचा डाव आखायचा, हाच या सरकारचा मानस आहे, असा आरोप संघटनांकडून करण्यात आला आहे.

--------------------

आम्ही अनेकदा सरकारला या परिस्थितीची कल्पना दिली, तरी त्यांनी याकडे लक्ष दिले नाही. याउलट एका खासगी कंपनीच्या हातात संपूर्ण टेलिकॉम क्षेत्र देण्याचा घाट घालण्यात आला आहे. 'ओपन सिग्नल'च्या या सर्वेक्षणातून बीएसएनएलची कामगिरी स्पष्ट झाल्याने सरकारचे गळचेपी धोरण उघडे पडले आहे. फोर जी स्पेक्ट्रम मिळाले असते, तर आतापर्यंत आम्ही खासगी कंपन्यांना कधीच मागे टाकले असते.

- नागेश नलावडे, उपाध्यक्ष, बीएसएनएल कर्मचारी संघटना

पहिल्यांदा मुख्यमंत्री होताना

चड्ड्या का आठवल्या नाहीत

मुख्यमंत्री फडणवीसांचा शरद पवारांना सवाल

पंढरपूर :

'पहिल्यांदा मुख्यमंत्री होताना हीच चड्डी तुम्हाला चांगली वाटली होती. तेंव्हा चड्डी का दिसत नव्हती? मला इतक्या खालच्या पातळीवर येऊन बोलायचे नाही, पण २३ तारखेला कोणाची चड्डी निघाली हे जनता बघेल. पवारांचा तोल गेल्यामुळे ते वाटेल ती बडबड करीत आहेत,' असा टोला मुख्यमंत्री देवेंद्र फडणवीस यांनी शरद पवार यांना लगावला.

माढा लोकसभा मतदारसंघातील प्रचाराच्या सांगता सभेसाठी रविवारी मुख्यमंत्री कुर्डुवाडी येथे आले होते. या वेळी केंद्रीय मंत्री रामदास आठवले उपस्थित उपस्थित होते. शरद पवार यांनी विजयसिंह मोहिते-पाटील यांच्यावर नातेपुते येथे 'चड्डी'वरून जोरदार टीका केली होती. त्या पार्श्वभूमीवर फडणवीस बोलत होते.

उदयनराजेंचा भाजप-काँग्रेस वापर करते

प्रकाश आंबेडकर यांचा आरोप

कराड :

'सातारा लोकसभा मतदारसंघातील राष्ट्रवादीचे उमेदवार बघून घेण्याची भाषा बोलतात. साताऱ्याच्या बाहेरही आयुष्य असते हे त्यांनी विसरू नये. निवडणुकीत हार-जीतच होत असते. तुम्हाला मतदार मताने बघून घेतील आणि लोळवल्याशिवाय राहणार नाहीत. उदयनराजे कधी इथे तर कधी तिथे असतात. नदीतील चिकन्या दगडाप्रमाणे कधी भाजप वापरते, तर कधी काँग्रेस वापरते,' अशी जोरदार टीका वंचित बहुजन विकास आघाडीचे प्रमुख प्रकाश आंबेडकर यांनी केली.

सातारा लोकसभा मतदारसंघातील वंचित बहुजन विकास आघाडीचे उमेदवार सहदेव ऐवळे यांच्या प्रचारार्थ कराडमधील जनता व्यासपीठावर रविवारी सकाळी आयोजित प्रचारसभेत ते बोलत होते. या वेळी सातारा लोकसभा मतदारसंघातील वंचित बहुजन विकास आघाडीचे उमेदवार सहदेव ऐवळे, अ‍ॅड. संभाजी मोहिते, प्रा. सुकुमार कांबळे, अ‍ॅड. संभाजी मोहिते, प्रा. पार्थ पोळके आदी उपस्थित होते.

प्रकाश आंबेडकर म्हणाले, 'डॉ. बाबासाहेब आंबेडकर यांच्यामुळेच साताऱ्याची गादी बचावू शकली. सरदार वल्लभभाई पटेल ही गादी देखील विलीन करायला निघाले होते. मात्र, डॉ. बाबासाहेब आंबेडकर यांच्यासारख्या तत्कालीन समाजसुधारकांनी सातारची गादी विलीन होऊ दिली नाही, त्यामुळे उदयनराजेंनी आपल्या गादीची शोभा ठेवली पाहिजे. उदयनराजे तुम्ही सामाजिक बांधिलकी विसरला आहात. भिडे गुरुजींना वाचवण्याचा तुम्ही प्रयत्न करीत आहात, परंतु आम्ही सत्ता परिवर्तन करून भिडेंना तुरुंगात टाकल्याशिवाय राहणार नाही. काँग्रेस-राष्ट्रवादीकडून फक्त घराणेशाही चालवण्याचे राजकारण केले जात आहे. कार्यकर्त्यांना न्याय दिला जात नाही. मात्र, वंचित बहुजन आघाडीने सामान्य कार्यकर्त्यांना न्याय देण्याचे काम केले आहे. अनेक सर्वपक्षीय कार्यकर्त्यांनी आम्हाला आतून पाठिंबा देण्याचे आश्वासन दिले आहे. निवडणूक विकासाच्या प्रश्नावरच लढली गेली पाहिजे. त्या जाती आणि धर्माच्या आधारे लढवल्या जात आहेत. आमदार पृथ्वीराज चव्हाण आमच्याकडे पैसे कुठून आले विचारतात. आम्ही निवडणूक संपल्यावर पारदर्शकपणे जाहीर करणार आहे. काँग्रेस पक्षाकडे ते जाहीर करण्याची हिंमत आहे का? असा प्रश्न करीत काँग्रेसने किती हेलिकॉप्टर भाड्याने घेतली. नांदेडच्या निवडणुकीत काँग्रेसच्या माजी मुख्यमंत्र्यांनी मुस्लिम वस्तीत किती पैसे खर्च केले, हे काँग्रेस जाहीर करू शकणार आहे का? एका मताला चार हजार रुपये वाटले आहेत. परंतु लोकांनी पैसे घेऊन मते वंचित आघाडीला दिली आहे.'

सहदेव ऐवळे म्हणाले, 'काँग्रेस, राष्ट्रवादी आघाडी व भाजप, शिवसेना युती ही देशाला धोकादायक आहे. त्यामुळे संविधान अडचणीत आले आहे. संविधान वाचवण्यासाठी प्रकाश आंबेडकर यांनी अनेक ठिकाणी बहुजन वंचित आघाडीने उमेदवार उभे केले आहेत. मला सातारा लोकसभा मतदारसंघातून निवडणूक लढण्याची संधी दिली आहे. देशाचे संविधान वाचविण्यासाठी या आघाडीचा उमेदवार म्हणून मला निवडून द्यावे.'

..........

उंडाळकर गटाचा

नरेंद्र पाटलांना पाठिंबा

कराड :

माजी मंत्री तथा काँग्रेसचे कराड दक्षिणचे माजी आमदार विलासराव पाटील-उंडाळकर यांनी युतीचे उमेदवार नरेंद्र पाटील यांना पाठिंबा जाहीर केला आहे. रविवारी बेलवडे बुद्रुक येथेही काका गटाच्या कार्यकर्त्यांची बैठक झाली. तिथेही युतीचे उमेदवार नरेंद्र पाटील यांना पाठींबा देण्याचा निर्धार व्यक्त करण्यात आला. मतदानाच्या आधी काही तास हालचाली गतीमान करण्याचा निर्णय घेण्यात आल्याचे काका गटाच्या कार्यकर्त्यांनी सांगितले आहे. मागील विधानसभा निवडणुकीत नरेंद्र पाटील यांनी विलासराव पाटील-उंडाळकर यांच्यासाठी कराड दक्षिण विधानसभा मतदारसंघात अनेक जाहीर सभा घेतल्या होत्या. त्यामुळे लोकसभेची निवडणूक जाहीर झाल्यापासून उंडाळकर व त्यांचे कार्यकर्ते काय भूमिका घेणार याकडे लक्ष लागून होते.

..........