कोल्हापूर टाइम्स टीम

ट्रान्सपोर्ट असोसिएशनची शिखर संस्था असलेल्या नवी दिल्ली येथील असोसिएशन ऑफ स्टेट रोड ट्रान्स्पोर्ट अंडरटेकिंग्जच्यावतीने देण्यात येणारा २०१७-१८ चा हायेस्ट टायर परफॉर्मन्स अॅवॉर्ड महापालिकेच्या केएमटी उपक्रमला जाहीर झाला. केएमटीला हा अॅवॉर्ड सलग पाचव्यांदा मिळाला. २६ मार्च रोजी नवी दिल्ली येथे अॅवॉर्डचे वितरण होणार आहे. याबाबतचे पत्र नुकतेच केएमटी प्रशासनाला मिळाले.

असोसिएशन ऑफ स्टेट रोड ट्रान्स्पोर्ट अंडरटेकिंग्ज या परिवहन उपक्रमांच्या नवी दिल्ली येथील शिखर संस्थेकडून दरवर्षी राष्ट्रीय पातळीवरील हायेस्ट टायर परफॉर्मन्स (अर्बन सर्व्हिसेस) अॅवॉर्ड जाहीर केला जातो. अॅवॉर्ड देशातील सर्व शहरी परिवहन उपक्रमांचे वार्षिक कामगिरीचा आढावा घेऊन दिला जातो. यामध्ये केएमटीने एक लाख किमीसाठी ४.८० संख्येच्या टायर्सचा वापर केला आहे. याची दखल घेत हायेस्ट टायर परफॉर्मन्स अॅवॉर्ड जाहीर झाला आहे. केएमटीने सलग पाचव्यांदा अॅवॉर्ड पटकावल्याबद्दल आयुक्त डॉ. मल्लिनाथ कलशेट्टी, परिवहन सभापती अभिजित चव्हाण यांनी सर्व कर्मचाऱ्यांचे अभिनंद केले.

कोल्हापूर : कोल्हापूर परिक्षेत्राचे विशेष पोलीस महानिरीक्षक सुहास वारके यांनी इचलकरंजी, जयसिंगपूर पोलिस ठाण्यांचा आढावा घेतला. इचलकरंजी शहरात वाहतुकीची समस्या निर्माण होते. त्यादृष्टीने कोल्हापूरप्रमाणे इचलकरंजी शहरात सीसीटीव्ही वरुन वाहतुकीचे नियोजन करण्याच्या सूचना संबंधीतांना दिल्या. त्याबाबत शहरांमध्ये सीसीटीव्ही कॅमेऱ्यांची संख्या वाढवता येईल का? याबाबतची माहिती घेतली. वार्षिक पाहणी अंतर्गत त्यांनी इजलकरंजी व जयसिंगपूर पोलिस ठाण्यांची पाहणी केली. यामध्ये त्यांनी इचलकरंजी शहरातील सीसीटीव्ही, गुन्हेगारी आणि प्रलंबित प्रकरणांबाबत अधिकाऱ्यांकडून आढावा घेतला.

कोल्हापूर : कोल्हापूर जिल्हा कुंभार समाज विकास फाऊंडेशन, पन्हाळा-गगनबावडा तालुका शाखेच्या अध्यक्षपदी बबन कुंभार (वारनूळ), युवा आघाडीच्या अध्यक्षपदी अजित कुंभार (आळवे), कार्याध्यक्षपदी मच्छिंद्र कुंभार (मोहरे) यांची निवड झाली. फाऊंडेशनचे जिल्हाध्यक्ष प्रकाश कुंभार (सरवडेकर), कार्याध्यक्ष संजय निगवेकर, मार्गदर्शक एम. व्ही. कुंभार, सचिव किरण माजगावकर, जिल्हा संपर्क प्रमुख गोविंद कृष्णा कुंभार यांच्या प्रमुख उपस्थितीत बैठक झाली. याप्रसंगी महादेव कुंभार (पडळ), संजय कुंभार (काखे), सागर कुंभार (वाळवेकरवाडी), संजय कुंभार (नेबापूर), विजय कुंभार (वारनूळ) यांची उपस्थिती होती.

कोल्हापूर टाइम्स टीम

जिल्हाधिकारी कार्यालयासमोर गेल्या ३५ दिवसांपासून चांदोली अभयारण्यग्रस्तांसह वारणा, उचंगी, सर्फनाला, एरंडोळ, धामणी धरणग्रस्तांचे विकसनशील पुनर्वसन करावे, या मागणीसाठी ठिय्या आंदोलन करत आहेत. महिना उलटून गेला तरी हे आंदोलन सरकारने बेदखल केले. परिणामी, शांततेच्या मार्गाने आंदोलन करूनही न्याय मिळत नसेल तर कायदा हातात घ्यायचा का?, अशी भावना प्रकल्पग्रस्त, धरणग्रस्तांमध्ये निर्माण होत आहे.

धरणग्रस्तांच्या मुलांना उच्च, व्यावसायिक शिक्षण घेण्यासाठी फीमध्ये सवलत मिळावी, धरण जलाशयातील मच्छिमारी, नौकाविहारासाठी प्रकल्पग्रस्तांना प्राधान्य द्यावे, घर बांधणीसाठी भरीव अनुदानाचे वाटप करावे, पसंतीनुसार लाभ क्षेत्रातील जमिनीचे वाटप करावे, लपवलेल्या संपादनपात्र जमिनी शोधून काढाव्यात, नव्या महसुली गावांना ग्रामपंचायतीचा दर्जा द्यावा, वारणा प्रकल्पग्रस्तास नागरी सुविधांसाठी निधी मिळावा या मागण्यांसाठी श्रमिक मुक्ती दलाच्या नेतृत्वाखाली ठिय्या आंदोलन सुरू आहे. आंदोलनात ७०० बाधित कुटुंबांतील सदस्य सहभागी झाले आहेत.

आंदोलनासाठी गाव सोडून येऊन येथे बसलेल्या धरणग्रस्त, प्रकल्पग्रस्तांना कधीतरी दोन-तीन दिवसांतून एकदा गावाकडून जेवणाचा डबा येतो. जेवण रस्त्याकडेला बसून ते जेवतात. जिल्हाधिकारी कार्यालयात जाऊन पिण्याचे पाणी आणतात. येथे शौचासह इतर नैसर्गिक विधींची सोय नाही. परिणामी, महिलांची प्रचंड गैरसोय होत आहे. जिल्हाधिकारी कार्यालयातील अधिकारी, संबंधित अधिकारी, स्थानिक लोकप्रतिनिधी आणि त्या-त्या ठिकाणचे लोकप्रतिनिधीही निर्दयपणे रोज त्यांच्या जगण्याकडे नुसतेच पाहात जातात. मात्र त्यांचे प्रश्न सोडवण्यासाठी कोणीच पुढाकार घेतलेला नाही. स्थानिक पातळीवरील काही प्रश्न सोडवण्यासाठी प्रशासनाने प्रयत्न केले. पण, अजूनही अनेक प्रश्न प्रलंबित आहेत. त्यामुळे आंदोलकांत प्रचंड असंतोष खदखदत आहे.

चांदोली अभयारण्यग्रस्तासह धरणग्रस्त हक्कांच्या मागण्यांसाठी ३५ दिवसांपासून जिल्हाधिकारी कार्यालयासमोर ठिय्या मारला आहे. तरीही सरकार, जिल्हा प्रशासनाने दखल घेतलेली नाही. सरकार गेंड्याच्या कातडीचे असल्याचा अनुभव आला आहे. २२ मार्चपर्यंत तोडगा न निघाल्यास पंढरपूरपर्यंत लाँग मार्चने जाणार आहे. आता आंदोलकांचा संयम सुटत चालला आहे. मागण्या मान्य कराव्यात, अन्यथा उद्रेक होईल.

- जानू झोरे, युवा आंदोलक

धरणग्रस्त, अभयारण्यग्रस्तांच्या पुनर्वसनासाठी २२ वर्षांपासून संघर्ष करीत आहे. आम्ही वडिलोपार्जीत जमिनी, घरे अभयारण्यासाठी दिली. निराधार, बेघर बनलो. घर उध्वस्त झाल्यावर माळरानावर जाऊन कुटुंब थाटले. तरीही प्रशासन, सरकारने लक्ष दिले नाही. जमीन नसल्याने दुसऱ्यांच्यात मोलमजुरी केल्यानंतरही रोजगार मिळत नाही, असे वास्तव आहे. म्हणून, जगणेच मुश्किल बनले आहे. प्रकल्पग्रस्तांसाठी सरकारने कोणतीही योजना आणलेली नाही. केवळ आम्हाला आश्वासनांचे गाजर दाखवण्याचे काम केले आहे.

- किसन पाटील, ज्येष्ठ आंदोलक

आम्ही कुटुंबासह ३५ दिवसांपासून जिल्हाधिकारी कार्यालयासमोर ठिय्या आंदोलनाला बसलो आहोत. कोणत्याही प्रकारच्या मुलभूत सुविधा नाहीत. महिलांसाठी स्वच्छतागृह नाही. पिण्याच्या पाण्याची सोय नाही. अनेक दिवस अंघोळीविना रहावे लागत आहे. रात्रभर फुटपाथवर झोपावे लागते. डास चावत असल्याने झोप येत नाही. रात्र जागून काढावी लागते. तीन दिवसांच्या शिळ्या भाकऱ्या, चटणी खाऊन दिवस ढकलावा लागत आहे. रोज एक आंदोलक आजारी पडतो. तरीही सरकार याकडे लक्ष देण्यास तयार नाही.

- सुमन बोडके, आंदोलक महिला

म. टा. वृत्तसेवा, पंढरपूर

राष्ट्रवादी काँग्रेसकडून माढा मतदारसंघात उमेदवारी मिळणार नसल्याचे दिसताच नाराज झालेल्या मोहिते-पाटील घराण्याने पक्षाची साथ सोडत भारतीय जनता पक्षात जाण्याचा निर्णय घेतला आहे. मुख्यमंत्री देवेंद्र फडणवीस यांच्या उपस्थितीत मुंबईत आज (बुधवारी) रणजितसिंह मोहिते-पाटील भाजपप्रवेश करणार आहेत. मोहिते-पाटील यांच्या रूपाने पश्चिम महाराष्ट्रातील एक वजनदार राजकीय कुटुंब भाजपच्या गळाला लागले आहे. राजकारणातील मातब्बर विखे घराण्यापाठोपाठ मोहिते-पाटील घराणेही भाजपमध्ये गेल्यामुळे युतीचे बळ वाढणार आहे.

मोहिते यांच्या अकलूज येथील शिवरत्न बंगल्यावर या संदर्भात कार्यकर्त्यांची बैठक बोलावण्यात आली होती. त्यात सोलापूर, सातारा, कोल्हापूर, सांगली आणि पुणे जिल्ह्यांतील सुमारे पाच हजारांवर कार्यकर्ते उपस्थित होते. या वेळी कार्यकर्ते व पदाधिकाऱ्यांनी अजित पवार आणि राष्ट्रवादीवर सडकून टीका करीत भाजप प्रवेशाची एकमुखी मागणी केली. त्यानंतर रणजितसिंह मोहिते पाटील यांनी बुधवारी मुंबईत गरवारे हॉलमध्ये दुपारी एक वाजता भाजपप्रवेश करणार असल्याची घोषणा केली. खासदार विजयसिंह मोहिते-पाटील यांनी कार्यकर्त्यांच्या निर्णयासोबत राहणार असून, यापुढे नरेंद्र मोदी यांच्या नेतृत्वाखाली काम करणार असल्याचे सांगितले. राष्ट्रवादी काँग्रेसकडून आमच्याशी कोणीही संपर्क साधलेला नाही, असेही मोहिते यांच्याकडून स्पष्ट करण्यात आले.

'राष्ट्रवादी'च्या स्थापनेपासून शरद पवारांना खंबीरपणे साथ देणाऱ्या मोहिते-पाटील यांना अलीकडील काळात पक्षाकडून अनेकवेळा डावलले गेल्याची भावना मोहिते व त्यांच्या समर्थकांत बळावली होती. लोकसभा निवडणूक जाहीर होण्याआधीच राष्ट्रवादी काँग्रसचे अध्यक्ष शरद पवार यांनी माढ्यातून निवडणूक लढवण्याच्या हालचाली सुरू केल्यानंतरच मोहिते-पाटील गटात नाराज पसरली होती. विजयसिंह मोहिते-पाटील यांनी पवारांसाठी जागा सोडायची तयारी दाखवली. मात्र, मोदी लाटेतही खासदार झालेल्या मोहिते-पाटील यांची उमेदवारी का कापली, असा प्रश्न कार्यकर्ते करीत होते. पवारांनी अचानक माढ्यातून माघार घेतली व पुन्हा विजयसिंह यांना माढ्यातून लढण्याचा आग्रह सुरू झाला. विजयसिंह मोहिते यांनी मुलगा रणजित याला उमेदवारी देण्याची विनंती पक्षाकडे केली होती. मात्र, पक्षातून विरोध असल्याचे कारण पुढे करीत त्यांना उमेदवारी नाकारण्यात आली. अखेर मोहिते-पाटील कुटुंबाने केंद्रीय मंत्री नितीन गडकरी यांच्यामार्फत मुख्यमंत्री फडणवीस यांच्याशी चर्चा करून भाजपप्रवेशाचा निर्णय घेतला.

मी उद्यापासून भाजपचा प्रचार करणार आहे. आता कार्यकर्त्यांसोबत यापुढे फक्त भाजपचे काम करणार असून, दुष्काळी जनतेचे प्रश्न कायमचे सोडविण्यासाठी यापुढेही प्रयत्न करणार आहे.

- विजयसिंह मोहिते-पाटील

खासदार, माढा

मोहितेंची नाराजी का?

- मोहिते-पाटील राष्ट्रवादीच्या स्थापनेपासून पवारांसोबत

- मात्र, २००९मध्ये विजयसिंह मोहितेंकडे दुय्यम खाते

- विरोधी बबन शिंदे गटाला राष्ट्रवादीने बळ दिल्याचा मोहिते गटाचे म्हणणे

- विधान परिषदेच्या निवडणुकीत मोहितेसमर्थक राष्ट्रवादीचे उमेदवार दिलीप साळुंखे यांचा पराभव. मात्र, बंडखोरांवर काँग्रेस-राष्ट्रवादीकडून काहीही कारवाई न केल्याने मोहिते नाराज. हा पराभव जिव्हारी

- जिल्हा परिषदेत बहुमत मिळवूनही अखेरच्या क्षणी पक्षाने भाजपचे संजय शिंदे यांना अध्यक्षपदासाठी पाठिंबा दिला.

-----------------

मोदी विरुद्ध देश

म. टा. प्रतिनिधी, मुंबई

आगामी निवडणूक ही राजकीय पक्षांनी एकमेकांच्याविरोधात लढवायची नसून ही निवडणूक नरेंद्र मोदी विरोधात देश अशी आहे. नरेंद्र मोदी आणि अमित शहा हे राजकीय क्षितिजावरून नाहीसे होतील त्यावेळी पक्षापक्षांमध्ये निवडणूक होईल. मनसे लोकसभा निवडणूक लढणार नाही, मात्र मनसेच्या कार्यकर्त्यांनी मोदीविरोध एवढेच काम निवडणूक काळात करावे, मतदारांनाही माझे हेच आवाहन आहे, अशा शब्दांत मनसे अध्यक्ष राज ठाकरे यांनी भाजपच्याविरोधात मंगळवारी तोफ डागली.

सविस्तर वृत्त...

--------------------

राजीनामा दिलेला नाही : विखे

विरोधी पक्षनेतेपदाचा राजीनामा दिल्याच्या बातमीचे राधाकृष्ण विखे यांच्याकडून खंडन करण्यात आले. आपण राजीनामा दिला नसून यासंबंधी आलेल्या बातम्या तथ्यहीन असल्याचे त्यांनी सांगितले. विखे सध्या नगर जिल्ह्यातच असून, या विषयावर पक्षाचे वरिष्ठ पदाधिकारी किंवा विधानसभा अध्यक्षांशीही त्यांची भेट झाली नसल्याचे सांगण्यात आले.

कोल्हापूर : बामसेफ व बहुजन क्रांती मोर्चाच्यावतीने गुरवार (ता. २१) व शुक्रवारी माणगाव स्मृती परिषदेचे आयोजन केले आहे. सायंकाळी चार वाजता परिषदेचे उद्घाटन खासदार संभाजीराजे यांच्या हस्ते होणार होईल. अध्यक्षस्थानी बामसेफचे राष्ट्रीय अध्यक्ष वामन मेश्राम असतील. ज्येष्ठ इतिहास संशोधक डॉ. जयसिंगराव पवार यांची प्रमुख उपस्थिती लाभणार आहे. परिषदेत 'डॉ. बाबासाहेब आंबेडकर : मुलनिवासी बहुजन महापुरुषांनी निर्माण केलेली चळवळ इव्हीएम मशीनमुळे धोक्यात आली आहे का' या विषयावर चर्चा होणार आहे.

Appasaheb.mali@timesgtoup.com

Tweet:Appasaheb_MT

कोल्हापूर : राजकारण म्हटले की प्रत्येक कार्यकर्त्याला पदाची महत्वाकांक्षा ठरलेली. मात्र साऱ्यांनाच पदे मिळत नाहीत. तरीही अनेक कार्यकर्ते नेत्यावर निष्ठा आणि पक्षाची विचारधारा अंगिकारुन सातत्याने कार्यरत असतो. सभा, मेळाव्याच्या माध्यमातून नेत्यांनी केलेले कौतुक, दिलेली शाबासकीची थाप त्याच्यासाठी खूप मोठी शिदोरी ठरते. त्या शिदोरीच्या बळावर नवी ऊर्जा घेऊन तो पुन्हा जोमाने काम करु लागतो. सध्या राजकीय दौरे आणि सभांची रेलचेल सुरू असताना नेते आणि कार्यकर्त्यांमध्ये जुळलेल्या अनोख्या अनोख्या नातेबंधांना उजाळा मिळत आहे.

पोस्टाच्या निवेदनाचीही दखल घेणारा नेता

राष्ट्रवादीचे नेते शरद पवार यांच्या कामाची पद्धत, कार्यकर्त्यांची कदर करण्याची भावना सर्वश्रृत आहेत. राष्ट्रवादी काँग्रेसमधील ज्येष्ठ कार्यकर्ते टी. बी. पाटील हे एस काँग्रेसपासून शरद पवार यांच्यासोबत आहेत. त्यांनी १९८८ मध्ये 'दूधगंगा, वेदगंगा शिक्षण प्रसारक मंडळ, मांगोली' या शिक्षण संस्था काढली. शिक्षणसंस्था, शाळेला मान्यता मिळवणे म्हणजे सरकारदबारी हेलपाटे, अधिकाऱ्यांना आर्जव करणे हे ठरलेले. यावेळी पाटील यांनी पवार यांना पोस्टाद्वारे निवेदन पाठवून शिक्षणसंस्थेला मान्यता मिळावी अशी विनंती केली. पोस्टाद्वारे पाठविलेल्या निवेदनाची दखल पवारांनी घेतली आणि त्यांनी तत्कालीन नेते बाबासाहेब कुपेकर यांच्यामार्फत शिक्षण संस्थेला मान्यता दिल्याचा निरोप पाठविला. ही आठवण माझ्यासाठी मर्मबंधातील ठेव असल्याची भावना टी. बी. पाटील यांनी व्यक्त केली.

गांधी मैदानात सभा, बाळासाहेबांची शाल

शिवसेनाप्रमुख बाळासाहेब ठाकरे यांच्याविषयी कार्यकर्त्यांना कमालीचा अभिमान. त्यांच्या सभेविषयी प्रचंड आकर्षण. १९९८ मध्ये कोल्हापुरातील गांधी मैदान येथे त्यांची सभा आयोजित केली होती. सभेला प्रचंड गर्दी झाली होती. गांधी मैदानच्या सभोवतालच्या संरक्षक भिंतीवर, झाडावर चढूनही लोक सभा ऐकत होते. उपजिल्हाप्रमुख रवी चौगुले सभेचे सूत्रसंचालन करत होते. शिवसेनाप्रमुख सभेला मार्गदर्शन करतील असे निवेदन करुन रवी चौगुले बाजूला उभे राहिले. बाळासाहेब भाषणाासाठी उभे राहताच फटाक्यांच्या आतषबाजीला सुरुवात झाली. अखंडपणे आतषबाजी सुरू होती. तेव्हा चौगुले यांनी माइकवरुन शिवसेनाप्रमुख मार्गदर्शन करणार आहेत, आतषबाजी थांबवा असे सुचविले. पण आतषबाजी चालूच. तेव्हा शिवसेनाप्रमुखांनी चेष्टेने, 'तुझं कोल्हापुरात काही वजन दिसत नाही. अजूनही आतषबाजी सुरू आहे' असे म्हणत त्यांनी आपल्या खांद्यावरील शाल रवी यांच्या हाती दिली आणि माइकचा ताबा घेतला. मग 'शिकलगार तुमची आतषबाजी थांबवा, आता माझी आतषबाजी सुरू होईल' असे त्यांनी म्हणताच संपूर्ण मैदानात शिट्ट्या टाळयांचा वर्षाव झाला होता. बाळासाहेबांनी दिलेली भगवी शाल अनेक वर्षे चौगुले यांच्याकडे होती.

राजीव गांधीचा फोटो, सोनियांसोबत हितगुज

१९८२ च्या सुमारास हालसिद्धनाथ कारखान्याच्या भूमिपूजन समारंभााला राजीव गांधी आले होते. त्यांचा कोल्हापुरी फेटा बांधून सत्कार करण्यात आला होता. तो फोटो, काँग्रेसच्या महिला आघाडीच्या कार्यकर्त्या सरला पाटील यांच्या संग्रही होता. काही वर्षापूर्वी पाटील यांनी तो फोटो काँग्रेसच्या अध्यक्षा सोनिया गांधी यांना दिल्लीत भेट दिला. राजीव गांधी यांचा फोटो पाहून श्रीमती गांधी यांच्या डोळ्यांच्या कडा ओलावल्या. त्यांनी त्या फोटोविषयी, कार्यक्रमाविषयी अतिशय तन्मयतेने पाटील यांच्याकडे चौकशी केली. पाच वर्षांपूर्वी श्रीमती गांधी या कोल्हापूर दौऱ्यावर आल्या होत्या. तत्कालिन काँग्रेसच्या जिल्हा परिषद अध्यक्षा विमल पाटील, महिला आघाडीच्या कार्यकर्त्या सरला पाटील यांनी त्यांचे विमानतळावर स्वागत केले. विमल पाटील ग्रामीण भागातील, नऊवारी साडी परिधान केलेल्या. नऊवारी साडी परिधान केलेली ग्रामीण भागातील काँग्रेस पक्षाची एक महिला कार्यकर्ती जिल्हा परिषद अध्यक्षा आहे हे जाणून गांधी यांनी त्यांचे कौतुक केले. जवळपास अर्धा ते पाऊणतास हितगुज सुरू होते. यावेळी ज्येष्ठ नेते मल्लिकार्जुन खरगे उपस्थित होते.

पवारांचा फेटा शिंदेंच्या डोक्यावर

राष्ट्रवादीचे अध्यक्ष शरद पवार यांचे कट्टर कार्यकर्ते म्हणून जयकुमार शिंदे आणि किसन कल्याणकर यांची ओळख. १९८० पासून ते पवारांशी निगडीत आहेत. मोतीबाग तालीम येथे त्यांच्या पहिली भेट झाली. दरम्यान पन्हाळा-गगनबावड्याचे तत्कालिन आमदार यशवंत एकनाथ पाटील यांच्या प्रचार सभेसाठी कोडोली येथे शरद पवार यांची जाहीर सभा झाली. या सभेप्रसंगी जयकुमार शिंदे पवारांना भेटावयास गेले. त्याप्रसंगी पवारांनी, जयकुमार शिंदे यांना आपल्या डोक्यावरील फेटा काढून दिला आणि 'माझं डोक तुला घे आणि चांगले चालव' असे विनोदाने म्हणाले. पवार यांनी दिलेला तो फेटा आजही शिंदे यांच्या संग्रही आहे.

म. टा. प्रतिनिधी, कोल्हापूर

गोव्याचे मुख्यमंत्री मनोहर पर्रिकर व माजी महापौर पी. टी. पाटील यांना श्रद्धांजली अर्पण करून महापालिका सभा तहकूब करण्यात आली. सभेसाठी कोरम पूर्ण झाला असला तरी, बहुसंख्य नगरसेवक लोकसभा निवडणुकीच्या प्रचारात व्यस्त असल्याने अनेकांनी सभेकडे पाठ फिरवली.

सभेच्या सुरुवातीलाच सत्ताधारी व विरोधी गटाने गोव्याचे मुख्यमंत्री पर्रिकर व माजी महापौर पाटील यांच्या निधनाचा शोकप्रस्ताव मांडला. सभागृहाने दोन मिनिटे स्तब्धता पाळून श्रद्धांजली अर्पण केली. आदरांजली व्यक्त करताना उपमहापौर भूपाल शेटे म्हणाले, 'मुख्यमंत्री व देशाचे संरक्षणमंत्री म्हणून कार्यभार पाहताना पर्रिकर यांनी कधीही पदाचा बडेजाव मिरवला नाही. लोकप्रतिनिधी कसा असावा याचे ते मूर्तीमंत उदाहरण होते. त्यांच्या निधानाने देशाचे मोठे नुकसान झाले आहे. तर माजी महापौर पाटील यांनी आपल्या कामाचा ठसा उमटवला. अर्बन बँकेचे अध्यक्ष व कृषी उत्पन्न बाजार समितीचे उपसभापती म्हणूनही त्यांनी भरीव योगदान दिले.'

भाजपचे गटनेता विजय सुर्यवंशी म्हणाले, 'मरावे परी किर्तीरुपी उरावे', असे पर्रिकर यांचे कार्य होते. त्यांचे व्यक्तिमत्व सर्वगुणसंपन्न नेतृत्वगुण असलेले होते.' पर्रिकर व पाटील यांच्या निधनामुळे सभा तहकूब करावी अशी विनंती सभागृह व सभाध्यक्षांना सुर्यवंशी यांनी केली. त्यानंतर सभाध्यक्षा महापौर सरिता मोरे यांनी सभा तहकूब करत असल्याचे जाहीर केले. दरम्यान, लोकसभा निवडणुकीची आचारसंहिता जाहीर होण्यापूर्वी महासभेचा अजेंडा प्रसिद्ध झाला होता. पण आचारसंहितेमुळे सभेत कोणताही धोरणात्मक निर्णय होणार नव्हता. त्याचबरोबर बहुतांशी नगरसेवक लोकसभा निवडणुकीच्या प्रचारात असल्याने अनेकांची सभेला गैरहजेरी होती. त्यामुळे अजेंड्यामध्ये प्रसिद्ध झालेले विविध विभागाचे शुल्क कमी करणे व भूमिगत वीजवाहिनी टाकण्यासाठी देण्यात येणाऱ्या परवानगीच्या विषयावर पुढील सभेत चर्चा होण्याची शक्यता आहे.

आमदार हळवणकर यांचे भाजप कायकर्त्यांना आवाहन

म. टा. प्रतिनिधी, कोल्हापूर

'राष्ट्रवादी काँग्रेसचे उमेदवार धनंजय महाडिक हे निवडणुकीतील भाजप शिवसेना युतीचे विरोधक असले तरी भाजपच्या कायकर्त्यांनी त्यांना शत्रू समजून त्यांच्याविरोधात प्रचार करावा', असे आवाहन आमदार सुरेश हाळवणकर यांनी केले. बिनखांबी गणेश मंदिरजवळील मंगलधाम येथे कोल्हापूर उत्तर विधानसभा मतदारसंघातील कार्यकर्त्यांच्या मेळाव्यात ते बोलत होते. यावेळी पश्चिम महाराष्ट्र देवस्थान समितीचे अध्यक्ष महेश जाधव, राज्य वस्त्रोद्योग महामंडळाचे अध्यक्ष आणि जिल्हाध्यक्ष हिंदूराव शेळके, 'गोकुळ'चे संचालक बाबा देसाई, महानगर अध्यक्ष संदीप देसाई यांची प्रमुख उपस्थिती होती.

आमदार हाळवणकर म्हणाले, 'राज्यातील भाजप शिवसेना युतीच्या प्रचाराचा शुभारंभ कोल्हापुरातून होणार आहे. या सभेला भाजपचे कार्यकर्ते मोठ्या संख्येने उपस्थित राहिले आहेत, हे मुख्यमंत्र्याच्या निदर्शनास आणण्यासाठी नेते, पदाधिकारी, बूथ प्रमुखांनी मोठ्या प्रमाणात सभेसाठी नागरिकांना घेऊन यावे. जे मंडल अध्यक्ष काम करणार नाहीत त्यांची रितसर हकालपट्टी करावी. राज्यात भाजप शिवसेनेची युती झाली असल्याने भाजपची जबाबदारी वाढली आहे. कोल्हापूर लोकसभा मतदारसंघात राष्ट्रवादीकडून महाडिक उमेदवार आहेत. त्यामुळे शिवसेनेचे उमेदवार प्रा. संजय मंडलिक यांच्या विजयासाठी भाजप कार्यकर्त्यांनी झोकून द्यावे.' भाजपचे १४ नगरसेवक या बैठकीला उपस्थित होते.

यावेळी आमदार हाळवणकरांनी सभेसाठी किती नागरिकांना घेऊन येणार याची रितसर माहिती बूथ प्रमुखांकडून घेतली. बैठकीच्या प्रारंभी गोव्याचे मुख्यमंत्री मनोहर पर्रिकरांना श्रद्धाजंली वाहण्यात आली. यावेळी भाजप सरचिटणीस दिलीप मैत्राणी, अशोक देसाई, संतोष भिवटे, राहुल चिकोडे, माजी नगरसेवक सुभाष रामुगडे, डॉ. सदानंद राजवर्धन, सुरेश जरग आदींसह भाजप पदाधिकारी व कायकर्ते उपस्थित होते.

......

'मैं चौकीदार' ...

'मैं चौकीदार नरेंद्र मोदी' या टॅग लाईनद्वारे भाजपचा प्रचार सुरु आहे. त्यामुळे प्रत्येक कार्यकर्त्याने यापुढे 'मै चौकीदार' असे म्हणून नाव सांगण्याची सूचना हाळवणकरांनी केली. त्यानंतर प्रत्येक पदाधिकाऱ्याने 'मै चौकीदार' अशी सुरुवात करत स्वत:चे नाव सांगितले.

.....

सतेज पाटलांसारखे काम नको

'भाजप कार्यकर्त्यांनी पक्षावर निष्ठा ठेऊन काम करावे. आपल्याला सतेज पाटील यांच्यासारखे काम करायचे नाही. पक्षाचे काम न करणाऱ्या मंडल अध्यक्षानांच नव्हे तर जिल्हाध्यक्षांनाही बदलू,' असा इशारा हाळवणकर यांनी यावेळी दिला.

कोल्हापूर टाइम्स टीम

जीएसटी परिषदेने निर्माणाधीन असलेल्या, बांधकाम सुरू असलेल्या घरांवरील जीएसटी (वस्तू व सेवा कर) कपात केल्याने बांधकाम व्यावसायिकांत समाधान व्यक्त केले जात आहे. कोल्हापूर शहर, उपनगरातील ७० ते ८० नवीन प्रकल्पांना त्याचा लाभ होणार आहे.

जीएसटी परिषदेने बांधकाम सुरू असलेल्या घरांवरील जीएसटी १२ टक्क्यांवरून पाच टक्के केला आहे. तर परवडणाऱ्या घरांवरील जीएसटी आठ टक्क्यांवरुन एक टक्क्यांवर करण्यात आला आहे. हा निर्णय फेब्रुवारीच्या शेवटच्या आठवड्यात घेण्यात आला. ही अंमलबजावणी एक एप्रिलपासून लागू होणार आहे. पण, या निर्णयाचा सध्या सुरू असलेल्या बांधकाम प्रकल्पांना याचा तोटा होणार होता. एकीकडे फ्लॅट, बंगला विक्रीनंतर १२ टक्के जीएटी ग्राहकांना भरावा लागत होता. तर दुसरीकडे बांधकाम व्यावसायिक घरबांधणीसाठी जे साहित्य वापरत होते, त्या वस्तूंवरही जीएसटी भरत होते. बांधकाम साहित्य खरेदी करताना भरलेला टॅक्स वजा करून (इनपूट टॅक्स क्रेडिट) व्यावसायिक ग्राहकांकडून १२ टक्क्यांऐवजी चार ते आठ टक्के जीएसटी आकारत होते.

आता ज्या बांधकाम व्यावसायिकांनी इनपूट टॅक्स क्रेडिटचा दावा केला आहे, त्यांना पूर्वीच्या दराने १२ टक्के जीएसटी भरावा लागणार आहे. पण, ज्या बांधकाम व्यावसायिकांनी इनपूट टॅक्स क्रेडिटचा दावा दाखल केलेला नाही, त्यांना पाच टक्के जीएसटी भरावा लागेल. या निर्णयाचा अध्यादेश निघाल्याने बांधकाम व्यावसायिकांत समाधान व्यक्त केले जात आहे.

कोल्हापूर शहर व उपनगरात ८० ते ८५ बांधकाम प्रकल्प सुरु आहेत. त्यांना या निर्णयाचा लाभ होणार आहे. पण एक एप्रिलनंतर गुढीपाडव्याच्या मुहूर्तावर जे नवीन प्रकल्प सुरू होतील, त्यांना पाच टक्के जीएसटी भरावा लागणार आहे. पण जे फ्लॅट, बंगले तयार झाले आहेत, त्यांना पाच किंवा १२ टक्के कर भरावा लागणार आहे.

जीएसटी परिषदेने घेतलेला निर्णय बांधकाम व्यावसायिक, ग्राहकांच्या हिताचा आहे. जे प्रकल्प सुरू आहेत, त्यांना लाभ होईल. इनपूट टॅक्स क्रेडिट घेतलेल्यांना १२ टक्के जीएसटी भरावा लागणार आहे.

- महेश यादव, अध्यक्ष क्रिडाई कोल्हापूर

कोल्हापूर टाइम्स टीम

'मेरी वेदर मैदानाशेजारील जिल्हा लॉन टेनिस असोसिएशन बेकायदेशीरपणे जागा व्यापत आहे. असोसिएशनने केलेल्या अतिक्रमणाबाबत जिल्हाधिकारी व महानगरपालिका आयुक्तांकडे लेखी निवेदन दिले आहे. सर्वसामान्यांच्या खेळासाठीचे मैदान हिरावू पाहणाऱ्या प्रवृत्तीला वेळीच अटकाव करा, अन्यथा तीव्र आंदोलन करू, ' असा इशारा भारत स्काऊट संस्थेच्या पदाधिकाऱ्यांनी मंगळवारी पत्रकार परिषदेत दिला. दरम्यान संस्थेच्या तक्रारीनंतर लॉन टेनिस असोसिएशनकडून सुरू असलेले बांधकाम थांबवण्यात आले.

स्काउटचे प्राचार्य विलास पोवार म्हणाले, 'मेरीवेदर मैदानावरील दहा एकर जागा भारत स्काउट संस्था, जिल्हा होम गार्ड व सैनिक कल्याण या तीन संस्थांना ९९ वर्षांच्या कराराने दिली आहे. यासाठी एक रुपया नाममात्र भाडेपट्टी देण्यात येते. १९९२ साली जिल्हा लॉन टेनिस असोसिएशनने ३०० बाय ६०० फूट जागा घेतली. संपूर्ण जागेवर कपांऊड घालून बंदिस्त केली. काही वर्षांपूर्वी आणखी जागा घेण्याचा प्रयत्न केला. तो प्रयत्न शिवसेना जिल्हाप्रमुखांनी हाणून पाडला. आता पुन्हा असोसिएशनकडून जागा बळकावण्याचा प्रयत्न सुरू आहे. त्यासाठी १२ फुटाचे कपाउंड घातले जात आहे. याविरोधात संस्थेच्यावतीने तक्रार नोंदविली आहे. शाळेतील विद्यार्थ्यांना समाजसेवेचे धडे शालेय जीवनात देणारी संस्था म्हणून स्काऊटकडे पाहिले जाते. अशा संस्थेची जागा बळकावण्याचा प्रयत्न झाल्यास तो ताकदीने हाणून पाडू.' दरम्यान लॉन टेनिस असोसिएशनच्यावतीने महापालिका प्रशासनाशी संपर्क साधल्यानंतर बांधकाम थांबवण्याचे आदेश दिले. पुन्हा बांधकाम करण्याचा प्रयत्न केल्यास कोर्टात धाव घेणार असल्याचे प्राचार्य पोवार यांनी सांगितले. पत्रकार बैठकीस महापालिकेच्या प्राथमिक शिक्षण मंडळाचे सभापती आशोक जाधव, शोभा तावडे उपस्थित होते.

म. टा. प्रतिनिधी, कोल्हापूर

हमीभावापेक्षा कमी दराने साखर विक्री करणाऱ्या साखर कारखान्यावर कारवाई करावी, असा आदेश केंद्रीय खाद्य आणि सार्वजनिक वितरण विभागाने राज्याच्या साखर आयुक्तांना दिला आहे. या आदेशाने साखर उद्योगात खळबळ उडाली असून कमी दराने साखर विक्री करणाऱ्या कारखान्यांची चौकशी होण्याची शक्यता वर्तवली जात आहे.

केंद्र सरकारने गतवर्षी साखरेचा हमीभाव प्रतिक्विंटल २९०० रुपये केला होता. पण दर वाढवून प्रतिक्विंटल ३५०० रुपये करावा, अशी मागणी कारखानदारांनी केली होती. हा दर दिला ऊस उत्पादकांना उसाला प्रतिटन एकरकमी एफआरपी देणे शक्य होईल, असा दावाही केला होता. दोन महिन्यांपूर्वी केंद्र सरकारने साखरेचा हमीभाव प्रतिक्विंटल ३१०० रुपये केल्याने साखरेला चांगला दर मिळण्याची आशा निर्माण झाली होती. पण काही खासगी व सहकारी कारखान्यांनी थेट ३१०० रुपयांपेक्षा कमी दराने साखर विक्री केल्याने साखर उद्योगात अस्थिरता निर्माण झाली.

ज्या कारखान्यांनी साखरेचा दर कमी करुन विक्री केली त्यांच्या साखरेचा चांगला उठाव झाला आहे. पण ३१०० रुपये हमीभावावर ठाम राहिलेल्या कारखान्यांचा साखरेचा उठाव झाला नाही. त्यामुळे कारखानदारांत अस्वस्थता निर्माण झाली होती. या पार्श्वभूमीवर काही कारखानदारांनी थेट केंद्रीय खाद्य आणि सार्वजनिक वितरण विभागाकडे तक्रार अर्ज केले. दरम्यान, बुधवारी (ता.२०) केंद्रीय खाद्य व सार्वजनिक वितरण विभागाचे अंडरसेक्रेटरी जितेंद्र जुयाल यांनी थेट राज्याच्या साखर आयुक्तांना नोटीस पाठवली आहे. त्यामध्ये कमी दराने साखर विक्री करणाऱ्या कारखान्यांवर कारवाई करण्याचे आदेश दिले आहेत. त्यामुळे राज्यातील ज्या साखर कारखान्यांनी गेल्या दोन महिन्यात मोठ्या प्रमाणावर साखर विक्री केली आहे, त्यांची चौकशी होण्याची शक्यता आहे.

दुसरीकडे राज्याच्या साखर आयुक्तांनी कमी दराने साखर विक्री करणाऱ्या कारखानदारांची गंभीर दखल घेत २८ मार्च रोजी राज्यातील सर्व कारखानदारांची बैठक बोलावली आहे. या बैठकीला कारखान्याचे अध्यक्ष किंवा कार्यकारी संचालकांनी उपस्थित रहावे, अशी नोटीस पाठवली आहे.

.....

कोट

'केंद्रीय खाद्य व सार्वजनिक वितरण विभागाने राज्याच्या साखर आयुक्तांना कमी दराने साखर विक्री करणाऱ्यावर कारखान्यांवर कारवाई करण्याचे आदेश दिले आहेत. त्यामुळे कारखान्यांना साखर विक्रीचा ताळेबंद द्यावा लागणार आहे.

पी.जी. मेढे, कार्यकारी संचालक, राजाराम कारखाना

.......

राज्यातील एकूण कारखाने १९५

कोल्हापूर विभागातील कारखाने ३६

राज्यातील एकूण ऊस गाळप ९१२ लाख मेट्रिक टन

राज्यातील एकूण साखर उत्पादन १०१ लाख क्विंटल

राज्यात सध्या सुरु असलेले कारखाने ११६

राज्यात गाळप बंद झालेले कारखाने ७९

म. टा. प्रतिनिधी, कोल्हापूर

माध्यमिक शिक्षणाधिकारी किरण लोहार यांच्या कामकाजाच्या चौकशी अहवालावर शिक्षण समिती सभापतींची स्वाक्षरी न झाल्याने हा अहवाल पुन्हा लांबणीवर पडला. शिक्षण समिती सभापती अंबरिश घाटगे यांची स्वाक्षरी झाली नसल्याने स्थायी समितीत अहवाल सादर केला नसल्याची माहिती प्रशासनाने सदस्यांना दिली. प्रत्येक वेळी काही ना काही कारणाने चौकशी अहवाल लांबणीवर पडल्याने तर्कवितर्क लढविले जात आहेत.

जि. प. अध्यक्षा शौमिका महाडिक यांच्या अध्यक्षतेखाली बुधवारी सभा झाली. सध्या लोकसभा निवडणुकीची आचारसंहिता लागू असल्याने सभेत कोणतीही धोरणात्मक चर्चा झाली नाही. दरम्यान बुधवारच्या सभेत शिक्षणाधिकारी लोहार यांच्या कामकाजाची चौकशी अहवाल सादर होणार होता. शिक्षण समिती सभापती घाटगे, सदस्य अरुण इंगवले, प्रसाद खोबरे, भगवान पाटील, समिती सचिव आणि उपमुख्य कार्यकारी अधिकारी रविकांत आडसूळ यांच्या समितीने चौकशीचे काम केले. ५० हून अधिक तक्रारदारांचे म्हणणे ऐकून घेतले. त्यामध्ये शिक्षक मान्यतेत अनियमितता, पदोन्नती डावलणे, नियमांना फाटा देऊन शिक्षण संस्थांना मान्यता, मुख्याध्यापकपदाच्या पदोन्नतीमध्ये दुजाभाव अशा गंभीर तक्रारी आढळल्या.

चौकशी समितीने २० पानी अहवालात या गंभीर तक्रारी नोंदविल्या आहेत. स्थायी समिती सभेत हा अहवाल सादर झाल्यानंतर राज्य सरकारकडे कारवाईसाठी शिफारस करण्यात येणार होती. मात्र अहवाल तयार होऊनही स्थायी समितीपुढे सादर करण्यास चालढकल सुरू असल्याची चर्चा वेगावली आहे. या साऱ्या पार्श्वभूमीवर बुधवारच्या सभेकडे लक्ष होते. सदस्य जयवंत शिंपी यांनी अहवाल सादर केव्हा करणार अशी विचारणा सभेत केली.

उपमुख्य कार्यकारी अधिकारी आडसूळ यांना याबाबत विचारले असता, 'लोहार यांचा चौकशी अहवाल तयार आहे, मात्र त्यावर चौकशीप्रमुख व शिक्षण समिती सभापती अंबरिश घाटगे यांची स्वाक्षरी झालेली नाही. ते सभेला अनुपस्थित राहिल्याने अहवाल सादर करता येणार नाही.' दरम्यान सीईओ अमन मित्तल यांनी विकासकामांच्या फायलीसंदर्भात एका कर्मचाऱ्याला नोटीस काढली होती. त्याप्रश्नी चर्चा झाली. सदस्य कल्लाप्पाण्णा भोगण, युवराज पाटील यांनी सहभाग घेतला. दरम्यान सभेला जि. प. उपाध्यक्ष सर्जेराव पाटील, महिला व बालकल्याण समिती सभापती वंदना मगदूम, राहुल पाटील, सदस्या संध्याराणी बेडगे उपस्थित नव्हत्या.

म. टा. प्रतिनिधी, कोल्हापूर

'खासदार धनंजय महाडिक यांचे कार्य कौतुकास्पद आहे. येत्या लोकसभा निवडणुकीत खासदार म्हणून त्यांनाच निवडून देणे लोकहिताचे ठरणार आहे राष्ट्रवादीचे नेते शरद पवार यांचे हात बळकट करण्यासाठी कोल्हापुरातून खासदार महाडिकांचा विजय ही काळाची गरज असल्याचे प्रतिपादन आमदार हसन मुश्रीफ यांनी केले.

कागल तालुक्यातील अर्जुनी, लिंगनूर, मेतके, करड्याळ येथे आायेजित प्रचार सभेत बोलत होते. मुश्रीफ म्हणाले, 'खासदार महाडिकांनी लोकसभेत जिल्ह्यातील विविध प्रश्नांना वाचा फोडली. त्यामुळे त्यांना सलग तिसऱ्यांदा संसदरत्न पुरस्कार मिळाला. विरोधी पक्षात असूनही पाच वर्षात कोट्यवधी रुपयांची विकासकामे केली. समाजातील सर्वच घटकांच्या समस्या जाणून त्या नियोजनबद्धरित्या सोडविल्या'

बिद्री कारखान्याचे संचालक प्रविणसिंह भोसले म्हणाले, 'वाडवडिलांच्या नावांनी मते मागण्याचे दिवस आता संपले आहेत. मिळालेल्या सत्तेचा वापर लोकांच्या कल्याणासाठी करणाऱ्यांच्या पाठीशी मतदार ठामपणे राहतील. लोकांमध्ये भाजप सरकारविरोधात चीड आहे. यामुळे सूज्ञ नागरिक खासदार महाडिकांना निवडून देतील.' याप्रसंगी सरपंच मयूर आवळेकर, सचिन आळवेकर,युवराज देसाई, रणजित पाटील, अरुण पाटील यांची भाषणे झाली. नितीन देसाई यांनी प्रास्ताविक केले. यावेळी पंचायत समिती सदस्य जयदीप पोवार, डी. पी. पाटील, तुकाराम देसाई, दादासो पेडणेकर आदी उपस्थित होते.

..........

म. टा. प्रतिनिधी, कोल्हापूर

पट्टणकोडोली (ता. हातकणंगले) येथे स्ट्रीट लाइट बसविण्याच्या कामाचे बिल काढण्यासाठी लाच घेतल्याप्रकरणी हातकणंगले पंचायत समितीमधील तत्कालीन गटविकास अधिकारी अरविंद धरणगुत्तीकर यांना सेवेतून निलंबित केले आहे. राज्य सरकारकडून बुधवारी हा आदेश जिल्हा परिषदेला मिळाला. त्यानुसार जिल्हा परिषदेने धरणगुत्तीकर यांच्या निलंबनाचा आदेश लागू केला आहे.

ठेकेदाराकने धरणगुत्तीकर यांच्याविरोधात १० हजार रुपयांची लाच मागितल्याची तक्रार लाचलुपत प्रतिबंधक विभागाकडे केली होती. जानेवारी २०१९ मध्ये हा प्रकार घडला होता. या प्रकरणी पोलिस कारवाई टाळण्यासाठी धरणगुत्तीकर अटकपूर्व जामिनासाठी प्रयत्नशील होते. गेल्या आठवड्यात त्यांना जामीन मिळाल्यानंतर शनिवारी ते कामावर रुजू झाले. दरम्यान, राज्य सरकारकडून बुधवारी त्यांना निलंबति करण्याच्या कारवाईचा आदेश जिल्हा परिषदेला मिळाला.

पट्टणकोडोलीत ९ ऑगस्ट ते २० सप्टेंबर २०१८ या कालावधीत स्ट्रीट लाइट बसविण्यात आले. या कामाचे एक लाख ५५ हजार ४०० रुपये बिलासाठी ठेकेदार पाठपुरावा करत होता. हे बिल देण्यासाठी पट्टणकोडोलीचे तत्कालीन ग्रामसेवक संभा कांबळे यांनी २५ हजार रुपयांची लाच मागितली होती. ठेकेदाराने लाचलुचपत प्रतिबंधक विभागाकडे तक्रार केल्यानंतर सापळा रचून ग्रामसेवकाला रंगेहाथ पकडले होते. याच कामासाठी धरणगुत्तीकर याने दहा हजारांची लाच मागितल्याची तक्रार ठेकेदाराने केली होती. या प्रकरणी त्यांच्याविरोधात पोलिसात गुन्हा दाखल झाला होता. यानंतर ते रजेवर गेले होते.

०००००

कोल्हापूर: निवडून आल्यानंतर खासदारांनी नागरिकांशी बांधिलकी कायम ठेवली पाहिजे. खासदार हा सर्वसामान्यांचा प्रतिनिधी आहे या भावनेतून काम केले. विकासाच्या प्रकल्पांची सुरुवात केली. त्यामुळे आदर्श खासदार अशी नागरिकांच्या मनात प्रतिमा निर्माण झाली आहे. यापुढेही कोल्हापूरच्या विकासाचे ध्येय पूर्णत्वाला नेण्यासाठी नागरिकांनी बळ द्यावे असे आवाहन खासदार धनंजय महाडिक यांनी केले. भागीरथी महिला संस्था आणि धनंजय महाडिक युवा शक्तीतर्फे आरकेनगर येथे महिला मेळावा आयोजित केला होता. महिला संस्थेच्या अध्यक्षा अरुंधती महाडिक मेळाव्याच्या अध्यक्षस्थानी होत्या. यावेळी अश्विनी माने, मनिषा गाडगीळ,वैशाली गवळी यांनी आरकेनगर परिसरातून खासदार महाडिकांना मताधिक्क्य देण्याची ग्वाही दिली. मेळाव्याला शुभांगी महाडिक, संगिता घोसाळकर, अश्रिता पिंपळे, नगरसेविका रुपाराणी निकम, बाळाबाई गाडगीळ, सुवर्णा पोवार, प्रभावती मगदूम आदी उपस्थित होते.

म. टा. प्रतिनिधी, कोल्हापूर

'भाजप-शिवसेना युतीचा प्रचार प्रारंभ कोल्हापुरातून होणार असल्याने विरोधकांच्या उरात धडक भरली आहे. काँग्रेस-राष्ट्रवादी आघाडीच्या प्राचार प्रारंभासाठी प्रियांका गांधी, सोनिया गांधी आणि शरद पवार यांना आमंत्रित केले जाणार असल्याची चर्चा विरोधक करत आहे. युतीच्या सभेमुळे आघाडीही सभा कोल्हापुरात व्हावी, असा विचार विरोधकांना करायला भाग पडले म्हणजे आमचा विजय आहे. युतीची विक्रमी सभा यशस्वी करून त्याचदिवशी लोकसभेचा विजय निश्चित होईल,' असा विश्वास पालकमंत्री चंद्रकांत पाटील यांनी व्यक्त केला.

जयलक्ष्मी सभागृहात भाजप-शिवसेनेच्या कोल्हापूर उत्तर विधानसभा मतदारसंघातील कार्यकर्त्यांच्या बैठकीत ते बोलत होते.

पालकमंत्री पाटील म्हणाले, 'अटलबिहारी वाजपेयी यांचे सरकार एका मताने पराभूत झाले होते, तर २००४ मध्ये भाजपला सात खासदार कमी पडल्याने काँग्रेसला सत्ता स्थापन करण्याची संधी मिळाली. यूपीएने दहा वर्षे सत्ता भोगत देश मागे नेला. त्यामुळे भावनेच्या आहारी न जाता या निवडणुकीत प्रत्येक खासदार महत्त्वाचा असल्याने यावेळी शिवसेनचा खासदार करण्यासाठी युतीच्या कार्यकर्त्यांनी पंतप्रधान मोदींच्या नेतृत्वाखाली केलेली विकासकामे जनतेपुढे घेऊन जावीत.'

केंद्र व राज्य सरकारने सकारात्मक कामांचा डोंगर उभारला असून, पालकमंत्री चंद्रकांत पाटील यांनी जिल्ह्यात अतिशय चांगले काम केल्याने युतीला मोठे मताधिक्य मिळेल, असा विश्वास आमदार राजेश क्षीरसागर यांनी व्यक्त केला. शिवसेनेचे उमेदवार प्रा. संजय मंडलिक म्हणाले, 'गेल्या लोकसभा निवडणुकीवेळी जिल्ह्यात शिवसेनेचे तीन आमदार होते, पण गेल्या साडेचार वर्षांत पुलाखालून बरेच पाणी वाहून गेले असून, पालकमंत्री चंद्रकांत पाटील, शिवसेनेचे तीन आमदार, भाजपचे कायकर्ते आणि काँग्रेसच्या मदतीच्या जोरावर लोकसभा निवडणुकीत विजय मिळेल.' संजय पवार यांनी लोकसभा निवडणुकीत दगाफटका होणार नाही यासाठी कार्यकर्त्यांना दक्ष राहण्याचे आवाहन केले. पश्चिम महाराष्ट्र देवस्थान समितीचे अध्यक्ष महेश जाधव यांनी, भाजप आणि शिवसेना या दोन शक्तींचे मनोमिलन झाल्याने लोकसभा निवडणुकीत विजय निश्चित असल्याचा विश्वास व्यक्त केला.

यावेळी शिवसेना शहरप्रमुख रविकिरण इंगवले, भाजप महानगर अध्यक्ष संदीप देसाई, ऋतुराज क्षीरसागर यांचीही भाषणे झाली. यावेळी माजी आमदार सुरेश साळोखे, महापालिका भाजप गटनेते नगरसेवक विजय सूर्यवंशी, शिवसेना नगरसेवक राहुल चव्हाण, भाजप नगरसेवक अजित ठाणेकर, विजय खाडे पाटील, आदी उपस्थित होते.

०००००००

सतेज प्रियांकाला येऊच देणार नाहीत

प्रियांका गांधी इंदिरा गांधींसारख्या दिसतात. त्या सुंदर दिसतात म्हणून जर मतदान होत असते तर हेमामालिनी, माधुरी दीक्षित, प्रियांका चोप्राही पंतप्रधान झाल्या असत्या, अशी टीका पालकमंत्री पाटील यांनी केली. विरोधकांच्या सभेला प्रियांका येणार असतील तर आमदार सतेज पाटील तिथे काय बोलणार? प्रियांका येऊ नयेत म्हणून सतेज पाटीलच प्रयत्न करतील, असेही ते म्हणाले.

०००००