कोल्हापूर टाइम्स टीम लोकसभा निवडणुकीसाठी २८ मार्चपासून प्रत्यक्ष अर्ज भरण्याची प्रक्रिया सुरू होत आहे. त्या पार्श्वभूमीवर इच्छुक उमेदवार आणि समर्थकांची अर्जांसोबतच्या कागदपत्रांसाठी धावपळ सुरू आहे. निवडणूक रिंगणातील उमेदवारांना पहिल्यांदाच गुन्हेगारीसंबंधीचा इतिहास इलेक्ट्रॉनिक चॅनेल्स, वृत्तपत्रांतून ठळक प्रसिद्ध करणे बंधनकारक करण्यात आले आहे. पाच वर्षांतील उत्पन्नवाढीच्या आलेखाचे प्रतिज्ञापत्रही द्यावे लागणार आहे. यासंबंधीची तयारी बहूतांश उमेदवारांनी पूर्ण केली आहे. कायदेतज्ज्ञांकडून कागदपत्रे तपासून घेतली जात आहेत. या निवडणुकीसाठी प्रत्येक उमेदवाराला ७० लाखांपर्यंत खर्चाची मर्यादा आहे. खर्चाचा हिशोब दाखवण्यासाठी अर्ज भरण्याआधीच्या दिवसापासून स्वतंत्र खाते उघडावे लागेल. मान्यताप्राप्त पक्षांच्या उमेदवारांना एक सूचक तर बिगर मान्यताप्राप्त पक्षाच्या उमेदवारांना दहा सूचक शोधावे लागणार आहे. खुल्या वर्गातील उमेदवारास २५ हजार तर आरक्षित प्रवर्गातील उमेदवारास साडेबारा हजार रुपये अनामत भरावी लागणार आहे. अर्जासोबत आयकर भरलेल्या पावत्या, सरकारी देणी नसल्याचे ना-हरकतपत्र जोडावे लागेल. अर्जात शैक्षणिक पात्रता, विवाहित-अविवाहित, स्वत:सह कुटुंबातील सर्व सदस्यांची पाच वर्षांतील उत्पन्नाची माहिती भरावी लागणार आहे. या माहितीसोबत अनुषंगिक कागदपत्रे द्यावी लागतील. ती संकलित करण्यासाठी उमेदवारांच्या समर्थकांची धावाधाव होत आहे. निवडणूक प्रक्रिया अशी २८ मार्च अर्ज भरण्यास सुरुवात ४ एप्रिल अर्ज भरण्याची अंतिम मुदत ५ एप्रिल दाखल उमेदवारी अर्जांची छाननी ८ एप्रिल अर्ज माघारीची अंतिम मुदत २३ एप्रिल सार्वत्रिक मतदान २३ मे निकाल पोलिस ठाण्यातून परवानगी सभा, बैठकांसाठीची परवानगी संबंधित पोलिस ठाण्यांतून घेणे सक्तीचे आहे. परवानगी न घेतल्यास आचारसंहिता भंगाचा आणि इतर बेकायदेशीर कृत्यांचे गुन्हे दाखल केले जात आहेत. त्यामुळे सर्वच प्रमुख पक्षांनी परवानगी घेण्यासाठी स्वतंत्र मनुष्यबळ तैनात केले आहे. निवडणूक प्रशासनाचे पथकही सभा, बैठकांतील घोषणा, भाषणांवर लक्ष ठेवून आहे. घोषणापत्राची सक्ती उमेदवारास फौजदारी प्रकरणांबाबत विहित नमुन्यांतील अर्जांतून घोषणापत्र भरून द्यावे लागणार आहे. त्यात न्यायालयाचे नाव, फौजदारी प्रकरणांची सद्यस्थिती, कलमे, अपराधाचे वर्णन, शिक्षा झाल्यास माहिती भरावी लागेल. गुन्ह्यांची माहिती उमेदवारी अर्ज मागे घेण्याच्या दिवसापासून ते मतदानाच्या तारखेपूर्वी दोन दिवस आधी तीनवेळा वृत्तपत्रे, वाहिन्यांमध्ये प्रसिद्ध करणे सक्तीचे आहे. माहिती प्रसिद्ध करणाऱ्या वृत्तपत्रांच्या प्रतींच्या खर्चाचा हिशोब जिल्हा निवडणूक अधिकाऱ्यांकडे द्यावे लागेल. खर्चाची माहिती ३० दिवसांत देण्याची सक्ती फौजदारी प्रकरणासंबंधीची माहिती प्रसिद्ध केलेल्या वर्तमानपत्रांचे नाव, प्रसिद्धीची तारीख, त्यासाठी केलेला खर्च, इलेक्ट्रॉनिक माध्यमांसाठी वाहिनीचे नाव, प्रसारीत झाल्याचा दिनांक, त्यासाठीच्या खर्चाची माहिती उमेदवारास स्वत:च्या सहीनिशी द्यावी लागणार आहे. ही माहिती निकाल लागल्यानंतर ३० दिवसांत राज्याच्या मुख्य निवडणूक अधिकाऱ्यांना पाठविण्यात येणार आहे.
मोबाइल अॅप डाउनलोड करा आणि राहा अपडेट