महाराष्ट्र टाइम्सच्या चित्रकला स्पर्धेला उत्स्फूर्त प्रतिसाद
कोल्हापूर टाइम्स टीम
शाळकरी मुलांच्या कल्पनाविष्कारातून कागदावर अवतरणाऱ्या वेगवेगळ्या कलाकृती, कधी रेषांचा खेळ तर कधी रंगाशी नातं जोडत हुबेहूब साकारणारी व्यक्तीचित्रे, आवडता पक्षी प्राण्यांपासून ते प्लास्टिकमुक्तीच्या जागरापर्यंतचा संदेश देणाऱ्या चित्रांची दुनिया रविवारी बालचमूच्या कॅनव्हासवर अवतरली. 'महाराष्ट्र टाइम्स'च्या सहाव्या वर्धापनदिनानिमित्त आयोजित शाळकरी मुलांच्या चित्रकला स्पर्धेच्या निमित्ताने रंग रेषांची चित्रशाळा अनुभवता आली. पहिली ते दहावी पर्यंतची हजारो मुले अक्षरश चित्रांच्या दुनियेत हरवली. आणि रविवारच्या सुट्टीचा दिवस जणू आनंदाची पर्वणी ठरला. भुरभुरता पाऊस आणि 'कलासंगम'च्या मंचावर रंग रेषांचा बहर असे चित्र विलोभनीय पहावयास मिळाले.
'महाराष्ट्र टाइम्स'च्या वर्धापनदिनानिमित्त आयोजित चित्रकला स्पर्धेत कोल्हापूरसह आसपासच्या गावातील हजारो मुलांनी सहभाग घेतला. सकाळी ९.३० वाजण्याच्या सुमारास दि न्यू एज्युकेशन सोसायटीच्या परिसर विद्यार्थ्यांच्या गर्दीने फुलला. दि न्यू एज्युकेशन सोसायटीचे सचिव प्राचार्य पी. एस. हेरवाडे, डाइस अकॅडमीच्या दिशा पाटील, महाराष्ट्र राज्य कला अध्यापक संघ, जिल्हाध्यक्ष प्रशांत जाधव, शिवाजी म्हस्के आदींच्या हस्ते रोपट्याला पाणी घालून अनोख्या पद्धतीने चित्रकला स्पर्धेचे उद्घाटन झाले.
स्पर्धेच्या तीनही गटातील विद्यार्थ्यांची स्वतंत्र बैठक व्यवस्था केली होती. स्पर्धेला प्रारंभ होताच मुलांनी मनातील उमलते तरंग कागदावर रेखाटण्यास सुरुवात केली आणि काही मिनिटांतच चित्रशाळा आकाराला येऊ लागली. प्रत्येक गटातील विद्यार्थी आपल्या आवडत्या विषयाचे रेखाटण आणि उत्कृष्ट रंगसंगती करत जणू चित्रांच्या दुनियेत हरविले. तास, दीड तासाच्या प्रयत्नानंतर मनासारखा चित्र आकाराला आल्यानंतर प्रत्येकाच्या चेहऱ्यावरील आनंदाच्या छटा आणखीनच फुलल्या. स्पर्धा संपल्यानंतर प्रत्येक विद्यार्थ्याला सहभाग प्रमाणपत्र प्रदान केल्यानंतर त्यांचा आनंद द्विगुणित झाला. कोल्हापूर जिल्हा कला अध्यापक संघ, कोल्हापूर आर्ट फाऊंडेशन व दि न्यू एज्युकेशन सोसायटी यांच्या सहकार्याने ही स्पर्धा झाली. पेटाळा येथील राम गणेश गडकरी सभागृह, प्रिन्सेस पद्माराजे गर्ल्सस हायस्कूल आणि विमला गोयंका इंग्लिश मीडियम स्कूल येथे चित्र दुनिया अवतरली. या स्पर्धेचे मुख्य प्रायोजक डाइस अकॅडमी होते तर श्री मुरारी मुद्रणालयचेही सहकार्य लाभले.
चिमुकल्यांना आकर्षण पक्षी, प्राणी अन् विदूषकाचे
पक्षी, प्राणी आणि सर्कशीतील विदूषक हे लहान मुलांच्या आकर्षणाचा केंद्रबिंदू. इयत्ता पहिली ते चौथीपर्यंतच्या विद्यार्थ्यांना चित्रकलेसाठी हेच विषय सुचविले होते. आवडत्या विषयावर चित्र काढण्याची संधी लाभताच लहानग्यांचा हुरुप आणखी वाढला. रंगीबेरंगी मुखवटे परिधान केलेला, खदखदून हसविणारा विदूषक अशी विविध रुपे कागदावर उतरु लागली. कुणी नानाविध पक्ष्यांच्या दुनियेत हरविले. तर कोण प्राण्यांची चित्रे काढू लागला. मोर, पोपट, चिमणी, कोकिळा या पक्ष्यांच्या चित्रात रंग भरत हुबेहूब चित्र साकारण्यासाठी त्यांची चाललेली धडपड वाखाणण्याजोगी होती. प्राण्यांची ओळख करुन देताना अनेकांनी घोडा, बैलजोडी, हत्ती, उंट, पाळीव कुत्रा यांना पसंती दिली. राम गणेश गडकरी सभागृहात झालेल्या या लहान गटातील चित्रकला स्पर्धेला उदंड प्रतिसाद मिळाला.
वाहतूक सुरक्षा आणि निसर्ग संवर्धनही
इयत्ता पाचवी ते सातवीच्या विद्यार्थ्यांची चित्रकला स्पर्धा 'वाहतूक सुरक्षा आणि हेल्मेटचा वापर, मिरवणूक, वृक्षारोपन व संवर्धन' या विषयावर रंगली. मुलांनी या स्पर्धेच्या माध्यमातून आवडता सण चित्रबद्ध केला. काही मुलांनी तर सार्वजनिक गणेशोत्सववर चित्र रेखाटन केले. आकर्षक गणेश मूर्ती, त्याभोवती केलेली सुंदर अशी आरास, वाजत गाजत काढलेली मिरवणूक असे अनेक प्रसंग विद्यार्थ्यांनी चित्रातून जिवंत केले. खरं तर, मिरवणुकीचा माहौल चित्रात उतरविणे अवघड, मात्र विद्यार्थ्यांनी अतिशय खुबीने मिरवणूक कागदावर आणली. वृक्षारोपण आणि संवर्धन या विषयावर शाळकरी मुलांच्या सजगवृत्तीचे दर्शन घडले. वाढते प्रदूषण रोखण्यासाठी निसर्ग संवर्धन, वृक्ष लागवड ही निकड त्यांनी चित्रांतून मांडली.
आयडॉलला चित्रबद्ध करताना....
आठवी ते दहावी या वयोगटातील विद्यार्थ्यांसाठी आवडते व्यक्तिमत्व, आवडता सण आणि प्लास्टिकमुक्ती हे विषय होते. आवडते व्यक्तिमत्व रेखाटताना विद्यार्थ्यांमधील कलागुण बहरले. सहभागी स्पर्धकांनी अतिशय तन्मयतेने आपआपल्या 'आयडॉल'ला चित्र रुप देताना कुठलीच कसर राहू नये याची खबरदारी घेत होता. छत्रपती शिवाजी महाराज, महात्मा गांधी, पंडित नेहरु, भगतसिंग, राजर्षी शाहू महाराज, रणरागिनी ताराराणी, क्रांतिज्योती सावित्रीबाई फुले यांची व्यक्तीचित्रे रेखाटली. माजी पंतप्रधान अटलबिहारी वाजपेयी यांचे व्यक्तीचित्र रेखाटत स्मृती जागविल्या. 'प्लास्टिकमुक्तीचा जागर, प्लास्टिक टाळा पर्यावरण वाचवा'अशी सामाजिक विषयावरील चित्रे रेखाटत विद्यार्थ्यांनी लक्ष वेधून घेतले.
'त्या' मुलांची चित्रे ठरली विशेष लक्षवेधी
समर्थ विद्या मंदिरमधील २६ दिव्यांग विद्यार्थी आणि विनयकुमार मदनमोहन लोहिया कर्णबधिर विद्यालयामधील ३५ विद्यार्थी स्पर्धेतील विशेष आकर्षण ठरले. या विद्यार्थ्यांनी तीनही गटातील विषयानुरुप चित्रे रेखाटली. गणेश उत्सव, दहीहंडीचे चित्रण, पक्षी, प्राण्यांची चित्रांनी उपस्थितांची वाहवा मिळवली. वाहतूक सुरक्षा आणि हेल्मेपटचा वापर या विषयावरील चित्रामध्ये विद्यार्थ्यांच्या या प्रश्नाकडे पाहण्याची सकारात्मक दृष्टी दिसली.
