म. टा. वृत्तसेवा, कराड

कोयना पाणलोट क्षेत्रात मुसळधार पावसाची संततधार सुरू असून, जलाशयाच्या पाणीसाठ्यात प्रतिसेकंद १४ हजार २९१ क्युसेक पाण्याची आवक सुरू झाली आहे. त्यामुळे गुरुवारी सायंकाळपर्यंत धरणातील पाणीसाठा ३५.३२ टीएमसी इतका झाला आहे.

संपूर्ण पाटण तालुक्यासह कोयना पाणलोट क्षेत्रात बुधवारी रात्रीपासून, मुसळधार पर्जन्यवृष्टी सुरू झाली आहे. अवघ्या बारा तासांत कोयना पर्जन्यमापन केंद्रावर तब्बल १५२ मिलिमीटर इतक्या पावसाची नोंद झाली. त्यामुळे कोयना धरणात प्रतिसेकंद १४ हजार २९१ क्युसेक इतक्या पाण्याची आवक सुरू झाली आहे. संततधार पावसामुळे धरणाच्या पाणीसाठ्यात झपाट्याने वाढ होत आहे. बारा तासांत तीन टीएमसी इतक्या पाण्याची वाढ होऊन धरणातील पाणीसाठा ३५.३२ टीएमसी इतका झाला आहे.

पाटण तालुक्यात सर्वत्र दिवसभर पावसाची संततधार सुरू असल्यामुळे कोयना नदीसह तालुक्यातील मोरणा, केरा नद्यांच्या पाणीपातळीत वाढ होऊ लागली आहे. तर, पाणलोट क्षेत्रातील धबधबे, ओढे, नाले पूर्ण क्षमतेने भरून वाहू लागले आहेत. दरम्यान, गुरुवारी सकाळी आठ ते सायंकाळी पाच वाजेपर्यंत कोयनानगर येथे ६८(१३५३),नवजा ६८(११८५) आणि महाबळेश्वर येथे ९१ (१०१८)मिलिमीटर इतक्या पावसाची नोंद झाली असून धरणाची पाणीपातळी २०८६.१ फूट आणि ६३५.८३८ मीटर इतकी झाली आहे.

'जैन धर्माकडून एकात्मतेची शिकवण'

डॉ. संजय जाधव यांचे प्रतिपादन

म. टा. प्रतिनिधी, कोल्हापूर

'जैन धर्माने कुणाचाही द्वेष न करता, वेगळेपणाची भावना न बाळगता सर्वांना एकत्र घेऊन एकात्मतेचे शिकवण रुजवली', असे प्रतिपादन डॉ. संजय जाधव यांनी केले. राजर्षी शाहू स्मारक भवन येथील व्याखानमालेत ते बोलत होते. 'जैन धर्म : आजच्या संदर्भात' असा व्याख्यानाचा विषय होता. अध्यक्षस्थानी जिल्हा परिषदेचे अतिरिक्त मुख्य कार्यकारी अधिकारी इंद्रजित देशमुख होते. नाबार्डचे माजी अध्यक्ष डॉ. यशवंत थोरात यांची प्रमुख उपस्थिती होती.

डॉ. जाधव यांनी जैन धर्म व जैन तत्वज्ञानाचे संदर्भ व्याख्यानात उलगडून दाखवले. ते म्हणाले, 'जैन धर्मातील प्रत्येक तीर्थकराने विचार दिला आहे. भगवान महावीर यांच्या विचारांचे दर्शन समजून घेऊन ते आचरणात आणणे यासाठी अनेक वर्षे साधना करावी लागते. कर्मकांडांचे अवडंबर झाल्यावर ते टाळून जैन धर्माने विचारांची बैठक दिली. त्यामुळे जैन धर्माचे जगाला आकर्षण वाटले.'

डॉ. जाधव म्हणाले, 'मळलेल्या वाटेने न जाता खाचखळग्यांनी, काट्याकुट्यांनी भरलेल्या रस्त्याने ध्येयाच्या दिशेने अविचल मनाने जाणारे तीर्थकर होतात. जिथे बुद्धीचा मार्ग संपतो तिथे तत्वाचा मार्ग सुरु होतो. विचारातून तत्व निर्माण होते. तत्वाची साधना केल्यानंतर ज्ञानाचा विकास होतो. ध्येयाकडे मार्गक्रमण करताना मोहाची भुरळ पडते, घात होतात. पण जैन तीर्थकरांनी अविचल निष्ठा ठेवत ज्ञान प्राप्त केले. या ज्ञानाचा उपयोग समाजाला व्हावा यासाठी तीर्थकरांनी विविध ग्रंथाद्वारे मार्ग आखून दिले. या आखून दिलेल्या मार्गावर जैन धर्माचे मार्गक्रमण सुरु आहे. जैन तत्वज्ञान इतके बळकट आहे की कोणताही रक्तपात न करता पाच हजार वर्षे अहिंसा तत्वज्ञानावर टिकलेला धर्म आजही बळकट स्थितीत आहे.'

डॉ. जाधव म्हणाले, 'धर्म आणि विचारांची फारकत झाल्यावर धर्म अडचणीत येतो. विचार कधीही मारले जात नाहीत हे धर्माची प्रमुख शिकवण आहे. प्रत्येक धर्मातील शिकवण एकच आहे. पण आज माझा धर्म अन्य धर्मापेक्षा कसे श्रेष्ठ आहे हे सांगितले जाते. जैन धर्मातील अहिंसा, दया, क्षमा, शांती हे विचार जगाला दिले असून त्यावर सध्या मानवजातीचा व्यवहार सुरु आहे', याकडे त्यांनी लक्ष वेधले.

नाबार्डचे अध्यक्ष डॉ. यशवंत थोरात म्हणाले, 'जगभरात आजअखेर झालेली युद्धे ही धर्माच्या नावाखाली झाली आहेत. मनुष्य धर्मासाठी मरायला तयार आहे. मारायला तयार आहे, पण धर्मासाठी जगायला तयार नाही, अशी खंत व्यक्त केली. अहिंसा हा जीवनाचा पाया आहे. कुणालाही शब्दाने, कृतीने, कुठलाही मार्गाने दु ख न देणे हा जैन धर्माचा पाया आहे. हे तत्व भारतीयांनी स्वीकारले असल्याने देश एकसंघ राहिला आहे', असे मत व्यक्त केले. यावेळी डॉ. जे. एफ. पाटील उपस्थित होते. स्वागत प्रा. के. के. बेकनाळे यांनी केले.

धावपट्टीसाठी दहा एकर

जमिनीचे अधिग्रहण होणार

२८ कोटींची मागणी, परिसरातील १३२ अडथळे हटवण्यासाठी होणार प्रयत्न

म. टा. प्रतिनिधी, कोल्हापूर

विमानतळाच्या धावपट्टीचे विस्तारीकरण करण्यासाठी दहा एकर जमिनीची गरज आहे. जमीन अधिग्रहण करण्याचा प्रस्ताव राज्य सरकारकडे पाठवला असून, यासाठी २८ कोटी रुपयांची मागणी केली आहे. दरम्यान, विमानतळ विस्तारीकरणासाठी राज्य सरकारने ३० टक्के निधी देण्याचे कबूल केले होते. यातील पहिल्या टप्प्यातील रक्कम मंजूर करण्यात आली. निधीची घोषणा होत असतानाच विमानसेवा सुरू करण्याबाबत मात्र उदासिनता असल्याने प्रवाशांमधून नाराजी व्यक्त केली जात आहे.

विमानतळाचे विस्तारीकरण आणि नाईट लँडिंगसाठी गेल्या काही वर्षांपासून प्रयत्न सुरू आहेत. भारतीय विमान प्राधिकरणने यासाठी वाढीव जागेची मागणी केली होती. मोठी विमाने उतरवण्यासाठी धावपट्टीच्या विस्तारीकरणाची गरज आहे. यासाठी प्राधिकरणने दहा एकर जागेची मागणी केली आहे. निवासी उपजिल्हाधिकारी संजय शिंदे यांनी विमानतळ प्राधिकरणच्या अधिकाऱ्यांसह बुधवारी विमानतळ परिसराची पाहणी केली. राज्य सरकारकडून मंजुरी मिळताच जमिनीचे अधिग्रहण होणार आहे. यासाठी २८ कोटी रुपयांची गरज असून, याची राज्य सरकारकडे मागणी करण्यात आली आहे. धावपट्टीची लांबी वाढल्यास मोठी मालवाहू विमानेही कोल्हापूर विमानतळावर उतरणार आहेत.

राज्य सरकारने पावसाळी अधिवेशनात सादर केलेल्या पुरवणी मागण्यांमध्ये कोल्हापूरसह रत्नागिरी आणि चंद्रपूर या तीन विमानतळांसाठी ९६ कोटी रुपयांची तरतूद केली आहे. यातील नेमकी किती रक्कम कोल्हापूरच्या वाट्याला येणार याचे तपशील अद्याप विमानतळ प्राधिकरणसह जिल्हा प्रशासनालाही मिळालेले नाहीत. विमानतळाच्या विस्तारीकरणासाठी केंद्र सरकार ७० टक्के, तर राज्य सरकार ३० टक्के निधी देणार आहे. राज्याच्या वाट्याचा निधी देण्यास सुरुवात झाली असून, राज्य सरकारने पुरवणी यादीत तरतूद केल्याची माहिती आमदार अमल महाडिक यांनी दिली. या रकमेतून विमानतळावरील नाईट लँडिंगची सुविधा, सुरक्षा भिंत, वाढीव इमारतींची कामे केली जाणार आहेत. दरम्यान, विमानतळाच्या आसपास २० किलोमीटर अंतरात १३२ अडथळे असल्याचे विमानतळ प्राधिकरणच्या पाहणीत स्पष्ट झाले आहे. उंच इमारतींचे बांधकाम, उंच झाडे, केआयटी कॉलेजचा घुमट, मोबाइल कंपन्यांचे टॉवर, कळंबा उर्जा प्रकल्पाचाही अडथळ्यांच्या यादीत समावेश आहे. हे अडथळे हटवण्यासाठी प्रयत्न केले जाणार आहेत. विमानतळ प्राधिकरणच्या अधिकाऱ्यांनी ही यादी जिल्हा प्रशासनाकडे पाठवली आहे.

चौकट

विमानसेवेबाबत उदासिनता

एकीकडे विमानतळ विस्तारीकरणासाठी राज्य सरकारने निधीची तरतूद केली, तर दुसरीकडे सुरू असलेली प्रवासी विमानसेवा बंद झाली. केवळ दोन महिने विमानसेवा सुरू राहिली. यानंतर खंडित झालेली विमानसेवा सुरू करण्यासाठी एअर डेक्कनने काहीच प्रयत्न केले नाहीत. विमानसेवा सुरू करून पुन्हा बंद केल्याबद्दल संबंधित कंपनीवर कारवाई करावी, अशी मागणी लोकप्रतिनिधींनी केली आहे. निधीच्या तरतुदीचे स्वागतच आहे, मात्र विमानसेवा पूर्ववत सुरू राहावी अशी अपेक्षा प्रवाशांकडून व्यक्त केली जात आहे.

चौकट

उंचीचे धोरण ठरवा

भारतीय विमान प्राधिकरणने कोल्हापूर विमानतळाच्या आसपास २० किलोमीटर अंतरातील सर्व प्रकारच्या बांधकामांवर निर्बंध घातले आहेत. प्राधिकरणचे ना हरकत प्रमाणपत्र घेतल्याशिवाय कोणतेच बांधकाम करता येणार नाही. २० किलोमीटर अंतरात कोल्हापूर शहरासह कागल आणि सर्वच एमआयडीसींचा समावेश होतो. प्राधिकरणच्या या नियमामुळे बांधकामांबाबत संभ्रमावस्था आहे. कोल्हापुरात मोठ्या उंचीच्या इमारती नाहीत. जी बांधकामे सुरू आहेत, त्यांच्यावरही मर्यादा आल्याने बांधकाम व्यावसायिकांसह नागरिकांमध्येही अस्वस्थता आहे. याबाबत विमानतळ प्राधिकरणने संबंधित यंत्रणांसोबत बैठक घेऊन इमारतींच्या उंचीचे धोरण निश्चित करावे, अशी मागणी आमदार अमल महाडिक यांनी केली. या मागणीचे निवेदन त्यांनी गुरुवारी (ता. ५) नागपूर येथे पर्यटन राज्यमंत्री मदन येरावर यांना दिले.

फोटो आहे

म. टा. प्रतिनिधी, कोल्हापूर

सदरबाजार चौकात सतीश दिनकर कांबळे (वय ३३ रा. देवाळे, ता. करवीर) या मोटारसायकल चोरट्यास स्थानिक गुन्हा अन्वेषण शाखेच्या पोलिसांनी गुरूवारी शिफातीने अटक केली. त्याच्याकडून सुमारे ४० हजार रूपये किंमतीची बजाज पल्सर मोटारसायकल जप्त केली. धैर्यप्रसाद हॉल परिसरात पेट्रोलिंग सुरू असताना पोलिसांना एका मोटारसायकलवर 'पोलिस' असे लिहलेली दुचाकी दिसली. पोलिस हवालदार राजेश आडूळकर यांना शंका आल्याने त्यांनी मोटारसायकलस्वाराचा पाठलाग करून सदरबाजार चौकात पकडले. त्यावेळी मोटारसायकल क्रमांक चुकीचा आणि पोलिस नसतानाही वाहनावर पोलिस लिहल्याचे निदर्शनास आले. त्याच्याकडे कसून तपासणी केली असता त्याने पल्सर मोटारसायकल जानेवारी २०१८ मध्ये महालक्ष्मी चेंबर्समधून चोरल्याची आणि वाहनाचा मूळ क्रमांक काढून बनावट नंबरप्लेट लावल्याची कबुली दिली. आरोपी कांबळेने मोटारसायकलीच्या हेडलाइट आणि पाठीमागील पंख्यावर पोलिस लिहिले आहे. पोलिस असल्याचे सांगून फसवणूक केल्याची शक्यता नाकारता येत नाही. फसवणूक झालेल्यांनी संपर्क साधावा, असे आवाहन पोलिसांनी केले आहे.

विनयभंगप्रकरणी

दोघांना अटक

कोल्हापूर

महिलेचा विनयभंग केल्याप्रकरणी राजारामपुरी पोलिसांनी दोघांना अटक केली. महेश महादेव तेवरे (रा. बागल चौक) आणि सचिन शंकरराव फाळके (रा.जवाहरनगर) अशी त्यांची नावे आहेत. गुरूवारी पार्वती टॉकीज परिसरातील एक महिलेच्या घरात घुसून संशयित आरोपींनी शिविगाळ करीत विनयभंग केला. या प्रकरणी फिर्यादीने पोलिसांत तक्रार दाखल केली. आरोपींना न्यायालयासमोर उभे केले असता त्यांना न्यायालयीन कोठडी देण्यात आली.

०

महिलेची पर्स लंपास

कोल्हापूर

येथील आयकर विभागाच्या समोरील रस्त्यावरून अभियंता महिलेच्या हातातील पर्स दुचाकीस्वार चोरट्याने धूम स्टाईलने लंपास केली. लिपी अजित कामत (वय ३९ रा. ताराबाई पार्क) यांनी याबाबत शाहूपुरी पोलिस ठाण्यात तक्रार दाखल केली. गुरूवारी सकाळी मुलगा द्रिश याला शाळेला सोडण्यासाठी जाताना हा प्रकार घडला. पर्समध्ये रोख ११०० रुपये, वाहन परवाना आणि एका बँकेचे एटीएम कार्ड होते. परिसरातील सीसीटीव्ही फुटेजच्या सहाय्याने पोलिस चोरट्याचा तपास करत आहेत.

फोटो - आहे.

रंकाळा, संध्यामठाचे वैभव

जतन करण्याचा निर्णय

म. टा. प्रतिनिधी, कोल्हापूर

उर्वरित महाराष्ट्र वैधानिक विकास महामंडळाचे अध्यक्ष डॉ. योगेश जाधव यांनी गुरुवारी जिल्हाधिकारी कार्यालयात जिल्हाधिकारी अविनाश सुभेदार, आयुक्त डॉ. अभिजित चौधरी, मुख्य कार्यकारी अधिकारी डॉ. कुणाल खेमनार, जिल्हा नियोजन अधिकारी सरिता यादव यांच्यासोबत बैठक घेतली. यावेळी ऐतिहासिक रंकाळा टॉवर आणि रंकाळा तलावातील संध्यामठाचे वैभव जतन करण्याचा निर्णय घेण्यात आला.

बैठकीत शहरातील सार्वजनिक ठिकाणी, बागेत वॉटर एटीएम बसविणे, शहरात विद्यार्थ्यांसाठी सुसज्ज अभ्यासिका सुरू करणे, फळे, भाजीपाला तपासणीसाठी प्रयोगशाळा विकसित करण्याला प्राधान्य देण्याविषयी डॉ. जाधव यांनी चर्चा केली. कोल्हापूर जिल्ह्याचा पर्यटन विषयक आराखडाही तयार करण्याचा निर्णय झाला. रंकाळा तलाव प्रदूषणमुक्त करण्यासाठी पर्यावरण मंत्री रामदास कदम यांच्याशी चर्चा झाल्याचे डॉ. जाधव यांनी यावेळी सांगितले. जिल्हा परिषदेचे सीईओ डॉ. खेमनार यांनी जिल्हा परिषदेतर्फे राबविण्यात येत असलेल्या विविध योजनांची माहिती दिली. कोल्हापूर जिल्ह्यातील विविध विकास योजना, उपक्रमे, जिल्हा नियोजन समितीच्या योजना तसेच राज्य, केंद्र पुरस्कृत आणि पर्यटन विषयक योजना, ग्रामविकास विभाग, महानगरपालिकेकडील योजनांची माहितीही त्यांनी घेतली.

Gurubal.mali@timesgroup.com

gurubalmaliMT

कोल्हापूर : पासपोर्ट सुविधा प्रत्येकाला सहज उपलब्ध व्हावी, यासाठी प्रत्येक लोकसभा मतदारसंघात पासपोर्ट कार्यालय सुरू करण्यात येणार आहे. गेल्या सत्तर वर्षांत केवळ ७४ कार्यालयच सुरू झाल्याने नागरिकांची अडचण होत होती. यामुळे दीड वर्षात तब्बल २१४ शहरात कार्यालय सुरू करत ही प्रक्रिया अधिक सुकर करण्यात आली आहे. नव्या निर्णयाने कोल्हापूर पाठोपाठ आता हातकणंगले मतदारसंघातील इचलकरंजी किंवा जयसिंगपूर शहरात पासपोर्ट काढण्याची सुविधा उपलब्ध होणार आहे.

अलिकडे पासपोर्ट काढणाऱ्यांची संख्या मोठ्या प्रमाणात वाढली आहे. त्यामुळे लोकांच्या सोयीसाठी पासपोर्ट कार्यालयांची संख्या वाढवण्यात येत आहे. परराष्ट्र खात्यातील सचिव ज्ञानेश्वर मुळे यांनी याला गती दिली आहे. याचाच भाग म्हणून प्रथम सर्व जिल्हा पोष्टात ही सुविधा उपलब्ध करून देण्याचा निर्णय झाला. त्यानुसार कोल्हापूर, सांगली, सातारा, सोलापूरसह सर्व जिल्ह्याच्या ठिकाणी ही सुविधा उपलब्ध झाली. पासपोर्ट काढण्यासाठी पन्नास किलोमीटरपेक्षा अधिक लांब जाण्याची गरज भासू नये म्हणून आता लोकसभेच्या प्रत्येक मतदारसंघात पासपोर्ट कार्यालय सुरू करण्यात येणार आहे. यामुळे देशातील सर्व ५४३ लोकसभा मतदारसंघात ही सुविधा उपलब्ध होणार आहे.

पासपोर्ट काढण्यासाठी लांब जावे लागत असल्याने नागरिकांची अडचण होत होती. ही अडचण दूर करण्यासाठी या कार्यालयांची संख्या वाढवण्यात येत आहेत. यामुळे येत्या वर्षभरात आणखी पाचशेवर कार्यालये सुरू होणार आहेत. शिवाय व्हिसाही सहज मिळावा, यासाठीही प्रयत्न सुरू आहेत. एखाद्या देशात गेल्यानंतर अचानक व्हिसा वाढवून हवा असेल तर किरकोळ दाखल्याच्या पूर्ततेनंतर त्याला तो उपलब्ध करून दिला जाणार आहे.

कोट

लोकांची गैरसोय टाळण्यासाठी दीड वर्षांत २१४ ठिकाणी पासपोर्ट सुविधा उपलब्ध करून देण्यात आली. भविष्यकाळात घरी बसूनच पासपोर्ट काढण्याची सुविधा देण्यात येणार आहे.

ज्ञानेश्वर मुळे, परराष्ट्र खात्यातील सचिव

आषाढीपूर्वी पंढपुरात प्रारंभ

दरवर्षी लाखो भाविक पंढपूरला विठ्ठलाच्या दर्शनासाठी जातात. या शहराची गेल्या काही वर्षांत झपाट्याने वाढ होत आहे. यामुळे या शहरातही पासपोर्ट सुविधा उपलब्ध करून देण्यात येणार आहे. आषाढी यात्रेपूर्वी हे कार्यालय सुरू करण्यात येत आहे. त्याची तयारी पूर्ण झाली आहे.

प्रक्रिया अधिक सुलभ

आधारकार्ड, पॅनकार्ड, निवडणूक ओळखपत्र असेल तर त्वरित पासपोर्ट

तत्काळ पासपोर्टसाठी सनदी अधिकाऱ्याची शिफारस गरजेची नाही

पहिला पासपोर्ट नंतर पोलिस व्हेरिफिकेशन

देशभरात कुठेही पासपोर्टसाठी अर्ज करण्याची सुविधा

विवाहित महिलांना लग्नाच्या सर्टिफिकेटची गरज नाही

प्रत्येक पन्नास किमी अंतरावर पासपोर्ट कार्यालय

प्रादेशिक योजनेतील त्रुटी दुर्लक्षित

आमदार चंद्रदीप नरके यांचा विधीमंडळात आरोप

म. टा. प्रतिनिधी, कोल्हापूर

प्रादेशिक योजनेतील त्रुटीसंदर्भात पाच हजारावर तक्रारी दाखल आहेत. सरकारकडून प्रकारची चौकशी करुन त्रुटी दूर करण्यासाठी तांत्रिक समितीची स्थापना केली. पण या समितीकडून त्रुटी दूर करण्याविषयी कार्यवाही का होत नाही? असा सवाल आमदार चंद्रदीप नरके यांनी केला. नरके यांनी नागपूर येथे सुरू असलेल्या विधीमंडळ अधिवेशनात याबाबतची विचारणा केली.

आमदार नरके यांनी प्रसिद्धीस दिलेल्या पत्रकात म्हटले आहे, प्रादेशिक योजनेतील त्रुटीसंदर्भात पाच हजारावर तक्रारी आहेत. मुख्यमंत्री देवेंद्र फडणवीस व पालकमंत्री चंद्रकांत पाटील यांना वेळोवेळी निवेदन दिली. त्याची दखल घेत मुख्यमंत्र्यांनी विधानसभेमध्ये या प्रकाराची चौकशी करुन त्रुटी दूर केल्या जातील असे आश्वासन दिले होते. त्या अनुषंगाने तीन एप्रिल २०१८ रोजी तांत्रिक समितीची स्थापना केली. या समितीने त्वरित काम करणे गरजेचे आहे. संबंधित तक्रारदारांना आपली बाजू मांडण्यासाठी वेळ, ठिकाण कळविणे आवश्यक आहे. तक्रारदारांनी आपली बाजू समितीपुढे मांडण्यासाठी जाहीर नोटीसीव्दारे प्रसिद्धीकरण समितीने देणे आवश्यक आहे. प्रत्येक तक्रारदारास तीन मिनिटे वेळ दिला तरी सुनावणीचा कालावधी दीड महिना होतो. त्यानंतर तांत्रिक समितीने जागेवरील वस्तूस्थिती, तक्रारदारांच्या मुद्यांची वस्तुनिष्ठ शहानिशा करणे अपेक्षित आहे. यासाठी कमीत कमी दोन महिने कालावधी लागणार आहे. मात्र समितीने गेल्या तीन महिन्याचा कालावधी वाया घालवला. उर्वरित तीन महिन्यांत सुनावणी घेऊन यामागचाच कित्ता गिरवणार आहेत का. सरकारने नागरिकांच्या तक्रारीची योग्य दखल घेण्यासाठी दिलेल्या आदेशानुसार समितीने कामे करावीत' असे पत्रकात म्हटले आहे.

चिखली रोपवाटिका दरोड्यातील

४० लाखांचे रक्तचंदन जप्त

चंदगड तालुक्यात कार्वे येथे कारवाई; दोघांना अटक

म. टा. प्रतिनिधी, कोल्हापूर

चिखली (ता. करवीर) येथे वन विभागाच्या रोपवाटिकेवर टाकलेल्या दरोड्यातील ४० लाख रूपयांचे रक्तचंदन मौर्जे कार्वे (ता. चंदगड) येथे विक्रीसाठी आणताना स्थानिक गुन्हे अन्वेषण पथकाने पकडले. बुधवारी सापळा रचून ४० लाखांचे रक्तचंदन जप्त करून दोघांना अटक केली. महंमद समीउल्ला अब्दुलरशिद शेख (वय ४७), मोहमद रफिक मोहंमद समीउल्ला शेख (वय ३६, रा. दोघे शिमोगा, कर्नाटक) अशी अटक केलेल्यांची नावे आहेत.

१८ जुलै २०१७ रोजी चिखली (ता. करवीर) येथील वन विभागाच्या रोपवाटिकेवर मध्यरात्री दरोडा टाकून सुरक्षारक्षकाचे हातपाय बांधून चंदन तेल, रक्तचंदन असा ७० लाख रुपयांचा मुद्देमाल टेम्पो भरून नेला होता. या दरोड्यातील ४० लाख रुपयांचे रक्तचंदन विक्रीसाठी चंदगड तालुक्यातील मौजे कार्वे गावात येणार असल्याची माहिती स्थानिक गुन्हे अन्वषेणच्या पथकाला समजली होती. त्यानुसार बुधवारी सापळा रचून रक्तचंदन जप्त करण्यात आले. त्यांच्याकडून अडीच टन वजनाचे रक्तचंदन जप्त केले. या दरोड्याच्या गुन्ह्यात पूर्वी पाचजणांना अटक करून त्यांच्याकडून ६४ किलो श्वेतचंदन आणि १०० किलो चंदन तेल असा ६१ लाख रुपयांचा मुद्देमाल जप्त केला होता. दरोड्यातील सर्वच मुद्देमाल हस्तगत करण्यात स्थानिक गुन्हे अन्वेषण पथकाला यश आले. वन विभागाच्या रोपवाटिकेत ८ ते १० दरोडेखोरांनी मध्यरात्री दरोडा टाकला होता. सुरक्षारक्षकासह तेथील कर्मचाऱ्यांना बेदम मारहाण करून डांबून घालून चंदन तेलाचे डबे, रक्तचंदनाची लाकडे व श्वेतचंदन लाकडाचे तुकडे असा ७० लाख ५० हजार रुपयांचा मुद्देमाल लुटून नेला होता. स्थानिक गुन्हे अन्वेषणचे तत्कालीन पोलिस निरीक्षक दिनकर मोहिते यांनी व त्यांच्या पथकाने सांगली, सातारा, मुंबई, कर्नाटकात छापे टाकून संदीप बाळू वसव (वय २७, गणेशनगर, रेठरे बुद्रुक, ता. कराड, सातारा), शिवा ऊर्फ शिनू चंदनवाले (वय ३८, रा. रामोशीवाडा, गावठाण, ता. पंढरपूर, जि. सोलापूर), मच्छिंद्र विलास बनसोडे (वय ३०, रा. गणेशनगर, रेठरे बुद्रुक, सातारा), संतोष सुग्रीव खुर्द (वय ३५ रा. देगाव, पंढरपूर, सोलापूर), इरफान अजिज बेग (वय ४१, रा. शेषांद्री, पुरम, शिमोगा, ता. जि. शिमोगापूर) या पाचजणांना अटक केली होती.

या दरोड्याच्या गुन्ह्यातील उर्वरित मुद्देमाल जप्त करण्यासाठी पोलिस अधीक्षक संजय मोहिते यांनी स्थानिक गुन्हे अन्वेषणचे पोलिस निरीक्षक तानाजी सावंत यांच्यावर तपास सोपवला होता. रक्तचंदन विक्रीसाठी दोन व्यक्ती येणार असल्याची माहिती मिळाली होती. त्यानुसार उपनिरीक्षक राजेंद्र सानप यांच्या मार्गदर्शनाखाली तपास पथक तैनात केले होते. जप्त केलेल चंदन चिखली येथील दरोड्यातील असल्याची कबुली अटक केलेल्या दोघा संशयितांनी दिली. या कारवाईत उपनिरीक्षक युवराज आठरे, सचिन पंडित, राजेंद्र सानप, किरण गावडे, श्रीकांत पाटील, सुजय दावणे, अनमोल पोवार, असिफ कलायगार, प्रदीप नाकील आदी सहभागी झाले.

राजेश पाटीलच्या जामीन

अर्जावर २७ ला सुनावणी

म. टा. प्रतिनिधी, कोल्हापूर

सहायक पोलिस निरीक्षक अश्विनी बिद्रे हत्या प्रकरणातील संशयित आरोपी अभय कुरुंदकरचा मित्र ज्ञानदेव उर्फ राजेश पाटील याच्या जामीन अर्जावर गुरुवारी मुंबई उच्च न्यायालयात सुनावणी झाली. न्यायाधीश साधना जाधव यांच्यासमोर आरोपीचे वकील व सरकारी वकील यादव यांनी युक्तिवाद मांडला. दोन्ही बाजूच्या वकिलांचे म्हणणे ऐकून घेतल्यानंतर २७ जुलैला निर्णय देणार असल्याचे न्यायालयाने सांगितले. १४ जुलै २०१६ रोजी अश्विनी बिद्रे बेपत्ता झाल्याची भाऊ आनंद बिद्रे व पती राजकुमार गोरे यांनी कळंबोली पोलिस ठाण्यात तक्रार दाखल केली होती. त्यानंतर ३१ जानेवारी २०१७ रोजी हत्येच्या उद्देशाने अपहरणाचा गुन्हा दाखल करण्यात आला. फेब्रुवारीत अभय कुरुंदकर सात महिने गायब होता. डिसेंबर २०१७ मध्ये कुरुंदकर व त्याचा मित्र राजेश पाटील यांना अटक झाली. त्यावेळेपासून कुरुंदकर, पाटील, फळणीकर व खासगी कारचालक असे चौघेजण अटकेत आहेत. अभय कुरुंदकरनेही न्यायालयात जामीन दाखल केला होता. मात्र त्याच्या वकिलांनी पुन्हा जामीन मागे घेतला. त्यानंतर कुरुंदकरला बडतर्फ करण्यात आले.

खोशियारी कमिटीच्या शिफारसींची अंमलबजावणी करण्याची मागणी

कोल्हापूर टाइम्स टीम

ई. पी. एस. १९९५ पेन्शनरांना किमान नऊ हजार रुपये दरमहा पेन्शन आणि त्यावर महागाई भत्याची जोड द्यावी, यासह भगतसिंग खोशियारी कमिटीच्या शिफारशींची त्वरित अंमलबजावणी करावी, आदी मागण्यांकडे लक्ष वेधण्यासाठी भर पावसात शहर, जिल्ह्यातील पेन्शनर गुरुवारी रस्त्यावर उतरले. जिल्हा सेवानिवृत्त पेन्शनर संघटना, सर्व श्रमिक संघाच्या नेतृत्वाखाली दोन वेगवेगळे मोर्च जिल्हाधिकारी कार्यालय, भविष्य निवार्ह निधी कार्यालयावर निघाले. त्यावेळी केंद्र सरकार आणि पंतप्रधान नरेंद्र मोदी यांच्या पेन्शनर विरोधी धोरणांवर जोरदार टीका केली.

सुप्रीम कोर्टाच्या निर्णयानुसार सर्व पेन्शनरांना समान न्याय द्यावा, पेन्शनकरिता शेवटच्या १२ महिन्यांच्या वेतनाची सरासरी कायम ठेवावी, ६० महिन्यांची सरासरीची अट रद्द करावी, ई. एस. आय. लागू करून व्यवस्था सक्षम करावी, पेन्शन आणि आर. ओ. सी. सुविधा पुर्नस्थापित करावी, पेन्शनरांच्या हयात प्रमाणपत्राची सुविधा खाते असलेल्या बँकेतून मान्य करावी, या मागण्यांसाठी कोल्हापूर जिल्हा सेवानिवृत्त पेन्शनर संघटना, सर्व श्रमिक संघातर्फे केंद्र सरकारकडे पाठपुरवा सुरू आहे. मात्र सरकार मागणीकडे सोयीस्करपणे दुर्लक्ष करीत आहे.

दरम्यान, १६ जून रोजी सर्व श्रमिक संघाने पुणे येथे बोलावलेल्या बैठकीत पेन्शनरांच्या सर्व संघटना एकत्र येऊन भव्य मोर्चा काढण्याचा निर्णय घेतला. त्यानुसार पेन्शनर संघटना आणि श्रमिक संघाच्या नेतृत्वाखाली पेन्शनर सकाळी ११ पासून दसरा चौकात एकत्र आले. मात्र मोर्चा कोठून सुरू करायचा आणि मागण्या कोणाच्या लेटरहेडवर लिहायच्या यावरून श्रमिक संघ आणि पेन्शनर संघटनेच्या पदाधिकाऱ्यांत तीव्र मतभेद झाले. त्यातून मागण्या सारख्याच असूनही दोन वेगवेगळे मोर्चे निघाले. पेन्शनर संघटनेचा मोर्चा दसरा चौकातून निघाला. जिल्हाधिकारी कार्यालयावर आला. तेथे प्रमुख पदाधिकाऱ्यांची भाषणे झाली. जेष्ठ विचारवंत पन्नालाल सुराणा यांनीही पाठिंबा दिला. मागण्यांचे निवेदन निवासी उपजिल्हाधिकारी संजय शिंदे यांना देण्यात आले. मोर्चात शामराव मोरे, आनंद पाटील, शिवाजी देसावळे, दिलीप पाटील, आनंद आबिटकर, वाय. एस. पाटील आदी उपस्थित होते.

श्रमिक संघाचा मोर्चा लक्ष्मीपुरीतील त्यांच्या कार्यालयापासून सुरू झाला. तेथून मोर्चा दसरा चौकातून जिल्हाधिकारी कार्यालयावर आला. तेथे शिंदे यांनी निवेदन दिले. तेथून ताराबाई पार्कातील भविष्यनिर्वाह कार्यालयावर मोर्चा आला. तेथे प्रमुख पदाधिकाऱ्यांनी मागण्यासंबंधी भाषणे केली. मागण्या मान्य करण्यास विलंब होत असल्याबद्दल भाजप सरकारच्या कार्यपद्धतीवर टीका केली. मागण्यांचे निवेदन भविष्य निर्वाह निधीचे आयुक्त सौरभ नयनप्रसाद यांना देण्यात आले. यावेळी संघाचे आप्पा कुलकर्णी, अनंत कुलकर्णी, प्रकाश जाधव, इमान राऊत आदी उपस्थित होते.

मतभेद चव्हाट्यावर

मागण्या आपल्याच लेटर हेडवर असाव्यात आणि लक्ष्मीपुरीतूनच मोर्चा सुरू करावा असा श्रमिक संघाच्या नेत्यांचा आग्रह होता. याउलट भूमिका पेन्शनर संघटनेची राहिली. त्यातून मागण्या समान असूनही दोन वेगवेगळे मोर्चे निघाले. परिणामी मोर्चाची ताकद विभागली. दोन्ही संघटनेतील मतभेदही चव्हाट्यावर आले.

भक्तजन मंडळ

अध्यक्षपदी केळकर

कोल्हापूर : बाबा जरगनगर येथील भक्तजन प्रणित सांस्कृतिक मंडळाच्या अध्यक्षपदी चिंतामणी केळकर यांची तर उपाध्यक्षपदी शंकरराव शिंदे यांची बिनविरोध निवड झाली. सरदार करले यांची सचिवपदी तर खजानिसपदी पांडुरंग दत्तात्रय कुंभार यांची निवड झाली. सह सचिवपदी केरबा पाटील, वैभवी संजय जरग, अंतर्गत लेखा परीक्षकपदी नारायण कुलकर्णी यांची निवड झाली. विजयसिंह हजारे, मोहन टोळ, आनंद कुलकर्णी, धनंजय कुलकर्णी, राहुल चिकोडे, भारत रंगापुरे, राजश्री सूर्यवंशी, स्वाती देशपांडे, डॉ. डी. एन. माने, डॉ. विठ्ठल कुंभार, शामराव संकपाळ यांची सदस्यपदी निवड झाली.

म. टा. वृत्तसेवा, कराड

कोयना पाणलोट क्षेत्रात मुसळधार पावसाची संततधार सुरू असून, जलाशयाच्या पाणीसाठ्यात प्रतिसेकंद १४ हजार २९१ क्युसेक पाण्याची आवक सुरू झाली आहे. त्यामुळे गुरुवारी सायंकाळपर्यंत धरणातील पाणीसाठा ३५.३२ टीएमसी इतका झाला आहे.

संपूर्ण पाटण तालुक्यासह कोयना पाणलोट क्षेत्रात बुधवारी रात्रीपासून, मुसळधार पर्जन्यवृष्टी सुरू झाली आहे. अवघ्या बारा तासांत कोयना पर्जन्यमापन केंद्रावर तब्बल १५२ मिलिमीटर इतक्या पावसाची नोंद झाली. त्यामुळे कोयना धरणात प्रतिसेकंद १४ हजार २९१ क्युसेक इतक्या पाण्याची आवक सुरू झाली आहे. संततधार पावसामुळे धरणाच्या पाणीसाठ्यात झपाट्याने वाढ होत आहे. बारा तासांत तीन टीएमसी इतक्या पाण्याची वाढ होऊन धरणातील पाणीसाठा ३५.३२ टीएमसी इतका झाला आहे.

पाटण तालुक्यात सर्वत्र दिवसभर पावसाची संततधार सुरू असल्यामुळे कोयना नदीसह तालुक्यातील मोरणा, केरा नद्यांच्या पाणीपातळीत वाढ होऊ लागली आहे. तर, पाणलोट क्षेत्रातील धबधबे, ओढे, नाले पूर्ण क्षमतेने भरून वाहू लागले आहेत. दरम्यान, गुरुवारी सकाळी आठ ते सायंकाळी पाच वाजेपर्यंत कोयनानगर येथे ६८(१३५३),नवजा ६८(११८५) आणि महाबळेश्वर येथे ९१ (१०१८)मिलिमीटर इतक्या पावसाची नोंद झाली असून धरणाची पाणीपातळी २०८६.१ फूट आणि ६३५.८३८ मीटर इतकी झाली आहे.

म. टा. वृत्तसेवा, पंढरपूर

आषाढी एकादशीच्या सोहळ्याच्या तयारीचे नियोजन गावपातळीपासून मंत्रालयापर्यंत सुरू असतानाच पंढरपुरात मात्र गुरुवारी गटारीचे मैलामिश्रित पाणी चंद्रभागेत मिसळू लागल्याने प्रशासनाचा गलथान कारभार पुन्हा एकदा समोर आला आहे. गेल्या काही वर्षांपासून अनेकवेळेला हा घाणेरडा प्रकार समोर येऊनही प्रशासनाकडून कायमचे उपाय करण्यास सुरुवात झालेली नाही. चंद्रभागेच्या वाळवंटातच हे गटारीचे घाण पाणी साठविण्यात येत असून, हे पाणी वाळवंटातून उचलून दुसरीकडे न टाकल्याने वारंवार हे घाण पाणी चंद्रभागेच्या पाण्यात मिसळत असल्याने भाविकांत नाराजी आहे.

म. टा. वृत्तसेवा, कराड

राज्य उत्पादन शुल्क विभागाच्या पथकाने बुधवारी कराड तालुक्यातील जुळेवाडी येथील माजी सैनिक गजानन दादू पवार यांच्या घरावर छापा टाकून गोवा बनावटीच्या विविध ब्रँडच्या ३६४ बाटल्या आणि फक्त सैन्य दलातील आजी-माजी जवानांसाठी (डिफेन्स करिता) असलेल्या मद्याच्या ३३६ सीलबंद बाटल्या जप्त केल्या. सुमारे २ लाख २ हजार ५८२ रुपयांचा मुद्देमाल जप्त करून गजानन पवार यांच्यावर महाराष्ट्र दारुबंदी कायद्यातर्गंत गुन्हा नोंद करण्यात आला आहे. कारवाई दरम्यान फरार झालेले गजानन पवार बुधवारी रात्री स्वत:हून राज्य उत्पादन शुल्कच्या येथील कार्यालयात हजर झाल्यानंतर अटक करण्यात आली.

कृष्णा सहकारी कारखाना परिसरातील बिअरबार व मद्यविक्री दुकाने जवळपास वर्षभरापासून बंद आहेत. अशा परिस्थितीत या परिसरात मोठ्या प्रमाणावर बेकायदा दारू विक्री होत असल्याच्या तक्रारी राज्य उत्पादन शुल्क विभागाकडे आल्या होत्या. जुळेवाडी येथील माजी सैनिक गजानन दादू पवार हे दारू विक्री करत असल्याची माहिती मिळाल्यानंतर राज्य उत्पादन शुल्क विभागाचे कोल्हापूर विभागीय उपायुक्त वाय. एम. पवार यांच्या आदेशावरून सातारा विभागाच्या अधीक्षक स्नेहलता श्रीकर यांच्या मार्गदर्शनाखाली राज्य उत्पादन शुल्क विभागाच्या पथकाने पवार यांच्या घरावर छापा टाकला. या वेळी गोवा बनावटीच्या विविध ब्रँडच्या ३६४ बाटल्या आणि आजी - माजी जवानांसाठी असलेल्या मद्याच्या ३३६ बाटल्या मिळून आल्या.

रोटरी ऑफ गार्गीचे

ग्रीन सिटी अभियान

म. टा. प्रतिनिधी, कोल्हापूर

पर्यावरणाचा समतोल निर्माण होऊन प्रदूषण मुक्ती होण्यासाठी रोटरी क्लब ऑफ गार्गीच्यावतीने ग्रीन सिटी अभियान राबवण्यात येत आहे. अभियानतंर्गत 'महाराष्ट्र टाइम्स' व 'गार्गी'च्यावतीने ताराबाई पार्कातील महाराष्ट्र उद्यानात वृक्षारोपण करण्यात आले. तर राज्य सरकारच्या वृक्षलागवड मोहिमेतंर्गत शेंडा पार्क येथे सदस्यांच्यावतीने वृक्षारोपण करण्यात आले. वर्षभर 'गार्गी'च्यावतीने अभियान राबवून जास्तीत जास्त परिसर हिरवा करण्यात येणार आहे.

गार्डन्स क्लबच्यावतीने शहरातील महापालिका उद्यानामध्ये वृक्षारोपण आणि सुशोभिकरण करण्यात येणार आहे. यातंर्गत रविवारी महाराष्ट्र उद्यानामध्ये 'महाराष्ट्र टाइम्स, गार्डन्स क्लब व रोटरी क्लब ऑफ गार्गी'च्यावतीने वृक्षारोपण करण्यात आले. 'गार्गी'च्यावतीने उद्यानात ताम्हण वृक्षांचे रोपण करण्यात आले. यानंतर सर्व सदस्यांनी शेंडा पार्क येथील राज्य सरकारच्या वृक्षारोपण मोहिमेत सहभाग घेतला. 'गार्गी'च्यावतीने वर्षभ ग्रीन सिटी अभियान हाती घेतले असून ठिकठिकाणी वृक्षारोपण करण्यात येणार आहे. शिरोली एमआयडीसी येथे लवकरच शंभर झाडे लावण्यात येणार आहेत. यामध्ये प्रामुख्याने ताम्हण वृक्षांसह इतर जंगली झाडांचे रोपण करण्यात येणार आहे.

वृक्षारोपण प्रसंगी क्लबच्या अध्यक्षा सुजाता लोहिया, सेक्रेटरी कविता घाटगे, सुरेखा इंग्रोले, आशा जैन, विना सिन्हा, विशाखा आपटे, गौरी शिरगावकर, आरती पवार, सुप्रिया डोईजड, शितल कुलकर्णी, सविता पदे, डॉ. प्रीया जैन, गौरी शिरोडकर आदी उपस्थित होते.

कोल्हापूर : ब्राह्मण सभा मुंबईतर्फे समाजातील हुशार विद्यार्थ्यांना महाविद्यालयीन शिष्यवृत्ती देण्यात येणार आहे. या शिष्यवृत्तीसाठी भरावयाचे अर्ज ब्राह्मण सभा करवीर मंगलधाम येथे उपलब्ध आहेत. सकाळी दहा ते दुपारी एक आणि दुपारी चार ते सायंकाळी सात या वेळेत कार्यालयात अर्ज मिळतील. समाजातील विद्यार्थ्यांनी त्याचा लाभ घ्यावा, असे आवाहन ब्राम्हण सभा करवीर मंगलधामचे अध्यक्ष डॉ. उदय कुलकर्णी यांनी केले आहे.

(फोटो आहे)

कोल्हापूर : रोटरी क्लब ऑफ होरायझनचा पदग्रहण समारंभ मंगळवारी (ता. ३) पार पडला. सदानंद कोठावळे यांची अध्यक्षपदी, तर संजय साळोखे यांची सचिव पदावर नियुक्ती करण्यात आली. यावेळी रोटरी क्लब ऑफ होरायझनचे क्लब मेंबर मोठ्या संख्येने उपस्थित होते. मावळते सचिव संजय भस्मे यांनी वर्षभरातील कामकाजाचा आढावा घेतला. कार्यक्रमात मावळते अध्यक्ष देवराज नाईक-निंबाळकर यांनी आपल्या कार्यकालामध्ये सहकाऱ्यांनी केलेल्या सहकार्याबद्दल आभार मानले. यावेळी कोठावळे व साळोखे यांनी पदभार स्वीकारला. त्यानंतर कोठावळे यांनी इतर सदस्यांची नेमणूक केली. यावेळी अभिनेता हार्दिक जोशी, असिस्टंट गव्हर्नर अभिजित काळे यांच्यासह रोटरी क्लबचे पदाधिकारी आणि होरायझनचे सर्व रोटरियन सदस्य उपस्थित होते.