फोटो - .................... इचलकरंजीत काँग्रेसचा सायकल मोर्चा पेट्रोल, डिझेल दरवाढीचा निषेध म. टा. वृत्तसेवा, इचलकरंजी पेट्रोल- डिझेल दरात सातत्याने होणाऱ्या वाढीच्या निषेधार्थ इचलकरंजी शहर काँग्रेस कमिटीच्यावतीने सायकल मोर्चा काढण्यात आला. तर कॉ. मलाबादे चौकात केंद्र व राज्य सरकारच्या निषेधार्थ जोरदार घोषणाबाजी केली. सरकारने पारदर्शक कारभाराच्या नावाखाली जनतेच्या डोळ्यात धूळफेक करुन सर्वसामान्यांचे बजेटच कोलमडून टाकले आहे. पेट्रोल आणि डिझेल दरवाढीने सर्वसामान्यांची लूट केली जात असल्याची टीका शहर काँग्रेस कमिटीचे अध्यक्ष प्रकाश मोरे यांनी यावेळी केली. महागाईने त्रस्त जनता मेटाकुटीला आली असताना मागील दहा दिवसात पेट्रोल-डिझेलच्या दरात सातत्याने वाढ करुन सर्वसामान्यांना जगणे मुश्किलीचे केले आहे. अच्छे दिनाचे स्वप्न दाखवून जनतेची लूट करणाऱ्या केंद्र व राज्य सरकारच्या धोरणाच्या विरोधात व दरवाढीच्या निषेधार्थ इचलकरंजी शहर काँग्रेस कमिटीच्यावतीने शहर अध्यक्ष प्रकाश मोरे यांच्या नेतृत्त्वाखाली सायकल मोर्चा काढण्यात आला. राजर्षि शाहू महाराज पुतळ्यापासून मोर्चाला सुरुवात झाली. छत्रपती शिवाजी महाराज पुतळा, कॉ. मलाबादे चौक, महात्मा गांधी पुतळा मार्गावरुन मोर्चा कॉ. मलाबादे चौकात आला. त्याठिकाणी भाजप सरकारच्या विरोधात घोषणाबाजी करण्यात आली. यावेळी अहमद मुजावर, किरण कटके यांनी मनोगत व्यक्त केले. प्रकाश मोरे यांनी, सत्तेत येण्यापूर्वी भाजपकडून पेट्रोल, डिझेल दरवाढीसंदर्भात अनेक आंदोलने करण्यात आली. सर्वसामान्यांना महागाई कमी करण्याचे गोंडस गाजर दाखविले गेले. मात्र, सत्ता मिळताच प्रत्यक्षात काय झाले, याचे चित्र समोर आहे. इंधन दरवाढीमुळे महागाई मोठ्या प्रमाणात वाढली असून सर्वसामान्यांना याचा मोठा आर्थिक फटका बसत आहे. पेट्रोल-डिझेलवर दुष्काळाच्या नावाखाली कर लावून लूट सुरु असून सामान्य नागरिकांची लूटमार थांबणार कधी, असा सवाल केला. या आंदोलनात अशोकराव सौंदत्तीकर, इचलकरंजी विधानसभा युवक काँग्रेस अध्यक्ष अमृत भोसले, बाळासाहेब कलागते, सुनिल पाटील, संजय कांबळे, दीपक सुर्वे, महेश सातपुते, राजू बोंद्रे, महेश पाटील, महावीर केटकाळे, तौफिक मुजावर, रामदास कोळी, के. के. कांबळे, शेखर हळदकर यांच्यासह विविध संस्थांचे पदाधिकारी, नगरसेवक-नगरसेविका, सेलप्रमुख सहभागी झाले होते.
मोबाइल अॅप डाउनलोड करा आणि राहा अपडेट