शिवाजी तरुण मंडळाच्या शिवजयंती उत्सवास, 'गर्जना महाराष्ट्राची'मधून अविचारांवर ओढले ताशेरे
म. टा. प्रतिनिधी, कोल्हापूर
सोमवारी (ता. १९) होणाऱ्या शिवजयंतीसाठी शहरासह जिल्ह्यात शिवभक्तांच्या उत्साहाला उधाण आले असून, शिवजयंतीची जय्यत तयारी सुरू झाली आहे. भव्य मिरवणुका आणि प्रबोधनाचा जागर ठिकठिकाणी करण्यात येणार आहे. गल्लीबोळांत बच्चे कंपनी पताका लावण्यात मग्न असून, गडकोटांवरून शिवज्योत आणण्यासाठी तरुणाईने जय्यत तयार केली आहे. शिवाजी पेठेतील शिवाजी तरुण मंडळाच्या अश्वारूढ पुतळा मिरवणुकीने शुक्रवारपासून शिवजयंती उत्सवास सुरुवात झाली. 'जय भवानी, जय शिवाजी', 'शिवाजी महाराज की जय'च्या घोषणांमध्ये सकाळी अश्वारुढ पुतळ्याची मिरवणूक काढण्यात आली. मिरवणुकीत शेकडो कार्यकर्ते मोटारसायकलसह सहभागी झाले होते.
दरवर्षी शिवाजी तरुण मंडळाच्यावतीने शिवजयंती भव्यदिव्य स्वरूपात साजरी केली जाते. मंडळाच्या वतीने चार दिवस विविध कार्यक्रमांचे आयोजन केले आहे. शुक्रवारी दसरा चौकातून मिरवणुकीला सुरुवात झाली. मिरवणुकीचे उद्घाटन आमदार राजेश क्षीरसागर यांच्या हस्ते झाले. मंडळाचां तिरंगी ध्वज व भगवा ध्वज घेऊन कार्यकर्ते मोटारसायकलसह मिरवणुकीत सहभागी झाले होते. मिरवणूक दसरा चौक, आईसाहेब महाराज चौक, बिंदू चौक, शाहू मैदान, मिरजकर तिकटी, बिनखांबी गणेश मंदिर, अर्धा शिवाजी पुतळामार्गे उभा मारुती चौकात दाखल झाली. चौकात अश्वारूढ पुतळा दाखल झाल्यानंतर पुतळ्याची प्रतिष्ठापना करण्यात आली.
शिवाजी तरुण मंडळाची सकाळी मिरवणूक पार पडल्यानंतर शहरातील गल्लीबोळांत लहान मुले आपल्या परिसरात भगव्या पताका लावताना दिसत होते. तर काही युवक गटागटाने छत्रपती शिवाजी महाराजांचा पुतळा व मावळ्यांच्या प्रतिकृती खरेदी करण्यासाठी पापाची तिकटी, गंगावेश व कुंभार गल्लीत गर्दी केली होती. सायंकाळी 'गर्जना महाराष्ट्रा'चा कार्यक्रमातून शाहीर दिलीप सावंत यांनी अविचारांवर प्रहार केले. सहशाहीर संजय गुरव, महिला शाहीर दीप्ती सावंत व तृप्ती सावंत यांनी पोवाडे सादर केले. यावेळी पारंपरिक नृत्यांचे सादरीकरण झाले. महापौर स्वाती यवलुजे यांच्या हस्ते कार्यक्रमांचे उद्घाटन झाले.
दसरा चौकातून सुरू झालेल्या मिरवणुकीत शिवाजी तरुण मंडळाचे अध्यक्ष सुजित चव्हाण, माजी स्थायी समिती सभापती सचिन चव्हाण, अशोक जाधव, लालासाहेब गायकवाड, सुरेश जरग, सदाभाऊ शिर्के, उत्सव समिती अध्यक्ष विशाल बोंगाळे, शाहीर दिलीप सावंत, सागर भालकर, अक्षय मोरे, अभिषेक शिंदे, अभिजित राऊत, समीर वर्णे, योगेश इंगवले, सुनील राऊत यांच्यासह शेकडो कार्यकर्ते सहभागी झाले होते.
मोबाइल अॅप डाउनलोड करा आणि राहा अपडेट
