‘ कागल नगरपालिकेला लागलेल्या आगीसंदर्भात सीसीटीव्ही फुटेजमध्ये काय आहे याचा खुलासा पोलिसांनी लवकरात लवकर केला पाहिजे. जिल्हाधिकाऱ्यांनी चौकशी समिती नेमली पाहिजे. कोणी बिल्डर यामागे आहे का, हे देखील तपासावे लागेल. या घटनेची शहानिशा झालीच पाहिजे नाहीतर नगरसेवकांसह पोलिस ठाण्यासमोर उपोषणाला बसावे लागेल’ असा इशारा आमदार हसन मुश्रीफ यांनी कागल येथे पत्रकार परिषदेत दिला.
कागल नगरपालिकेला लागलेली लाग ही पालिकेच्या इतिहासात दुर्दैवी घटना आहे. वादाचा विषय होणार हे गृहीतच धरले होते, असे स्पष्ट करुन आमदार मुश्रीफ म्हणाले, ‘जनतेच्या मनातील संभ्रम दूर होणे आवश्यक आहे. घरकुलाचे पाप झाकण्यासाठी व गुंठेवारी प्रकरणे जाळली असे दोन आरोप भाजपने केले आहेत. त्यापैकी घरकुलाचे काम गेली काही वर्षे सुरु आहे. याबाबत माहितीच्या अधिकारात विरोधकांना दोन वेळा माहिती देण्यात आली आहे. त्याचा डाटाही शिल्लक आहे, म्हाडाकडेही त्याची कॉपी आहे. प्रकल्पाच्या कन्स्लटंटकडेही त्याची माहिती आहे. त्यामुळे पुन्हा ती माहिती गोळा होऊ शकते असे अधिकाऱ्यांनी अगोदरच सांगितलेलेच आहे.’
भारतीय जनता पक्षाने एवढे मोठे धडधडीत आरोप कसे काय केले, त्याचे काय कारण असावे, साडेतीन वर्षे आमची सत्ताही नाही. आम्ही काही गोलमाल केले आहे काय? एवढे दडविण्यासारखे व जाळण्यासारखे काय आहे? असे अनेक प्रश्न उपस्थित करुन मुश्रीफ म्हणाले, ‘याउलट आमचे नगरसेवक प्रविण काळबर व इतरांचे मी अभिनंदन करतो की त्यांनी सीसीटीव्हीचे फुटेज असलेले डीव्हीआर मशीन सुरक्षित काढून पोलिसांच्या ताब्यात दिले आहे. एकतर शॉर्टसर्किटमुळेच ही आग लागली असेल, अन्यथा हे कुणी केले, याचा खुलासा त्यातून होईलच. त्याहीपेक्षा मला असे वाटते की,कागलमध्ये सध्या मोठमोठे बिल्डर्स आलेले आहेत. कागलच्या एक चतुर्थांश मालकीची जमीन असलेले मोठे बिल्डरदेखील यामध्ये आहेत. त्यांच्या काही जमिनींवर आरक्षण आहे. बांधकामाला त्यांनी परवानगी घेतलेली आहे. ती परवानगी खोटी कागदपत्रे दाखल करुन घेतली की काय? त्यासाठीच उपद्व्याप झाला असावा की काय, अशी शंका आहे. मी कुणाचेही नाव घेतलेले नाही. मात्र याचीही सखोल चौकशी झाली पाहिजे. सीसीटीव्ही फुटेजमध्ये काय असेल ते जनतेपुढे आले पाहिजे. जळले की जाळले हे लोकांना कळालेच पाहिजे. सामान्य माणसांच्या मनातील शंकेचे निराकरण होणे गरजेचे आहे.’ यावेळी भैय्या माने, उपनगराध्यक्ष नितीन दिंडे, पक्षप्रतोद प्रविण काळबर, आनंदा पसारे, सौरभ पाटील, बाबासो नाईक आदी उपस्थित होते
मोबाइल अॅप डाउनलोड करा आणि राहा अपडेट
