Maharashtra Times

म. टा. वृत्तसेवा, सोलापूर
सोलापूर विद्यापीठाला राजमाता अहल्यादेवी होळकर यांचे नाव देण्याची घोषणा मुख्यमंत्री देवेंद्र फडणवीस यांनी केल्यानंतर सोलापुरातील वीरशैव लिंगायत समाजामध्ये नाराजी पसरली आहे. बुधवारी सायंकाळी सिद्धेश्वर मंदिरात झालेल्या सभेत सोमवारी सोलापूर बंदची हाक देण्यात आली आहे. पालकमंत्री विजयकुमार देशमुख यांच्या राजीनाम्याची मागणीही या सभेत करण्यात आल्याने विद्यापीठ नामकरणाचा वाद आणखी चिघळला आहे.
सोलापूर विद्यापीठाला सिद्धेश्वर महाराजांचे नाव देण्याची मागणी लिंगायत समाजाने केली होती. तत्पूर्वी धनगर समाजाने सोलापुरात मोर्चा काढून राजमाता अहल्यादेवी होळकर यांचे नाव देण्याची मागणी केली होती. त्याला लिंगायत समाज वगळता सर्व समाजाने जाहीर पाठिंबा दिला होता. मुख्यमंत्री फडणवीस यांनी अखेर नागपूर येथील धनगर समाजाच्या मेळाव्यात सोलापूर विद्यापीठाला अहिल्यादेवी होळकर यांचे नाव देणार असल्याची घोषणा केल्यानंतर सोलापुरात धनगर समाजाने जल्लोष केला तर लिंगायत समाजाने मुख्यमंत्री फडणवीस यांचे पुतळे जाळून निषेध नोंदवला होता.
दरम्यान, शिवा विरशैव संघटनेचे संस्थापक प्रा. मनोहर धोंडे आणि सिद्धेश्वर देवस्थानचे अध्यक्ष धर्मराज काडादी यांनी आंदोलनाची दिशा ठरविण्यासाठी बुधवारी सिद्धेश्वर मंदिरात समाजाची बैठक बोलावली होती. या बैठकीत सरकारच्या निर्णयाच्या निषेधार्थ सोमवारी सोलापूर बंदची हाक देण्यात आली. यामुळे सोलापुरात पुन्हा एकदा नामकरणाचा प्रश्न चिघळण्याची शक्यता निर्माण झाली आहे.
जिजाऊ ब्रिगेड रस्त्यावर
दरम्यान विद्यापीठाला अहल्यादेवी होळकर यांचे नाव देण्याचा निर्णय झाल्यानंतर नाराज झालेल्या लिंगायत समाजाला दिलासा देण्यासाठी सोलापूर रेल्वे स्थानकाला बसवेश्वरांचे नाव देण्याबाबत पालकमंत्री विजयकुमार देशमुख यांनी मुख्यमंत्री फडणवीस यांची भेट घेतली असता त्यांना हिरवा कंदील देण्यात आला. त्यानंतर जिजाऊ ब्रिगेडने बुधवारी सायंकाळी कार्यकर्त्यांनी स्वतःहून सोलापूर रेल्वे स्थानकासमोर राजमाता जिजाऊ रेल्वे स्थानक, असा फलक लावल्याने नामांतराचा प्रश्न आता एका वेगळ्या वळणावर येऊन ठेपला आहे.

Latest Images