Maharashtra Times

म. टा. वृत्तसेवा, सांगली

कोठडीत पोलिसांनी चौकशीच्या नावाखाली अनिकेत कोथळे याचा सुपारी घेऊन खून केल्याचा गंभीर आरोप कोथळेच्या नातेवाईकांनी गुरुवारी पत्रकारांशी बोलताना केला. अनिकेत कामाला असलेल्या एका बॅगच्या दुकानाच्या वरच्या मजल्यावर अवैध कृत्ये चालायची. त्या ठिकाणी उपनिरीक्षक युवराज कामटे याची ये जा असायची. बॅग मालकाने अनिकेतला अचानक कामावरुन काढल्याने तो चिडला होता. त्याला दुकानातील कृत्यांची माहिती असल्याने तो काहीतरी गडबड करेल, या भीतीने खोट्या गुन्ह्यात त्याला गुंतवून चौकशीच्या नावाखाली त्याचा खून केल्याचा दावा अनिकेतच्या पत्नीसह सर्वच नातेवाईकांनी केला आहे.

सर्व नातेवाईकांनी गुरुवारी जिल्हाधिकाऱ्यांची भेट घेऊन न्यायाची मागणी केली. त्यानंतर त्याची पत्नी संध्या, भाऊ अमित आणि अशोक, वडील अशोक, आई अलका आदींनी माजी उपमहापौर युवराज बावडेकर, युवक काँग्रेसचे मंगेश चव्हाण यांच्या उपस्थितीत पत्रकारांशी संवाद साधला. पोलिसांनी जाणीवपूर्वक अनिकेतचा बळी घेतला आहे. त्याच्या मृतदेहाचे जे काय शिल्लक असतील ते भाग आमच्या ताब्यात द्यावेत. ते कोणत्याही स्थितीत असलेतरी आम्ही ते स्विकारुन त्यावर पोलिस ठाण्याच्या दारातच अंत्यसंस्कार करणार आहोत, अशा संतप्त भावना त्यांनी व्यक्त केल्या.

‘शहर पोलिस ठाण्याशेजारीच असलेल्या बॅगांच्या दुकानात अनिकेत कामाला होता. पंधरा दिवसांपूर्वी अचानक त्याला कामावरुन काढण्यात आले. याचा जाब विचारल्यानंतर अनिकेतला धमकावण्यात आले. त्या दुकानात युवराज कामटेची सतत ऊठबस असायची. दुकानाच्या वरच्या मजल्यावर अवैध कृत्ये चालत. त्याठिकाणी कामटेची येजा असायची. या गोष्टींची कल्पना अनिकेतला होती. कामावरुन काढल्याने तो काहीतरी गडबड करेल, या भीतीनेच खोट्या गुन्ह्यात त्याला गोवण्यात आले. त्यानंतर अमानुष मारहाण करुन त्याचा खून करण्यात आला. या पार्श्वभूमीवर संबधित बॅग दुकानदाराचीही चौकशी करावी,’ अशी मागणीही कोथळे कुटुंबीयांनी केली.

फिर्यादी आहे कुठे?

‘अमोल भंडारे या मित्रासह शनिवारी सायंकाळी बाहेर पडलेला अनिकेत पुन्हा घरी परतलाच नाही. पोलिसांनी ज्या गुन्ह्यात अनिकेत आणि अमोल भंडारेला अटक केली, त्या गुन्ह्याचा फिर्याद समोर आणावा. तो मुंबईचा अभियंता असेल तर त्याला अनिकेत आणि अमोलची नावे कशी समजली? रविवारी पहाटे तीनच्या सुमारास पोलिसांनी त्यांना अटक केल्याचे नातेवाईकांना फोनवरुन कळविले घेतले होते. तर सोमवारी सकाळपर्यंत त्यांना कुठे ठेवले होते? सोमवारी रात्री अनिकेत आणि अमोल दोघेही पळून गेले असे सांगितले गेले. परंतु त्याबाबत नातेवाईकांना कोणतीही माहिती का दिली? असे अनेक सवाल नातेवाईकांनी उपस्थित करुन पोलिसांच्या भूमिकेवर संशय घेतला आहे. आमच्या सर्व प्रश्नांची उत्तरे देण्याबरोबरच जे जे दोषी आहेत त्यांच्यावर कडक कारवाई केली पाहिजे,’ अशी मागणी नातेवाईकांनी केली आहे.

उपधीक्षक डॉ. काळेंचीही चौकशी करा

अनिकेतचा भाऊ आशीष म्हणाला, ‘पोलिस उपअधीक्षक डॉ. दीपाली काळे यांची भेट घेऊन अनिकेतबाबत चौकशी केली. त्यावेळी अनिकेत सुरक्षित आहे. त्याला तुमच्या ताब्यात सुखरूप देण्यात येईल. कोण काय सांगतेय यापेक्षा पोलिस काय सांगतात, यावर विश्वास ठेवा, असे सांगितले. अनिकेतचा खून झाल्यानंतर डॉ. काळे यांनी पोलिस ठाण्यात येऊन बरीच माहिती घेतली होती. मग वस्तूस्थिती आमच्यापासून का लपविली? त्यामुळे डॉ. काळे यांचीही चौकशी करावी.’

Latest Images