म. टा. प्रतिनिधी, कोल्हापूर

जिल्हा सहकारी दूध उत्पादक संघाच्या (गोकुळ) निवडणूकीत ३५ दुहेरी ठराव आले आहेत. या ठरावांवर सोमवारपासून (ता. २७) सहाय्यक दुग्ध निंबधकांकडे सुनावणी होणार असून ३१ जानेवारीपर्यंत अंतिम यादी तयार केली जाणार आहे.

गोकुळच्या निवडणुकीसाठी ३६५४ ठराव दाखल झाले आहेत. एकाच नावाचे ठराव वेगवेगळ्या संचालकांना दिले आहे. मात्र त्याची छाननी सहाय्यक दुग्ध निबंधक डॉ. गजेंद्र देशमुख यांनी केली आहे. जिल्ह्यातील ३५ संस्थांनी वेगवेगळ्या नावाने दुहेरी ठराव दाखल केले आहेत. त्यामध्ये सर्वाधिक आठ ठराव पन्हाळा तालुक्यातील आहेत. कागल, राधानगरी तालुक्यातून प्रत्येकी चार, गडहिंग्लज गगनबावडा तालुक्यातून प्रत्येकी तीन, तर करवीर आणि शाहूवाडी तालुक्यातून प्रत्येकी दोन दुहेरी ठराव आले आहेत. हातकणंगले आणि शिरोळ तालुक्यातून एकही दुहेरी ठराव आलेला नाही.

म. टा. प्रतिनिधी, कोल्हापूर

जगातील सात खंडांतील सात सर्वोच्च शिखरे सर करण्याचे ध्येय बाळगलेले कोल्हापूरचे गिर्यारोहक सागर नलवडे यांनी प्रजासत्ताकदिनी, २६ जानेवारी रोजी आफ्रिका खंडातील टांझानियातील 'माउंट किलीमंजारो' हे शिखर सर केले. उणे १५ ते २० इतके तापमान आणि प्रचंड बर्फवृष्टी होत असतानाही या शिखरावर पोहोचून त्यांनी भारताच्या ७१व्या प्रजासत्ताक दिनानिमित्त ७१ फुटांचा तिरंगा फडकवला. 'मोहीम सह्याद्रीच्या लेकराची' असे या मोहिमेचे नाव असून यापूर्वी स्वातंत्र्यदिनी, १५ ऑगस्ट २०१९ रोजी युरोप खंडातील रशियातील सर्वात उंच शिखर पादाक्रांत केले होते.

मूळचे कागल तालुक्यातील करनूरचे असलेले सागर नलवडे हे सध्या मुंबईत असून त्यांनी 'शिलेदार अॅडव्हेंचर इंडिया' या संस्थेच्या माध्यमातून काम चालवले आहे. सात खंडातील सात सर्वोच्च शिखरे सर करण्याची मोहीम त्यांनी आखली आहे. त्यानुसार २६ जानेवारी रोजी आफ्रिका खंडातील माउंट किलीमंजारो या ५८९५ मीटर इतकी उंची असलेल्या सर्वोच्च शिखरावर मोहिमेचे आयोजन केले. मोहिमेला सुरुवात केल्यानंतर तापमान प्रचंड खराब झाले होते. बर्फवृष्टीही जोरदार सुरू होती. अशा प्रतिकूल परिस्थितीत त्यांनी तीन सहकाऱ्यांसह शिखर गाठले. प्रजासत्ताक दिनानिमित्त ७१ फुटांचा तिरंगा फडकवत नवा विक्रम प्रस्थापित केला. त्यांच्या टीमने तिथे भारतीय संविधानाचे वाचन करत रायगडवरील माती आणि छत्रपती शिवाजी महाराजांच्या प्रतिमेचे पूजन केले. वसई-अर्नाळा येथील रोहित पाटील, इंदापूर येथील योगेश करे आणि उत्तर प्रदेशमधील पोलिस आशिष दीक्षित हे त्यांच्यासोबत मोहिमेत सहभागी आहेत.

नलवडे यांनी यापूर्वी १५ ऑगस्ट २०१९ रोजी युरोप खंडातील रशिया येथील ५६४२ मीटर इतके सर्वात उंच शिखर असलेल्या माउंट एलब्रुसच्या बेस कॅम्पवर ७३ फूट तिरंगा ध्वज फडकवला होता. या मोहिमेसाठी '३६० एक्सप्लोरर'चे आनंद बनसोडे यांचे त्यांना सहकार्य लाभले आहे. खासदार संभाजीराजे छत्रपती, संयोगिताराजे छत्रपती, समरजीतसिंह घाटगे, मंत्री हसन मुश्रीफ यांनी नलवडे यांना सहकार्य केले आहे.

अवघ्या सहा महिन्यांत जगातील सात खंडांतील सात सर्वोच्च शिखरांपैकी युरोप, आफ्रिका या दोन खंडांतील दोन शिखरे सर केली आहेत. आणखी पाच खंडांतील पाच शिखरे सर करायची आहे. या हिमशिखरांच्या मोहिमा खूप खर्चिक व अवघड आहेत. हे खूप आव्हानात्मक आहे. तरीही मी जिद्दीने तयारी करत असून मला सर्वांचे सहकार्य लाभत आहे.

- सागर नलवडे, गिर्यारोहक

म. टा. प्रतिनिधी, कोल्हापूर

शिवाजी विद्यापीठाचा ५६ वा दीक्षान्त समारंभ ६ फेब्रुवारी रोजी होणार असून यंदा ६० हजार १६७ स्नातकांना पदवी प्रमाणपत्र देण्यात येणार आहेत. विद्यापीठाचे कुलपती तथा राज्यपाल भगतसिंग कोश्यारी आणि विद्यापीठ अनुदान आयोगाचे उपाध्यक्ष डॉ. भूषण पटवर्धन यांच्या प्रमुख उपस्थितीत हा दीक्षान्त समारंभ होणार आहे. परीक्षा व मूल्यमापन नियंत्रण मंडळातर्फे त्यासाठीची तयारी सुरू आहे.

दीक्षान्त समारंभाज २०१९मध्ये पदवी व पदव्युत्तर परीक्षा उत्तीर्ण झालेल्या विद्यार्थ्यांना पदवी प्रमाणपत्र देण्यात येणार आहे. यामध्ये विज्ञान, कला, वाणिज्य, मॅनेजमेंट, व्यावसायिक अभ्यासक्रमांचा समावेश आहे. तसेच पीएच.डी.धारक विद्यार्थ्यांना पदवी देण्यात येणार आहे. यंदा काही निकाल जाहीर होण्यास विलंब झाल्याने विद्यार्थ्यांना पदवी प्रमाणपत्रासाठी अर्ज करण्यास उशीर झाला. ही मुदत वाढवून देण्यात आली होती. महापुराचा फटकाही यावर्षी अर्जासाठी देण्यात आलेल्या मुदतीला बसला होता. नोव्हेंबरअखेर दिलेल्या मुदतीअंती ५४ हजार अर्ज आले होते. त्यानंतर डिसेंबरच्या पहिल्या आठवड्यापर्यंत मुदतवाढ देण्यात आली होती. ६० हजार १६७ विद्यार्थ्यांचे अर्ज दाखल झाले. त्यानुसार दीक्षान्त समारंभात पदवीदान कार्यक्रम होणार आहे.

म. टा. प्रतिनिधी, कोल्हापूर

आईने कीटकनाशक पाजल्यानंतर उपचारासाठी सीपीआरमध्ये दाखल केलेल्या बालिकेचा अखेर रविवारी (ता. २६) रात्री मृत्यू झाला. श्रेया गणेश चव्हाण (वय अडीच वर्षे) असे मृत बालिकेचे नाव आहे.

आई सारिका गणेश चव्हाण (२६, रा. मांगणूर, ता. कागल) हिने बुधवारी (ता. २२) पायल आणि श्रेया या दोन मुलींना कीटकनाशक पाजून स्वत:ही कीटकनाशक प्राशन केले होते. या घटनेत सारिका आणि पायल या दोघींचा मृत्यू झाला. अत्यवस्थ अवस्थेतील श्रेया या बालिकेवर सीपीआरच्या अतिदक्षता विभागात उपचार सुरू होते. रविवारी रात्री तिचा मृत्यू झाला. उत्तरीय तपासणीनंतर मृतदेह वडील गणेश चव्हाण यांच्याकडे सोपवला. या घटनेची नोंद सीपीआर पोलिस चौकीत झाली.

म. टा. प्रतिनिधी, कोल्हापूर

प्रजासत्ताक दिनी केवळ दहा रुपयांत शिवभोजन योजनेला शहरात चार विविध ठिकाणी सुरुवात झाली. पालकमंत्री सतेज पाटील यांच्या हस्ते सुभाष रोड येथील रुद्राक्षी स्वयं महिला बचतगट संचलित आण्णा रेस्टॉरंट तर जिल्हाधिकारी कार्यालयासमोरील हॉटेल शिवाज् येथे महापौर अॅड. सूरमंजिरी लाटकर यांच्या हस्ते केंद्राचे उद्घाटन झाले. ताराबाई रोड येथील महालक्ष्मी भक्तमंडळ येथे आमदार चंद्रकांत जाधव यांच्या हस्ते तसेच साइक्स एक्स्टेंशनमधील हॉटेल साईराज येथे सरसेनापती संताजी घोरपडे साखर कारखान्याचे अध्यक्ष नावेद मुश्रीफ यांच्या हस्ते शिवभोजन योजनेस प्रारंभ करण्यात आला.

उदघाटन कार्यक्रमात पालकमंत्री पाटील म्हणाले, 'शिवभोजन योजना राज्यात प्रायोगिक तत्वावर सुरूवात करण्यात आली आहे. प्रतिसाद मिळाल्यास ही योजना राज्याच्या इतर भागांतही राबवण्यात येणार आहे. गरीब आणि गरजू जनतेला अवघ्या दहा रुपयांत पोटभर जेवण मिळणार आहे. स्वस्त, स्वच्छ, पोषक आणि ताजे जेवणही देण्याची जबाबदारी केंद्रांवर आहे.'

जिल्हाधिकारी दौलत देसाई, महापालिकेचे आयुक्त डॉ. मल्लिनाथ कलशेट्टी, जिल्हा परिषदेचे मुख्य कार्यकारी अधिकारी अमन मित्तल, जिल्हा पुरवठा अधिकारी दत्तात्रय कवितके, अन्नधान्य वितरण अधिकारी माधवी शिंदे, महिला बचत गटाच्या अध्यक्ष राजश्री सोलापुरे आदीसह बचत गटाचे सदस्य उपस्थित होते.

पहिल्याच दिवशी उद्दिष्टपूर्ती

सरकारने शिवभोजन योजनेंतर्गत दररोज एकूण ६०० थाळी वितरणाचे उदिष्ट दिले आहे. पहिल्याच दिवशी चारही केंद्रांत हे उद्दिष्ट पूर्ण झाले. एका थाळीत सरकारच्या निकषानुसार दोन चपाती, एक वाटी भाजी आणि वरण, एक मुद भात देण्यात आले. दुपारी १२ वाजता चारही ठिकाणी भोजन वितरणास सुरूवात झाली. सर्वच केंद्रांवर भोजनाचा आस्वाद घेतल्यानंतर गर्दी झाली होती. जेवण घेण्यासाठी आलेल्यांचा तेथे फोटो घेतला जात होता. तो अॅपमध्ये अपलोड केल्यानंतर रिसीट दिली जात होती. त्यानंतर भोजन दिले जात होते.

समिती ठेवणार नियंत्रण

शिवभोजनसाठी केंद्रांची निवड करणे, केंद्रांतील थाळीत नियमाप्रमाणे आहार दिला जातो की नाही यावर नियंत्रण ठेवण्यासाठी जिल्हाधिकाऱ्यांच्या अध्यक्षतेखाली समिती नियुक्त केली आहे. समितीमध्ये जिल्हा पुरवठा अधिकारी सदस्यसचिव आहे. महापालिकेचे आयुक्त सदस्य आहेत.

म. टा. प्रतिनिधी, कोल्हापूर

तब्बल दहा वर्षांनंतर भारत राखीव बटालियनला नंदवाळ (ता. करवीर) येथील जागा मिळाली. गट क्रमांक ६३ मधील ४६ हेक्टर आठ आर जमीन भारत राखीव बटालियन-३ या तुकडीला देण्याचा शासन निर्णय झाला. याबाबतचे परिपत्रक सरकारने जाहीर केले.

या जागेतील १८ मीटर रुंद प्रस्तावित रस्ता वगळता उर्वरित जमीन गृह विभागाच्या नियंत्रणाखालील भारत राखीव बटालियनला दिली आहे. यातील सामाजिक वनीकरणच्या जागेत कोणतेही बांधकाम करता येणार नाही. याशिवाय सामाजिक वनीकरणच्या जागेतील झाडांची देखभाल करण्याची जबाबदारीही राखीव बटालियनकडे सोपवली आहे. या निर्णयामुळे तब्बल दहा वर्षांनी राखीव बटालियनला कोल्हापुरात जागा मिळाली. सध्या जागेअभावी बटालियनच्या अनेक जवानांना दौंडमध्ये दुसऱ्या बटालियनच्या जागेत थांबावे लागते. नंदवाळ येथे जागा मिळाल्याने जिल्ह्यातील सुरक्षेला बळ मिळाले असून, नंदवाळसह परिसराच्या विकासालाही चालना मिळाल्याची माहिती बटालियनचे सहायक समादेशक शिवाजीराव जमदाडे यांनी दिली.

म. टा. प्रतिनिधी, कोल्हापूर

दैवज्ञ शिक्षण समाजाच्या (बोर्डिंग) निवडणुकीत सत्तारुढ दैवज्ञ विश्वकर्मा सत्तारुढ पॅनेल ११ जागा जिंकल्या. विरोधी आघाडीने कडवी झुंज देतानाना आठ जागांवर विजय मिळवला. १९ जागांसाठी ३८ उमेदवार रिंगणात होते. निवडणूक निर्णय अधिकारी म्हणून असिफ शेख यांनी काम पाहिले.

शनिवारी (ता. २५) झालेल्या निवडणुकीत १९६५ पैकी १११८जणांनी मतदानाचा हक्क बजावला. अध्यक्षपदासाठीच्या निवडणुकीत सुधाकर पेडणेकर विजयी झाले. त्यांना ५५० मते मिळाली. उपाध्यक्षपदासाठी मधुकर पेडणेकर ५४८ मते मिळवून विजयी झाले. अन्य विजयी उमेदवार असे (कंसात मतदान) : सत्तारुढ पॅनेल - सचिव विजय घारे (५६१), उप सेक्रेटरी श्रीकांत कारेकर (५६८), सुपरिटेंड प्रभाकर आणवेकर (५४४), समिती सदस्य - गजानन नागवेकर (५५४), पद्माकर नार्वेकर (५५७), प्रविण मालवणकर (५४६), संजय कारेकर (५३३), शेखर पाटगावकर (५१६), गजानन भुर्के (५१०), रत्नाकर नागवेकर (५०६).

दैवज्ञ तिरुपती बालाजी पॅनेल : खजानिस श्रीराम भुर्के (५४४), समिती सदस्य - मुरलीधर मसूरकर (५८८), एकनाथ चोडणकर (५६८), सुनील बेळेकर (५४०), महेश पोतदार (५३६), किशोर कारेकर (५१४)महेश जामसांडेकर (५०४).

म. टा. प्रतिनिधी, कोल्हापूर

प्रजासत्ताक दिनी शांतीदूत मर्दानी आखाड्याचा खेळाडू गफूर मुजावर याने दांडपट्ट्याने सपासप वार करत ४००० लिंबू कापण्याचा विक्रम नोंदवला. यासाठी त्याला एक तास ५८ मिनीटांचा कालावधी लागला. रविवारी सकाळी साडेनऊ वाजता पद्मावती मंदिराच्या पिछाडीस एनसीसी रेसकोर्स रस्त्यावर याचे आयोजन केले होते.

यादवनगर येथे रहात असलेला गफूर गेली सात वर्षे मर्दानी कलेचे प्रशिक्षण घेत असून तो गोपाळ कृष्ण गोखले कॉलेजमध्ये बी.एस्सी.च्या दुसऱ्या वर्षात शिकत आहे. सामाजिक कार्यकर्ते शेखर जाधव, उद्योजिका विद्या माने, उद्योजक प्रशांत सुतार, अमित जाधव यांच्या उपस्थितीत उपक्रमास सुरुवात झाली. हलगी, घुमक्याच्या तालावर रस्त्यावर मांडलेले लिंबू दांडपट्ट्याने सपासप कापण्यास गफूरने सुरुवात केली. उपक्रम पाहण्यासाठी नागरिकांनी गर्दी केली होती. टाळ्या वाजवून आणि घोषणा देत सहकारी त्याला प्रोत्साहन देत होते. सुमारे दोन तासांनंतर गफूरने अखेरचा लिंबू कापून विक्रमाची नोंद केली. यावेळी 'जय भवानी, जय शिवाजी', 'भारतमाता की जय', 'वंदे मातरम'चा जयघोष करण्यात आला. आखाड्याचे संस्थापक सूरज केसरकर व कार्याध्यक्ष अतुल शिंदे यांच्या मार्गदर्शनाखाली सर्व पदाधिकारी, मित्र परिवार, पालकांनी प्रोत्साहन दिले.

विक्रमानंतर गफूर म्हणाला, 'छत्रपती शिवाजी महाराजांची युद्धनिती लोकांना माहीत व्हावी, मर्दानी खेळाचा प्रसार व्हावा, शालेय शिक्षणात मर्दानी खेळांचा समावेश व्हावा, यासाठी हा उपक्रम आयोजित केला.'

फोटो आहे

म. टा. प्रतिनिधी, कोल्हापूर

'शहरातील कचरा उठावाबाबत वारंवार तक्रारी निर्माण होत आहेत. आरोग्य विभागाकडून कचऱ्याचे योग्य नियोजन होत नाही. कंटेनरमुक्त प्रभाग करण्याचे उद्दिष्ट आहे. त्यासाठी ३४ प्रभागांचा प्लॅन तयार करा,' असा आदेश सोमवारी स्थायी समिती सभापती शारंगधर देशमुख यांनी दिला. तसेच टीपरवरील चालक वारंवार न बदलण्याची सूचनाही त्यांनी केली. स्थायी समितीचे सदस्य व आरोग्य विभागाच्या बैठकीत ते बोलत होते.

सभापती देशमुख म्हणाले, 'विशेषत: घनकचरा व्यवस्थापन प्रकल्पाजवळील प्रभाग कंटेनरमुक्त करण्यासाठी टीपरची खरेदी करण्यात आली. पण अद्यापही प्रभाग कंटेनरमुक्त झालेले नाहीत. त्याबाबतचा प्रस्ताव सादर करा. टीपरवरील चालक वारंवार बदलला जात असल्याने त्यामधील साहित्याची चोरी होत आहे. त्यासाठी एकच चालक ठेवा. प्रकल्पाजवळील प्रभागातून तीन तर इतर प्रभागातून दोन फेऱ्या झाल्या पाहिजेत. त्याशिवाय स्टोअरमध्ये टीपर जमा करु नका.'

विरोधी पक्षनेता विजय सुर्यवंशी म्हणाले, 'शहर कोंडाळामुक्त करण्यासाठी टीपर वाहने खरेदी केली, पण प्रत्यक्षात शहर कोंडाळामुक्त झाले नाही. त्यामुळे प्रत्येक प्रभागात कचरा साचत आहे. कचरा उठाव जलदगतीने होण्यासाठी प्रशासनाने वाहने वाढवण्याचे नियोजन करावे.' पूजा नाइकनवरे यांनी रात्रीच्यावेळी कचरा उठाव करण्याची मागणी केली. सदस्य भूपाल शेटे म्हणाले, 'प्रभागातील सफाइ कर्मचाऱ्यांच्या संख्येत तफावत आहे. तसेच टीपर चालकांनी मोबाइल बंद ठेवू नयेत.' कसबा बावडा शंभर टक्के कंटेनरमुक्त करण्यासाठी फेऱ्या वाढवण्याची मागणी माधुरी लाड यांनी केली. आरोग्याधिकारी डॉ. दिलीप पाटील यांनी ३४ प्रभाग कंटेनरमुक्त करण्यासाठी प्रस्ताव वरिष्ठ कार्यालयाकडे तातडीने सादर करु, असे सांगितले.

बैठकीस नगरसेवक संदीप कवाळे, सचिन पाटील, राजाराम गायकवाड, नियाज खान, पशुवैद्यकीय अधिकारी डॉ. विजय पाटील, मुख्य आरोग्य निरिक्षक जयंत पवार, सर्व आरोग्य निरिक्षक व मुकादम उपस्थित होते.

सामाजिक आशयातील उत्कृष्ट सिनेमा म्हणून गौरव

म. टा. प्रतिनिधी, कोल्हापूर

पश्चिम बंगाल येथे पार पडलेल्या एव्हरेट आंतरराष्ट्रीय फिल्म फेस्टिव्हलमध्ये 'गावगाडा'हा सिनेमा सर्वोत्कृष्ट सामाजिक सिनेमा ठरला. या सिनेमाची निर्मिती कोल्हापुरात झाली होती. सिलीगुडी शहरात झालेल्या आंतरराष्ट्रीय फिल्म फेस्टिव्हलमध्ये कोल्हापुरात साकारलेल्या सिनेमाचे राष्ट्रीय पातळीवर कौतुक झाल्यामुळे कलाकारांचा हुरुप वाढला आहे.

'कोल्हापूरच्या रांगड्या मातीत आणि संस्कृतीने नटलेल्या या सिनेमाचे कथानक सामाजिक विषयावर बेतलेले आहे. फिल्म फेस्टिव्हलमध्ये ही कलाकृती सर्वोत्कृष्ट सामाजिक सिनेमा ठरला. या सिनेमासाठी प्रत्येकाने घेतलेल्या कष्टाचे सार्थक झाले'अशा भावना सिनेमाशी निगडीत कलाकार व तंत्रज्ञांनी व्यक्त केल्या. निर्माती निशा गावकर, कार्यकारी निर्माता विजय माळी, लेखक व दिग्दर्शक संजय टिपुगडे, संवाद चंद्रशेखर जनवाडे व कॅमेरामन जयदीप निगवेकर यांच्या टीमने हा सिनेमा तयार केला आहे.

या महोत्सवात १७ देशातील सिनेमांचा समावेश होता. तसेच देशातील विविध राज्यातील 'देश संस्कृती आणि आणि ग्रामीण जीवन'वर आधारित सिनेमांचा समावेश होता. यामध्ये हिंदी, मराठी, गुजराती, भोजपुरी, तमिळ, कन्नड, तेलगूसह अन्य भाषेतील सिनेमांचे नामांकन झाले होते. सिनेमात संजय तोडकर, चित्रा कुलकर्णी, धनंजय पोलादे, निकीता पाटील, संध्या वेल्हाळे, एन. डी. चौगुले, जितेंद्र पोळ, जगन्नाथ घाडगे आदींच्या भूमिका आहेत.

म. टा. प्रतिनिधी, कोल्हापूर

कोल्हापूर जिल्हा परिषदेच्या विविध समित्यांमधील रिक्त जागांसाठी सत्ताधारी महाविकास आघाडी आणि विरोधी भाजप व मित्रपक्ष आघाडीमध्ये एकमत होण्याची शक्यता धूसर होत चालली आहे. दोन्ही बाजूंनी समन्वय आणि संवादाचा अभाव असल्यामुळे भाजप आघाडीच्या कालावधीतील सहा माजी पदाधिकाऱ्यांची कोणत्या समितीवर वर्णी लावायची हे अजूनही अधांतरी आहे. प्रशासनाकडे समिती सदस्यत्वासाठी तीन अर्ज दाखल झाले आहेत. सत्ताधारी आणि विरोधकाची टोकाचे राजकारण विचारात घेता समिती सदस्यत्वाचा निकाल निवडणुकीवर लागण्याची शक्यता आहे.

१८ जागांसाठी जादा अर्ज आले तर निवडणूक घ्यावी लागेल, ही शक्यता गृहित धरून प्रशासनाने अध्यक्ष बजरंग पाटील यांच्याकडे विशेष सभेसाठी तारीख मागितली आहे. जि. प. मध्ये दोन जानेवारीला सत्तांतर झाले. अध्यक्ष व उपाध्यक्ष निवडणुकीत महाविकास आघाडीने भाजप आघाडीचा पराभव केला. त्या पाठोपाठ झालेल्या समिती सभापतिपदाच्या निवडणुकीतही महाविकास आघाडीने वर्चस्व कायम राहिले.

विविध समित्याच्या रिक्त जागेसाठी सध्या हालचाली सुरू आहेत. यामध्ये बारा पंचायत समिती सभापतींना स्थान मिळणार आहे. शिवाय जिल्हा परिषदेतील सत्तांतरामुळे रिक्त झालेल्या पदाधिकाऱ्यांच्या सहा जागांवर नव्याने सदस्यांच्या निवडी होणार आहेत. माजी पदाधिकाऱ्यांना महत्त्वाच्या समितीत स्थान देण्याचा प्रघात आहे. मात्र, सत्ताधारी व विरोधकांतील कुरघोडीच्या राजकारणाने उचल खाल्ली आहे. भाजप आघाडीतील त्या माजी पदाधिकाऱ्यांना कमी महत्त्वाच्या समितीवर सदस्य म्हणून नेमणूक करण्याच्या महाविकास आघाडीकडून हालचाली सुरू आहेत. माजी अध्यक्षा शौमिका महाडिक, माजी सभापती सर्जेराव पाटील, अंबरीश घाटगे, सर्जेराव पाटील-पेरीडकर, विशांत महापुरे, वंदना मगदूम यांना कोणत्या समितीत संधी दिली जाणार याकडे लक्ष आहे.

तिघांचे अर्ज दाखल

महाविकास आघाडी आणि विरोधकांतील विसंवादामुळे अद्याप कोणत्या समितीवर कोणाला संधी मिळणार हे अद्याप निश्चित झाले नाही. शिवाय रिक्त जागेसाठी सदस्यांचे प्रशासनाकडे अर्ज दाखल करावयाचे आहेत. विरोधी आघाडीतील जनसुराज्य शक्ती पक्षाचे सदस्य शंकर पाटील यांनी बांधकाम समितीसाठी अर्ज दाखल केला आहे. महिला व बालकल्याण समितीच्या माजी सभापती वंदना मगदूम यांनी समाजकल्याण समितीत काम करण्याची रुची दाखविली आहे. हातकणंगले पंचायत समिती सभापती महेश पाटील यांनी बांधकाम समितीवर संधी मिळावी यासाठी अर्ज केला आहे. सभापती पाटील हे आमदार प्रकाश आवाडे गटाचे आहेत. दरम्यान, राष्ट्रवादी काँग्रेस पक्षाचे सदस्य विजय बोरगे यांची बांधकाम समिती सदस्य म्हणून नेमणूक झाली आहे.

००००

म. टा. प्रतिनिधी, कोल्हापूर

'महापालिकेचा प्रमुख आर्थिक स्रोत असलेल्या घरफाळा विभागात मोठी अनागोंदी निर्माण करून भ्रष्टाचार केला गेला आहे. त्याबाबत नेमलेल्या समितीने अद्याप चौकशीला सुरुवातही केलेली नाही. विभागातील अधिकारी, कर्मचाऱ्यांनी संगनमताने भ्रष्टाचार करुन महापालिकेचे आर्थिक नुकसान केले आहे. त्यांच्यावर सायबर क्राइम अंतर्गत गुन्हा दाखल करा' अशी मागणी शिवसेनेच्या शिष्टमंडळाने सोमवारी समितीमधील अधिकाऱ्यांकडे केली. चौकशीस विलंब होत असल्याचा निषेध करत अधिकाऱ्यांना धारेवर धरले. सॉफ्टवेअरमध्ये फेरफार करून ८० मालमत्तांच्या घरफाळ्यात बदल करण्यात आल्याचा आरोप शिष्टमंळाने केला.

यावेळई व्हीनस कॉर्नर येथील मातोश्री प्लाझामधील काही मिळकतींच्या कागदपत्रांची तपासणी करून घरफाळा कमी करणाऱ्या प्रकरणांचा पर्दाफाश केला. दरम्यान, आयुक्त डॉ. मल्लिनाथ कलशेट्टी रजेवर असल्याने मुख्य लेखापरिक्षक धनंजय आंधळे, सहाय्यक उपायुक्त संजय सरनाईक, कर निर्धारक व संग्राहक संजय भोसले यांना निवेदन दिले.

शिवसेनेचे जिल्हाप्रमुख संजय पवार यांनी शिष्टमंडळाचे नेतृत्व केले. राजारामपुरीतील एका मिळकतदाराने त्या जागेत क्लिनिक असताना जनावरांचा गोठा आणि आरसीसी इमारत असताना कौलारू घर दाखवून घरफाळ कमी केल्याचे जिल्हाप्रमुख पवार यांनी निदर्शनास आणून दिले. ते म्हणाले, 'चौकशी समितीकडून इतका विलंब होत असताना वरिष्ठ अधिकारी काय करतात? काम जमत नसेल तर त्यांनी राजीनामा द्यावा.' आणखी काही मिळतींची उदाहरणे देत त्यांनी काही मिळकतींची तपासणी करण्याची मागणी केली. यावेळी कर निर्धारक व संग्राहक भोसले यांनी चौकशी अहवाल दोन ते तीन दिवसांत देणार येणार आहे असे सांगितले.

यावेळी महापालिकेच्या अधिकाऱ्यांसमवेत त्यांनी मिळकतींची तपासणी केली. चुकींच्या पद्धतीने नोंदी करुन घरफाळा कमी केल्याचे निदर्शनास आले.

याबाबत दिलेल्या निवेदनात म्हटले की आहे, 'घरफाळा विभागामध्ये भ्रष्टाचार होत असल्याचे दोन महिन्यांपूर्वी निदर्शनास आणून दिले. मात्र, याबाबत प्रशासकीय पातळीवर कोणतीही कार्यवाही झालेली नाही. कमर्शिअल वापराच्या इमारतींमध्ये भाडेकरू असूनही मूळ मालकांकडून त्यांचा वापर होत असल्याचे दाखविले गेले आहे. अशा प्रकारे घरफाळा कमी करून घेऊन त्याद्वारे महापालिकेचे कोट्यवधी रुपयांचे नुकसान केले आहे. याबाबत आयुक्तांनी नेमलेल्या चौकशी समितीने अद्याप कोणतीही तपासणी अथवा चौकशी केलेली नाही. संबंधीत विभागातील अधिकाऱ्यांची चौकशी करून या लिंकमधील पाच महिन्यांतील 'एडीट ऑप्शन'ची तपासणी करा. शहरातील काही ठिकाणची एटीएम, बँका, हॉस्पिटल्स, ब्रँडेड शोरुम व व्यायामशाळांना लागू केलेली घरफाळ्याची तपासणी करावी.'

शिष्टमंडळात जिल्हाप्रमुख विजय देवणे, उप जिल्हाप्रमुख सुजित चव्हाण, मेघा पेडणेकर, शहरप्रमुख शिवाजीराव जाधव, शुभांगी पोवार, प्रा. शिवाजीराव पाटील, अवधूत साळोखे, दिनेश परमार, शशिकांत बिडकर, धनाजी यादव, भगवान कदम, राजेंद्र पाटील आदींचा समावेश होता.

शिष्टमंडळाच्या केलेल्या मागणीनुसार व्हीनस कॉर्नर येथील मलाबार गोल्ड व जेसवानी यांच्या मिळकतींची माहिती घेतली. त्यांची कर आकारणी भाडे करारानुसार झाली असून त्याचा करार प्रशासनाकडे आहे. महापालिकेच्या सुत्रानुसार कर आकारणी झाली असून त्याबाबतचा अहवाल आयुक्तांकडे सादर केला जाणार आहे. त्यामध्ये अनियमितता आढळल्यास दोषींवर कारवाई करण्यात येणार आहे.

- संजय भोसले, कर निर्धारक व संग्राहक

भ्रष्टाचाराचा भांडाफोड

शिष्टमंडळाच्या आरोपांनंतर व्हीनस कॉर्नर येथील मातोश्री प्लाझामधील आयडीबीआय बँकेच्या व्यवस्थापकांशी चर्चा करण्यात आली. मलाबार गोल्ड या शोरुमचे भाडे कमी दाखविण्यात आल्याचे आढळले. दोन्ही ठिकाणी चुकीच्या पद्धतीने नोंदी करून घरफाळा आकारणी कमी केल्याचे स्पष्ट झाले. त्यामुळे संबंधितांवर गुन्हा दाखल करण्याची मागणी शिष्टमंडळाने घेतली. मात्र नंतर झालेल्या चर्चेनंतर याबाबत पुढील सोमवारपर्यंत मुदत देण्यात आली. या कालावधीत संबंधितांवर भ्रष्टाचाराचा गुन्हा दाखल न झाल्यास तीव्र आंदोलनाचा इशारा कार्यकर्त्यांनी दिला.

काय आहे घोटाळा ?

- मिळकतींच्या क्षेत्रफळामध्ये फेरफार

- घरफाळा आकारणीमध्ये बदल करून फसवणूक

- सॉफ्टवेअरमधून ८० मालमत्तांचा घरफाळ्यात फेरफार

- आक्षेपांनंतर दोन मिळकतींच्या कागदपत्रांची तपासणी

कोल्हापूर : यशवंत पंचायत राज अभियानांतर्गत राज्यस्तरीय पुरस्कारासाठी कोल्हापूर जिल्हा परिषदेच्या विविध योजनांची अंमलबजावणी व कामकाजांची मंगळवारी (ता.२८) तपासणी होणार आहे. नाशिक विभागीय आयुक्त कार्यालयातील उपायुक्त अरविंद मोरे यांच्या नेतृत्वाखालील समितीकडून ही तपासणी होईल. यशवंत पंचायत राज अभियान २०१८-१९ अंतर्गत पुणे विभागात कोल्हापूर जिल्हा परिषद व सांगली जिल्ह्यातील पंचायत समिती कडेगाव हे प्रथम आले आहेत. आता राज्यस्तरीय पुरस्कारासाठी प्रत्येक विभागात प्रथम आलेल्या जिल्हा परिषद व पंचायत समित्यांची तपासणी सुरू आहे. उपायुक्त मोरे तपासणीसाठी कोल्हापुरात दाखल झाले आहेत. यशवंत पंचायत राज अभियानामध्ये राज्यात अव्वल क्रमांक पटकाविण्यासाठी जि.प.प्रशासनाकडून तयारी सुरू आहे.

कोल्हापूर

शेतकरी सहकारी संघाचे अध्यक्ष अमरसिंह माने यांनी सोमवारी राजीनामा दिला. संचालक मंडळात राजीनामा मंजूर करुन तो जिल्हा उपनिबंधकाकडे पाठवण्यात येणार आहे. त्यानंतर नवीन अध्यक्ष निवडीचा कार्यक्रम जाहीर होणार आहे. शेतकरी संघावर राष्ट्रवादी, जनसुराज्य, काँग्रेस पक्षाची सत्ता असून आघाडीच्या नियमानुसार अध्यक्ष माने यांनी राजीनामा द्यावा, यासाठी राष्ट्रवादीच्या संचालकांकडून मागणी होत होती. शुक्रवारी (ता. २४) जिल्हा नियोजन मंडळाचा बैठकीनंतर ग्रामविकास मंत्री हसन मुश्रीफ आणि आमदार विनय कोरे यांच्यात बैठक झाली. यावेळी मुश्रीफ यांनी माने यांना राजीनामा देण्यास सांगावे, अशी सूचना कोरे यांना केली होती. त्यानंतर कोरे यांच्या सूचनेनुसार अध्यक्ष माने यांनी संघाचे व्यवस्थापक आप्पासाहेब निर्मळे यांनी राजीनामा दिला. दरम्यान, राष्ट्रवादीचे जी.डी.पाटील यांचे नाव अध्यक्षपदासाठी आघाडीवर आहे.

म. टा. प्रतिनिधी, कोल्हापूर

महापालिकेच्या गुरुवारी (ता. ३०) होणाऱ्या विशेष सभेत महापौर अॅड. सूरमंजिरी लाटकर आपल्या पदाचा राजीनामा देणार आहेत. त्याबाबतची सूचना पक्षनेतृत्वाने त्यांना दिली आहे. तसेच शहरातंर्गत टाकण्यात येणाऱ्या गॅस वितरण योजनेतील पाइपलाइन टाकण्यास मंजुरी देण्याबाबत सदस्य ठरावावर सभागृहात चर्चा होणार आहे.

पक्षातंर्गत फॉर्म्युल्यानुसार महापौर अॅड. लाटकर यांचा कार्यकाळ संपुष्टात आला आहे. बुधवारी झालेल्या महासभेत त्या राजीनामा देण्याची शक्यता होती. पण काही कारणाने त्यांचा राजीनामा लांबणीवर पडला. त्यानंतर केवळ आठ दिवसांत विशेष सभेचे आयोजन केले आहे. सभेत त्या आपला राजीनामा सादर करतील. त्याबाबतची सूचना ग्रामविकास मंत्री हसन मुश्रीफ यांनी दिली आहे. त्यानंतर विभागीय आयुक्तांच्या सूचनेनुसार नवीन महापौर निवडीचा कार्यक्रम जाहीर होईल.

दरम्यान, हिंदुस्थान पेट्रोलियम ऑइल गॅस कंपनीच्यावतीने राबवण्यात येणाऱ्या योजनेसाठी शहर हद्दीतून गॅस वितरण नलिका टाकण्यात येणार आहे. याबाबतचा ठराव करण्यास विलंब झाल्यानंतर सोशल मीडियाच्या माध्यमातून खासदार संभाजीराजे यांनी तीव्र नाराजी व्यक्त केली होती. योजनेतील नलिका टाकण्यासाठी मंजुरी देण्यासाठी आलेल्या सदस्य ठरावावर सभेत चर्चा होणार आहे.

म. टा. प्रतिनिधी, कोल्हापूर

'दर महिन्याच्या पहिल्या सोमवारी आयोजित केल्या जाणाऱ्या लोकशाही दिनाला आता मी स्वत: आणि पालकमंत्री सतेज पाटील आणि सार्वजनिक आरोग्य राज्यमंत्री राजेंद्र यड्रावकर राहतील,' अशी माहिती ग्रामविकास मंत्री हसन मुश्रीफ यांनी दिली. ३ फेब्रुवारीपासून प्रत्येक महिन्याच्या पहिल्या सोमवारी लोकशाही दिनास मंत्री उपस्थित राहणार आहेत. शासकीय विश्रामगृहातील राजर्षी छत्रपती शाहू सभागृहात सकाळी ११ ते २ या वेळेत होणाऱ्या या लोकशाही दिनात नागरिकांनी प्रश्न मांडावेत, असे आवाहनही त्यांनी केले आहे.

याबाबतच मंत्री मुश्रीफ यांनी प्रसिद्धी पत्रकात म्हटले आहे, जिल्ह्यातील शासकीय, निमशासकीय आणि महामंडळाकडील प्रलंबित प्रश्नांबाबत नागरिकांनी लोकशाही दिनास निवेदने घेऊन यावीत. नागरिकांचे प्रश्न अधिकाऱ्यांनी सोडवले पाहिजेत. नियमानुसार काम होणार असेल तर ते त्वरीत झाले पाहिजे. होणार नसेल तर का होणार नाही त्याचे उत्तर हे संबंधिताला दिले पाहिजे. नागरिकांना शासकीय कार्यालयात विनाकारण हेलपाटे मारायला लागू नयेत, असा आमचा प्रयत्न आहे.'

कावळा नाक्यावर संपर्क कार्यालय

'कावळा नाका येथील जुन्या विश्रामगृहात माझे, पालकमंत्री पाटील, मंत्री यड्रावकर यांचे लवकरच संपर्क कार्यालय सुरु होणार आहे. लोकशाही दिनाव्यतिरिक्त नागरिकांनी इतर वेळीही आपल्या समस्या, अडचणींसंबंधी कार्यालयात पत्रव्यवहार करुन संपर्क साधावा. येथे नियुक्त अधिकारी त्याबाबत संबंधीत नागरिकांना उत्तर देतील,' असे मंत्री मुश्रीफ यांनी सांगितले.

म. टा. प्रतिनिधी, कोल्हापूर

राजर्षी शाहू गव्हर्न्मेंट सर्व्हंट्स को-ऑपरेटिव्ह बँकेने जिवंत व्यक्तीचा मृत मतदारयादीत समावेश केल्याच्या घटनेनंतर बँकेने चूकीची कबुली देत मतदार यादी दुरुस्ती केली आहे. काही सभासदांची नावे नजरचुकीने मृतांच्या यादीत समाविष्ट झाली असून त्यांची नावे पात्र यादीत समावेश करावीत, असे पत्र बँकेने जिल्हा उपनिबंधकांना पाठवले आहे. दरम्यान मतदार यादीतील चुकांवर ३५ हरकती आल्या असून त्यांना नोटिसा पाठविण्यात आल्याचे जिल्हा उपनिबंधक कार्यालयाने सांगितले.

बँकेने १० जानेवारी रोजी प्रारुप मतदारयादी प्रसिद्ध केली होती. त्यामध्ये बँकेचे माजी अध्यक्ष विश्वास माने, माजी संचालक माजी महापौर आर. के. पोवार यांच्यासह चारशे ते पाचशे लोकांचा मृत सभासदांच्या यादीत समावेश होता. त्यावर जिवंत सभासदांनी जिल्हा उपनिंबधकाकडे दाद मागितली.

त्याबाबत बँकेने आज खुलासा केला आहे. यात म्हटले आहे की, हयात सभासद मतदारांची नावे मृत मतदारयादीत समाविष्ट झाल्याबद्दल दिलगिरी व्यक्त करत आहोत. मृत सभासदांच्या यादीतील चूक लक्षात आल्यावर बँक प्रशासनाने तत्काळ दुरुस्ती करून अद्यायावत यादी जिल्हा उपनिबंधक कार्यालयाकडे सादर केली आहे. संगणकातील तांत्रिक चुकांमुळे ही चूक झाल्याची कबुली बँकेने दिली आहे. ही चूक हेतूपुरस्सर केले नसल्याचा दावाही करण्यात आला आहे.

म. टा. प्रतिनिधी, कोल्हापूर

जिल्हा मध्यवर्ती सहकारी बँकेच्या निवडणुकीसाठी नेत्यांनी ठराव जमा करण्यासाठी यंत्रणा कामाला लावली असून सोमवारअखेर १४५१ ठराव दाखल झाले. सर्वाधिक २५२ ठराव हातकणंगले तालुक्यातून जमा झाले असून गगनबावडा तालुक्यातून अवघे तीन ठराव जमा झाले आहेत.

गोकुळच्या निवडणुकीसाठी ठराव जमा करण्याची अंतिम मुदत संपल्यानंतर काँग्रेस, राष्ट्रवादी, शिवसेनेच्या नेत्यांनी जिल्हा बँकेसाठी ठराव गोळा करण्यासाठी प्रमुख पदाधिकाऱ्यांना आदेश दिले आहेत. गोकुळचे ठराव दाखल करताना काही नेत्यांनी जिल्हा बँकेसाठी ठराव जमा केले आहेत. बँकेच्या सेवा-संस्था गटातील बारा तालुक्यांत १९४१ मतदार आहेत. प्रत्येक तालुक्यातून प्रत्येकी एक संचालक निवडण्यात येणार असल्याने निवडणुकीत चुरस निर्माण होणार आहे. त्यामुळे नेत्यांनी ठरावांसाठी यंत्रणा लावली आहे. राधानगरी तालुक्यात राष्ट्रवादीचे जिल्हाध्यक्ष ए. वाय. पाटील १२५ हून अधिक ठराव दाखल केले आहेत. बँकेचे अध्यक्ष ग्रामविकास मंत्री हसन मुश्रीफ, संचालक आमदार पी. एन. पाटील, विनय कोरे, राजेंद्र पाटील-यड्रावकर यांचे तालुक्यातील ठराव पदाधिकारी जमा करीत आहेत. मतदार असलेल्या संस्थांच्या पदाधिकाऱ्यांचे मेळावेही आयोजित केले जात आहेत.

सोमवारअखेर दाखल झालेले ठराव : चंदगड ५९, गडहिंग्लज ७३, भूदरगड, १४, हातकणंगले २५२, शिरोळ २४०, शाहूवाडी ८१, कागल २४२, राधानगरी २७, कोल्हापूर शहर ११८, करवीर १४१, आजरा ८७, पन्हाळा ११४, गगनबावडा ३, एकूण १४५१.

म. टा. प्रतिनिधी, कोल्हापूर

'गोकुळ'च्या निवडणूकीसाठी दाखल करण्यात आलेल्या ३५ दुबार ठरावांबाबत मंगळवारपासून (ता. २८) दुग्ध विभागाचे सहाय्यक निबंधक डॉ. गजेंद्र देशमुख यांच्या कार्यालयात सुनावणी होणार आहेत. दोन दिवसांत बारा तालुक्यांतील संस्थांची सुनावणी होणार असून संबधित संस्थांना नोटिसा पाठविण्यात आल्या आहेत.

यामध्ये मंगळवारी करवीर, कागल, पन्हाळा, शाहूवाडी तालुक्यातील संस्थांची सुनावणी होणार आहे. पन्हाळा तालुक्यातून सर्वाधिक आठ दुबार ठराव आहेत. कागल तालुक्यात चार, करवीर, पन्हाळा आणि शाहूवाडी तालुक्यात प्रत्येकी दोन ठराव आहेत. १६ दुबार ठरावावर सुनावणी होणार आहे. काही दूध संस्थांकडून वकील म्हणणे मांडणार आहेत. प्रत्येक संस्थेला म्हणणे मांडण्यासाठी पाच मिनिटांचा वेळ देण्यात येणार आहे. सुनावणीनंतर अंतिम निर्णय देशमुख घेणार असून त्यानंतर प्रारुप यादी विभागीय निबंधकांकडे पाठवण्यात येणार आहे.