पोलिस असल्याची भासवून

४५ हजारांचे दागिने लंपास

इचलकरंजी : पोलिस असल्याची बतावणी करून चौकशीच्या बहाण्याने ४५ हजार रुपयांचे सोन्याचे दागिने लंपास केल्याची घटना दोन दिवसांपूर्वी घडली. या घटनेची नोंद शिवाजीनगर पोलिसात झाली आहे. याबाबत भानुदास ढेरे (वय ४८ रा. गोकुळ चौक) यांनी तक्रार दिली आहे.

दोन दिवसांपूर्वी भानुदास ढेरे हे सायकलवरुन दुकानातून साहित्य आणण्यासाठी जात होते. त्याचवेळी कोल्हापूर रोडवरील मॉडर्न हायस्कूलजवळ पाठीमागून स्प्लेंडर मोटारसायकलवरुन आलेल्या एका अनोळखी व्यक्तीने त्यांना अडवले. पोलिस अधिकारी असल्याचे सांगत ओळखपत्रही दाखविले. या परिसरात चरस, गांजाचा व्यवसाय चालत असल्याची माहिती मिळाल्यावरुन चेकिंग सुरू असल्याचे सांगत ढेरे यांच्याकडील दीड तोळ्याची सोन्याची चेन, अर्धा तोळ्याचे लॉकेट व एक तोळ्याची अंगठी असा ४५ हजार रुपयांचा ऐवज, मोबाइल रुमालात ठेवून घेतला आणि मुद्देमाल घेऊन पलायन केले.

म. टा. वृतसेवा, हातकणंगले

हुपरी (ता. हातकणंगले) येथील नगरपरिषदेचे स्वीकृत नगरसेवक सुदर्शन खाडे यांनी आमदार सुरेशराव हाळवणकर यांच्या आदेशानुसार ठरलेल्या सहा महिन्यांच्या मुदतीनंतर जिल्हाधिकाऱ्यांकडे पदाचा राजीनामा सुपूर्द केला. पुढील सहा महिन्यांसाठी नगरपरिषद कृती समितीचे निमंत्रक अमजद नदाफ यांची निवड निश्चित असल्याचे सांगण्यात येते. दरम्यान, उपनगराध्यक्ष जयकुमार माळगे यांच्या राजीनाम्याची अद्याप प्रतिक्षा आहे.

हुपरी नगरपरिषदेत भाजपाची सत्ता आल्याने भाजपच्या जयश्री महावीर गाठ यांना नगराध्यक्षपदी संधी मिळाली. भाजपचे सात, ताराराणी आघाडीचे पाच, शिवसेनेचे दोन, अंबाबाई आघाडीचे दोन तसेच दोन अपक्ष नगरसेवक आहेत. अपक्ष नगरसेवकांनी भाजपमध्ये प्रवेश केला होता. पहिल्या सहा महिन्यांसाठी भाजपने उपनगराध्यक्ष जयकुमार माळगे व स्वीकृत नगरसेवक सुदर्शन खाडे यांना संधी दिली. दोघांची सहा महिन्यांची मुदत संपल्यामुळे त्यांना आमदार हाळवणकर यांनी राजीनामा देण्याचे आदेश दिले होते. त्यानंतर दोन दिवसांपूर्वी सुदर्शन खाडे यांनी जिल्हाधिकारी अविनाश सुभेदार यांच्याकडे राजीनामा दिला. तो मंजूर करण्यात आला. पुढील स्वीकृत नगरसेवक म्हणून नगरपरिषद कृती समितीचे निमंत्रक अमजद नदाफ यांना संधी दिली जाणार असल्याचे सांगण्यात येते. ज्येष्ठ नेते महावीर गाठ, भाजपचे पक्षप्रतोद तानाजी पोवार, पक्षप्रतोद भरत लठ्ठे यांचे यासाठी प्रयत्न सुरू आहेत.

म. टा. वृत्तसेवा, आजरा

'स्वच्छ भारत निर्मितीसाठी बेगडी अभियान राबविणाऱ्या आणि त्याची जाहिरात करणाऱ्य राजकारण्यांनी गटारात उतरणाऱ्या स्वच्छता कामगारांचे क्षणाक्षणाला मरणारे जीवनमान उंचावण्यासह त्यांना जीवदान देणे अपेक्षित आहे. पण ते होत नाही. म्हणूनच केवळ स्वच्छ नको, तर आम्हाला सत्य भारत हवा आहे,' असे प्रतिपादन जेष्ठ पत्रकार निखिल वागळे यांनी आजरा येथे केले. येथील अण्णा-भाऊ सांस्कृतिक सभागृहामध्ये आयोजित लोकशाहीर द. ना. गव्हाणकर स्मृतीनिमित्त पहिला पुरस्कार जेष्ठ सामाजिक कार्यकर्ते आणि विचारवंत डॉ. आ. ह. साळुंखे याना प्रदान करण्यात आला. त्यावेळी ते बोलत होते. अध्यक्षस्थानी रवींद्र आपटे होते.

डॉ. साळुंखे म्हणाले, 'हल्ली नवी पिढी खुलण्यासाठी, त्यांना कौतुकाची थाप मिळावी म्हणून मी पुरस्कार स्वीकारत नाही. पण देशाचा, महाराष्ट्राचा आणि गोव्याचा लढा शाहिरीच्या बळावर लोकलढा केलेल्या लोकशाहीर गव्हाणकर यांच्या नावे हा पुरस्कार असल्याने तो स्वीकारतो आहे. अण्णाभाऊ साठे आणि अमर शेख यांच्या बरोबरीने क्रांतिकारक चळवळ केलेले लोकशाहीर गव्हाणकर उपक्षेचे धनी झाले. पण ते तिघे तीन विविध जातीधर्माचे प्रतिनिधी होते. पण भेदाच्या भिंती ओलांडत ते 'डी-कास्ट' झाले. असे महान कार्य करण्याची त्यांना प्रेरणा देणारी येथील माती प्रतिभाशाली आहे. या मातीमध्ये त्यांचे केवळ पुतळे आणि इमारती होण्यापेक्षा, त्यांचे प्रेरणादायक जिवंत स्मारक व्हावे. जे नव्या पिढीला मार्गदर्शक ठरेल.'

संपत देसाई यांनी प्रस्ताविक केले. 'लोकशाही गव्हाणकर आणि बाबूराव पेंटर हे दोन्ही कलावंत महागोंडचे. त्यांची कला सर्वसामान्यांचा आवाज बुलंद करणारी होती. त्यांचे कलादालन महागोंड येथे व्हावे, यासाठी मान्यवरांनी सहकार्य करावे' असे ते म्हणाले. खासदार धनंजय महाडिक, रवींद्र आपटे आणि अरुण सामंत यांची भाषणे झाली.

आमदार प्रकाश आबिटकर, संध्यादेवी कुपेकर, रामराजे कुपेकर, माजी आमदार श्रीपतराव शिंदे, सभापती रचना होलम, नगराध्यक्षा जोत्स्ना चराटी, स्वाती कोरी, तहसीलदार अनिता देशमुख, किसनराव कुराडे, राजेंद्र गड्ड्यानावर, महागोंडच्या सरपंच सुलाताई गुरव, गव्हाणकरांच्या कन्या प्रतिभा सामंत, राजा शिरगुप्पे, प्रा. सुनील शिंत्रे आदिंसह मान्यवर उपस्थित होते. ज्योतिप्रसाद सावंत यांनी मानपत्र वाचन केले.

लाखोंचा निधी जाहीर

खासदार महाडिक यांनी गव्हाणकर कलादालनासाठी १० लाख तर दरवर्षीच्या पुरस्कार रक्कमेसाठी ५० हजार रुपये देणगी जाहीर केली. उपस्थित तीन आमदारांनी प्रत्येकी ५ लाख तर जिल्हा नियोजन मंडळातून २५ लाखांचा निधी उपलब्ध करून देण्याची ग्वाही दिली.

शासनाला सोयीस्कर विसर

१९३५ साली पदवीधर झालेल्या गव्हाणकरांनी देशाचा स्वातंत्र्य लढा, संयुक्त महाराष्ट्र चळवळ, गोवा मुक्ती संग्राम आणि 'फकिरा' चित्रपट निर्मिती बरोबर आयुष्यभर कामगार, शोषित, कष्टकऱ्यांसाठी लढा दिला. भरीव काम करूनही मतांचे राजकारण करणाऱ्या सर्व शासनाना त्याचा सोयीस्कर विसर पडला' अशी खंत गव्हाणकर यांचे जावई अरुण सामंत यानी व्यक्त केली.

म. टा. प्रतिनिधी, कोल्हापूर

अहिंसावादी तत्वज्ञानाचे पुरस्कार करणाऱ्या राष्ट्रपिता महात्मा गांधी यांची जयंती मंगळवारी महापालिकेच्यावतीने साजरी केली. महात्मा गांधींच्या जयंतीचे औचित्य साधून वरुणतीर्थ वेश येथील महात्मा गांधी यांच्या पुर्णाकृती पुतळ्यास महापौर शोभा बोंद्रे यांच्या हस्ते पुष्पहार अर्पण करण्यात आला. तसेच करवीर निवासिनी अंबाबाई मंदिर परिसरात 'स्वच्छता हिच सेवा' मोहीम राबवण्यात आली.

यावेळी आयुक्त डॉ. अभिजीत चौधरी, उपमहापौर महेश सावंत, स्थायी समिती सभापती सभापती आशिष ढवळे, अतिरिक्त आयुक्त श्रीधर पाटणकर, उपायुक्त मंगेश शिंदे, प्राथमिक शिक्षण समिती सभापती अशोक जाधव, शहर अभियंता नेत्रदिप सरनोबत, उपशहर अभियंता रमेश मस्कर, कनिष्ठ अभियंता सुनील भाईक, अशोकराव साळोखे, चंद्रकांत यादव, शरद तांबट, बापू मकानदार आदी उपस्थित होते.

महापालिकेच्यावतीने 'स्वच्छता हिच सेवा' या उपक्रमांतर्गत विविध सेवाभावी संस्थांच्यावतीने अंबाबाई मंदिर परिसरात स्वच्छता मोहीम राबविण्यात आली.

मोहिमेची सुरवात महापौर बोंद्रे यांनी स्वत: झाडू हातात घेऊन केली. महात्मा गांधी यांच्या जयंतीला १५० वर्षे पूर्ण होत असून याचे औचित्य साधत पंतप्रधान नरेद्र मोदी यांनी 'स्वच्छता हिच सेवा' हे अभियान राबविणेचा संकल्प केला होता. त्याचाच एक भाग म्हणून गेल्या पंधरा दिवसापासून कोल्हापूर महानगरपालिके तर्फे शहरात कृती अराखडा तयार करुन स्वच्छता हिच सेवा या उपक्रमाची प्रभावी पणे अंमलबजावणी करण्यात आली. यामध्ये ओला व सुका कचरा वर्गीकरण करणे, प्रेक्षणीस स्थळे, मुख्य रस्ते, सार्वजनिक शौचालय, भाजी मार्केट इत्यादी ठिकाणी नागरीक, सेवाभावी संस्था, शाळा, महाविद्यालय इत्यादीच्या समन्वयाने स्वच्छता मोहीम राबवली.

म. टा. वृत्तसेवा, पन्हाळा

कोल्हापूर-रत्नागिरी महामार्गावरील बोरपाडळे वन उपज नाक्याजवळ रविवारी पहाटे अवैधरित्या जळावू लाकूड वाहतूक करणाऱ्या सुमारे बारा ट्रक अडविण्यात आले होते. त्यांची कागदपत्रे तपासून कसून चौकशी करण्यात आली. त्यापैकी तीन ट्रकवर जादा माल आणि तोडणी व वाहतूक पासमध्ये तफावत आढळल्याने कारवाई करण्यात आली.

बोरपाडळे येथील हॉटेलजवळ अडविण्यात आलेल्या बारा ट्रकपैकी एका ट्रकमध्ये (एमएच ०९ बीसी ३३१३) सुमारे तीन घनमीटर जादा लाकुड सापडले. तर आणखी दोन ट्रकमध्ये (एमएच ११ एम ५६३०) आणि एमएच ०८ एच ००३४) यामध्ये लाकूड तोडणी आणि वाहतूक पास यांच्यामध्ये तफावत आढळली. त्यांच्या कागदपत्रे तपासली असता पासवर तोडणीची तारीख जुनी तर वाहतूक पासची नवीन तारीख आढळली. या ट्रकवर पहिल्यांदा पन्हाळा येथे गुन्हा दाखल करण्यात येणार आहे. उर्वरीत नऊ ट्रकना चौकशीनंतर सोडून देण्यात आले. पन्हाळ्याच्या वनक्षेत्रपाल प्रियांका दळवी, फिरते संरक्षण अतिक्रमण निर्मूलन वनपथकाचे इंद्रजित निकम, राजेश चौगुले, रॉकी देसाई आदींनी ही कारवाई केली.

म. टा. वृत्तसेवा, बेळगाव

शाळेला सुट्टी असल्याने पोहायला गेलेल्या शाळकरी मुलाचा बुडून मृत्यू झाल्याची घटना गौडवाड येथे घडली आहे. गौतम लक्ष्मण पवार (१४) असे बुडून मृत्यू पावलेल्या मुलाचे नाव आहे. गांधी जयंतीनिमित्त शाळेला सुट्टी असल्याने गौतम आपल्या मित्रासमवेत गावातील भरम तलावात पोहण्यासाठी गेला होता. गौतम बुडल्याची घटना कळताच गावकऱ्यांनी तळ्याकडे धाव घेतली आणि त्याचा मृतदेह बाहेर काढला. सदर घटनेची काकती पोलिस स्थानकात नोंद झाली आहे.

म. टा. वृत्तसेवा, जयसिंगपूर

'महाराष्ट्राच्या खेड्यापाड्यातील मातीच्या कणा-कणात कला क्रिडा क्षेत्राची अत्युच्च प्रतिभा आहे. यामुळेच धनराज पिल्ले सारखे खेळाडू घडले. महात्मा ज्योतिबा फुले, क्रांतीज्योती सावित्रीबाई फुले यांनी जे झेललं त्याला आलेली ही फळे आहेत. नव्या पिढीने याचा आदर्श घ्यावा' असे मत विचारवंत डॉ. आ. ह. साळुंखे यांनी व्यक्त केले. जयसिंगपूर येथे रत्नाप्पाण्णा कुंभार विचार मंचच्या पुरस्कार वितरण सोहळ्यात ते बोलत होते. सोहळ्याच्या अध्यक्षस्थानी नगराध्यक्षा डॉ. नीता माने होत्या.

कार्यक्रमात गोकुळ दूध संघाचे संचालक अरूण डोंगळे यांच्या हस्ते दिग्दर्शक राजदत्त यांना जीवनगौरव, पार्श्वगायिका उत्तरा केळकर यांना समाजभूषण, डॉ. आ. ह. साळुंखे यांना साहित्यरत्न तर हॉकीपटू पद्मश्री धनराज पिल्ले यांना क्रीडारत्न पुरस्काराने गौरविण्यात आले. उच्चशिक्षण विभागाचे सहसंचालक अजय साळी प्रमुख उपस्थित होते.

दिग्दर्शक राजदत्त म्हणाले, 'स्वातंत्र्याच्या ६० वर्षानंतरही सर्वत्र अंधार आहे अशी ओरड होते. मात्र प्रत्येकाने हातात पणती घेऊन त्यामध्ये आपल्या कर्तृत्वाचे तेल ओतून ती पेटविली पाहिजे, तरच हा अंधार दूर होईल. देशभक्त रत्नाप्पाण्णा कुंभार यांनी स्वातंत्र्यानंतर सहकार चळवळ उभी केली. सर्वसामान्यांच्या प्रश्नांसाठी झगडणारे ते आदर्श नेतृत्व होते. नव्या पिढीने त्यांचा आदर्श घेऊन वाटचाल केली पाहिजे.'

हॉकीपटू धनराज पिल्ले म्हणाले, 'महाराष्ट्राच्या मातीत जिद्द आहे. माझ्यामध्येही ती आहे. जीवनात हॉकी हे एकच लक्ष्य होते. कठोर परिश्रमातून मी यशोशिखर गाठले. अर्जुन, पद्मश्री, राजीव गांधी खेलरत्न यासारख्या पुरस्कारांचे स्वप्न होते. ते सत्यात उतरविले. शिवरायांच्या महाराष्ट्राच्या मातीत जन्मलो याचा मला अभिमान आहे.'

दे. भ. रत्नाप्पाण्णा कुंभार यांनी आपल्या कर्तृत्वातून ठसा उमटविल्याचे नमूद करून अरूण डोंगळे म्हणाले, 'गेली बारा वर्षे समाजातील रत्ने शोधून त्यांना आण्णांच्या नावाने पुरस्कार देवून विचारमंचच्यावतीने गौरविण्यात येते, हे काम कौतुकास्पद आहे. '

नगराध्यक्षा डॉ. माने, सुरेश कुराडे, अजय साळी यांनी मनोगत व्यक्त केले. पार्श्वगायिका उत्तरा केळकर यांनी आपल्या मधुर स्वरांनी उपस्थितांना मंत्रमुग्ध केले. मंचचे अध्यक्ष बंडा मिणियार यांनी स्वागत केले. बाबासाहेब परिट यांनी प्रास्ताविक केले. रेखा गायकवाड, नगरसेविका स्वरुपा पाटील-यड्रावकर, निलम माणगावे, मंजुश्री मिणियार यांनी मानपत्राचे वाचन केले. महादेव मेथे यांनी आभार मानले. प्रकाश गडदे यांनी सूत्रसंचलन केले. शरद साखर कारखान्याचे चेअरमन डॉ. राजेंद्र पाटील-यड्रावकर, रजनीताई मगदूम, माजी नगराध्यक्ष अमरसिंह निकम, अशोकराव घोरपडे, बाबगोंडा पाटील, शंकर पाटील, डॉ. चिदानंद आवळेकर, प्रताप नाईक, शोभा कोळी, इम्तियाज खान आदी उपस्थित होते.

फोटो आहे

म. टा. प्रतिनिधी, कोल्हापूर

उच्चशिक्षणातील शिक्षकांच्या रिक्त जागा भराव्यात, जुनी पेन्शन योजना लागू करावी, ७१ दिवसांचे थकीत वेतन द्यावे आदी मागण्यांसाठी शिवाजी विद्यापीठ शिक्षक संघ (सुटा) व महाराष्ट्र राज्य प्राध्यापक महासंघाच्यावतीने (एमफुक्टो) दसरा चौकात काळ्या फिती लावून मौन आंदोलन केले. महात्मा गांधी जयंतीचे औचित्य साधून मुख्यमंत्री देवेंद्र फडणवीस मौन सोडावे, अशी अपेक्षा व्यक्त करण्यात आली.

प्राध्यापकांच्या विविध मागण्यांसाठी गेल्या आठ दिवसांपासून आंदोलन सुरु आहे. राज्यस्तरावर सुरु असलेल्या आंदोलनाची सरकारने अद्याप दखल घेतलेली नाही. विशेषत: मुख्यमंत्री फडणवीस व उच्चशिक्षण मंत्री विनोद तावडे शिक्षण व्यवस्था खिळखिळी करत असलाचा आरोप करत संघटना अधिक आक्रमक झाली आहे.

आंदोलनाचा भाग म्हणून महात्मा गांधीजींच्या जयंतीचे औचित्य साधून प्राध्यापकांनी दसरा चौकात तोंडाला काळ्या फिती लावून मौन धरणे आंदोलन केले. प्रथम महात्मा गांधी व लालबहाद्दूर शास्त्री यांच्या प्रतिमेचे पूजन करण्यात आले. सरकारने मौन सोडून बोलके व्हावे, उच्चशिक्षणातील गुणवत्ता व स्वायतत्ता यांचे रक्षण करावे, सरकारच्या अनास्थेमुळे विद्यार्थी, शिक्षक, प्राचार्य व संस्थाचालकांमध्ये प्रचंड असंतोष निर्माण झाला आहे. या असंतोषाला प्राध्यापकांनी आंदोलनाच्या माध्यमातून वाचा फोडली आहे.

आंदोलनादरम्यान आमदार चंद्रदीप नरके यांनी भेट देवून मुख्यमंत्री फड‌णवीस यांच्यासोबत चर्चा घडवून आणण्याचे आश्वासन दिले. आंदोलनास वसंतराव मुळीक, सुधाकर सावंत, प्रभाकर आरडे, बी. एल. बरगे, राजेश वरक यांनी पाठिंबा दिला.

मौन आंदोलनात प्रा. सुधाकर मानकर, डॉ. सुभाष जाधव, डॉ. डी. एन. पाटील, डॉ. अरुण शिंदे, डॉ. अरुण पाटील, प्रा. संतोष जेठीथोर, प्रा. आर. जी. कोरबू, प्रा. प्रकाश कुंभार यांच्यासह प्राध्यापक सहभागी झाले.

म. टा. वृत्तसेवा, गारगोटी

आगामी लोकसभा व विधानसभा निवडणुकीसाठी प्रशासन आतापासूनच कामाला लागले आहे. निवडणूक आयोगाने मतदार याद्यांचा विशेष पुनरीक्षण कार्यक्रम जाहीर केला आहे. त्यानिमित्ताने रविवारी विशेष मोहीम झाली. या पार्श्वभुमीवर भुदरगडचे तहसीलदार अमरदीप वाकडे यांनी तालुक्यातील सर्व मतदार पर्यवेक्षकांची बैठक घेतली.

निवडणूक आयोगाने दिनांक १ जानेवारी २०१९ या अर्हता दिनांकावर आधारित छायाचित्र मतदार याद्यांचा विशेष संक्षिप्त पुनरीक्षण कार्यक्रम जाहीर केला आहे. या कार्यक्रमात १ सप्टेंबर ते ३१ ऑक्टोबर या कालावधीत दावे व हरकती स्वीकारणेत येत आहेत. या कार्यक्रमात ७, १४, २१ आणि २८ ऑक्टोबर रोजी ज्या-त्या गावातील प्रत्येक मतदान केंद्रावर विशेष मोहीमेचे आयोजन केले आहे. या दिवशी सर्व मतदान केंद्रावर संबंधित केंद्रस्तरीय अधिकारी उपस्थित राहून मतदार नोंदणीचे काम करणार आहेत. पात्र व्यक्ती मतदार होण्यापासून वंचित राहू नये. यासाठी नावनोंदणी तसेच नाव वगळणे, मतदार मृत असेल तर तशी नोंद करणे अशी कामे केली जाणार आहेत. यासाठी केंद्रस्तरीय अधिकारी व पर्यवेक्षकांनी मतदान केंद्रांवर उपस्थित राहण्याच्या सूचना भुदरगड प्रशासनाकडून या बैठकीत देणेत आल्या.

नागरिकांनी फॉर्म नंबर ६ भरून घेऊन मतदार नोंदणी करून घ्यावी. ज्यांचे मतदार यादीतील नावात तसेच इतर दुरुस्ती असल्यास त्यांनी दुरुस्तीबाबत आवश्यक पुराव्यासह मतदान केंद्रस्तरीय अधिकाऱ्यांकडे दुरुस्तीबाबत फॉर्म भरून द्यावा असे आवाहन तहसिलदार अमरदीप वाकडे यांनी केले आहे. बैठकीस निवडणूक नायब तहसीलदार हणमंत म्हेत्रे, राजीव कुंभार तसेच तालुक्यातील सर्व पर्यवेक्षक उपस्थित होते.

म. टा. वृत्तसेवा शाहूवाडी

कांडवण पैकी कांबळेवाडी (ता. शाहूवाडी) येथील अल्पवयीन मुलीवर लैंगिक अत्याचार करणाऱ्या व घटनेनंतर फरार झालेल्या तानाजी नामदेव शिंदे (वय २३, रा. कांडवण पैकी कोकणेवाडी, ता. शाहूवाडी) या आरोपीला सोमवारी मध्यरात्री सव्वाएकच्या सुमारास कोल्हापूर मध्यवर्ती बसस्थानकावर शिताफीने पकडण्यात शाहूवाडी पोलिसांना यश आले. पुणे-मुंबईकडे जाणाऱ्या बसगाड्यांजवळ घुटमळत असलेल्या या नराधम आरोपीला पकडण्यात आले. पीडितेच्या आईने दिलेल्या फिर्यादीनुसार रविवारी (ता. ३०) तानाजी शिंदे याच्या विरोधात शाहूवाडी पोलिसांत गुन्हा दाखल झाला होता. दरम्यान, त्याला करवीर पोलिसांच्या कोठडीतून मंगळवारी दुपारी आरोपी शिंदे याला कोल्हापूर न्यायालयात हजर केले असता शुक्रवारपर्यंत (ता. ५) पोलिस कोठडीत ठेवण्याचे आदेश न्यायालयाने दिले आहेत.

दरम्यान फरारी आरोपीला पकडण्यात मोलाची कामगिरी बजावणाऱ्या पोलिस निरीक्षक मनोहर रानमाळे यांच्यासह तपास पथकाचे तपासाधिकारी व डीवायएसपी आर. आर. पाटील यांनी कौतुक केले. रानमाळे आणि तपास पथकाला विशेष पारितोषिक मिळण्यासाठी वरिष्ठांकडे प्रस्ताव पाठविणार असल्याचे त्यांनी पत्रकारांशी बोलताना सांगितले.

कांडवण पैकी कांबळेवाडी (ता. शाहूवाडी) येथे शनिवारी (ता. २९) सायंकाळी साडेपाचच्या सुमारास दुकानातून किराणा माल खरेदी करून लहान बहिणीसह घरी परत निघालेल्या सात वर्षीय अल्पवयीन मुलीला रस्त्यातून उचलून नेऊन आरोपी तानाजी शिंदे याने कांडवण ते कांडवण पैकी कांबळेवाडी दरम्यानच्या रस्त्यालगत ऊसाच्या शेतात लैंगिक अत्याचार केले. शिंदे घटनास्थळावरून पसार झाला. शाहूवाडी पोलिस ठाणे ६० किलोमीटरवर असल्याने सोळा तासांनंतर गुन्ह्याची नोंद झाली. आरोपी शिंदे हा घरच्यांच्या संपर्कात नाही. तो मोबाइलही वापरत नसल्याने त्याला शोधून काढण्याचे पोलिसांसमोर आव्हान होते. शाहूवाडीचे ४० पोलिस कर्मचारी त्याचा शोध घेत होते. खबऱ्यांकडून माहिती घेत पोलिस निरीक्षक रानमाळे हे शिंदे याच्यापर्यंत पोहचले. सोमवारी रात्री उशिरा एका खबऱ्याने शिंदे हा कोल्हापूर मध्यवर्ती बसस्थानक परिसरात असल्याची माहिती त्यांना दिली. पोलिसांनी सापळा रचून त्याला पकडले.

निरीक्षक रानमाळे, उपनिरीक्षक महादेव जठार, हेड कॉन्स्टेबल चिंतामणी बांबळे, सागर कुंभार, धनाजी सराटे, भरत मोळके, माणिक पाटील, सचिन चव्हाण, प्रकाश कांबळे आदींनी तपास पथकात यशस्वी कामगिरी बजावली. स्थानिक पोलिस पाटील पांडुरंग सुतार, हनुमंत जाधव यांसह ग्रामस्थांनी, सामाजिक संघटनांनी पोलिसांनी तपासात सहकार्य केल्याचे तपासाधिकारी आर. आर. पाटील यांनी सांगितले.

फोटो :

डीवायएसपी आर. आर. पाटील, पोलिस निरीक्षक मनोहर रानमाळे यांनी आरोपी तानाजी शिंदेला अटक केली.

म. टा. वृत्तसेवा, शिराळा

वारणानगर येथील तात्यासाहेब कोरे वारणा सहकारी साखर कारखान्याच्या ६३ व्या वर्धापन दिनानिमित्त आयोजित रक्तदान शिबिरात दीडशेहून अधिक जणांनी रक्तदान केले. यात महिलांचाही सहभाग होता. वर्धापन दिनानिमित्ताने कारखाना कार्यालयासह, स्वर्गीय तात्यासाहेब कोरे यांच्या शिल्पाभोवती विद्युत रोषणाई करण्यात आली होती. महात्मा गांधी हॉस्पिटल परगाव व कोल्हापुरातील अर्पण ब्लड बॅंकेच्या सहकार्याने रक्तदान शिबिर झाले. सलग पंधरा वर्षे रक्तदान करणा-या रक्तदात्यांचा कारखान्याचे उपाध्यक्ष प्रतापराव पाटील, प्रभारी कार्यकारी संचालक व्ही. एस. कोले यांच्या हस्ते सत्कार करण्यात आला. यावेळी प्रशासकीय अधिकारी दादा जाधव, डॉ. जे. बी. चव्हाण, एम. ए. बाबर, ऊस विकास अधिकारी सुभाष करडे, विठ्ठल पाटील, सुरक्षा अधिकारी वाय. एस. पिंपरी, दादा भोई, विश्वास जाधव, अनिल चव्हाण, अजित कपाळे, डॉ. गाढवे, डॉ. अर्जुन शेळके, बाजीराव पाटील, विजय शिंगाडे, राजेंद्र निकम यावेळी उपस्थित होते.

प्रशासनाची मेहरनजर, तक्रारदार सदस्यांचा आरोप

म. टा. प्रतिनिधी, कोल्हापूर

येथील माध्यमिक शिक्षणाधिकारी किरण लोहार यांना सर्वसाधारण सभेत सक्तीच्या रजेवर पाठवण्याचा निर्णय होऊन दोन आठवडे होऊन गेले. मात्र अद्यापही त्यांना प्रत्यक्षात रजेवर पाठविण्यात आलेले नाही. यामुळे रजेचा निर्णय लालफितीत अडकल्याचे पुढे आले आहे. परिणामी सभेतील निर्णयालाच आव्हान देत लोहारांनी कार्यालयात, स्थायी समितीला हजर राहण्याचा प्रयत्न केला, असा आरोप तक्रारदार सदस्य राजवर्धन निबांळकर यांनी पत्रकारांशी बोलताना केला.

लोहार पैशासाठी शिक्षकांना त्रास देतात, कामाची अडवणूक करतात, सभा, बैठकांना हजर राहत नाही, असा आरोप निंबाळकर यांच्यासह अनेक सदस्यांचा आहे. याच कारणांवरून सक्तीच्या रजेवर पाठवून त्यांच्यासह कार्यालयातील कर्मचाऱ्यांची चौकशी करण्याचा आदेश अध्यक्ष शौमिका महाडिक यांनी सभेत दिला. आदेश झुगारून ते कार्यालयात येण्यासाठी धडपडत आहेत. सदस्यांनी आक्षेप घेतल्यानंतर त्यांना कार्यालय आणि 'स्थायी'तून काढता पाय घ्यावा लागला. रितसर त्यांना सक्तीच्या रजेचा आदेश देण्यात आलेला नाही. तो द्यावा, अशी मागणी सदस्य निंबाळकर वारंवार करीत आहेत.

मुख्य कार्यकारी अधिकारी अमन मित्तल, अध्यक्षा महाडिक यांच्याकडे ते पाठपुरावा करीत आहेत. त्यामुळे अजूनही निर्णय न होण्यामागचे गुपित काय असा प्रश्न उपस्थित होत आहे. नियमानुसार कोणत्याही अधिकाऱ्यास सक्तीच्या रजेवर पाठवता येत नाही. मात्र सीईओ मित्तल यांनी रजा टाकण्याचा आदेश दिला आणि तो पाळला नाही, तर त्यांच्याकडून कार्यभार काढून घेण्याचा अधिकार आहे. पण या अधिकाराचा वापर होताना दिसत नाही. परिणामी प्रशासनच लोहार यांना पाठिशी घालत असल्याच्या तक्रारीला बळ मिळत आहे.

--------------

लैंगिक प्रकरणाचा

अहवाल लपवला

शहरातील एका हायस्कूलमध्ये शालेय मुलीवर शिक्षकानेच लैंगिक अत्याचार केल्याचा प्रकार घडला होता. या प्रकरणाचा चौकशी अहवाल 'माध्यमिक' विभागातील कार्यालयात आला आहे. तो अहवाल मिळवण्यासाठी विविध संघटनांचे पदाधिकारी प्रयत्न करीत आहेत. माहिती अधिकाराखाली मागणीही केली आहे. मात्र अहवाल देण्यास टाळाटाळ केली जात आहे. तो लपवून ठेवण्यामागचे गौडबंगला काय, असा सवाल ब्लॅक पँथरचे अध्यक्ष सुभाष देसाई यांनी केला आहे.

------------------

तक्रारींचा पाऊस

लोहारांच्या प्रशासकीय कामकाजाची चौकशी करण्यासाठी समितीची स्थापना केली आहे. समितीच्या सदस्यांकडे लोहाराविरोधातील तक्रारींचा पाऊस पडत आहे. अनेक तक्रारी लेखी, तोंडी स्वरूपात येत आहेत. याशिवाय आणखी कुणाच्या तक्रारी असल्यास द्याव्यात, असे आवाहन गुरूवारी समितीचे सदस्य करणार आहेत.

-------------

म. टा. प्रतिनिधी, कोल्हापूर

जिल्हा परिषदेतर्फे खरेदी केलेल्या औषध घोटाळ्याचा ठपका असलेले औषध निर्माण अधिकारी बी. डी. चौगले यांची सोयीच्या ठिकाणाहून अखेर उचलबांगडी होणार आहे. दुर्गम समजल्या जाणाऱ्या शाहूवाडी तालुक्यातील करंजफेण प्राथमिक आरोग्य केंद्रात त्यांची बदली होणार आहे. यासंबंधीचा प्रस्ताव आरोग्य प्रशासनाने मुख्य कार्यकारी अधिकारी डॉ. अमन मित्तल यांच्याकडे पाठवला आहे.

जिल्ह्यात तीन महिन्यांपूर्वी औषध घोटाळा गाजला होता. या प्रकरणात ठपका असलेले जिल्हा आरोग्य अधिकारी डॉ. प्रकाश पाटील यांची बदली झाली. तर औषध निर्माण अधिकारी चौगले यांना सक्तीच्या रजेवर पाठवण्यात आले होते. त्यांची खातेनिहाय चौकशी सुरू आहे. दरम्यान, ते पुन्हा सेवेत रूजू झाल्यानंतर त्यांनी सोयीचे ठिकाण मिळवले. हातकणंगले तालुक्यातील हेर्ले प्राथमिक आरोग्य केंद्रात ते औषध निर्माण अधिकारी म्हणून रूजू झाले. गेल्या सर्वसाधारण सभेत अनेक सदस्यांनी औषध घोटाळ्यातील दोषींना वाचवले, सोयीच्या आरोग्य केंद्रात बदली केल्याचा आरोप केला. त्याची गंभीर दखल घेऊन चौगले यांची हेर्ले प्राथमिक आरोग्य केंद्रातून बदली करण्याचा प्रस्ताव तयार करण्यात आला आहे.

-------------------

लालबहाद्दुर शास्त्रींना अभिवादन

कोल्हापूर : जय जवान जय किसान असा नारा देत देशातील कृषी क्षेत्रास चालना देणारे माजी पंतप्रधान लालबहाद्दुर शास्त्री यांच्या जयंतीनिमित्त महापालिकेच्यावतीने मंगळवारी सकाळी शास्त्रीनगर येथील लालबहाद्दुर शास्त्री यांच्या पुतळयास महापौर शोभा बोंद्रे यांच्या हस्ते पुष्पहार अर्पण केला. यावेळी स्थायी समिती सभापती सभापती आशिष ढवळे, उपायुक्त मंगेश शिंदे, शहर अभियंता नेत्रदिप सरनोबत, प्रभारी जनसंपर्क अधिकारी मोहन सूर्यवंशी यांच्यासह नागरिक उपस्थित होते.

जीवदान संस्थेचा माणुसकीचा झरा

कोल्हापूर टाइम्स टीम

वेळ दुपारची. पावसाने जोर धरलेला. पावसापासून बचाव करण्यासाठी ७५ वर्षीय अजोबांची चाललेली धडपड. आजोबाप्रमाणेच इतरांचीही पावसापासून बचाव करण्यासाठी धडपड अन् यशस्वीही. पण, विकलांग आजोबा फुटपाथवरच पावसाच्या धारा झेलत असह्यपणे बसले होते. यावेळी जीवदान संस्थेच्या पदाधिकाऱ्यांनी माणुसकीचे दर्शन घडवत विकलांग आजोबांना सावली केअर सेंटरमध्ये दाखल केले. अन् एका विकलांगाला निवारा मिळाला.

२० सप्टेंबर रोजी दुपारी तीन वाजता परतीच्या पाऊस शहराला झोडपून काढत होता. अचनाक आलेल्या पावसाने सर्वांचीच त्रेधातिरपीट उडाली. सर्वजण मिळेत तेथे निवारा शोधत होते. अशाच स्थितीत गिजवणे (ता. गडहिंग्लज) येथील विकलांग आजोबा रस्त्यावरुन सरपटत निवारा शोधणाचा प्रयत्न करत होते. धो-धो पडणाऱ्या पावसात त्यांची धडपड सर्वजण पहात होते. त्याचवेळी निवाऱ्यासाठी थांबलेल्या जीवदान संस्थेचे अध्यक्ष अरुण खोडवे, वैभव देसाई, भगवंत शिंगाडे, संतोष रणदिवे, संदीप खोडवे व वसंत लिंगनूरकर पहात होते. क्षणाचाही विलंब न लावता सर्वांनी त्यांना बोलते केले. त्यांच्या तोंडून करुण कहाणी ऐकल्यानंतर त्यांना सोबत येण्याची विनंती केली.

विकलांग आजोबांनीही निवारा मिळत असल्याने होकार दिला. कुटुंबांकडून अहवेलना झालेल्या आजोबांनी होकार देताच खोडवे यांनी सावली केअर सेंटरच्या संचालिका गौरी देशपांडे यांच्याशी संपर्क साधला. त्यांनीही सकारात्मक प्रतिसाद दिल्यानंतर त्यांची रवानगी 'सावली'मध्ये करण्यात आली. यापूर्वीही जीवदान संस्थेच्या पदाधिकाऱ्यांनी अशाच पद्धतीने अनेक निराधरांना निवारा मिळवून दिला आहे. विकलांग आजोबांना दाखल करण्यसाठी कागदपत्रांचे सर्व सोपस्कार पूर्ण करत असताना यापूर्वी दाखल केलेल्या निराधरांची विचारपूस खोडवे यांच्या टीमने केली.

चार दिवसांनंतर संस्थेच्या पदाधिकाऱ्यांनी सावली सेंटरला भेट दिली. यावेळी गिजवणे येथील आजोबांचे बदलेले रुप पाहून सर्वचजण अचंबित झाले. जीवदान संस्थेच्या पदाधिकाऱ्यांनी दाखवलेल्या या माणुसकीमुळे आजोबाही कृतार्थ झाले.

कोल्हापूर टाइम्स टीम

ऐतिहासिक महत्त्व असलेल्या शिवाजी चौक सुशोभिकरणाच्या कामाला नऊ महिन्यांपूर्वी सुरुवात झाली. या कालावधीत पुतळ्याच्या चबुतऱ्याची उंची वाढवण्यासाठी आवश्यक काँक्रिटीकरणाचे कामही पूर्णत्वास गेलेले नाही. कामाची मुदत उलटूनही गेल्यानंतरही काम अत्यंत संथगतीने सुरू असल्याने किमान नव्या वर्षात तरी, चौकाचे सुशोभिकरण पूर्ण होईल का? असा प्रश्न उपस्थित होऊ लागला आहे.

देशाच्या स्वातंत्र्यलढ्यात छत्रपती शिवाजी चौकाचे महत्वपूर्ण स्थान आहे. दैदिप्यमान इतिहास असलेल्या छत्रपती शिवरायांचा पुतळा येथील अनेक राजकीय आणि सामाजिक परिवर्तन लढायांचा साक्षीदार आहे. शहराच्या मध्यवर्ती ठिकाणी असलेल्या चौकाला अनेक पर्यटक भेटी देत असतात. मध्यवस्तीतील पुतळ्याच्या संरक्षणासाठी सभोवती लोखंडी खांब बसवण्यात आले होते. कालांतराने चौकातील वाहतूक वाढत गेल्यानंतर लोखंडी खांबांना धक्का पोहचू लागला. काही खांब निखळून पडले. परिणामी इतिहासाचा साक्षीदार असणाऱ्या चौकाच्या सुशोभिकरणाची संकल्पना पुढे आली.

आमदार राजेश क्षीरसागर यांच्या निधीतून सुशोभिकरण करण्याचा निर्णय घेण्यात आला. चौक सुशोभिकरणासाठी एक कोटी रुपयांचा आराखडा तयार करण्यात आला. चौकाचा ऐतिहासिक बाज कायम ठेवण्यासाठी इतिहास संशोधक, अभ्यासक आणि तज्ज्ञांकडून सूचना मागवण्यात आल्या. तत्कालीन महापौर हसीना फरास यांच्या अध्यक्षतेखाली सर्वपक्षीय समितीची स्थापना करण्यात आली. समितीला प्राप्त झालेल्या सूचनेनुसार आर्किटेक्ट सूरज जाधव यांनी येथील डिझाइन तयार केले. त्यानंतर दहा डिसेंबर २०१७ रोजी सुशोभिकरणाच्या कामाचे भूमीपूजन करण्यात आले. त्यासाठी छत्रपती शिवरायांच्या पदस्पर्शाने पावन झालेल्या ३३ गड-कोटांवरील माती, दगड व पाणी आणण्यात आले. त्याचबरोबर जिल्ह्यातील नद्यांचे पाणी व शहरातील शाहूकालीन तालीम संस्थांतील माती आणून श्रीमंत शाहू छत्रपती यांच्या हस्ते भूमीपूजन झाले.

भूमीपूजन समारंभ अत्यंत थाटामाटात केल्यानंतर काम लवकरच पूर्ण होईल अशी शहरवासियांची अपेक्षा होती. सहा जून या शिवराज्यभिषेक दिनापर्यंत चौकाचे सुशोभिकरण करून पुतळा खुला करण्याची घोषणाही करण्यात आली होती. पण गेल्या नऊ महिन्यांतील कामाची गती पहाता अजून काम पूर्ण होण्यास किती कालावधी लागेल असा प्रश्न सर्वसामान्यांच्या मनात निर्माण होऊ लागला आहे.

सुशोभिकरणात छत्रपती शिवाजी महाराजांचा पुतळा जागेवरुन न हलवता येथील चबुतऱ्याची उंची दोन फुटांनी वाढवण्यात येणार आहे. त्यासाठी चबुतऱ्याखाली काँक्रिटीकरण करण्यात येणार आहे. पण गेल्या नऊ महिन्यात काँक्रिटीकरणाचे काम अद्याप पूर्ण झालेले नाही. काँक्रिटीकरणानंतर चबुतऱ्याला मशालीचा आकार देऊन भिंतीवर ऐतिहासिक घटना व शिल्पांची माहिती आणि पायथ्याला शिवमुद्रा असा ऐतिहासिक बाज तयार करण्यात येणार असल्याचे सांगितले जाते. पण अद्याप चुबतऱ्याचे कामच झालेले नसल्याने उर्वरीत कामासाठी किती दिवस लागतील याची माहितीच संबंधितांकडे नाही. सुशोभिकरणाला सुरुवात झाल्यापासून शिवरायांचा पुतळा चोहोबाजुंनी पत्रे लावून बंदिस्त केला होता. गणेशोत्सवकाळात २१ फुटी गणेशमूर्तीच्या दर्शनासाठी पत्र्यांची उंची कमी केली. उंची कमी केल्यानंतर प्रत्यक्ष काम कोणत्या टप्प्यावर आले आहे, हे दिसले. येथे चौकाभोवती आकर्षक विद्युत रोषणाई करण्यात येणार आहे. मात्र कामाची गती पाहता चौक विद्युत रोषणाईने कधी उजाळून निघणार? असा प्रश्न उपस्थित केला जात आहे. काँक्रिटीकरणासह कास्टिंगचे काम सुरू असल्याचे महापालिकेच्यावतीने सांगितले जात आहे. मात्र, त्यातील दिरंगाईबद्दल चिंता व्यक्त होत आहे.

चौकाचा ऐतिहासिक बाज ठेवून सुशोभिकरण करण्यात येत आहे. कामाची रचना मेघडंबरीप्रमाणे आहे. गिरगाव येथे त्याच्या कास्टिंगचे काम सुरू आहे. एक ते दीड महिन्यांत ते काम पूर्ण होईल.

- नेत्रदीप सरनोबत, शहर अभियंता