कोल्हापूर टाइम्स टीम
अवघ्या आठवडाभरावर आलेल्या दिवाळीच्या तयारीसाठी रविवारी बाजारपेठेत खरेदीची धांदल उडाली. महाद्वार रोड, राजारामापुरी, लक्ष्मीपुरी, ताराबाई रोड या परिसरात रांगोळी, पणत्या, रोषणाई व फराळाच्या साहित्यापासून कपड्यांच्या खरेदीसाठी रविवारी सुटी असल्याने मोठ्या प्रमाणावर नागरिक घराबाहेर पडले. त्यामुळे शहरात मोठी गर्दी झाली. जिल्ह्यातून आणि परजिल्ह्यातून खरेदीसाठी आलेल्या नागरिकांमुळे गांधीनगरची बाजारपेठही फुलली होती. खरेदीच्या मूडमधील नागरिकांमुळे सकाळपासूनच शहरातील अनेक चौकांमध्ये, रस्त्यांवर वाहतुकीची कोंडी झाली.
‘दिवाळी सण मोठा, नाही आनंदाला तोटा’ या उक्तीप्रमाणे घराघरात उत्साहाचे वातावरण असते. यंदाही दसरा झाल्यानंतर लगेच दिवाळीच्या तयारीला सुरूवात झाली होती. घरोघरी स्वच्छता, रोषणाईची व्यवस्था केली जात आहे. वाहन, घर, सोने खरेदीसाठीचे नियोजन केले जात आहे. पुढील सोमवारपासून (ता. १६ ऑक्टोबर) दिवाळीला प्रारंभ होणार आहे. तयारीसाठी केवळ आठवडाच शिल्लक राहिल्याने सर्वत्र लगबग सुरू झाली आहे. घरांची स्वच्छता तसेच फराळाचे साहित्य बनवण्यास सुरुवात झाली आहे.
शहरातील राजारामपुरी, लक्ष्मीपुरी, शाहूपुरी, लक्ष्मीरोड, महाद्वार रोड, गांधीनगर येथील बाजारपेठेत ग्राहकांची खरेदीसाठी वर्दळ वाढली आहे. शहरातील मॉल, बझारमध्येही गर्दी आहे. दिवाळीच्या वैविध्यपूर्ण पणत्या, विद्युत माळा, मेणबत्यांचे स्वतंत्र स्टॉल लावण्यात आले आहेत. ब्रँडेड कपडे, इलेक्ट्रॉनिक वस्तूंवरील दसरामधील ऑफर्स कायम आहेत. ऑफर्सची जाहिरातबाजी करून ग्राहकांना खेचण्यासाठी प्रचंड स्पर्धा दिसत आहे. शहराच्या चौकाचौकात फलकांद्वारे आकर्षक जाहिरात केल्या जात आहेत. शिवाय मोबाइलवरही एसएमएसने ऑफर्सची माहिती दिली जात आहे.
रविवारी सुटीचा दिवस असल्याने महाद्वार रोडवर सकाळपासून खरेदीसाठी गर्दी होती. सर्व साहित्य एकाच ठिकाणी मिळत असल्याने येथे दिवसभर गर्दी होती. सायंकाळनंतर तर त्यामध्ये आणखीनच वाढ झाली. सध्या लक्ष्मीपुरीतील बाजारपेठेत फराळाच्या साहित्य खरेदीसाठी मोठी गर्दी आहे. लक्ष्मी रोडवर तसेच राजारामपुरीत असलेल्या कपड्यांच्या दुकानांनी विविध योजना जाहीर केल्या असल्याने ही दुकाने दिवाळीसाठी नटल्याचे दिसत होते. या दुकानांमध्ये खरेदीसाठी गर्दी होत असल्याने काहींनी दुकानाबाहेरही स्टॉल लावले आहेत.
रेडीमेड कपडे
राजारामपुरी, महाद्वार रोड, गांधीनगर येथे नामवंत ब्रँड्सचे रेडिमेड कपड्यांचे शोरूम्स मोठ्या संख्येने आहेत. येथे तरुणाईची गर्दी अधिक आहे. लहान मुले, महिलांसाठी ड्रेस मटेरियल खरेदीसाठी सहकुटुंब अनेजण बाहेर पडले. ब्रँडेड कपड्यांवर २५ टक्यांपर्यंत सवलत आहे. याशिवाय एकावर एक फ्री, दोनवर तीन फ्री अशा ऑफर्स आहेत. पसंतीनुसार कपडे असल्याने ग्राहक खिळून राहत आहेत.
इलेक्ट्रॉनिक वस्तू
दिवाळीच्या मुहूर्तावर इलेक्ट्रॉनिक वस्तूची खरेदी केली जाते. टीव्ही, फ्रीज, कम्युटर, मोबाइल, लॅपटॉप, वॉशिंग मशीन्सला मागणी आहे. मूळ किंमतीवर २० टर्क्क्यांपर्यंत सवलत दिली जात आहे. काही शोरूम्सनी जुन्या वस्तू देऊन नव्या वस्तू विक्रीचीही ऑफर दिली आहे. नविन वस्तू खरेदीसाठी सुलभ हफ्त्याने कर्जाची सुविधा उपलब्ध आहे. त्यामुळे टेंबे रोड, लक्ष्मीरोड, महाद्वार रोड, गांधीनगरातील दुकानात ग्राहक खरेदी करताना दिसत आहे.
वाहनांचे बुकिंग
मुहूर्तावर घेऊन जाण्यासाठी चारचाकी, दुचाकींचे बुकिंग सुरू आहे. ग्राहक विविध कंपन्यांचे वाहनांची माहिती घेत आपल्याला हवे ते वाहन बूक करीत आहेत. शोरूम्सनी ग्राहकांना आकर्षित करण्यासाठी वाहन खरेदीवर विविध ऑफर्स जाहीर केल्या आहेत. जुने वाहन घेऊन नविन वाहनावरील एक वर्षाचा विमा, अॅसेसेरिज मोफत अशा ऑफर्स आहेत. ग्राहकांचे लक्ष वेधण्यासाठी सर्वच शोरूम्स सजवून दुचाकी, चारचाकी आकर्षकपणे पार्क केल्या आहेत.
फराळाचे साहित्य
तेल, मैदा, हरभरा पीठ, रवा, डाळी, डालडा, खोबरे, गूळ, साखर यासह मसाल्याच्या पदार्थांची खरेदी केली जात आहे. याशिवाय तयार फराळ घेऊन जाण्याकडेही कल आहे. दिवाळीच्या दिवशी अंघोळ करण्यासाठी सुंगधी साबण, उटणे, अत्तर, आकाश कंदील असे साहित्यही घेतले जात आहे. त्यासाठी दुकान, मॉलमध्ये मोठी गर्दी होत आहे. ग्राहकांना त्वरित सेवा देण्यासाठी दुकानदारांनी जादा कर्मचाऱ्यांची नियुक्ती केली आहे.
भेटवस्तू , ड्रायफ्रूट्सची गर्दी
दिवाळीदिवशी नातेवाईक, मित्रमंडळींना मिठाई, ड्रायफूट्सचे बॉक्स व भेटवस्तू देण्याची परंपरा आहे. हा ग्राहक मिळवण्यासाठी सर्वच बेकरी चालकांना समोर स्टॉल उभारून आकर्षक मांडणी केली आहे. पाचशेपासून दहा हजारांपर्यंत भेटवस्तूसह ड्रायफुडसचे पॅकेज आहे. ग्राहक आपल्या बजेट नुसार खरेदी करीत आहे.
कमानी, फलक झळकले
जाहिरातीसाठी विक्रेत्यांनी बाजारपेठेत आपल्या दुकानासमोर कमानी उभ्या केल्या आहेत. सवलत, ऑफर्सची माहिती फलक दर्शनी भागात लावले आहेत. त्यामुळे बाजारपेठ गजबजलेली दिसत आहे. वर्दळीच्या रोडवरील दुकानदारांनी समोर उभारलेले मंडप, कमानीमुळे वाहतुकीस अडथळा होत आहे. वाहनांची कोंडी होत आहे. परिणामी बाजारपेठेचा श्वास कोंडल्याचे चित्र जाणवते आहे.
मोबाइल अॅप डाउनलोड करा आणि राहा अपडेट