महानगरपालिकेतील सत्तारुढ राष्ट्रवादी-काँग्रेस आघाडीचे नेतृत्व राष्ट्रवादी काँग्रेसचे नेते आमदार हसन मुश्रीफ आणि काँग्रेसचे नेते आमदार सतेज पाटील करतात. मात्र, गेल्या पाच महिन्यांत वाहतूक व्यवस्थेचा बट्ट्याबोळ होऊनही या दोन्ही नेत्यांनी ना महापालिकेचे पदाधिकारी, नगरसेवकांना फटकारले, ना जबाबदार अधिकाऱ्यांची बैठक घेऊन वाहतूक सुधारणेसाठी प्रयत्न केले.
दरम्यान, पालकमंत्री चंद्रकांत पाटील यांनी शहर वाहतूक नियंत्रणासाठी एकात्मिक वाहतूक व्यवस्थापन आराखडा तयार करण्याचे आदेश ९ मे २०१७ रोजीच्या बैठकीत जिल्हा पोलिस अधीक्षकांना आदेश दिले होते. मात्र, प्रशासनाच्या स्तरावरूनही फारसे काहीही झालेले नाही. लोकप्रतिनिधींच्या स्तरावर प्रश्नांच्या पाठपुराव्याकडे काणाडोळा झाल्यानेच ही स्थिती ओढवली आहे.
रविवारी (ता. १ ऑक्टोबर) झालेल्या भीषण अपघाताप्रमाणेच गेल्या सहा महिन्यांत शहरात अपघातांची संख्या वाढली आहे. २१ जुलै रोजी उमा टॉकीज चौकात चालकाला हृदयविकाराचा झटका आल्याने त्याचे नियंत्रण सुटले. सिग्नलवर थांबलेल्या या एसटी बसने दोघांचा बळी घेतला. त्यासह शहर परिसरात झालेल्या अपघातात पाचजणांना जीव गमावावा लागला. वाढत्या अपघातांच्या पार्श्वभूमीवर महानगपालिकेने वाहतूक सुधारणांसाठी फारसे प्रयत्न केलेले नाहीत. ऑक्टोबर २०१५ मध्ये झालेल्या निवडणुकीत महापालिकेवर आघाडीची सत्ता आली. सध्या राष्ट्रवादी काँग्रेस पक्षाकडे महापौरपद तर काँग्रेसकडे स्थायी समिती सभापतिपद आहे. मात्र, शहराच्या वाहतूक कोंडीच्या प्रश्नाकडे सोयीस्करपणे दुर्लक्ष केले जात असल्याच्या तक्रारी आहेत.
रस्ते अपघाताच्या घटनांमध्ये गेल्या तीन महिन्यांत वाढ झाली आहे. सातत्याने होणारी वाहतूक कोंडी, फेरीवाल्यांची बेशिस्त, रस्त्यावरच येऊन ठेपलेले फेरीवाले, पार्किंगचा प्रश्न शहरवासीयांसमोर असताना या नेत्यांनी यासंदर्भात ना महापौर, स्थायी सभापती, परिवहन सभापती यांच्याकडे विचारणा केली, ना अधिकाऱ्यांना धारेवर धरले. जुलै महिन्यात झालेल्या उमा टॉकीज येथील अपघातानंतर शहरातील वाहतूक व्यवस्थेच्या सुधारणेबाबत तातडीने पावले उचलण्याची आवश्यकता होती. प्रत्यक्षात सिग्नल सिंक्रोनायझेशन वगळता महापालिकेच्या स्तरावर काहीही झाले नाही.
आमदार क्षीरसागर यांच्या कार्यक्षेत्रात शहरातील ५३ प्रभाग आहेत. त्यांच्याच पक्षाच्या नगरसेवकाकडे केएमटीचे सभापतिपद आहे. त्यांच्याकडूनही केएमटी सुधारणेसह वाहतूक व्यवस्थेतील सुधारणांसाठी महापालिकेच्या स्तरावर बैठका, जादा निधी असे प्रयत्न झालेले नाहीत. केवळ पत्रक प्रसिद्ध करून त्यांनी महानगरपालिकेला जबाबदार धरले आहे.
पालकमंत्र्यांचे प्रयत्न पण...
नागपूरच्या धर्तीवर कोल्हापूर शहरात वाहतूक सुधारणा व्हावी यासाठी पालकमंत्री चंद्रकांत पाटील यांचे प्रयत्न आहेत. त्यांनी यापूर्वी ९ मे २०१७ रोजी पोलिस अधीक्षक कार्यालयात वाहतूक नियोजन आढावा बैठक घेतली होती. त्यावेळी शहरामध्ये वाहतूक कोंडीची समस्या दिवसेंदिवस वाढत असल्याचे मान्य करत यावर कायमस्वरुपी तोडगा काढण्यासाठी शहराचा एकात्मिक वाहतूक व्यवस्थापन आराखडा तयार करण्याच्या सूचना पोलिस अधीक्षकांना दिल्या होत्या. बैठकीत बंद ११ सिग्नल, सिग्नल सिंक्रोनायझेशन, वाहतुकीस अडथळा करणारे दुकानदार, फेरीवाल्यांवर कारवाई, झेब्रा क्रॉसिंग, स्पीड ब्रेकर आदी बाबींवर चर्चा झाली. प्रत्यक्षात प्रशासनाच्या स्तरावरूनही काहीही झाले नाही. यासाठीही पाठपुरावा करण्याची गरज निर्माण झाली आहे.
मोबाइल अॅप डाउनलोड करा आणि राहा अपडेट
