Maharashtra Times

म. टा. वृत्तसेवा, मिरज

‘सत्तेच्या राजकारणाचा मला कधीही मोह नव्हता व नाही. सत्तेत नसतानाही समाजासाठी खूप काही करता येते,’ असे स्पष्ट प्रतिपादन राष्ट्रवादीच्या नेत्या खासदार सुप्रिया सुळे यांनी मिरजेत पत्रकार परिषदेत केले. संजय भोकरे शैक्षणिक संकुलात ‘जागर जाणिवांचा’ या कार्यक्रमात सुप्रिया सुळे यांनी विद्यार्थ्यांशी संवाद साधला. त्यानंतर झालेल्या पत्रकार परिषदेत त्या बोलत होत्या.

त्या म्हणाल्या, ‘राजकारणात सत्ता येते व जाते. मात्र, समाजाचे आपण काही देणे लागतो या जाणिवेतून काम करत राहिल्यास आपण बरेच काही करू शकतो. महाराष्ट्र राज्य देशात प्रत्येक क्षेत्रात अग्रेसर राहावे हीच माझी इच्छा असून, त्यासाठी मी आजवर काम करत आले आहे. महाराष्ट्रात महिला व मुलींमध्ये असुरक्षिततेची भावना निर्माण झाली असून, त्यांच्या मनातील ही भीती काढण्यासाठी पक्षविरहित सामाजिक चळवळ उभी केली पाहिजे.’

देशाच्या इतिहासात झाल्या नव्हत्या इतक्या शेतकऱ्यांच्या आत्महत्या नरेंद्र मोदी सरकारच्या कार्यकाळात झाल्या असल्याची टीका त्यांनी केली. शेतकऱ्यांच्या आत्महत्या या तीन वर्षांत तिप्पट झाल्या असून त्यास केवळ हे शासनच जबाबदार आहे. शेतकऱ्यांना संपूर्ण कर्जमाफी हाच त्यावर एकमेव उपाय आहे. शिक्षणक्षेत्राचा या शासनाने खेळखंडोबा केला असून विद्यार्थ्यांचे भवितव्य यामुळे धोक्यात आले आहे. ग्रामपंचायतपासून ते राष्ट्रपती पदापर्यंतची सर्व सत्तास्थाने आज भाजपच्या हाती असूनही देशातील जनता सुखी व समाधानी नाही हे या शासनाचे फार मोठे अपयश आहे,, असेही त्या म्हणाल्या.

Latest Images