Maharashtra Times

पुणे : कोल्हापुरात आज, गुरुवारी होत असलेल्या कृषी राज्यमंत्री सदाभाऊ खोत यांच्या मेळाव्यावर भारतीय जनता पक्षाचे धुरिण बारीक लक्ष ठेऊन आहेत. मंत्री खोत मेळाव्याला किती गर्दी खेचतात. स्वाभिमानी शेतकरी संघटनेतील किती कार्यकर्ते, नेते फोडतात, यावरून खोत यांची ताकद लक्षात येणार आहे. या मेळाव्यावरच खोत यांची पुढील वाटचाल आणि भाजपकडून मिळणारी रसद अवलंबून आहे, अशी माहितीही भाजपच्या एका ज्येष्ठ नेत्याने दिली.
गुरुवारच्या मेळाव्यात नव्या संघटनेची आणि आपल्या पुढील राजकीय निर्णयांची घोषणा खोत करणार आहेत. हा मेळावा यशस्वी व्हावा, अशीच भाजपची इच्छा आहे. भाजपकडून मोठ्या प्रमाणात रसदही पुरविण्यात आली आहे. मेळाव्याच्या जाहिराती, पोस्टर, फलक आणि मेळाव्याला जाण्यासाठी गाड्यांची व्यवस्था भाजपकडून करण्यात आली आहे. मात्र, सदाभाऊंची नेमकी ताकद कळावी, ते किती लोकांना जमवू शकतात, हे कळावे म्हणून भाजप कार्यकर्त्यांना मेळाव्याला उपस्थित राहण्याबाबतचे कोणतेही आदेश दिलेले नाहीत, अशी माहितीही सूत्रांनी दिली आहे.
शेट्टींना अडचणीत आणण्यासाठी प्रयत्न
पंतप्रधान नरेंद्र मोदी आणि मुख्यमंत्री फडणवीस यांच्यावर थेट टीका करणारे आणि राष्ट्रीय पातळीवरील शेतकरी नेत्यांबरोबर केंद्रातील भाजपविरोधात देशभर रान उठविणारे स्वाभिमानी शेतकरी संघटनेचे खासदार राजू शेट्टींना त्यांच्या बालेकिल्ल्यात अडचणीत आणण्यासाठी प्रदेश भाजपकडून सदाभाऊ खोत यांना मोठी रसद पुरविली जात आहे. स्वाभिमानीचे कार्यकर्ते फोडण्यात खोत यशश्वी झाले किंवा न झाले तरीही खोतांना होणारी रसद कायम राहणार आहे. मेळाव्याच्या यशापयशावरून भविष्यात खोत यांना कशाप्रकारे मदत करायची याचा निर्णयही भाजप धुरिण घेणार आहेत, अशी माहितीही सूत्रांनी दिली आहे.

Latest Images