म. टा. प्रतिनिधी, कोल्हापूर
अवघ्या दोन दिवसांवर आलेल्या शारदीय नवरात्र उत्सवानिमित्त करवीरनिवासिनी श्री अंबाबाई मंदिरात भाविकांच्या सुविधांसह सुरक्षा व उत्सवादरम्यान होणाऱ्या सर्व पूजाविधींसाठीची तयारी अंतिम टप्प्यात आली आहे. मंदिराच्या पूर्व दरवाजाबाहेर भाविकांसाठी दर्शनमंडप उभारण्यात आला आहे. तर पावसाची शक्यता गृहित धरून त्यानुसार व्यवस्था करण्यात आली आहे.
नवरात्र उत्सवाच्या पार्श्वभूमीवर सोमवारी देवस्थान समिती, पुजारी यांची सोमवारी समन्वय बैठक झाली. यावेळी देवीच्या विविध रूपातील पूजा बांधण्याचा आणि नवरात्र काळात अंबाबाईची मिरवणूक सुवर्णपालखीतून काढण्याचाही निर्णय या बैठकीत घेण्यात आला. पश्चिम महाराष्ट्र देवस्थान समितीच्या कोषाध्यक्षा वैशाली क्षीरसागर, समिती सदस्य सुभाष वोरा, शिवाजीराव जाधव, संगिता खाडे, प्रमोद पाटील, सचिव विजय पोवार, शिवाजीराव साळवी, सुदेश देशपांडे, धनाजी जाधव, यांच्यासह पदाधिकारी उपस्थित होते.
नवरात्र उत्सवाच्या पार्श्वभूमीवर देवस्थान समिती व प्रशासन, सामाजिक संस्था आणि पुजारी यांच्या विविध बैठका सोमवारी दिवसभर घेण्यात आल्या. अंबाबाईला परिधान करण्यात आलेल्या घागरा -चोळी प्रकरणामुळे देवीच्या विविध रुपातील पूजा यंदाच्या नवरात्रात बांधल्या जाणार का? याबाबत भाविकांमध्ये संभ्रम होता. परंतु देवस्थान समिती व श्रीपूजक यांच्यातील समन्वय बैठकीमध्ये या विषयावर चर्चा होऊन पारंपरिक पूजा बांधण्याबाबत सहमती देण्यात आली.
दरम्यान, देवस्थान समिती, महापालिका प्रशासन, विद्युत मंडळ, वाहतूक पोलिस, सेवाभावी संस्था या सर्वांची संयुक्त बैठक देवस्थान समितीच्या कार्यालयामध्ये झाली. यावेळी उत्सवामधील कामाचे स्वरुप, नियम व अन्य गोष्टींबाबत सूचना देण्यात आल्या. महापालिका व्यवस्थापनातर्फे मंदिराच्या आवारातील स्वच्छतागृहे, अन्य ठिकाणांची स्वच्छता व औषध फवारणी करण्याची सूचना करण्यात आली. तर वाहतूक पोलिसांकडून मंदिराच्या चारही दिशेला बॅरीकेट्स लावण्याची तयारी करण्याचे नियोजन केले.
नवरात्र काळात शहरातील मुख्य मार्गावर तसेच शहरात येणाऱ्या रस्त्यावर ७० दिशादर्शक फलक लावले जाणार आहेत. अग्निशमन दलाकडूनही उत्सव काळात घाटी दरवाजा येथे २४ तास अग्निशमन बंब तैनात केला जाणार आहे. तर विद्युत विभागाकडून मंदिरामध्ये दोन फेज विद्युततारा कायमस्वरुपी सोडल्या जाणार आहेत. त्यामुळे उत्सवादरम्यान विद्युत पुरवठा खंडीत होऊ नये यासाठी ही सोय करण्यात येणार आहे. तर दोन विद्युत कर्मचारी मंदीरात व दोन आवारात कायमस्वरुपी सेवा देणार आहेत.
सुवर्णालंकाराची स्वच्छता
करवीर निवासिनी अंबाबाई मंदिरातील गरुड मंडपामध्ये सुवर्णालंकाराची स्वच्छता करण्यात आली. नवरात्रोत्सवात देवीला दररोज विविध अलंकारांची सालंकृत पूजा बांधली जाते. त्यामुळे उत्सवापूर्वी मंदिर व्यवस्थापनाकडून ही स्वच्छता करण्यात आली. सोमवारी दुपारी अंबाबाईच्या पारंपरिक दागिन्यांची स्वच्छता करण्यात आली. यामध्ये किरीट, मंगळसूत्र, ठुशी, मोरपक्षी, मोहनमाळ, चंद्रहार, म्हाळुंग, तन्मणी यासारख्या सोन्याच्या आभूषणांची स्वच्छता दिवसभर करण्यात आली. या स्वच्छतेबरोबरच मंदिराच्या आवारातील वास्तू, भिंती व अन्य छोट्या मंदिरांची स्वच्छता दिवसभर सुरू होती. घटस्थापनेच्या पूर्वदिनापर्यंत म्हणजे बुधवारपर्यंत मंदिरातील साफसफाई तसेच स्वच्छतेची कामे पूर्ण केली जाणार आहेत.
सेवाभावी संस्थांना ओळखपत्र
नवरात्रोत्सवामध्ये मंदिरातील भाविकांच्या मदतीसाठी व गर्दीचे व्यवस्थापन करण्यासाठी सेवा देणाऱ्या सेवाभावी संस्थांच्या पदाधिकाऱ्यांना व स्वयंसेवकांना देवस्थान समितीच्यावतीने ओळखपत्रांचे वाटप केले जाणार आहे. त्यासाठी आवश्यक तेवढेच स्वयंसेवक मंदिरामध्ये तैनात करण्याचे आवाहन केले आहे. असा निर्णय देवस्थान समिती व सेवाभावी संस्थांच्या बैठकीत घेण्यात आला. या बैठकीला व्हाईट आर्मी, अनिरुद्ध बापू संस्था, जीवनज्योती, अॅस्टर आधार, अॅपल हॉस्पिटल, महालक्ष्मी भक्त मंडळ यासह विविध संस्था उपस्थित होत्या.
दर्शनमंडप होणार सुरक्षित
नवरात्र काळात येणाऱ्या पावसाची शक्यता गृहित धरून दर्शन मंडप भाविकांसाठी सुरक्षित करण्यात आला आहे. मंडपावर पत्र्याचे छत करण्यात आले आहे. तसेच दर्शनरांगेतून भाविकांना व्यवस्थित पुढे जाता यावे यासाठी बॅरिकेटस लावण्याचे काम सुरू आहे. दर्शनरांगेत प्रतीक्षा करणाऱ्या भाविकांसाठी देवस्थान व्यवस्थापनातर्फे पाण्याची व्यवस्था करण्यात येणार आहे, त्याचीही तयारी सुरू आहे. दर्शनासाठी येणाऱ्या ज्येष्ठ भाविक, गर्भवती यांच्यासाठी दर्शनरांगेत काही अंतरावर बसण्यासाठी टेबल व्यवस्था करण्याचेही नियोजन देवस्थान व्यवस्थापनातर्फे करण्यात आले आहे.
मोबाइल अॅप डाउनलोड करा आणि राहा अपडेट
