Maharashtra Times

म. टा. वृत्तसेवा, कागल

शिवसेना सत्तेला महत्व देत नाही. गरीबांच्यासाठी काम करणारा हा पक्ष आहे. सर्वसामान्य जनतेलाच पक्षप्रमुख उद्धव ठाकरे दैवत मानतात. जनतेच्या भल्यापुढे सत्ता आम्हाला गौण आहे, असे प्रतिपादन गृह व नियोजन राज्यमंत्री दीपक केसरकर यांनी केले.

ते मुरगूड (ता. कागल) येथे नगरपालिकेच्या विविध विकासकामांच्या प्रारंभ, लाभार्थ्यांना अनुदान वाटप कार्यक्रमात‌ ते बोलत होते. अध्यक्षस्थानी शिवसेना सहसंपर्क प्रमुख प्रा. संजय मंडलिक होते.

केसरकर म्हणाले, दिवंगत सदाशिवराव मंडलिक यांनी आयुष्यभर जनतेची सेवा केली. त्यांचे कोकणावर विशेष प्रेम होते. त्यांचा आशिर्वाद मलाही मिळाला आहे. त्यांचा विचार जिवंत ठेवण्यासाठी प्रा.संजय मंडलिक यांना खासदार करून दाखवावे. मुरगूड शहरासाठी २४ तास पाणी पुरवठा योजनेसाठी,अर्धवट राहिलेल्या अंबाबाई देवालयासाठी आणि स्वीमिंग तलावासाठी आवश्यक असणारा सर्व निधी मुख्यमंत्र्यांना भेटून देवू. मुरगूड शहर राज्यात आदर्श करण्यासाठी येथील पदाधिकाऱ्यांनी बांधलेला चंग निश्चित यशापर्यंत घेवून जाईल.

प्रा.संजय मंडलिक म्हणाले, ‘कागल तालुक्याने नेहमीच सामाजिक एकतेचा संदेश तडीस नेला आहे. मुरगूड ही संस्थान काळातील नगरपालिका असून सतेवर येतानाच पारदर्शी कारभार करण्याचे वचन सर्वानी दिले आहे. शहरात कोट्यावधीची कामे चालू आहेत.उर्वरित कामासाठी पुरेसा निधी देवून मुरगूड शहर राज्यात आदर्श करण्यासाठी आम्हाला सहकार्य करावे. बिद्री साखर कारखान्यासाठी दररोज शुभ संकेत मिळत असून अनेकजन मदतीसाठी पुढे येत आहेत. आमच्या मंडळीनी बिद्रीतील अपप्रवृती घालवण्यासाठी न्यायालयीन पातळीवर यशस्वी लढाई केली आहे. आता जनतेचा न्यायालयातही आम्हालाच न्याय मिळणार आहे.’

यावेळी विरेंद्र मंडलिक,आमदार प्रकाश आबिटकर यांचीही भाषणे झाली. विजयमाला मंडलिक गर्ल्स हायस्कूलच्या विद्यार्थिनीनी स्वागत गीत सादर केले.यावेळी शहरातील नागरीकांना स्वच्छतागृहाचे अनुदान,अपगांना निधी,बकेट वाटप करण्यात आले.

यावेळी माजी आमदार दिनकरराव जाधव, शिवसेना जिल्हाप्रमुख विजय देवणे,मंडलिक कारखाना उपाध्यक्ष बंडोपंत चौगले, बिद्रीचे माजी उपाध्यक्ष विजय सिंह मोरे, सभापती कमल पाटील आदी उप‌स्थ‌ित होते.

Latest Images