म. टा. प्रतिनिधी, कोल्हापूर
गणेश विसर्जन मिरवणुकीला मंगळवारी सकाळी आठ वाजता खासबाग मैदान येथून सुरुवात होत आहे. विसर्जनादरम्यान कोणताही अनुचित प्रकार घडू नये, यासाठी जिल्ह्यात साडेतीन हजार पोलिसांचा बंदोबस्त तैनात केला आहे. शहरात १३०० पोलिस मिरवणुकीवर नजर ठेवणार आहेत. सोमवारी सायंकाळपासूनच येथे बंदोबस्त तैनात करण्यात आला आहे. डॉल्बी रोखण्यासाठी मंडळांवर पोलिसांच्या विशेष स्कॉडची नजर राहणार आहे. याशिवाय वेळेत विसर्जन मिरवणूक संपवण्यासाठी चार पर्यायी मार्गही तयार केले आहेत.
गणेश विसर्जन मिरवणुकीवर साडेतीन हजार पोलिसांची नजर राहणार आहे. शहरासह इचलकरंजी, जयसिंगूर, पेठवडगाव, कागल, गडहिंग्लज आदी शहरांवर पोलिसांनी लक्ष केंद्रीत केले आहे. सोमवारी सकाळी पोलिस मुख्यालयात बंदोबस्ताचे वाटप करण्यात आले. यावेळी पोलिस अधीक्षक संजय मोहिते यांनी उपस्थित पोलिस अधिकारी आणि कर्मचाऱ्यांना आवश्यक सूचना दिल्या. ‘विसर्जन मिरवणुकीत डॉल्बी वाजू नये, यासाठी संशयित मंडळांवर पोलिसांची करडी नजर राहणार आहे. मिरवणुकीत हुल्लडबाजी करणारे तरुण, खिशेकापू, मिरवणुकीची अडवणूक करणारी मंडळे यांच्यावर विशेष लक्ष केंद्रीत करा,’ अशा सूचना अधीक्षक मोहिते यांनी पोलिसांना दिल्या आहेत.
शहरातील विसर्जन मार्गावरील अतिक्रमणे हटवली असून, पोलिसांनी दहा ठिकाणी वॉच टॉवर तयार केले आहेत. या सर्वच टॉवरवरून पोलिस दुर्बिणीतून मिरवणुकीवर लक्ष ठेवणार आहेत. याशिवाय टॉवरवरील पोलिसांकडे वॉकीटॉकीही पुरवण्यात आले आहेत. मिरवणूक मार्गावर ५० हून अधिक सीसीटीव्ही कॅमेरे आहेत. पोलिस अधीक्षक कार्यालयातील कंट्रोल रुममध्ये कॅमेऱ्यांचे चित्रीकरण दिसत असल्याने पोलिसांचे एक पथक कंट्रोल रुममधून मिरवणुकीवर नजर ठेवणार आहे. मिरवणुकीतील हुल्लडबाजांचा बंदोबस्त करण्यासाठी कंट्रोल रुममधील पथक बंदोबस्तावरील पोलिसांना सूचना देणार आहे. याशिवाय पंचगंगा घाट, राजाराम बंधारा, बापट कॅम्प आणि इराणी खाणीवरही पुरेसा बंदोबस्त तैनात केला आहे.
स्पेशल स्कॉड तैनात
पोलिसांनी डॉल्बीमुक्त विसर्जन मिरवणुकीसाठी मंडळांचे प्रबोधन केले आहे. बहुतांश मंडळांनी डॉल्बीला फाटा देऊन पारंपरिक वाद्यांच्या गजरात मिरवणुकीत सहभागी होणार असल्याचे हमीपत्रही पोलिसांना दिले आहे. ऐनवेळी काही मंडळांकडून डॉल्बीचा दणदणाट होऊ नये, यासाठी संशयित मंडळांवर पोलिस लक्ष ठेवून आहेत. सोमवारी रात्रभर मंडळांच्या हालचालीवर पोलिसांनी लक्ष ठेवले आहे. मंगळवारी दिवसभरात कोणी डॉल्बी जोडण्याचा प्रयत्न केल्यास डॉल्बी यंत्रणा जप्त करण्याचा इशारा पोलिसांनी दिला आहे. ही कारवाई करण्यासाठी पोलिसांचे विशेष स्कॉड कार्यरत आहे.
पारंपरिक विसर्जन मार्ग
उमा टॉकीज चौक, सावित्रीबाई हॉस्पिटल चौक, दिलबहार चौक, टेंबे रोड, मिरजकर तिकटी, बिनखांबी गणेश मंदिर, महाद्वार रोड, पापाची तिकटी, गंगावेश, बाजारगेट परिसर ते पंचगंगा घाट हा विसर्जन मिरवणुकीचा पारंपरिक मार्ग आहे.
चार पर्यायी मार्ग
मुख्य मिरवणूक मार्गातून जाणाऱ्या मंडळांना पंचगंगा घाटावर पोहोचण्यास विलंब होतो, त्यामुळे चार पर्यायी मार्गांची व्यवस्था केली आहे.
१) उमा टॉकीज चौक, आझाद चौक, कॉमर्स कॉलेज, बिंदू चौक, शिवाजी चौकमार्गे पापाची तिकटी, गंगावेश, नदीघाट.
२) फोर्ड कॉर्नर चौक, आईसाहेब पुतळा चौक, बिंदू चौकमार्गे शिवाजी पुतळा, पापाची तिकटी, गंगावेश, नदीघाट.
३) अकरा फुटांपेक्षा अधिक उंचीच्या मूर्तींसाठी गंगावेश येथून रंकाळा एसटी स्टँड, जाऊळाचा गणपती, खराडे महाविद्यालय, जुना वाशी नाकामार्गे इराणी खणीकडे विसर्जनासाठी जातील.
४) पापाची तिकटी येथून काही मंडळे कुंभार गल्ली, बुधवार पेठ, तोरस्कर चौकमार्गे पंचगंगा घाट या मार्गाचा वापर करतील.
जिल्ह्यातील बंदोबस्त
अधीक्षक १
अप्पर अधीक्षक २
उपअधीक्षक ८
निरीक्षक २९
सहायक निरीक्षक १०४
कॉन्स्टेबल २२००
होमगार्ड १२००
शीघ्रकृती दल ३ तुकड्या
चौकट –
शहरातील बंदोबस्त
अप्पर अधीक्षक १
उपअधीक्षक ६
निरीक्षक १९
सहायक निरीक्षक ७१
कॉन्स्टेबल ६९७
होमगार्ड ३०५
शीघ्रकृती दल ३ तुकड्या
राखीव दल ३ तुकड्या
मोबाइल अॅप डाउनलोड करा आणि राहा अपडेट
