सर्वोच्च न्यायालयाच्या आदेशानुसार डॉल्बी लावणाऱ्या मंडळावर पोलिसांना कारवाई करावीच लागेल. कारवाई केल्यानंतर मंडळातील मुलांच्या करिअरला अडथळा येतो. गेल्या वर्षी डॉल्बी लावलेल्या १६ मंडळावर कारवाई झाली. त्यांनी यंदा डॉल्बी लावू नये, यासाठी समुपदेशन करण्यात येईल, असे प्रतिपादन पालकमंत्री चंद्रकांत पाटील यांनी शुक्रवारी केले. गणराया अॅवॉर्ड वितरण प्रसंगी धैर्यप्रसाद हॉलमध्ये ते बोलत होते. यावेळी छत्रपती शाहू महाराज, महापौर हसीना फरास, विशेष पोलिस महानिरीक्षक विश्वास नांगरे- पाटील यांची प्रमुख उपस्थिती होती.
पालकमंत्री पाटील म्हणाले, ‘छोट्या गावातील लोकसंख्येइतकी संख्या शहरातील एकेका मोठ्या मंडळात असते. त्यामुळे प्रत्येक मंडळांनी विधायक, रचनात्मक काम करण्याला प्राधान्य द्यावे. उत्सव काळात पोलिसांना सहकार्य करावे. बंदोबस्ताला असणाऱ्या महिला पोलिसांची गैरसोय होते. त्यांच्यासाठी मोबाइल चेजिंग रूम तयार करण्याच्या सूचना दिल्या आहेत.’
नांगरे-पाटील म्हणाले, ‘कोल्हापूरला समाज प्रबोधन, शिक्षण, शौर्याची परंपरा आहे. त्यामुळे सर्वच मंडळांनी यंदा रचनात्मक, प्रबोधनात्मक गणेशोत्सव साजरा करावा. कायद्याचा धाक दाखवून आनंदावर विरजण घालणार नाही. मात्र, डॉल्बी लावून कायद्याचा भंग केल्यास पोलिसांना कारवाई करावी लागेल. विधायक गणेशोत्सवाला पोलिस सहकार्य करतील.’
आमदार राजेश क्षीरसागर म्हणाले, ‘सर्वच मंडळांनी डॉल्बीमुक्त गणेशोत्सव साजरा करावा. पारंपरिक वाद्यांचा वापर करावा. अनेक मंडळे समाज प्रबोधनपर देखावे साजरे करतात. त्यामुळे पोलिस प्रशासनाने रात्री वेळ वाढवून द्यावी.’
जिल्हा पोलिस प्रमुख संजय मोहिते म्हणाले, ‘यंदा जिल्ह्यात ७ हजार, १३० सार्वजनिक गणेश मंडळे गणपतीची प्रतिष्ठापना करणार आहेत. त्यापैकी ९२२ गणेश मंडळे शहरातील आहेत. प्रमुख मंडळाच्या पदाधिकाऱ्यांची बैठक घेऊन डॉल्बी न लावण्याची विनंती केली आहे. त्यास सकारात्मक प्रतिसाद दिला आहे. पश्चिम महाराष्ट्रात डॉल्बीसाठी प्रसिद्ध असलेल्या अर्जुनवाड गावाने यावर्षी डॉल्बी न लावण्याचा निर्णय घेतला. त्याचा आदर्श सर्वच मंडळांनी घ्यावा.
यावेळी हसीना फरास यांचे भाषण झाले. रणरागिणी ग्रुपमधील महिलांनी ‘सोनु तुला भरोसा नाय काय’ या गाण्यातून डॉल्बीमुक्त गणशोत्सव साजरा करण्याचे आवाहन केले. कार्यक्रमास आमदार डॉ. सुजित मिणचेकर, जिल्हाधिकारी अविनाश सुभेदार, मुख्य कार्यकारी अधिकारी डॉ. कुणाल खेमनार, आयुक्त अभिजित चौधरी, अपर पोलिस अधीक्षक सुहेल शर्मा, दिनेश बारी यांच्यासह मंडळाचे पदाधिकारी, कार्यकर्ते मोठ्या संख्येने उपस्थित होते. अप्पर अधीक्षक सुहेल शर्मा यांनी आभार मानले.
कोरा चेक
डॉ. प्रभू यांच्या हॉस्पिटलला एका कार्यक्रमाच्या निमित्ताने भेट दिली. तेथील रुग्णांची परिस्थिती डॉक्टारांनी सांगितले. ते ऐकूण गरीब रुग्णांना उपचारासाठी कोणत्याही सरकारी योजनेतून पैशाची तरदूत होत नाही, त्यांच्या खर्चासाठी मी कोरा चेक दिला आहे, अशी माहिती पालकमंत्री पाटील यांनी सांगताच प्रेक्षकांनी टाळ्या वाजवून प्रतिसाद दिला.
मोबाइल अॅप डाउनलोड करा आणि राहा अपडेट
