म. टा. प्रतिनिधी, कोल्हापूर
त्यांच्यापैकी कोण कॉलेजियन्स आहेत, तर कुणी इंजिनीअरिंगची पदवी घेतली आहे. शिक्षण, नोकरी, व्यवसाय सांभाळत त्या साऱ्यांनी फोटोग्राफीची आवड जोपासली आहे. ‘फोटोग्राफी इज एव्हरीथिंग’ या भावनेतून एकवटलेल्या ग्र्रुपमध्ये हौशी आणि व्यावसायिक छायाचित्रकारही सहभागी आहेत. या साऱ्यांनी मनाला साद घालणारी निसर्गाची नानाविध रुपे, ऐतिहासिक वास्तू, शौर्याचा वारसा ठरलेली गडकिल्यांपासून सण, संस्कृतीतील वेगळे क्षण कॅमेऱ्यात टिपत ते प्रदर्शनाच्या माध्यमातून नागरिकांच्या भेटीस आणले आहेत. येथील शाहू स्मारक भवनच्या कलादालन येथे फोटोग्राफीचे प्रदर्शन भरविले आहे.
सांगली, कोल्हापूरसह आसपासच्या शहरातील फोटाग्राफर्सच्या वेगळ्या नजरेची ही दुनिया प्रेक्षकांना भुरळ पाडणारी आहे. सांगली येथील आयर्विन पूल, कोल्हापुरातील न्यू पॅलेस, खिद्रापूर येथील कोपेश्वर मंदिर, गणपतीपुळे, ऐतिहासिक हम्पी, बदामी, किल्ले प्रतापगडसह जवळपास १२० हून अधिक छायाचित्रे प्रदर्शनात आहेत. जवळपास ४० छायाचित्रकारांचा समावेश आहे. सण, समारंभातील वेगवेगळ्या प्रसंगाची छायाचित्रे संस्कृतीचे अनोखे दर्शन घडवितात.
कोल्हापुरातील रांगडी आणि कलासक्त व्यक्तीमत्वेही टिपली आहेत. म्हैशींच्या शर्यती, चिखलगुट्टाची छायाचित्रे वेगळेपणा दर्शवितात. छायाचित्रकारांनी दैनंदिन जीवनातील टिपलेल्या गमंतीजमती, लहान मुलांच्या भावविश्व उलगडून दाखविणारी छायाचित्रे पाहताना नागरिक हरवून जातात. शाहूवाडीचे पोलिस उपअधीक्षक आर.आर.पाटील यांच्या हस्ते व उत्सव लॅबचे विश्वनाथ बनसोडे (इचलकरंजी), सांगलीचे टी. ए. साळुंखे, पत्रकार अनंत सरनाईक, महेश कुर्लेकर यांच्या उपस्थितीत प्रदर्शनाचे उद्घाटन झाले. सकाळी दहा ते रात्री आठ या वेळेत प्रदर्शन खुले राहणार आहे.
कोल्हापूर, सांगलीतील फोटोग्राफर्सचा समावेश
प्रदर्शनात कोल्हापुरातील जानकी भोसले, श्रीप्रसाद पुनाळकर, अमोल लायकर, अमित पोवार, जेम्स नाचणकर, अनिकेत गुरव, विनोद पाटील, कुलदीप सावंत, सुनील लायकर, प्रणव घोटगे,, अथर्व देव, वैभव पाटील, शैलेश चांदूरकर यांच्या छायाचित्रांचा समावेश आहे. योगेश माने (इचलकरंजी), दगडू जगताप (चंदूर), अक्षय मगदूम, अरुणकुमार चौगुले, अजित चौगुले (उदगाव), ज्ञानदेव सलाते (बुबनाळ) यांची छायाचित्रे लक्ष वेधणारी आहेत. सांगलीतील राम म्हस्के, किरण चव्हाण, अनिल अकिवाटे, योगेश गुरव, शितल पाटील, रोकश बिरादार, शुभम गावडे, अमित कणिरे, रोहित कांबळे, सुनील कदम यांच्या छायाचित्रांनी प्रदर्शनाची शोभा वाढली आहे.
वॉटसअॅप ग्रुप ते फेसबुक पेज
उदगाव येथील विनायक पाटील यांच्या पुढाकारातून २६ जून २०१६ रोजी ‘फोटोग्राफी इज एव्हरीथिंग’ या नावांनी ग्रुपची स्थापना केली. ख्यातनाम फोटोग्राफर मनोज मुसळे, विजय पाटील यांचे मार्गदर्शन लाभते. ग्रुपच्या सदस्यांची संख्या १२० आहे.ग्रुपच्या अध्यक्षपदी शितल पाटील (सांगली) तर उपाध्यक्षपदी अरुणकुमार चौगले (उदगाव) आहेत. कोल्हापुरातील टीमचे प्रमुख शैलेश चांदूरकर, अमोल लायकर आहेत. ज्यांच्याकडे डीएसएलआर कॅमेरा आहे. ते ग्रुपचे सदस्य होऊ शकतात. कोल्हापूर, सांगली, पुणे, सातारासह विविध शहरातील फोटोग्राफरही सदस्य आहेत. ग्रुपतर्फे फेसबुकवर ‘फोटाग्राफी इज एव्हरीथिंग’ नावाचे पेज तयार केले आहे.
ग्रुपच्या सदस्यांनी फोटोग्राफीतील कौशल्ये आत्मसात करावीत यासाठी प्रयत्न असतो. नवीन शिकण्याची आणि सातत्याने वेगळे काही तरी करण्याची वृत्ती वाढीस लागावी म्हणून वॉटसअॅप ग्रुपवर रोज दोन फोटो टाकले जातात. सदस्य त्या फोटोची वैशिष्ट्ये नमूद करतो. वॉटसअॅप ग्रुपवर फोटोग्राफी व्यतिरिक्त अन्य कुठल्या पोस्ट नसतात. ग्रुपचे वैशिष्ट म्हणजे कॉलेजियन्स युवक युवतींपासून नोकरदार, व्यावसायिक फोटोग्राफर, गृहिणी, ज्येष्ठ नागरिक असे विविध वयोगटातील सदस्य आहेत.
- विनायक पाटील, संस्थापक फोटोग्राफी इज एव्हरीथिंग ग्रुप
ग्रुपतर्फे वर्षातून दोन वेळेला छायाचित्रांचे प्रदर्शन भरविले जाते. कोल्हापुरातील हे पहिलेच प्रदर्शन आहे. यापूर्वी सांगलीत भरविलेल्या प्रदर्शनास नागरिकांचा प्रतिसाद मिळाला होता. ग्रुपतर्फे छायाचित्रांच्या प्रदर्शनाबरोबरच फोटो वॉक, फोटो टूर अशा संकल्पना राबविल्या जातात. महिला सदस्यासाठी फोटाग्राफी विषयक कार्यशाळा आयोजित केल्या जातात. छायाचित्रांविषयी प्रत्येक सदस्यांनी आपआपली मते नोंदवावीत असा नियम केल्यामुळे सुधारणेला संधी मिळते.
- शितल पाटील, अध्यक्ष फोटोग्राफी इज एव्हरीथिंग ग्रुप
मोबाइल अॅप डाउनलोड करा आणि राहा अपडेट
