म. टा. वृत्तसेवा, सांगली
सांगली जिल्ह्याच्या काही भागात मंगळवारी पहाटेपासून पावसाने संततधार धरली असून, पेरणीनंतर अद्यापही तग धरुन असलेल्या खरिपाला काहीअंशी जीवदान मिळण्याची शक्यता निर्माण झाली आहे. अधूनमधून काहीसा जोर असलेली सर येवून जाते. या पावसाने पाणी खळाळून वाहताना दिसत नाही. परंतु, एकसारखी संततधार असलेला पाऊस जमिनीत मुरत आहे. याचा फायदा पिकांना निश्चित होणार आहे.
दीर्घकाळ दडी मारल्यानंतर पुन्हा पावसाला सुरुवात झाली आहे. उन्हाळ्यासारखे चटके देणारे वातावरण आणि सोसाट्यासारखा वाहणारा एकसारखा वारा यामुळे पाऊस गायबच झाल्याची चर्चा सुरू होती. यंदाच्या पावसाळ्यात कायम दुष्काळी असलेल्या जत, आटपाडी, कवठेमहांकाळ आदी भागात सुरुवातील दमदार हजेरी लावली होती. त्यामुळे शेतकऱ्यांनी पेरण्या आटोपून घेतल्या होत्या. पहिल्या ओलीवर पीक अंकुरले पण पावसाने दडी मारल्याने शेतकरी चिंतेत आहे. अद्यापही दुष्काळी भागात पावसाचा थेंब नाही. जून जुलैमध्ये हिरवाईने नटणाऱ्या टेकड्या, डोंगर, शिवारे आजच्या घडीला ओसाड दिसत आहेत. दूरवर ढग दाटून येतात. दूर कुठेतरी पाऊस पडत असल्याचा भासही होतो. काही वेळेला गार वारेही झोंबून जाते. परंतु, प्रत्यक्षात आपल्या वावरात पाऊस नसल्याची जाणीव होताच बळीराजा हिसमुसतो. त्याने अजूनही आशा सोडलेली नाही. दुबार पेरणी करायची तयारी आहे, परंतु त्यासाठीही पाऊस लागणार आहे. दुबार पेरणीतून भले पीक हाताला लागणार नाही, पण जनावरांना चारा मिळेल, अशी त्यांना आशा आहे.
दुष्काळी भाग अद्याप कोरडा
सांगली आणि आजूबाजूच्या मिरज, तासगाव, कवठेमहांकाळ, कडेगाव या तालुक्यातल्या काही भागात मंगळवारी दिवसभर संततधार होती. सकाळपर्यंतच्या चोवीस तासांत जिल्ह्यात सरासरी ५.१ मिलीमीटर इतका पाऊस नोंदला गेला आहे. दिवसभर सांगलीच्या पश्चिम भागातील वाळवा, शिराळा आणि पूर्व भागातील मिरज, कवठेमहांकाळ, तासगाव तालुक्याच्या बहुतांशी भागात संततधार होती. कडेगाव, खानापूर आणि आटपाडी तालुक्याच्या काही भागापर्यंत रिमझीम पोहचली आहे. कवठेमहांकाळ तालुक्याचा पूर्व आणि संपूर्ण जत तालुक्यात मात्र थंड वाऱ्याशिवाय काहीच नव्हते. वातावरण मात्र ढगाळ होते. मंगळवारी सकाळी आठ वाजेपर्यंत चोवीस तासांतील नोंदीनुसार मिरज २.१, खानापूर-विटा २, वाळवा-इस्लामपूर १०.८, तासगाव १, शिराळा २५.२, कवठेमहांकाळ ०.६, पलूस ३ आणि कडेगाव तालुक्यात ५.८ मिलीमीटर पावसाची नोंद झाली आहे.
वारणा दुथडी
चांदोली धरण परिसरात रविवारी रात्रीपासून सुरू झालेला मुसळधार पाऊस अद्याप सुरूच आहे. धरण पाणलोट क्षेत्रातून पाण्याचा प्रवाह मोठ्या प्रमाणात धरणात येत असल्यामुळे धरणाची पाण्याची पातळी झपाट्याने वाढत आहे. रविवारपासून पडत असलेल्या पावसामुळे वारणा नदी दुथडी भरून वाहू लागली आहे. धरण ५८.३२ टक्के भरले आहे. धरण पाणलोट क्षेत्रात गेल्या चोवीस तासांत ५३ मिमी पाऊस पडल्याची नोंद वारणावती येथील पर्जन्यमापकावर झाली आहे. धरणात २०.०६ टीएमसी पाणीसाठा झाला आहे. आतापर्यंत चांदोली धरण पाणलोट क्षेत्रात ९४५ मिमी पावसाची नोंद झाली आहे. धरणाची पाणीपातळी ६१०.४० मीटर इतकी झाली आहे. सोमवारी आणि मंगळवारी दिवसभर संततधार पाऊस सुरू होता. गेल्या बावीस दिवसांत धरणात ८.५७ टीएमसीने पाणी वाढले आहे. या दरम्यान धरण परिसरात ६७२ मिमी पाऊस झाला आहे. पावसाचे आगार समजल्या जाणाऱ्या चांदोली धरण परिसरात यंदा जुलै महिना संपत आला तरी पाऊस म्हणावा तसा सुरू नव्हता. पिकांना तरवणी मिळेल इतकाच पाऊस परिसरात सुरू होता. वर्षांत तीन ते चार हजार मिमी पाऊस या परिसरात हमखास पडतो. यंदा पावसाचे प्रमाण कमी दिसत आहे. दरम्यान या परिसरात पडत असलेल्या संततधार पावसामुळे कोकरूड-शेडगेवाडी रस्त्यावर झाड उन्मळून पडल्यामुळे सोमवारी काहीकाळ वहातूक ठप्प झाली होती. स्थानिक ग्रामस्थ आणि कोकरूड पोलिसांच्या मदतीने पाच ते सात तासांनी या झाड बाजूला करून वाहतूक सुरळीत करण्यात आली.
मोबाइल अॅप डाउनलोड करा आणि राहा अपडेट
