प्रवीण कांबळे, हातकणंगले
सोनालीचे वडील गवंडीकाम करतात तर आई शेतमजुरी करते. हातावर पोट असणाऱ्या या दाम्पत्याच्या मुलीने विद्येच्या बळावर जीवनाचे ध्येय साध्य करायचा ध्यास घेत दहावीच्या परीक्षेत ९३.४० टक्के गुण मिळविले आहेत. यशाचा आलेख असाच कायम ठेवत सोनालीला अधिकारी व्हायचं आहे. स्पर्धा परीक्षांच्या माध्यमातून जनसेवा तर करायचीच आहे, शिवाय कष्टकरी आईवडिलांच्या जीवनात आनंदही फुलवायचा आहे.
कुंभोज येथील सोनाली भोसले हिच्या घरची परिस्थती अत्यंत गरिबीची आहे. वडील शिवाजी गवंडी म्हणून काम करतात तर आई शेतमजुरी करते. सोनालीला दोन भावंडे आहेत. तिघा मुलांना शिकवताना भोसले दाम्पत्याची अक्षरशः दमछाक होते. परंतु, सोनालीची अभ्यासातील चमक पाहून कितीही कष्ट पडले तरी चालतील पण, मुलांना शिकवायचेच, असा निर्धार त्यांनी केला. सोनालीनेही आईवडिलांच्या कष्टाची जाण राखत जिद्दीने अभ्यास केला आणि दहावीत ९३.४० टक्के गुण मिळविले. बाहुबली विद्यापीठ या संस्थेच्या एम.जी. शहा विद्या मंदिरात शिकणाऱ्या सोनालीने येथील दहावी केंद्रातही दुसरा क्रमांक पटकावला आहे. विशेष म्हणजे कोणताही खासगी क्लास न लावता तिने हे यश मिळवले. अभ्यासासाठी वडिलांनी तिला घरातील दहा बाय दहाच्या खोलीत पोटमाळाही करून दिला होता.
आईवडील सकाळीच कामावर बाहेर पडल्यानंतर शाळेला जायच्या आधी आणि शाळेतून आल्यावर सोनाली अभ्यास करीत असे. आपल्या आईवडिलांना अभ्यासातील काही कळत नसले तरी त्यांच्या पाठिंब्याने आणि शाळेतील शिक्षकांच्या मार्गदर्शनाने सोनालीने दहावीच्या वर्षातील क्षण अन् क्षण कारणी लावला. आजकाल खासगी क्लासचे प्रचंड आकर्षण असूनही तिने परिस्थितीची जाणीव ठेवत स्वअध्ययनावर भर देत यशाला गवसणी घालण्याचा प्रयत्न केला. तिच्या या प्रयत्नांची पोचपावती तिला निकालादिवशी मिळाली. आपल्या यशामध्ये आईवडील आणि शिक्षकांचा मोलाचा वाटा असल्याचे ती नम्रतेने सांगते.
सोनालीचे पहिली ते सातवीपर्यंतचे शिक्षण विद्या मंदिर, कुंभोज येथे झाले, तर आठवी ते दहावीपर्यंतचे शिक्षण तिने एम.जी. शहा विद्या मंदिरमधून घेतले. या दोन्ही शाळांचे ऋण ती मनोमन मान्य करते. सोनालीचे हे यश इतरांना सांगताना आजही तिची आई संपदा यांच्या डोळ्यातून आनंदाश्रू वाहतात. लेकीचे कौतुक करताना त्या म्हणतात, ‘माझ्या लेकीनं खूप सोसलंय. गवंडीकाम रोज मिळेल याची शाश्वती नाही. शेतात मजुरी करून संसाराचा गाडा चालवला. घरात अनेक अडचणी असताना सोनालीने आम्हाला नाराज केले नाही. आमच्या कष्टाला सोनालीने यशाची झालर लावली आहे.’
......
‘वडील गवंडीकाम करतात. मात्र त्यांना रोज काम मिळेलच, याची खात्री नसायची. या परिस्थितीत आई मजुरी करुन पोटापाण्याचा प्रश्न सोडवते. अशा बिकट परिस्थितीत घराचा गाडा चालवताना आई कधीही खचली नाही. माझ्या शिक्षणासाठी खस्ता खाल्लेल्या वडिलांनी इतरांचे अनेक इमले बांधले. मला आता त्यांनी बांधलेल्या इमल्यांवर कळस चढवायचा आहे. आईवडिलांसाठी सुखाचे दिवस दाखवण्यासाठी उच्चपदस्थ अधिकारीपदाचा इमला चढायचा आहे.
सोनाली भोसले
मोबाइल अॅप डाउनलोड करा आणि राहा अपडेट
