जयसिंगपूर औद्योगिक वसाहतीजवळील खासगी जमिनीवर अतिक्रमण करून उभारण्यात आलेली तात्यासाहेब कोरेनगर ही झोपडपट्टी सोमवारी सकाळी पोलिस बंदोबस्तात हटविण्यात आली. सुमारे चाळीस झोपड्या जेसीबीच्या सहाय्याने उद्ध्वस्त करण्यात आल्या. त्यामुळे झोपडपट्टीवासियांचे संसार उघड्यावर पडले.
औद्योगिक वसाहतीजवळ गट क्र. ४६/४ मध्ये फजलुल्ला मौलाना अब्दुसकादर इराणी, बापू आप्पाण्णा मगदूम, आण्णासो दत्तात्रय राजमाने यांच्या मालकीची सुमारे १९ एकर जागा आहे. त्यापैकी सुमारे साडेतीन एकर जागा ही रस्ता, नाले यांच्यासाठी सोडण्यात आली आहे. यापैकी काही जागेत गेल्या १५ वर्षांपासून अतिक्रमण करून झोपड्या उभारण्यात आल्या होत्या व त्याचे नामकरण तात्यासाहेब कोरेनगर असे करण्यात आले होते.
या ठिकाणी प्रारंभी बारा झोपड्या होत्या. त्यांची संख्या आता चाळीसपर्यंत पोचली होती.या जागेवरील अतिक्रमणे हटविण्यासाठी फारूख पठाण यांनी २४ मे रोजी जिल्हा पोलिसप्रमुखांकडे पोलिस बंदोबस्त देण्याची मागणी केली होती. तर या जागेवरील अतिक्रमणे कायम करावीत, अशी मागणी झोपडपट्टीवासीयांनी जिल्हाधिकाऱ्यांकडे केली होती. मात्र, ही अतिक्रमणे खासगी जागेवर असल्याने ती कायम करता येणार नाहीत, असा निर्वाळा जिल्हाधिकाऱ्यानी दिला होता. त्यामुळे ही अतिक्रमणे हटविण्याचा मार्ग मोकळा झाला होता.
सोमवारी सकाळी ११ वाजण्याच्या सुमारास मोठ्या पोलिस बंदोबस्तात चार जेसीबींच्या साह्याने एकाचवेळी अतिक्रमणे हटविण्याची मोहीम हाती घेण्यात आली. अचानक सुरू झालेल्या कारवाईमुळे झोपडपट्टीवासीयांचे धाबे दणाणले. प्रारंभी अतिक्रमणे काढण्यास विरोध झाला. मात्र, पोलिस बंदोबस्तात कारवाई करण्यात आली. अतिक्रमणे काढून घ्यावीत, अशा नोटीसा आपण पाठविल्याचे फारूख पठाण यांनी सांगितले. तर कोणतीही नोटीस न मिळाल्याचा आरोप झोपडपट्टीवासीयांनी केला. काही वेळातच जेसीबींच्या साह्याने ही झोपडपट्टी जमीनदोस्त करण्यात आली.
मोबाइल अॅप डाउनलोड करा आणि राहा अपडेट
