तरू विक्रीने फुलले रस्ते

June 18, 2017, 2:30 pm

≫ Next: ‘रस्ते’ ठरावावरून दुफळी

≪ Previous: डासांच्या उपद्रवामुळे नागरिकांना त्वचेचे विकार

$

0

0

म. टा. प्रतिनिधी, कोल्हापूर

अधुन-मधून पावसाची हजेरी लागत असल्याने शेतीच्या पेरणीच्या कामांना वेग आला आहे. भात, सोयाबीन, भुईमूग अशा पारंपरिक पिकांच्या पेरणीबरोबरच लवकर भाजीपाल्याचे पिक येण्यासाठी वांगी, टोमॅटो, मिरची, कांदा आदीची लावण केली जाते. अशा अल्पकाळात उत्पादन होणाऱ्या पिकांचे तरु (रोप) खरेदीसाठी शहरातील पापाची तिकटी येथे शेतकऱ्यांची गर्दी होत आहे. शेकडा ५० ते ७० रुपयांप्रमाणे विविध वाणांचे खात्रीशीर तरु म्हणून अनेक शेतकरी येथून तरूची वर्षानुवर्षे खरेदी करत आहेत.

पारंपरिक शेतीबरोबर प्रगतशील शेती म्हणून अनेक शेतकरी विविध प्रकारच्या तरवांची लागवड करुन विक्री करत असतात. जयसिंगपूर, मिरज, सांगलीच्या पश्चिम भागात आधुनिक पद्धतीने तरवांची निर्मिती करतात. त्याचप्रमाणे कसबा सांगाव, कागल, सौंदलगा याठिकाणीही अशा प्रकारच्या तरवांची लागवड करुन विक्री केली जाते. जिल्ह्याच्या पश्चिम भागात पावसाचे प्रमाण जास्त असल्याने असे तरु तयार होत नसल्याने रोपवाटिकांमध्ये तयार केलेल्या तरवांची खरेदी केली जाते. गेल्या अनेक वर्षांपासून पापाची तिकटी येथे अशा तरुंची विक्री होते. त्यामुळेच या मार्गावर आता तरु विक्रेत्यांची आणि खरेदीदार शेतकऱ्यांची गर्दी होऊ लागली आहे.

मोबाइल अॅप डाउनलोड करा आणि राहा अपडेट

---

‘रस्ते’ ठरावावरून दुफळी

June 18, 2017, 2:30 pm

≫ Next: जिल्हाधिकाऱ्यांना जाब विचारू

≪ Previous: तरू विक्रीने फुलले रस्ते

$

0

0

म. टा. प्रतिनिधी, कोल्हापूर

गावपातळीवर दारु दुकानांच्या विरोधात आवाज एकवटत असताना महापालिकेतील काही कारभारी नगरसेवकांनी मात्र दारु व्यावसायिकांशी संगनमत करुन रस्ता हस्तांतरणाचा घाट घातला आहे. जकात बंद, एलबीटी रद्द झाल्यामुळे महापालिकेच्या आर्थिक उत्पन्नावर मर्यादा आल्या आहेत. प्रभागातील पायाभूत सुविधासाठी नगरसेवक निधीसाठी भांडत असताना रस्ते हस्तांतरणानंतर महापालिकेवर संबंधित रस्त्यांच्या देखभाल दुरुस्तीचा बोजा वाढणार आहे. मात्र, शहराच्या हितापेक्षा व्यक्तीगत लाभाला प्राधान्यक्रम देत कारभारी नगरसेवकांनी रस्ते हस्तांरणाचा चंग बांधला आहे.

महापालिकेतील ठराविक नगरसेवकांनी यामध्ये एकत्र येऊन कोट्यवधी रुपयांचा डल्ला मारल्याची चर्चा महापालिकेत रंगली आहे. इतर नगरसेवकांना या निर्णय प्रक्रियेपासून लांब ठेवले आहे. पक्षाचा आदेश या नावाखाली नगरसेवकांचा आवाज दाबला जात असल्याच्या तक्रारी आहेत. सर्वच पक्षातील अनेक नगरसेवकांना रस्ते हस्तांतरणाच्या ठरावाच्या विरोधात आहेत. मात्र कारभारी नगरसेवक नेते मंडळीच्या मर्जीतील असल्याने त्यांच्या विरोधात तक्रारी करायच्या कुणाकडे असा प्रश्न खासगीत व्यक्त करत आहेत.

सुप्रीम कोर्टाच्या आदेशामुळे एक एप्रिलपासून राज्य आणि राष्ट्रीय महामार्गापासून ५०० मीटर अंतरातील दारु दुकाने बंद करण्यात आली आहेत. कोल्हापूर शहरातील २१० दारु दुकानापैकी ८८ दुकाने बंद आहेत. तावडे हॉटेल ते शिवाजी पूल पर्यंतच्या मार्गावरील ५०० मीटरच्या अंतरातील ६६ दुकाने बंद आहेत. दारु दुकाने बंद झाल्यामुळे हवालदिल झालेल्या व्यावसायिकांनी महापालिकेतील काही पदाधिकारी, कारभारी नगरसेवकांशी संधान साधत महामार्ग महापालिकेकडे हस्तांतरण करण्याचा घाट घातला आहे. या प्रकरणी सत्ताधाऱ्यांच्या पार्टी मिटिंगमध्ये पदाधिकारी आणि कारभारी नगरसेवकांत वाद झाला होता. अन्य नगरसेवकांना आर्थिक आमिषे दाखवत कारभाऱ्यांनी मोठ्या रकमेवर डल्ला मारल्याची चर्चा आहे. दरम्यान, दारुमुळे अनेकांचे संसार उघड्यावर पडले आहेत. सर्वसामान्य कुटुंबांना झळ बसत आहे. ग्रामीण भागात बाटली आडवी करण्यासाठी चळवळी सुरू असताना कोल्हापुरात बंद असलेली दारु दुकाने सुरु करण्याचा प्रकार अनेक महिला सदस्यांना रुचलेला नाही.

मोबाइल अॅप डाउनलोड करा आणि राहा अपडेट

जिल्हाधिकाऱ्यांना जाब विचारू

June 18, 2017, 2:30 pm

≫ Next: डॉ. रघुनाथ माशेलकर यांना शाहू पुरस्कार

≪ Previous: ‘रस्ते’ ठरावावरून दुफळी

$

0

0

म. टा. प्रतिनिधी, कोल्हापूर

करवीरनिवासिनी श्री अंबाबाईप्रश्नी जिल्हा प्रशासनाने कोणतीच भूमिका का घेतली नाही? याचा जाब विचारण्याचा निर्णय रविवारी अंबाबाई मंदिरात झालेल्या आंदोलनावेळी घेण्यात आला. अंबाबाई मंदिर श्रीपूजकमुक्त करण्याची मागणी भक्तांच्यावतीने बुधवारी (ता. २१) दुपारी १२ वाजता, जिल्हाधिकाऱ्यांकडे निवेदनाद्वारे करण्यात येणार आहे.

अंबाबाई मंदिर श्रीपूजकमुक्त व्हावे, यासाठीचा लढा तीव्र करण्यात आला आहे. जोपर्यंत मंदिर श्रीपूजक मुक्त होत नाही, तोपर्यंत न्यायालयीन आणि रस्त्यावरची लढाई टप्प्याटप्याने सुरुच ठेवली जाईल असे सांगण्यात आले. रविवारी सकाळी १० वाजता जुना राजवाडा पोलिस ठाण्यात अंबाबाईचे भक्त आणि शाहूभक्त जमा झाले. यावेळी ‘लोकशाहीमध्ये समतेचे तत्व स्वीकारले आहे. त्या न्यायाने स्त्र‌ियांना एक आणि पुरुषांना एक असा भेद धर्माबाबत करता येणार नाही. श्रीपूजकांच्या पत्नी, आई, मुलींना गाभाऱ्यात प्रवेश दिला जातो, त्याचप्रमाणे सर्व जातीच्या महिलांना मंदिरातील गाभाऱ्यात प्रवेश मिळावा. यासाठी कोल्हापूरच्या पुरोगामी भूमीत लवकरच जनआंदोलन सुरूवात केली जाईल. अंबाबाईच्या पूजेचे विधी करण्याचा अधिकारही महिलांना मिळावा अशी मागणी आहे’ असे ज्येष्ठ अभ्यासक डॉ. सुभाष देसाई यांनी सांगितले.

राष्ट्रवादी काँग्रेसचे शहरप्रमुख राजू लाटकर म्हणाले, ‘मंदिर श्रीपूजकमुक्त करण्यासाठी निर्णय घेणे आवश्यक आहे. याप्रश्नी अजूनही प्रशासनाने कोणतीच दखल घेतली नाही. याचाच अर्थ प्रशासन कोणाच्या तरी दबावाखाली काम करत आहे. तातडीने निर्णय न झाल्यास कोल्हापूरकरांचा उद्रेक होईल. याला प्रशासन जबाबदार असेल.’


तोडकरसह पाचजणांना रोखले

स्वाभिमान संघटनेचे सचिन तोडकर, सचिन खांडेकर, शक्ती सारंग, सुनील मुळे, विनायक भांबुरे यांनी देवस्थान समितीमध्ये दुग्धाभिषेक करण्यासाठी रीतसर पावती केली होती. त्यामुळे ते गाभाऱ्यात जाण्यासाठी मंदिरातील उंबऱ्यात आले. यावेळी पोलिस निरीक्षक तानाजी सावंत, कर्मचारी सुहास पोवार यांनी सचिन तोडकर यांना अडविले. पोलिसांनी या पाचजणांना बाहेर काढले. यावेळी आंदोलकांनी घोषणाबाजी केली.


दहा पुजाऱ्यांची गरज काय?

साकडे आंदोलनादरम्यान डॉ. सुभाष देसाई यांनी, ‘मंदिरातील गाभाऱ्यात दहा पुजाऱ्यांचे काय काम आहे? एकीकडे आर्द्रतेचा विषय सुरू असतानाही अजूनही गाभाऱ्यात दहा-दहा पुजारी कसे काय असतात?, असा सवाल पोलिसांना केला. यावेळी उपस्थित पोलिसांनी, ‘आतमध्ये असलेल्या पुजाऱ्यांनी गाभाऱ्यातून बाहेर बसावे’, असे सुनावले. त्यामुळे आतील आठ पुजारी प्रदक्षिणा मार्गाकडे निघून गेले.

मोबाइल अॅप डाउनलोड करा आणि राहा अपडेट

डॉ. रघुनाथ माशेलकर यांना शाहू पुरस्कार

June 19, 2017, 12:09 pm

≫ Next: ‘निमा’च्या कार्यशाळेत प्रस्तावित बिलाविरोधात इशारा

≪ Previous: जिल्हाधिकाऱ्यांना जाब विचारू

$

0

0

म. टा. प्रतिनिधी, कोल्हापूर

येथील राजर्षी शाहू छत्रपती मेमोरियल ट्रस्टच्यावतीने दरवर्षी देण्यात येणारा राजर्षी शाहू पुरस्कार ज्येष्ठ शास्त्रज्ञ डॉ. रघुनाथ माशेलकर यांना जाहीर आहे. एक लाख रुपये, स्मृतिचिन्ह आणि मानपत्र असे पुरस्काराचे स्वरुप आहे. सोमवारी (ता. २६) सायंकाळी सहा वाजता प्रदान सोहळा होणार आहे. ट्रस्टचे अध्यक्ष, जिल्हाधिकारी अविनाश सुभेदार यांनी पत्रकार परिषदेत ही माहिती दिली.

अध्यक्ष सुभेदार म्हणाले, ‘ट्रस्टच्यावतीने दरवर्षी समाज प्रबोधन, साहित्य, कला, संस्कृती, विज्ञान, संगीत, क्रीडा आदी क्षेत्रात प्रदीर्घ काळ उल्लेखनीय योगदान देणाऱ्या संस्था व व्यक्तीला शाहू पुरस्काराने सन्मानित केले जाते. डॉ. माशेलकर यांच्या संशोधन क्षेत्रातील उल्लेखनीय कार्याबद्दल यावर्षीच्या पुरस्कारासाठी त्यांची निवड करण्यात आली आहे. श्रीमंत छत्रपती शाहू महाराज यांच्याहस्ते व पालकमंत्री चंद्रकांत पाटील यांच्या प्रमुख उपस्थित पुरस्कार प्रदान सोहळा होणार आहे.’

दरम्यान, ज्यांना मी आदर्श मानतो त्या राजर्षी शाहूंच्या नावाचा पुरस्कार मिळाल्याचा आनंद असल्याची प्रतिक्रिया डॉ. माशेलकर यांनी व्यक्त केली. हा पुरस्कार विशेष असून, या पुरस्काराचा अभिमान वाटतो, असे ते म्हणाले.

मोबाइल अॅप डाउनलोड करा आणि राहा अपडेट

‘निमा’च्या कार्यशाळेत प्रस्तावित बिलाविरोधात इशारा

June 19, 2017, 2:30 pm

≫ Next: तावडे हॉटेल परिसरात इमारतीला आग

≪ Previous: डॉ. रघुनाथ माशेलकर यांना शाहू पुरस्कार

$

0

0

म. टा. प्रतिनिधी, कोल्हापूर,

‘केंद्र सरकार एनएसआयएसएम बिल येत्या अधिवेशनात मांडणार आहे. हे बिल भारतीय चिकित्सा पध्दतीच्या डॉक्‍टरांच्या नोंदणी, कायदेशीर हक्क व वैद्यक व्यवसायासंदर्भात सुधारणा सुचवणारे आहे. या बिलाचे कायद्यात रूपांतर झाले तर आयुर्वेदीक डॉक्‍टरांवर अॅलोपॅथी औषधे वापरण्याच्या कायदेशीर हक्कावर बंधने येणार असून तसे झाल्यास राज्यव्यापी आंदोलनासाठी सज्ज रहा,’ असे आवाहन नॅशनल इंटीग्रेटेड मेडिकल ‘निमा’ असोसिएशनचे माजी राष्ट्रीय अध्यक्ष व पुण्याच्या राष्ट्रीय शिक्षण मंडळाचे अध्यक्ष डॉ. सुहास परचुरे यांनी केले. करवीर शाखेच्यावतीने ‘भारतीय चिकित्सा पध्दतीच्या डॉक्‍टरांचे कायदेशीर हक्क,’ या विषयावर एकदिवसीय कार्यशाळा झाली. यावेळी ते बोलत होते.

दरम्यान, गेली पन्नासहून अधिक वर्षे इंटीग्रेटेड मेडिकल प्रॅक्‍टीशनर्स आणि आयुर्वेदीय शिक्षणासाठी डॉ. परचुरे यांनी केलेल्या कामाबद्दल त्यांचा ज्येष्ठ इतिहास संशोधक डॉ. जयसिंगराव पवार यांच्या हस्ते त्यांचा जीवनगौरव पुरस्काराने सन्मान झाला.

डॉ. पवार यांनी राजर्षी छत्रपती शाहू महाराजांच्या विविध आरोग्यविषयक निर्णयांची माहिती यावेळी दिली. आर्यांग्ल दवाखाना राजर्षींनी पहिल्यांदा कोल्हापुरात स्थापन केल्याचेही त्यांनी सांगितले. त्यानंतर दिवसभर झालेल्या कार्यशाळेत मुंबईतील ज्येष्ठ न्याय वैद्यक तज्ज्ञ डॉ. विनायक म्हात्रे, डॉ. परचुरे, डॉ. चंद्रकांत कोलते,

डॉ. कैलास गौड यांनी मार्गदर्शन केले.

ग्राहक संरक्षण कायदा विषयावर सुभाष कांबळे, ‘भारतीय गुन्हेविषयक कायदे आणि वैद्यक व्यवसाय’ या विषयावर ज्येष्ठ विधिज्ज्ञ. शिवाजीराव राणे यांनी मार्गदर्शन केले. संघटनेचे माजी राज्याध्यक्ष डॉ. सुनील पाटील यांनी प्रास्ताविक केले. डॉ. ऋषीकेश जाधव यांनी स्वागत केले. डॉ. प्रसाद मोटे, डॉ. शिवकांत पाटील यांनी सूत्रसंचालन केले. यावेळी डॉ. अरूण मोराळे, अभिजीत मुळीक, यशपाल हुलस्वार, आदित्य काशीद, प्रणव पाटील, स्मिता कोलते, डॉ. स्नेहल पाटील आदी उपस्थित होते.

मोबाइल अॅप डाउनलोड करा आणि राहा अपडेट

तावडे हॉटेल परिसरात इमारतीला आग

June 19, 2017, 2:30 pm

≫ Next: समीर सांगली मुक्कामी

≪ Previous: ‘निमा’च्या कार्यशाळेत प्रस्तावित बिलाविरोधात इशारा

$

0

0

म. टा. प्रतिनिधी, कोल्हापूर

तावडे हॉटेल परिसरात रविवारी रात्री दोनच्या सुमारास एका घराला आग लागली. भीषण आगीत पाचजण जखमी झाले. त्यांच्यावर सीपीआर रुग्णालयात उपचार सुरू आहेत. आगीत घरासह वाहनांचे सुमारे ५ लाख रुपयांचे नुकसान झाले. अग्निशामक दलाच्या बंबांनी ही आग आटोक्यात आणली.

तावडे हॉटेल परिसरात गांधीनगर मार्गावरील सरगूर प्लाझा ही इमारत आहे. रविवारी मध्यरात्री दोनच्या सुमारास इमारतीच्या तळमजल्यावर आग लागली. आगीने भीषण रूप धारण केल्याने आग इमारतीत पसरली. यात सिकंदर सरगूर, गुलाब सरगूर, चांदसाब सरगूर आणि इकबाल सरगूर यांची घरे आगीच्या भक्षस्थानी पडली. गाढ झोपेत असलेल्या आतील रहिवाशांना आगीची कल्पना न आल्याने ते आतच आडकले होते. घटनास्थळी आलेल्या अग्निशमन दलाच्या दोन बंबांनी एक तासाच्या प्रयत्नाने आग आटोक्यात आणली.

या घटनेत सैफ समीर सरगूर (वय १२), सिकंदर हमीद सरगूर (४५), अशपाक इकबाल सरगूर (२२), शिया समीर सरगूर (८), आणि अप्सरा समीर सरगूर (२८) हे जखमी झाले. या सर्वांवर सीपीआर रुग्णालयात उपचार करण्यात आले. आगीत एक बुलेट मोटारसायकल आणि दोन मोपेड जळून खाक झाल्या. यात सुमारे पाच लाखांचे नुकसान झाल्याचा अंदाज आहे.

आग लागली की...

दरम्यान, ही आग शॉर्टसर्कीटने लागली, की कोणी जाणिवपूर्वक लावली याचा तपास गांधीनगर पोलिस करीत आहेत. शुक्रवारी मध्यरात्री लिशांन हॉटेल परिसरात मोटारसायकल पेटविल्याची घटना घडली. त्यामुळे ही आग शॉर्टसर्किटमुळे लागली की कोणी जाणीवपूर्वक लावली याचा शोध घेण्याचे काम पोलिसांकडून सुरू आहे. या घटनेची नोंद गांधीनगर पोलिस ठाण्यात झाली आहे.

मोबाइल अॅप डाउनलोड करा आणि राहा अपडेट

समीर सांगली मुक्कामी

June 19, 2017, 2:30 pm

≫ Next: ‘माध्यमिक’मध्ये ८ हजारांचा दर

≪ Previous: तावडे हॉटेल परिसरात इमारतीला आग

$

0

0

म. टा. प्रतिनिधी, कोल्हापूर

कॉम्रेड गोविंद पानसरे यांच्या हत्येतील संशयित आरोपी समीर विष्णू गायकवाड (वय ३२, रा. सांगली) याची सोमवारी (ता. १९) संध्याकाळी सव्वापाच वाजता कळंबा कारागृहातून सुटका झाली. लगेच तो वकिलांसोबत सांगलीकडे रवाना झाला. ‘देवाच्या कृपेने सुटलो! आता लवकरच प्रसिद्धी माध्यमांसमोर बोलणार आहे’, अशी प्रतिक्रिया त्याने अॅड. वीरेंद्र इचलकरंजीकर यांच्याकरवी दिली.

जिल्हा व सत्र न्यायाधीश एल. डी. बिले यांनी शनिवारी संशयित आरोपी समीरचा सशर्त जामीन मंजूर केला होता. सोमवारी जामीनदार दत्तात्रय पांडुरंग एडके (वय ४४ रा. वासुंबे, ता. तासगाव) आणि जगन्नाथ धोंडिराम पाटील (५८, रा. निमणी, ता. तासगाव) यांनी सकाळी ११ वाजता न्यायाधीश एल. डी. बिले यांच्याकडे जामिनासंदर्भातील कागदपत्रे सादर केली. न्यायाधीश बिले यांनी कागदपत्रांची पडताळणी करून जामीनदारांना अटींची माहिती दिली. त्यानंतर पाच वाजता कळंबा कारागृहात जामीनदारांसह वकील समीर पटवर्धन आणि वीरेंद्र इचलकरंजीकर यांनी कागदपत्रांची पूर्तता केली. सव्वापाच वाजता समीर हा वकील आणि नातेवाईकांसह कारागृहाबाहेर आला. त्याने प्रसिद्धीमाध्यमांच्या प्रतिनिधींकडे पहात हात उंचावला. अॅड. वीरेंद्र इचलकरंजीकर यांनी लगेच पत्रकारांकडे येऊन, ‘देवाच्या कृपेने सुटलो! लवकरच माध्यमांसमोर बोलणार आहे’ असे समीरने सांगितल्याचा निरोप दिला. सध्या समीर काहीच बोलणार नाही असे ते म्हणाले. अॅड. इचलकरंजीकर यांनी पानसरे कुटंबातील वादावरही बोट ठेवले. ते म्हणाले, ‘समीर निर्दोष आहे. पोलिसांनी सासू-सुनेच्या वादाचाही तपास करावा.’

अॅड. पटवर्धन यांनीही ही लढाई जिंकण्याचा विश्वास व्यक्त केला. यावेळी कारागृहाबाहेर आनंद देशपांडे, संदीप अपशिंगेकर यांच्यासह समीरचे नातेवाईक आणि हिंदुत्ववादी कार्यकर्ते उपस्थित होते. या खटल्याची पुढील सुनावणी १२ जुलैला होणार आहे.

तर पोलिस संरक्षण

संशयित समीर गायकवाड कारागृहातून बाहेर पडताच त्याच्या जिवाला धोका होऊ शकतो, अशी शंका हिंदुत्ववादी कार्यकर्त्यांनी व्यक्त केली होती. याबाबत अॅड. पटवर्धन म्हणाले, ‘सध्यातरी पोलिस संरक्षणाची मागणी आम्ही करणार नाही. वेळ पडल्यास जरूर संरक्षण मागू.’ समीरचे आधार कार्ड आणि मतदान ओळखपत्र एसआयटीने जप्त केले आहे. त्यामुळे ओळखीचा पुरावा म्हणून आम्ही रेशनकार्डची झेरॉक्स प्रत कोर्टात सादर केली’ असे ते म्हणाले.

मोबाइल अॅप डाउनलोड करा आणि राहा अपडेट

‘माध्यमिक’मध्ये ८ हजारांचा दर

June 19, 2017, 2:30 pm

≫ Next: केडीसीसी संचालकांची जुलै महिन्यात परदेशवारी

≪ Previous: समीर सांगली मुक्कामी

$

0

0

Bhimgonda.Desai@timesgroup.com
Tweet : @bhimgondaMT

कोल्हापूर : टायपिंग इन्स्टिट्यूटचे संगणक प्रशिक्षण संस्थेत रुपांतरित करण्याच्या प्रस्तावाला प्राथमिक शिक्षण विभागाची मान्यता घ्यावी लागते. ही मान्यता देण्यासाठी येथील माध्यमिक शिक्षण विभागाने ‘८०००’चा दर काढला आहे. यातून एक शिक्षण विस्तार अधिकारी मालामाल होत आहे. लाचखोरीने विभाग बदनाम झाला तरी अद्यापही पैशाची खुलेआम मागणी केली जाते. पैसे न दिल्यास प्रस्तावात त्रुटी काढल्या जातात. बेरोजगारांची ‌खिशावर लाचखोर अधिकारी, कर्मचारी दिवसाढवळ्या दरोडा टाकला जात आहे.

जिल्ह्यात १३६ टायपिंग इन्स्टिट्यूट आहेत. नोकरी न मिळालेल्या बेरोजगांरानी या संस्था सुरू केल्या. मात्र, बदलत्या तंत्रज्ञानामुळे टायपिंग यंत्रावरील प्रशिक्षणाऐवजी संगणकावर टायपिंग प्रशिक्षण देण्याचा आदेश सरकारने नुकताच काढला. या आदेशानुसार अनेक संस्थाचालक टायपिंग इन्स्टिट्यूटचे रुपांतर संगणक टायपिंग प्रशिक्षण संस्थेत करण्याचा प्रस्ताव माध्यमिक शिक्षण विभागात देत आहेत. प्रस्तावाची छाननी करून प्राथमिक मान्यता देण्याची जबाबदारी ‘माध्यमिक’मधील विस्तार अधिकाऱ्यांची आहे. प्राथमिक मान्यता मिळाल्यानंतर अंतिम मंजुरीसाठी प्रस्ताव शिक्षण आयुक्ताकडे पाठवले जाते. आयुक्ताकडून मंजूरी मिळाल्यानंतर इन्स्टिट्यूट शासनमान्य होते.

प्राथमिक मान्यतेचा प्रस्ताव नियमांनुसार सर्व कागदपत्रांनीशी परिपूर्ण असल्यास मंजूरीसाठी एक हजार रुपये द्यावे लागतात. कागदपत्रांची कमतरता ‌‌किंवा त्रुटी असल्यास आठ हाजारांपर्यंत मोजावे लागतात. पैशाची भाषा सुरू झाल्याशिवाय संबंधीत अधिकारी प्रस्तावाला हातच लावत नाही. ‘पैसे मिळणार नाहीत’ असे वाटल्यास प्रस्ताव कसा मंजूर होत नाही, याची मोठी यादीच दिली जाते. त्यामुळे प्रस्तावासोबत ‘लक्ष्मी’दर्शन घडवावे लागते. मान्यता मिळण्यात अडचणी येतील, या भीतीपोटी पैसे कशासाठी ? असे विचारण्याचे धाडसही संबंधित इन्स्टिट्यूटधारक करीत नसल्याचे वास्तव आहे. (क्रमशः)

कमाई लाखात

कोल्हापूर, इचलकरंजी, गडहिंग्लज, शिरोळ, जयसिंगपूर, कुरूंदवाड, अंबप, सरुड, हुपरी, बिद्री, हुपरी, कागल, गारगोटी, वारणानगर यांसह जिल्ह्यातील मोठ्या गावांत १३६ टायपिंग इन्स्टिट्यूट आहेत. या सर्व इन्स्टिट्यूटचे प्रस्ताव बदलासाठी आले आहेत. यासाठी किमान एक ते आठ हजारांपर्यंत वसुली सुरू असल्याने कमाई लाखात आहे.

माहिती देण्यास टाळाटाळ

जिल्ह्यात टायपिंग इन्स्टिट्यूट किती आहेत, त्याची माहिती शिक्षण विस्तार अधिकाऱ्यांकडे ‘महाराष्ट्र टाइम्स’ने मागितली. त्यांच्याकडे विषय असतानाही, त्यांनी अन्य अधिकाऱ्यांकडे माहिती घेण्यास सांगून टाळाटाळ केली. संबंधीत लिपीकांना विचारल्यावर त्यांनी माहिती देण्यासाठी फाइलची शोधाशोध सुरू केली. त्यावेळी माहिती नाकारल्याची सारवासारव सुरू होती.


माध्यमिक शिक्षण विभागातील गलथान कारभार पुन्हा सुरूच आहे. टपालमध्ये दिलेली फाइल संबंधित टेबलच्या लिपिकांकडे जाण्यासाठी १५ ते २० दिवस लागतात. खाबुगिरी पूर्णतः थांबलेली नाही. या सर्वांचा परिणाम जिल्ह्याच्या शिक्षण व्यवस्थेवर होत आहे.

राजेश वरक, अध्यक्ष, माध्यमिक शिक्षक संघ

मोबाइल अॅप डाउनलोड करा आणि राहा अपडेट

---

केडीसीसी संचालकांची जुलै महिन्यात परदेशवारी

June 19, 2017, 2:30 pm

≫ Next: दंड चुकवण्यासाठी बोगस हेल्मेट

≪ Previous: ‘माध्यमिक’मध्ये ८ हजारांचा दर

$

0

0

म. टा. प्रतिनिधी, कोल्हापूर

प्रशासक नियुक्तीनंतर सत्तेवर आलेल्या कोल्हापूर जिल्हा मध्यवर्ती सहकारी बँकेच्या संचालक मंडळाने बँकेचा संचित तोटा भरुन काढला आहे. आता बँक फायद्यात आणली असल्याने जुलै महिन्यात हे सर्व संचालक, चेअरमन हसन मुश्रीफ यांच्या खर्चाने परदेशवारीवर जाणार आहेत. मॉरिशस व दुबई दौऱ्याचा कार्यक्रम निश्चित झाला आहे असे सूत्रांनी सांगितले.

कोल्हापूर जिल्हा बँकेची सहकार कलम ‘८८’ नुसार चौकशी झाल्यानंतर बँकेवर प्रशासकांची नियुक्ती करण्यात आली होती. प्रशासकीय काळात कर्जवसुली मोहीम तीव्र करुनही बँकेच्या ताळेबंदामध्ये सुधारणा झालेली नव्हती. चौकशीचा ससेमिरा पूर्ण झाल्यानंतर पुन्हा बँकेची निवडणूक झाली. त्यानंतर संचालक मंडळ अस्तित्वात आले. बँकेने वसुली मोहीम तीव्र करत बँकेचा संचित तोटा भरुन काढला. सनई-चौघडा वाजवत कर्जवसुली केल्याने अनेक मोठ्या थकबाकीदारांनी ‘ओटीएस’मध्ये कर्जाची परतफेड केली. त्यामुळे धोक्यात आलेला बँकेचा परवाना सुरक्षित राहिला.

तसेच संचालक मंडळाने घेतलेल्या विविध कर्जयोजनांमुळे कर्जपुरवठाही चांगला झाला. कर्जवसुलीमुळे बँकेचा संचित तोटा कमी झाल्याने उत्साही झालेल्या चेअरमन मुश्रीफ यांनी, सर्व संचालकांना घेऊन परदेशगमनाचा बेत आखला आहे. जुलै महिन्याच्या अखेरीस हे सर्व संचालक मॉरिशस व दुबईसाठी रवाना होणार आहेत. मात्र, हा खर्च चेअरमन मुश्रीफ हे स्वतः करणार असल्याचे सांगण्यात आले.

मोबाइल अॅप डाउनलोड करा आणि राहा अपडेट

दंड चुकवण्यासाठी बोगस हेल्मेट

June 19, 2017, 2:30 pm

≫ Next: इचलकरंजीत फेरीवाल्यांचा मोर्चा

≪ Previous: केडीसीसी संचालकांची जुलै महिन्यात परदेशवारी

$

0

0

कोल्हापूर टाइम्स टीम

पोलिसांनी जिल्ह्यातील महामार्गावर दुचाकीस्वारांना हेल्मेट वापरण्याची सक्ती केली असून, जे दुचाकीस्वार हेल्मेटचा वापर करीत नाहीत, त्यांच्यावर दंडात्मक कारवाईही सुरू आहे. या कारवाईमुळे पाचशे रुपयांचा भुर्दंड सोसावा लागत असल्याने दुचाकीस्वारांनी स्वस्तातील आणि हलक्या प्रतीच्या हेल्मेट खरेदीस सुरुवात केली आहे. केवळ दिखाऊ हेल्मेटमुळे कारवाई टळते, मात्र जिवाचे रक्षण होते का? प्रश्न महत्त्वाचा असल्याने हेल्मेटच्या दर्जाचीही तपासणी होणे गरजेचे आहे.

दुचाकीस्वारांना दुचाकी चालवताना हेल्मेट वापरणे बंधनकारक आहे. मात्र बहुतांश दुचाकीस्वार याकडे दुर्लक्ष करतात. अपघातांमधील जखमी आणि बळींमध्येही विनाहेल्मेट दुचाकी चालवणाऱ्यांची संख्या लक्षणीय आहे. विशेषतः महामार्गांवर याचे प्रमाण जास्त असल्याने पोलिसांनी महामार्गांवर हेल्मेट सक्ती सुरू केली आहे. गेल्या दहा दिवसांत पोलिसांनी सुमारे १७०० हून अधिक दुचाकीस्वारांवर कारवाई करून ८ लाखांहून अधिक दंडाची रक्कम वसूल केली. विनाहेल्मेट प्रवास करणाऱ्या दुचाकीस्वारांना पाचशे रुपयांची दंड आकारणी केल्यामुळे महामार्गावर जाणाऱ्या वाहनधारकांमध्ये अस्वस्थता निर्माण झाली होती. काहींनी घरात धूळ खात पडलेले हेल्मेट काढून वापर सुरू केला, तर काही दुचाकीस्वारांनी तात्पुरते मित्रांकडून हेल्मेट मागून वेळ मारून नेली.

पोलिसांच्या हेल्मेट सक्तीचा हेल्मेट विक्रेत्यांकडून मात्र मोठा गैरफायदा घेतला जात आहे. शहरातील दुकानांमध्ये ब्रँडेड हेल्मेटच्या किमतीत वाढ झाली आहे, महामार्गासह शहरातही अनेक ठिकाणी स्वस्तातील हेल्मेटची विक्री सुरू झाली आहे. अवघ्या दोनशे ते तीनशे रुपयात फायबर आणि हेल्मेटची हलक्या दर्जाची हेल्मेट विकली जात आहेत. विशेष म्हणजे यावर आयएसआय मार्क असल्याचे सांगून हेल्मेट खपवण्याचे काम विक्रेते करतात. पाचशे रुपये दंडाची पावती करण्यापेक्षा दोनशे रुपयांचे हेल्मेट घेऊन हेल्मेट सक्तीतून पळवाट काढण्याचा फंडा दुचाकीस्वार वापरत आहेत. स्वस्तातील हेल्मेट विक्रीमुळे माहमार्गांवर दुचाकीस्वारांच्या डोक्यावरील हेल्मेटचा वापर नक्कीच वाढला आहे, पण दिखाऊ हेल्मेटमुळे सुरक्षेचा मूळ हेतू बाजूलाच पडला आहे. हेल्मेटची गुणवत्ता तपासण्याची यंत्रणा सध्या उपलब्ध नसल्याने बनावट हेल्मेट विक्री राजरोस सुरू आहे.

शहरातून बाहेर पडणाऱ्या मार्गांवरील सर्व नाके, महामार्गांवरील पेट्रोल पंपांसह काही मोक्याच्या ठिकाणी स्वस्तातील हेल्मेट विक्री जोरदार सुरू आहे. दुचाकीस्वार केवळ पैसे वाचवण्याच्या हेतूने आणि पोलिसांचा कारवाईचा ससेमिरा चुकवण्यासाठी बनावट हेल्मेटची खरेदी करीत आहेत. याचा फटका दुचाकीस्वारांनाच बसू शकतो.


मानसिकतेचा अभाव

६० ते ७० हजार रुपयांची दुचाकी खरेदी करताना मागेपुढे न पाहणारे वाहनधारक पेट्रोलसाठीही महिन्याला दोन ते अडीच हजार रुपयांचा खर्च करतात, मात्र आठशे ते हजार रुपयांचे दर्जेदार हेल्मेट खरेदी करताना हात आखडता घेतात. ही मानसिकता दुचाकीस्वारांना संकटात घेऊन जाणारी आहे. पोलिसांकडून होणारी सक्ती केवळ दंडवसुलीसाठी नाही, तर वाहनधारकांच्या सुरक्षेसाठीच आहे हे समजून घेण्याचा अभाव वाहनधारकांमध्ये असल्याचे दिसते.

मोबाइल अॅप डाउनलोड करा आणि राहा अपडेट

इचलकरंजीत फेरीवाल्यांचा मोर्चा

June 19, 2017, 2:30 pm

≫ Next: ‘आप’कार्यकर्त्यांना मारहाण

≪ Previous: दंड चुकवण्यासाठी बोगस हेल्मेट

$

0

0

इचलकरंजी

शहरातील जुन्या हॉकर्ससह आवश्यक नवीन हॉकर्स झोन निश्चित करण्याबरोबरच, दैनंदिन बाजार शुल्क वसुली खासगी ठेकेदारामार्फत करु नये यासह विविध मागण्यांसाठी कोल्हापूर जिल्हा छोटे व्यापारी फेरीवाले संघटनेच्यावतीने नगरपरिषदेवर मोर्चा काढण्यात आला. यावेळी विविध मागण्यांचे निवेदन नगराध्यक्षा अलका स्वामी यांना देऊन छोटे व्यावसायिक, फेरीवाल्यांच्या समस्या तातडीने दूर करण्याची विनंती करण्यात आली. दरम्यान, बाजार कर वसुलीतून जमा होणारी रक्कम नगरपरिषदेच्या स्वतंत्र खात्यात जमा करुन त्याचा वापर हा छोटे व्यावसायिक, फेरीवाले, विक्रेत्यांसाठी करावा अशी मागणीही करण्यात आली.

छोटे व्यावसायिक भाजीपाला, फळ विक्रेते, फेरीवाले आदींच्या अनेक समस्या प्रदीर्घ काळापासून प्रलंबित आहेत. या मागण्यांची नगरपरिषदेने दखल घेऊन त्याची पूर्तता करावी यासाठी कोल्हापूर जिल्हा छोटे व्यापारी फेरीवाले संघटनेच्यावतीने नगरपरिषदेवर मोर्चा काढण्यात आला.

फेरीवाल्यांना पंडीत दिनदयाळ उपाध्याय अंत्योदय कर्ज योजनेचे अर्ज नगरपरिषदेकडून उपलब्ध करुन मिळावे, बाजार शुल्क वसुलीतून जमा होणारी रक्कम नगरपरिषदेच्या स्वतंत्र बँक खात्यात जमा करुन त्यातून फेरीवाल्यांच्या समस्या मार्गी लावाव्यात, शहरातील १० हॉकर्स झोनचे काम अपूर्ण असून ते पूर्ण करण्यासह काही नवीन हॉकर्स झोनची आवश्यकता असल्याने त्याची त्वरीत अंमलबजावणी व्हावी, आदी मागण्यांचा समावेश होता. त्यानंतर फेरीवाला शिष्टमंडळ आणि नगराध्यक्षा स्वामी यांच्यात मागण्यांबाबत चर्चा झाली. त्यावेळी दैनंदिन बाजार शुल्क वसुलीचे काम खासगी ठेकेदारामार्फत करण्यात येणार असल्याने त्याच्याकडून प्रचलित दराऐवजी मनमानी पध्दतीने वसुली होण्याची शक्यता नाकारता येत नाही. त्यामुळे संबंधित ठेकेदारास दर निश्चित करुन देण्यात यावेत अशीही मागणी करण्यात आली.

चर्चेनंतर बोलताना नगराध्यक्षा स्वामी यांनी, हॉकर्स झोनमया अंमलबजावणीसह विविधन प्रश्नांबाबत नगरपरिषदेच्या सभेत निर्णय घेण्याची ग्वाही दिली. चर्चेत फेरीवाला संघटनेचे दिपक पाटील, शफिक बागवान, अमर भिसे आणि अतिरिक्त मुख्याधिकारी डॉ. पवन म्हेत्रे, नगरसेवक मनोज हिंगमिरे आदींसह नगरपरिषदेचे पदाधिकारी सहभागी झाले होते.

मोबाइल अॅप डाउनलोड करा आणि राहा अपडेट

‘आप’कार्यकर्त्यांना मारहाण

June 19, 2017, 2:30 pm

≫ Next: सभेआधीच होणार ‘निकाल’

≪ Previous: इचलकरंजीत फेरीवाल्यांचा मोर्चा

$

0

0

म. टा. प्रतिनिधी, कोल्हापूर

महापालिकेच्या हद्दीतून जाणारे राज्य व राष्ट्रीय महामार्ग ताब्यात घेऊ नयेत, अशा आशयाचे निवेदन देण्यासाठी आलेले आम आदमी पार्टीचे कार्यकर्ते व महापौर हसीना फरास यांचे पुत्र व माजी नगरसेवक आदिल फरास यांच्यात प्रचंड वादावादी झाली. आपच्या कार्यकर्त्यांनी नगरसेवकांवर खरमरीत टीका केल्यानंतर वादाचे पर्यवसाना मारहाणीत झाले. काँग्रेस, राष्ट्रवादीचे पदाधिकारी, गटनेते, नगरसेवक आणि आप कार्यकर्त्यांनी एकमेकांचा एकेरी उल्लेख केल्यामुळे अंगावर धावून जाण्याचा व धक्काबुक्कीचा प्रकार घडला. महापौर कार्यालयातील या गोंधळाचे मोबाइलवर चित्रीकरण करणाऱ्या आपचे कार्यकर्ते उत्तम पाटील, सद्दाम देसाई यांना मारहाण झाली. मोबाइलमधील फोटो व फुटेज डिलीट करण्याचा प्रकार घडला. मारामारीत सदस्यांचे नातेवाईक, माजी नगरसेवक व समर्थक पुढे होते. महापौर कार्यालयात पंधरा ते वीस मिनिटे हा गोंधळ आणि आरडाओरडीचा प्रकार सुरू होता.

निवेदन द्यायला गेलेल्या कार्यकर्त्यांना महापौर कार्यालयात मारहाण करण्याचा प्रकार महापालिकेच्या इतिहासात पहिल्यांदाच घडला. दरम्यान, आपच्या कार्यकर्त्यांनी जाणूनबुजून महापौर कार्यालयात हुज्जत घातली. त्यांना मूळ प्रश्नाची सोडवणूक करण्याऐवजी स्टंटबाजी करायची होता, असा आरोप सत्ताधारी गटाने केला. तर माजी नगरसेवक फरास यांच्या कार्यकर्त्यांकडून मारहाण झाली असून संबंधितावर रितसर गुन्हे दाखल करण्यात येणार असल्याचे ‘आप’च्यावतीने सायंकाळी स्पष्ट करण्यात आले आहे.

महापालिकेच्या मंगळवारी (ता.२०) होणाऱ्या सर्वसाधारण सभेत शहर हद्दीतील राज्य आणि राष्ट्रीय महामार्ग महापालिकेकडे हस्तांतरण करुन घेण्याचा सदस्य ठराव आहे. उपमहापौर अर्जुन माने यांनी ठराव मांडला असून काँग्रेसचे गटनेते शारंगधर देशमुख यांनी अनुमोदन दिले आहे. सुप्रीम कोर्टाच्या आदेशानुसार महामार्गापासून ५०० मीटर अंतरात असलेली शहरातील ८८ दुकाने बंद करण्यात आली आहेत. महापालिकेने महामार्ग आपल्याकडे हस्तांतरित करुन घ्यावेत यासाठी दारु व्यावसायिक आणि महापालिकेतील कारभारी नगरसेवक एकत्र आल्याची टीका होऊ लागली आहे.

सामाजिक स्वास्थ्याच्यादृष्टीने दारु दुकाने पुन्हा सुरु करणे घातक आहे. यामुळे महामार्ग महापालिकेने ताब्यात घेऊ नयेत, या मागणीसाठी सोमवारी आम आदमी पार्टीचे पंधरा ते सोळा कार्यकर्ते दुपारी महापौर फरास यांना निवेदन देण्यासाठी आले होते. यावेळी महापौर फरास कार्यालयात नव्हत्या. आदिल फरास हे महापौर कार्यालयात निवेदन स्वीकारण्यासाठी हजर होते. निवेदन स्वीकारण्यावरुन त्यांच्यात आणि ‘आप’ कार्यकर्त्यांत चकमक उडाली आणि गोंधळाला सुरुवात झाली.

मोबाइल अॅप डाउनलोड करा आणि राहा अपडेट

सभेआधीच होणार ‘निकाल’

June 19, 2017, 2:30 pm

≫ Next: जिल्हा बँक १२ टक्के दराने कर्जपुरवठा करणार

≪ Previous: ‘आप’कार्यकर्त्यांना मारहाण

$

0

0

म. टा. प्रतिनिधी, कोल्हापूर

महापालिकेतील कारभारी नगरसेवकांनी दारु व्यावसायिकांच्या फायद्यासाठी रस्ता हस्तांतरणाचा ठराव मंजूर होण्यासाठी पुढे सरसावले असताना विविध संघटना, पक्षांनी मात्र त्याला विरोध केला आहे. भारतीय जनता पक्ष-ताराराणी आघाडीने या ठरावाला विरोध करण्याचा निर्णय घेतला. ठराव मंजूर झाला तर त्या विरोधात राज्य सरकार व सुप्रीम कोर्टापर्यत जाऊन लढा देण्याचे यावेळी ठरले. तर याप्रश्नी रस्त्यावर उतरून आंदोलनासह कायदेशीर लढाईचा इशारा शिवसेनेने दिला. दरम्यान, काँग्रेस-राष्ट्रवादी आघाडीत ठरावावरून धुसफूस सुरू असल्याने सोमवारी आघाडीची बैठक झाली नाही. मंगळवारी सकाळी ही बैठक होईल.

दरम्यान, रस्ते हस्तांतरणाचा ठराव काहींनी प्रतिष्ठेचा केल्याने, उद्याच्या सभेत या ठरावावर मतदान होण्याची शक्यता आहे. याशिवाय, महापालिकेतील एका पदाधिकाऱ्याच्या नातेवाईकाने एका पक्षाच्या गटनेत्याला कल्पना न देता जागेचा झोन बदलाचा प्रस्ताव घुसडल्याची चर्चा महापालिकेत आहे. महापालिकेची सर्वसाधारण सभा मंगळवारी (ता.२०) होत आहे. ठराव मंजूर होण्यासाठी गेले तीन महिने पडद्याआड मोठ्या घडामोडी सुरु आहेत. ठराव मंजूर करण्यासाठी तब्बल सव्वादोन कोटी रुपयांचा व्यवहार ठरल्याची चर्चा आहे. ठराव मंजूर होण्यासाठी मोठ्या घडामोडी सुरू आहेत.

शिवसेनेचे निवेदन

रस्ते हस्तांतरणाचा सर्वसाधारण सभेसमोर असलेला ठराव नामंजूर करावा अशा मागणीचे निवेदन शिवसेना शहरप्रमुख शिवाजी जाधव, दुर्गेश लिंग्रस, सुजित चव्हाण, दत्ता टिपुगडे, राजू हुंबे, राजू ​जाधव, हर्षल सुर्वे, शशिकांत बिडकर, रणजित आयरेकर, अवधूत साळोखे यांनी अतिरिक्त आयुक्त श्रीधर पाटणकर यांना दिले. मात्र, महापालिकेच्या सत्तेत सहभागी असलेल्या शिवसेनेच्या चारही नगरसेकांपैकी कोणीच यावेळी उपस्थित नव्हते.

राष्ट्रवादी विद्यार्थी काँग्रेस

दरम्यान, राष्ट्रवादी विद्यार्थी काँग्रेसतर्फे महापालिका प्रशासनाला निवेदन सादर करत महामार्ग वर्ग करण्याचा ठराव नामंजूर करण्याबाबत निवेदन दिले. यामध्ये अवधूत अपराध, रविराज सोनुले, निखिल मुजुमदार,सचिन मुदगल, ऋषीकेश हुन्नुरे, सूरज पाटील आदींचा समावेश होता. मात्र राष्ट्रवादी काँग्रेस पक्ष महापालिकेत सत्तेवर असताना याच पक्षाच्या विद्यार्थी आघाडीने घेतलेली ही विरोधाची भूमिका आश्चर्यकारक असल्याची चर्चा सुरू होती.

पालकमंत्र्यांनी दिले विरोधाचे आदेश

भाजप, ताराराणी आघाडीच्या नगरसेवकांची सोमवारी महापालिकेत पार्टी मिटींग झाली. या बैठकीत रस्ता हस्तांतरणाच्या ठरावाला विरोध करण्याच्या निर्णय झाला. पालकमंत्री चंद्रकांत पाटील यांच्याशी सोमवारी सकाळी गटनेते विजय सूर्यवंशी, सत्यजित कदम, विरोधी पक्षनेते किरण शिराळे यांनी फोनवरुन चर्चा केली. यावेळी पालकमंत्र्यांनी ठरावाला विरोध करण्याचे सांगितल्याचे बैठकीत सांगण्यात आले. या ठरावावरुन सत्ताधारी मतदान झाले तर त्याला विरोध करण्यासाठी मंगळवारच्या सभेला प्रत्येक सदस्याने हजर राहावे म्हणून भाजप, ताराराणी आघाडीने सदस्यांनी व्हीप लागू केला आहे.

काँग्रेस, राष्ट्रवादीचा आज निर्णय

रस्ता हस्तांतरण ठरावाबाबतचा निर्णय घेण्यासाठी काँग्रेस, राष्ट्रवादी काँग्रेसच्या नगरसेवकांची मंगळवारी सकाळी बैठक होणार आहे. आघाडीचे नेते हसन मुश्रीफ, सतेज पाटील यांच्याशी चर्चा केली जाईल. पार्टी मिटींगमध्ये निर्णय होईल असे काँग्रेसचे शारंगधर देशमुख यांनी सांगितले. दारु दुकाने बंद झाल्यामुळे मद्यपी उघड्यावर मद्यपान करत आहेत त्याचा नागरिकांना त्रास होत असल्याचे उपमहापौर अर्जुन माने यांनी सांगितले. दरम्यान संपूर्ण जिल्ह्यात दारुबंदी झाली पाहिजे असे आमचे मत आहे. सध्या मात्र काही जण तुपाशी तर काही जण उपाशी असे चित्र असल्याचे यावेळी सांगण्यात आले.

महिला म्हणून संपूर्ण देशभरात दारुबंदी व्हावी अशी माझे मत आहे. मला अधिकार असते तर त्याची सगळीकडेच अंमलबजावणी केली असती. मंगळवारी काँग्रेस आघाडीची पार्टी मिटींग आहे. बैठकीत ठरावाबाबत निर्णय होईल. पार्टीचा निर्णय महत्वाचा आहे.

हसीना फरास, महापौर

मोबाइल अॅप डाउनलोड करा आणि राहा अपडेट

जिल्हा बँक १२ टक्के दराने कर्जपुरवठा करणार

June 19, 2017, 2:30 pm

≫ Next: कळंबा कारागृहात विपश्यना केंद्र

≪ Previous: सभेआधीच होणार ‘निकाल’

$

0

0

म. टा. प्रतिनिधी, कोल्हापूर

राज्य सरकारच्या तत्वत: कर्जमाफीचे निकष ठरून शेतकऱ्यांना कर्जमाफी मिळण्यास वेळ लागणार असल्याने खरीप हंगामासाठी मार्च २०१६ पर्यंतच्या थकीत पीककर्ज असलेल्या शेतकऱ्यांना राज्य सरकारच्या परिपत्रकातील निकाषांनुसार दहा हजार रुपये पीककर्ज देण्याचा निर्णय कोल्हापूर जिल्हा मध्यवर्ती सहकारी बँकेच्या संचालक मंडळाच्या बैठकीत घेण्यात आला. बँकेचे चेअरमन व आमदार हसन मुश्रीफ यांनी सोमवारी पत्रकार परिषदेत ही माहिती दिली. मात्र हा कर्जपुरवठा १२ टक्के दराने करण्यात येईल. कर्जपुरवठा करताना येणाऱ्या अडचणींची माहिती राज्य सरकारला देणार असल्याचेही मुश्रीफ म्हणाले.

चेअरमन मुश्रीफ म्हणाले, ‘नोव्हेंबरमध्ये केंद्र सरकारने घेतलेल्या नोटाबंदी निर्णयानंतर जिल्हा बँकेत २७८ कोटी ७९ लाख रुपये पडून आहेत. त्यामुळे बँकेला दररोज १५ लाख रुपयांच्या व्याजाचा भुर्दंड सहन करावा लागत आहे. भारतीय रिझर्व्ह बँक आणि नाबार्डचे थकबाकीदारांना कर्जपुरवठा करण्यास बंदी केल्याने थकीत कर्जदारांना कर्जपुरवठा करणे अवघड आहे. तरीही सरकार थकहमी देत असल्याने प्रतिज्ञापत्र घेऊन १२ टक्के व्याजदराने खरीप हंगामासाठी दहा हजार रुपये कर्ज देण्यात येणार आहे. त्याबाबतचे आदेश तत्काळ सेवा सोसायट्यांना काढण्यात आले आहेत.’

चेअरमन मुश्रीफ म्हणाले, ‘कर्जमाफी जाहीर करताना आयकर रिटर्न, इन्कमटॅक्स, चारचाकी वाहन, कुटुंबातील एक व्यक्ती नोकरी असल्यास असे अनेक गंमतीशीर निकष लावले आहेत. या निकषांमध्ये बदल न केल्यास फार मोठी कर्जमाफी होणार नाही याबाबत खासदार राजू शेट्टी यांच्याही चर्चा केली आहे. प्रतिज्ञापत्र घेऊन कर्जपुरवठा करताना त्याचा तपास बँकेने कसा करायचा का? सरकारने सहकार कलम ७९ ‘अ’ची भीती घातली आहे. पण अशा कलमांना आम्ही भीत नाही. ठेवीदारांचे नियंत्रण आरबीआय करत असते, त्यामुळे सरकार असे निर्देश देऊ शकत नाही. खरीप हंगामासाठी कर्जपुरवठा करण्यास बँकेकडे निधी आहे. निधी कमी पडल्यास राज्य बँकेने निधी देण्यास तयार आहे’ असे मुश्रीफ म्हणाले.

चुकीचा संदेश जाऊ नये म्हणून?

कर्जमाफीचा निर्णय घेतल्यानंतर पालकमंत्री पाटील यांनी पत्राद्वारे आणि फोनद्वारे खरीप हंगामासाठी दहा हजार रुपयांचे अर्थसाह्य थकीत कर्जदारांना द्यावे अशी मागणी केली होती. कर्जमाफीच्या उच्चाधिकार समितीचे अध्यक्ष पालकमंत्री पाटील असल्याने आणि केडीसीसीने जर कर्जपुरवठा न केल्यास राज्यात चुकीचा संदेश जाईल त्यामुळे केडीसीसीने कर्जपुरवठा करावा अशी आमदार हाळवणकर यांनी मागणी केली होती. त्यानुसार राज्यात चुकीचा संदेश जाऊ नये, यासाठी थकीत कर्जदारांना कर्जपुरवठा करणार असल्याचे मुश्रीफ सांगितले.


संचालक मंडळाच्या बैठकीतील ठराव

- नोटाबंदी काळात जमा झालेली रक्कम आरबीआयने स्वीकारावी
- पीककर्ज वसुलीस सप्टेंबर २०१७ पर्यंत मुदतवाढ द्यावी
- सरकारने खरीप हंगामासाठी निधी उपलब्ध करावा
- थकबाकीदारांना कर्जपुरवठ्यास नाबार्ड व आरबीआयची संमंती मिळवून द्यावी

मोबाइल अॅप डाउनलोड करा आणि राहा अपडेट

कळंबा कारागृहात विपश्यना केंद्र

June 19, 2017, 2:30 pm

≫ Next: समीर गायकवाडची कारागृहातून सुटका

≪ Previous: जिल्हा बँक १२ टक्के दराने कर्जपुरवठा करणार

$

0

0

कोल्हापूर टाइम्स टीम

कैद्यांमध्ये अंतर्बाह्य बदल घडावा यासाठी कळंबा कारागृहात विपश्यना केंद्र सुरू होत आहे. विपश्यना केंद्रासाठी कारागृहात स्वतंत्र कक्ष तयार केला असून, याचे काम अंतिम टप्प्यात आहे. दर महिन्याला प्रत्येकी दहा दिवासांची दोन शिबिरे आयोजित केली जाणार आहेत. यातून कैद्यांच्या मनात सकारात्मकता वाढवून त्यांना गुन्हेगारी कृत्यांपासून परावृत्त केले जाणार आहे.

कळत नकळत हातून घडलेल्या गुन्ह्यांची शिक्षा भोगताना गुन्हेगार म्हणून नावावर पडलेला शिक्का पुसणे सोपे काम नाही. कैद्यांनी स्वतःहून तसा प्रयत्न केला तरी समाज त्यांना सतत त्यांच्या चुकीची जाणीव करून देतो. यातून कैद्यांची मानसिकता बिघडते. शिक्षा भोगून बाहेर पडल्यानंतर समाजाशी पुन्हा एकरूप होण्यात कैद्यांना अडचणी येतात. जे कैदी मानसिकदृष्ट्या सक्षम असतात तेच पुन्हा नव्याने जगणे सुरू करतात, मात्र अनेक कैदी नकारात्मक मानसिकतेमुळे पुन्हा गुन्हेगारी कृत्यांकडे वळतात किंवा व्यसनांच्या आहारी जातात. या कैद्यांमध्ये शिक्षेनंतर स्वतःच्या पायावर उभे राहण्याची हिम्मत निर्माण व्हावी यासाठी कळंबा कारागृहात विपश्यना केंद्र सुरू होत आहे. अधीक्षक शरद शेळके यांची ही कल्पना असून, त्यांनी वरिष्ठ कार्यालयाकडे पाठवलेल्या प्रस्तावाला तातडीने मंजुरीही मिळाली.

विपश्यना केंद्रासाठी कारागृहात स्वतंत्र कक्ष बनवला आहे. एका वेळी ५० कैद्यांना या केंद्रात विपश्यना करता येणार आहे. कैद्यांसाठी १० दिवसांच्या एका शिबिराचे नियोजन केले आहे. शिबिरासाठी निवडलेल्या कैद्यांना विपश्यना केंदातच राहावे लागणार आहे. यासाठी झोपण्याचाही स्वतंत्र कक्ष बनवला आहे. विपश्यना काळात सहभागी कैद्यांचा कारागृहातील इतर कोणत्याही घडामोडींशी संबंध येणार नाही. चिंतन, प्रवचने, योगा, आदींचे प्रशिक्षण देण्यासाठी ५ ते ६ तज्ज्ञ मार्गदर्शकांची टीमही कारागृहात राहणार आहे. या केंद्रासाठी आवश्यक असणाऱ्या स्क्रीन, स्पीकर्स, फलक लावण्याचे काम अंतिम टप्प्यात आहे. जुलै महिन्यात पहिले विपश्यना शिबिर सुरू होणार आहे.

जन्मठेपेतील कैद्यांना प्राधान्य

जन्मठेपेतील कैदी जास्त काळ कारागृहात असतात. नातेवाईकांपासून दुरावल्यामुळे या कैद्यांचे मानसिक खच्चीकरण होते. शिक्षा भोगून बाहेर गेल्यानंतर नवीन काही करावे इतकी उर्जा यांच्यात उरत नाही. जगण्याची उमेद हरलेल्या या कैद्यांमध्ये सकारात्मक ऊर्जा निर्माण व्हावी यासाठी जन्मठेपेतील कैद्यांना विपश्यना वर्गासाठी प्राधान्य दिले जाणार आहे. यानंतर उर्वरित कैद्यांचीही निवड विपश्यनेसाठी केली जाईल. सुरुवातीला बाहेरच्या तज्ज्ञांकडून मार्गदर्शन घेतले जाईल. नंतर कारागृहातील कैद्यांनाही मार्गदर्शन देऊन सर्वच बराकींमध्ये विपश्यनेचा उपक्रम सुरू केला जाणार आहे.


कारागृहातील कैदी

क्षमता – १७५५

एकूण कैदी – १७२३

पुरुष कैदी – १६६७

महिला कैदी – ५६



विपश्यना आणि योगा केल्याने मानसिकतेत सुधारणा होते. याच माध्यमातून कैद्यांच्या जीवनात सुधारणा करण्याचा प्रयत्न केला जाणार आहे. कळंबा कारागृहातील विपश्यना केंद्राचे काम अंतिम टप्प्यात असून, लवकरच याची सुरुवात होईल.

शरद शेळके, कारागृह अधीक्षक

मोबाइल अॅप डाउनलोड करा आणि राहा अपडेट

---

समीर गायकवाडची कारागृहातून सुटका

June 19, 2017, 2:30 pm

≫ Next: पन्हाळा-पावनखिंड मोहीम आठ जुलैला

≪ Previous: कळंबा कारागृहात विपश्यना केंद्र

$

0

0

म. टा. प्रतिनिधी, कोल्हापूर

कॉम्रेड गोविंद पानसरे यांच्या हत्येतील संशयित आरोपी समीर विष्णू गायकवाड (वय ३२, रा. सांगली) याची अखेर २१ महिन्यांनंतर कळंबा कारागृहातून जामिनावर सुटका झाली. शनिवारी न्यायाधीश एल. डी. बिले यांनी समीरला सशर्त जामीन मंजूर केल्यानंतर कागदपत्रांची पूर्तता न झाल्याने त्याचा कारागृहातील मुक्काम वाढला होता. जामीनदारांसह जातमुचलक्याची पूर्तता केल्यानंतर सोमवारी संध्याकाळी सव्वापाचच्या सुमारास समीरची सुटका झाली.

कॉम्रेड पानसरे यांच्या हत्येप्रकरणी पोलिसांनी संशयित गायकवाड याला १६ फेब्रुवारी २०१५ मध्ये सांगलीतून अटक केली होती. २१ महिने समीर कळंबा कारागृहात होता. दरम्यान जिल्हा न्यायालयात दोन वेळा, तर हायकोर्टात एकदा दाखल केलेला जामीन अर्ज फेटाळण्यात आला होता. यानंतर समीरचे वकील समीर पटवर्धन यांनी पुन्हा समीरच्या जामिनासाठी जिल्हा न्यायालयात अर्ज दाखल केला होता. दोन्ही बाजूचा युक्तिवाद झाल्यानंतर शनिवारी न्यायाधीश बिले यांनी समीरला सशर्त जामीन मंजूर केला. शनिवारीच समीरच्या सुटकेसाठी सनातन संस्थेच्या कार्यकर्त्यांनी प्रयत्न केले. मात्र जामीनदारांची पूर्तता वेळेत न झाल्याने समीरचा कारागृहातील मुक्काम वाढला होता. सोमवारी सकाळी पांडुरंग एडके (वय ४४, रा. वासुंबे, ता. तासगाव, जि. सांगली) आणि जगन्नाथ धोंडीराम पाटील (५८, रा. निमणी, ता. तासगाव, जि. सांगली) या जामीनदारांनी प्रक्रिया पूर्ण केली.

संध्याकाळी पाचच्या सुमारास अॅड. पटवर्धन यांच्यासह समीरच्या नातेवाईकांनी कारागृहात जाऊन कागदपत्रांची पूर्तता केल्यानंतर सव्वापाचच्या सुमारास समीर कारागृहातून बाहेर पडला. समीरने यावेळी माध्यमांना सामोरे जाण्याचे टाळले. लवकरच माध्यमांसमोर तो बोलणार असून, देवाच्या कृपेने सुटका झाल्याची प्रतिक्रिया त्याच्या वतीने अॅड. वीरेंद्र इचलकरंजीकर यांनी दिली.

मोबाइल अॅप डाउनलोड करा आणि राहा अपडेट

पन्हाळा-पावनखिंड मोहीम आठ जुलैला

June 19, 2017, 2:30 pm

≫ Next: ‘हमीदवाडा’ अखेर बिनविरोध

≪ Previous: समीर गायकवाडची कारागृहातून सुटका

$

0

0

कोल्हापूर टाइम्स टीम

ऐतिहासिक पन्हाळा-पावनखिंडीच्या मार्गावर दरवर्षी आयोजित करण्यात येणारी पदभ्रमंती मोहीम यंदा आठ व नऊ आणि २२ व २३ जुलैला आयोजित केल्याची माहिती हिल रायडर्सच ग्रुपचे अध्यक्ष प्रमोद पाटील यांनी दिली. पदभ्रमंतीच्या माध्यमातून इतिहासातील आठवणींना उजाळा देण्यात येणार आहे.

पाटील म्हणाले की, सिद्धी जोहरच्या वेढ्यातून सुटका करुन घेत छत्रपती शिवरायांनी विशाळगडाकडे पावनखिंडमार्गे मार्गक्रमण केले. ३५७ वर्षापूर्वी घडलेलली घटना आजही अंगावर शहारे आणते. पावनखिंडीत घडलेल्या या रणसंग्रमाची माहिती मिळण्यासाठी दरवर्षी दोन टप्प्यात पदभ्रमंती मोहीम हाती घेतली जाते. यावर्षी पहिल्या मोहिमेला शनिवारी (ता. ८ जुलै) सुरु होणार आहे. दोन दिवसांत सुमारे ४० किमीचा प्रवास करत रविवारी दुपारी पांढरेपाणीमार्गे पावनखिंड येथे पोहोचणार आहे. शनिवारी सकाळी आठ वाजता नरवीर शिवा काशीद यांच्या पुतळ्याला वंदन करुन मोहिमेला सुरुवात होणार आहे. नोंदणी सशुल्क असून सहभागींना अल्पोपहार, जेवण व निवासाची सुविधा देण्यात येणार आहे.

नोंदणीसाठी संपर्काची ठिकाणे

शिवस्वरुप स्टेशनरी, खरी कॉर्नर, स्टुडिओ एक्स्पोज, राजारामपुरी ९ वी गल्ली, समीट अॅडव्हेंचर्स, पर्ल हॉटेल शेजारी, साई समर्थ सेल्स, कोळेकर तिकटी, सुपर सॉनिक नेट, शिवाजी विद्यापीठ रोड, समर्थ नेट कॅफे, मुक्त सैनिक वसाहत.

मोबाइल अॅप डाउनलोड करा आणि राहा अपडेट

‘हमीदवाडा’ अखेर बिनविरोध

June 19, 2017, 2:30 pm

≫ Next: मोपेडच्या डिकीतून दागिन्यांची पर्स लंपास

≪ Previous: पन्हाळा-पावनखिंड मोहीम आठ जुलैला

$

0

0

कागल

हमीदवाडा (ता.कागल) येथील सदाशिवराव मंडलिक साखर कारखान्याच्या निवडणुकीत २१ जागांसाठी आता केवळ २२ अर्ज शिल्लक राहीले आहेत. त्यातील सेनापती कापशी येथील प्रदीप चव्हाण हे आजारी असल्याने अर्ज माघारी घेवू शकले नाहीत. ते मंगळवारी (ता. २०) माघार घेण्याची शक्यता आहे. त्यामुळे २१ जणांचे संचालक मंडळ आता निश्चित झाले असून आता केवळ घोषणेची औपचारिकता राहीली आहे. नवीन संचालक मंडळात तब्बल १० नव्या चेहऱ्यांना संधी मिळाली आहे. संचालक मंडळ निवडताना कारखान्याचा कारभार आणि गटाची बांधणी या बाबी डोळ्यासमोर ठेवण्यात आल्या आहेत.

साखर काखान्यात यावेळी काही विद्यमान संचालकांबाबत नाराजी होती, तर दुसऱ्या बाजूला इच्छुकांची संख्याही मोठी होती. त्यामुळे दिवंगत माजी खासदार सदाशिवराव मंडलिक यांच्या पश्चात होणाऱ्या या पहिल्याच निवडणुकीत प्रा. मंडलिक कुणाच्या गळ्यात संचालकपदाची माळ घालणार, याकडे सर्वांचे लक्ष लागले होते. त्यानुसार प्रा.संजय मंडलिक, वीरेंद्र मंडलिक, बंडोपंत चौगुले (म्हाकवे), बापूसो भोसले पाटील (बस्तवडे), शिवाजीराव इंगळे (शेंडूर), शहाजी पाटील (सिध्दनेर्ली), आप्पासाहेब तांबेकर (मांगनूर), शहाजी यादव (लिंगनूर),जयसिंग गिरीबुवा (करंजिवणे), शंकर व्यंकू पाटील (मौजे सांगाव), आनंदा मोरे (हमीदवाडा) अशा विद्यमान संचालकांना पुन्हा संधी देण्यात आली आहे. तर नवीन चेहऱ्यांमध्ये दत्ता चौगुले (तमनाकवाडा), दत्तात्रय सोनाळकर (भडगाव), मसू पाटील (उंदरवाडी), धनाजी बाचणकर (साके), नंदिनीदेवी बाळासो चौगुले (खडकेवाडा), राजश्री बाळासो चौगुले (आणूर), कैलास जाधव (कसबा सांगाव), ईगल प्रभावळकर (कागल), दिनकर बाळा पाटील ( कौलगे), मारुती काळुगडे (बेनिक्रे) यांचा समावेश आहे.

संचालक निवडताना ५० टक्क्यांच्या वर जुन्या चेहऱ्यांना संधी देण्यात आली आहे. यापूर्वी संचालकांची संख्या २३ होती. परंतु आता नवीन नियमानुसार आर्थिकदृष्ट्या दुर्बल गट आणि एक महिला सदस्य कमी करण्यात आला आहे. कागलच्या चंद्रकांत गवळी यांना नगरपालिकेत केलेली बंडखोरी त्यांच्या अंगलट आली. तर बाबगोंडा पाटील अगोदरच नाराज होवून बाजूला गेले आहेत. त्यामुळे ईगल प्रभावळकर यांच्या आजवरच्या निष्ठेचे त्यांना चांगले फळ मिळाले. तर म्हाकवे येथील बंडोपंत चौगुले आणि राजश्री चौगुले (आणूर) या पै पाहुण्यांमध्ये संचालकपद अवघ्या तीन किलोमीटवर मिळाले. स्वत: मंडलिक यांच्या घरातील पिता पुत्र संचालक झाले आहेत. तर शेंडूरमध्ये शिवाजीराव इंगळे यांना संचालक पद मिळाले असले तरी त्यांचे सुपुत्र भाजपचे कट्टर कार्यकर्ते आहेत.

मोबाइल अॅप डाउनलोड करा आणि राहा अपडेट

मोपेडच्या डिकीतून दागिन्यांची पर्स लंपास

June 19, 2017, 2:30 pm

≫ Next: विद्यार्थी वाहतुकीचा धोकादायक खेळ

≪ Previous: ‘हमीदवाडा’ अखेर बिनविरोध

$

0

0

म. टा. प्रतिनिधी, कोल्हापूर

रंकाळा चौपाटी येथे मोपेडच्या डिकीतून अज्ञात चोरट्याने पर्स लांबवली. रविवारी (ता. १८) रात्री आठच्या सुमारास ही घटना घडली. या घटनेत सोन्याच्या दागिन्यांसह मोबाइल आणि रोख रकम असा सुमारे ४८ हजार रुपयांचा किमती ऐवज लंपास झाला आहे. प्रियांका मोहन शिंदे (वय २९, मूळ रा. वर्षानगर, सध्या रा. अंधेरी इस्ट, पूनमनगर, मुंबई) यांनी याबाबत जुना राजवाडा पोलिस ठाण्यात फिर्याद दाखल केली.

याबाबत जुना राजवाडा पोलिसांकडून मिळालेल्या माहितीनुसार प्रियांका शिंदे या ज्वेलरी डिझायनर आहेत. सम्राटनगरातील वर्षानगरमध्ये त्यांचे घर आहे. सध्या त्या मुंबईतील अंधेरी इस्ट येथे राहतात. रविवारी रात्री त्या काही कामानिमित्त रंकाळा चौपाटी येथे गेल्या होत्या. त्यांनी मोपेड (एमएच०९ टीसी २४२) ही चौपाटीवर पार्क केली होती. काही वेळाने त्या मोपेडजवळ आल्या असता, त्यांना डिकीचे लॉक काढलेले दिसले.

डिकीतील पर्स नसल्याचे निदर्शनास येताच त्यांनी आसपास शोध घेतला. मात्र पर्स सापडली नाही. पर्समध्ये २ तोळ्यांचे मंगळसूत्र, ५ ग्रॅम वजनाची अंगठी, मोबाइल, रोख ५०० रुपये असा सुमारे ४८ हजार रुपयांचा ऐवज होता. शिंदे यांनी याबाबत जुना राजवाडा पोलिस ठाण्यात फिर्याद दाखल केली आहे. डिकी फोडून किंमती ऐवज लंपास करण्याची आठवड्यात ही दुसरी घटना घडल्याने नागरिकांमध्ये भीतीचे वातावरण निर्माण झाले आहे.

मोबाइल अॅप डाउनलोड करा आणि राहा अपडेट

विद्यार्थी वाहतुकीचा धोकादायक खेळ

June 19, 2017, 2:30 pm

≫ Next: जयसिंगपुरात झोपड्या हटविल्या

≪ Previous: मोपेडच्या डिकीतून दागिन्यांची पर्स लंपास

$

0

0

कोल्हापूर टाइम्स टीम

धोकादायक विद्यार्थी वाहतूक करणाऱ्या वाहनचालकांवर कारवाई करण्याच्या वल्गना प्रादेशिक परिवहन विभागाकडून दरवर्षी केल्या जातात. अनेकदा इशारेही दिले जातात. मात्र अशी वाहतूक करणाऱ्यांवर कारवाई करण्यात मात्र हात आखडताच घेतल्याचे चित्र शहरात दिसते. फिटनेस सर्टिफिकेट्‍स नसलेल्या स्कूल बसेस आणि एकाच रिक्षात दहा ते पंधरा विद्यार्थ्यांची धोकादायक वाहतूक आजही शहरात बिनबोभाट सुरू असल्याचे दिसते. प्रादेशिक परिवहन विभागाने कारवाईबाबत मात्र डोळ्यावर पट्टी ओढली आहे. त्यातच या रिक्षा थेट रस्त्यांवरच उभ्या असतात. त्यामुळे वाहतूक कोंडीचा प्रश्न गंभीर बनला आहे.

कोल्हापूर शहरातील अनेक शाळांमध्ये रिक्षाने विद्यार्थी वाहतूक होते. इंग्रजी माध्यमांच्या शाळांमध्ये स्कूल बस व व्हॅनची सुविधा पुरवली जात असली तरी काही शाळांत रिक्षाने विद्यार्थी वाहतूक केली जाते. रिक्षातून विद्यार्थ्यांच्या वाहतुकीला बंदी होती. पण, २०१२ पासून रिक्षातून विद्यार्थी वाहतुकीला परवानगी मिळाली आहे. एका रिक्षातून १२ वर्षाखालील पाच विद्यार्थी वाहतूक करायला परवानगी असली तरी दहा ते पंधरा मुले कोंबली जातात. तीन टप्प्यात विद्यार्थी बसण्याची सोय रिक्षामध्ये केली जाते. लहान मुले तक्रार करत नाहीत. शिवाय नोकरदार पालकांना मुलांना शाळेत सोडायला आणि आणायला वेळ नसतो. त्यामुळे अशी वाहतूक करणाऱ्यांविरोधात मुलांना त्रास होत असला तरी पालक गप्प बसणे पसंत करतात. सहा सिटर रिक्षात तर २० ते २५ मुले कोंबली जातात.

विद्यार्थी वाहतूक करणाऱ्या रिक्षांची आरटीओ विभागाकडून तपासणी केली जात नाही. विद्यार्थी वाहतूक करणाऱ्या रिक्षा भक्कम असाव्यात, अशी आरटीओची अट आहे. तसेच रिक्षाच्या दोन्ही बाजूचे दरवाजे बळकट असले पाहिजेत. पण, रिक्षा भक्कम आहे की नाही याची तपासणी केली जात नाही. तसेच विद्यार्थी वाहतूक करणाऱ्या बहुतांशी रिक्षा गॅस कीटच्या आहेत. या गॅस कीटमध्ये स्वयंपाकाचा गॅस वापरला जातो. अनेक रिक्षांमध्ये छोटी अनधिकृत सिलिंडर वापरली जातात. २०१२ मध्ये गॅस कीट असलेली रिक्षा पेटल्यानंतर विदार्थी रिक्षा वाहतूक सुरक्षेचा प्रश्न निर्माण झाला होता. पण ‘रात गयी, बात गयी’ या उक्तीनुसार रिक्षा वाहतुकीकडे आरटीओ कानाडोळा केला जातो.

विद्यार्थी वाहतूक करणाऱ्या रिक्षांना शाळा प्रशासन मैदानात पार्किंग करायला मज्जाव करतात. त्यामुळे रस्त्यावरच विद्यार्थ्यांना सोडून रिक्षा लावल्या जातात. त्यामुळे वाहतुकीची प्रचंड कोंडी होते. दरवर्षी शाळा प्रशासन व शहर वाहतूक नियंत्रण शाखा यांच्यात विद्यार्थी वाहतुकीसंदर्भात बैठक होते. पण, वाहतुकीबाबतच्या सूचनांना शाळा केराच्या टोपल्या दाखवतात. विशेष पोलिस महानिरीक्षकांच्या कार्यालयासमोर इंग्रजी माध्यमाची शाळा विद्यार्थी वाहतूक करणाऱ्या रिक्षांना शाळांच्या कॅम्पसमध्ये प्रवेश देत नाही. शहरातील अनेक मराठी माध्यमांच्या शाळांचा कॅम्पसही मोठा आहे. मात्र त्‍याही रिक्षांना प्रवेश देत नाहीत. शहर वाहतूक नियंत्रण शाखा महिन्याला १०० रुपयांची दंडात्मक पावती करुन धोकादायक विद्यार्थी वाहतुकीला रान मोकळेच सोडते, असे चित्र आहे.

७०२ बसेसपैकी ४५० बसेसची तपासणी

जिल्ह्यात विद्यार्थी वाहतूक करणाऱ्या ७०२ बसेस आणि व्हॅन्स आहेत. या वाहनांना दरवर्षी आरटीओकडून फिटनेस सर्टिफिकेट घ्यावे लागते. मे महिन्यात आरटीओने फ्री फिटनेस चेकअपचे आयोजन केले होते. त्यात १०६ बसेसची तपासणी झाली होती. १५ जूनअखेर ४५० बसेसना फिटनेस प्रमाणपत्र दिले आहे. ज्या बसेस फिटनेसमध्ये अपात्र ठरल्या आहेत त्यांना आरटीओने नोटिसा पाठवल्या आहेत. फिटनेस नसलेल्या बसेसवर कारवाई करण्याची मागणी केली जात आहे.

कोट०००००

विद्यार्थी वाहतुकीमध्ये विद्यार्थ्यांची सुरक्षितता महत्त्वाची आहे. धोकादायक विद्यार्थी वाहतूक करणाऱ्या वाहनांवर कारवाई करण्याचा अधिकार आरटीओ व वाहतूक पोलिसांना आहे. अशा वाहनांवर दंडात्मक कारवाई केली जात आहे. विद्यार्थ्यांच्या सुरक्षेला सर्वोच्च प्राधान्य असेल.

स्टीव्हन अल्वारिस, उप प्रादेशिक परिवहन अधिकारी

धोकादायक वाहतूक असणारे शाळांचे परिसर

होली क्रॉस, सेंट झेवियर्स, प्रायव्हेट हायस्कूल, चंदूलाल गोडीदास शहा विद्या मंदिर, शेलाजी वन्नाजी संघवी विद्यालय, म.ल.ग. हायस्कूल, इंदुमती गर्ल्स हायस्कूल, न्यू मॉडेल, स.म.लोहिया हायस्कूल, रा. ना. सामाणी विद्यालय, प्रिन्सेस पद्माराजे गर्ल्स हायस्कूल, विमला गोयंका इंग्लीश स्कूल, महाराष्ट्र हायस्कूल, आदर्श विद्यालय, वसंतराव देशमुख विद्यालय, महावीर इंग्लिश स्कूल

मोबाइल अॅप डाउनलोड करा आणि राहा अपडेट