कोल्हापूरकरांसाठी बहुप्रतिक्षित असलेल्या कोल्हापूर-वैभववाडी रेल्वे मार्गाचे भूमिपूजन रविवारी (ता. ११ जून) होणार असल्याचे विश्वसनीय सूत्रांनी सांगितले. मात्र, कार्यक्रमाला रेल्वेमंत्री सुरेश प्रभू उपस्थित राहणार नसल्याचे सांगण्यात येते. कऱ्हाड रेल्वे स्थानकावर आयोजित एका कार्यक्रमात विविध प्रकल्पांचे उदघाटन करण्यात येणार आहे. त्यात व्हिडिओ लिंकद्वारे कोल्हापूर-वैभववाडी रेल्वे प्रकल्पाचे भूमिपूजनही करण्यात येईल अशी माहिती रेल्वेतील सूत्रांनी दिली. मात्र, याला अधिकृत दुजोरा मिळालेला नाही.
कोल्हापूर आणि पश्चिम महाराष्ट्राशी निगडीत रेल्वेच्या अनेक विकासप्रकल्पांची घोषणा रेल्वेमंत्री सुरेश प्रभू यांनी केली आहे. त्यात कोल्हापूर-वैभववाडी रेल्वे मार्ग, हातकणंगले-इचलकरंजी तसेच फलटण-पंढरपूर मार्गांचा समावेश आहे. यातील कोल्हापूर-वैभववाडी या १०७ किलोमीटर मार्गाला अंतिम मंजुरी मिळाली आहे. रेल्वेमंत्रालयाने या प्रकल्पासह राज्यातील विविध प्रकल्पांसाठी दहा हजार कोटी रुपयांची तरतूदही केली आहे. कामसाठी जॉईंट व्हेंचर कंपनीची स्थापना करण्यात आली आहे. त्यामुळे आता केवळ भूमिपूजन करून कामाला सुरुवात करण्याची औपचारिकता राहिली आहे. येत्या रविवारी ही औपचारिकता पूर्ण होऊन काम सुरू होईल, अशी अपेक्षा व्यक्त होत आहे.
पॉवर ग्रीडशी अंतिम करार
रविवारी कोल्हापूर-वैभवाडी बरोबरच पुणे-मिरज-कोल्हापूर मार्गाच्या विद्युतीकरणासाठी पॉवर ग्रीड कार्पोरेशनसोबत अंतिम करार करण्यात येणार आहे. त्यामुळे या मार्गाच्या विद्युतीकरणाच्या कामासही थेट प्रारंभ होणार असल्याचे समजते. या कार्यक्रमांबरोबरच कोल्हापूर जिल्ह्यातील हातकणंगले-इचलकरंजी आणि फलटण-सातारा या मार्गांसाठीची फाइलन लोकेशन पाहणी होणार असल्याची माहिती आहे, हा संपूर्ण कार्यक्रम अजूनही रेल्वेकडून अधिकृतरित्या जाहीर करण्यात आलेला नाही.
मोबाइल अॅप डाउनलोड करा आणि राहा अपडेट
