एक जूनपासून सुरू झालेल्या शेतकरी संपाची धग बुधवारी सातव्या दिवसीही कायम राहिली. विदर्भ, मराठवाड्यापाठोपाठ पश्चिम महाराष्ट्रातही याची तीव्रता वाढत आहे. शेतीप्रधान व सधन अशा कोल्हापूर जिल्ह्यातही ही संपाची व्याप्ती वाढत आहे. बुधवारी पश्चिम करवीरमधील कुडित्रे पाठोपाठ खुपिरे, साबळेवाडी, शिंदेवाडी या गावांनी गावातील सर्व व्यवहार बंद ठेवून कडकडीत बंद पाळला.
संपाच्या पहिल्या दिवसापासून थोड्याफार प्रमाणात सहभागी झालेला शेतकरी बुधवारी पूर्ण ताकदीने संपात सहभागी झाला. सुरूवातीच्या दिवसात फक्त दुध संकलन बंद ठेवून या परिसरातील शेतकरी संपात सहभागी होते.पाच जुनच्या महाराष्ट्र बंद नंतर बुधवारी तीच लाट कायम दिसली. मंगळवारी या परिसरामध्ये ग्रामपंचायतीने दवंडी देवून संपात सहभागी होण्यासाठी बंद पाळण्याचे आवाहन केले. त्याला प्रतिसाद देत सकाळपासून ग्रामस्थांनी उत्स्फूर्तपणे सर्व व्यवहार बंद ठेवले. या परिसरात जवळपास दैनंदिन १० हजार लिटर दुध संकलन होते. पण बंदच्या पार्श्वभूमीवर सर्व दुध संस्थांनी संकलन पूर्णपणे बंद ठेवले. गावातून कोणत्याही प्रकारचा शेतीमाल बुधवारी शहराकडे गेला नाही. गावातील सर्व दुकाने, सहकारी संस्था, बॅंका व अन्य सरकारी कार्यालये बंद ठेवण्यात आली. .
सकाळी ग्रामस्थांनी ग्रामपंचायतजवळ जमून गावातून पदयात्रेव्दारे लोकांना आवाहन केले. यावेळी ‘शेतकरी एकजुटीचा विजय असो, कर्जमाफी झालीच पाहिजे, शेतीला हमीभाव मिळालाच पाहिजे’ अशा घोषणांनी परिसर दणाणून गेला. या पदयात्रेचे नंतर सभेत रूपांतर झाले. सभेत शेतकरी संघटनेचे पांडूरंग शिंदे, ज्ञानदेव पाटील तसेच के. डी. पाटील, संजय पाटील, शिवाजी पाटील यांनी आपली मते व्यक्त केली. यावेळी सरपंच प्रकाश चैगले, साबळेवाडी सरपंच तानाजी पाटील, कुंभी संचालक संजय पाटील, माजी संचालक तुकाराम पाटील, माजी चेअरमन सर्जेराव पाटील, बजरंग जांभळे, प्रविण पाटील, संजय पाटील आदींसह ग्रामस्थ मोठ्या संख्येने उपस्थित होते.
मोबाइल अॅप डाउनलोड करा आणि राहा अपडेट
