करवीरनिवासिनी श्री अंबाबाईच्या मूर्तीवर डाग आहे. ही मूर्ती बदलण्याचा सर्वांनी विचार करण्याची गरज आहे. दोन वर्षांपूर्वी झालेल्या रासायनिक संवर्धन प्रक्रियेची सीडी, अहवाल सादर करून दोषींवर कारवाई करावी. याबाबत गांभीर्याने विचार न केल्यास मंदिराचे चारही दरवाजे बंद करू असा इशारा शिवसेनेने शुक्रवारी देवस्थान समितीत झालेल्या बैठकीत देण्यात आला.
करवीरनिवासिनी श्री अंबाबाईच्या मूर्तीची झीज होत असल्याचे, मूर्तीवर पांढरे डाग पडल्याचे गेल्या आठवड्यात उघडकीस आले होते. त्यामुळे दोन वर्षांपूर्वी झालेली रासायनिक संवर्धन प्रक्रिया फोल ठरल्याचे यावरुन अधोरेखित झाले. याबाबत शुक्रवारी देवस्थान समिती, पुरातत्व विभाग आणि शिवसेनेच्या शिष्टमंडळाची बैठक झाली. बैठकीत पुरातत्व विभागाने दिलेल्या नियमांचे पालन होत नसल्यामुळे मंदिरातील आर्द्रता वाढून मूर्तीवर परिणाम होऊ लागल्याचे पुरातत्व विभागाचे उपाधिक्षक श्रीकांत मिश्रा यांनी सांगितले. यावर शिवसेनेने ‘गेल्या दोन वर्षात नियमांची अमंलबजावणी का केली नाही?’ असा सवाल करत देवस्थान समितीच्या अधिकाऱ्यांना धारेवर धरले. यावेळी, मंदिराच्या गाभाऱ्यातील आर्द्रता अंबाबाईच्या मूर्तीची झीज होण्यास कारणीभूत असल्याचे मत तज्ज्ञांनी मांडले.
संवर्धन समितीने देवीच्या मूर्तीवर पाण्याचा वापर करू नका, ओले हार घालू नये, लाकडी चौकट काढण्यात यावी, गाईचे तूप व दूध वापरावे, गाभाऱ्यात तीन ते चारच श्रीपूजक असावेत यांसह १७ प्रकारच्या नियमावलीवर सांगितल्या होत्या. याची अंमलबजावणी का झाली नाही? असा सवाल शिवसेनेच्या कार्यकर्त्यांनी केला. दोन वर्षांपूर्वी केलेल्या रासायनिक संवर्धन प्रक्रियेची सीडी आणि अहवाल सर्वांनसमोर आणा अशी मागणी जिल्हाप्रमुख संजय पवार व विजय देवणे यांनी केली. दोन वर्षांपूर्वी करण्यात आलेली रासायनिक संवर्धन प्रक्रिया आणि २०१६ मध्ये विनापरवाना मूर्तीवर केलेली लेप प्रक्रिया याची चौकशी करून दोषींवर करावाई करावी, याचा गांभीर्याने विचार करावा. अन्यथा मंदिराचे चारही दरवाजे बंद करून आंदोलन करू’ असा इशारा शिवसेनेने दिला.
यावेळी पुरातत्व विभागाचे उपाधिक्षक श्रीकांत मिश्रा, देवस्थान समितीचे सचिव विजय पोवार, सुदेश देशपांडे, मूर्ती अभ्यासक प्रसन्न मालेकर, सदस्य शिवाजी जाधव, संगिता खाडे, शिवसेनेचे जिल्हाप्रमुख संजय पवार, विजय देवणे, हर्षल सुर्वे आदी पदाधिकारी उपस्थित होते.
दोन वर्षांपूर्वी ज्यांनी रासायनिक संवर्धन प्रक्रिया राबविली, त्यांच्यावर कारवाई करावी. अंबाबाईच्या मूर्तीवर संवर्धनाचे प्रयोग सुरू आहेत. या सर्व बाबींचा विचार करून मूर्ती बदलण्याचा प्रयत्न करावा. दोन वर्षांपूर्वी पुरातत्त्व विभागाचे अधिकारी डॉ. एम. आर. सिंग आणि तत्कालीन देवस्थान व्यवस्थापन समितीच्या सचिव शुभांगी साठे यांनी पदाचा गैरवापर केल्याबाबत त्यांच्यावर गुन्हा दाखल करावा. संवर्धन प्रक्रियेची सीडी व अहवाल सादर करावा. दोषींवर करावाई करावी.
संजय पवार, जिल्हा प्रमुख, शिवसेना
सन २०१५मध्ये तत्कालीन जिल्हाधिकारी डॉ. अमित सैनी आणि सचिव शुभांगी साठे यांनी रासायनिक संवर्धनाची प्रक्रिया केली. त्यानंतर २०१६ मध्ये सिंग यांनी मंदिराला घाईघाईने भेट दिली. त्यांनी कोणाच्या सांगण्यावरुन प्रक्रिया केली याची चौकशी झाली पाहिजे. श्रीपूजकांनी १३ मे २०१६ रोजी लेप करण्याची प्रक्रिया राबविली. रासयनिक प्रक्रियेची सीडी देवस्थान समितीच्या लॉकरमध्ये सुरक्षित आहे. सीडीत काय आहे, संवर्धन समितीचा अहवाल काय याची माहिती देवस्थानच्या सदस्यांना दिलेली नाही.
संगिता खाडे, सदस्य, पश्चिम महाराष्ट्र देवस्थान व्यवस्थापन समिती
पुरातत्व उपाधिक्षक श्रीकांत मिश्रा यांनी आज मूर्तीची पाहणी केली. मूर्ती संवर्धनाबाबत काही पर्यायी उपाय सुचविले आहेत. १३ मे २०१६ रोजी झालेल्या लेप प्रक्रियेला देवस्थान समितीची परवानगी घेण्यात आली नव्हती. त्यामुळे याची चौकशी करून कारवाई करण्यात येईल.
विजय पोवार, सचिव, पश्चिम महाराष्ट्र देवस्थान व्यवस्थापन समिती
अध्यक्ष, सचिवांनी राजीनामा द्यावा
गेल्या दोन वर्षात मूर्तीवर केल्या रासायनिक संवर्धनानंतर पुरातत्व विभागाने सुचविलेल्या नियमांची अमंलबजावणी देवस्थान समितीने केलेली नाही. नियमांची अंमलबजावणी करता येत नसेल तर, देवस्थान समितीचे अध्यक्ष तथा जिल्हाधिकारी आणि देवस्थान समितीचे सचिवांनी राजीनामा द्यावा अशी मागणी शिवसेनेने बैठकीत केली.
मोबाइल अॅप डाउनलोड करा आणि राहा अपडेट
