डोळ्यादेखतच दोघांना चिरडले

May 24, 2017, 2:30 pm

≫ Next: चौकाने अनुभवला थरार

≪ Previous: साखरीत ‘जलयुक्त’चा पंचनामा

$

0

0

म. टा. प्रतिनिधी, कोल्हापूर

‘उमा टॉकीजच्या बाजूला सिग्नलला उभा होतो. काही समजण्यापूर्वीच समोरून येणाऱ्या भरधाव एसटीने एकापाठोपाठ एका गाडीला चिरडायला सुरुवात केली. माझ्या डोळ्यादेखत दोघेजण एसटीच्या चाकाखाली जाताना दिसले.’ अपघात घडला तेव्हा, चौकात सिग्नलला उभे असलेले अमर समर्थ हे दुचाकीस्वार घटनेविषयी सांगत होते.

अमर समर्थ यांच्या डोळ्यासमोर अपघात घडला. घटनेची माहिती देताना ते म्हणाले, ‘नेहमी प्रमाणे सिग्नलला गाड्या थांबल्या होत्या. गणपतीमंदिराच्या दिशेने आरडा-ओरडा आणि काही तरी एकमेकांवर आदळ्याचा मोठा आवाज ऐकू येऊ लागला. समोरून भरधाव एसटी वाटेत येणाऱ्या प्रत्येकाला उडवत येताना दिसत होती. रस्त्यावर असलेल्याकाही चारचाकी चालकांनी तत्काळ त्यांच्या गाड्या बाजुला डिव्हायडर आणि बॅरेकेटवर नेऊन आदळल्या. पण, दोघे दुचाकीस्वार थेट एसटीच्या चाकाखाली येताना दिसले. त्यांना चिरडतच एसटी पुढे वाहतूक पोलिस चौकीवर येऊन आदळली. आम्ही एसटी चालकाला पकडण्यासाठी गेलो. तर तो काहींसा बेशुद्ध अवस्थेत दिसत होता. तोपर्यंत जखमींना हॉस्पिटलमध्ये दाखल करण्यासाठी अनेकजण रस्त्यावर धावले. त्यांच्याबरोबर एसटी चालकालाही सीपीआरमध्ये पाठविण्यात आले. अपघातात एक वाहतूक पोलिस जखमी झाले असे समर्थ यांनी सांगितले.

लॉजच्या गॅलरीतून रस्त्यावरील गर्दी पाहत होतो. अचानक आलेल्या बसने वाहनांना उडवले. काही सेकंदात रस्त्यावर गाड्यांचा खच पडला आणि लोक रक्ताच्या थारोळ्यात पडले. बसचे चालक स्टेअरिंगवर झुकल्याच्या स्थितीत बेशुद्ध अवस्थेत होते.

- शुभम पंडत, प्रत्यक्षदर्शी

बेशिस्त वाहनधारकांविरोधात कारवाई करण्यासाठी आम्ही उमा टॉकीज चौकात पोलिस केबिनजवळ थांबलो होतो. पेट्रोल पंपाच्या समोरून जोरात आवाज आल्याने पाहिले तर एक बस वाहनांना चिरडत समोर येत असल्याचे दिसले. हा प्रकार फारच थरारक होता. आम्ही सुदैवाने बचावलो.

- राजाराम कुंभार, वाहतूक पोलिस

मोबाइल अॅप डाउनलोड करा आणि राहा अपडेट

---

चौकाने अनुभवला थरार

May 24, 2017, 2:30 pm

≫ Next: अधिकाऱ्याकडून तडजोडीसाठी ऑफर

≪ Previous: डोळ्यादेखतच दोघांना चिरडले

$

0

0

म. टा. प्रतिनिधी, कोल्हापूर

उमा टॉकीज चौकात भीषण अपघात झाल्याची बातमी शहरात वाऱ्यासारखी पसरली. त्यामुळे अनेकांनी चौकाच्या दिशेने धाव घेतली. त्यामुळे अपघातानंतर अवघ्या काही क्षणांत चौकांत प्रचंड गर्दी झाली. वाहतूक पोलिसांनी तत्काळ दक्षता घेत. उमा टॉकीज चौकाकडे जाणारी वाहतूक बंद केली. पण, उद्यमनगरातील छोट्या गल्ल्यांतून अनेकांनी चौक गाठला आणि बघ्यांची गर्दी झाली.

ओढ्यावरचा गणपती मंदिरापासून चालकाचा एसटीवरील ताबा सुटल्याचे प्रत्यक्षदर्शींनी सांगितले. तेथून पुढे सिग्नलच्या बॅरेकेटिंगपासून रस्त्यावर काचांचा खच पडला होता. वाहनांना चिरडत गेलेल्या एसटीची डिझेल टाकी फुटल्याने चौकात मध्यभागी डिझेल पसरले होते. तर जखमी आणि मृत्यूमुखी पडलेल्यांचे रक्त चौकात पसरले होते. गाड्यांच्या तुटलेल्या नंबरप्लेट, हेडलाइट, इंडिकेटरच्या काचा घटनास्थळी पसरलेल्या होत्या.

अपघाताला बळी पडलेल्यांच्या टोप्यांपासून हेल्मेट आणि इतर साहित्याचा अक्षरशः चुराडा झाला होता. वाहतूक पोलिसांनी क्रेनच्या साह्याने अपघातग्रस्त गाड्या बाजूला करून रस्ता मोकळा केला. घटनास्थळी पोलिसांसह वाहतूक पोलिस आणि शीघ्र कृती दलाचे जवानांना पाचारण करण्यात आले होते. त्यांनी घटनास्थळावरील गर्दी पांगविली. पोलिसांनी सायंकाळी पावणेसातच्या सुमारास अपघाताचा पंचनामा केला. त्यावेळीही चौकांत गर्दी कायम होती. अपघातानंतर शहरातील मुख्य चौकांपैकी एक असलल्या उमा टॉकीज चौकाकडील वाहतूक इतरत्र वळवण्यात आली. चौका चौकात वाहतूक पोलिसांनी बॅरेकेटिंग करून अपघात स्थळाच्या दिशेने जाणारी वाहने इतरत्र वळविली. सायंकाळची वाहतुकीची वेळ असल्याने इतर रस्त्यांवर वाहतूक कोंडी आणि संथ गतीने पुढे सरकरणारी वाहने, असे चित्र दिसत होते. विशेषतः गवत मंडई, उद्यमनगर, पाटीकडील तालीम मंडळ, टेंबे रोड आझाद चौक, फोर्ड कॉर्नर या परिसरात वाहतूक रेंगाळली होती.


चालकाचा ताबा सुटलेली एसटी पार्वती चित्रमंदिराकडून उमा टॉकीज चौकाकडे येत होती. एसटी ओढ्यावरच्या गणपती मंदिरापुढे येत असतानाच, त्या दिशेने सिग्नल सुटला होता. त्यामुळे चौकातून पुढे येत असलेल्या वाहनांवरच पाठिमागून एसटीने धडक द्यायला सुरुवात केली. मागून एसटीची धडक होत असल्याने अपघातग्रस्तांना बाजूला होण्याची संधीही मिळाली नाही. पण, सिग्लन सुटला असल्याने गाड्या पुढे सरकत होत्या. तेच जर, दुसऱ्या बाजूचा सिग्नल सुटलेला असता, तर घटनेचे गांभीर्य आणखी वाढले असते आणि बळींची संख्या मोठी असती, असे प्रत्यक्षदर्शींनी सांगितले. ताबा सुटलेली एसटी पुढे वाहतूक पोलिस चौकीला धडकली. त्या चौकीच्या मागे विजेचा एक ट्रान्सफॉर्मर आहे. एसटी त्यावर थेट धडकली असती, तर उच्च दाबाचा प्रवाह एसटीशी जोडला जाण्याचा धोका होता. एसटीत वाहकासह जवळपास ३५ प्रवासी होते. त्यांचाही जीव धोक्यात आला असता. एसटीतील प्रवाशांना किरकोळ दुखापती झाल्या आहेत. तसेच वीज वितरण कंपनीकडून तात्काळ परिसरातील पुरवठा खंडीत करण्यात आला. अग्निशमन दलाच्या जवानांनी विजेच्या तारांमधील गुंता सोडवला.


चौकात डोळ्यासमोर अपघात झाल्यानंतर तेथे उपस्थित प्रत्येकजण जमखींच्या मदतीला धावाला. अपघात कसा आणि काय झाले, हे काही मिनिटे प्रत्यक्षदर्शींना कळालेच नाही. पण, समोर दिसत असलेल्या जखमीला उचलून सीपीआरकडे पाठविण्याची तत्परता चौकातील प्रत्येकाने दाखविली. चौकातील वाहतूक सुरळीतच रहावी, यासाठी उपस्थित वाहतूक पोलिसांना तरुणांनी मदत केली. त्याचबरोबर रस्त्यावर पडलेले डिझेल, ऑइल घालविण्यासाठी चौकाजवळील तरुणांनीच त्यावर माती टाकली.

मोबाइल अॅप डाउनलोड करा आणि राहा अपडेट

अधिकाऱ्याकडून तडजोडीसाठी ऑफर

May 24, 2017, 2:30 pm

≫ Next: प्रगती झाली असेल, तर आरक्षण घेऊ नका

≪ Previous: चौकाने अनुभवला थरार

$

0

0

म. टा. प्रतिनिधी, कोल्हापूर

गगनबावडा तालुक्यातील साखरी-म्हाळुंगे गावच्या हद्दीतील जंगलात जलयुक्त शिवार योजनेतून ‌कृषी विभागाने‌बांधलेल्या माती बंधाऱ्याचे निकृष्ट काम पाहण्यासाठी शिवसेना जिल्हाप्रमुख संजय पवार, युवा शहरप्रमुख हर्षल सुर्वे यांच्या नेतृत्वाखालील शिष्टमंडळ बुधवारी गेले. त्यावेळी गगनबावड्याचे तालुका कृषी अधिकारी नामदेव परीट यांनी शिवसेनेचे कार्यकर्ते प्रकाश पाटील यांच्याकरवी त्यांना पैशाची ऑफर दिल्याचे उघड झाले. परीट आणि पाटील यांनी पवार यांच्याशी केलेले संभाषण मोबाइलच्या स्पिकरवरून पत्रकारांना ऐकवले.

शिवसेना जिल्हाप्रमुख पवार, सुर्वे हे प्रसार माध्यमाच्या प्रतिनिधींना घेऊन बंधारा पाहण्यासाठी गेल्याची माहिती कृषी अधिकारी परीट यांना कळाली. त्यांच्यासोबत असलेले शिवसेनेचे प्रकाश पाटील यांनी, पवार यांना फोन केला. ‘साहेब मी तुमचा कार्यकर्ता बोलतोय’ असे सांगत पाटील यांनी, ‘परीट माझे नातेवाईक आहेत. त्यांना सहकार्य करा. मी तुम्हाला भेटण्यासाठी येणार आहे. कुठे भेटू ते सांगा. तुमचे नाव सांगून आमच्याकडून ‘दोन’ घेऊन गेले आहेत. तुम्हाला जे हवे आहे, ते देण्यास तयार आहे’ असे सांगितले.

यावेळी पाटील यांनी मोबाइल परीट यांच्याकडे दिला. परीट यांनीही पवार यांच्याशी संभाषण केले. ‘तुमच्या नावे ते ‘दोन’ घेऊन गेलेत. त्यांच्याकडून एक मागून घ्या. आम्ही आणखी एक जमा करून देतो. मात्र, मला सहकार्य करा. वरिष्ठांनी सांगितले म्हणून बंधाऱ्यांची कामे केली आहेत.

यावर पवार यांनी, ‘माझे नाव सांगून कोण ‘दोन’ घेऊन गेले त्यांचे नाव सांगा. त्याला माझ्यासमोर आणा. मला हापूस, पायरी, फणस काय देणार ते सांगा. मी जिल्हाप्रमुख आहे. पक्ष चालवतो. मला भेटू नका. बंधाऱ्याचे काम निकृष्ट केले आहे. मग तुम्ही आज का आला नाही. शेतकरी, जवानांच्या प्रश्नात शिवसेना तडजोड करीत नाही. तुम्ही अशाप्रकारे शिवसेनेला विकत घेण्याचा प्रयत्न करू नका. आम्ही निकृष्ट कामांच्या चौकशीची मागणी लावून धरणार आहे. अशी ऑफर घेऊन पुन्हा संपर्क साधू नका’ असे खडसावले.

मोबाइल अॅप डाउनलोड करा आणि राहा अपडेट

प्रगती झाली असेल, तर आरक्षण घेऊ नका

May 24, 2017, 2:30 pm

≫ Next: रावतेंना कर्नाटकच्या सीमेवर अडवले

≪ Previous: अधिकाऱ्याकडून तडजोडीसाठी ऑफर

$

0

0

म. टा. प्रतिनिधी, कोल्हापूर

देशाच्या स्वातंत्र्यानंतर दलित आणि आदिवासी समाजाने गेल्या ७७ वर्षांत मोठ्या प्रमाणावर सवलती घेतल्या. पण, समाज अजूनही आहे तिथेचे आहे. त्यामुळे सामाजिक क्षेत्रात काम करणाऱ्या व्यक्तींबरोबरच समाजातील प्रत्येकाची जबाबदारी वाढली आहे. आता जर प्रगती झाली असेल, माझे सर्व व्यवस्थित चालले असेल, तर मी मुलांसाठी आरक्षण कशाला घेऊ. माझी पत्नीही नोकरी करत असेल, स्वस्त घरांसाठीच्या योजनेचा आधार कशाला घेऊ, असा जर प्रत्येकाने विचार केला, समाजात मागे राहिलेला माणूस पुढे येईल, असे मत राज्याचे महसूलमंत्री आणि जिल्ह्याचे पालकमंत्री चंद्रकांत पाटील यांनी व्यक्त केले.

राज्य सरकारच्या समाज कल्याण विभागाच्या वतीने डॉ. बाबासाहेब आंबेडकर यांच्या १२५ व्या जयंतीच्या निमित्त हा डॉ. बाबासाहेब आंबेडकर समाज उत्थान पुरस्कार व शाहू़, फुले, आंबेडकर पुरस्कारांचे वितरण बुधवारी कोल्हापुरात झाले. त्यावेळी पाटील बोलत होते. सामाजिक न्यायमंत्री राजकुमार बडोले, राज्यमंत्री दिलीप कांबळे, आमदार डॉ. सुजित मिणचेकर, आमदार सुरेश हाळवणकर, सामाजिक न्याय विभागाचे सचिव दिनेश वाघमारे, आयुक्त पियूष सिंह, प्रादेशिक आयुक्त रवींद्र कदम-पाटील, सहायक आयुक्त विशाल लोंढे, अतिरिक्त आयुक्त डॉ. सदानंद पाटील, सहायक आयुक्त बाळासाहेब कदम आदी प्रमुख उपस्थित होते.

चंद्रकांत पाटील म्हणाले, ‘सामाजिक न्याय विभागात जास्त निधी असला, तरी त्याच्या मर्यादा आहेत. त्यात सर्वांना न्याय मिळायचा असेल, तर ज्यांना आजवर लाभ मिळाले, त्यांनी इतरांना लाभ मिळू दिला पाहिजे. जसजसे आपण प्रगतीमध्ये पुढे जाऊ, तसा खालचा माणूस पुढे येत राहिला पाहिजे. अऩ्यथा तो खालीच राहील. स्वातंत्र्यानंतर आजही दलित समाज झोपडपट्टीतच का राहतो? घरांच्या इतक्या योजना झाल्या तरी समाज आहे तिथेच का आहे.? याचा अर्थ पैसा काहीजणांमध्येच फिरतो आहे. त्यामुळे सर्वांना न्याय मिळण्यासाठी सामाजिक कार्यकर्त्यांची जबाबदारी वाढली आहे.’

समाजिक न्याय विभागात खूप मोठ्या प्रमाणावर निधी असल्याचे सांगून चंद्रकांत पाटील म्हणाले, ‘योजनांची अंमलबजावणी करणारे सरकारी अधिकारी आणि कार्यकर्ते यांची भूमिका आई-वडील यांच्यासारखी असायला हवी, तशी नाही. आईप्रमाणे अडचणीत आलेल्याला मदत केली पाहिजे, तर वडिलांप्रमाणे गैरफायदा घेणाऱ्यास फटकारून गुन्हा दखल केला पाहिजे. काम करणाऱ्यांनी मिशनच्या भूमिकेतून पहावे.’

मोबाइल अॅप डाउनलोड करा आणि राहा अपडेट

रावतेंना कर्नाटकच्या सीमेवर अडवले

May 25, 2017, 4:04 am

≫ Next: शेतकरी एक जूनपासून संपावर

≪ Previous: प्रगती झाली असेल, तर आरक्षण घेऊ नका

$

0

0

मटा ऑनलाइन वृत्त । कागल

कर्नाटक सरकारने 'जय महाराष्ट्र' बोलण्याला घातलेल्या बंदी विरोधात बेळगावातील मराठी जनतेने कर्नाटक सरकारविरोधात एल्गार पुकारला. मराठी जनतेने सरकारचा निषेध करण्यासाठी काढलेल्या मोर्चात सहभागी होण्यासाठी गेलेले शिवसेनेचे नेते दिवाकर रावते यांना कर्नाटकच्या सीमेवरच अडविण्यात आले. त्यामुळे कर्नाटकच्या सीमेवर तणाव पसरला होता.

कर्नाटक सरकारविरोधातील मोर्चात सहभागी होण्यासाठी रावते येणार असल्याचं समजल्याने कर्नाटकच्या सीमेवर प्रचंड पोलीस बंदोबस्त ठेवण्यात आला दिवाकर रावते या मोर्चात सहभागी होण्यासाठी कोल्हापूरहून बेळगावच्या दिशेने रवाना झाले होते. मात्र, कागलमधील कोगनोळी फाट्याजवळच कर्नाटक पोलिसांनी रावते यांना अडवले.

पोलिसांनी रावते आणि जिल्हाध्यक्ष संजय पवार यांना बेळगावमध्ये दाखल होण्यास परवानगी नाकारली. यावेळी पोलिसांकडून दिवाकर रावते आणि संजय पवार यांना कन्नड भाषेतील जिल्हाबंदीच्या नोटीस देण्यात आल्या. मात्र, रावते यांनी मराठी भाषेतील नोटीस देण्याचा आग्रह धरला. जिल्हाधिकारी आणि जिल्हा दंडाधिकाऱ्यांच्या आदेशानुसार २४ ते २७ मेपर्यंत ही प्रवेशबंदी लागू राहणार आहे. दरम्यान, पोलिसांनी ठाम भूमिका घेतल्याने दिवाकर रावते यांना पुन्हा कोल्हापूरच्या दिशेने परतावे लागले.

मी महाराष्ट्र सरकारचा प्रतिनिधी म्हणून त्याठिकाणी गेलो होतो. मात्र, कर्नाटक सरकारकडून मला प्रवेश नाकारण्यात आला. मी केवळ शिवसेनेचाच प्रतिनिधी असतो तर ही बंदी नक्कीच झुगारली असती, असे रावते यांनी म्हटले.
दरम्यान, आज दुपारी १२ वाजता बेळगावातील संभाजी चौकातून जिल्हाधिकारी कार्यालयावर हा मोर्चा काढण्यात आला. या मोर्चात महाराष्ट्र एकीकरण समितीच्या कार्यकर्त्यांसह बेळगावातील मराठी जनता सहभागी झाले होते. या पार्श्वभूमीवर याठिकाणी कडेकोट पोलीस बंदोबस्त ठेवण्यात आला होता.

मोबाइल अॅप डाउनलोड करा आणि राहा अपडेट

शेतकरी एक जूनपासून संपावर

May 25, 2017, 2:30 pm

≫ Next: सरकार शेतक‍ऱ्यांना कर्जमाफी देणारच

≪ Previous: रावतेंना कर्नाटकच्या सीमेवर अडवले

$

0

0

म. टा. प्रतिनिधी, कोल्हापूर

‘सरकारच्या चुकीच्या धोरणामुळे शेतमालाला भाव मिळत नाही. सातत्याने शेती तोट्यात जाते आहे. शेतकरी कर्जबाजारी झालाय. शेती उत्पादनाला हमी भाव मिळावा, अशी मागणी केली. त्याकडे सरकारने दुर्लक्ष केले. शेवटचा पर्याय म्हणून राज्यातील शेतकरी १ जूनपासून बेमुदत संपावर जातील. संपाच्या काळात शहराकडे जाणारे दुधाचे टँकर, भाजीपाला रोखले जाईल’, अशी माहिती शेतकरी संघटनेचे नेते रघुनाथ पाटील यांनी गुरुवारी पत्रकार परिषेदत दिली.

पाटील म्हणाले, ‘अहमदनगर जिल्ह्यातील पुणतांबे गावातील शेतकऱ्यांनी संपावर जाण्याचा निर्णय घेतला. त्या संपाचे लोण राज्यभर पसरू नये, याची दक्षता सरकारने घेतली होती. मुख्यमंत्री देवेंद्र फडणवीस, विरोधी पक्षनेते राधाकृष्ण विखे-पाटील यांच्या पुढाकाराने पुणतांबे ये‌थील शेतकऱ्यांमध्ये फुट पाडण्याचा प्रयत्न झाला. मात्र शेतकऱ्यांनी तो हाणून पाडला. तेथील शेतकऱ्यांनी संपाचा निर्णय कायम ठेवला. संपूर्ण राज्यासह निम्म्या भारतातील शेतकरी संपावर जाण्याची भाषा करू लागलेत. विविध संघटना त्यामध्ये सहभागी होणार आहेत. संपाच्या काळात शेतकरी आपले उत्पादन बाजारात आणणार नाहीत.’

पाटील म्हणाले, ‘सलग दोन-तीन वर्षे महाराष्ट्रातील कारखानदारांनी उत्पादकांना कमी भाव दिला. गेल्या गळीत हंगामात उत्तर प्रदेश सरकाने प्रतीटन ३१०० ते ३२०० रुपये भाव ‌निश्चित केला. गुजरातमधील गणदेवी साखर कारखान्याने चार हजारांवर दर दिला. याउलट महाराष्ट्रात सरकार, स्वाभिमानी शेतकरी संघटना, कारखानदार प्रतिनिधींच्या बैठकीत एफआरपीच्या रकमेत तुकडे पाडले. दोन टप्यात देण्याची सवलत दिली. पहिली उचल २३०० रुपये मिळाली. हा दर परवडत नसल्याने राज्यातील ऊस उत्पादक शेतकरी भाजीपाल, फुलशेती, तूर अशा पिकांकडे वळला. एकेकाळी साखर उत्पादनात देशात अग्रेसर असलेला महाराष्ट्र गेल्या गळीत हंगामात मागे पडला. उत्तरप्रदेश पहिल्या स्थानावर गेले. राज्यातील उसाचे क्षेत्र कमी झाल्याने २००पैकी केवळ ७० कारखान्यांनी उसाचे गाळप केले. त्याचा फटका तोडणी मजूर, वाहतूकदारांना मोठा प्रमाणात बसला. नुकतीच केंद्र सरकाने प्रतीटन २५० रुपयांची एफआरपीत वाढ केली. ती फसवी आहे. शेतकऱ्यांना परवडणारी नाही. त्यामुळे आंदोलन करण्यात येत आहे.’

मोबाइल अॅप डाउनलोड करा आणि राहा अपडेट

सरकार शेतक‍ऱ्यांना कर्जमाफी देणारच

May 25, 2017, 2:30 pm

≫ Next: ‘त्या’ बस चालकावर सदोष मनुष्यवधाचा गुन्हा

≪ Previous: शेतकरी एक जूनपासून संपावर

$

0

0

म. टा. वृत्तसेवा, कसबा बावडा

‘सरकार कर्जमाफी देणारच आहे. मात्र विरोधक याप्रश्नी राजकारण करत आहेत. ते कमी पडते म्हणून सत्तेत सहभागी असलेली शिवसेना त्यांना साथ देत आहे. विरोधकांना फक्त राजकारण करायचे आहे. त्यांना शेतकऱ्यांशी काहीही देणेघेणे नाही,’ असा आरोप पालकमंत्री चंद्रकांत पाटील यांनी केला. ‘शिवार सवांद’ यात्रेच्या प्रारंभप्रसंगी वडणगे (ता.करवीर) येथे ते बोलत होते.

पालकमंत्री पाटील म्हणाले, ‘कर्जमाफी होणारच आहे. सरकारला राजकारण न करता शेतकऱ्याला सुखी समृद्ध करायचे आहे. सरकारने आजपर्यंतची मोठी गुंतवणूक जलयुक्त शिवार सारख्या अनेक योजनेवर केली असून आणखी एक मोठी योजना सरकार बनवत असून उत्पादनात भागिदारी करता येईल का याचा विचार सुरु आहे. आजतागायत शेतकऱ्यांचे उत्पादन न वाढल्याने त्यांच्यावर कर्जाचा डोंगर उभा राहीला. त्यांचे उत्पादन वाढले नाही तर हे कर्जाचे चक्र असेच चालू राहील.’

‘गोकुळ’चे संचालक व भाजपचे संघटनमंत्री बाबा देसाई यांनी यावेळी जिल्ह्यातील सर्व तालुक्यातील शिवार सवांद यात्रेचा कार्यक्रम सांगितला. यावेळी शिवाजी बुवा, के. एस. चौगुले, संभाजी पाटील उपस्थित होते.

‘कॉंग्रेस - राष्ट्रवादीच्या काळात बजेटमध्ये १३ हजार कोटींची तरतूद व्हायची. आमच्या सरकारने ही तरतूद २५ हजार कोटीपर्यंत केली असून त्यात १२ हजार कोटी रुपये वाढविले आहेत. या वाढीव तरतुदीमधून अपूर्ण धरणे, रखडलेले प्रकल्प पूर्ण करून जलसाठा वाढविण्याला प्राधान्य दिले आहे. जलयुक्त शिवार अभियानाच्या माध्यमातून ११ हजार गावे जलयुक्त केली आहेत. यापुढे ३२ हजार गावे जलयुक्त करायचा सरकारचा मानस असून कर्जमाफीपूर्वी शेतकरी सक्षम करण्याचा सरकारचा प्रयत्न राहणार असल्याचे प्रतिपादन पालकमंत्री चंद्रकांत पाटील यांनी केले.

भाजपच्या वतीने आयोजित केलेल्या करवीर तालुक्यातील सांगरुळ, वाशी, सडोली खालसा येथील शिवार संवाद यात्राप्रसंगी ते बोलत होते.पालकमंत्री पुढे म्हणाले, ‘ठिबक सिंचनसाठी शेतकऱ्यांनी एकत्र येऊन १०० एकरावर प्रकल्प सुरू केल्यास याबाबतीत संबंधित कंपनीशी बोलून येणारा खर्च निम्म्याने करून त्यातील निम्मा आम्ही भरू व उरलेला फक्त २५ टक्के खर्च शेतकऱ्यांना भरावा लागेल अशी सोय करण्यात येणार आहे.

मोबाइल अॅप डाउनलोड करा आणि राहा अपडेट

‘त्या’ बस चालकावर सदोष मनुष्यवधाचा गुन्हा

May 25, 2017, 2:30 pm

≫ Next: साहित्यच देशाला तारेल

≪ Previous: सरकार शेतक‍ऱ्यांना कर्जमाफी देणारच

$

0

0

म. टा. प्रतिनिधी, कोल्हापूर

शहरातील उमा टॉकीज चौकात बुधवारी बसवरील नियंत्रण सुटून झालेल्या गंभीर अपघातात दोन व्यक्तींचा मृत्यू झाला, तर १० जखमी झाले. अपघातास कारणीभूत ठरलेले बस चालक रमेश सहदेव कांबळे (वय ४२. रा. कांडगाव, ता. करवीर) याच्यावर जुना राजवाडा पोलिस ठाण्यात सदोष मनुष्यवधाचा गुन्हा दाखल करण्यात आला.

कांबळे हे सेवेत असताना पाच अपघात घडले होते, यातील एका अपघातात ते दोषी आढळल्याने परिवहन विभागाने यापूर्वीच त्यांची १ वर्षाची पगारवाढ रोखली होती. पोलिसांनी कांबळेची सविस्तर माहिती घेण्यासाठी परिवहन विभागाशी पत्रव्यवहार सुरू केला आहे. दरम्यान, चालक रमेश सहदेव कांबळे यांना ब्रेन ट्युमर (मेंदूतील गाठ) असल्याचे वैद्यकीय तपासणीत स्पष्ट झाले. ब्रेन ट्युमरच्या त्रासाने चक्कर येऊन कांबळे यांचे बसवरील नियंत्रण सुटल्याची शक्यता सीपीआरमधील वैद्यकीय अधिकाऱ्यांनी वर्तवली आहे. कांबळे यांची एमआरआय टेस्ट केल्यानंतर इतर आजारांबाबत माहिती मिळणार आहे.

अपघातानंतर बस चालकाला हृदय विकाराचा झटका आल्याने किंवा त्यांना बसचा ब्रेक निकामी झाल्याने अपघात झाल्याचा प्राथमिक अंदाज वर्तवला जात होता. मात्र बस सुस्थितीत होती. बसचालक काही वेळात शुद्धीवर आल्याने अपघाताच्या नेमक्या कारणाबाबत उलटसुलट चर्चा सुरू होती. ‘चालक कांबळे यांची सिटी स्कॅन टेस्ट केली असून, त्यांना ब्रेन ट्युमर असल्याचे टेस्टमधून लक्षात आले. कांबळे यांच्या मेंदुच्या डाव्या बाजुला समोर ४.३ सेंटीमीटरची गाठ आहे. गाठेचा आकार आणि वाढ पाहता गेल्या चार ते पाच वर्षांपासून कांबळे यांना याचा त्रास असावा. एमआरआय टेस्ट केल्यानंतर इतर आजारांबद्दल सविस्तर माहिती उपलब्ध होईल’, अशी माहिती सीपीआरमधील मेंदू विकार तज्ज्ञ डॉ. अनिल जाधव यांनी दिली.

मोबाइल अॅप डाउनलोड करा आणि राहा अपडेट

---

साहित्यच देशाला तारेल

May 25, 2017, 2:30 pm

≫ Next: मराठी भाषिकांचा विराट मोर्चा

≪ Previous: ‘त्या’ बस चालकावर सदोष मनुष्यवधाचा गुन्हा

$

0

0

म. टा. प्रतिनिधी, कोल्हापूर

‘स्वातंत्र्यानंतर गेल्या सत्तर वर्षात अभिव्यक्तीवर आघात करणारी परिस्थिती निर्माण झाली आहे. सतत एक भय दिसत आहे. असहिष्णुता वाढत आहे. अशा वातावरणात अराजकतेच्या उंबरठ्यावर असलेल्या देशात विचारांची नवनिर्मिती करण्याची गरज आहे. दर्जेदार साहित्य वाचनातून घडणारी पिढीच देशाला तारेल’ असा विश्वास मुंबई विद्यापीठाचे माजी कुलगुरू डॉ. भालचंद्र मुणगेकर यांनी व्यक्त केला. दक्षिण महाराष्ट्र साहित्य सभेतर्फे धम्मपाल रत्नाकर राज्यस्तरीय

काव्य पुरस्कार व लेखकांच्या उत्कृष्ट साहित्यकृतींना देण्यात येणाऱ्या ग्रंथ पुरस्कार प्रदान कार्यक्रमप्रसंगी ते बोलत होते. गुरुवारी सकाळी शाहू स्मारक भवनात झालेल्या कार्यक्रमास प्राचार्य विश्वास सायनाकर, प्राचार्य डॉ. महेंद्र कदम प्रमुख उपस्थित होते.

डॉ. मुणगेकर म्हणाले, ‘लेखक जेव्हा लिहितो तेव्हा त्याची प्रत्येक गोष्ट ही नवनिर्मिती असते. त्यामध्ये त्याचा स्वतंत्र विचार असतो, भूमिका असते, निरीक्षण आणि त्याचे समाजात उमटलेल्या पडसादांचे विश्लेषण असते. त्यामुळे प्रत्येक साहित्य ​किंवा साहित्यिक याचे वर्गीकरण करू नये. ज्येष्ठ साहित्यिक आणि नवोदित साहित्यिक यांच्यातील दरीही कमी होऊन त्यांच्यामध्ये विचारांची देवाणघेवाण व्हायला हवी. साहित्यामध्ये समाजात, माणसांच्या विचारात बदल घडवण्याची ताकद असते. याचा विचार केल्यास सध्या देशातील अत्याचार, बेरोजगारीसारख्या घटनांमुळे जो वैचारिक असमतोल आला आहे त्याला थांबवण्यासाठी लेखकांची जबाबदारी वाढते. देशाच्या लोकसंख्येपैकी ६ टक्के युवक बेरोजगार आहेत. त्यातून त्यांच्यामध्ये विघातक प्रवृत्ती निर्माण होत आहे. महिलांवरील

वाढत्या अत्याचार आणि बलात्कारांनी देश हादरून गेला आहे.’

डॉ. मुणगेकर म्हणाले, ‘काळाच्या कसोटीवर कालबाह्य ठरणाऱ्या गोष्टी टाकून दिल्या पाहिजेत, आणि नव्या गोष्टी स्वीकारल्या पाहिजेत. पुरूषांचे स्वयंघोषित श्रेष्ठत्व हे स्त्रीच्या कार्यकुशलतेतील, तिच्या स्वातंत्र्यातील मीठाचा खडा बनले आहे. हा खडा ठेचण्याचे काम साहित्यातून प्रगल्भ होणारे विचारच भविष्यात करणार आहेत. त्यामुळे साहित्यात काही नवं लिहू पाहणाऱ्यांना पुरस्काराच्या निमित्ताने मिळणारं बळ आणि त्यातून होणारी विचारांची नवनिर्मिती हा देशाचा कणा ठरणार आहे.’

प्राचार्य विश्वास सायनाकर म्हणाले, ‘पुस्तक माणसाला घडवत असतात हा इतिहास आहे. हरेक प्रकारच्या साहित्य वाचनातून माहितीचा खजिना तयार होतो. समाजातील वास्तवतेशी माणूस भिडतो. चांगल्या-वाईटाची जाण त्याला येते. समाज समृद्ध होण्यासाठी अशाप्रकारचे संवेदनशील मन असणारी माणसं ही समाजाची ताकद बनते. त्यामुळे साहित्य चळवळीत काम करणाऱ्या संघटनाच्या सातत्यपूर्ण कामाला श्रेय दिले पाहिजे.’

प्राचार्य महेंद्र कदम यांनी पुरस्कारासाठी निवडलेल्या काव्यसंग्रहाच्या परीक्षणाबाबत संवाद साधला. पुरस्कार प्राप्त कवयित्री कल्पना दुधाळ, सारीका परळकर, विजय माळी, विशेष पोलिस महानिरीक्षक विश्वास नांगरे पाटील यांनी मनोगत व्यक्त केले. प्रास्ताविकात बोलताना ‘दमसा’चे अध्यक्ष विजय चोरमारे म्हणाले, ‘पुरस्काराच्या निमित्ताने दर्जेदार लेखन करणाऱ्या साहित्याचा सन्मान करण्याबरोबरच समाजात संवेदनशील लेखकांना प्रोत्साहन देण्यासाठी हा उपक्रम केला जातो.’

मोबाइल अॅप डाउनलोड करा आणि राहा अपडेट

मराठी भाषिकांचा विराट मोर्चा

May 25, 2017, 2:30 pm

≫ Next: शिवसेनेत बाळासाहेबांचा स्वाभिमान असेल तरच सरकार पडेल

≪ Previous: साहित्यच देशाला तारेल

$

0

0

म. टा. वृत्तसेवा, बेळगाव

‘जय महाराष्ट्र..., जय भवानी जय शिवाजी, मराठीतून कागदपत्रे मिळालीच पाहिजेत, मराठी फलक लागलेच पाहिजेत’ अशा घोषणा देऊन विराट मोर्चा काढत बुधवारी महाराष्ट्र एकीकरण समितीने कर्नाटक सरकारच्या धमकीला घाबरत नसल्याचे दाखवून दिले. आमदार संभाजी पाटील, आमदार अरविंद पाटील, एकीकरण समितीचे अध्यक्ष दीपक दळवी, कार्याध्यक्ष माजी आमदार मनोहर किणेकर, सरचिटणीस मालोजी अष्टेकर यांच्या नेतृत्वाखाली मोर्चा काढण्यात आला. मोर्चात आबालवृद्ध मोठ्या संख्येने सहभागी झाले होते.

मोर्चात जय महाराष्ट्र घोषणा दिल्यामुळे पोलिसांनी आमदार संभाजी पाटील, आमदार अरविंद पाटील यांच्या सह मध्यवर्ती समिती अध्यक्ष दीपक दळवी, माजी आमदार मनोहर किणेकर आदींवर गुन्हे दाखल केला आहेत. दोन भाषिकांत तेढ निर्माण करणे, कर्नाटक राज्याचा अपमान करणे असे गुन्हे यांच्यावर दाखल करण्यात आले आहेत. पोलीस सूत्रांनी दिलेल्या माहितीनुसार मोर्चात जय महाराष्ट्रसह संयुक्त महाराष्ट्राच्या घोषणा दिलेल्यांवर गुन्हा १५३ अ, १८०, आयपीसी ३४ कलम लावण्यात आली आहेत. बेळगाव पोलिस उपायुक्त अमरनाथ रेडी यांच्या मार्गदर्शना खाली हे गुन्हे लादण्यात आले आहेत.

धर्मवीर संभाजी चौकातील संभाजी महाराजांच्या पुतळ्याला समितीच्या पदाधिकाऱ्यांनी पुष्पहार अर्पण करून जय महाराष्ट्र अशा घोषणा देऊन मोर्चाला प्रारंभ करण्यात आला. बसवर मराठी फलक लावावेत, शेतकऱ्यांच्या मालाला हमीभाव मिळावा, शेतकऱ्यांचे कर्जमाफ करा, रस्ता रुंदीकरणात जागा गमावलेल्याना नुकसान भरपाई द्या, सुपिक जमीन संपादित करू नये अशा मागण्या करणारे फलक मोर्चात होते. जय महाराष्ट्र म्हणणारच हे कर्नाटक सरकारला ठणकावून सांगण्यासाठी मराठी भाषिक कार्यकर्ते मोर्चात मोठ्या संख्येने सहभागी झाले होते.

‘आमदारकी गेली तरी बेहत्तर, मी जय महाराष्ट्र म्हणणारच. कर्नाटक सरकारच्या धमकीला मी घाबरत नाही’ अशा भावना आमदार संभाजी पाटील यांनी यावेळी व्यक्त केल्या. भूसंपादन, जाचक कर आणि मराठी कागदपत्रे या मुद्द्यावर दिलेले निवेदन सरकारकडे पाठवू असे आश्वासन जिल्हाधिकारी एन. जयराम यांनी महाराष्ट्र एकीकरण समितीच्या पदाधिकाऱ्यांना दिले. मोर्चात अनेक ग्राम पंचायत तालुका पंचायत जिल्हा पंचायत नगरसेवक आणि आमदार असे लोकप्रतिनिधी सामील झाले होते. त्यांनी पोलिस प्रशासनासमोरच ‘जय महाराष्ट्र’च्या घोषणा दिल्या.

परिपत्रके मराठीत देण्यात यावीत, भाषिक अल्पसंख्यांक अधिकारांचे रक्षण करा असे निवेदन जिल्हाधिकारी एन. जयराम यांना देण्यात आले. निवेदन घेण्यासाठी जिल्हाधिकारी मोर्चात आले असता त्यांच्यासमोरही ‘जय महाराष्ट्र’ घोषण देत कार्यकर्त्यांनी परिसर दणाणून सोडला.

मोर्चावेळी प्रचंड पोलिस बंदोबस्त तैनात करण्यात आला होता. मध्यवर्ती समितीचे दीपक दळवी, प्रकाश मरगाळे, अरविंद पाटील, मनोहर किणेकर, जिल्हा पंचायत सदस्य सरस्वती पाटील, माजी महापौर व नगरसेविका सरिता पाटील यांच्यासह अनेक नगरसेवक, तालुका पंचायत सदस्य, जिल्हा पंचायत सदस्य, ग्रामपंचायत सदस्य उपस्थित होते.

मोबाइल अॅप डाउनलोड करा आणि राहा अपडेट

शिवसेनेत बाळासाहेबांचा स्वाभिमान असेल तरच सरकार पडेल

May 26, 2017, 7:51 am

≫ Next: दिव्यांगांना आठ दिवसांत केबिन द्या’

≪ Previous: मराठी भाषिकांचा विराट मोर्चा

$

0

0

म. टा. प्रतिनिधी, कोल्हापूर

शिवसेना सत्तेला मुंगळ्यासारखी चिकटून बसली आहे. मंत्रीमंडळाच्या बैठकीत मंत्री निर्णयांना पाठींबा देतात आणि बाहेर विरोध करतात. सरकारमध्ये रहायचे की नाही याचा निर्णय शिवसेनाच घेऊ शकते. शिवसेनेत बाळासाहेब ठाकरेंचा स्वाभिमान अंगात भिनला असेल तर राज्य सरकार पडू शकते, असा टोला राष्ट्रवादी काँग्रेस पक्षाचे प्रदेशाध्यक्ष सुनील तटकरे यांनी लगावला. २०१९ च्या लोकसभा व विधानसभा निवडणुकीच्या पार्श्वभूमीवर पक्ष बळकट करण्यासाठी ११ जूनपासून अजित पवार व आपण राज्यभर दौरे काढणार असून पदाधिकारी व कार्यकर्त्यांच्याबरोबर झालेल्या चर्चेनंतर पक्षसंघटनेत फेरबदल होतील असे त्यांनी सांगितले.

प्रदेशाध्यक्ष तटकरे कोल्हापुरात घरगुती कामासाठी कोल्हापुरात आले होते. राष्ट्रवादी काँग्रेस पक्षाच्या जिल्हा कार्यालयात त्यांनी पत्रकार परिषदेत शिवसेना व भाजपवर सडकून टिका केली. १९९५ पासून शिवसेना भाजप, काँग्रेस राष्ट्रवादीची आघाडी सरकारे राज्यात अस्तित्वात आली. केंद्रातही आघाडी सरकार होते. पण सध्याच्या भाजप शिवसेना या दोन पक्षासारखा विसंवाद कधीच नव्हता. सत्तेत शिवसेनेची ४० टक्के भागीदारी असताना उद्धव ठाकरे सरकारला नालायक, दरोडखोर अशी टीका करत आहेत. आघाडी सरकारच्या प्रक्रियेला छेद देणारी वक्तव्ये ठाकरे करत आहेत. एकीकडे मंत्रीमंडळाच्या बैठकीत शिवसेनेचे मंत्री पाठींबा देतात व बाहेर टीका करतात. भाजपचे १२३ व शिवसेनेचे ६३, घटक पक्ष असे मिळून १९० संख्याबळ असलेले २५ वर्षातील राज्यात सर्वात संख्याबळ असलेले सरकार असूनही अस्थिर सरकार आहे. खिशात राजीनामे आहेत असे वारंवार इशारे देणाऱ्या शिवसेनेने हिंमत असेल तर सरकारमधून बाहेर पडावे, असेही तटकरे यांनी म्हंटले.

राज्य आर्थिक दिवाळखोरीत

एलबीटी रद्द केल्यामुळे राज्य सरकार १२ हजार कोटी रुपयांच्या उत्पन्नाला मुकले आहे असा आरोप तटकरे यांनी केला. एलबीटी कर लागू असता तर जीएसटी कायद्याची अंमलबजावणी केल्यानंतर केंद्राकडून जादा मदत मिळाली असती याकडे त्यांनी लक्ष वेधले. मुंबई महानगरपालिकेचे जकातीचे उत्पन्न बुडणार असून त्याच्याबदली केंद्र सरकारकडून राज्याचे मुख्यमंत्री व अर्थमंत्री जादा निधी आणण्यात अपयशी ठरले आहे. राज्य सरकारने अर्थसंकल्पाच्या ५० टक्के पुरवण्याच्या मागण्या काढल्याने राज्य आर्थिक दिवाळखोरीत निघाले आहे, अशी टीकाही त्यांनी केली.

मोबाइल अॅप डाउनलोड करा आणि राहा अपडेट

दिव्यांगांना आठ दिवसांत केबिन द्या’

May 26, 2017, 2:30 pm

≫ Next: कळंब्याचे पाणी ‘मुरतंय’ कुठे?

≪ Previous: शिवसेनेत बाळासाहेबांचा स्वाभिमान असेल तरच सरकार पडेल

$

0

0

म. टा. प्रतिनिधी, कोल्हापूर

मुख्य रस्त्यापासून दूर असल्याने आठ​ दिवसांत ७९ दिव्यांगांना केबिनसाठी पर्यायी जागा द्याव्यात, अन्यथा स्वतः केबिनचे वाटप करीन, असा इशारा महापौर हसीना फरास यांनी दिला. अपंग कृती आराखड्यांतर्गत दिव्यांगांना देण्यात येणाऱ्या केबिनसाठी पर्यायी जागा देण्याबाबत महापौर फरास यांनी आयुक्त डॉ. अभिजीत चौधरी यांच्यासमवेत शहरात पाहणी केली.

महापालिकेच्यावतीने अपंग कृती आराखड्यानुसार दिव्यांगांसाठी विविध योजना राबवण्यात येत आहेत. दिव्यांगांना उदरनिर्वाहाचे साधन देण्यासाठी पाच बाय सहा फुटाच्या १७३ केबिन देण्याचे निश्चित केले होते. मात्र दिव्यांगांनी जागेबाबतच्या समस्या महापौरांसमोर मांडल्या होत्या. त्यासाठी महापौरांच्या अध्यक्षतेखाली बैठकही घेण्यात आली होती. यात ७६ दिव्यांगांनी जागा बदलून मिळण्याबाबत अर्ज दाखल केले होते. काही जागा मुख्य रस्त्यापासून दूर असल्याने दिव्यागांनी विरोध केला होता. त्यामुळे ७९ दिव्यांगांना पर्यायी जागा द्यावी लागणार आहे. या जागा निश्चित करण्यासाठी वाशी नाका राजकपूर पुतळा, रंकाळा संप आणि पंप हाउसजवळ, मैल खड्डा, सायबर चौक, महावीर उद्यान, शहाजी कॉलेजसमोर भेट देऊन जागांची पाहणी केली.

यावेळी महापौर फरास म्हणाल्या, ‘तीन वर्षे दिव्यांग समस्या घेऊन महापालिकेत येत आहेत. प्रशासनाकडून दिरंगाई होत आहे. आठ दिवसात जागा निश्चित करुन दिव्यांगाना केबिनची कब्जेपट्टी देण्यात यावी. विलंब झाल्यास स्वत: केबिनचे वाटप करेन.’

आयुक्त डॉ.अभिजित चौधरी यांनी पाहणी केलेल्या जागा देण्याबाबत संबंधित अधिकाऱ्यांची बैठक घेऊन नियमाप्रमाणे लवकरात लवकर केबिनसाठी जागा निश्चित करुन देण्याचे आश्वासन दिले. त्यानुसार सायंकाळी अधिकाऱ्यांची बैठक घेऊन जागांबाबत माहितीही घेतली.

पाहणीवेळी उपमहापौर अर्जुन माने, अतिरिक्त आयुक्त श्रीधर पाटणकर, गटनेता शारंगधर देशमुख, आदील फरास, उपशहर अभियंता रमेश मस्कर, हर्षजित घाटगे, आर. के. जाधव, इस्टेट ऑफिसर प्रमोद बराले, सर्व्हेअर शाम शेटे, तानाजी गेजगे, दत्तू पारधी आदी उपस्थित होते.

मोबाइल अॅप डाउनलोड करा आणि राहा अपडेट

कळंब्याचे पाणी ‘मुरतंय’ कुठे?

May 26, 2017, 2:30 pm

≫ Next: तीस चौकांचे होणार सुभोभिकरण

≪ Previous: दिव्यांगांना आठ दिवसांत केबिन द्या’

$

0

0

भारतभूषण गिरी, कोल्हापूर

उन्हाळ्याच्या अखेरच्या टप्प्यात कळंबा तलावाची स्थिती भीषण झाली आहे. गेल्यावर्षी तलाव कोरडा पडल्याने जलसंपदा विभागाने गाळ काढला होता आणि त्यानंतर पाऊसही चांगला झाला होता. त्यामुळे तलाव जुलै महिन्यात तुडुं भरला. मात्र यंदा एप्रिलमध्येच तलावाची पाणीपातळी इतकी खालावली की पाणी उपसा करणे बंद करण्यात आले. तलावाची पाणी साठवण क्षमता वाढूनही आणि तलाव पूर्णपणे भरूनही तलावाबाबत अशी स्थिती उद्भवत असेल तर त्याचा विचार करण्याची गरज आहे. महापालिकेने तलावाच्या अस्तित्वासाठी सौंदर्यीकरणापेक्षा देखभालीवर प्राधान्य दिले पाहिजे, अशी अपेक्षा व्यक्त होत आहे.

राजर्षी शाहू महाराजांच्या काळात बांधलेला हा तलाव कळंबा, पाचगावसह कोल्हापूर शहरातील बोअरसाठी महत्त्वाचा जलस्रोत म्हणून महत्त्वाचा ठरत आहे. १३३ वर्षे उलटली तरी तलाव सेवा बजावत आहे. मात्र गेल्यावर्षी यात खंड पडला. वास्तविक कोणत्याही जलसाठ्याची निगा राखणे, देखभाल करणे, स्वच्छता ठेवणे हे करावेच लागते. तरच जलसाठ्याचे पाणी निरंतर मिळत राहते आणि वापरण्यायोग्य राहते. अन्यथा जलसाठ्याचे स्त्रोत बंद होतात. गळतीने पाणी वाया जाते, प्रदूषणामुळे पाणी दूषित होते. जलसाठ्याचा उपसा किंवा वापर बंद केल्यास तो जलसाठा निरुपयोगी, कालांतराने मृत होतो. हे धोके डोळ्यासमोर ठेवून आपण कळंबा तलावाचे संवर्धन करण्याची आवश्यकता आहे.

गेल्यावर्षी पावसाळ्याआधी दोन महिने तलाव कोरडा पडला. १९७२ च्या दुष्काळाला मोठ्या धीराने तोंड देणाऱ्या या तलावाने २०१६ च्या दुष्काळासमोर नांगी टाकली. कळंबा तलावाला कोरडा पडल्याचे पाहणे हे आश्चर्यकारक होते. जलसंपदा विभागाने दुष्काळाची तीव्रता अधिक असल्याने, नैसर्गिक आपत्ती असल्याने तलाव कोरडा पडल्याचे सांगितले. त्यानंतर पाणी साठवण क्षमता वाढावी यासाठी तलावातील गाळ काढण्यास प्रारंभ केला. मात्र यावेळी तलावाचा इतिहास, बांधकाम आणि पाणलोट क्षेत्राचा अभ्यास, बंधाऱ्याची स्थिती, कुठे गळती आहे का? याचा कसलाही अभ्यास न करता गाळ काढला गेला. नियोजन न करता यंत्रसामग्री कामाला जुंपली. गाळ कोणता आणि तळ कोणता हे न पाहता पोकलॅन मशीनद्वारे जितके खोल खणता येईल तितके खणण्यात आले आणि तोच गाळ समजून काढला गेला. यावेळी तलावात अडीचशे वर्षांपूर्वीचा पाट सापडला. पाटापर्यंतच तलावाचा तळ काढण्याची आवश्यकता होती. नंतर पाऊस जसा सुरु झाला तसे गाळ काढण्याचे काम थांबले.

कळंबा तलावाचा गाळ काढल्याने सा‌ठवण क्षमता वाढली. यंदाच्या पावसाळ्यात २५ जुलै २०१६ रोजीच तलाव भरला. या तलावात ३२०० कोटी लिटर जादा पाणी साठले. ही वस्तुस्थिती असताना गेल्या महिन्यात तलावाची पाण्याची पातळी इतकी खालावली की, उपसा बंद करावा लागला. आता पाण्याची पातळी खालविण्याचे नेमके कारण जलसंपदा विभागाने शोधण्याची गरज आहे. तलावात पाणीसाठा एकदम खालावल्याचे कारण शोधायला हवे.

अभ्यासकांच्या मते, तलावाचा गाळ शास्त्रोक्त पद्धतीने, अभ्यासपूर्वक काढला गेला नाही. पाणलोट क्षेत्रातील बांधकामे सुरू आहेत, त्यावर बंधने आणली गेली नाहीत. तलावातून पाणी वाहून जात असल्याचे स्थानिक नागरिकांचे म्हणणे आहे. महापालिकेने तलावाच्या मूळ दुखण्याकडे दुर्लक्ष करुन तलावाचे सौंदर्यीकरण व तेथे पर्यटकांना आकर्षित करण्याच्यादृष्टीने कामे सुरु केली आहेत. तलावाचे पाणी कसे टिकेल आणि ते प्रदूषणविरहीत कसे राहील याकडे महापालिकेने गांभीर्याने लक्ष देणे गरजेचे आहे.


गेल्यावर्षी झालेल्या चांगल्या पावसाने कळंबा तलाव तुडुंब भरला. तलावातील गाळ काढल्याने जादा पाणीसाठा झाला. तरीही तलावाची पाण्याची पातळी खूप खालावली. वाढत्या उष्‍णतेमुळे मोठ्या प्रमाणात बाष्पीभवन झाल्याने पातळी खालावली, हे एक महत्त्वाचे कारण आहे. शिवाय पाण्याचा चोरटा उपसाही होत असेल, गाळ काढताना काही तांत्रिक चुका झाल्या असू शकतील तसेच बंधाऱ्याला गळतीही असू शकेल. ती शोधून दुरुस्त करावी.

डॉ. मधुकर बाचूळकर, पर्यावरण अभ्यासक

मोबाइल अॅप डाउनलोड करा आणि राहा अपडेट

तीस चौकांचे होणार सुभोभिकरण

May 26, 2017, 2:30 pm

≫ Next: कामामुळेच ‘टॉप वन’ बनलो

≪ Previous: कळंब्याचे पाणी ‘मुरतंय’ कुठे?

$

0

0

म. टा. प्रतिनिधी, कोल्हापूर

महापालिका आणि केएसबीपी संस्थेच्यावतीने शहरातील तीस चौकांचे सुशोभिकरण करण्यात येणार असल्याची माहिती महापौर हसीना फरास व सुजय पित्रे यांनी शुक्रवारी पत्रकार परिषदेत दिली. प्रायोजकांच्या मदतीने सहा महिन्यांत हा प्रकल्प पूर्ण करण्यात येणार आहे. त्यानंतर ऐतिहासिक रंकाळा तलावाचे सुशोभिकरण करण्यात येणार असल्याचेही यावेळी त्यांनी सांगितले.

महापौर फरास म्हणाल्या, ‘केएसबीपी या स्वयंसेवी संस्थेने शहरातील पंधरा किलोमीटरचे रस्ते व विविध चौक, आयलंडचे सुशोभिकरण केले आहे. अद्यापही बरेच चौक दुर्लक्षित आहेत. या चौकांचे सुशोभिकरण करणे महापालिकेला न परवडणारे आहे. यामुळे प्रायोजकांच्या माध्यमातून शहरातील सर्व चौक, आयलंड सुशोभित करण्याचा निर्णय घेण्यात आला आहे. यासाठी केएसबीपीने पुढकार घेतला आहे. पहिल्या टप्यात तीस प्रायोजकांच्या माध्यमातून तीस चौक सुशोभित करण्यात येतील. दहा वर्षे या चौकांच्या देखभालीची जबाबदारी संबंधित प्रायोजकांची राहिल. महापालिकेसह दोन्ही संस्थांचे फलक तेथे लावण्यात येतील.’

सुजय पित्रे म्हणाले, ‘ऐतिहासिक रंकाळा तलावावर रोज हजारो पर्यटक येतात. त्यामुळे हा तलाव आणखी सुंदर करणे आवश्यक आहे. त्यामुळे रंकाळ्याचेही सुशोभिकरण करण्यात येणार आहे. त्यासाठी रंकाळा तलाव विकास समिती स्थापन करणार आहे. समितीच्यावतीने तलावाचा संपूर्ण नवीन विकास आराखडा महापालिकेस सादर करण्यात येणार आहे. निसर्गावर व तेथील उद्यानावर कोणताही विपरित परिणाम होऊ नये याची दक्षता घेत हे सुशोभिकरण करण्यात येणार आहे. चौक व आयलंडच्या कामासाठी केएसबीपीकडून समन्वय अधिकारी नेमण्यात येणार आहे. दर सहा महिन्यांनी यासंदर्भातील माहिती महापौर व आयुक्तांना देण्यात येणार आहे. इंडियन इन्स्टिट्यूट ऑफ इंटिरिअर डिझायनर्स व केएसबीपीच्यावतीने दाभोळकर कॉर्नर तर गंगावेश चौकाचे सुशोभिकरण अर्बन बँक व इंडियन इन्स्टिट्यूट ऑफ आर्किटेक्ट्सच्यावतीने करण्यात येणार आहेत.’

यावेळी उपमहापौर अर्जुन माने, सभापती वहिदा सौदागर, सुरेखा शहा, नगरसेवक प्रवीण केसरकर, आदिल फरास उपस्थित होते.

चौकट

विद्रूपीकरण केल्यास कारवाई

‘शहरातील काही चौकांचे परिसरातील लोकांकडून विद्रुपीकरण केले जात आहे. शहर सौंदर्यीकरणास मदत करण्याऐवजी विद्रुप करणाऱ्यावर कारवाई करण्यात येणार आहे. कोणत्याही प्रकारे आयलँड विद्रुप केल्यास संबंधितांवर कडक कारवाई करू’ असा इशारा महापौर हसिना फरास यांनी दिला. त्या म्हणाल्या, ‘कोणत्याही राजकीय पक्षाने अशा आयलँडवर जाहिरातबाजी केल्यास त्यावर काळे फासण्यात येईल.’

हे चौक, आयलंड होणार सुशोभित

कावळा नाका, तावडे हॉटेल परिसर, सदरबाजार चौक, धैर्यप्रसाद चौक, कोयास्को चौक, पंचशील हॉटेल चौक, दाभोळकर कॉर्नर, ट्रेड सेंटर, व्हीनस कॉर्नर, विद्यापीठ चौक, सायबर चौक, राजाराम टॉकीज, बिंदू चौक, सीपीआर, जिल्हाधिकारी कार्यालय, भगवा चौक, जयंती नाला आयलंड, शिवाजी पूल चौक, पोलिस मुख्यालय, सीबीएस, गंगावेश, रंकाळा स्टँड, टाकाळा चौक, तोरस्कर चौक, माऊली चौक, शाहू मिल चौक, मिरजकर तिकटी, पोस्ट ऑफिस चौक, बागल चौक.

मोबाइल अॅप डाउनलोड करा आणि राहा अपडेट

कामामुळेच ‘टॉप वन’ बनलो

May 26, 2017, 2:30 pm

≫ Next: श्री अंबाबाई मूर्तीची झीज

≪ Previous: तीस चौकांचे होणार सुभोभिकरण

$

0

0

म. टा. प्रतिनिधी, कोल्हापूर

‘जिल्ह्याचा विकास आणि लोककल्याण यावर फोकस ठेवून मी खासदार म्हणून भूमिका पार पाडत आहे. लोकसभेतील अभ्यासपूर्ण मांडणी आणि विकासकामांच्या सोडवणुकीसाठी सातत्याने पाठपुरावा केल्यामुळे टॉप टेन म्हणून गौरव झाला. पहिल्या वषी टॉप टेन, दुसऱ्या वर्षी टॉप थ्री आणि तिसऱ्या वर्षी टॉप वन अशी चढती कमान आत्मविश्वास उंचावणारी आहे’ असे खासदार धनंजय महाडिक यांनी ‘महाराष्ट्र टाइम्स’शी बोलताना सांगितले.

खासदार महाडिक म्हणाले, ‘मी जिल्ह्याचा विकास नजरेसमोर ठेवून कार्यरत आहे. कोल्हापूरच्या विकासाला गती लाभण्यासाठी विमानसेवा अत्यावश्यक आहे. यासंदर्भात सर्व तांत्रिक बाबींची पूर्तता केल्या. सप्टेंबरपासून विमानसेवा सुरळीतपणे सुरु होईल असा विश्वास आहे. कोल्हापूरच्या रेल्वे स्थानकांत विविध सुविधासह कोल्हापूर-पुणे रेल्वेमार्गाचे दुहेरीकरण विद्युतीकरणाच्या प्रयत्नांना यश आले. कोल्हापूर-वैभववाडी रेल्वेसाठी सातत्याने पाठपुरावा केला. कोकणला कोल्हापूर रेल्वेने जोडण्याच्या कामाला नजीकच्या सुरुवात होईल. कोल्हापुरात मुंबई उच्च न्यायालयाचे सर्किट बेंचचा मुद्दा संसदेत मांडला. शेतकऱ्यांच्या कर्जमाफीची मागणी केली. सातत्याने केलेल्या पाठपुराव्यामुळे कोल्हापुरात पासपोर्ट कार्यालय सुरू झाले. जिल्हा पातळीवर पासपोर्ट कार्यालय सुरु होण्याचा देशातील हा पहिला पथदर्शी प्रयोग आहे.’

खासदार महाडिक म्हणाले, ‘कोल्हापूर जिल्ह्याचा सर्वांगिण विकासासाठी केंद्र सरकारकडे २३०० कोटी रुपयांचा विकास निधी द्यावा अशी मागणी के​ली आहे. जिल्ह्यातील रस्त्यांच्या दुरुस्तीसाठी भरीव निधी मिळावा म्हणून सरकार दरबारी पाठपुरावा केला. पंतप्रधान स्वास्थ सुरक्षा योजनेंतर्गत सीपीआरचा समावेश करुन सीपीआरला वैद्यकीय उपकरणे, मशिनरी मिळवून दिली. पंचगंगा नदी प्रदूषण मुक्तीसाठी भरघोस निधी मिळावा यासाठी मिळावा याकरिता प्रयत्न केले. कोल्हापूर जिल्हा विकासाचा रोल मॉडेल बनावा यासाठी पूर्ण क्षमतेने काम करणार आहे. संसदेत ७०४ प्रश्न विचारले. देशातील टॉप वन खासदार, मानाचा संसद रत्न पुरस्कारांनी गौरव झाला. यामध्ये कोल्हापुरातील जनतेचा मोठा वाटा आहे.’

मोबाइल अॅप डाउनलोड करा आणि राहा अपडेट

---

श्री अंबाबाई मूर्तीची झीज

May 26, 2017, 2:30 pm

≫ Next: योजनांना मुहूर्ताची प्रतीक्षा

≪ Previous: कामामुळेच ‘टॉप वन’ बनलो

$

0

0

म. टा. प्रतिनिधी, कोल्हापूर

दोन वर्षांपूर्वी रासायनिक संवर्धन प्रक्रिया केल्यानंतरही करवीर निवासिनी श्री अंबाबाईच्या मूर्तीची झीज होऊ लागली आहे. त्यामुळे मूर्ती संवर्धनासाठी केलेली ही रासायनिक संवर्धनाची प्रक्रियाच कुचकामी ठरल्याचे स्पष्ट होत आहे. मूर्तीवरील पांढरे डाग आणि रासायनिक थर निघत आहे.

श्री अंबाबाईच्या मूर्तीवर रासायनिक संवर्धन प्रक्रिया २२ जुलै २०१५ ते ६ ऑगस्ट २०१५ दरम्यान झाली. ही प्रक्रिया पूर्ण झाल्यानंतर मूर्ती सुस्थितीत रहावी, यासाठी केंद्रीय पुरातत्व समितीने काही नियम आणि अटींचे पालन करायला सूचवले होते. मात्र त्याकडे दुर्लक्ष झाले. त्यामुळेच मूर्तीची झीज होत असल्याचे बोलले जात आहे.

रासायनिक प्रक्रिया झाल्यानंतर पुरातत्त्व विभागाचे अधिकारी डॉ. एम. आर. सिंह यांनी मूर्तीचे रासायनिक संवर्धन चांगल्या पद्धतीने झाले असून, किमान शंभर वर्षे मूर्तीला काही होणार नसल्याचे सांगितले होते. मात्र मूर्ती संवर्धनानंतर आठ महिन्यातच मूर्तीवर पांढरे डाग दिसू लागले आहेत. देवीच्या पायाची बोटे, गदेचे टोक झिजले आहे. त्यामुळे रासायनिक संवर्धन प्रक्रियेवरच शंका उपस्थित केली जात आहे.



मूर्ती संवर्धनासाठी दोन वर्षांनी वॉटर प्रुफिंग करणे आवश्यक आहे. याचबरोबर बाहेरील भिंतींवरील रंग काढणे, प्रदक्षिणा मार्गावरील फरशा काढल्यानंतर त्यावरील सिमेंटचे थर काढणे आवश्यक आहे.

गजानन मुनिश्वर, श्रीपूजक

मूर्तीची झीज होणे ही अत्यंत गंभीर बाब आहे. पश्चिम महाराष्ट्र देवस्थान समितीचे अध्यक्ष म्हणून जिल्हाधिकाऱ्यांनी याची गांभीर्याने दखल घ्यावी. अन्यथा या प्रश्नावर आवाज उठवू.

सुभाष वोरा, सदस्य, पश्चिम महाराष्ट्र देवस्थान समिती



संवर्धन ठरले कुचकामी

दोन वर्षांपूर्वी अंबाबाई मूर्तीचे रासायनिक संवर्धन करण्याचे ठरले होते. मात्र पुरातत्त्व अधिकाऱ्यांनी मूर्तीवर नैसर्गिक लेपन करण्याचा निर्णय घेतला. मूर्ती अभ्यासकांच्या मतानुसार मूर्तीवर वज्रलेपाचा थर देण्यात आला आणि त्यावर हे लेपन करण्यात आले. मूर्ती संवर्धन करण्यासाठी किमान सहा महिने आधी मूर्तीचा अभ्यास करुन लेपनाची गुणवत्ता तपासूनच संवर्धन करणे आवश्यक होते. मात्र तसे काहीच केले गेले नसल्याचे मूर्ती अभ्यासकांनी सांगितले.

अशा आहेत अटी

श्री अंबाबाईच्या गर्भकुडीतील आर्द्रता कमी करण्यासाठी पाण्याचा साठा काढणे

गाभारा आणि गर्भकुडीला जोडणारी लाकडी चौकट काढणे

गर्भकुडीत निर्माल्य व फुलांचा साठा ठेवू नये

पाण्याच्या प्लास्टिक बाटल्यांचा साठा ठेवू नये

गाभाऱ्यातील चांदीच्या वस्तू, चौथरा, पायऱ्यांवर सोन्याचे पाणी द्यावे

गर्भकुडीत अधिकाधिक पाच श्रीपूजकांनीच थांबावे

पूजेसाठी दुधाचा वापर करायचा झाल्यास गायीचे दूधच वापरावे

दर्जेदार मधाचा वापर करावा

साडी आणि नित्यालंकाराचे वजन कमी करण्यासाठी दागिन्यांची संख्या कमी करावी

मोबाइल अॅप डाउनलोड करा आणि राहा अपडेट

योजनांना मुहूर्ताची प्रतीक्षा

May 26, 2017, 2:30 pm

≫ Next: चिमुकल्यांच्या गळाभेटीने फुटला भावनांचा बांध

≪ Previous: श्री अंबाबाई मूर्तीची झीज

$

0

0

म. टा. प्रतिनिधी, कोल्हापूर

लोकसभेत पहिल्यांदाच प्रतिनिधीत्व करणाऱ्या खासदार धनंजय महाडिक यांची पहिल्या तीन वर्षात संसदेतील ‘टॉप वन’ खासदार म्हणून गणना झाली. लोकसभेत सर्वाधिक प्रश्नांची मांडणी, प्रश्नांच्या सोडवणुकीसाठी पाठपुरावा ​या निकषावर हा बहुमान मिळाला. खासदारांच्या दृष्टीने ही बाब अभिमानस्पद असली तरी या कालावधीत त्यांनी जाहीर केलेल्या महत्वाकांक्षी योजनांच्या कामाचा मुहूर्ताचा श्रीफळ अद्याप फुटलेला नाही.

कोल्हापुरातील बास्केट ब्रीज, विमानसेवा सुरू करण्याचे जाहीर केले होते. निधीची तरतूदही झाली. मात्र, बास्केट ब्रीज कामाला अजून सुरुवात झाली नाही. पंचगंगा नदी प्रदूषणमुक्ती, मॉडेल रेल्वे स्टेशन, स्मार्ट सिटी, बहुमजली पार्किंग व्यवस्था, कोल्हापूरला पर्यटनाच्या नकाशावर आणणाऱ्या उपक्रमांत कोल्हापूर अजूनही मुख्य ट्रॅकवर दिसत नाही. तर पासपोर्ट कार्यालय, विमानसेवा, रेल्वे मार्गाचे दुहेरीकरण-विद्युतीकरण, सीपीआरला उर्जितावस्था, पर्यायी शिवाजी पुलाच्या बांधकामासाठी पाठपुरावा या त्यांच्या जमेच्या बाजू आहेत. महाडिक यांच्या ​सक्रिय कारभारामुळे अपेक्षा उंचावल्या आहेत. मात्र आगामी दोन वर्षात विकासकामांच्या पूर्ततेचे आव्हान त्यांच्यासमोर आहे.

करवीर निवासिनी अंबाबाई मंदिर विकास आराखड्याचा प्रश्न अनेक वर्षे चर्चेत आहे. यासह जिल्ह्यातील जोतिबा, खिद्रापूर, नृसिंहवाडी या प्राचीन मंदिरामुळे धार्मिक पर्यटनाला मोठा वाव आहे. ऐतिहासिक वारसा सांगणारे १३ किल्ले आहेत. पर्यटकांसाठी आकर्षणाचे केंद्रबिंदू ठरतील अशी संग्रहालये आहेत. कोल्हापुरातील सराफी व्यवसाय, चप्पल उद्योग, गूळ, फाउंड्री उद्योग यातून उद्योग-व्यवसायाची संधी, क्षमता मोठी आहे. कोल्हापुरी ब्रँडिंगच्या नावाखाली मार्केट निर्माण होऊ शकते. उद्योगापासून पर्यटन क्षेत्रापर्यंत आणि पायाभूत सुविधापासून नवीन प्रकल्पांच्या अंमलबजावणीसाठी कृतीबद्ध आराखड्याची आवश्यकता आहे. कोल्हापूरच्या सर्वांगिण विकासाचा व्यापक दृष्टिकोन ठेवून खासदार महाडिक यांनी संसदेच्या हिवाळी अधिवेशनात २३०० कोटी रुपयांची मागणी केली होती. हा कृती आराखडा मंजूर होऊन निधी उपलब्ध झाला तर जिल्ह्याचा कायापालट होऊ शकतो. त्यांच्याकडून नजीकच्या काळात या कामाची पूर्तता होणे आवश्यक आहे.

स्मार्ट सिटी, मोठे प्रकल्प दूरच

विकसित शहर म्हणून कोल्हापूरची ओळख देशभर निर्माण झाली असताना गेल्या काही वर्षांत कोल्हापूर शहरात राज्य आणि केंद्र सरकारचा एकही मोठा प्रोजेक्ट आला नाही. केंद्राच्या स्मार्ट सिटी योजनेत कोल्हापूर फेल झाले. महापालिकेच्या कारभारासोबत शहर व जिल्ह्यातील लोकप्रतिनिधींही तितकेच जबाबदार ठरले. वास्तविक स्मार्ट सिटीतून हजारो कोटी रुपयांचा निधी उपलब्ध होऊ शकला असता. वाहतुकीची कोंडी दूर करण्यासाठी तावडे हॉटेल ते शिवाजी पूलापर्यंतचा उड्डाणपूल, बहुमजली पार्किंग व्यवस्था, संस्थानकालीन रेल्वे स्टेशनचे पीपीपी तत्वावर मॉडेल रेल्वे स्टेशनचे काम रखडले. शहर आणि जिल्ह्याच्या औद्योगिक विकासाला लाभदायक ठरु शकणाऱ्या मुंबई-बेंगलोर कॉरिडोरमध्ये कोल्हापूरचा समावेश होऊ न शकल्याने त्याचा फटका भविष्यकाळात बसणार आहे. रत्नागिरी-नागपूर हा राष्ट्रीय महामार्ग अंतर्गत जिल्ह्यातील रस्त्यांची कामासाठी भू संपादन व इतर प्रक्रिया जलदगतीने झाल्यास शहर विकासाचा वेग धरू शकणार आहे. पश्चिम घाटातील पर्यावरणदृष्ट्या अतिशय संवेदनशील परिसरातील (इको सेन्सेटिव्ह झोन) गावांचा पुनर्वसनाचे प्रश्न आहेत.

सोयीची भूमिका, भाजपाशी जवळीक

महापालिका निवडणूक असो की जिल्हा परिषद. प्रत्येक ठिकाणी खासदार महाडिक यांनी सोयीची भूमिका घेतल्याचा आरोप राष्ट्रवादी काँग्रेसमधूनच केला गेला. राष्ट्रवादीचे नेते आमदार हसन मुश्रीफ आणि खासदार महाडिक यांच्यामध्ये सख्य नाही. पक्षात हे दोन्ही नेते सत्ताकेंद्र बनले आहेत. खासदारांनी भाजपचे नेते आणि पालकमंत्री चंद्रकांत पाटील यांच्यासोबत चांगलेच सख्य जमवले आहे. भाजपशी त्यांची वाढलेली जवळीक आणि भाजपसोबतची उठबस यातून वेगळे संकेत आहेत. त्यांची भाजपसोबतची जवळीक राष्ट्रवादीच्या नेत्यांना मान्य नाही. त्यातूनच मुश्रीफ यांची आमदार सतेज पाटील यांच्याशी राजकीय मैत्री घट्ट झाली आहे.

मोबाइल अॅप डाउनलोड करा आणि राहा अपडेट

चिमुकल्यांच्या गळाभेटीने फुटला भावनांचा बांध

May 27, 2017, 2:30 pm

≫ Next: ब्रेकफेलने पुन्हा बसचा थरार

≪ Previous: योजनांना मुहूर्ताची प्रतीक्षा

$

0

0

म. टा. प्रतिनिधी, कोल्हापूर

जन्मठेप आणि दीर्घकाळ शिक्षा भोगत असलेल्या कैद्यांसाठी मुलांची गळाभेट घेण्याचा उपक्रम कळंबा कारागृहाने सुरू केला आहे. शनिवारी या उपक्रमांतर्गत दीडशेवर कैद्यांच्या ३०० हून अधिक मुलांनी कारागृहात जाऊन पालकांची भेट घेतली. या भेटीने ताटातूट झालेल्या जिवांची घालमेल आणि मायेचा पाझर कारागृहाने अनुभवला.

कळंबा कारागृह प्रशासनाने कैदी आणि त्यांच्या मुलांच्या गळाभेटीचा उपक्रम सुरू केला आहे. गेल्यावर्षी सुरू झालेल्या उपक्रमात १३० कैद्यांनी मुलांची गळाभेट घेतली होती. यंदा २२० कैद्यांनी गळाभेटीसाठी अर्ज केला होता. यातील दीडशेहून अधिक मुलांनी कैद्यांची गळाभेट घेतली. विशेष म्हणजे यात आठ महिला कैद्यांचाही समावेश आहे.

कळंबा कारागृहाच्या भव्य दगडी तटबंदीच्या आत कैदी सकाळपासूनच मुलांच्या प्रतीक्षेत होते. अनेकांनी आठवड्यापासून या भेटीची तयारी सुरू केली होती. कारागृहात काम करून मिळणाऱ्या पैशांमधून त्यांनी आतील कँटीनमधून मिठाई खरेदी केली होती. काही कैद्यांनी स्वतःच्या हस्ताक्षरात मुलांसह नातेवाईकांसाठी पत्र लिहिले होते. छोट्या कॅरिबॅग घेऊन कैदी कारागृहाच्या प्रवेशद्वाराकडे नजर लावून बसले होते. अशीच घालमेल कारागृहाच्या बाहेरही होती. काही कैद्यांचे नातेवाईक शुक्रवारपासूनच कोल्हापुरात येऊन थांबले होते. शनिवारी सकाळीच चिमुकल्यांसह नातेवाईकांनी कारागृह प्रवेशद्वारावर गर्दी केली. नऊपासून ओळखपत्रे तपासून प्रशासनाने मुलांना आत सोडण्यास सुरुवात केली.

कारागृहाच्या आवारात घातलेल्या मंडपात कैदी आणि त्यांच्या मुलांची भेट झाली. यानंतर काही क्षण केवळ कुंदके आणि रडण्याचाच आवाज येत होता. कैद्यांसह त्यांच्या मुलांनाही अश्रू आवरता आले नाहीत. एकमेकांचे अश्रू पुसत धीर देणे आणि ख्यालीखुशालीची विचारपूस करण्यात तासाचा वेळ काही क्षणात निघून गेल्याची भावना त्यांच्या चेहऱ्यावर दिसत होती. प्रशासनाने या सर्वांसाठी एकत्रित स्नेहभोजनाचीही व्यवस्था केली होती. एकमेकांना घास भरवून त्यांची पुन्हा ताटातूट झाली. कैद्यांच्या मुलांनी पाणावल्या डोळ्यांनी पुन्हा भेटण्याचे ठरवून पालकांचा निरोप घेतला.


कैदी सिव्हिल ड्रेसमध्ये

कैद्यांना कारागृगात विशिष्ट गणवेश दिला जातो. याच गणवेशात मुलांची आणि त्यांची भेट झाली तरी मुलांच्या मनावर नकारात्मक परिणाम होण्याची भीती असते, त्यामुळे मानसोपचार तज्ज्ञांच्या सल्ल्याने प्रशासनाने कैद्यांना सिव्हिल ड्रेसमध्ये मुलांना भेटण्याची संधी दिली. यामुळे कारागृहातही कौटुंबिक वातावरणाचा अनुभव आला.

मोबाइल अॅप डाउनलोड करा आणि राहा अपडेट

ब्रेकफेलने पुन्हा बसचा थरार

May 27, 2017, 2:30 pm

≫ Next: प्रदर्शनातून लागणार प्रलंबित गुह्यांचा शोध

≪ Previous: चिमुकल्यांच्या गळाभेटीने फुटला भावनांचा बांध

$

0

0

म. टा. प्रतिनिधी, कोल्हापूर

ऐन गर्दीच्या वेळी रंकाळा चौपाटीजवळ बोलोली-रंकाळा एसटीचा ब्रेक फेल झाल्याने पुन्हा अपघाताचा थरार अनुभवाला आला. प्रसंगावधान राखून बस रोखण्यात यश आल्याने मोठा अनर्थ टळला. चार दिवसांपूर्वीच उमा टॉकीज चौकात झालेल्या एसटी अपघातानंतर पुन्हा एकदा संभाजीनगर आगाराच्याच एसटीचे ब्रेक निकामी झाल्याने परिवहन विभागाच्या गांभीर्याबद्दल उलटसुलट चर्चेला उधाण आले आहे.

बुधवारची घटना ताजी असतानाच शनिवारी रात्री सव्वाआठच्या सुमारास बोलोली-रंकाळा (एम. एच. १२ सी.एच. ७८७७) या एसटीचे ब्रेक निकामी झाले. चालक साताप्पा निकम (वय २७, रा. वट्टवाडी, ता. करवीर) बोलोलीहून रंकाळा बसस्थानकाकडे येत होते. चौपाटीजवळ आल्यानंतर ब्रेक निकामी झाल्याचे त्यांच्या लक्षात आले. यानंतर निकम यांनी गिअरवर बसची गती कमी करून ती थांबवण्याचा प्रयत्न केला, मात्र एसटी थांबली नाही. याचवेळी वाहक एस. एम. तळेकर (३१, रा. शिरशी, ता. राधानगरी) यांनी खिडकीतून आरडाओरडा करीत रस्ता रिकामा करण्याचे आवाहन केले. एसटीची गती कमी होती, मात्र अपघाताचा धोका असल्याने लोकांनी आरडाओरडा सुरू केला. दरम्यान, चौपाटीलगत रस्त्याकडेला थांबलेला तरुण जावेद दिलावर फरास याच्या हा प्रकार लक्षात आल्याने त्याने बसच्या चाकाखाली मोठे दगड टाकून एसटी थांबवण्याचा प्रयत्न केला. काही अंतर पुढे गेल्यानंतर अखेर श्रीराम बेकरीसमोर एसटी थांबवण्यात यश आल्याने सर्वांनीच सुटकेचा निश्वास सोडला.

एसटीत सात प्रवाशी होते. ब्रेक निकामी झाल्याचे समजताच या प्रवाशांचीही तारांबळ उडाली. काहीक्षण त्यांनी अक्षरशः जीव मुठीत घेऊन प्रवास केला. वेळीच एसटी थांबवली नसती तर पुढे सिग्नलवरील गर्दीत एसटी घुसण्याचा धोका होता. ब्रेक निकामी झाल्याचे समजताच चालक निकम यांची पाचावर धारण बसली. रक्तदाब वाढल्याने त्यांना चक्करही आली. वाहक तळेकर आणि जावेद फरास यांनी निकम यांना तातडीने उपचारासाठी सीपीआरमध्ये दाखल केले. दरम्यान, पोलिस आणि संभाजीनगर आगारातील अधिकाऱ्यांनी घटनास्थळी धाव घेतली. दुसऱ्या एसटीच्या मदतीने ब्रेक निकामी झालेली एसटी आगाराकडे पाठवण्यात आली. या घटनेने रंकाळा परिसरातील वाहतूक मात्र अर्धा तास ठप्प झाली होती. पुन्हा संभाजीनगर आगाराच्या बसचा अपघात झाल्याची चर्चाही सोशल मीडियात सुरू झाली.


जावेदचे प्रसंगावधान

एसटीचे ब्रेक फेल झाल्याने रस्त्यावरील वाहने हटवण्यासाठी मोठा गोंधळ सुरू होता. आरडाओरडा ऐकून चौपाटीलगत थांबलेल्या जावेद फरासने धोका पत्करत एसटी थांबवण्याचे प्रयत्न केले. मोठे दगड एसटीच्या चाकाखाली टाकून एसटी थांबवल्याने अपघाताचा धोका टळल्याने जावेदच्या प्रसंगावधानाचे सर्वांनीच कौतुक केले.

एसटीला गांभीर्यच नाही?

उमा टॉकीज चौकात झालेल्या अपघातानंतर परिवहन विभागाकडील सर्व एसटींची पाहणी केली जाईल, असे अधिकाऱ्यांनी सांगितले होते, मात्र चार दिवसातच ब्रेक निकामी झाल्याने पुन्हा अपघाताचा थरार निर्माण झाल्याने एसटीच्या एसटीच्या गांभीर्याबाबत शंका उपस्थित झाली आहे.

मोबाइल अॅप डाउनलोड करा आणि राहा अपडेट

प्रदर्शनातून लागणार प्रलंबित गुह्यांचा शोध

May 28, 2017, 2:30 pm

≫ Next: आजऱ्यात टस्करची दहशत

≪ Previous: ब्रेकफेलने पुन्हा बसचा थरार

$

0

0

म. टा. प्रतिनिधी, कोल्हापूर

बेवारस वाहनांसह खून आणि बेपत्ता झालेल्या व्यक्तींचे गुन्हे पोलिस ठाण्यांमध्ये दाखल होतात. मात्र त्याची उकल होण्याचे प्रमाण कमी आहे. त्यामुळे पोलिसांनी कोल्हापूर परिक्षेत्रासह कोकण आणि गोवा विभागातील उकल न झालेल्या गुन्ह्यांचे प्रदर्शन सुरू केले आहे. या प्रदर्शनातून पोलिसांसह नागरिकांनाही गुन्ह्यांची माहिती मिळणार असल्याने गुन्हे उघडकीस येण्यास मदत होत आहे. अलंकार हॉल येथे हे प्रदर्शन सोमवारपर्यंत (ता. २९) सुरू राहिल.

अदखलपात्र गुन्ह्यांपासून गंभीर स्वरुपाची मारामारी, खून, चोरी, घरफोड्या, दरोडे, वाहनचोरी अशा अनेक गुन्ह्यांची नोंद पोलिस ठाण्यांमध्ये होते. गुन्हेगाराची माहिती मिळताच पोलिस त्याला अटक करून त्याच्यावर कायदेशीर कारवाई करतात. मात्र काही गुन्ह्यांची पुरेशी माहितीच उपलब्ध होत नसल्याने त्यांची उकल होत नाही. विशेषतः बेपत्ता व्यक्ती, बेवारस व्यक्तीचा खून, अपहरण, वाहन चोरी अशा गुन्ह्यांची उकल करण्यासाठी पोलिसांना प्रयत्नांची पराकाष्टा करावी लागते. अनेक शक्यता पडताळूनदेखील काही गुन्हे उघडकीस आणण्यास यश येत नाही, तेव्हा पोलिसदेखील हतबल होतात. असे गुन्हे उघडकीस आणण्यासाठी मदत व्हावी या हेतून उघडकीस न आलेल्या गुन्ह्यांचे प्रदर्शन भरवले जाते.

कोल्हापूर परिक्षेत्रासह कोकण आणि गोव्यातील गुन्ह्यांचे प्रदर्शन शुक्रवारपासून कसबा बावडा येथील अलंकार हॉलमध्ये सुरू झाले. पोलिस अधीक्षक संजय मोहिते, अपर पोलिस अधीक्षक सुहेल शर्मा, अतिरिक्त पोलिस अधीक्षक डॉ. दिनेश बारी, स्थानिक गुन्हे अन्वेषण विभागाचे निरीक्षक दिनकर मोहिते यांच्या उपस्थितीत प्रदर्शनाला सुरुवात झाली. प्रदर्शनात कोल्हापूर, सांगली, सातारा, सोलापूर ग्रामीण, पुणे ग्रामीण, रत्नागिरी, सिंधुदुर्ग, गोवा उत्तर आणि बेळगाव ग्रामीण विभागातील २०१२ पासून उकल न झालेल्या गुन्ह्यांची माहिती मांडण्यात आली आहे. बेपत्ता व्यक्ती, बेवारस व्यक्तींचे मृत्यू, अपहरण आणि बेवारस वाहनांची माहिती या प्रदर्शनात आहे. विशेष म्हणजे यात सर्वाधिक २२९५ बेपत्ता व्यक्तींची नोंद आहे. यातही १५ ते २५ वयोगटातील तरुणींचे प्रमाण अधिक आहे. लग्न करण्याच्या हेतूने घरातून पळून गेलेल्या तरुणींचाही यात समावेश असल्याचे पोलिस अधिकाऱ्यांनी सांगितले. सोलापूर जिल्ह्यात २६६ बेवारस मयतांची नोंद आहे. यानंतर सांगलीत १४६ बेवारस मयतांची नोंद आहे. मयतांबद्दल काहीच माहिती उपलब्ध न झाल्याने गुन्ह्यांची उकल होऊ शकली नाही. मयतांचे फोटो, खून झालेले ठिकाण, मृत व्यक्तीकडे सापडलेल्या वस्तू यांची माहिती प्रदर्शनात मांडली आहे.

तातडीने साधा संपर्क

हे प्रदर्शन सर्वांसाठी खुले असून, ज्यांचे नातेवाईक बेपत्ता आहेत त्यांनी आवर्जून प्रदर्शनाला भेट द्यावी असे आवाहन पोलिस अधीक्षक संजय मोहिते यांनी केले आहे. बेपत्ता नातेवाईकांबाबत प्रदर्शनातून काही माहिती मिळताच नातेवाईकांनी तातडीने उपस्थित पोलिस कर्मचारी आणि अधिकाऱ्यांशी संपर्क साधावा. संबंधित गुन्ह्याची सर्व माहिती त्यांना मिळणार आहे.

पोलिसांचीही प्रदर्शनाला भेट

मिसिंग व्यक्ती आणि वाहनांचे अनेक गुन्हे प्रदर्शनातून उघडकीस येण्याची शक्यता आहे. याबाबत पोलिस ठाण्यांमध्ये गुन्हे दाखल होताच इतर सर्व पोलिस ठाण्यांनाही माहिती कळवली जाते, मात्र एकाच ठिकाणी परिक्षेत्रासह कोकण आणि गोवा विभागातील गुन्ह्यांची माहिती उपलब्ध असल्याने पोलिसांनाही याचा तपासासाठी उपयोग होणार आहे. प्रत्येक पोलिस ठाण्यांचे एक पथक प्रदर्शनाला भेट देणार आहे.

मोबाइल अॅप डाउनलोड करा आणि राहा अपडेट