Twitter:@rg_ravirajMT
जिल्ह्यातील गव्यांच्या संख्येत यावर्षी सुमारे चाळीस टक्क्यांनी वाढ झाल्याचे प्राणी गणनेतून स्पष्ट झाले असून, त्यामुळे दक्षता न घेतल्यास माणूस-गवा संघर्ष वाढण्याचा धोका आहे. भुरदरगड तालुक्यातील आकुर्डे येथे काही दिवसांपूर्वी गव्याच्या हल्ल्यात दोघांचा मृत्यू झाला होता. त्यामुळे माणूस आणि वन्य प्राणी यांच्यातील संघर्षाचे गांभीर्य वाढणार आहे.
वनखात्याच्या प्रादेशिक विभागाने जिल्ह्यातील प्राण्यांची नुकतीच प्रगणना केली आहे. दर वर्षी बौद्ध पोर्णिमेच्या रात्री ही गणना केली जाते. बौद्ध पोर्णिमेला पडणाऱ्या चांदण्यात जंगलांमधील पाणवठ्यावर येणाऱ्या प्राण्यांची गणना करून ही आकडेवारी काढण्यात येते. थेट प्राणी गणना यापेक्षा एक ट्रेंड म्हणून, या गणनेकडे पाहण्यात येते. यंदा १० आणि ११ मे रोजी झालेल्या प्राणी गणनेच्या आकडेवारीनुसार आजरा, भुदरगड, पन्हाळा आणि राधानगरी या तालुक्यांमध्ये गव्यांची संख्या सर्वाधिक दिसत आहे. कागल, हातकणंगले आणि शिरोळ तालुक्यात एकही गवा नसल्याचे स्पष्ट झाले आहे.
आकुर्डे येथील दुर्दैवी घटनेनंतर वनविभागाने गव्यांचा मानवाशी होणारा संघर्ष टाळण्यासाठी सुरुवात केली आहे. मुळात गवा हा हिंस्त्र प्राणी नाही. माणसाचे शरीर हे त्याचे अन्नही नाही. त्यामुळे त्याचाशी होणार संघर्ष टाळण्यासाठी माणसानेच काळजी घेण्याची गरज आहे. राधानगरी, भुदरगड आणि पन्हाळा तालक्यात जंगल आणि गाव यांच्यामधील जागेत गेल्या काहीवर्षांत मोठ्याप्रमाणावर ऊस शेती वाढली आहे. त्यामुळे गव्यांच्या अधिवासालाच धक्का पोहोचल्याचे दिसत आहे. गवा माणसाच्या वस्ती घुसत असल्याची चर्चा होत असली, तरी त्याआधी माणूस गव्यांच्या वस्तीत घुसला त्यामुळेच दोघांमधील संघर्ष पेटत असल्याचे स्पष्ट होत आहे. आता तर जिल्ह्यत गव्यांची संख्याच वाढल्याने भविष्यात अशा घटना टाळण्यासाठी शेतकरी, ग्रामस्थ आणि वन विभाग यांनी अधिक दक्षता घेण्याची गरज आहे.
जिल्ह्यात गव्यांची संख्या लक्षणीय आहे. यावर्षी त्यात मोठी वाढ दिसून येत आहे. त्यामुळे भविष्यात दुर्दैवी घटना घडू नयेत, यासाठी काळजी घेणे महत्त्वाचे आहे. मुळात गवा हा हिंस्त्र प्राणी नाही. त्याची जीवनशैली समजून घेऊन, माणसाने हा प्रश्न हाताळला पाहिजे. दोघांमधील संघर्ष टाळण्यासाठी वनविभाग उपाययोजना आखत आहे. ग्रामस्थांनी आता त्याची काटेकोर अंमलबजावणी करणे गरजेचे आहे.
- प्रभू नाथ शुक्ला, उपवनसंरक्षक, वनविभाग कोल्हापूर
वाघांच्या संख्येवर प्रश्नचिन्ह?
वनविभागाने केलेल्या प्रगणनेवेळी वाघ किंवा बिबट्या दिलेला नाही. यासंदर्भात गणनेच्या वेळी प्राणी दिसला नाही, तर त्याची नोंद होत नसल्याचे वन अधिकाऱ्यांनी स्पष्ट केले. त्यातच वाघ आणि बिबट्या गव्यांची शिकार करतो. त्यामुळे वाघ दिसला नाही आणि गव्यांची संख्या वाढली, यातून जिल्ह्यातील वाघांच्या संख्येवर प्रश्नचिन्ह उपस्थित होत आहे.
तालुकावार गव्यांची संख्या
तालुका २०१६ २०१७
पन्हाळा ३३ ५८
आजरा ८४ १८२
गगनबावडा ४० ६९
राधानगरी १७ ३३
चंदगड २७ ३३
करवीर ० ३
शाहूवाडी ६५ ७५
भुदरगड ५० ९०
चंदगड ११७ ५४
मोबाइल अॅप डाउनलोड करा आणि राहा अपडेट
