कोल्हापूर : शहरातील वाहतूक कोंडी टाळण्यासाठी गर्दीच्या ठिकाणी उड्डाणपूल उभारणीचा प्रस्ताव पुन्हा चर्चेत आला आहे. पालकमंत्री चंद्रकांत पाटील यांनी यात लक्ष घातल्याने उड्डाणपूल उभारणीच्या आशा पल्लवीत झाल्या आहेत.
मात्र वाहतूक कोंडी, विद्यार्थ्यांच्या सुरक्षिततेचा विचार करून यापूर्वीही उड्डाणपूल, स्कायवॉक आणि सब वे तयार करण्याच्या घोषणा झाल्या. महापालिकेच्या काही योजनांसाठी अंदाजपत्रकात तरतूद केली. आमदार फंडातून निधी मिळवून पादचाऱ्यांसाठी पूल उभारण्याचे ठरले. पण नियोजन व पाठपुराव्याचा अभाव, महापालिकेची कमकुवत आर्थिक स्थिती, निधीचा घोळ यामुळे शाहू खासबाग मैदान चौक, गंगावेश, विक्रमनगर या परिसरातील उड्डाणपुलांचे प्रस्ताव अधांतरीच लटकले. सिद्धाळा गार्डन परिसरात विद्यार्थ्यांसाठी उभारण्यात येणाऱ्या स्कायवॉक उभारणीसाठी निविदा काढण्यात आली. चार कोटी ३० लाखांचा हा प्रोजेक्ट निधीअभावी थांबला आहे.
शाहू खासबाग मैदान परिसर हा गजबजलेला परिसर आहे. संगीतसूर्य केशवराव भोसले नाट्यगृह, परिसरात नामवंत शाळा, खाऊगल्ली, बँका, हॉटेल, व्यापारी संकुले, केएमटी बसथांबा यामुळे येथे मोठ्या प्रमाणात वाहतूक सुरू असते. दररोज सकाळी व संध्याकाळी शाळा, कार्यालये सुरू होताना आणि बंद होताना विद्यार्थी, नागरिकांची गर्दी असते. यावेळी सुरू असलेल्या वाहतुकीमुळे कोंडी होते. विद्यार्थ्यांसाठी ही स्थिती धोकादायक असते. त्यामुळे परिसरातील संघटनांनी आंदोलन केले. त्यानंतर विद्यार्थी, नागरिकांच्या सुरक्षिततेसाठी चौकात स्कायवॉक उभारण्याचे ठरले. तत्कालिन स्थायी समिती सभापती आदिल फरास यांनी अंदाजपत्रकात दीड कोटी रुपयांची तरतूद केली. दीड कोटी रुपये बीओटी तत्वावर उभारुन स्कायवॉक तयार करण्याचे निश्चित झाले. पण महापालिकेची आर्थिक स्थिती आणि बीओटी तत्वावर प्रकल्प राबविण्यात येणाऱ्या अडचणी यामुळे पुढे काहीच झाले नाही. स्कायवॉकचा पत्ता नाही, खाऊ गल्लीतील अस्ताव्यस्त पार्किंग आणि मोठ्या प्रमाणातील वाहतूक यामुळे सायंकाळी सहा ते रात्री नऊ या वेळेत हा मार्ग जीवघेणा ठरला आहे. गंगावेश, रंकाळा स्टँन्ड ते जाऊळाचा बाल गणेश मंदिरपर्यंत उड्डाणपूल प्रस्तावित आहे. मात्र, निधीअभावी या कामालाही सुरुवात झाली नाही.
ओव्हरब्रिजची केवळ चर्चाच
तावडे हॉटेल ते कावळा नाका या मार्गावर सतत वर्दळ असते. शहरात प्रवेशासाठी शिरोली पुलापासूनचा हा प्रमुख मार्ग आहे. रस्त्याला जोडणारा सर्व्हीस मार्ग हा अरुंद आहे. यासाठी या मार्गावरून थेट प्रवेश करता यावा यासाठी शिरोली पुलापासून मुख्य रस्त्यापर्यंत उड्डाणपूल बांधून थेट स्वागत कमानीपर्यंत येण्याची सुविधा उपलब्ध करण्यासंदर्भात महापालिकेच्या सर्वसाधारण सभेत चर्चा झाली. २०१५-१६ मधील अंदाजपत्रकात शिरोली पूल येथून शहरात प्रवेशासाठी ओव्हरबीज बांधण्यासाठी तरतूद करण्यात आली. पण अधिकारी बदलले, पदाधिकाऱ्यांमध्ये खांदेपालट झाला आणि जुन्या योजना बासनात गुंडाळून ठेवण्यात आल्या.
न्यू महाव्दार रोडवरील सिद्धाळा गार्डनसमोरील मार्गावर खास विद्यार्थ्यांसाठी उड्डाणपूल उभारणीचा प्रस्ताव आहे. माजी नगरसेवक सचिन चव्हाण यांचा यासाठी पाठपुरावा सुरू आहे. स. म. लोहिया, न्यू हायस्कूल, पदमाराजे गर्ल्सस हायस्कूल व ज्युनिअर कॉलेज, रा. ना. सामाणी विद्यालय येथे असल्याने या मार्गावर विद्यार्थ्यांची वर्दळ असते. या परिसरात विद्यार्थ्यांच्या सुरक्षिततेचा विचार करुन उड्डाणपूल उभारणीचा आराखडा तयार केला. जवळपास तीन कोटी ४० लाख रुपयांचा हा आराखडा आहे. साठ लाखांच्या कामाची निविदा प्रक्रिया राबवली. मात्र नंतर या प्रकल्पात अडचणी निर्माण होत गेल्या. या भागातील प्रस्तावित स्कायवॉकचे काम रखडले. या भागातील स्कायवॉकसाठी पुन्हा एकदा महापालिकेत हालचाली सुरू आहेत. या भागात स्कायवॉक झाला तर न्यू महाद्वार रोड, सिद्धाळा गार्डन, मंगळवार पेठ, शिवाजी पेठ परिसरातील नागरिकांना गर्दीपासून थोड्या फार प्रमाणात दिलासा मिळू शकेल. या भागातील वर्दळ लक्षात घेता आणखी सुधारणांची गरज आहे. महापालिकेने या भागाचा विचार करून वाहतूक सुधारणांसाठी आणखी प्रयत्न करण्याची गरज आहे.
शाहू मैदान चौकात सब-वे होणे अत्यावश्यक आहे. वाहतुकीची समस्या तीव्र बनली आहे. यासाठी सुमारे चार कोटी रुपये खर्च अपेक्षित आहे. पालकमंत्री चंद्रकांत पाटील यांच्यासमोर ही योजना मांडली आहे. पालकमंत्र्यांनी प्राथमिक टप्प्यात निधी देण्याचे मान्य केले आहे. या भागात सब वे झाल्यास वाहतूक कोंडी सुटेल.
- आदिल फरास, माजी नगरसेवक
सिद्धाळा गार्डनसमोरील स्कायवॉकसाठी कागदपत्रांची पूर्तता, प्रशासकीय पातळीवर पाठपुरावा सुरू आहे. येत्या काही दिवसांत पहिल्या टप्प्यातील कामाला सुरुवात होईल. त्यासाठी प्रयत्न सुरू आहेत.
- सचिन चव्हाण, माजी नगरसेवक
शहरातील वाहतूक कोंडीची १९ ठिकाणे निश्चित केली आहेत. कोंडी दूर करण्यासाठी प्रयत्न सुरू आहेत. सर्वाधिक रहदारीच्या रस्त्यांवर उड्डाणपूल उभारणीचे नियोजन आहे. पालकमंत्री चंद्रकांत पाटील यांच्यासमोर काही रस्त्यांवरील उड्डाणपुलांबाबत सादरीकरण केले आहे. निधीअभावी मोठे प्रकल्प उभारण्यात महापालिकेसमोर अडचणी आहेत.
- नेत्रदीप सरनोबत, शहर अभियंता, महापालिका
मोबाइल अॅप डाउनलोड करा आणि राहा अपडेट
