वाढदिवसाचा उत्साह, शुभेच्छांचे फोन आणि सोशल मीडियावरून शुभेच्छांचा वर्षाव स्वीकारत संध्याकाळी घरगुती सेलिब्रेशनचा बेत प्रदीप पांडुरंग सोळंकी (वय ६१, रा. नागाळापार्क) यांनी आखला होता. नवी कपडे परिधान करून मुलांसोबत दुकानात वेळ घालवला आणि वाढदिवसाच्या तयारीसाठी नेहमीपेक्षा दुपारी लवकर घरी जाण्याची घाई केली. एकसष्टीच्या सेलिब्रेशनचा बेत आखतानाच त्यांच्यावर काळाने घाला घातला. समोरून आलेल्या दुचाकीने दिलेल्या धडकेत ते क्षणात रक्ताच्या थारोळ्यात पडले आणि मोठ्या भावासमोरच ते गतप्राण झाले. एकसष्टीचे सेलिब्रेशन करण्याच्या तयारीत असलेल्या कुटुंबीयांना त्यांचा मृत्यूचा प्रचंड मोठा धक्का बसला.
प्रदीप सोळंकी हे सोळंकी परिवारातील नेहमी हसतखेळत राहणारे व्यक्तिमत्व. घरातील लहानग्यांसोबत लहान होणारे आणि मोठ्यांसोबत तेवढ्याच पोक्तपणाने वागणारे सोळंकी घरासह व्यावसायिक वर्तुळातही सर्वांचे लाडके. घरात तीन भावंडांमध्ये ते सर्वात लहान. तिघांचीही शितपेयाची दुकाने. प्रामाणिकपणा आणि सचोटीने त्यांनी स्वतःचा सोळंकी ब्रँड जपला आणि वाढवलाही. रोहित (२२) आणि याहित (२०) या दोन मुलांवरही त्यांनी असेच संस्कार केले, त्यामुळे भाऊसिंगजी रोडवरील त्यांच्या सोळंकी कोल्ड्रिंक हाऊसमध्ये नेहमीच वर्दळ असते. गप्पा मारण्यासाठी कोल्हापूरच्या आंदोलनांपासून ते मिसळपर्यंत आणि क्रिकेटपासून ते चित्रपटांपर्यंत कोणताच विषय त्यांना वर्ज नव्हता. वय वाढले, पण मनाने ते तरुणच होते. नेहमी टापटीप राहण्याच्या सवयीमुळे त्यांनी वयाची साठी ओलांडली यावर कुणाचा विश्वासच बसत नव्हता.
सोमवारी त्यांचा ६१ वा वाढदिवस असल्याने घरगुती सेलिब्रेशनचा बेत सुरू होता. सकाळीच आंघोळ आटोपून त्यांनी नवीन कपडे परिधान केली. मंदिरात जाऊन देवदर्शन केले. मोठा भाऊ किरण यांनीही प्रदीप यांना वाढदिवसाच्या शुभेच्छा दिल्या. मोबाइलवरून येणाऱ्या शुभेच्छा स्वीकारत सोळंकी कुटुंबीयांचा एकसष्टी सेलिब्रेशनचा प्लॅन सुरू होता. नाष्टा आटोपून दोन्ही मुलं भाऊसिंगजी रोडवरील दुकानाकडे गेली. काही वेळाने प्रदीप सोळंकी हेदेखील दुकानात गेले. दुपारपर्यंत दुकानातील कामे आटोपली. वाढदिवस असल्याने नेहमीपेक्षा थोडे लवकर घरी जाण्याची त्यांची घाई सुरू होती. सोबत मोठा भाऊ किरण हेदेखील होते. प्रदीप हे दुचाकीवरून घराकडे जाण्यासाठी निघाले.
उन्हामुळे रस्त्यावर फारशी वर्दळही नव्हती. जिल्हाधिकारी कार्यालयाच्या पुढे नवरंग अपार्टमेंटजवळ पोहोचताच समोरून आलेल्या दुचाकीचे हँडेल सोळंकी यांच्या दुचाकीला धडकले. यात सोळंकी यांची दुचाकी पडून ती रस्त्यावर घसरत काही अंतर फरफतट पुढे गेली. डोक्याला गंभीर जखम झाल्याने सोळंकी रक्ताच्या थारोळ्यात पडले होते. मोठे भाऊ किरण सोळंकी यांच्यासमोरच हा प्रकार घडला. कार पार्क करून येईपर्यंत मोठ्या प्रमाणात रक्तस्राव झाला. डोळ्यादेखत लहान भाऊ मृत्यूच्या दाढेत गेल्याचे पाहून किरण यांना धक्क बसला. प्रदीप सोळंकी यांना तातडीने नागरिकांनी उपचारासाठी सीपीआरमध्ये दाखल केले, मात्र उपचारापूर्वीच त्यांचा मृत्यू झाल्याचे डॉक्टरांनी सांगितले.
सोळंकी कुटुंबीयांवर दुःखाच डोंगर
अनपेक्षितपणे घडलेल्या या घटनेने सोळंकी कुटुंबीयांवर दुःखाचा डोंगर कोसळला. काही तासांपूर्वी एकसष्टीच्या सेलिब्रेशनची तयारी सुरू होती, त्याच घरात अंत्ययात्रेची तयारी करावी लागली. आता बर्थडेचे सेलिब्रेशन कुणाचे करायचे आणि हॅप्पी बर्थ डे कुणाला म्हणायचे असा हंबरडा प्रदीप सोळंकी यांच्या मुलांनी फोडला. रात्री उशिरापर्यंत कुटुंबीयांच्या सांत्वनासाठी नागरिकांची सोळंकी यांच्या घरी गर्दी होती.
धडक देणाऱ्या दुचाकीचा शोध सुरू
या अपघाताची नोंद शाहूपुरी पोलिस ठाण्यात झाली आहे. सोळंकी यांच्या दुचाकीला धडक देऊन पळालेल्या दुचाकीवर दोन तरुण होते, असे प्रत्यक्षदर्शींनी पोलिसांना सांगितले. परिसरातील सीसीटीव्ही फुटेजच्या माध्यमातून धडक देऊन पळालेले दुचाकीस्वार शोधण्याचे काम शाहूपुरी पोलिसांकडून सुरू आहे.
मोबाइल अॅप डाउनलोड करा आणि राहा अपडेट
