येथील संगीतसूर्य केशवराव भोसले नाट्यगृह व खासबाग मैदान या प्रकल्पाला जागतिक पातळीवर अत्यंत प्रतिष्ठेच्या मानल्या जाणाऱ्या इटलीमधील ए डिझाइन अॅवॉर्ड अँड स्पर्धेमधील ‘ए डिझाइन’ पुरस्काराने सन्मानित करण्यात आले आहे. नाट्यगृहाच्या नुतनीकरण प्रकल्पाला येथील आर्किटेक्ट सुरत अंजली असोसिएशनला कल्चरल हेरिटेज आणि कल्चरल इंडस्ट्रियल डिझाइन या विभागात हा पुरस्कार मिळाला आहे. या रुपाने शहरातील वास्तूशिल्पाला आंतरराष्ट्रीय दर्जाचा प्रथमच पुरस्कार मिळाला आहे.
हा पुरस्कार जागतिक स्तरावर चांगल्या डिझाइनची जागरुकता व समज निर्माण करण्यासाठी दिला जात आहे. डिझायनर्स, ब्रँड, कंपन्यांना उत्कृष्ट व उच्च प्रतीचे काम आणि प्रकल्प तयार करण्यास उत्तेजन देणे हे या पुरस्कारामागील ध्येय आहे.
महापालिकेच्या अखत्यारित असलेले केशवराव भोसले नाट्यगृह पूर्वी पॅलेस थिएटर म्हणून ओळखले जात होते. राज्यातील एक प्रसिद्ध नाट्यगृह म्हणून ओळख होती. या नाट्यगृहाचे दोनदा नुतनीकरण झाले होते. त्यानंतर वेळोवेळी केलेल्या बदलांमुळे मूळ स्वरुप लोप पावले होते. त्यामुळे २०१३ मध्ये नाट्यगृहाचे मूळ रुप जपत नुतनीकरण करण्याचे महापालिकेच्यावतीने ठरवण्यात आले होते. त्यानुसार मार्च २०१३ ते एप्रिल २०१५ या कालावधीत नुतनीकरण करण्यात आले. त्यासाठी आर्किटेक्ट जाधव यांनी आराखडा तयार केला. यामध्ये यापूर्वी केलेल्या नुतनीकरणातील खटकणाऱ्या अनेक गोष्टी दूर करत ऐतिहासिक बाज जपण्याचा प्रयत्न करण्यात आला. त्यासाठी नाट्यगृहाच्या दगडी इमारतीचा वापर व्यवस्थित करुन लाकडी कामामुळे जुना लूक कायम ठेवण्यात यशस्वी झाले.
नाट्यगृह व मैदान या सांस्कृतिक वारसा असलेल्या वास्तूचे जतन व संवर्धन करताना गतवैभव प्राप्त करुन दिले आहे. लाइट अँड साउंड, अॅकॉस्टिक्स, वातानुकुलीत यंत्रणा, अद्ययावत स्टेज या नवीन तंत्रज्ञानाचा अतिशय कुशलनेते वापर करण्यात आला आहे. स्ट्रक्चरल ऑडिट करून त्यामध्ये सुचवलेले उपाय स्वीकारून हा परिसर पुढील शंभर वर्षांसाठी मजबूत व सुधारित करण्यात आला आहे. या प्रकल्पाला फेब्रुवारी २०१७ मध्ये आय. आय. आय. डी. या संस्थेचा पब्लिक स्पेसेस या वर्गवारीमध्ये नॅशनल अॅवॉर्ड देण्यात आले आहे. या स्पर्धेची ज्युरी दिल्ली येथे झाली.
मोबाइल अॅप डाउनलोड करा आणि राहा अपडेट
