पत्नीचा फोटो काढताना दरीत पडून मृत्यू

March 19, 2017, 8:19 pm

≫ Next: ​सातारा झेडपीचेअध्यक्ष संजीवराजे?

≪ Previous: तुरुंगाधिकाऱ्याची बदली; सुभेदार निलंबितआरोपीकडे मोबाइल सापडल्याने कारवाई

$

0

0

म. टा. वृत्तसेवा, सातारा

सज्जनगडावर पत्नीचा फोटो काढत असताना पाय घसरून दरीत पडल्याने धनंजय जाधव (३२, सातारा) यांचा मृत्यू झाला. अवघ्या चार महिन्यांपूर्वी त्यांचा विवाह झाला होता.
धनंजय जाधव पत्नी नीलमबरोबर शुक्रवारी दुपारी दर्शनासाठी सज्जनगडावर गेले होते. मारुती मंदिराजवळ दोघेही विसावा घेण्यासाठी थांबले. या वेळी धनंजय जाधव फोटो काढत होते. फोटो काढत असताना दरीच्या दिशेने ते गेले. या वेळी त्यांचा पाय घसरून ते दरीत कोसळले. डोळ्यांसमोर पती दरीत खाली पडल्याने मदतीसाठी आरडाओरडा केला. काही वेळानंतर त्या ठिकाणी काही ग्रामस्थ गेले. मात्र, पती दरीत पडल्याच्या धक्क्याने नीलम बेशुद्ध पडली होती.
त्यामुळे घटनास्थळी जमलेल्या ग्रामस्थांना नेमकी घटना समजू शकली नाही. नीलम शुद्धीवर आल्यानंतर पती दरीत पडले असल्याचे तिने सांगितले. तोपर्यंत अंधार पडण्यास सुरुवात झाली होती.
पोलिसांना घटनेची माहिती मिळाल्यानंतर त्यांनी शोधमोहीम सुरू केली. रात्री ११च्या सुमारास धनंजय जाधव यांना शोधण्यात यश आले, मात्र त्यांचा मृत्यू झाला होता.

मोबाइल अॅप डाउनलोड करा आणि राहा अपडेट

---

​सातारा झेडपीचेअध्यक्ष संजीवराजे?

March 20, 2017, 10:54 am

≫ Next: खासदार उदयनराजेंवर मारहाण, खंडणीचा गुन्हा

≪ Previous: पत्नीचा फोटो काढताना दरीत पडून मृत्यू

$

0

0

सातारा

जिल्हा परिषद अध्यक्ष व उपाध्यक्षपदाच्या निवड प्रक्रियेची रंगीत तालिम सोमवारी जिल्हा परिषद अध्यक्षांच्या बंगल्यावर विधान परिषदेचे सभापती रामराजे नाईक निंबाळकर यांच्या उपस्थितीत पार पडले. दोन तासांच्या राजकीय खलबतानंतर संजीवराजे नाईक निंबाळकर यांच्या अध्यक्षपदाच्या निवडीवर जवळपास शिक्कामोर्तब करण्यात आले. उपाध्यक्ष निवडीसाठी पाटण तालुक्यातून माजी आमदार विक्रमसिह पाटणकर यांचे समर्थक राजेंद्र पवार व खटाव तालुक्यातून सुरेंद्र गुदगे यांच्या प्रत्येकी सव्वा वर्षे मुदत देण्याच्या चर्चा रंगल्या. या निवडी जवळपास निश्चित असून मंगळवारी प्रत्यक्ष सभेपूर्वी शरद पवार यांच्याकडून निवड जाहीर करणारा दूरध्वनी केला जाणार असल्याची खात्रीशीर माहिती आहे.

मोबाइल अॅप डाउनलोड करा आणि राहा अपडेट

खासदार उदयनराजेंवर मारहाण, खंडणीचा गुन्हा

March 23, 2017, 4:03 am

≫ Next: प्रादेशिक आराखड्यात गंभीर त्रुटी

≪ Previous: ​सातारा झेडपीचेअध्यक्ष संजीवराजे?

$

0

0

मटा ऑनलाइन वृत्त । सातारा

राष्ट्रवादी काँग्रेसचे खासदार उदयनराजे भोसले यांच्यावर मारहाण आणि खंडणीचा गुन्हा दाखल करण्यात आला आहे. उदयनराजे भोसले आणि रामराजे निंबाळकर यांच्यातील संघर्षातून हा गुन्हा दाखल करण्यात आला असून या दोन गटांतील संघर्ष पुन्हा एकदा वाढल्याचे समोर आले आहे.

सातारा जिल्ह्यातील लोणंद शहराजवळ सोना अलाईज कंपनीत उदयनराजे यांच्या नेतृत्वात काम करणारी एक माथाडी कामगार संघटना आहे, तर दुसऱ्या संघटनेचे नेतृत्व रामराजे निंबाळकर हे करतात. कंपनी रामराजेंच्या संघटनेला झुकतं माप देते तसेच त्यांना अधिक काम देते, असा उदयनराजे यांचा आरोप होता. त्यामुळे १८ फेब्रुवारीला त्यांनी कंपनीचे अधिकारी राजकुमार जैन यांना सातारा विश्रामगृहात बोलावून घेतले होते.

सातारा विश्रामगृहात आल्यानंतर उदयनराजे आणि त्यांच्या सहकाऱ्यांनी राजकुमार जैन यांना मारहाण केली आणि त्यांच्याकडे असलेला ऐवज काढून घेतला, अशी तक्रार जैन यांनी सातारा पोलीस स्टेशनला दिल्यानंतर उदयनराजे आणि त्यांच्या साथीदारांवर मारहाण आणि खंडणीचा गुन्हा दाखल करण्यात आला आहे. उदयनराजे यांचे समर्थक अशोक सावंत, रणजीत माने, सुकुमार रासकर, धनाजी धायगुडे, राजकुमार गायकवाड, अविनाश सोनवले, ज्ञानेश्वर कांबळे आणि योगेश बांदल अशा ९ जणांना अटक करण्यात आली आहे.

मोबाइल अॅप डाउनलोड करा आणि राहा अपडेट

प्रादेशिक आराखड्यात गंभीर त्रुटी

March 26, 2017, 2:30 pm

≫ Next: गुढीपाडव्याचे मार्केट सज्ज

≪ Previous: खासदार उदयनराजेंवर मारहाण, खंडणीचा गुन्हा

$

0

0

म. टा. प्रतिनिधी, कोल्हापूर

जिल्ह्याच्या प्रादेशिक योजनेच्या बृहत आराखड्याबाबत नागरिकांच्या प्रचंड तक्रारी आहेत. त्यांच्या निराकरणा​शिवाय सरकारला सादर केल्यास मुख्यमंत्र्यांपर्यंत दाद मागण्यात येणार आहे. तरीही तक्रारींची दखल घेतली नाही तर आंदोलन आणि कोर्टात धाव घेण्याची तयारीही नागरिकांच्यावतीने केली आहे. दरम्यान, मंगळवारी विभागीय आयुक्त चोकलिंगम यांच्या अध्यक्षतेखाली प्रादेशिक नियोजन मंडळाची बैठक होत आहे. यामध्ये त्रुटी दूर करण्याबाबत लोकप्रतिनिधींनी पुढाकार घ्यावा, असे आवाहन करण्यात आले आहे.

आराखड्याबाबत नियोजन मंडळाची स्थापना करण्यात आली आहे. जिल्ह्याचा नवा प्रादेशिक आराखडा होण्याची गरज असल्याने विविध अभ्यास समितींच्या माध्यमातून त्याची तयारी करण्यात आली. प्रत्यक्षात तो जाहीर करण्यात आल्यानंतर हजारोंच्या संख्येने तक्रारी दाखल करण्यात आल्या. त्या तक्रारींवरही गडबडीने सुनावणी घेण्यात आली. सुनावणीनंतर योग्य ती दुरुस्ती करुन तो आराखडा सरकारकडे पाठवणे आवश्यक होते. मात्र ३१ मार्चला मंडळाची मुदत संपत असल्याने अनेक त्रुटींसह आराखड्याला मंजुरी देऊन तो सादर करण्याचा प्रयत्न सुरु आहे. याबाबत असोसिएशन ऑफ आर्किटेक्ट अँड इंजिनीअर्सच्या नेतृत्वाखाली अर्थमुव्हर्स असोसिएशन, लँड डेव्हलपर्स असोसिएशन तसेच विविध तक्रारदारांच्यावतीने आवाज उठवला आहे. मंगळवारच्या बैठकीत सरसकट मंजुरी देऊ नये. आराखडा होण्याची गरज असताना त्यांच्या त्रुटी दुरुस्त करण्याची आवश्यकता आहे. त्यादृष्टीने निर्णय घेण्याची मागणी लोकप्रतिनिधींकडे केली आहे. मंडळात सदस्य असलेल्या आमदारांशीही चर्चा केली आहे. त्यानुसार बैठकीत मागणी करण्यात येणार आहे.

त्रुटी आढळल्यास आराखडा रद्द

प्रशासनाला ३१ मार्चपर्यंत सरकारकडे आराखडा सादर करण्याची मुदत आहे. पण सरकारला निर्णय घेण्याची मुदत नाही. प्रादेशिक आराखडा सामान्यांच्या हिताआड आराखडा येणार असेल तर वेळप्रसंगी तो आराखडा रद्द करुन नवीन प्रक्रिया सुरु केली जाईल. गंभीर त्रुटी असलेला आराखडा मंजूर केला जाणार नाही. तसेच सक्षम अधिकाऱ्याची नेमणूक चौकशी केली जाईल. ज्या अधिकाऱ्यांकडून चूक झाली असेल, त्यांच्यावरही कारवाई केली जाईल.

चंद्रकांत पाटील, पालकमंत्री

मोबाइल अॅप डाउनलोड करा आणि राहा अपडेट

गुढीपाडव्याचे मार्केट सज्ज

March 26, 2017, 2:30 pm

≫ Next: सांडपाणी थेट पंचगंगेत

≪ Previous: प्रादेशिक आराखड्यात गंभीर त्रुटी

$

0

0

म. टा. प्रतिनिधी, कोल्हापूर

साडेतीन मुहूर्तांपैकी एक असलेल्या गुढीपाडवा सणानिमित्त शहरातील सर्वच बाजारपेठा सज्ज झाल्या आहेत. चिव्याची काठी, साखरेच्या माळा, फळे, फुले, चाफ्यांची माळ, कलश, मीनी गुढीसह अन्य वस्तूंनी बाजारपेठ सजली आहे. नववर्षाचा मुहूर्त साधत ग्राहकांकडूनही विविध वस्तू खरेदीसाठी बुकिंग केले जात आहे.

अवघ्या दिवसावर गुढीपाडवा आल्यामुळे बाजारापेठेत नवीन वस्तू खरेदीसाठी उधाण आले आहे. पाडव्यानिमित्त वस्तू खरेदी करण्यासाठी गेल्या काही दिवसांपासून ग्राहक चौकशीसाठी शोरुममध्ये येत आहेत. गुढीसाठी शहरातील बिंदू चौक, दसरा चौक, मिरजकर तिकटी, टिंबर मार्केट या ठिकाणी चिव्यांचे ढीग लागले आहेत. ८० ते १५० रुपयांप्रमाणे या चिव्यांची विक्री होत आहे. अमावस्येआधी गुढीची काठी नेण्याची प्रथा असल्याने साहित्य खरेदीसाठी गर्दी झाल्याचे चित्र रविवारी दिसत होते. शहरातील ठिकठिकाणी साखरेच्या माळांची विक्रीही मोठ्या प्रमाणात होत आहे. एका माळेची किंमत २० ते ५० रुपये आहे. गुढीसाठी ब्लाउज पीस, साडी अशी वस्त्रे वापरली जात असली तरी खास गुढीसाठी भरजरी आणि जरीकाठेच्या साड्या बाजारात आल्या आहेत.

इलेक्ट्रॉनिक वस्तूंचे मार्केट

एलइडी, फ्रीज, वॉशिंग मशिन, एसी, मोबाइल, ओव्हन, कॅमेरा आदी इलेक्ट्रॉनिक वस्तू खरेदीसाठी विक्रेत्यांनी आकर्षक ऑफर दिल्या आहेत. दुचाकी आणि चारचाकी खरेदीवर विक्रेत्यांनी आकर्षक ऑफर जाहीर केल्या आहेत. या दिवशी वाहनाची डिलिव्हरी केल्यास भरघोस सूटही वाहन कंपन्यानी जाहीर केल्या आहेत.

मिनी गुढी

नववर्षाचे स्वागत मोठ्या उत्साहाने करण्यासाठी अर्पाटमेंटमध्ये राहणाऱ्यांनी मिनी गुढी खरेदीला पसंती दिली आहे. गेल्या तीन ते चार वर्षांपासून मिनी गुढीची मागणी वाढत आहे. ही गुढी साधारण १५० ते २५० रूपयांपर्यंत उपलब्ध आहे.

सोन्याला झळाळी

साडेतीन मुहूर्तांपैकी एक असलेल्या गुढीपाडव्याचा मुहूर्त साधत सोनेखरेदीला पसंती दिली जाते. सणानिमित्त अनेकांनी सोने, चांदी खरेदी आणि गृहप्रवेशासाठी गुढीपाडव्याचा मुहूर्त साधण्याचा बेत केला आहे. या दिवशी सोने-चांदीचे दागिने घेणे पसंत केले आहे. काहींनी पसंतीनुसार दागिने बनविण्यासाठी ऑर्डर दिली आहे.

मोबाइल अॅप डाउनलोड करा आणि राहा अपडेट

सांडपाणी थेट पंचगंगेत

March 26, 2017, 2:30 pm

≫ Next: ‘मातोश्रीवर जायची आवश्यकता नाही’

≪ Previous: गुढीपाडव्याचे मार्केट सज्ज

$

0

0

कोल्हापूर टाइम्स टीम

कोल्हापूर, इचलकरंजीसह नदीकाठावरील ३८ गावांतील सर्व सांडपाण्यावर अजूनही प्र‌क्रिया केली जात नाही. परिणामी सांडपाणी थेट पंचगंगा नदीत मिसळत आहे. तीव्र उन्हामुळे नदीची पातळी खालावली आहे. त्यातच सांडपाण्यामुळे प्रदूषणाचा प्रश्न गंभीर बनत चालला आहे. वर्षभरापूर्वी नदीकाठावरील गावांनी मातीचे बंधारे घालून सांडपाणी अडवण्याचा प्रयोग केला. तो अयशस्वी झाला. निधी नसल्याने तात्पुरत्या स्वरूपाच्या उपाययोजना कुचाकामी ठरल्या. दीर्घकालीन नियोजन कागदावरच आहे. कोल्हापूर शहरातील सांडपाणीही थेट नदीत जात असल्याने इचलकरंजी आणि शिरोळ तालुक्यातील नदीकाठच्या गावांत सा‌थीचे रोग पसरण्याची भीती निर्माण झाली आहे.

पंचगंगा नदी प्रदूषणाचा प्रश्न गेल्या दहा वर्षांपासून ऐरणीवर आहे. प्रत्येक वर्षी उन्हाळा तीव्र झाल्यानंतर प्रदूषण वाढत राहते. आताही ऊन वाढले आहे. नदीतील पाणी कमी ‌होत आहे. प्रदूषित पाणी वाढत आहे. शहरातील बारा नाल्यांवरील सांडपाण्यावर प्र‌‌क्रिया करणारे प्रकल्प पूर्ण क्षमतेने कार्यान्वित नाहीत. उपाययोजनांबाबत इचलकरंजी नगरपालिका प्रचंड उदासीन आहे. सर्व ठिकाणच्या औद्योगिक वसाहतीत

सामूहिक सांडपाणी प्रक्रिया पूर्ण क्षमतेने सुरू नाहीत.

नदीकाठावरील गावांत दूषित पाण्याचा पुरवठा होत असल्याने आरोग्याचा प्रश्न निर्माण झाला आहे. निधी नसल्याने कायमस्वरूपी उपाययोजना करता येत नाहीत. शक्य तिथे तात्पुरत्या स्वरूपात उपाययोजना केल्याचा प्रशासनाचा दावा आहे. नदीकाठावरील गावांत प्रदूषण रोखण्यासाठी वर्षापूर्वी मातीचे बंधारे टाकून सांडपाणी अडवण्याचा प्रयत्न करण्यात आला. मात्र बहुतांशी गावात बंधारे वाहून गेले आहेत. शोषखड्डे भरुन गेले आहेत. सांडपाणी थेट नदीत मिसळत आहे. प्रदूषण रोखण्याची जबाबदारी असलेले प्रदूषण नियंत्रण मंडळ प्रशासन आमच्या हातात काहीही नाही, असे सांगत कार्यालयात बसून कागद रंगवत आहे. उच्च न्यायालयाच्या आदेशानुसार नियुक्त केलेल्या समितीच्या बैठकीत गेले वर्षभर केवळ नियोजनावरच चर्चा सुरू आहे.

३८ गावे जबाबदार

पंचगंगा प्रदूषणास जबाबदार तालुकानिहाय गावे ः करवीर – परिते, कोथळी, हळदी, कांडगांव, कोपार्डे, कुडित्रे, वाकरे, बालिंगे, नागदेववाडी, पाडळी ब्रुद्रक, वरणगे, हणमंतवाडी, शिंगणापूर, प्रयाग, आंबेवाडी, वडणगे, कळंबा, पाचगाव, मोरेवाडी, उचगाव, गांधीनगर, वळीवडे, चिंचवाड, वसगडे.

हातकणंगले – रूकडी, शिरोली, पट्टणकोडोली, हातकणंगले, तिळवणी, रूई, हुपरी, चंदूर, कबनूर.

शिरोळ- शिरदवाड, शिरढोण, नांदणी, शिरोळ, नृसिंहवाडी


अध्यक्षांची जबाबदारी वाढली

नूतन अध्यक्षा शौमिका महाडिक यांच्या जिल्हा परिषद मतदारसंघातील आणि त्यांचे पती अमल महाडिक यांच्या विधानसभा मतदारसंघातील गावेही पंचगंगा प्रदूषणास कारणीभूत आहेत. शौमिका महाडिक यांनी अध्यक्ष निवडीनंतर पंचगंगा प्रदूषणाचा प्रश्न सोडवण्याला प्राधान्य देणार असल्याचे म्हटले होते. या पार्श्वभूमीवर अन्य लोकप्रतिनिधींबरोबरच या दोघांचीही जबाबदारी वाढली आहे. राज्यात भाजपची सत्ता आहे. दोघेही भाजपचे आहेत. प्रदूषण रोखण्यासाठीच्या कायमस्वरूपी उपाययोजनांसाठी भरीव निधी आणणे त्यामुळे सोपे होणार आहे.


निधी नाकारल्याने

पंचगंगा नदी प्रदूषणास जबाबदार असलेल्या गावांत ‘निरी’ या पर्यावरणविषयक काम करणाऱ्या संस्थेने सूचवलेल्या कायमस्वरूपी उपाययोजना करण्यासाठी जिल्हा परिषदेने आराखडा तयार केला. १०८ कोटींचा हा प्रस्ताव २४ नोव्हेंबर २०१४ रोजी केंद्र सरकारकडे पाठवला. पण, तो केंद्र सरकारने फेटाळला. राज्य सरकारकडूनच निधी उपलब्ध करून घ्यावा, अशी सूचना केंद्राने केली आहे. राज्य सरकारही निधी देण्याबाबत गंभीर दिसत नाही. ‌परिणामी निधीच नसल्याने तात्पुरत्या उपाययोजना केल्या जात आहेत.


पंचगंगा प्रदूषणास हेही जबाबदार

कोल्हापूर महानगरपालिका

इचलकरंजी नगरपालिका

इचलकरंजी औद्योगिक वसाहत

लक्ष्मी औद्योगिक वसाहत

पंचतारांकित औद्योगिक वसाहत

शिरोली, गोकुळ शिरगांव औद्योगिक वसाहत

पार्वती औद्योगिक वसाहत, यड्राव

पंचगंगा नदी खोऱ्यातील ८ साखर कारखाने

.............................

‘निरी’ने सूचवलेल्या उपाययोजना

पंचगंगा नदी प्रवाह प्रवाहित ठेवणे

सांडपाणी, मैला शुध्दीकरण व व्यवस्थापन करणे

सांडपाणी संकलन यंत्रणा कार्यक्षम करणे

प्रक्रियाकृत सांडपाण्याचा पुनर्वापर करणे

औद्योगिक वसाहतीत सांडपाणी प्र‌क्रिया प्रकल्प बंधनकारक करणे



कोल्हापूर, इचलकरंजीसह नदीकाठावरील गावांतील सांडपाणी थेट नदीत मिसळत आहे. चांगल्या उपाययोजना केलेल्या नाहीत. पंचगंगेचे प्रदूषण वाढले आहे. अनेक गावांना नदीतील पाणी पिण्यासाठी पुरवठा केला जातो. ते‌थे आरोग्याची समस्या निर्माण होत आहे.

दिलीप देसाई, याचिकाकर्ते


दोन आठवड्यांपासून पाणी कमी झाल्याने पंचगंगा नदीचे प्रदूषण वाढले आहे. हातकणंगले, शिरोळ तालुक्यातील नदीकाठावरील गावांना दूषित पाणी प्यावे लागत आहे. वारंवार मागणी करूनही प्रदूषण रोखण्यासाठी कायमस्वरूपी उपाययोजना केलेल्या नाहीत.

बंडू पाटील, शेतकरी, शिरोळ

मोबाइल अॅप डाउनलोड करा आणि राहा अपडेट

‘मातोश्रीवर जायची आवश्यकता नाही’

March 26, 2017, 7:04 pm

≫ Next: घरफाळा-पाणीपट्टीवाढ फेटाळली

≪ Previous: सांडपाणी थेट पंचगंगेत

$

0

0

म. टा. प्रतिनिधी, कोल्हापूर

‘आमचे १६० व बाकीचे मिळून सरकारकडे सध्या २०० आमदारांचे संख्याबळ आहे. शिवसेना सरकारमध्ये आहे. त्यामुळे परत मातोश्रीवर जायचा प्रश्नच नाही,’ असे महसूलमंत्री चंद्रकांत पाटील यांनी रविवारी येथे स्पष्ट केले.

मध्यावधी निवडणुकीचीही केवळ चर्चाच असून २०० संख्याबळ असताना काँग्रेस, राष्ट्रवादीचे आमदार फोडण्याचीही गरज नसल्याचे सांगून सरकार भक्कम असल्याचे त्यांनी सूचित केले.

नारायण राणे यांच्या भाजप प्रवेशाबाबत विचारल्यानंतर पाटील यांनी सावध प्रतिक्रिया दिली. ते म्हणाले, ‘नारायण राणे यांच्या नावाची केवळ चर्चा आहे. सर्वच पक्षांना हवेसे वाटणारे राणे यांचे व्यक्तिमत्व आहे. मात्र प्रवेशाबाबतचा निर्णय प्रदेशाध्यक्ष घेतील. त्यापूर्वी स्थानिक पातळीवर नेत्यांशी चर्चा करुनच ते निर्णय घेतील. मोदींवर विश्वास ठेवून पक्षात येणाऱ्यांचे स्वागत आहे. नुकत्याच झालेल्या विधानसभा निवडणुकीत मिळालेल्या विजयामुळे

भाजपकडे येण्याची अनेकांची तयारी आहे.’

मोबाइल अॅप डाउनलोड करा आणि राहा अपडेट

घरफाळा-पाणीपट्टीवाढ फेटाळली

March 24, 2017, 2:30 pm

≫ Next: शिवाजी पुलासाठी पंतप्रधानाचे आश्वासन

≪ Previous: ‘मातोश्रीवर जायची आवश्यकता नाही’

$

0

0

म. टा. प्रतिनिधी, कोल्हापूर

प्रस्तावित घरफाळा आणि पाणीपट्टीवाढीला विरोध करत महापालिकेच्या सर्वसाधारण सभेने दोन्ही करवाढीचे प्रस्ताव फोटाळून लावले. या प्रस्तावावरुन सभागृह आणि प्रशासन आमनेसामने उभे ठाकले होते. यापूर्वी सभागृहात दोन वेळेला सर्वपक्षीय नगरसेवकांनी करवाढीला विरोध केल्यामुळे शुक्रवारच्या सभेत औपचारिकताच शिल्लक होती. अधिकाऱ्यांनी योग्य प्रस्ताव सादर केला नाही, विविध पर्याय सुचवूनही प्रशासनाने त्या अनुषंगाने चर्चा केली नसल्याचा आक्षेप ठेवत नगरसेवकांनी प्रशासनाचा निषेध केला. सभागृहाने नामंजूर केलेले करवाढीचे प्रस्ताव प्रशासनाने सरकारकडे विखंडीत करण्यासाठी पाठवू नयेत, अशी सूचनाही यावेळी करण्यात आली.

सभेत वादळी चर्चा होईल, अशी अपेक्षा होती. सर्वपक्षीय नगरसेवक दोन्ही करवाढीच्या विरोधात एकवटले. करवाढीच्या फेरप्रस्तावासंदर्भात अधिकाऱ्यांनी नियोजन किंवा योग्य प्रस्ताव तयार केल्याचे सभागृहात दिसले नाही. आक्रमक सभागृह आणि हताश प्रशासन असेच चित्र यावेळी पाहायला मिळाले. करवाढीबाबतच्या नगरसेवकांच्या आक्षेपांना प्रशासनाकडून उत्तरेही दिले नाहीत. काँग्रेसचे गटनेते शारंगधर देशमुख यांनी सभागृहाने घरफाळा आणि पाणीपट्टीवाढ नामंजूर करण्याचा निर्णय घेतला आहे. प्रशासनाने करवाढीबाबत कसलाही प्रस्ताव सादर केला नाही, गटनेत्यांशी चर्चा केली नाही. त्यामुळे सभागृह प्रशासनाचा निषेध करत आहे, असे सांगितले.

प्रा. जयंत पाटील यांनी प्रशासनाच्या कारभाराची लक्तरे काढताना नगरसेवक गेली महिनाभर घरफाळा आणि पाणीपट्टी प्रस्तावाबाबत प्रशासनाला योग्य प्रस्ताव सादर करण्याच्या सूचना करत आहेत. पाणीपट्टीच्या थकीत रकमेवरील दंडात सवलत देण्यासाठी आयुक्तांना त्यांच्या अखत्यारित निर्भया योजना सुरु करण्याचा अधिकार आहे. सवलत योजनेमुळे उत्पन्न वाढले असते. शिवाय सभागृहाकडूनही व्यापार प्रकारातील पाणीबिलात वाढ करण्यास मंजुरी मिळाली असती. पण प्रशासनाकडून कसलाही प्रतिसाद मिळाला नसल्याचा आक्षेप ठेवला.



नागरिकांवर कसल्याही प्रकारची करवाढ नको अशी सभागृहाची पहिल्यापासून भूमिका होती. प्रशासनाला तसे आधीच कळविले होते. शुक्रवारच्या सभेत घरफाळा आणि पाणीपट्टीवाढीचे प्रस्ताव फेटाळले आहेत.

महापौर हसीना फरास


प्रशासनाचे करवाढीतून वीस कोटीच्या उत्पन्नाचे उद्दिष्ट होते

महापालिकेच्या आर्थिक उत्पन्नात वाढ करण्याच्या उद्देशाने रेडीरेकनरनुसार घरफाळा आकारणी आणि पाणीपट्टीत तीस टक्क्यांनी वाढ हे प्रस्ताव मंजुरीसाठी सभागृहासमोर होते. प्रशासनाने घरफाळा वाढीतून १२ कोटी तर पाणीपट्टीत आठ कोटींची वाढ अपेक्षित धरली होती. मात्र भांडवली मूल्यावर आधारित करप्रणालीमुळे घरफाळ्यात भरमसाट वाढ होऊन नागरिकांचे कंबरडे मोडणार असल्याचे सांगत नगरसेवकांनी विरोध दर्शविला होता. करवाढीला विरोध करत सोमवारची (ता.२० मार्च) सभा तहकूब केली होती.

मोबाइल अॅप डाउनलोड करा आणि राहा अपडेट

---

शिवाजी पुलासाठी पंतप्रधानाचे आश्वासन

March 24, 2017, 2:30 pm

≫ Next: बिलाच्या वादातून डॉक्टरला मारहाण

≪ Previous: घरफाळा-पाणीपट्टीवाढ फेटाळली

$

0

0

म. टा. प्रतिनिधी, कोल्हापूर

पुरातत्व खात्याच्या मंजुरीकडे बोट दाखवून ​येथील ब्रिटीशकालीन शिवाजी पुलाच्या पर्यायी पुलाच्या कामावर घालण्यात आलेल्या निर्बंधाबाबत तातडीने मार्ग काढण्याच्या सूचना पंतप्रधान नरेंद्र मोदी यांनी दिल्या. जनतेच्या सुरक्षेशी खेळता कामा नये, असे सांगत पुलाचा प्रश्न मार्गी लावण्याचे आश्वासन पंतप्रधान मोदी यांनी खासदार संभाजीराजे छत्रपती यांना शुक्रवारी दिले. यामुळे पुरातत्त्व कायद्यात आवश्यक दुरुस्ती होण्याची आशा वाढली आहे.

शिवाजी पुलाच्या पर्यायी पुलाचे काम सुरू आहे. ७० टक्क्यांपेक्षा जास्त काम झाले असून शहराच्याबाजूने असलेल्या पुलाचे काम पुरातत्त्व विभागाच्या निर्बंधामुळे रखडले आहे. याबाबत केंद्रीय दळणवळण मंत्री नितीन गडकरी व सांस्कृतिक राज्यमंत्री डॉ. महेश शर्मा यांनी शिवाजी पुलाबाबत कायदा व न्याय मंत्रालयाकडे कायद्यात दुरुस्तीसाठी प्रस्ताव पाठवला. पण, कायदा व न्याय मंत्रालयाकडून कायद्यात कोणत्याही प्रकारचे बदल करता येत नसल्याचे दोन्ही मंत्र्यांना कळवण्यात आले होते. कायद्यात दुरुस्ती करायची असेल तर त्याचे सर्वस्वी अधिकार संसदेला आहेत. त्याचे गांभीर्य ओळखून खासदार संभाजीराजे छत्रपती यांनी शुक्रवारी सकाळी पंतप्रधान नरेंद्र मोदी यांची संसदेमधील कार्यालयात भेट घेतली. सुमारे वीस मिनिटे संभाजीराजे छत्रपतींनी अत्यंत जिव्हाळ्याच्या असलेल्या शिवाजी पुलाचे काम पुरातत्त्व विभागाने घातलेल्या निर्बंधामुळे रेंगाळले असल्याचे संभाजीराजे यांनी पंतप्रधानांना सांगितले.

यासाठी पुरातत्त्व खात्याची मंजुरी आवश्यक असल्याने उर्वरित काम ठप्प झाले. महाडसारखी दुर्घटना होऊ नये, यासाठी तत्काळ मार्ग काढावा, असे संभाजीराजे छत्रपतींनी पंतप्रधानांच्या निदर्शनास आणले. पंतप्रधानांनी गांभीर्य ओळखून खासगी सचिव राजीव टोपनो यांना बोलावून याप्रश्नी तातडीने मार्ग काढण्याच्या सूचना दिल्या. जनतेच्या सुरक्षेशी खेळता कामा नये, असेही ते म्हणाले. हा प्रश्न विनाविलंब मार्गी लावण्याचे आश्वासन त्यांनी दिले.

मोबाइल अॅप डाउनलोड करा आणि राहा अपडेट

बिलाच्या वादातून डॉक्टरला मारहाण

March 24, 2017, 2:30 pm

≫ Next: कोल्ड्रिंक मार्केट हाउसफुल

≪ Previous: शिवाजी पुलासाठी पंतप्रधानाचे आश्वासन

$

0

0

म. टा. प्रतिनिधी, कोल्हापूर

रुग्णाला डिस्चार्ज देताना बिलावरून झालेल्या वादातून उद्यमनगरातील वालावलकर लक्ष्मीनारायण ट्रस्ट हॉस्पिटलमध्ये रुग्णांच्या नातेवाईकांनी डॉक्टरला बेदम मारहाण केली. शुक्रवारी (ता. २४) दुपारी दोनच्या सुमारास घडलेल्या या घटनेत डॉ. याकूब नजरखान पठाण (वय ३८, रा. लोहार गल्ली, कागल) जखमी झाले आहेत. याप्रकरणी राजारामपुरी पोलिसांनी मयूर दत्तात्रय पाटील (२३) आणि हसन रफिक शेख (दोघेही रा. बागल गल्ली, यादवनगर) या दोन हल्लेखोरांना अटक केली आहे. हल्लेखोरांपैकी माजी नगरसेवक रफिक मुल्ला फरार आहे.

रुग्णांच्या नातेवाईकांकडून डॉक्टरांवर होणाऱ्या हल्ल्यांच्या निषेधार्थ राज्यभरात डॉक्टरांनी गेली चार दिवस काम बंद केले होते. हा मुद्दा हायकोर्टासह राज्याच्या विधानसभेतही गाजला असतानाच कोल्हापुरात नातेवाईकांनी डॉक्टराना लक्ष्य केले. कराडमधील विश्वनाथ काकडे यांना चार दिवसांपूर्वी मधुमेहावरील उपचारासाठी वालावलकर ट्रस्ट हॉस्पिटलमध्ये दाखल केले होते. त्यांचे बिल १५ हजार रुपये केले होते. याबाबत नातेवाईकांनी आक्षेप घेतला. शाब्दिक वादानंतर मयूर पाटील, हसन शेख आणि माजी नगरसेवक मुल्ला या तिघांनी डॉ. पठाण यांना मारहाण केली. यावेळी हॉस्पिटलमधील कर्मचारी मनीषा खोत यांनी सतर्कता दाखवत डॉ. पठाण यांना हल्लेखोरांच्या तावडीतून सोडवले. या घटनेने रुग्णालयात प्रचंड तणाव निर्माण झाला. त्याचबरोबर रुग्णांतही भीतीचे वातावरण निर्माण झाले. घटनेची माहिती मिळताच राजारामपुरी पोलिसांनी घटनास्थळी धाव घेऊन पाटील आणि शेख या दोघांना अटक केली. मात्र मुल्ला फरार झाला.

घटनेची माहिती शहारातील खासगी डॉक्टरांना मिळताच त्यांनी वालावलकर हॉस्पिटलमध्ये गर्दी केली. जखमी डॉ. पठाण यांच्यासह इतर डॉक्टरांनी राजारामपुरी पोलिस ठाण्यात जाऊन संशितांविरोधात फिर्याद दाखल केली. डॉक्टर पठाण यांच्यावर सीपीआरमध्ये प्राथमिक उपचार केल्यानंतर त्यांना खासगी रुग्णालयात हलवले आहे. हल्लेखोरांविरोधात पोलिसांनी तातडीने कडक कारवाई करावी, अशी मागणी डॉक्टरांनी केली आहे.

मोबाइल अॅप डाउनलोड करा आणि राहा अपडेट

कोल्ड्रिंक मार्केट हाउसफुल

March 24, 2017, 2:30 pm

≫ Next: विद्यापीठाचे अंदाजपत्रक ऑनलाइन

≪ Previous: बिलाच्या वादातून डॉक्टरला मारहाण

$

0

0

satish.ghatage@timesgroup.com

twitter:@satishgMT

कोल्हापूर ः खुळुखुळू घुंगरांच्या तालावर चरकात निघणारा उसाचा रस, चित्रपटाच्यागृहाच्या बाहेर ‘थंडगार लेमन,’ ची पल्लेदार जाहिरात करणारे विक्रेते, ताक, लस्सी, विक्री करणाऱ्या डेअऱ्या आणि कोल्ड्रिंक हाउसमध्ये सरबत, ज्यूस आणि शेक असे थंडगार पदार्थ... उन वाढेल तसे ज्यूस, सरबत आणि अन्य थंडगार पदार्थांचे मार्केट तेजीत आले आहे. सकाळी दहा ते मध्यरात्री उशिरापर्यंत हातगाड्या कोल्ड्रिंक आणि रसवंतीगृहात हाउसफुल्ल गर्दी असते. फेब्रुवारी ते मार्च या कालावधीत सरबत व ज्यूसच्या मार्केटमध्ये शंभर ते दीडशे कोटींची उलाढाल होते, असा अंदाज व्यक्त केला जात आहे.

उन्हाळा सुरु झाला की शीतपेयांच्या जाहिरातींचा मारा होत असतो. पण, शीतपेयांपेक्षा ग्राहक आजही पारंपरिक सरबत, रसालाच पसंती देतात. रस्त्यावरील गाड्यापासून मॉलपर्यंत सरबत, ज्यूस मिळतात. सर्व सरकारी कार्यालये, चित्रपटगृहे, बसस्टॉप आणि मंदिरांबाहेर सरबत, सोड्याच्या गाड्या पाहायला मिळतात. कोल्हापूर शहरात १०० हून अधिक कोल्ड्रिंक्स दुकाने आहेत. घट्ट दही आणि मलईपासून तयार केलेल्या लस्सी आणि ताकाचे मार्केटही सध्या तेजीत आहे.

सरबतमध्ये लिंबू, कोकम, वाळा (खस), ऑरेंज, लेमन या सरबतांपैकी लिंबू व कोकम सरबताला सर्वांत जास्त मागणी आहे. लिंबू सरबत तयार करण्यासाठी काही ठिकाणी लिंबू वापरतात तर बहुतांश ठिकाणी सिरप अथवा इसेन्स वापरतात. साखर, पाणी आणि सोड्याचा वापर करुन ही सरबते बनवली जातात. कोल्डिंक हाउसमध्ये ग्राहकांसमोर सरबत बनवली जात असल्याने सरबताच्या वासाचा फिल ग्राहकाला येतो. काही ठिकाणी अगोदर तयार सरबत करुन विक्री केली जातात. सध्या सरबत व ज्यूस विक्री करणाऱ्या मोबाइल व्हॅनही जागोजागी दिसू लागल्या आहेत. एकाच व्हॅनमध्ये इसेन्स आणि सोडा मिक्स करुन ते १० रुपयाला सरबत दिले जाते. उन्हाची तीव्रता वाढेल तशी घट्ट लस्सी, ताकालाही मागणी वाढू लागली आहे.

सरबतासाठी इसेन्स आणि सिरपची उलाढालही मोठी आहे. मोठमोठ्या कंपन्या इसेन्स व सिरपमध्ये उतरल्या आहेत. इसेन्सचा वापर कोल्ड्रिंक हाउसमध्ये केला जातो. साखर व सोड्याचे योग्य ते प्रमाण करुन ५०० मिलीलिटर इसेन्सच्या बाटलीत १० ते १५ हजार ग्लास सरबत तयार होतो. सिरप घट्ट असते. त्यात साखर व फळांचा रस असतो. घरात याचा वापर मोठ्या प्रमाणात केला जातो. कोल्ड्रिंक हाउसमध्ये दुधाचा वापर करुन चिकू, अॅपल, मँगो, पायनापल, थंडाई, पिस्ता, स्ट्रॉबेरी, वेनिला हे शेक तयार केले जातात. शेकमध्ये तयार फळांचा वापर करण्याकडे कटाक्ष असतो. बड्या कंपन्यांचे पॅकबंद ज्यूसही बाजारात मोठ्या प्रमाणात उपलब्ध आहेत. तयार पेरु, अॅपल, आंबा, मिक्स फ्रूट ज्यूसही बाजारात आणले आहेत. बहुतांशी घरात फ्रीज असल्याने अशा पॅकबंद ज्यूसचा वापर करता येतो. एका लिटरमध्ये तीन ते पाच ग्लास ज्यूस मिळतो.

मँगो नव्हे पपईचा गर

उन्हाळा सुरू झाल्यावर रस्त्यांवर मँगो ज्यूसचे स्टॉल झळकू लागतात. मँगो ज्यूससाठी आंबा, दुधाचा वापर करावा लागतो. दूध ५० रुपये लिटर व आंबा ४०० रुपये डझन असल्यामुळे ओरिजनल आंब्याचा गर वापरण्याऐवजी मँगो पल्पचा वापर केला जातो. मँगो पल्प पपईच्या गरात इसेन्स घालून तयार केला जातो. दूध, पाणी मिसळून त्यात पपईपासून बनवलेला मँगो पल्प घालून केलेला हा ज्यूस दहा रुपयाला विकला जातो. ओरिजनल मँगो पल्पमध्ये जिभेला केसर जाणवते. ओरिजनल मँगो पल्पचा दर ४५० ते ५०० रुपये इतका आहे.


सरबत व ज्यूसचा व्यवसाय चार महिने चालतो. फळांबरोबर सिरप, इसेन्सचा वापर करुन सरबत व ज्यूस तयार केला जातो. शहरात कोल्डिंक्सची १०० हून अधिक दुकाने असून ग्राहकांच्या पसंतीनुसार सरबत, ज्यूस तयार करून दिले जातात. चार महिन्यांत या व्यवसायात मोठी आर्थिक उलाढाल होते.

साहील उदय शिंदे (गवळी), कोल्ड्रिंक व्यावसायिक

मोबाइल अॅप डाउनलोड करा आणि राहा अपडेट

विद्यापीठाचे अंदाजपत्रक ऑनलाइन

March 24, 2017, 2:30 pm

≫ Next: सव्वा वर्षात इलेक्ट्रॉनिक पासपोर्ट

≪ Previous: कोल्ड्रिंक मार्केट हाउसफुल

$

0

0

म. टा. प्रतिनिधी, कोल्हापूर

शिवाजी विद्यापीठाने विद्यार्थी केंद्रीत, विद्यार्थी आणि शिक्षकांमधील संशोधनवृत्तीला चालना देणारा व विद्यापीठ कर्मचाऱ्यांना गृह कर्जासाठी भरीव तरतूद असलेले अंदाजपत्रक सादर केले. व्यवस्थापन परिषदेने सादर केलेल्या अंदाजपत्रकाला शुक्रवारी अधिसभेने मंजुरी दिली. २०१७ - १८ च्या अंदाजपत्रकामध्ये संशोधनवृत्ती वाढवण्याबरोबरच छत्रपती शिवाजी महाराज पुरस्कार व बेटी बचाव अभियानासाठी अनुक्रमे ५० व तीन लाखांची तरतुद केली आहे. विद्यापीठाने प्रथमच ऑनलाइन पद्धतीने अंदाजपत्रकाचे सादरीकरण केले.

विद्यापीठाचे वित्त व लेखा समितीने विविध विभागाने केलेल्या आर्थिक तरतुदी, त्यांच्याकडील वार्षिक जमा व खर्च याचा अंदाजपत्रक समितीने प्रत्यक्ष आढावा घेऊन २०१७-१८ चा अंदाजपत्रक मसुदा तयार केला. मसुदा समितीने व्यवस्थान परिषदेस सादर केल्यानंतर व्यवस्थापन परिषदेने अधिसभेच्या मान्यतेसाठी सादर केला. जमा ३४१ कोटी ५१ लाख आणि ३४४ कोटी २८ लाख अशी दोन कोटी ७७ लाख रुपयांच्या तुटीच्या अंदाजपत्रकाला मान्यता मिळाली. सदरची तूट विद्यापीठाच्या शिलक्क रकमेतून भरुन काढण्याचा प्रस्ताव तयार केला आहे.

देखभालीसाठी ७६ कोटी ३२ लाख रुपयांची तरतूद केली आहे. विद्यापीठ विकासासाठी ३१ कोटी २२ लाख रुपयांची तरतूद केली आहे. तर वेतनावर ७० कोटी ७६ लाखांची तरतूद केली आहे. अंदाजपत्रकामध्ये खर्चाची बाजू जास्त दिसत असली, तरी विद्यापीठाला विद्यापीठ अनुदान आयोग, केंद्र व राज्य सरकार निधी, डीएसटी व पंचवार्षिक योजनामधून येणाऱ्या निधीवर अवलंबून राहावे लागणार आहे. तरीही विद्यापीठाने विद्यार्थी व शिक्षकांमधील संशोधनवृत्तीला चालना देण्यासाठी भरीव तरतूद केली आहे. गोल्डन ज्युबिली स्कॉलरशीप व सुवर्ण महोत्सवी वर्षातील संशोधक विद्यार्थी व शिक्षकांसाठी सात लाखांची तरतूद केली आहे. यावर्षीपासून उत्कृष्ट संशोधक शिक्षक व विद्यार्थ्यांची निवड करण्यात येणार असून त्यासाठी २५ लाख रुपयांची तरतूद केली आहे. सर्वोत्कृष्ट विभाग योजनेतंर्गत विद्यापीठातील सायन्स व अभियांत्रिकी विभागासाठी वीस लाखांची अंदाजपत्रकात तरतूद केली असून विद्यापीठातील गृहकर्ज योजना मंजूर केली असून त्यासाठी एक कोटी रुपयांची तरतूद केली आहे.

विद्यापीठाचे कुलसचिव डॉ. विलास नांदवडेकर यांनी अधिसभेस अंदाजपत्रक सादर केले. अंदाजपत्रकास सर्वानुमते मंजुरी देण्यात आली. यावेळी कुलगुरू डॉ. देवानंद शिंदे, परीक्षा नियंत्रक महेश काकडे, विशेष कार्यकारी अधिकारी डॉ. डी. टी. शिर्के, प्रभारी वित्त व लेखाधिकारी अजित चौगले, उपकुलसचिव डॉ. व्ही. एन. शिंदे, अधिष्ठाता डॉ. वासंती रासम, डॉ. पी. डी. राउत, डॉ. ए. एम. गुरव, डॉ. पी. एस. पाटील, ग्रंथपाल डॉ. नमिता खोत, विद्यार्थी कल्याण मंडळाचे सचिव डॉ. आर. व्ही. गुरव यांच्यासह विद्यापीठाचे अधिकारी उपस्थित होते.

विभाग जमा रक्कम खर्च रक्कम

देखभाल ७६ कोटी ३२ लाख ९१ कोटी ८९ लाख

विकास ३१ कोटी २२ लाख ३१ कोटी २२ लाख

वेतन ७० कोटी ७६ लाख ७० कोटी ८९ लाख

एजन्सी स्कीम ५४ कोटी ७५ लाख ३२ कोटी ०१ लाख

निलंबन लेखे १०८ कोटी ४४ लाख ११८ कोटी २५ लाख

एकूण ३४१ कोटी ५१ लाख ३४४ कोटी २७ लाख


राज्यातील पहिलाच प्रयत्न

शिवाजी विद्यापीठाने प्रथमच ऑनलाइन अंदाजपत्रक सादर केले. ऑनलाइनअंदाजपत्रक सादर करणारे राज्यातील पहिले विद्यापीठ असल्याचा बहुमान शिवाजी विद्यापीठाला मिळाला आहे. ऑक्टोबरपासून यासाठी विद्यापीठाच्या वित्त व लेखा विभागाचे काम सुरू होते. यासाठी विद्यापीठाच्या विविध विभागासह ८० जणांकडे लॉगइन दिले होते. त्यानुसार सर्व विभागानी ऑनलाइन अंदाजपत्रकातील तरतुदी दिल्या होत्या. यापुढे कोणत्याही विभागाने खर्चाचा तपशील ऑनलाइन पद्धतीने दिल्यानंतर त्याची नोंद होणार असल्याने यापुढे अंदाजपत्रक सादर करताना वित्त व लेखा विभागाला तीन ते चार महिने अगोदार तयारी करावी लागणार नाही.



सुधारित अंदाजपत्राकात ११ कोटी ११ लाख रुपयांची वाढ

१४ कोटी रुपयांची खर्चामध्ये वाढ केली.

संशोधक विद्यार्थ्यांसाठी सात लाखांची शिष्यवृत्ती

इ-लर्निंग अंतर्गत टॅबसाठी तीन लाख रुपये

संलग्न कॉलेजमधील संशोधक शिक्षकांसाठी सहा कोटी ५० लाख

पदवीस्तरावरील विद्यार्थ्यांसाठी पाच कोटी

नोंदणीकृत संशोधन विद्यार्थ्यांसाठी एक कोटी

छत्रपती शिवाजी महाराज पुरस्कारांसाठी ५० लाख

उत्कृष्ट संशोधक शिक्षक व विद्यार्थ्यांसाठी एक लाखाचा पुरस्कार

विद्यापीठ कर्मचारी गृह कर्ज योजना एक कोटी रुपये


कोट

विद्यार्थ्यांच्या सर्वांगीण विकास संशोधनवृत्तीला चालना देणारे विद्यापीठाचे अंदाजपत्रक आहे. विद्यार्थी वसतीगृह, शैक्षणिक सहल आणि विद्यार्थ्यांचे कौशल्य व क्षमता वाढवण्यावर अंदाजपत्रकामध्ये भर दिला आहे. पेपरलेस प्रशासनाच्यादृष्टीने ऑनलाइन कार्यप्रणालीवर भर देऊन जास्तीत-जास्त तंत्रज्ञानावर भर पुढील काळात देण्यात येणार आहे.

डॉ. देवानंद शिंदे, कुलगुरू, शिवाजी विद्यापीठ

मोबाइल अॅप डाउनलोड करा आणि राहा अपडेट

सव्वा वर्षात इलेक्ट्रॉनिक पासपोर्ट

March 24, 2017, 2:30 pm

≫ Next: प्रवाशांच्या सुरक्षेकडे कानाडोळा

≪ Previous: विद्यापीठाचे अंदाजपत्रक ऑनलाइन

$

0

0

म. टा. प्रतिनिधी, कोल्हापूर

पासपोर्टमधील बनावटगिरी रोखण्यासाठी अत्याधुनिक तंत्रज्ञानाचा वापर करून सव्वा वर्षात इलेक्ट्रॉनिक पासपोर्ट उपलब्ध होतील, अशी माहिती परराष्ट्र सचिव ज्ञानेश्वर मुळे यांनी पत्रकार परिषदेत दिली. पोस्ट ऑफ‌िसमध्ये सुरू होणारे राज्यातील पहिले पासपोर्ट कार्यालय शनिवारी (२५) कोल्हापुरात सुरु होत आहे, अशी माहिती त्यांनी दिली.

ज्ञानेश्वर मुळे म्हणाले, ‘पासपोर्ट ही काळाची गरज बनली असून पासपोर्ट हे चैनीची वस्तू नसून प्रगतीचे महाद्वार आहे. शिक्षण, नोकरी, पर्यटन, नातेवाईकांची भेट, मनोरंजनासाठी भविष्यात पासपोर्ट आवश्यक आहे. पासपोर्टमध्ये तंतोतंतपणा आणण्यासाठी अत्याधुनिक तंत्रप्रणालीचा वापर करुन पुढील वर्षी इलेक्ट्रॉनिक पासपोर्ट उपलब्ध केला जाणार आहे. या पासपोर्टमध्ये इलेक्ट्रॉनिक चीप असणार आहे. पासपोर्टच्या प्रत्येक पानावर गुप्त अॅप्लिकेशन राहणार असल्याने पासपोर्टमधील बनवेगिरी बंद होणार आहे. नाशिकच्या प्रिंटिंग प्रेसमध्ये इलेक्ट्रॉनिक पासपोर्टसाठी लागणारी छपाई सुरू झाली आहे. पुढील सव्वा वर्षात पासपोर्ट उपलब्ध होणार आहेत.’

ते पुढे म्हणाले, ‘गेल्या ७० वर्षांत देशात पासपोर्ट काढणारी फक्त ९० कार्यालये होते. परराष्ट्रमंत्री सुषमा स्वराज्य व पोस्ट खात्याच्या सहयोगातून देशात आणखीन ९० पासपोर्ट कार्यालये वर्षात सुरु होणार आहेत. त्यातील १८ कार्यालये सुरू झाली आहेत. सव्वाशे कोटी लोकसंख्या असलेल्या देशात फक्त साडेसात कोटी लोकांच्याकडे पासपोर्ट आहे. सध्या वर्षाला सव्वा कोट पासपोर्ट आम्ही देऊ शकते. हा वेग लक्षात घेता देशातील सर्व नागरिकांना पासपोर्ट देण्यासाठी सव्वाशे वर्ष लागतील. म्हणून प्रत्येक जिल्ह्यात पासपोर्ट कार्यालय सुरू करण्याचा आमचा प्रयत्न आहे. कोल्हापुरातील पासपोर्ट कार्यालयासाठी खासदार धनंजय महाडिक, खासदार राजू शेट्टी, खासदार संभाजीराजे यांच्यासह जिल्हाधिकारी डॉ. ​अमित सैनी, कोल्हापूर पोस्ट ऑफिस प्रवर अधीक्षक रमेश पाटील यांच्या प्रयत्नातून व सहकार्यातून पासपोर्ट ऑफ‌िस सुरू होत आहे. पोस्टात कार्यालये सुरू केल्याने मोठी बचत झाली आहे.कोल्हापुरात रोज ५० व्यक्तींना पासपोर्ट दिले जाणार असून पुढील सात दिवसातील पासपोर्ट काढणाऱ्यांना वेळा देण्यात आल्या आहेत. कोल्हापूरसह सांगली, सातारा, पुणे, सोलापूर, अहमदनगर जिल्ह्यातील नागरिकांना पासपोर्टची काढण्याची संधी मिळणार आहे. पासपोर्ट काढणाऱ्यांची संख्या पाहता कोल्हापुरात रोज २०० व्यक्तींना पासपोर्ट देण्याची सोय करण्यात आली आहे.’

पत्रकार परिषदेला क्षेत्रीय पासपोर्ट अधिकारी अतुल गोतसुर्वे, जिल्हाधिकारी डॉ. अमित सैनी, जिल्हा परिषद मुख्य कार्यकारी अधिकारी डॉ. कुणाल खेमनार उपस्थित होते.


तीन खासदारांच्या उपस्थितीत उद्‍घाटन

रमणमळा येथील प्रधान पोस्ट ऑफ‌िसच्या कार्यालयात सकाळी साडेदहा वाजता खासदार राजू शेट्टी, खासदार धनंजय महाडिक, खासदार संभाजीराजे, महापौर हसीना फरास, महाराष्ट्र गोवा जनरल पोस्ट मास्टर विनोदकुमार वर्मा यांच्या उपस्थितीत पासपोर्ट कार्यालयाचे उद्‍घाटन होणार आहे.

पोलिसांकडून पडताळणी होईना

पासपोर्ट नोंदणीनंतर पासपोर्ट काढणाऱ्या व्यक्तींना पडताळणी केली जाते. कोल्हापूर पोलिसांचे पासपोर्ट कागदपत्रांची पडताळणी अतिशय संथ असून त्यासंदर्भात पोलिस प्रशासनाला पत्र पाठवण्यात येणार आहे. तसेच विशेष पोलिस महानिरीक्षक विश्वास नांगरे-पाटील यांच्यासमवेत चर्चा केली जाईल, असे मुळे यांनी सांगितले.

मोबाइल अॅप डाउनलोड करा आणि राहा अपडेट

प्रवाशांच्या सुरक्षेकडे कानाडोळा

March 24, 2017, 2:30 pm

≫ Next: आयुक्त पी. शिवशंकर यांची बदली

≪ Previous: सव्वा वर्षात इलेक्ट्रॉनिक पासपोर्ट

$

0

0

म. टा. प्रतिनिधी, कोल्हापूर

खासगी कंपनीकडून शहरात सुरु असलेल्या मिळकतींच्या सर्व्हेत मोठ्या प्रमाणात तोडपाणी होत आहे. कंपनीचे कर्मचारी मिळकतधारकांकडे उघडपणे पैसे मागत मिळकतीच्या नोंदी सोयीनुसार करत आहेत. सर्व्हेच्या नावाखाली लूटमार होत असताना महापालिकेचे अधिकारी त्यांना पाठीशी घालण्यामागील गौडबंगाल काय? अशा फैरी झाडत नगरसेवकांनी सायबर टेक प्रायव्हेट लिमिटेड कंपनीवरील कारवाईसाठी आक्रमक बनले. नगरसेवक राहुल चव्हाण यांनी कर्मचाऱ्यांकडून मिळकतधारकाकडे पैसे मागत असल्याचे रेकॉर्डिंग सभागृहाला ऐकवित संबंधित कर्मचाऱ्यावर तत्काळ कारवाईची आग्रही राहिले.

शहरातील मिळकतींचा सर्व्हे करणाऱ्या सायबर टेक कंपनीच्या कामकाजाविषयी नगरसेवकांच्या तक्रारीची दखल घेत आयुक्त पी. शिवशंकर यांनी या प्रकरणाची स्वत: चौकशी करुन कारवाईची ग्वाही सभागृहाला दिली. महापौर हसीना फरास यांच्या अध्यक्षतेखाली सभा झाली. नगरसेवक राहुल चव्हाण यांनी प्रभागातील एका नागरिकाला मोबाइलवरुन संपर्क साधत कंपनीच्या कर्मचाऱ्यांनी सर्व्हे दरम्यान किती पैसे मागितले हे सभागृहाला ऐकविले. संबंधित कर्मचाऱ्यावर काय कारवाई करणार? असा सवाल उपायुक्त ज्ञानेश्वर ढेरे यांना केला. शिवसेनेचे गटनेते नियाज खान, अभिजित चव्हाण हे आक्रमक होत कारवाईवर ठाम राहिले.

ताराराणी आघाडीचे नगरसेवक सत्यजित कदम यांनी नागरिकांची लूट सुरू असताना वरिष्ठ गप्प का ? काम पूर्ण होण्याअगोदर कंपनीला ५० लाख रुपये देण्यावरुन अधिकाऱ्यांना जाब विचारला. नगरसेवक मुरलीधर जाधव यांनी कंपनीला चौदा महिन्यात सर्व्हे पूर्ण करण्याची मुदत दिली होती. आतापर्यंत केवळ तीस टक्के काम झाले आहे. वॉटर ऑडिटचे काम थंडावल्याचा आरोप केला. चर्चेत नगरसेवक शेखर कुसाळे, सूरमंजिरी लाटकर, मोहन सालपे यांनी सहभाग घेतला. कर निर्धारक दिवाकर कारंडे यांनी आयुक्तांनी कंपनीला कामात सुधारणा करण्याची नोटीस दिली आहे. कंपनी​ने मुदतीत काम केले नाही तर प्रतिदिन एक हजार रुपये दंडाची कारवाई प्रस्तावित असल्याचे सांगितले.

........

आयुक्तांवर निष्क्रीयतेचा आरोप,

आकृतीबंधचा प्रस्ताव मागे

महापालिकेच्या अस्थापनावरील पदांचा आकृतीबंध सुधारित करण्याच्या प्रस्तावावरुन प्रशासन आणि नगरसेवकांत संघर्ष उडाला. आकृतीबंध हा महापालिका आणि सामान्य लोकांच्या हितापेक्षा अधिकाऱ्यांचा फायद्याचा असल्याचा आरोप नगरसेवकांनी केला. हा प्रस्ताव अमान्य असून प्रशासनाने फेर प्रस्ताव सादर करावा अशी भूमिका नगरसेवकांनी घेतली. नगरसेवक सुनील कदम यांनी आयुक्तावर निष्क्रीयतेचा व मनमानीपणाचा आरोप केला. तुमच्या कालावधीत विकास कामे झाली नाहीत, तुम्ही कामेही करत नाही आणि निर्णयही होत नाहीत असा ठपका ठेवला. अजित ठाणेकर यांनी सहायक आयुक्तांच्या वेतनश्रेणीची विचारणा केली. विजय खाडे यांनी आकृतीबंधात क्रीडा अधिकाऱ्याच्या नेमणुकीची सूचना केली. प्रविण केसरकर, शेखर कुसाळे यांनी आकृतीबंधमध्ये त्रुटी असल्याचे सांगितले. राहुल माने, तौफिक मुल्लाणी यांनी आकृतीबंध म्हणजे काय हे सभागृहासमोर मांडण्याची सूचना केली. आयुक्त पी. शिवशंकर यांनी प्रस्ताव मागे घेता येणार नसल्याचे सांगताच सभागृहात पुन्हा गोंधळ उडाला. सभागृहाच्या भावना विचारात घेत आयुक्तांनी फेरप्रस्ताव मागे घेत असल्याचे जाहीर केले. दरम्यान संजय भोसले यांनी महापालिकेत ४६७४ पदे मंजूर असून १३२५ पदे रिक्त असल्याची सांगितले. राज्य सरकारच्या गतवर्षीच्या आदेशानुसार आकृतीबंध निश्चित केला आहे. सभागृहाच्या मान्यतेनंतर तो राज्य सरकारकडे सादर करण्यात येणार असल्याचे उत्तर दिले.

संजय भोसलेंची पदोन्नती बेकायदेशीर

नगरसेवक भूपाल शेटे यांनी केएमटीत क्लार्क म्हणून रुजू झालेल्या संजय भोसले यांच्याकडे चार विभागाचा कार्यभार कोणत्या नियमावलीच्या आधारे सोपविला. त्यांना दिलेली पदोन्नती बेकायदेशीर आहे. त्यांच्यापेक्षा जादा बुध्दिमत्तेचे कर्मचारी महापालिकेत असताना भोसले यांच्यावर वरिष्ठांची इतकी मेहेरनजर कशासाठी? अशी विचारणा केली. वरिष्ठ अधिकाऱ्यासमोर लुडबूड करणाऱ्या व कायम त्यांच्या अवतीभोवती फिरणाऱ्यांना पदोन्नती देण्यापेक्षा प्रशासनाने महापालिका अतंर्गत स्पर्धा परीक्षा घेऊन नेमणुका कराव्यात. आकृतीबंध करताना नगरसेवकांनी सुचविलेल्या सूचनांचा समावेश करावा असे प्रा. जयंत पाटील यांनी सुचविले.

‘कामाचा बट्ट्याबोळ’

सत्यजित कदम म्हणाले उपनगरांची संख्या वाढली असून प्रभागातील कामासाठी कर्मचारी नाहीत. महापालिकेत महिला सदस्यासाठी कक्ष नाही, स्वच्छतागृहे नाहीत. केवळ अधिकाऱ्यांच्या केबीन वाढल्या आहेत. नगरसेवक संतोष गायकवाड यांनी केएमटीमधील घोटाळे आणि गैरव्यवहार प्रकरणी जबाबदारी कुणावर निश्चित करायची ? अशी विचारणा केली.

मोबाइल अॅप डाउनलोड करा आणि राहा अपडेट

आयुक्त पी. शिवशंकर यांची बदली

March 24, 2017, 2:30 pm

≫ Next: दोषींकडून रक्कम वसूल करणार

≪ Previous: प्रवाशांच्या सुरक्षेकडे कानाडोळा

$

0

0

म. टा. प्रतिनिधी, कोल्हापूर

महापालिका कामकाजाला शिस्त आणि कामकाजात आधुनिक तंत्रज्ञानाचा अवलंब करत वेगळी ओळख निर्माण केलेल्या आयुक्त पी. शिवशंकर यांची बदली झाली आहे. त्यांच्या जागी भंडाऱ्याचे जिल्हाधिकारी डॉ. अभिजीत चौधरी यांची नियुक्ती करण्यात आली आहे. राज्य सरकारने शुक्रवारी सायंकाळी आयएएस अधिकाऱ्यांच्या बदलीचा आदेश काढला आहे. आयुक्त शिवशंकर यांच्या कोल्हापुरातील कारकीर्दीला तीन वर्षे होण्याआधीच त्यांची बदली झाली आहे.

पी. शिवशंकर यांनी जानेवारी २०१५ मध्ये महापालिकेचे आयुक्त म्हणून सूत्रे हाती घेतली होती. नियमानुसार काम करण्याच्या वृत्तीमुळे गेल्या सव्वादोन वर्षांच्या कालावधीत त्यांचा सभागृह, नगरसेवक आणि अधिकाऱ्यांशी सतत संघर्ष होत राहिला. त्यांनी महापालिकेच्या कामकाजाला शिस्त लावण्याचा प्रयत्न केला. महापालिकेच्या उत्पन्नात भर घालण्यासाठी त्यांनी घरफाळा बिले पोस्टाने पाठविण्याचा निर्णय अंमलात आणला. महापालिकेतील बोगस हजेरी आणि कामचुकारांना चाप लावण्यासाठी बायोमेट्रिक पध्दत सुरु केली. अधिकाऱ्यांच्या दैनंदिन कामकाजाच्या नोंदीसाठी गुगल कॅलेंडर सुरु केले. कामचुकार अधिकाऱ्यांवर कारवाईचा बडगा उगारला. मात्र त्यांच्या कालावधीत कोल्हापुरात मोठ्या प्रकल्पाची अंमलबजावणी झाली नसल्याचा नगरसेवकांचा आक्षेप राहिला आहे. त्यांच्या बदलीचा ठराव सभागृहाने एकदा केला होता.

मोबाइल अॅप डाउनलोड करा आणि राहा अपडेट

---

दोषींकडून रक्कम वसूल करणार

March 25, 2017, 2:30 pm

≫ Next: पासपोर्ट सेवा केंद्राचा शानदार उद्‍घाटन सोहळा

≪ Previous: आयुक्त पी. शिवशंकर यांची बदली

$

0

0

म. टा. प्रतिनिधी, कोल्हापूर

केंद्र पुरस्कृत एका‌‌‌त्मिक पाणलोट व्यवस्थापन योजनेतील (वसुंधरा पाणलोट) गैरव्यवहाराची रक्कम दोषी अधिकाऱ्यांकडून वसूल करण्यासाठी ठोस पाठपुरावा करण्यात येईल, असे जिल्हा‌धिकारी डॉ. अमित सैनी यांनी स्पष्ट केले. जिल्हा सनियंत्रण समितीच्या बैठकीत खासदार राजू शेट्टी यांनी जिल्हाधिकाऱ्यांना याबाबत सूचना केली. त्यावेळी त्यांनी दोषींवर जबाबदारी निश्चित करून रक्कम वसुलीसाठी पाठपुरावा करण्याचे आश्वासन दिले.

ताराराणी सभागृहात बैठक झाली. कृषी विभागाने दडवलेल्या पाणलोट घोटाळा चौकशी अहवालावर महाराष्ट्र टाइम्सने सप्टेंबरमध्ये वृतमालिका प्रसिध्द केली होती. त्याची दखल घेऊन खासदार शेट्टी यांनी गेल्या सनियंत्रणच्या बैठकीत दोषींवरील कारवाईचे काय झाले, अशी विचारणा केली होती. त्यानंतर मुख्यमंत्री देवेंद्र फडणवीस यांना पत्र देऊन लक्ष वेधले होते. शनिवारच्या बैठकीत पुन्हा खासदार शेट्टी यांनी कारवाईचा मुद्दा उपस्थित केला.

त्यावर जिल्हाधिकारी डॉ. सैनी म्हणाले, दोषींकडून रक्कम वसूल करण्यासंबंधीचा अहवाल कृषी विभागच्या वरिष्ठ अधिकाऱ्यांकडे पाठवला आहे. त्याबाबत लवकरच कारवाई होईल.


काय आहे घोटाळा ?

जिल्ह्यातील पाणलोट कामांत सुमारे ३० कोटींचा गैरव्यवहार झाल्याची तक्रार १८ जुलै २०१५ रोजी झाली होती. त्यानंतर समितीतर्फे चौकशी झाली. चौकशीत ५५ अधिकाऱ्यांवर ठपका ठेवला आहे. जागेवर जाऊन कामांची पाहणी व तपासणी न करणे, नियमबाह्य कामांची निवड, निकृष्ट बंधारे होऊ नयेत यासाठी लक्ष न देणे, असे आक्षेप ठेवले आहेत.

मोबाइल अॅप डाउनलोड करा आणि राहा अपडेट

पासपोर्ट सेवा केंद्राचा शानदार उद्‍घाटन सोहळा

March 25, 2017, 2:30 pm

≫ Next: पन्हाळा-पावनखिंड पदभ्रमंती मार्गाचा विकास करा

≪ Previous: दोषींकडून रक्कम वसूल करणार

$

0

0

म. टा. प्रतिनिधी, कोल्हापूर

भारताची लोकसंख्या १२५ कोटी असली तरी केवळ ७ कोटी ५० लाख नागरिकांकडे पासपोर्ट आहे. पासपोर्टही आता अत्यावश्यक बाब बनली आहे. मागणी

करणाऱ्या प्रत्येकाला पासपोर्ट मिळावा, यासाठी भारतातील प्रत्येक जिल्ह्यात पासपोर्ट कार्यालय उघडण्यासाठी प्रयत्नशील असल्याचे प्रतिपादन विदेश मंत्रालयाचे सचिव डॉ. ज्ञानेश्वर मुळे यांनी केले. कोल्हापुरात सेवा केंद्र सुरू झाल्याने वर्षाकाठी कोल्हापूरकरांचे दहा ते पंधरा कोटी वाचणार आहेत, असेही त्यांनी स्पष्ट केले.

येथील मुख्य पोस्ट ऑफिस कार्यालयात महाराष्ट्रातील पहिल्या पोस्ट ऑफिस पासपोर्ट सेवा केंद्राचे उद्‍घाटन छत्रपती शाहू महाराज यांच्याहस्ते करण्यात आले. यावेळी आयोजित कार्यक्रमात डॉ. मुळे बोलत होते.

ते म्हणाले की, एखाद्या विकासकामासाठी लोकप्रतिनिधी एकत्र आल्यास उत्कृष्ट काम होऊ शकते, याचे उत्तम उदाहरण म्हणून पासपोर्ट सेवा केंद्राचे नाव घेता येईल. रोज ५० नागरिकांना पहिल्या टप्प्यात पासपोर्ट वितरणाची सुविधा मिळणार असून भविष्यात हा विस्तार वाढवण्यात येणार आहे.

डॉ. मुळे म्हणाले, ‘पोलिस पडताळणीबाबत महाराष्ट्र राज्य तेलंगणा आणि आंध्र प्रदेशपेक्षा मागे असून तेथे पोलिस पडताळणीला लागणारा कालावधी तीन दिवसांचा असतो. महाराष्ट्रात हा कालावधी २१ दिवसापेक्षा जास्त असतो. पासपोर्टची प्रक्रिया सोपी करण्यासाठी अनेक बदल करण्यात आले आहेत. आता काही मोजकीच कागदपत्रे स्वसाक्षांकीत करुन घेतली जातात. बदलत्या सामाजिक वास्तवाचे भान राखत पाल्याच्या पासपोर्टवर दोन्ही पालकांची नावे आवश्यक नसल्याबाबतचा बदलही करण्यात आल्याचे तसेच अनाथ अश्रमातील मुलांना पासपोर्ट मिळण्याबाबतही आवश्यक बदल करण्यात आले आहेत.’

व्हीसा प्रक्रियाही सोपी

भारतातील व्हीसा प्रक्रिया सोपी करण्यात आली आहे. १५५ देशांतील नागरिकांना ऑनलाइन व्हीसा सुविधा प्रक्रिया निर्माण करुन देण्यात आली आहे. पासपोर्ट, हायकोर्ट आणि एअरपोर्ट या तीन बाबी पूर्ण झाल्यानंतर कोल्हापूरचा विकास कुणीही रोखू शकत नाही,असेही मुळे यांनी यावेळी सांगितले.

मोबाइल अॅप डाउनलोड करा आणि राहा अपडेट

पन्हाळा-पावनखिंड पदभ्रमंती मार्गाचा विकास करा

March 27, 2017, 2:30 pm

≫ Next: पाडव्याच्या स्वागतासाठी करवीरनगरी सज्ज

≪ Previous: पासपोर्ट सेवा केंद्राचा शानदार उद्‍घाटन सोहळा

$

0

0

कोल्हापूर टाइम्स टीम

पन्हाळा पावनखिंड प्रदभ्रमंती भागात विकासकामे राबववून या मार्गाचा विकास करावा, अशी मागणी हिल रायडर्स अँड हायकर्स ग्रुपच्या माध्यमातून विविध सामाजिक संस्था, संघटनांनी मुख्य वनसंरक्षक अरविंद पाटील यांच्याकडे सोमवारी केली.

शिवसेना जिल्हाप्रमुख विजय देवणे, हिल रायडर्स अँड हायकर्स ग्रुपचे प्रमोद पाटील, समिर अॅडव्हेंचर्स विनोद कांबोज, शाहीर राजू राऊत, डॉ. अमर आडके, शंभुराजे मर्दानी खेळ विकास मंचचे सुरज ढोली यांच्या शिष्टमंडळाने मुख्य वनसंरक्षकांची भेट घेतली. पावनखिंड परिसरात छत्रपती शिवाजी महाराजांच्या जाज्वल इतिहास घडला आहे. शिवा काशिद व बाजी फुलाजी देशपांडे यांच्या पराक्रमाने ही भूमी शौर्याचे प्रतिक बनले. या परिसरात घडलेल्या रोमांचकारी इतिहासामुळे दरवर्षी या परिसरात हजारो युवक-युवती पदभ्रमंती मोहिमेसाठी येत असतात. पण परिसरात कोणत्याच सुविधा नाहीत. या परिसरात पायाभूत सुविधा राबवण्यासाठी विविध संघटनांनी चर्चा व अभ्यास करुन प्रकल्प आराखडा तयार केला आहे. त्याची अंमलबजावणी करण्याची मागणी शिष्टमंडळाने केली. त्यावर या भागाच्या विकासासाठी जिल्हाधिकारी कार्यालयाकडून प्रकल्प प्रस्ताव आल्यानंतर व​नविभाग ताबडतोब निधीची तरतूद करेल, असे आश्वासन मुख्य वनसंरक्षक अरविंद पाटील यांनी दिले.

शिष्टमंडळाने प्राथमिक विकास आराखड्याची प्रत पाटील यांच्याकडे दिली. पदभ्रमंती मार्गाच्या प्रसिद्धीसाठी वेबसाईट सुरू करावी, नकाशा प्रसिद्ध करावा, राज्यातील पर्यटनस्थळाच्याठिकाणी फलक लावावेत, अशी मागणी केली. तसेच पदभ्रमंती मार्गात दिशादर्शक फलक, शिलालेख, मार्ग निश्चिती अशी सोय करावी. मार्गावर पाण्याची सोय, कचरा व्यवस्थापन, शौचालय, स्वच्छतागृहे, वस्ती छावणी, तंबू निवास, न्याहरी निवास योजना, आपत्ती व्यवस्थापन यांची सोय करण्याच्या सूचना करण्यात आल्या.

मोबाइल अॅप डाउनलोड करा आणि राहा अपडेट

पाडव्याच्या स्वागतासाठी करवीरनगरी सज्ज

March 27, 2017, 2:30 pm

≫ Next: अतिक्रमणांना पालकमंत्र्यांची आठवड्याची मुदत

≪ Previous: पन्हाळा-पावनखिंड पदभ्रमंती मार्गाचा विकास करा

$

0

0

कोल्हापूर टाइम्स टीम

नववर्षाचे उत्साहात स्वागत करण्यासाठी तसेच चैतन्याची गुढी उभारण्यासाठी करवीरनगरी सज्ज झाली आहे. बाजारापेठाही सजल्या आहेत. पाडव्यानिमित्त कोल्हापुरात वाहन, घर, इलेक्ट्रॉनिक वस्तू, सोने-चांदी, फ्लॅअ आणि गृहोपयोगी वस्तू खरेदीच्या उत्साहाला उधाण आले आहे. सामाजिक संस्था, संघटना आणि तरुण मंडळांच्यावतीने पाडव्यानिमित्त विविध उपक्रमांचे आयोजनही करण्यात आले आहे.

गुढीपाडवा घरोघरी मराठी वर्षातील पहिला सण. हा सण साजरा करण्यासाठी पाडव्याच्या पूर्वसंध्येपासूनच जय्यत तयारी सुरु झाल्याचे दिसत होते. सायंकाळी बाजारपेठेत साहित्य खरेदीसाठी गर्दी झाली होती. शहरातील चौकाचौकांत गुढीसाठीचे चिवे विक्रीसाठी उपलब्ध होत्या. चाफ्याच्या फुलांच्या माळांची २० ते ३० रुपयांना विक्री होत होती.

इलेक्ट्रॉनिक वस्तू

पाडवासणाचे औचित्य साधून व्यापारी वर्गानेही विविध वस्तू खरेदीवर खास ऑफर्स आणि सवलती दिल्यामुळे शोरुममध्ये बुकिंगसाठी गर्दी झाली होती. यामध्ये वॉशिंग मशीन, एसी, मोबाइल फोन, टॅब, लॅपटॉप तसेच गृहोपयोगी वस्तूंमध्ये फ्रीज, कुलर, व्हॅक्यूम क्लिनर अशा वेगवेगळ्या वस्तूंची रेलचेल दित आहे. त्यातही अद्ययावत आणि आणि नवीन मॉडेल्सही उपलब्ध करण्यात आली आहेत.

वाहन मार्केट

पाडव्याच्या मुहूर्तावर वाहन घरी नेता यावे, यासाठी ग्राहकांनी गेल्या आठवड्यात शहरातील अनेक शोरुमध्ये कार आणि टुव्हिलरची मोठ्या प्रमाणात बुकिंग केले आहे. दुचाकी आणि चारचाकी खरेदीवरही विक्रेत्यांनी आकर्षक ऑफर दिल्या आहेत. या दिवशी वाहनाची डिलिव्हरी केल्यास भरघोस सूट देण्याची ऑफर वाहन कंपन्यांनी जाहीर केली आहे.

सोने-चांदी खरेदीला पसंती

अनेकांनी गुंतवणूक म्हणूनही सोने-चांदीचे दागिने खरेदी करण्यासाठी पसंती दिली आहे. सोन्या-चांदीची प्रमुख बाजारपेठ असलेल्या गुजरीसह अन्य सराफी दुकानात सोने खरेदीसाठी गर्दी होण्याची शक्यता आहे. त्यामुळे मंगळवारी, गुढीपाडव्यादिवशी मार्केटला झळाळी येणार आहे. सोने खरेदी करण्यापूर्वी पसंतीच्या डिझाइन्ससाठी ऑर्डर देऊन तर काहींनी, पाडव्यादिवशी सोने घरी न्यायचे म्हणून दागिन्यांचे बुकिंग आधीच केले आहे.

पूजेच्या साहित्यासाठी गर्दी

साडेतीन मुहूर्तांपैकी एक असलेल्या या सणानिमित्त शहरातील सर्वच बाजारपेठा सज्ज झाल्या आहेत. चिव्याची काठी, साखरेच्या माळा, फळे, फुले, जरीकाठाचे वस्त्र, चाफ्यांच्या फुलांची माळ, कलश, मिनी गुढीसह पूजेचे अन्य साहित्य खरेदी करण्यासाठी सोमवारी संध्याकाळपर्यंत बाजारपेठेत गर्दी झाल्याचे दिसत होते.

ढोलताशा स्पर्धा

गुढीपाडव्याचे मंगलमयी स्वागत करण्यासाठी मंगळवार (ता. २८) सायंकाळी चार वाजता शाहू खासबाग मैदान येथे जिल्हास्तरीय ढोलताशा वादन स्पर्धा होणार आहेत. विजेत्या पथकाला एक लाख रुपयाचे बक्षीस दिले जाणार आहे. पश्चिम महाराष्ट्रातील या सर्वांत मोठ्या स्पर्धेचे आयोजन युवासेना व आमदार राजेश क्षीरसागर फाउंडेशनने केले आहे.

सीनिअर सिटीझनसाठी ‘स्नेहबंध’

ऋणानुबंध चॅरिटेबल ट्रस्टच्यावतीने सीनिअर सिटीझनसाठी स्नेहबंध या निवासी सहयोगी संकुलाच्या नूतन वास्तूचा पायाभरणी समारंभ होणार आहे. मंगळवार (ता. २८) सकाळी १० वाजता, मत्तिवडे रोड, करनूर (कागल) येथे पालकमंत्री चंद्रकांत पाटील यांच्याहस्ते पायाभरणी होणार आहे.

मोबाइल अॅप डाउनलोड करा आणि राहा अपडेट

अतिक्रमणांना पालकमंत्र्यांची आठवड्याची मुदत

March 27, 2017, 2:30 pm

≫ Next: महामंडळ नियुक्त्या एप्रिलमध्ये

≪ Previous: पाडव्याच्या स्वागतासाठी करवीरनगरी सज्ज

$

0

0

म. टा. प्रतिनिधी, कोल्हापूर

‘राजकीय दबाव झुगारून सीपीआर रुग्णालयाच्या आवारातील अतिक्रमणे काढा. दोन एप्रिलपर्यंत अतिक्रमणे न काढल्यास सीपीआर प्रशासनावर कारवाई केली जाईल’, असा इशारा पालकमंत्री चंद्रकांत पाटील यांनी दिला. सोमवारी (ता. २७) सीपीआरमध्ये झालेल्या बैठकीत मंत्री पाटील यांनी, शासकीय सेवेत राहूनही बाहेरील खासगी रुग्णालयांमध्ये काम करणाऱ्या डॉक्टरांची यादी तयार करण्याचे आदेश सीपीआरचे अधिष्ठाता डॉ. जयप्रकाश रामानंद यांना दिले. बैठकीनंतर मंत्री पाटील यांनी पत्रकारांना निर्णयांची माहिती दिली.

सीपीआर रुग्णालयाच्या अभ्यागत मंडळाची बैठक अधिष्ठाता कार्यालयात पालकमंत्री चंद्रकांत पाटील यांच्या अध्यक्षतेखाली झाली. यावेळी त्यांनी सीपीआरमधील विविध कामांचा आढावा घेतला. भाजलेल्या रुग्णांसाठी अद्ययावत कक्ष सुरू करणे, नवीन पोलिस चौकीची उभारणी, सांडपाणी निर्गतीकरणाचा प्रश्‍न या गोष्टी प्रामुख्याने मार्गी लावण्याच्या सूचना केल्या. उच्च न्यायालयाच्या आदेशानुसार रुग्णालयात डॉक्टरांना सुरक्षा पुरवली जाईल. रुग्णांसोबत दोनच नातेवाईकांना आत थांबण्याची परवानगी देण्यात येईल, असे पालकमंत्री पाटील यांनी स्पष्ट केले. डॉक्टरांना २४ तास पुरेसा पोलिस बंदोबस्त देण्याची जबाबदारीही सरकारने घेतली आहे. यासाठीचा खर्च राज्य सरकार करेल, असे त्यांनी स्पष्ट केले.

डॉ. रामानंद यांनी यावेळी सीपीआरमध्ये ऑडिटोरीयमची गरज व्यक्त केला. यावर पालकमंत्र्यांनी त्यांना खडसावत रुग्णांसाठी सुविधा उपलब्ध करण्यावर भर देण्याची सूचना केली. बैठकीस आमदार अमल महाडिक, समितीचे सदस्य महेश जाधव, अजित गायकवाड, शीतल रामुगडे, डॉ. सुरेखा बसरगे, डॉ. इंद्रजित काटकर, डॉ. अजित लोकरे, सुनील करंबे, सुभाष रामुगडे आदींसह जिल्हा शल्यचिकित्सक डॉ. एल. एस. पाटील, वैद्यकीय अधीक्षक डॉ. शिशिर मिरगुंडे, सार्वजनिक बांधकाम विभागाचे कार्यकारी अभियंता आर. एस. पाटील, पोलिस उपअधीक्षक भारतकुमार राणे, राजीव गांधी योजनेचे जिल्हा समन्वयक डॉ. सागर पाटील आदी उपस्थित होते.

अतिक्रमणे हटवा, अन्यथा कारवाई

सीपीआर रुग्णालयाच्या आवारात १४ अतिक्रमणे आहेत. या अतिक्रमणधारकांना एक एप्रिलपर्यंतची मुदत देऊन मंगळवारी अंतिम नोटीस देण्याची सूचना मंत्री पाटील यांनी केली. अतिक्रमणे काढताना राजकीय दबाव घेऊ नका. दोन एप्रिलपर्यंत सीपीआरचा परिसर अतिक्रमणमुक्त झाला पाहिजे, अन्यथा सीपीआर प्रशासनावर कारवाई करू, असा स्पष्ट इशारा पालकमंत्री पाटील यांनी दिला. त्यामुळे सीपीआरमधील अतिक्रमणे हटण्याची शक्यता निर्माण झाली आहे.

भाजलेल्या रुग्णांसाठी अद्ययावत कक्ष

सीपीआरमध्ये भाजलेल्या रुग्णांवर उपचार करण्यासाठी स्वतंत्र अद्ययावत कक्ष नाही. अलिकडे कोल्हापूर जिल्ह्यासह कर्नाटक सीमाभाग, कोकण आणि सांगली जिल्ह्यातूनही रुग्ण दाखल केले जातात. भाजलेल्या रुग्णांवर उपचार करण्यासाठी अद्ययावत कक्ष गरजेचा आहे, अशी मागणी अधिष्ठाता रामानद यांनी केली. याचा तातडीने प्रस्ताव तयार करून देण्याचे आदेश मंत्री पाटील यांनी दिले. प्रस्तावाला मंजुरी आणण्याची जबाबदारी पालकमंत्र्यांनी स्वीकारली.

पेशंट पळवणाऱ्या साखळीची अधिष्ठातांची कबुली

राजीव गांधी योजनेचा आढावा घेतल्यानंतर सीपीआरकडे येणाऱ्या पेशंटची संख्या कमी असल्याचा मुद्दा अभ्यागत मंडळाचे सदस्य सुभाष रामुगडे यांनी उपस्थित केला. यावर अधिष्ठाता डॉ. जयप्रकाश रामानंद यांनी सीपीआरमधून पेशंटना खासगी रुग्णालयात पळवणारी यंत्रणा सक्रीय असल्याची कबुली दिल्याने उपस्थितांनी आश्‍चर्य व्यक्त केले. तसेच १०८ रुग्णवाहीकेमधील डॉक्टरही पेशंटना खासगी रुग्णालयात जाण्याचा सल्ला देतात. यासाठी त्यांना कमीशन मिळते, असा आरोपही बैठकीत करण्यात आला.

मोबाइल अॅप डाउनलोड करा आणि राहा अपडेट