पासपोर्ट ही आता केवळ चैन उरली नसून ती गरज बनली आहे. पासपोर्टची वाढती मागणी पाहता प्रत्येक जिल्ह्यात पासपोर्ट कार्यालय सुरू करण्याचे काम सुरू झाले आहे. येत्या दीड महिन्यात राज्यातील १८ जिल्ह्यांमध्ये पासपोर्ट केंद्र कार्यान्वित होणार असल्याचे परराष्ट्र सचिव डॉ. ज्ञानेश्वर मुळे यांनी जाहीर केले.
कोल्हापूर येथील मुख्य पोस्ट कार्यालयात महाराष्ट्रातील पहिल्या पोस्ट ऑफिस पासपोर्ट सेवा केंद्राचे उद्घाटन श्रीमंत छत्रपती शाहू महाराज यांच्या हस्ते करण्यात आले. यावेळी आयोजित कार्यक्रमात डॉ. ज्ञानेश्वर मुळे बोलत होते. यावेळी खासदार राजू शेट्टी, खासदार धनंजय महाडिक खासदार संभाजीराजे छत्रपती, महापौर हसीना फरास, पोस्टमास्टर जनरल विनोदकुमार शर्मा, जिल्हाधिकारी डॉ. अमित सैनी, पुण्याचे क्षेत्रीय पासपोर्ट अधिकारी अतुल गोतसुर्वे, महापालिका आयुक्त पी. शिवशंकर, जिल्हा परिषदेचे मुख्य कार्यकारी अधिकारी डॉ. कुणाल खेमनार आदी प्रमुख उपस्थित होते. जिल्हाधिकारी डॉ. अमित सैनी यांच्या पासपोर्टचे नूतनीकरण करून या सेवेचा शुभारंभ करण्यात आला.
यावेळी बोलताना डॉ. मुळे म्हणाले, ‘सव्वाशे कोटी लोकसंख्या असलेल्या देशात केवळ साडेसात लाख नागरिकांकडेच पासपोर्ट आहे. पासपोर्ट काढण्याची प्रक्रिया सुलभ करण्यात आली आहे. गेल्या तीन वर्षांपासून कोल्हापूरच्या नागरिकांना पासपोर्टसाठी पुण्याला जावे लागत असल्यामुळे वेळ आणि पैसे खर्च होत होते. मात्र या सेवाकेंद्रामुळे वर्षाकाठी कोल्हापूरकरांचे दहा ते पंधरा कोटी रुपयांची बचत होणार आहे. एखाद्या विकासकामासाठी लोकप्रतिनिधी एकत्र आल्यास उत्कृष्ट काम होऊ शकते याचे उत्तम उदाहरण म्हणून पासपोर्ट सेवा केंद्राचे नाव घेता येईल. रोज ५० नागरिकांना पहिल्या टप्प्यात पासपोर्ट वितरणाची सुविधा मिळणार असून भविष्यात हा विस्तार वाढवण्यात येणार आहे असे सांगून डॉ. मुळे म्हणाले, ‘पासपोर्ट, हायकोर्ट आणि एअरपोर्ट या तीन गोष्टी पूर्ण झाल्यानंतर कोल्हापूरचा विकास कोणीही रोखू शकत नाही,’ असेही त्यांनी यावेळी सांगितले.
श्रीमंत छत्रपती शाहू महाराज म्हणाले, ‘विविध कारणांनी परदेशात जावू इच्छिणाऱ्यांची संख्या वाढत असून त्यासाठी पोस्ट ऑफिस पासपोर्ट सेवा केंद्रामुळे पासपोर्ट मिळणे सोपे होणार आहे. कोल्हापुरात हे केंद्र तातडीने होणे गरजेचे होते. पाठपुराव्यामुळेच हे शक्य झाले.’
खासदार संभाजी राजे म्हणाले, ‘पासपोर्ट केंद्राप्रमाणेच कोल्हापूरचे प्रश्न सुटावेत यासाठी राजकारण विरहीत प्रयत्न करण्यात येतील.’
खासदार राजू शेट्टी म्हणाले, ‘पासपोर्ट प्रक्रिया सोपी व्हावी, एजंटगिरी नाहीशी व्हावी आणि सेवा अधिकाधिक लोकाभिमुख व्हावी. सविनय कायदेभंगाचे गुन्हे असणाऱ्यांना पासपोर्ट देण्याबाबतचा निर्णय परराष्ट्र मंत्रालयाने सकारात्मक घ्यावा,’ असे आवाहन केले.
धनंजय महाडिक म्हणाले, ‘कोल्हापुरातील पासपोर्ट केंद्र बंद झाल्यानंतर कोल्हापूरकरांची होणारी गैरसोय पाहिली आहे. दरडोई उत्पन्नामध्ये देशात दुसऱ्या स्थानावर असलेल्या कोल्हापुरात पासपोर्ट केंद्र असावे यासाठी पाठपुरावा केला आणि तो यशस्वी झाला. आता पोलिस पडताळणी प्रक्रिया शिथील करण्यासाठी बैठक घेऊ.’ यावेळी जिल्हाधिकारी डॉ. अमित सैनी, विनोदकुमार शर्मा, अतुल गोतसुर्वे यांनी मनोगत व्यक्त केले.
प्रक्रिया सोपी होणार
सविनय कायदेभंगाचे गुन्हे अनेकांवर आहेत,अशा स्थितीत सर्व सामान्यांच्या हक्कासाठी लढा देणारे सामान्य कार्यकर्ते पासपोर्ट सुविधेपासून वंचित राहू नयेत यासाठी परराष्ट्र मंत्री सुषमा स्वराज यांच्याशी चर्चा करणार असल्याचेही डॉ. मुळे यांनी यावेळी सांगितले. पासपोर्टची प्रक्रिया सोपी करण्यासाठी अनेक बदल करण्यात आल्याचे सांगून आता काही मोजकीच कागदपत्रे स्वसाक्षांकित करुन घेतली जातात.
आमच्यावरही गुन्हे
पासपोर्ट वितरण प्रकियेतील महत्त्वाचा भाग असलेल्या पोलिस पडताळणीमध्ये संबंधित अर्जदाराच्या नावावर कोणता गुन्हा नोंद आहे का हे तपासले जाते. यावरून व्यासपीठावर चांगलीच खसखस पिकली. खासदार महाडिक म्हणाले, ‘कोल्हापूर हे चळवळीचे आणि आंदोलनाचे शहर आहे. सामाजिक कार्यासाठी रस्त्यावर उतरणारे कार्यकर्ते कोल्हापुरात आहेत. विद्यार्थी चळवळीही सातत्याने होत असतात. त्यामुळे अशा आंदोलनातून गुन्हे नोंद असतील त्यामध्ये शिथीलता आणावी. या कार्यक्रमासाठी उपस्थित असलेल्या अनेकांवर असा सविनय कायदेभंगाचा गुन्हा नोंद असेल. माझ्यावरच काही सामाजिक गुन्हे नोंद आहेत. राजू शेट्टी यांनीही माझ्यावर ४२ गुन्हे नोंद असल्याने मी परदेशी कसा जाणार? असा सवाल करताच हशा पिकला.
फॉर्म भरण्यासाठी स्वतंत्र कक्ष लवकरच
पासपोर्ट मिळण्यासाठीच्या प्रक्रियेला येणाऱ्या खर्चापेक्षा एक रुपयाही कुणाला देऊ नका असे आवाहन करत डॉ. मुळे यांनी सांगितले की, पासपोर्टसाठी अर्ज भरण्याची पद्धत ज्यांना अवगत नाही त्यांच्यासाठी स्वतंत्र कक्षही लवकरच तयार केला जाणार आहे. सध्या पोस्ट ऑफिस केंद्रातील अधिकारी व कर्मचारी शंका निरसन करतील.
मोबाइल अॅप डाउनलोड करा आणि राहा अपडेट
