रेल्वेमंत्री सुरेश प्रभू शनिवारी (ता. २५) कोल्हापुरात येत आहेत. यापार्श्वभूमीवर राजर्षी छत्रपती शाहू महाराज टर्मिनसचे सुभोभिकरण अंतिम टप्प्यात आहे. प्रवेशद्वारासमोर भव्य मंडप घालण्याचे काम सुरू आहे. स्टेशन अधीक्षक सुग्रीव मीना यांनी गुरुवारी स्टेशनवरील कामांची पाहणी केली.
रेल्वेमंत्री प्रभू यांचे शनिवारी सायंकाळी पाच वाजता स्थानकात आगमन होणार आहे. त्यांच्या हस्ते विविध कामांचा प्रारंभ केला जाईल. मंत्री प्रभू येत असल्याने स्थानक चकाचक करण्यात येत आहे. स्थानकाची रंगरंगोटी करण्यात आली आहे. आता दिवसातून तीनवेळा स्वच्छता केली जात आहे. दुचाकी आणि चारचाकी वाहनांची पार्किंग व्यवस्था बदलण्याच्या सूचना देण्यात आल्या आहेत. संत निरंकारी मिशन ट्रस्टच्या सहकार्याने रोपांच्या शोभिवंत कुंड्या ठेवल्या आहेत. प्रवेशद्वाराला हिरवाईचा लूक देण्यात आला आहे. स्टेशनवरील धातूशोधक यंत्रणेची तपासणी करण्यात आली. रेल्वे सुरक्षादल, पोलिस आणि रेल्वे कर्मचाऱ्यांना प्रवाशांसोबत सौजन्याने वागण्याच्या सूचनाही देण्यात आल्या. रात्री उशीरापर्यंत रेल्वेस्थानकावर रोषणाई करण्याचे काम सुरू होते. त्यासाठी रेल्वेचे इलेक्ट्रिकल विभागाने तयारी केली. अधीक्षक मीना यांनी स्थानकाच्या प्रवेशद्वाराच्या परिसरात झोपलेल्या काहीजणांना हटकले.
दरम्यान, रेल्वे प्रवासी संघटना शनिवारी रेल्वेमंत्र्यांची भेट घेणार आहेत. कोल्हापूरच्या स्थानकाबाबतच्या विविध मागण्यांचे निवेदन देण्यात येणार आहे. मंत्री प्रभू यांच्या हस्ते कोल्हापूर ते वैभववाडी नवीन मार्गाच्या कामाचा प्रारंभ केला जाण्याची शक्यता आहे. काही विकासकामांचे लोकार्पण करण्यात येणार आहे. यातील बहुतांश कामांचे लोकार्पण पुणे स्टेशनशी संबंधित आहे. कोल्हापूर स्टेशनवर होणारे कार्यक्रम व्हिडीओ कनेक्टिव्हीटीच्या माध्यमातून पुणे स्टेशनवर दाखवण्यात येणार आहेत.
मोबाइल अॅप डाउनलोड करा आणि राहा अपडेट
