म. टा. वृत्तसेवा, इस्लामपूर
कृषी राज्यमंत्री सदाभाऊ खोत यांचे पुत्र सागर यांच्या प्रचाराला जाताना कुटुबियांच्या मोटारीला अपघात झाला. रविवारी सकाळी पावणेदहाच्या सुमारास इस्लामपूर-सांगली रस्त्यावरील आष्टा गावानजीक शिंदे मळ्याजवळ ही घटना घडली. अपघात दहा जण जखमी झाले. यापैकी दोघांची प्रकृती गंभीर असून त्यांच्यावर कोल्हापूर येथील खासगी हॉस्पिटलमध्ये उपचार सुरू आहेत. अन्य जखमींवर इस्लामपूर येथील प्रकाश हॉस्पिटलमध्ये उपचार सुरू आहेत. जखमींमध्ये मंत्री खोत यांच्या दोन सुना मोहिनी सागर खोत आणि गीता सुनील खोत यांचा समावेश आहे.
प्रचारासाठी निघालेल्या या मोटारीच्या (एमएच ४५. ए. ७५७२) उजव्या बाजूचे पाठीमागील टायर फुटल्याने हा अपघात झाला. भरधाव वेगात असताना टायर फुटल्याने चालकाचे मोटारीवरील नियंत्रण सुटले आणि मोटार दोनदा उलटली. गाडीत महिला असल्याने एकच गलका उडाला. रस्त्यावरील प्रवाशांनी उलटलेली मोटार सरळ करून जखमींना तातडीने उपचारासाठी इस्लामपूर येथील प्रकाश हॉस्पिटलमध्ये पाठविले. मोटारीतील बहूतेक सर्वांच्या हात, पाय, मानेला, डोक्याला मार लागला आहे.
अपघातातील जखमी तृप्ती तानाजी हारुगडे (वय २२ रा. येलूर, ता. वाळवा) आणि सुनील लक्ष्मण खोत (वय २७ रा. मरळनाथपूर, ता. वाळवा) यांच्या डोक्याला मार लागल्याने या दोघांना कोल्हापूर येथील खासगी हॉस्पिटलमध्ये हालवण्यात आले.
मंत्री खोत यांच्या सून मोहिनी सागर खोत यांच्या पाठिला आणि पायाला तर गीता सुनील खोत यांच्या मानेला दुखापत झाली आहे. रुपाली सुनील खोत, अरुणा दीपक खोत, जयकर हिंदूराव खोत, निलेश किसन खोत व योगिता दीपक खोत (सर्व रा. मरळनाथपूर) आणि तेजश्री गणेश शेवाळे (रा. इस्लामपूर) यांच्यावर इस्लामपूर येथे उपचार सुरू आहेत.
खोत यांचे पुत्र सागर हे बागणी मतदारसंघातून जिल्हा परिषदेची निवडणूक लढवत आहेत. त्यांच्या प्रचारासाठी कुटुंबीय सकाळी बागणी मतदारसंघात निघाले होते. अपघाताची नोंद आष्टा पोलिस ठाण्यात झाली आहे.
मोबाइल अॅप डाउनलोड करा आणि राहा अपडेट