कोल्हापूर टाइम्स टीम
शहरातील वाहतुकीचे प्रमाण कमी करण्यासाठी भोवताली रिंगरोडचे नियोजन करण्यात आले. त्याचबरोबर शहर व परिसरातील वाहतूक व्यवस्थेला शिस्त लावण्यासाठी रिंगरोडच्या परिसराला अतिक्रमणमुक्त ठेवण्याबरोबरच शहरासाठी विविध सुविधांची पायाभरणीही आत्ताच होण्याची आवश्यकता आहे. ८८ किलोमीटर लांबीच्या रिंगरोडचा वापर पूर्ण क्षमतेने होण्यासाठी अतिक्रमण रोखण्यासाठी त्या मार्गावर ठिकठिकाणी बाजार तसेच महत्त्वाच्या ठिकाणांच्या जागांचे नियोजन करण्याची आवश्यकता आहे. शहराबाहेर अवजड वाहनांना वाहनतळ, वाहतूक सुविधा प्रकल्प, वाहतूक विकास प्रकल्प, केएमटीची शटल बस सर्व्हिस, जुळ्या कोल्हापूरसाठी जमीन सर्व्हेक्षण या बाबींचा अग्रक्रमाने विचार करण्याची गरज निर्माण झाली आहे.
शहराची हद्दवाढ होत नसल्याने व अरुंद रस्त्यांमुळे होणारी वाहतुकीमुळे कोंडी कमी करण्यासाठी सरकारने नुकताच रिंगरोड प्रस्तावित केला. या रिंगरोडमध्ये सभोवतालच्या ग्रामीण, इतर जिल्हा, विशेष जिल्हा तसेच राज्य मार्गांचा समावेश आहे. या रस्त्यावरुन शहरात नाइलाजाने जाणारी वाहने या रस्त्यांची साखळी करुन शहराबाहेरुन पाठवण्याचे नियोजन केले आहे. पण, जोडल्या जाणाऱ्या या सर्व रस्त्यांवर भविष्यात येणारा ताण आत्ताच लक्षात घेण्याची आवश्यकता आहे. त्यादृष्टीने प्रादेशिक आराखड्यातील दळणवळण अभ्यास गट समितीचे सदस्य विनायक रेवणकर यांनी जिल्हा प्रशासनाकडे पूर्वीच काही महत्त्वाच्या शिफारशी केल्या आहेत. रिंगरोडचा वापर व्यवस्थित व पूर्ण क्षमतेने होण्यासाठी खास लक्ष देण्याची गरज आहे. अन्यथा त्या रस्त्यावर ‘बायपास’ मिळण्याऐवजी जर वाहने रखडत चालली तर त्याचा वापर कमी होऊन पुन्हा शहरातील वाहतूक वाढण्याचा धोका असतो.
त्यामुळे या रस्त्यावर वाहतूक वाढल्याने आपोआपच तेथील विविध व्यवसायाला चालना मिळून मोठी व्यावसायिक स्पर्धा होण्याची शक्यता आहे. त्यातून आपोआपच अतिक्रमणाला चालना मिळण्याची शक्यता असते. हे थांबवण्यासाठी या रस्त्यावरील महत्त्वाच्या गावांच्या ठिकाणी बाजारपेठांचे नियोजन करण्याची आवश्यकता आहे. त्यामुळे इतरत्र व्यवसाय वाढण्यापेक्षा नियोजित ठिकाणी चालना मिळेल व वाहतुकीला अडथळा होणार नाही, असे रेवणकर यांनी शिफारशीमधून सुचवले आहे. याबरोबरच जिल्ह्यातील महामार्गाशी संलग्न ५० किलोमीटरच्या आवारातील प्रमुख गावांची वाढ होण्यासाठी पडीक जमीन टाऊनशीपसाठी प्रस्तावित करणे, दहा हजारावर लोकसंख्या असेल तर तिथे गरजेनुसार रस्ते प्रस्तावित करणे, भविष्यातील गरजांच्यादृष्टीने सर्व्हेक्षण करण्याची आवश्यकताही व्यक्त केली आहे.
रिंगरोडबाबतच्या दक्षतेसह शहरांतर्गत वाहतूक सुरळीत राहण्यासाठीही काही महत्त्वाचे मुद्दे रेवणकर यांनी मांडले आहेत. औद्योगिक वसाहतीकडे ये-जा करण्याचे प्रमाण मोठे असल्याने वसाहतीजवळच नागरी वसाहत उभारणीकरिता जमिनीची उपलब्धता करुन देणे गरजेचे आहे. त्यामुळे शहरातील ही वाहतूक कमी होण्यास मदत होणार आहे, असे त्यांचे मत आहे. तीर्थक्षेत्रासाठी येणाऱ्या पर्यटकांची संख्या मोठी आहे. त्यांची सर्व वाहने शहरात येण्याऐवजी पर्यटकांना ने आण करण्यासाठी केएमटीची शटल सर्व्हिस सुरू करण्यात यावी, अवजड वाहनांसाठी वाहनतळ उपलब्ध करुन देण्याची गरज आहे. पर्यटक वाहने व अवजड वाहनांबरोबर सार्वजनिक वाहतूक व्यवस्थेतील वाहनांचाही त्यांनी विचार केला आहे. शहराच्या प्रवेशद्वार व महामार्गाजवळ वाहतूक केंद्र स्थान निर्मिती केली पाहिजे, असे रेवणकर यांनी सुचवले आहे. यामध्ये खासगी प्रवाशी बस स्टँड, एसटी महामंडळ, बसस्टँड, रेल्वे स्टेशन, ट्रक टर्मिनल यांचा समावेश करण्यात यावा, असे त्यांचे मत आहे. प्रादेशिक आराखडा निश्चित करताना या बाबींचा विचार करण्यात यावा, याबाबतचे पत्र जिल्हा प्रशासनाकडे तसेच प्रादेशिक योजनेच्या नगररचना कार्यालयास देण्यात आले आहे.
....
शहराच्या तसेच जिल्ह्याच्या वाहतूकविषयक सुविधांसाठी २२ शिफारशी केल्या आहेत. शहरासाठी रिंगरोडबरोबरच अवजड वाहनांसाठी वाहनतळ आवश्यक आहे. त्यामुळे शहरातील बहुतांश अवजड वाहतुकीचा प्रश्न संपुष्टात येऊन अंतर्गत वाहतूक सुरक्षित होईल. त्याबरोबरच स्टँड, रेल्वे स्टेशन, केएमटी टर्मिनल विविध ठिकाणी विखुरण्यापेक्षा एकाच ठिकाणी करण्याचा प्रयत्न झाला तर नागरिकांसाठी सोईस्कर होईल. त्यातून शहरातील अन्य रस्त्यांवर येणारा ताण कमी होईल.
विनायक रेवणकर, सदस्य, दळणवळण अभ्यास गट समिती, प्रादेशिक आराखडा
....
आणखी काही शिफारशी
गारगोटी, शिवडाव, आश्रमशाळा मार्ग गरजेचा
तालुक्यांना जोडणाऱ्या रस्त्यांची १० किलोमीटरने रुंदी करावी
जुळे कोल्हापूरसाठी जमीन उपलब्ध करुन देण्यात यावी
गगनबावडा मार्गाचे चौपदरीकरण
गडहिंग्लज ते वेंगुर्ला मार्ग राष्ट्रीय महामार्ग करावा
करुळ घाटात दरी पूल मार्गाचे सर्व्हेक्षण करावे
मोबाइल अॅप डाउनलोड करा आणि राहा अपडेट
